احلام وردية برئاسة الجمهورية

يحتوي على كل أنواع القصص والأحداث الواقعية الشخصية .

المشرف: بانه

أضف رد جديد
هاشم الرزقابي
مشاركات: 396
اشترك في: الثلاثاء 2009.1.6 8:16 pm
مكان: السودان

احلام وردية برئاسة الجمهورية

مشاركة بواسطة هاشم الرزقابي »

هاشم الرزقابي


‏6 نوفمبر‏، الساعة ‏06:51 مساءً‏ ·






احلام وردية برئاسة الجمهورية
هاشم عوض الكريم رزق
قيل ان الاحلام او الرؤيا هي انعكاسات لما ظل مختزن بالعقل الباطن وما يعايشه الانسان في حياته اليومية من خواطر وانفعالات فيختزنها ثم يعيد اجترارها واستعراضها في منامه
ولكن قد يكون ما يراه النائم ليس رؤيا ولا حلما وإنما هو حديث النفس وتطلعاتها وهو مايسمى:بأضغاث الأحلام وهو عبارة عن أحداث في الذاكرة و العقل الباطن يجترها الانسان أثناء النوم كما هنالك (احلام اليقظة)او مايعرف بالتطلع للأفضل.
في حديث للبخاري يقول معناه ان (الرؤيا من الله والحلم من الشيطان فإذا حلم أحدكم بحلم يكرهه فليبصق عن يساره وليستعيذ بالله منه فلن يضره)
والذي يقع عليه التحقيق أن الرؤيا الصالحة كما جاء انها جزء من ستين من النبوة وذكر في معنى الحديث الشريف انها بشارة للمؤمن ،وقد ذكران بن سيرين هو امهر من اشتهروا بتفسير الرؤيا والأحلام. قيل جاءه رجل فقال له لقد رأيت في منامي انني آخذ البيض وأقشره ثم أكل البياض وارمي الصفار فقال له ان صدق منامك فأنت نباش قبور وقد كان كذلك! ومهما يكن من تقارب بين الرؤيا والأحلام. تبقى هي انعكاسات لما يختزن (بدسكات )العقل الباطن ليجترها الانسان في منامه بعد هذه التقدمة...
دعنا نقرأ ذلك مع الاخ المغترب صاحب الاحلام الوردية (rose dreams) الذي لا اشك انه سيحتاج الى ابن سيرين هذا العصر حتى يفسر له احلامه..فان صدقت فنحن نطالبه بنظرة خاصة للمغتربين خاصة فيما يختص بالجبايات والإتاوات المتعددة على المغتربين ومنع دخول السيارات بموديلات متأخرة وال( digital receiver) والتشدد في جبايات الجمارك حتى طالت المتاع الشخصي .
يقول الراوي انه استيقظ من النوم مذعورا على جرس المنبه وكان قبله قد رأى فيما يرى النائم مجموعة من الاخوة السودانيين حضورا في منزله وبعد الترحاب وتقديم واجب الضيافة تحلقوا حوله يعرضون عليه ترشيح نفسه لرئاسة الجمهورية !!يقول بعد سماع ماقالوا بداية كنت اعتقد انهم يمزحوا ولكن عندما ادركت جديتهم وإصرارهم جال بصري ثم ارتد الي ثانية وأنا لا استوعب مايقولون! حيث دار نقاش مستفيض خلاصته في الاتي.
يا ابو اشرف نحن اجمعنا على ترشيحك لرئاسة الجمهورية حلقت فيهم مليا ثم قلت يا اخوان رئاسة الجمهورية (حته واحدة)والله انتو بتبالغوا! انتو مجانين ولاشنو؟ يمكن انتو غلطانين في التسمية قولوا رئيس رابطة رئيس جالية ..يااخي قلنا ليك رئيس جمهورية السودان ..يا اخوانا بطلوا المزح. اولا انا عمري ماانتميت لي اي حزب سياسي حتى عندما كنت طالب،ثانيا انا ماعندي اي طموحات سياسية او رئاسية ثالثا كان تخلوها مقبولة شوية كأن تقولوا رئيس للجالية او نائب برلماني ممثلا لشتات المغتربين بالخارج او والي ولاية مثلا يمكن تكون مقبولة اما رئيس جمهورية دا بصراحة ما ممكن!وما داخلة في دماغي!ولا بقدر عليها وما مؤهل ليها من الاساس ياخي اسمع حسب منطوق المادة (37)من الدستور انت مستوفي لكل الشروط المؤهلة للرئاسة سوداني الجنسية سليم العقل مكمل اربعين سنه غير متهم او مدان في جريمة مخلة بالشرف او الامانة وبتعرف تكتب وتقرأ ودي كل الشروط المطلوبة في الرئيس . يا اخوانا الموضوع ما موضوع دستور وقانون وخلافة؟اولا انا لي مدة طويلة ما مشيت السودان ولا مقيم فيه اقامة دائمة ا وحتى منتظمة يعني يادوبك الاجازة في حدها الاقصى لا تتجاوز شهرين بعد كل سنتين او ثلاثة وفي بعض الاحيان قد تمتد لأكثر من ذلك بالتالي المرشحين الاخرين هم احق مني لأنهم مقيمين ومعايشين الاوضاع في السودان ومواكبين لكل الاحداث يااخي الحته دي ما وارده في الدستور ولا من شروط الاهلية للترشيح ولا يوجد نص في الدستور ينص او يلزم المرشح بان يكون مقيم في السودان.المهم موطن سوداني مؤهل وأنت كذلك. يا اخوانا انا الكم مليون جنيه رسوم الترشيح اجيبا من وين ؟ثاني الناس البزكوني للترشيح من الولايات ديل القاهم وين؟ يااخي نحن متكفلين بي كل نفقات الترشيح والتزكية والدعاية والإعلان وأي منصرفات اخرى ،وبعدين حكاية تزكية الولايات محلوله ما جميع ولايات السودان ممثلة في قطاع السودانيين العاملين بالخارج هذا اذا افترضنا على النطاق الولائي وإذا افترضنا على النطاق القومي فالسودانيين منتشرين (بالكوم) على نطاق العالم عندك امريكا وكندا واستراليا بس فيهم قريب المليونين بخلاف المهاجرين في فيجي وبريطانيا وكوريا والصين والهند وهولندا وسنغافورة يااخي انت ماشي بعيد ليه السودانيين في مصر ودول الخليج لوحدهم يفوزوك وبالتزكية كمان !.يا اخوانا انا اترشح باسم ياتو حزب؟ يااخي دي مشكلة؟دعنا نقول حزب الشتات السوداني بدول العالم فهو اكبر من احزاب ألامه والاتحادي الديمقراطي والمؤتمر الوطني او الشعبي .. يا اخوانا انتو مالقيتوا زول غيري انا ؟ ترشحوه؟مالكم دايرين تقصروا عمري وتودوني في ستين داهية هو انا ناقص ؟ ماعندكم مثلا الاخ مؤيد زول حركي وكمان اسمو ذاتُ اعلامي يصلح للهتافات مثل (لانؤيد غير مؤيد)نحن نريد رئيسنا مؤيد ايدناك يامؤيد سير سير يامؤيد او عندكم اخونا ازهري ما برضو بيحمل اسم الزعيم الخالد وأبو الوطنية ودا في حد ذاتُ بخلى الناس يرشحوه وينتخبوه ويفوزه بالتزكية كمان عندكم اخونا عادل اسمو موسيقي وجميل ويصلح للهتافات وتصدر النشرات الاخبارية ذي اصدر السيد عادل وصرح السيد عادل وهنالك الطريفي وقاسم بلال ذي ابوكم مين قاسم بلال ريسكم مين قاسم بلال الاسماء دي كلها لامعة ومواكبة.ولا انتو دايرين امشي ليكم السجن وتمشوا انتو القصر والسوق! قديمة العبوا غيرها شوفوا ليكم زول ثاني غيري انا حسه مرتاح 24 قيراط وحر طليق اتجول في الطرقات وامشي في الاسواق ذي مادائر اتجول علي كيفي وأسافر على عينك يا تاجر في اي زمان ومكان مالكم دايرين تقيدوا حركتي وتحددوا اقامتي وتدخلوني سجن اختياري الواحد لو دائر يحلق راسُ الحلاق لازم يجيهو في القصر مالكم دايرين تحرموني من الحرية الانا فيها دي.الواحد لو داير يزور اهلو لازم يرافقوbodyguard) ).يااخي انت ستصبح رئيس الجمهورية يعني اخر عظمة وآخر ابهه عربية بي بوارق ومواتر يمين وشمال وحرس قدام وراء ورحلات للخارج علي كيفك ولقاءات ومؤتمرات وصحافة وتلفزيون وقنوات فضائية لو داير تمشي بحري تلقى الطيارة جاهزة ولو داير تقلع ضرسك الطيارة جاهزة المانيا ولا بريطانيا! يا اخونا رئيس جمهورية دي ما حاجة ساهله ذي ما بتتخيلوا خاصة في بلد ذي السودان فيه مشاكل تشيب الراس وتقصر العمر عندك مثلا الحروب الاهلية في دارفور وجنوب النيل الازرق ثاني المشكلة الاقتصادية والفجوة الغذائية الطاحنه رغم كمية المياه الما قادرين نستفيد منها وأكثر من نصفها مستفيدة منه مصر برغم الاراضي الخصبة البكر المالاقية مدخلات انتاج زراعي والأيدي العاملة المدربة المنتشرة في دول العالم بجانب هجرة العقول المطردة الخلت الاطباء يخرجوا بي فيزه تربية مواشي ومشاكل الفقر والمرض والعطالة المتنامية سنويا ومشاكل ال...يا اخونا اعفوني من المهمة دي..ياابو الرجال كلها مشاكل محلولة بمرور الايام ماهو الرؤساء الكانوا قبلك مرشحين تاني وثالث يعني هم عملوا شنو؟عشان نختارهم تاني!على العموم نحنا ماحنقصر معاك وحنقدم ليك الدعم المادي والمعنوي بس انت وافق اهـ قلت اشنو؟ طيب يا اخوانا ادوني فرصة اشاورالمدام السيدة حرمنا .. يااخي مدام شنو وحرم منو؟انت من ناس الراية ولا اشنو؟ يا اخوانا مابرضها حتكون السيدة الاولى حرم السيد رئيس الجمهورية اللهو سيادتنا وستنطبق عليها كل البروتوكولات الرئاسية ..طيب خلاص روح شاورا بس بي سرعة عليك الله. يقول الراوي دخلت على السيدة حرمنا المصون ودار بيننا الحوار التالي.
اسمعي يامدام الجماعة القاعدين في الصالون ديل قالوا دايرين يرشحوا سيادتنا رئيسا للجمهورية وهم مصرين على ترشيحي وقالوا هم متكفلين بكل النفقات والمصاريف الخاصة بالانتخابات وقلت اخذ رائيك ما برضو ماانت شريكة حياتي اهـ قلتي شنو ؟(اجي)رئيس جمهوريه وين يعني؟وين يعني في الفلبين! مافي السودان انتي مابتقري جرايد ولا بتسمعي اخبار التلفزيون والاذاعه وكل القنوات الفضائية بتتحدث عن انتخابات السودان (انت فاضيه من متابعة الافلام التركية والمصرية )قنوات السودان في تلفزيونك دا مافي؟
لابس قايلاك داير تترشح في امريكا باقي الايام دي سامعه في القنوات الفضائية ذي قالوا باراك اوباما داير يترشح لي ولاية تانية. ماهو برضوا متابعة ماشاءالله ايشمعنى ماسمعت اخبار انتخابات السودان قنوات فضائية قالت! ياوليه نحن مالنا ومال امريكا واوباما اقولك انتخابات السوداااان. اهـ قلتي اشنو؟اسمع ياابو اشرف الجماعة ديل لو بيخلوك تباشر عملك من هنا وتدير شئون البلاد من ارض المهجر ولا كمان نقيم شهر هنا وشهر في السودان يعني تعمل خروج وعودة متعددة المرات ماعندي مانع موافقة لكن تقولي نروح نستقر في السودان (بري)مالنا ومال الجهجهة نقوم نقطع مصالحنا بي هنا ونلقي اقامتنا وباكر بعد باكر ينط عقيد ولا عميد يقلبه ويستلم السلطة ونروح نحنا شمار في مرقه (بري)روح ياراجل اعتذر ليهم خليهم يرشحوا واحد غيرك! بدل مانندم ونتحسر ذي المعتمد بن عباد صاحب اشبيلية بعد ان استولى تاشفين على ملكة وسجنه فقال قولته الشهيرة عندما دخلن عليه بناته وهو مسجون.
فيما مضى كنت بالأعياد مسرور
فجأءك العيد في الاغماد مأسور
ترى بناتك في الاطمار جائعة
يغزلن للناس ما يملكن قطمير
يطأن في الطين والأقدام حافية
كأنها لم تطأ مسكا وكافور
افطرت في العيد لاعادت إساءته
فكان فطرك للأكباد تفطير
قد كان دهرك إن تأمره ممتثلا
فردك الدهر منفيا ومأمور
من بات بعدك في ما لم يسر به
فإنما بات بالأحلام مغرور
يقول الراوي بعد هذه الابيات التي تلتها السيدة حرمنا المصون عن المعتمد بن عباد صاحب اشبيلية رجعت للجماعة وقلت ليهم يا جماعه والله بصراحة الموضوع دام ما داخل دماغي ابدا ثم انو.علي الطلاق..وقبل ان يكمل جملته يرن جرس المنبه مؤذنا بقرب صلاة الفجر ليستيقظ السيد مرشح الرئاسة مذعورا فيظل يبسمل ويحوقل ويقول اللهم اجعله خير اللهم اجعله خير فتستيقظ السيدة الاولى حرم السيد المرشح يا راجل قول بسم الله مالك ؟ بي تبسمل وتحوقل ؟ كابوس ياوليه كابوس حلم مزعج كلُ من عشاك التقييل المتأخر دا .....
صورة العضو الرمزية
الماسة الخماسية
مشاركات: 5439
اشترك في: السبت 2010.4.3 2:09 pm
مكان: مكان

رد: احلام وردية برئاسة الجمهورية

مشاركة بواسطة الماسة الخماسية »

هههههههههه

راقتنى تلك الاحلام الوردية بمقدمة منك تثقيفية

وسرد موضوعى ساخر ماهر لكل أحداثنا الواقعية

ثم خاتمة ذات منطق ولطافة دليل على شخصية واعية راقية وكذا فكاهية

سلمت أياديك _ هاشم _ ولعلها آخر الاحلام الكابوسية _




هاشم الرزقابي
مشاركات: 396
اشترك في: الثلاثاء 2009.1.6 8:16 pm
مكان: السودان

رد: احلام وردية برئاسة الجمهورية

مشاركة بواسطة هاشم الرزقابي »

هههههههههه

راقتنى تلك الاحلام الوردية بمقدمة منك تثقيفية

وسرد موضوعى ساخر ماهر لكل أحداثنا الواقعية

ثم خاتمة ذات منطق ولطافة دليل على شخصية واعية راقية وكذا فكاهية

سلمت أياديك _ هاشم _ ولعلها آخر الاحلام الكابوسية _




,وسلم مرورك الاجميل يديك العافية
أضف رد جديد

العودة إلى ”سيناريو وأحـداث“