شواكيش حسب التخصصات الجامعية

أضحك بمزاج سودانى 100 فى الميه

المشرف: بانه

أضف رد جديد
صورة العضو الرمزية
ميرفابي
مشاركات: 2865
اشترك في: الخميس 2015.1.15 10:56 pm
مكان: بين الخرطوم وبورتسودان

شواكيش حسب التخصصات الجامعية

مشاركة بواسطة ميرفابي »


كلية طب الاسنان
من يحصل تسوس بالشكل ده في حياتنا يا بتول ...لازم نقلع اسباب التسوس من جذوره... التخدير الموضعي لآلمنا ما بحل المشكلة...ومحاولة التقويم فشلت معاك للاسف..ودايما بتركبي لي ضرس ما ضرسك..عشان كده الجسر امتد وزاد بيناتنا ...وقدر ما حركت فكي معاك برضو مصرة تجيبي لي التهاب في اللثة ...انتي بقيتي حشوة مؤقتة لقلبي وانا محتاج حشوة دااااااااااااااايمة



كلية علوم التغذية
بتول انتي سببتي لي تسمم في حياتي ..وعلاقتنا دي ناقصة فايتمين.. ولازم تنتهي لأنو الاستمرار فيها غير صحي على الاطلاق
وبعدين انا زهجت من المحاولات الفاشلة لتعقيم علاقتنا.. و زهجت من تطهيرك لجروحي القديمة...وبقى عندي عسر في هضم شخصيتك...حتى شهيتي للونسة مع البنات اتسدت
كفانا مواد حافظة يا دي

كلية هندسة الجينات
بتول ...انتي عارفة انو جيناتك هي السبب؟!!...ضعف المناعة العاطفي موروث في عيلتك... أنا آسف بس أحماضنا النووية ما بتتفق ولازم نتحلل....وكلو كروموسوماية تمشي جهة
وكلو نواة تطلع خليته

كلية هندسة النســيــج
بتول الخيوط البتربط بيناتنا مالا بقت ضعيفة ؟ و أن كم مرة حذرتك من الغزل الماليهو حد ..... الدبلة تلقيها في الشباك .... و الألوان الصارخة الفي القماش دي بتعني انفصال
يلا خلااااااااص الا أديك دفـــرة


كلية علوم الطيران
بتول ....يؤسفني اقول ليكي اني دقيت ليكي خروج نهائي من حياتي... اعمل شنو ياخ؟...انتي عارفة انو مكنة الحب بتخرب عاجلا ام آجلا..وبعدين انا زول درجة اولى وانتي يا دااااااااااب درجة الأفق
انا وانتي طيارتنا وررررررررر اقلعت ...ما تخلينا نهبط هبوط اضطراري برة مدرجات الحياة


كلية الموسيقى و المسرح و الدراما
اسمعيني يا بتول انا بحبك مووووووووووووت ومتمني أعرسك الليلة قبل بكرة...اها نمشي نشتري الشبكة متين؟
رأيك شنو في الدور ده؟...ما انفع ممثل يا بتول ؟
اسمعيني يا بتول ...بصراحة السيناريو بتاع حبنا ده فيهو خروج عن النص...حياتنا بقت نشاز...وانا بفتكر اننا لازم نفكر في الحوارات البتدور بيناتنا على مسرح الواقع.... ولازم نعزف عزف انفرادي كلو واحد براااااااااااااااهو.. فهمتيني مش؟؟
هاااااا؟؟...لأ المرة دي انا جاااااااااااااااااااادي....تمث يل شنو يا دي؟
ما تفهمي ياااااااااااخ ..الا ألحن ليك كلامي ده ؟


كلية هندسة الاتصالات
بصراحة يا بتول انا كنت قايلك في السلك...لاكين طلعتي موبايل بلا بطارية... انا وانتي لازم نقطع اتصالاتنا ببعض..انتي مرات مشغولة...ودايما مقطوعة ..المسافات بيناتنا زادت...ومشاعرنا بقت مشوشة لأنو عواطفنا للأسف بقت لاسلكية
ياخي باختصار...حبنا طلع برة الشبكة


كلية الهندسة الزراعية
عارفة يا بتول ؟...الحب ده بذرة دايرة ليها تربة ممتازة...وموية نضيفة...واضاءة كافية شان تنمو...وانت للأسف تربتك ما نضيفة وماااااااااااااااالحة تب... و مويتك ما ارتوازية....وكان لازم نحصد الفشل في علاقتنا دي..خلينا من التفرع في المواضيع الغير مورقة....علاقتنا اصيبت باليرقات وانتي للأسف استخدمتي المبيدات العاطفية من غير ما تكلميني..بعدين بصراحة انا خايف انو براعمنا في المستقبل يطلعو زيك كدا


كلية علم البصريات
بتول انتي عارفة اني زول عندي بعد نظر..وشايف اننا ما بننفع لبعض...اقول ليكي أنا ما قادر اكمل.. حاكتب كلامي على ورقة...ركزي معاي وحاولي تقري الحروف دي
i

h
a
t
e

u

أها غمضي العين الشمال...وافتحي اليمين...قريتيها؟ ...... كلك نظر يا بتول


كلية علم الكيمياء
شوفي يا بتول لمن تحصل أكسدة بيناتنا ده معناتو اني قلوي...وانتي حااااااااااااااااااااااامضة ..انتي زمان كنت فلذة كبدي...لاكين انا بطلت أطلع مع اشباه الفلذات.. وبعدين القال تتفاعلي كدة منو؟...انتي ما عارفة انو التفاعلات العاطفية بتحول محلول المشاعر الى محلول لا لون له ولا رائحة؟
الحكاية دي فجرت معمل حبنا للأسف ...وبعدين انا اكتشفت لي عنصر مشع...وما مستعد اخليها عشان عنصر خامل زيك انتي


كلية علم الاقتصاد
عارفة يا بتول ...المشكلة ومافيها انو حصل ركود لمشاعرنا....والاسعار العاطفية انخفضت...حتى أسهم القلب بقت بمعدل سهم واحد لكل 100 نبضة....وبعدين البضاعة العاطفية ما لعبة ياااااااااااخ
انتي مش عارفة انك حسب قانون العرض
والطلب لمن تزيدي في كمية الحنان ممكن يحصل نقصان في سعر العاطفة؟


كلية الآداب قسم علم الآثار
بتول اسمحي لي انك تحفة مزيفة....الجكس كلهم تحف عتيقه و نادرة الا انتي.. ما عندك غير فك الرموز بالطريقة التعجبك...تنقبي عن المشاكل تنقيب...وبعدين انا وانت اساسا حضاراتنا مختلفة من البداية...وافتكر حقو ندفن البيناتنا بعد ده.... هووووووووووي مالك بتعايني لي كدا...ما فهمتي؟...ليــــــــــــه أنا بتكلم لغة مسمارية ولا شنو؟...شنو لعنة الفراعنة الانا اتبليت بيها دي


كلية شواكيش بتخصصات جامعيةالفيزياء قسم العلوم الفلكية
اسمعي يا بتول انتي ما لاحظتي انو سنتنا الضوئية مرت بسرعة؟
يا بت الحلال الشمس والقمر ما بتلاقو في سما وااااااااحدة...يعنى
باختصار نجم حبنا أفل... وبعدين انا كنت قايلك مجرة مختلفة عن باقي المجرات...كنت قايل ما ليك زي في الكون...طلعتي ثقب اسود في حياتي...وانا بالشكل ده ح الف معاك مدارات الحياة من غير اي هدف
أفتكر كلامي واضح وضوح كوكب الزهرة الساعة 4 الفجر


كلية علوم البحار
اسمعي هنا ده... مركب فيهو قبطانين بغرق عديـــــــــــــــــــــــــــ ــــــــــــــــــــ ـل كدة....وبعدين انتي ما ملاحظة اننا دايما ماشين عكس التيار؟...وانو أمواج الحياة بترزع في مركبنا ده يمين وشمال من غير اي سبب...انت ليــــــــــــــــــــــه مصرة تغرقيني معاك يا بتول ؟... ياخي انا زهجت من المد والجزر الحاصل لي بسببك
يلا بعد ده نزلي شراعك من حياتي ...واقطعي خطافك عني البحر ملاااااااااااااااان اسماك

كلية المختبرات الطبيـــة

يابتول بما ان النتايج بتاعة التحليل بتاعتنا طلعت مختلفه تماما واي واحد مننا فصيلة الدم بتاعتو مابتتفق مع التاني يعني يابتول لو انتي بوظتف بطلع انا نقتف والعكس المهم يابتول دايرك تعرفي ان لازم اي واحد فينا اعمل تحليل لدمو في معمل براهو.......
صورة العضو الرمزية
ود الخير
مشاركات: 11370
اشترك في: الخميس 2009.4.30 11:51 pm
مكان: جده

رد: شواكيش حسب التخصصات الجامعية

مشاركة بواسطة ود الخير »

كليه الحياه الجميله
شوفى يا قصه كان ماقرينا بارينا الطلبه
تانى توبه لا ريد لا غرام لا خطوبه عرس بس(زى ما قال محمد الامين )
زيتك وبصلك ودقيقک وكل يوم ارقعك بمسكول
اها على بركهالله ولى ندور. يااااااا
صورة العضو الرمزية
بانه
مشاركات: 11781
اشترك في: الأحد 2012.10.14 7:37 pm
مكان: ارض الله الواسعة

رد: شواكيش حسب التخصصات الجامعية

مشاركة بواسطة بانه »

ههههه :yar:
الحمد لله تخصصي هنا مافيش banana.gif banana.gif
صورة العضو الرمزية
ميرفابي
مشاركات: 2865
اشترك في: الخميس 2015.1.15 10:56 pm
مكان: بين الخرطوم وبورتسودان

رد: شواكيش حسب التخصصات الجامعية

مشاركة بواسطة ميرفابي »

[quote="بانه"]ههههه :yar:
الحمد لله تخصصي هنا مافيش banana.gif banana.gif
[/quote]
2323 23 2323 23
الحمد لله

صورة العضو الرمزية
waya
مشاركات: 14068
اشترك في: السبت 2007.8.11 11:15 pm
مكان: على سفر

رد: شواكيش حسب التخصصات الجامعية

مشاركة بواسطة waya »

.. ..ﺍﺳﺘﻴﻢ ... ﻭﻋﺪﻡ ﻣﻔﺎﻫﻴﻢ
..ﺭﺿﻴﻨﺎ ﺑﺎﻟﻬﻢ ... ﻭﺭﻛﺒﻨﺎ ﻳﺎ ﻋﻢ
..ﻗﻄﺎﻃﻲ ... ﻭﻣﺴﺘﻮﻯ ﻭﺍﻃﻲ
..ﺷﺮﺑﺘﻮ ﺷﺎﻳﻴﻨﺎ .... ﻭﻧﺴﻴﺘﻮ ﺃﺳﺎﻣﻴﻨﺎ
..ﻓﺘﺮﻧﺎ ﻣﻦ ﺍﻟﻜﻮﺍﺭﻉ ... ﻭﻧﻮﻡ ﺍﻟﺸﻮﺍﺭﻉ
..ﺗﻔﺎﺡ .. ﻭﻗﻠﺒﻚ ﻣﺮﺗﺎﺡ
..ﺳﻴﺒﻚ .. ﻭﺭﻭﺡ ﻟﻲ ﻧﺼﻴﺒﻚ
..ﻭﺑﻲ ﺟﺎﺯﻙ ..ﺷﺘﺎﺕ ﻳﺎ ﻭﻫﻢ
"""""
ﺳﺖ ﺷﺎﻱ ﻣأخدة شاكوش
أضف رد جديد

العودة إلى ”منتدى النكات والفكاهة“