[frame="1 80"]بسم الله والحمد لله والصلاة والسلام على رسول الله
اما بعد
اخوانى واخواتى ومشرفى منتدانا الغالى انا سودانى _ ذلك المنتدى الذى يسمعنا فى وقت قررنا انا نبوح له بشى _ المنتدى الذى لا يعاتبنا لغيابنا وهجراننا اليه بل دائما نجده مستقبلا لنا بذراعين مفتوحين وبلهفة لاحضاننا
[frame="7 80"]يا ولد يا ولد بانقا قوم على حيلك الساعه بقت سبعه قوم شوف مدرستك _ امممم هاااااااااااااااه اتشهق
واقوم بانقا اصنقر على حيلو فى العنقريب وانوم تانى _ الام تقش فى الحوش وتجى لافه بى مقشاشتا انت نمت تاانى
يا ولد بانقا قوم تقوم قيامتك شوفو الولد المقيصيف دا _ والله اصلك بالمقشاشه دى اخلى بطنك وضهرك واحد
يا ولد قوم
بانقا اخيرا قام الشنطه رميت امس شال الشنطه وفى كراس واقع بى ضهر العنقريب شالوا دخلوا فى الشنطه
ولبس قميصو المكرفس ومشا المدرسه .
طابوور صفا اااااانتباه العليهم البرنامج سنه كم ؟؟ الاستاذات شايلات سيطانن وواقفات فى الطابور
والمدير بى نظارتو واقف هنااااك
بانقا جاء داخل منسرق بى نص الطابور _ تعال تعال بى هنا مع المتاخرين ديل _ جابوهو مع حمد وفهيمه
وعباس وكل واحد انجلد ليهو تلاته سيطان فى ايدو
حكاها بانقا ودخل الفصل
المهم عمنا خير السيد ابو بانقا جاء من الغابه وهو شغال اعمال حره يوم انزل تراب من لورى وامش ارفع وانزل طوب اها اليوم داك مافى زول جاهو من اسياد اللوارى مشا شال فاسو وجاب ليهو حطب فى الحمار
ودا شغلو بس مبسووط وحامد ربو على باب الكريم
يا حاج خير السيد اخوى مااا كبرت على شغلتك دى ( صاحبو حاج التوم بهظر معاهو ) فى ضل النيمه الضابحين فيها عتود
والله يا التوم نحن صابرين وريسنا قال فى بترول فى الجنوب طالع سمع اضانك يا خير السيد باقى لى سمعك تقيل ها زول حرم من خشم الرئيس البترول جاى وبنصبر مانا فاحين خشمنا دا تب فرحتنى والله وليداتنا الاستشهدواء ديل ما خساره ان شاء الله فى الجنه امين والله هسى ود الطيب البقرا فى الخرتوم دكتره صحى مشا الجهاد ها زول كلهم مشو ود حامد اخوى مشا امس ضربلنا قال فى جوبا هع عفيت منهم الله انصرم ديل اياهم الحارسين بلدنا وشبر ما بفرطوا فيهو
بانقا لملم حقيبتو ومن اول وقمصانو والكتب والحاج اداهو قريشات والحاجه برضو مرقة المحفظه وادتو واتوكل مشا اسكن مع ناس بت المنا المرا الطيبه وحنينه بانقا ولد ذكى جددا وشاااطر بس الظروف ما كانت مساعداهو كان دايما ساقط فى الكيميا والفيزيا والرياضيات بى ذكاهو بنجح فيها دقا الباب وفتحت ليهو حاجه بت المنا زاااتا وقلدتو قلده قووويه وجرتو لى جوه دخل خجيلااان هو زول حساس حبتين وجابو ليهو عصير وانبطح البيت سمح شدييد فى المدينه والملايات طاووس ومفرشااات وكل شئ بنظام ختا الشنطه جنب سريرو وجوهو الاولاد قعدو معاهو وسلموا عليهو واتونسوا معاهو لكن البنيات ما جن سلمن اخد ليهو نومه كاااربه لا جرا ملايه ولمن اجى انقلب بخاف اخرب الملايه المهم بعد المغرب جاتو الحاجه وانت مااا غريب يا ولدى انت زى ناس اسامه البيت بيتك والاوضه دى اقعد فيها واهتم بى قرايتك اااو لدى امك دى تعبت فى تربيتكم وابوك شقيان فى دربكم دحين ااوليدى شد حيلك والمدرسه قريبه البتقرا فيها دى انت مش مع ناس حامد ود الطيب ؟ قال ليها اى يا خلاص من هنا ما بعيده بتمش وتجى شالت الشنطه وختتا فى الدولاب وجابت ليهو بطانيه وكباية حليب ساااقطه ومشت ما قصروا معاهو تب ناس بت المنا ويا دوووب ارتاح بانقا وبقا احضر الحصص تمااام اها عمك التاجر راجل بت المنا دا برضو عندو بيهم قرابه قال ليهو يا ابنى المدارس اصبحت ما بتهتم وانا مستعد اقريك فى معهد دكتور صلاح فيهو اساتذه ممتازين وانت ما بفرزك من ناس اولادى مشا دفعوا ليهو الرسوم حقت المعهد واتحول هناك القرايه على مستوى عالى ومختلطه بنات ظراااف وسمحااات وبت اهلو السكن معاهم بقت ترجيهو الهدوم مغسلات ومكويات ومريحات كمان فى الدولاب البس ونفسياتو ما شاء الله وبقا استوعب ووفروا ليهو طربيزه ومعاها الكرسى اذاكر بالليل وبانقا اجتهد ما بنوم الا حبه اوول باول اذاكر واصبح نجم الفصل فى المعهد بالمشاركات وحل المسائل المعقده وقبل كل بداية حصه اطلعوا مسائل وكل الطلاب بجتمعوا عشان هو اشطر واحد واذكى واحد.
بانقا جاء العصريه كدا اتفرج على ناس الكوره سلام عليكم وين يا فرده وكيف يا معلم لقا واحد من اولاد الجيران قعدو اتفرجو فى الكوره واتونسو اها قال ليهو شايفك لابس دموريه وحالق صلعه دا معسكر شنو ؟ والله يا بانقا معسكر شرطه شعبيه تمام والله بالعصر بس؟ قال ليهو ساعه واحده بالعصر بس اها وبخرجوكم وبدوكم رواتب وبتليسوا كاكى ؟ قال ليهو اى مدة شهرين وبخرجونا بس وطوالى بنشتغل اهااا بانقا الفكره وقعت ليهو خااصة انو بحب العسكريه قام مشا ليهم وصاحبو وصاهو ما يقول طالب سجل وبدا ادرب بالعصريات مع قرايتو شهرين وفعلا ودوهو الاستاد واتخرج مرابط شرطه شعبيه خريطة السودان كااااامله من حلفا لى نمولى مرسومه فى كتفو امش وايان ليها وفخور بى وطنو مليون ميل مربع وزعوهو قسم شرطة اها اشتغل كم يوم بس فى القسم ومشا لى رئيس القسم يا سعادتك انا طالب شهادة ودايرك تفرغنى جزئى عشان اكمل والامتحانات قربت قال ليهو يا ابنى نحن زاااتنا كايسين للبقرو ديل والشرطى المتعلم دا هدفنا من الليله انت مفرغ للقرايه ما عليك الا تشيل يومية الحوادث دى توديها للقسم الاوسط كانوا بجمعوا يوميات الحوادث للقسم الرئيسى دى اصبحت مهمة المرابط بانقا اجى دقائق اشيلا واوصلا الاوسط واغيير الكاكى والبس ملابس المعهد وواصل قرايه
التلفزيون وبرنامج فى ساحات الفداء والحرب فى الجنوب الشغل الشاغل للشعب السودانى والاناشيد الوطنيه الجهاد نادانا لى جنان رضوانا __ اماه لا تحزنى فالحافظ الله __ على خطا الشهيد خطوة بخطوه __ قول للداير شبر فى بلدنا __ جبنتا فى المتمه لا بتقدر عليها لا بتوافى شروطا _ والرئيس البشير يلقى خطاب كله رجوله وقوه وتحدى ويغنى له محمد بخيت وشنان ويرقص بعصاه ويرقص معه الشعب السودانى
كانت الاجواء مليئه بالوطنيه وزولنا الولد المجتهد بانقا الطالب المرابط دخل جو الامتحانات خلاااص واتفرغ كليا من الشرطه واصبح ليل ونهار فى المذاكره والزول دا حتما بجيب الطب ولا الصيدله حتى دا راى الاساتذه
قرار جمهورى صدر قبل الامتحانات بشهر (( اى طالب لابد من دخول معسكر خدمه وطنيه شرط عشان اخش الجامعه واى طالب ما بخش معسكر بتم حجب النسبه حتى ))) عادى انا اصلا شرطى وعسكرى ما بهمنى القرار دا ابو بانقا جاى بالحمار مليان حطب وجلابيتو مشرطه ووسخانه داخل الحله ودكان الحله يا حاج بعد دا كبرت هههههه عمك على سيد الدكان ما كبرت انت الخات عنقريبك فى خشم دكانك والبجى كلو بتقول ليهو شيل تعال كدى خبرك شنو وخبارك بقيت تتمسا (تتاخر لحدى المساء) والله بانقا ولدى بدورلو رسوم امتحانات بدور ارسلا ليهو اها اخوى عر ككككك نهر حمارو وفات بانقا يومى حق الفطور بكون ما عندو وما بحب اشيل من زول وعارف ظروف البيت
طلع جدول الامتحانات خلااص والموضوع دخل فى الجد الاسبوع الجاى اول جلسه والمذاكره لحدى الصباح وبانقا شايل المذكره واقرا والقلب دقاتو زادت وكل طالب تحت شجره ودخلوا الامتحانات كيف الشغل يا بانقا دايما بتلاقيهو بت اهلو الجميله الرائعه بعد كل جلسه والله تماام يا سلمى تحمد الله معاهو وتجيهو وهو اذاكر تجيب ليهو سيرمس شاى الحليب وجك العصير ومحتاج حاجه شكرا ما قصرتى اى دا كلو دين عليك عشان بعد تتخرج دكتور اول مرتب لى ولا حتعمل نايم ههههه ابشرى من خشمك لباب السما لا ما بحصل وما بنسى وقفتك دى طول عمرى وقفت شنو ياخ ما تكبر الموضوع انت مننا وفينا يلا هووى تصبح على خير ما تقول انا حميتك تذاكر وانتى من اهلو بانقا زول مادب ومحترم وود ناس لكن برضو حساس والبت جميله جدا وذوق ودمها خفيف وكان بانقا بتشووق لسؤالا بعد الجلسه اشتغلت كيف الليله ودايما كان ردو الحمد لله لانو فعلا ذكى واجتهد وفعلا غلطاتو بسيطه جددا
بعد بكره اااخر جلسه وكالعاده سلمى تدق الباب دقات خفيفه بانامل رقيقه واحساس مرهف جميل مرحبا تخت الشاى والذلابيه وتكب الكبايه الاولى فى كبابى زااتا رووعه وتقعد فى طرف السرير هسى يا بانقا دى اخر جلسه ليكم اى والله بختكم خلاص ترتاحوا من السهر دا وطبعا بترجع الحله؟؟ هههههه طبعا يعنى ح اقعد بعد الامتحانات اعمل شنو؟ مستعجله على مشيتى عشان عذبتك غسيل ومكوه وشااى صح هههههههه حرااااااام عليك دا اسمو عذاب كمان اقول ليك حاجه انا بكون مبسوووطه لما اعمل حاجه ليك خااصة لما اغسل هدومك واكويها واشوفك لابسا وكان على انا تسكن معانا طوول العمر زعلتنى منك لييه زعلتى كيف تقول لى دايراك تمشى !!! يا بت انا بهظر معاك والله يا سلمى انا زااتى لو بى كيفى ما امشى منكم واقعد معاكم طوول العمر فى زول القا زوله زيك كدا وبى صراحه كل اهلك ما قصروا معاى خلاص يا بانقا تصبح على خير رككز فى مزكرتك دى اووعك تسرح ههههه خلاص يلا امشى نومى
الاهل والاصدقاء متجمعين بكميات كبييره فى حوش مركز الامتحانات واوراق متطايره وفرحه كانه عيد احتفالا بانتهاء فترة الامتحانات وجاء البطل بانقا راجع البيت لكن اتغير احساسو شويه وهو اتامل غرفتو وطربيزتو ودولابو واجمع فى باقى حاجاتو الباب نقر بل جيتار عزف نغمه كانها علاج الهموم ومزيل التعب انامل سلمى تستاذن فى الدخول دخلت الفرحه ناقصه المره دى مستعجل شديد يا بانقا صح ؟؟ اول حاجه عملتها تلم فى حاجاتك ؟ صحيح القال المفارق عينو قويه انتى محسسانى انى مسافر فرنسا يا بت انا ماشى الحله وبجيكم كل اسبوع ولا اسبوعين يا زول اهم حاجه انك امتحنت كويس وتانى كل شئ ساهل بس والله العظيم ما عارفه البيت بكون كيف بعدك بكون تمااام ان شاء الله وبنتواصل يا غاليه خلاص لو بتعزنى ما تنقطع وفى حاجه فى مزكرة الكيميا دى الصفحه 32 شوفا بعد تمشى الحله حاجة شنو ؟؟؟ انت حتشوفا بسالنى ليه بس امانه ما تشوفا الا بعد تمش الحله وعد؟؟ اوك خلاص ؟ سلمى يااااااا سلمى نادى بانقا دا تعالوا اتغدوا اخوك دا قنعنا من اكلو فى البيت والله الولد دا بمش وين انا ما عارفاهو هووووى يا بانقا الحكومه بتناديك اها اقدر قول ما داير اكل هههههههههه لا خلاص جاى يا ود نفيسه وانت يا ولد لى هسى بتخجل مننا ؟؟؟ المفروض تخت براااك تاكل انت ضيف؟ لا والله يا خاله عادى سلمى ادتو نظرات شماته _ اها افتح خشمك هههههههههه اتغدوا والحقيبه جنب كرسى الاكل اها يا خاله انا بمشى عشان الحق الباص حق ود عجيب كان فانتى ما بلقا عربيه تانى اجى يا ولدى طوااالى كدى اقعد ارتاح ليك يومين تلاته من تعب القرايه دا والحله بتمش ليها والله يا خاله بمش وبجيكم ما بنقطع والله كنا قايلنك بتقعد ليك يومين تلاته طيب ارجا عمك حاج الامين قول ليهو ماشى امكن ما ارضى مشيتك كلميهو يا خالتى والله داير امش ورضيهو وبجيكم والله اها ودعتك الله يا ولدى خلى بالك من رقبتك وسلم لى على امك وقول ليها تجى مارقه علينا التسلم سااى وامك دى شوفتى ليها فى بكا سعديه بت الجاك الزمن دا والله شغل الناس وخلاهم بالسنين ما اتلاقو