العم احمد قصة طويلة في فصول

يحتوي على كل أنواع القصص والأحداث الواقعية الشخصية .

المشرف: بانه

صورة العضو الرمزية
ابو الملكات
مشاركات: 942
اشترك في: الثلاثاء 2008.7.29 6:16 pm
مكان: الامارات

رد: العم احمد قصة طويلة في فصول

مشاركة بواسطة ابو الملكات »

بسم الله الرحمن الرحيم
وبه نستعين
الفصل السابع عشر
وصل العم احمد والخالة سعيدة والصغير ياسر وكان فى استقبالهم فى محطة السكة حديدة بالخرطوم اخوه عثمان والصغيرة علوية وهناك فى البيت الحاجة زينب وحليمة قاعدين يجهزو فى البيت والحاج سعد لسع شغال اجازته تبدا بعد ثلاثة يوم وطبعاً بشير فى الكلية ؟ والاجمل الاسبوع القادم أول اجازة له بعد ستة شهور من التدريب فى الكلية يعنى سوف يجي وهو لابس البدلة العسكرية والحاجة زينب عارفة كدا لانها الاسبوع الفات كانت معاه وقال ليها الخبر بانه الاسبوع القادم معاهم ان شاء الله يعني فرحانة بقدوم ابنها البكر العم احمد واولاده وحضور ابنها بشير وهو يرتدي البدلة العسكرية أول مرة وعلوية من الخرطوم لحدى امدرمان ماسكة فى ياسر وعرف العم احمد من اخوه عثمان وهم فى التاكسي اخبار الحي ومنو السافر ومنو القاعد من شباب الحي وهنا قال ليهو عثمان فى مفاجئة ليك انت بس ناس ابوى ماعارفينها ؟ ويساله العم احمد اها قول ان شاء الله خير شنو المفاجئة ؟ ويقول عثمان قبل يومين ناس نادي الهلال قالوا عاوزيني اسجل معاهم فى النادي انا قلت ليهم اخوى جاى بعد كم يوم وهو المسؤول عني وانا الحمدلله ماشى كويس فى الدراسة ؟ وقال له العم احمد يازول الفيها خير ربنا يسويها الاهم مادام انت كويس فى الدراسة مافى مشكلة تاني بس ياعثمان عندي سوال مهم جداً انت هلالابي ولا مريخابي حب النادي دا شى مهم لكل لاعب كورة ؟ ويرد لالا انا هلالابي من صغير وانت عارف كدا ؟ ويقول العم احمد انا عارف لكن قلت يمكن اتغيرت بس اديني يومين واقعد مع ابوي وبراحه اخليه يوافق اها ما قاعد تمشي لى اخوك بشير تزوره كيف كم مرة مشيت ليهو لكنه بقى ضعيف ما بشير داك الزمان وعند الوصولهم البيت خرجت الحاجة زينب زغرتت فرحانة بوصول ولدها احمد وابنه ياسر وبنت اختها سعيدة وبعد السلام من الحاجة زينب للعم احمد والخالة سعيدة وطبعاً شالت حفيدها مبسوطة ؟ وهنا سالت الخالة سعيدة ناس امي ما عندهم خبر بوصولنا ؟ وترد خالتها كيف يابتي اخوك عثمان اول امبارحة مشي كلمن وجاء يمكن حسي يجو بس ما تمت كلامها الحاجة زينب الباب ضرب وتسمع صوت اختها اها ما قلت ليك الحمدلله وصلوا وهاك يا بكاء الخالة سعيدة وامها وصاحبتها كمان جات مع امها واكتملت الفرحة ؟ وعثمان طوالى مشا الدكان اصلوا كان مكلم بتاع الدكان يخلى ليهو صندوقين ببسي كولا باردة فى التلاجة بتاعة الدكان وبعد نص ساعة الحاج سعد جاء البيت اصلوالساعة ثلاثة مواعيد عودة والده من العمل وكان فرحان بوصول ابنه احمد وفرحان اكتر بحفيده ياسر ؟ وابتدا العم احمد بسوال ابوه اها يابه ان شاء الله الرطوبة تكون خلتك شوية ؟ ويرد والله الحمدلله كويس ؟ ويقول العم احمد انت عارف يابه انت داير عروسه صغيرة ويضحك الحاج سعد ؟ ويقول له انت ليحسع ما خليت البتسوي فوقو دا الله يجازي محنك البركة فيكم انتم ويساله العم احمد اها اصحابك ان شاء كلهم بخير ؟ ويرد ابوه الحمدلله بخير بس عمك محجوب شوية عيان الحمى جننتهو وعمك طه سافر لولده فى القضارف قبل يومين هو الحاجة زوجته الباقين كويسين يحمدو الله سيدهم وطالت الونسة واجتمعت الاسرة وبشير بكرة العصر بيجي ياخذ الخميس ويوم الجمعة العصر بتجي العربية تشيلوا وان شاء الله لو كان فى العمر بقية نكمل
صورة العضو الرمزية
ابو الملكات
مشاركات: 942
اشترك في: الثلاثاء 2008.7.29 6:16 pm
مكان: الامارات

رد: العم احمد قصة طويلة في فصول

مشاركة بواسطة ابو الملكات »

بسم الله الرحمن الرحيم
وبه نستعين
الفصل الثامن عشر
اصبح الصباح وبعد العودة من الجامع طوالى الشاي وعثمان لبس للمدرسة وكمان حليمة والصغيرة علوية والحاج سعد بعد الشاي طوالى طلع عشان عندهم عربية بتوديهم الشغل هو معاهو جماعة الشهر بخمسين قرش قام العم احمد زى الساعة تمنية ونص قعد مع ناس امه وطبعاً ياسر البيت عليهو غريب ما زى بيتم الفى الفاشر والساعة عشره البيت اتملا نسوان جاراتم جن يسلموا على الخالة سعيدة طوالى العم احمد طلع مشى دكان الشايقي صحبو وكمان عشان يعرف اخبار الحي منه ويسلم على عمه حسن بتاع الدكان التاني صاحب ابوه ويمشى لعمه طه سيد الطابونة وكمان ياخذ جولة فى شوارع الحي الذى له مدة طويلة منه وتكون مواعيد الصلاة جات يصلي فى جامع الحي ويمشي البيت ينتظر ابوه وكمان عثمان وحليمة والصغيرة علوية يكونوا جوا من المدارس وفى العصر بعد الصلاة يمشى مع عثمان يحضر تمرين النادي ويشوف لعبه كيف ويسلم على جماعته القدام من شباب الحي بلقاهم فى تمرين الفريق وبعد صلاة المغرب طوالى يمشي لبيت عمو ود الفادني ابو طارق عريس اخته حليمة يسلم عليهم وكمان يدي هديتو الجابة ليهو معاهو وطبعا بشوق متتظر يوم بكرة عشان اخوه بشير جاي ودى أول مرة يجي من يوم ما تم تعينه فى الجيش الى البيت وطبعاً كمان بالبس العسكري واكيد بكرة الفرحة بتكون كبيرة وناس الحي كلهم بكرة بيجوا يسلموا كمان على بشير لانها أول اجازة من يوم ما دخل الكلية وطبعاً الحاج سعد اشترى الخروف ليهو اربعة يوم مربوط فى البيت وكلم كل اهل الحي بان يوم الجمعة الجاية الكل معزومين غذاء بمناسبة حضور ولده احمد من الفاشر وكمان أول زيارة لولده بشير من يوم ما مشى الكلية الحربية وحليمة كلمت صحباتة واخوات عريسها طارق الاتنين وطبعاً الصغيرة علوية من ما جات من المدرسة طوالى مع ياسر طالعة ونازلة وياسر معها فى طرفها وكمان اشترت ليهو حلاوة حربة من حق فطورها جابتها ليهو وساقتهو الى بيت صحبتها سهي عشان يلعبوا هناك طبعاً ما فى خروج للشارع اصلوا بيناتهم نفاج وعاد العم احمد بعد الزيارات القام بيها وختوا العشاء وبعد العشا قام الحاج سعد ؟ وقال للعم احمد اها ياولدي انا بنوم عشان بكرة آخر يوم لى فى الشغل اصلوا اجازتي تبدا من يوم السبت الجاي وكمان عشان بكرة بعد الشغل بخش السوق اجيب معاي باقى الحاجات ؟ وقال العم احمد خلاص يابوى انت امشى الشغل وتعال راجع البيت طوالى وانا بسوق معي عثمان ونمشي نجيب باقى الحاجات الدايرنها طيب ياابوي ؟ الوالد انت ياولدي جيت من السفر تعبان ؟ يرد لالا ياابوى ما تعبان ولا حاجة انا زاتي عاوز امشى اشوف السوق لى منه مدة طويلة خلاص يا ابوى امشى نوم تصبح على خير انا بقعد شوية مع ناس امي واقوم انوم انا زاتي عشان صلاة الصبح ان شاء الله لو كان فى العمر بقية نكمل
صورة العضو الرمزية
ابو الملكات
مشاركات: 942
اشترك في: الثلاثاء 2008.7.29 6:16 pm
مكان: الامارات

رد: العم احمد قصة طويلة في فصول

مشاركة بواسطة ابو الملكات »

بسم الله الرحمن الرحيم


وبه نستعين


الفصل التاسع عشر


اصبح الخميس والكل فى شوق للقاء بشير بعد سته شهور فى الكلية الحربية بتين العصر يجي ويحضر الطالب الحربي بشير للبيت وامه تشوفو بهدوم الضباط طبعاً عثمان قال للعم احمد اليوم ما عندنا حاجة ندرسها اصلوا الامتحانات قربت من يوم السبت بتبدا يلا نقوم نمشي السوق من بدرى احسن ونجيب الحاجات بتاعه الكرامة عشان بعدين تاني ما بنقدر نعمل حاجة مع وجود بشير والناس بتجي تسلم عليه شفت انت براك امبارح البيت اتملا ناس كيف عشان جيتكم ؟ وهنا نادا العم احمد امه يمة تعالى انا دايرك شوية ؟ امه سمح ياولدي جاية اها خير ياابوي ؟ العم احمد اها يمة انتو دايرين شنو من السوق ؟ وترد امه لالا ياوالدي ابوك براه بيمشى ؟ ويقول العم احمد لا يمة انا امبارح بالليل اتكلمت مع ابوي قلت ليهو من الشغل يجي البيت ياخذ راحتوا وانا وعثمان نمشى السوق نجيب الحاجات بعدين يمة انا زاتي داير اشوف السوق لى منه زمن طويل ؟ امه سمح ياولدي الله يخليك لينا اها دايرين اول التبادى زيت رطل ونص زيت سمسم ما تجيب زيت الغلغل زيت الفول وتاني حاجة البهارات شطة وفلفل وقرفة وشمار وكسبرة اها البصل وملح ما تجيب الملح الدراش جيب الملح الناعم وبطاطس وبامية واسود واتنين كيلو طماطم شوف الطماطم السمحة وعجورتين تاني ما اظن فى شى الرغيف هنا فى طابونة عمك طه وكان نسينا شي عثمان بيجرى بيجيو من الدكاكين الفى الحلة وذهب العم احمد واخوه عثمان لااحضار الطلبات وعشان كمان مافى شى تاني يشغلهم بعدين العصر بعد حضور بشير وعاد الحاج سعد من الشغل وطوالى رقد والعم احمد واخوه عثمان اتاخروا فى السوق شوية اصلوا العم احمد لاقى ليهو كم واحد بيعرفو سلم عليهم وكمان عزمهم للكرامة بكرة الجمعة بعد الصلاة الغداء فى البيت وجاء وقت حضور بشير وعلوية كانت واقفة مع ولد اخوه ياسر قدام الباب جات عربية الجيش ونزل منها بشيروطوالى جرت ليهو علوية وهي ماسكة ياسر بشير شوف ياسر ولد احمد وشال بشير ياسر وباسو وهنا طلعت الحاجة زينب تزغرد فرحانة بوصول ولدها بشير وبلس الضباط وخرج العم احمد واخذ اخوه بشير بالحضن وجات حليمة وسعيدة وخالتو ام سعيدة وصاحبة سعيدة وكان الوالد الحاج سعد بيتوضأ لصلاة العصر اصلوا شالتو نومة وما راح الجامع ؟ وطوالى بشير باس راس ابوه اها ياابوي ان شاء الله كويس ووجع الكرعين خلاك ؟ ويرد الوالد الحمدلله بخير بس انت طيب واخوانك طيبين انا كويس ما عندى حاجة عثمان شال شنطة اخوه بشير ودخلها جوه البيت وابتدوا شباب الحي يجوا يسلموا على بشير والديوان اتملا والحوش برا كمان قرب يتملى وطوالى جرى عثمان الدكان وجاب البيسي طبعا من اول امبارح كان كلم الشايقى صحبو سيد الدكان بتجهيز البيسي عشان وصول العم احمد وحضور بشير بعد سته شهور قضاها فى التدريب فى الكلية طبعاً الكلية لاتسمح للطالب الحربي بالخروج قبل فترة تدريب عسكري وينتقل من الحياة المدنية للحياة العسكرية حياة الضبط والربط ان شاء الله لو كان فى العمر بقية نكمل
صورة العضو الرمزية
ابو الملكات
مشاركات: 942
اشترك في: الثلاثاء 2008.7.29 6:16 pm
مكان: الامارات

رد: العم احمد قصة طويلة في فصول

مشاركة بواسطة ابو الملكات »

بسم الله الرحمن الرحيم
وبه نستعين
الفصل العشرون
وجاء الصباح وقام الحاج سعد بضبح الخروف ومعاهو عثمان لانه حلف على العم احمد وبشير بان لا يقوم واحد منهم بعمل شى ؟ وقامت الحاجة زينب واختها ام الخالة سعيدة بتجهيز العدة الصينية والصحن الكبير عشان عثمان يخط فيه المرارة وطبعاً والدة الخالة سعيدة فنانة فى عمل المرارة ؟ واحضر عثمان المرارة لخالتو وكانت هي قد جهزت البصل والشطة بالدكوة وقامت بتنظيف المرارة وكان الحاج سعد قد اكمل بدوره هو تقطيع الخروف مع ابنه عثمان وغسل ايديه ؟ وجات علوية ماسكة ياسر قالت لعثمان خالتي قالت ليك تعال شيل المرارة جاهزة ؟ وقال الحاج سعد لعثمان خليها تخليها شوية امشى نادى ناس عمك طه وعمك حسن بسرعة ؟ وخرج عثمان لتنفيذ ما طلبه منه والده وماهي إلا دقائق واجتمع الجيران وجات المرارة وبعد اكل المرارة قام الجيران عشان يمشوا يتجهزوا للصلاة الساعة حداشر ونص ؟ وهنا نادت الحاجة زينب ولدها عثمان تعال شيل اللحمة دي قبال ما تبرد وجات اللحمة وكانت احلى لحمة صاج ياكلوها ؟ وبعد الصلاة ابتدا البيت باستقبال الضيوف والجيران وكانت كرامة حلوة لا تنسى وبعد الغدا وتفرق الجيران والمعزومين ؟ جلس العم احمد مع اخوه بشير اها كيف العسكرية لقيتها يابشير ان شاء الله عجبتك لكن ظهر التدريب عليك انقسمت النص لكن الحمدلله بقيت مية مية سالت عثمان قال لي قاعد يجيك ؟ ويرد بشير اى والله طوالى بيجيني واخبار البيت معاي منه وحتى جواباتك ليهو قاعد يقراها لي ؟ يازول الحمدلله ماشي كويس ؟ ويسال العم احمد اها انت بتين تخريجكم ؟ ويرد بشير وين لسع سنة وزيادة طبعاً بتجي تحضر التخريج ؟ العم احمد طبعاً اكيد لو ربنا احيانا ما متنا باخذ الاجازة انا والاولاد ونجي نحضر التخريج ؟ ويقول العم احمد اها اسمع يااخوي مادام قبلت تشتغل فى الجيش لازم بالك يكون طويل واكيد من فترة التدريب دى عرفت العسكرية ضبط وربط ونظام ؟ اها انا عاوز اقول ليك كلام قالو لى عثمان وما قالو لى اى زول فى البيت طبعاً انت عارفهو بيلعب كورة وكمان لاعب حريف والحمدلله فى دراسته شاطر وانا ناس النادي كلمو واحد ضابط معنا فى الفاشر من اولاد الحي اخوه الاكبر معاكم هنا عضو فى ادارة النادى جاني هناك باالبيت فى الفاشر وطلب مني اخليه يلعب وهم مسوؤلين عن دراسته وحسع لما جيت قال لى عثمان ناس نادى الهلال كلموا ادارة النادي عشان يلعب فى الهلال معاهم طبعاً عثمان قال ليهم اخوى الكبير جاى بعد كم يوم وهو الذى يقرر العب وإلا اها انت قول رايك شنو موش احسن ليهو لكن لو درتا كلامي امبارح انا مشيت معه التمرين ما شاء الله حريف والحمدلله كمان شاطر فى المدرسة اها ياخوي ما بدوك يوم تجى تحضر عرس اختك حليمة ان شاء الله كلها عشرة يوم ويتم العرس بس تبدا اجازة المدارس وكان دع الحال انا بجي الكلية هناك وبكلم قائدكم عشان يديك يوم واحد تحضر العرس اسمع ياخوى الكلام كتير بس انت اتخرج اول بعدين نتكلم ؟ بشير ليه فى شنو ؟ العم احمد لالا مافى حاجة بس شايف ابوى دا كرعية متعباتنو شوية قلت نخليه يسيب الشغل ؟ بشير اسمع يااحمد اخوى انا اول ما قبلوني فى الكلية قلت ليهو نفس الكلام دا قال راسه والف سيف ما بيقعد ساكت فى البيت بعد شغل الحكومة يقعد قدام باب البيت ويبيع القش ؟ العم احمد يازول الله كريم ربنا يحييانا لى بعدين اها العربية بتجيك بتين ؟ ويرد بشير اربعة ونص بعد صلاة العصر بعد دا اقوم استحم عشان البس واكون جاهز ان شاء الله لو كان فى العمر بقية نكمل
صورة العضو الرمزية
ابو الملكات
مشاركات: 942
اشترك في: الثلاثاء 2008.7.29 6:16 pm
مكان: الامارات

رد: العم احمد قصة طويلة في فصول

مشاركة بواسطة ابو الملكات »

بسم الله الرحمن الرحيم
وبه نستعين
الفصل الحادي وعشرون
مرت العشرة يوم واهل العريس جابو الشيلة وتم تحديد يوم الخميس الجاي يكون العرس رسل الحاج سعد ولده عثمان البلد عشان يكلم اهلهم باالعرس وكمان يوريهم بانه من الاوئل فى الامتحان وجاب نتيجة كويسة ؟ وقال العم احمد لعثمان وانت ماشي اغش معاك بشير كلمه عشان يقدر يجي ويجيب معاهو اصحابوا مااصلو الخميس يكون يوم اجازاتهم الاسبوعية ؟ وجات الحاجة زينب الديوان قالت لولدها العم احمد تعال يا احمد يا ولدي امشى معاي للسوق عاوزة لي حاجات ؟ قال العم احمد طيب يمة انا جاهز بس انتي قولى اطلع تلقيني بره واقف فى خشم الباب ذهبت لتجهيز نفسها ؟ علوية يمة انتي ماشة وين ؟ امها مالك دايرة شنو ؟ عليك الله يمة ماشة وين ؟ اها ماشة السوق اجيب لي حاجات ؟ علوية انا عاوزة امشى معاك ؟ يا بت اقعدي فى الواطة الشلاقة شنو ليك ؟ علوية عليك الله سوقني معاك ؟ ويسمع العم احمد الحوار ويدخل ؟ ويقول الى امه يمة خليها تمشى مالوا ؟ وقالت لها اها خلاص قومي البسي وتفرح علوية للذهاب للسوق وعشان تشتري لولد اخوها حلاوة ولعبة ؟ وفى البيت قامت والدة الخالة سعيدة بتجهيز الاشياء اصبح البيت خلية نحل دا طالع ودا داخل طبعاً بكرة دق الريحة ونسوان الحي كلهن بيجن عشان كدا الحاجة زينب ماشة السوق عشان تجيب لوازم جلسة بتاعة بكرة من لحم وكمونية وبن وباقى الاشياء ؟ وهناك العروسة مع صحباتها يشوفو فى الحاجت الجابوها اهل العريس وآخر انبساط وطبعا من يوم السبت بعد بكرة يبدا تعليم العروسة الرقيص ؟ والحاج سعد قاعد هناك تحت ضل النيمة فى عنقريبه الهباب وجنبو الرادى يسمع الاخبار واغاني الحقيبة وقدامه ولد ولده ياسر قاعد فى صدره يلقلق مع جده بكلام ما يعرفو غير ابوه وامه ؟ وينادي الحاج سعد على بنت اخوه ؟ سعيدة ؟ نعم ياعمي ؟ تعالى شيلى الولد دا وغسلي ليهو ايدينوا من الوساخة دى ؟ وتجري الخالة سعيدة مسرعة وتشيل ياسر مع قرصة دا شنو الوساخة العملتها دى ويبكي ياسر ؟ ويقول الحاج سعد انا قلت ليك نظفيه مش تدقي ؟ براه ياعمي اصلوا خمجان ابوه مدلعوا ؟ حاج سعد خلاص نظفيه وتعالى ختي هنا فى تبروكة جده خليه يلعب بي لعباتوا جنبي هنا ؟ طيب ياعمي وتذهب الخالة سعيدة وتجيب لعبات ياسر وتختوا جنب جده وتمشى عشان هى شاده الملاح ؟ ويكورك الحاج سعد يابت تعالى جيبي لي الحقة حقتي من جوه تلقيها تحت المخدة اصلى دسيتا من ولدك دا خفت كمان يقوم يسف منها ويضحك الحاج سعد ويتذكر زمان ولده احمد دا فتح الحقة وشال ليهو سفة بس الحمدلله قبال ما يسفها امه شافتو جرت وتفقتها منهو ودقتو ومن اليوم داك تاني ما قرب جنب الحقة وان شاء الله لو كان فى العمر بقية نكمل
صورة العضو الرمزية
ابو الملكات
مشاركات: 942
اشترك في: الثلاثاء 2008.7.29 6:16 pm
مكان: الامارات

رد: العم احمد قصة طويلة في فصول

مشاركة بواسطة ابو الملكات »

بسم الله الرحمن الرحيم
وبه نستعين
الفصل الثاني وعشرون
ومر الاسبوع واليوم الخميس العرس ؟ وكمان العم احمد باقى ليهو تسعة يوم ويسافر هو واولاده خلاص الاجازة كملت ؟ وعثمان بات يوم واحد وتاني يوم رجع وجاب معاهو من البلد اربعة خرفان فى البوكس حق ود خالتو الطاهر خروف من عمته اخت ابوه الكبيرة وخروف من ود خالتو الطاهر زاتو وخروفين من ابو الخالة سعيدة وكمان عمته ادتو 10 جنيه عشان جاب نتيجة كويسة فى المدرسة ؟ وفى حوالى الساعة تسعة ونص صباحاً جو ناس البلد كلهم اجروا بص حسين الشغال فى الخط حتى يوم بكرة بالليل يرجع بيهم وفى العصر جاء بيشر ومعاهو اتنين من زملاءه فى الكلية اصلوا اهلهم بعيدين شوية واحد من الابيض والتاني من مدني وكمان عشان يشاركو زميلهم بشير فى زواج اخته فى الساعة التاسعة تماماً جات سيرة العريس وتعالات الزغاريد وبعد العشاء ابتدت الحفلة وكانت حفلة حلوة من غير ما يعكر صفوها احد والعريس عندو اصحابو فنانين غنوا كانت حفلة روعه لا تنسى والصباح كانت الصبحية وبعدها طوالى العريس ساق عروسته وبعربية ابن عمه الى المطار عشان الطائرة بتقوم الساعة واحدة ظهراً لبورتسودان اصلوا حاجز فى فندق بااركويت مدينة العرسان فى السودان لمدة اسبوع وكانت هذة الرحلة هدية من زملاءه المدرسين مشاركة منهم لقضاء اسبوع من شهر العسل وجات الساعة اربعة وقام بشير وزملاءه بتجهيز انفسهم عشان العربية حقت الجيش بتجي زى الساعة خمسة ونص ؟ وقال العم احمد لخوه بشير طبعاً ما لقينا فرصة كبيرة عشان نقعد معاك لكن شاء الله بيناتنا الجوبات طبعاً الخميس الجاي بتجي عشان نودعك بشير اكيد بجي وزى ما قلت بيناتنا الجوبات يا اخوي وبعد وداع بشير وزملاءه ؟ قعد العم احمد مع ابوه يتونس معاهو وقال ليهو يابوي الحمدلله انا شغال وكويس وكمان الحمدلله هو بشير خلاص كلها كم شهر ويبقى ضابط يعنى بعد كدا انت ترتاح عشان الناس كمان بعدين ما يقولوا بالله اولاده شغالين ابوهم المسكين شغال وكمان عندو واحد ضابط وبعدين انت الحمدلله ما محتاج لزول حتى انحنا اولادك ما محتاج لينا بخيرك الحمدلله بس عاوزنك ترتاح ربيتنا الحمدلله ؟ اطرق الحاج سعد براسه على الارض ؟ وقال ليهو طيب ياوالدى الفيها خير ربنا يسويها ؟ طبعاً الحاج سعد بيحب احمد وعارف انو ولده عقله كبير ؟ وعثمان اعتذر لادارة النادي بانه لم يتمكن من حضورالتمرين حق الجمعة وتم قبول عذره ؟ والحاج سعد من الان وهو فى الاجازة السنوية يعنى عندو شهر اجازة واكيد بيمشى البلد بياخذ ليهو خمستاشر يوم اوعشرين يوم بس بيكون قاعد هذا الاسبوع حتى يسافر ولده العم احمد وبعدين يسوق الحاجة زينب وعلوية يقضوا باقى الاجازة فى البلد ؟ وكمان العم احمد بعض زملاءه وصوهو يجيب ليهم حاجات من اهلهم هنا فى امدرمان واحدين فى العرضة واحدين فى الثورة واحدين فى ام بدة ولازم يمشى ليهم كلهم عشان يشال الامانات لزملاء وكمان وهو زاتو عاوز ليهو حاجات لنفسه والخالة سعيدة برضوا عاوزة تشتري لصحباتها حاجات والحاجة زينب فرحانة وحزنانة فرحانة بعرس بتها الكبيرة وحزنانة لفراقها الكم يوم ديل وطبعاً لم تعود بتسكن جنبها مع اهل زوجها وهم جيرانهم اصلوا زوجها بيبني فى بيتو فى الثورة القطعة الارض طلعت ليهو فى التوزيع الاراضي طبعاً دا بيت ابوه من زمن المهدية حق جدو ابو ابوهو اصلوا جد كان من انصار المهدية ان شاء الله لو كان فى العمر بقية نكمل
صورة العضو الرمزية
ابو الملكات
مشاركات: 942
اشترك في: الثلاثاء 2008.7.29 6:16 pm
مكان: الامارات

رد: العم احمد قصة طويلة في فصول

مشاركة بواسطة ابو الملكات »

بسم الله الرحمن الر حيم
وبه نستعين
الفصل الثالث وعشرون
عادت العروسة حليمة مع زوجها طارق من بورتسودان بعد انتهاء الاسبوع حوالى الساعة خمسة ونص مساء وطوالى جابها العريس الى بيت ابوها من المطار سلمت على اهلها وهاك يا زغاريد من الحاجة زينب والخالة سعيدة فرحانين بعودتها ونص ساعة كدا قاموا الى بيتهم ومعهم الصغيرة علوية وامها ؟ ونادي العم احمد الخالة سعيدة قال لها تجهز نفسها للسوق عشان بعد صلاة المغرب طوالى يطلعوا طبعاً بكرة الخميس وبشير بيجي بكرة وانا مابقدر اطلع معاك تاني ويوم السبت السفر خلاص وكمان بعد بكرة لازم يمشى ناس عمه فى الفتيحاب يجيب حاجات ودعمه الفى نيالا وكمان يودع عمه ؟ ذهب العم احمد مع الخالة سعيدة للسوق لشراء حاجاتهم ؟ وعثمان طبعاً من قبيل قام مشى التمرين ؟ والحاج سعد فاتح الرادى ويسمع فى الاخبار من راديو لندن ومعه حفيده الاول ياسر قاعد قدامه يلعب ومع اذان العشا رجعت الحاجة زينب مع علوية للبيت عشان حاج سعد بيمشى الجامع للصلاة ولازم تكون فى البيت ورجع عثمان من التمرين بعد صلاة المغرب وطوالى غير ومشى النادى عندهم محاضرة وكمان ناس نادي الهلال جاين يقابلوا العم احمد عشان انتقال عثمان للهلال من الموسم الجاي واتفقو مع ادارة النادي يجوا الساعة عشرة بالليل يقابلوا العم احمد وطبعاً العم احمد عنده خبر عشان كدا طلع من بدري للسوق ولازم يكون تسعة ونص فى البيت اصلو حاجاتهم بسيطة وفعلا الساعة تسعة وربع كان فى البيت ؟ طوالى سال ابوه يابه عثمان وين ؟ الحاج سعد والله اسه ناس امك قالوا مشى النادي ؟ خلاص كويس طبعاً ياابوي انا كلمتك بموضوع عثمان والكورة حسع ناس النادي جاين عشان يسجلوا وانا وريتم بانك موافق مادام انا موافق والحمد الله عثمان كويس فى الدراسة ودا الاهم ياابوي وبعدين ياابوي ما نحرموا من الحاجة الهو عاوزها كل الشباب الان بيلعب الكورة وعثمان كويس ما زول بتاع حاجات بطالة والحمدلله لا بسكر ولا بيشرب سجائر من البيت للنادي والمدرسه دا كل هموا ؟ ويرد ابوه خلاص ياوالدي مادام انت شايف فيها مصلحتو انا ماعندي مانع وزى ما قلت ماشى فى دراسته كويس ربنا يحفظو ويحفظكم كلكم امين يارب ؟ وهنا ضرب الباب وقام العم احمد يفتح الباب وكان ناس النادي ومعهم عثمان اتفضلوا اتفضلوا ادخلو ياجماعة ودخلوا الجماعة وسلموا على الحاج سعد ؟ وطبعاً عثمان قام بالتعريف دا اخوى احمد الكبير ودا الوالد الحاج سعد ؟ وجات الصغيرة اخته علوية وطوالى عثمان قدمها ودى حبوبتنا الصغيرة اختي علوية ؟ وقالت له علوية عثمان امي قال ليك تعال شيل الشربات جلسوا الجماعة ؟ وقام مندوب نادي الهلال وقال طبعاً انحنا جاين عشان نسجل ولدنا عثمان معانا باالنادي ونحنا اتفقنا مع ادارة ناديكم عشان نسجله والكلمة الاولى والاخيرة ليكم انتم وكمان الابن عثمان ؟ وقال الحاج سعد انا والله ياولادي ما بعرف حاجة من كلامكم دا اهو دا اخوه الكبير وهو المسؤول كمان عننا كلنا البقول نحنا معاهو ؟ وقام العم احمد بعد ما سمى بالله اولاً فى حاجة لازم تعرفوها هي عثمان هلالابي وحقيقة البيت كلهو هلالاب ماعدا اختنا العروسة حليمة مريخابية وعلى السكين ويضحك الجميع ؟ وقال عضو نادي الهلال الحمدلله اذن ما فى مشكلة ؟ طيب يا اخ احمد اول حاجة ادارة نادي الهلال من الان هي مسؤولة عن عثمان من ناحية الدراسة وكمان ايضاً بعد التخرج ايجاد العمل وتانية حاجة قررت ادارة النادي دفع مبلغ خمسين جنيه لللاعب عشان يشتري العاوزوهو واشترى ليهو النادى اتنين كدارة واحد للمبارات واحدة لتمرين وكل تمرين يجي الباص الخاص باالنادي يشيلو ويرجعوا بعد التمرين اومبارة للبيت وقال العم احمد الفيها خير ربنا يسويها يلا شيلوا الفاتحة ياجماعة وكان هذا هو تسجيل عثمان لنادي الهلال ؟ ووقع العم احمد على عقد التسجيل واستلم الخمسين جنيه من عضو مجلس ادارة نادي الهلال وعثمان استلم الكدارات وهنا طلبوا الجماعة منهم الاذن باالانصراف وقال عضو نادي الهلال لعثمان بكرة الباص بيجيك الساعة اربعة ونص كون جاهز ان شاء الله لوكان فى العمر بقية نكمل
صورة العضو الرمزية
ابو الملكات
مشاركات: 942
اشترك في: الثلاثاء 2008.7.29 6:16 pm
مكان: الامارات

رد: العم احمد قصة طويلة في فصول

مشاركة بواسطة ابو الملكات »

بسم الله الرحمن الرحيم
وبه نستعين
الفصل الرابع وعشرون
اصبح الصباح وعثمان فرحان انو بقى لاعب فى نادي الهلال ؟ ونادا العم احمد اخوه عثمان بعيد وقال ليهوهاك القروش دي اديها للوالد وقول ليهو خليها معاك انا ماعندى مكان اختها فيه وامشى انا بعدين بتكلم مع ابوي براي ؟ عثمان شال القروش وقال لاخوه حاضر وطوالى مشى الى ابوه واداهوالقروش وقال ليهو زي ما قال اخوه احمد ؟ جابوا الفطور وطوالى العم احمد قال الى ابوه انا ماشي اجيب حاجات حقات الاخوان هناك من اهلهم وان شاء الله الغدا هنا فى البيت معاكم ؟ برضوا الخالة سعيدة قالت الى امها يمة تمشى معي السوق عندي شوية حاجات عاوزة اجيبا عشان تانى ما بلقى طريقة امشى ؟ وعثمان قال لوالده انا يابوي بمشى عند سامي صحبى وبرجع قبل الغدا اصلوا اخوه مسافر بكرة الخليج لقى ليهو فيزا بتاعة عمل ؟ ويرد الوالد سمح امشى ياولدي بسلامة لكن ياولدي بس ما تتاخر عشان اخوك بشير جاي لليلة ؟ ويرد طيب يا ابوي ان شاء الله ؟ وقال عثمان ياابوي اخت ليك العنقريب فى ضل النيمة قبل ما امشى ؟ بارك الله فيك اى ياولدي ؟ العم احمد توفق مشى لبيوت زملاءه وكان كل شى جاهز يعني ما اتاخر كتير الساعة اتنين كان فى البيت ؟ والخالة سعيدة رجعت مع امها برضو الساعة اتنين ونص ؟ وايضاً عثمان رجع مع ناس خالتو وزوجة اخوه سعيدة سوا وجاء الغدا واكل الجميع ؟ وقال العم احمد انا عاوز انوم شوية قبل صلاة العصر وطلع ونام ومع اذان العصر قام العم احمد للصلاة وقامت الحاجة زينب بعمل الجبنة للحاج سعد ؟ وفى حوالى الساعة خمسة جاء بشير باالزي العسكري لطلبة الكلية الحربية بس ملص هدومو ولبس الجلابية ؟ طوالى عثمان بفرحة قال ليهو خلاص انا سجلت فى الهلال من امبارح ؟ ورد بشير ربنا يوفقك وتكون لاعب كبير وله شان فى كورة السودان ؟ وجلس العم احمد مع اخوه بشير وقال ليهو الحمدلله انا اتكلمت مع ابوي بخصوص موضوع الشغل وافق على كلامي وقال ان شاء الله اخوك بشير يتخرج وانا بخليهو الشغل وانبسط بشير لكلام اخوه احمد بموافقة ابوه ؟ وقال ليهو صدقني يااحمد دا اجمل واسعد خبر اسمعو جزاك الله خير وكمان خبر تاني كويس امبارح ناس نادي الهلال كانوا معنا هنا فى البيت بخصوص تسجيل عثمان والحمدلله تم كل شى بخير وتمام واصبح عثمان لاعب باالهلال وتعهد من ادارة الهلال ممثلة فى العضو الذى جاء امس هي مسؤولة عن النشاط الدراسي لعثمان وجاء الليل وبشير مع العم احمد فى ونسة طويلة ودا آخر اليوم مع بشير وذلك عشان العم احمد بيسافر يوم السبت ومافى طريقة تاني يلاقى اخوه ان شاء الله فى الاجازة الجاية وحضور تخريج بشير ان شاء الله لو كان فى العمر بقية نكمل
صورة العضو الرمزية
مرسال الشوق
مشاركات: 14746
اشترك في: الاثنين 2009.11.2 3:49 pm
مكان: عارفني منــــــــــــــك

رد: العم احمد قصة طويلة في فصول

مشاركة بواسطة مرسال الشوق »

متااااااابعين بشغف ..... ياحلو

happy0005.gif happy0005.gif
صورة العضو الرمزية
ابو الملكات
مشاركات: 942
اشترك في: الثلاثاء 2008.7.29 6:16 pm
مكان: الامارات

رد: العم احمد قصة طويلة في فصول

مشاركة بواسطة ابو الملكات »

مرسال الشوق كتب:
متااااااابعين بشغف ..... ياحلو

happy0005.gif happy0005.gif

رمضان كريم
شكراً استاذي علي المتابعة وان شاء الله تجد ما يسرك انت والاخوه الاعضاء
كل الود والاحترام
صورة العضو الرمزية
ابو الملكات
مشاركات: 942
اشترك في: الثلاثاء 2008.7.29 6:16 pm
مكان: الامارات

رد: العم احمد قصة طويلة في فصول

مشاركة بواسطة ابو الملكات »

بسم الله الرحمن الرحيم
وبه نستعين
الفصل الخامس وعشرون
حانت لحظات الوداع لسفر العم احمد والخالة سعيدة والصغير ياسر والذهاب لمحطة السكة حديد وقال العم احمد لوالده اها يا ابوي مع السلامة وخلى بالك على نفسك ؟ الوالد قال لالا انا بمشى معاكم المحطة ؟ العم احمد قاليهو يا ابوي انت وامي وخالتي لا خليكم هنا فى البيت يمشى معنا عثمان وعلوية بس اها داير شنو من الفاشر اجيبو ليك ياابوي لاما داير حاجة سلامتك انت واولادك وانتي يمة دايرة شنو من هناك لالا مادايره حاجة بس كلمت سعيدة ترسل لى مفاريك اصلوا مفاريك هناك سمحة مامشكلة ان شاء الله اى زول جاي برسل ليك خالتي طلباتك شنو لا ياولدي سلامتكم طلباتي سعيدة عارفاهن ؟ عثمان يلا يااحمد التاكسي جاء امرقو عثمان ومعاهو اتنين من اولاد الحي رفعوا العفش فى التاكسي وهنا ودع العم احمد ابوه وامه وخالتو وكمان الخالة سعيدة وركبو التاكسي ومع كلمات الوداع والدموع غادروا البيت طبعاً الصغيرة علوية اخيراً براها اقتنعت بالبقاء وعدم السفر اولاً انها وجدت صحبات فى المدرسة وفى الحي ولكنها طالبت العم احمد يخلى ياسر هنا مع امها عشان تلعب معاهو بعد العودة من المدرسة وقال العم احمد انتي عارفة ياسر عاوز يرضع طوالى اها بعدين انا هناك منو البيعمل لى الاكل لو سعيدة قعدت معاكم وقالت علوية خلاص بنتظره فى الاجازة خلاص يازولة اتفقنا وهناك فى المحطة والعم احمد بيقدم التصاريح لموظف شباك التذاكر حصل شكلة بالقرب منه واحد قبقب واحد وعاوز يضربه وتدخل العم احمد وطبعاً كان لابس الزي العسكري بين المتشاجرين ومعه اتنين كانو واقفين جنبو والحمدلله انتهت الشكلة بلا ضرب وعند وقوف القطار فى خطه جري اخوه عثمان وتم حجز مقعدين فى قمرة بالدرجة التالتة وطبعا حصلت مدافرات شديدة بس عثمان كان سريع وحجز ليهم مكان وبعد ركوب العم احمد والخالة سعيدة حصلت موناوشات بين الركاب معاهم فى القمرة ؟ وهنا ضرب الجرس معلن بداية انطلاقة القطار ونزل عثمان وهو ماسك يد اخته علوية مودعين ورافعين ايدياهم يلوحون لهم حتى توارى القطار تحت جسر المسلمية متجه للغرب وبعض مرور ربع ساعة تطايبت النفوس وجات المعرفة بين الركاب المعاهم فى القمرة وكانت من اجمل السفريات وان شاء الله لو كان فى العمر بقية نكمل
صورة العضو الرمزية
ابو الملكات
مشاركات: 942
اشترك في: الثلاثاء 2008.7.29 6:16 pm
مكان: الامارات

رد: العم احمد قصة طويلة في فصول

مشاركة بواسطة ابو الملكات »

بسم الله الرحمن الرحيم
وبه نستعين
الفصل السادس وعشرون
عاد العم احمد الى بيتو وكان باقى يومين وينزل الشغل وطبعاً سلم كل واحد من زملاءه حاجاتو وذهب تاني يوم من وصولهم مع الخالة سعيدة الى سوق الفاشر واشتروا حاجاتهم وشيلوا الشيالي القفة وهو شايل الصغير ياسر والخالة سعيدة اشترت حاجات خاصة بها شايلها فى يدها ؟ مر شهر من وصول العم احمد للفاشر وعاد من العمل ووجد ان الخالة سعيدة ما عملت الاكل ؟ العم احمد مالك ان شاء الله خير وينو الغدا ؟ ما عملتو ريحة البصل دي كرهتنى العيشة ؟ وسمعت جارتهم سعدية كلامهم ومنزل سعدية يفصله عنهم صريف يعنى لو كان فى ورقة كشكشت ساكت هم بيسمعوها لهذا سمعت سعدية ما دار بينهم وهي كمان كانت قاعدة مع الخالة سعيدة وعرفت من كلامها انها بتتوحم وسعدية ما شاء الله عندها اربعة اولاد تلاتة اولاد وبنت واحدة وزوجها فى مامورية ليهو خمستاشر يوم ؟ ولبست توبها وجات داخلة عليهم ؟ احمد ازيك يااخوي معليش المراة دى بتتوحم خليها مسكينة انا عملت الملاح لينا وليكم اصبرعليها شوية يا ودامي ؟ والخالة سعيدة قالت لسعدية انا زاتي ريحتو دى ما دايراها ؟ العم احمد شال ياسر وطلع قعد فى الراكوبة واصبح العم احمد يعمل كل حسابو ما يحتك بالخالة سعيدة حتى تمر التلاتة شهور دى بتاعة الوحم بالسلامة ؟ وفى يوم شعر العم احمد بالحمى وطلع ارونيك مرض وذهب للدكتور وعرف من الدكتور بانه مصاب بملاريا ومنحه الدكتور راحه لمدة اربعة ايام مع صرف الدواء وكل يوم يحضر المستشفى ياخذ الحقنة وجابو زملاءه باالعربية للبيت ؟ وقالوا للخالة سعيدة احمد دا عندو حمى شديدة حمى ام برد وبعد ان رقدوا غطوه باتنين بطانية وطلعوا وقال العم احمد للخالة سعيدة ادينى موية اشرب وماكان من الخالة سعيدة إلا ملت الكوز وقامت دفقتو فيه وطبعاً العم احمد ما عندو قدرة يتحرك من تعب الحمى قام كورك فيها وطبعاً سعدية كانت حاضرة لما احمد جابوا من الاسبتالية وجات شافتو طوالي جات جارية لم سمعت احمد يكورك ولقت العم احمد غرقان فى الموية ؟ ضحكت وقالت ليهو استحمل مسكينة ما بيدها وطوالى مشت بيتها وجابت بطانية وشالت البطاطين الفيهن الموية وغطتو وشالت ديك شرتم برا فى حبل الغسيل مرت الايام وعادت الخالة سعيدة لحالتها الطبيعية ؟ وارسل العم احمد جواب يخبر فيه ابوه بان سعيدة حامل وليها تلاتة شهور الحمدلله ؟ وبعد اسبوع وصل جواب له من طارق زوج اخته حليمة يعلن فيه خبر حمل حليمة طوالى ؟ بعد العودة للبيت كلم سعيدة ابشرى حليمة حامل جانى جواب من زوجها اليوم طبعاً فرحت الخالة سعيدة لهذا الخبر السعيد وقالت ليهو عليك الله يااحمد اكتب لى جواب ليها ؟ وقال لها حاضرالعم احمد وطوالى جاب الورق وكتب الجواب وقراء وقال اها قولي تانى عاوزة اكتب لك شنو ؟ برى خلاص كفاية وقفلو وقال ليها بكرة بدى الدي ار يرمى فى البوستة ؟ ومرت الشهور وباقى شهر ويشرف القادم الجديد اسرة العم احمد بت ولد العلم عند الله وايضاً حليمة كمان شهرين كدا وبرضو تلدي وبشير كمان خمسة شهور والتخريج وعثمان بقى لاعب يشار لهو باالبنان واحد اللاعبين الاساسين فى الهلال والصغيرة علوية ماشة الفصل التالت وطبعا ياسر اكمل عامه التانى وان شاء الله لوكان فى العمر بقية نكمل
صورة العضو الرمزية
ابو الملكات
مشاركات: 942
اشترك في: الثلاثاء 2008.7.29 6:16 pm
مكان: الامارات

رد: العم احمد قصة طويلة في فصول

مشاركة بواسطة ابو الملكات »

بسم الله الرحمن الرحيم


وبه نستعين


الفصل السابع وعشرون


حانت ساعة الولادة ومشى العم احمد وجاب الداية من بيتها بعربية الجيش وكانت الساعة حوالى الساعة السادسة مساء وجن نسوان الاشلاق منتظرين ولادة الخالة سعيدة وفى تمام الساعة تسعة ليلاً جات الصرخة من المولود وكانت بنت وبعد الداية انتهت العم احمد شالها رجعها واداها خمسة جنيه وقال ليها انت وزوجك لازم تحضروا السماية بعد ذهاب الداية دخلوا عليها نسوان الاشلاق يهنونها ويباركوا ليها البنت وتلقى العم احمد التهاني من زملاءه فى الاشلاق والكل ان شاء الله تتربى فى عزك وان شاء الله من المستورات ومن بنات الوطن الصالحات ؟ واصبح الصباح وفى الطابور طلب العم احمد الاذن بالذهاب الى البوستة عشان يرسل تلغرافين واحد للوالد وتاني لبشير يخبرهم بولادة الخالة سعيدة وربنا رزقهم بي بنت وانه اختار لها اسم آمنه تيمننا بام الرسول عليه افضل الصلاة والتسليم وعاد العم احمد من البوستة بعد ان غيشا السوق واشترى كيسين حلاوة وملوة تمر بركاوي وهو سعيد بقدوم الحلوة آمنه ؟ والرقيب المسؤول عنه سمح له بالذهاب للبيت عشان يكون اليوم جوار زوجته شكره وذهب ووجد جارتهم سعدية قامت بكل شي وياسر مع اولادها الصغار بيلعب فى بيتها وطبعاً عملت للخالة سعيدة مديدة الحلبة وسعيدة مبسوطة باالاميرة آمنه ومرت الايام وآمنه الان قربت تكمل شهرها التاني ؟ وجات البشارة تلغراف من طارق زوج اخته حليمة يعلمه بانهم رزقوا ولد واكتملت الفرحة بهذا الخبر السعيد ؟ وتوالت الايام وآمنه اصبح عندها اربع شهور ونص بشير باقى لتخريجه شهر ونص ؟ وتقدم العم احمد بطلب الاجازة وشرح لقائده اسباب طلب الاجازة بان اخوه الاصغر منه تخريجه بعد شهر ونص وهو وعده بان يحضر التخريج ؟ وهنا آمر قائده بان يمنح الاجازة السنوية من الشهر القادم بعد الشغل رجع العم احمد البيت وقال للخالة سعيدة يلا جهزى حاجاتك مفاريكك والاشياء الطالبنها منك الشهر الجاي الاجازة ومعها صرفة الصندوق حقي وكمان ختتك انتي مع صاحباتك وناس كمال ود عمي هو واولاده فى ام درمان ليهم اسبوعين قال بيحضر تخريج بشير وبعدها باسبوع برجع عشان خلى اخوه الصغير فى الدكان حقو فى نيالا ؟ مر الشهر كانه اسبوع وصرف العم احمد قروش الاجازة زايد صرفة الصندوق والخالة سعيدة خلاص اخذت خطتها واشترت اشياءها ؟ وارسل العم احمد تلغراف الى اخوه عثمان بواسطة نادي الهلال بان يكون فى المحطة هم بقطار الاسبوع الجاي وعاد عثمان للبيت فرحان واخبر ناس البيت بان خلاص ناس احمد جاين فى قطار الاسبوع القادم وفرح الجميع وخاصة علوية خلاص ياسر جاي وطبعا سمعت بى البنت لكن ما شافتها عشان كدا مركزه فى ياسر وان شاء الله لو كان فى العمر بقية نكمل
صورة العضو الرمزية
ابو الملكات
مشاركات: 942
اشترك في: الثلاثاء 2008.7.29 6:16 pm
مكان: الامارات

رد: العم احمد قصة طويلة في فصول

مشاركة بواسطة ابو الملكات »

بسم الله الرحمن الرحيم
وبه نستعين
الفصل الثامن وعشرون
عمت الفرحة قلب الحاج سعد والحاجة زينب بوصول ابنهم البكر وكمان بعد عشرة يوم تخريج ابنهم التاني ضابط فى القوات المسلحة وسعادة بنتهم مع زوجها وشوفت ابنها وشهرة ابنهم التالت فى عالم الكورة وانه اصبح احد نجوم الكورة فى الوطن ونجاح آخر العنقود فى المدرسة ونيلها المركز الاول على بنات جيلها نعم عمت السعادة تلك الاسرة المكافحة ؟ وشكر الوالدين ربهم وساله ان يديم عليهم هذة السعادة ويكفيهم عيون الحساد ؟ وفى عصر اليوم التاني ذهب العم احمد بعد صلاة العصر بعد ان كلم ناس البيت بانه سوف يتاخر شوية بعد زيارة اخوه بشير فى الكلية الحربية والسلام عليه ومعرفة تفاصيل حفل التخريج ومن اخوه بشير سوف يمشى طوالى لبيت عمه فى الفتيحاب يسلم وكمان يلاقي ابن عمه كمال الذى سبقه بالوصول الى ام درمان ثم بعد ذلك العودة للبيت ؟ طبعاً العم احمد كان فى جوابه الاخير قبل الوصول كلم ابوه بان لايشتري خروف هو الذى سوف يجي ويشتري خروفين فرحة بتخريج اخوه ومنها كمان سلامة وصولهم فى الاجازة ؟ عاد العم احمد وجد ناس البيت شفقانين عليه ؟ مالكم انا ما كلمتكم قبل ما امشى بانى بتاخر شوية بمشى اسلم على عمي مااصلهم هم قريبين من الكلية الحمدلله جيت وانا بخير ؟ ويسال عثمان وين لسع ما جاء ؟ قال عندهم تمرين مهم وعلوية نامت وقالت لازم تنوم معها آمنه وياسر جات عمته وراجلها وقالوا لازم يسوقوا معاهم وهو زاتو تعلق بولدهم ؟ ويرد خير ؟ وابوك من قبيل اتعشى ونام انت عارفو بينوم بدري ؟ ويسال طيب خالتي وينها هوي خالتك فى سابع نومة مسكينة مهدودة من تعب البيت الله يعينها ؟ ويقول العم احمد خلاص تصبحوا على خير انا زاتي عاوز انوم ؟ ومرت الايام سريعة وبكرة حفل التخريج والاهل جوا من البلد باتو معاهم اخو الحاج سعد الاصغر واولاده واخته الكبيره وبناتها واولادهم ماشاء الله البيت اتملى اجر العم احمد باص من باصات خطهم طبعاً عثمان بيعرفهم كلهم هو الذى كلم سيد الباص بانهم بكرة ماشين دار الرياضة امدرمان عشان يشهدوا حفل تخريج اخوه الاكبر منه من الكلية الحربية وكان التخريج وبعد حفل التخريج تقدم بشير الى ابوه وباس يده وقبل راس امه وبحضن اخذ اخوه الكبير احمد وتقبل التهاني من كل الاهل الذين حضروا من البلد والجيران ؟ وقال بشير عندنا اجازة عشرة يوم لكل الدفعة عشان كل واحد يمشى يشوف اهله ويسلم عليهم عشان بعد العودة من الاجازة الشغل طوالى وهو من بكرة معاهم فى البيت بس يسلم العهدة للكلية عشان الدفعة الجديدة وقال العم احمد خلاص بكرة الصباح بنضبح خروف لناس البلد عشان بيمشوا وعثمان قال الخروف التاني يوم الخميس الجاي هو عازم زملاءه اللاعبين وادارة نادى الهلال وشباب الحي وكمان جايبين فنانين وجاء الخميس وقامت الحفلة وكانت من الحفلات الرائعه التى لا تنسى وان شاء الله لو كان فى العمر بقية نكمل
صورة العضو الرمزية
ابو الملكات
مشاركات: 942
اشترك في: الثلاثاء 2008.7.29 6:16 pm
مكان: الامارات

رد: العم احمد قصة طويلة في فصول

مشاركة بواسطة ابو الملكات »

بسم الله الرحمن الرحيم
وبه نستعين
الفصل التاسع وعشرون
عاد العم احمد والخالة سعيدة ومعهم ياسر والصغيرة آمنه ونزل يومين مع ابن عمه فى نيالا ووصل الفاشر وكان الباقى له يومين وينزل الشغل ومرت الايام والعم احمد شغال ماموريات من الفاشر الى الجنينة والى نيالا وكتم ومليط ؟ وطلبه قائده وقال له الحمدلله هناك تقارير بانك مجتهد فى عملك وانا ارسلت اشارة لترقيتك الى امباشى بتعديل الحديث ( عريف ) وجات الموافقة والف مبروك يا احمد وايضاً ترشيحك الى الدرجة الاولى انت تستاهل ونتمنى لك التوفيق والسداد ؟ وتقبل احمد التهنئة من زملاءه بالسرية والكل تستحق يااحمد وجاء البيت فرحان برتبة امباشى والخالة سعيدة عاوزة تطير من الفرح وفى المساء ذهب لبوستة وارسل تلغراف لوالده يخبره بترقية وتلغراف الى اخوه بشير الذى يعمل الان فى الجنوب وتحديداً فى واو عاصمة مديرية بحر العزال برتبة ملازم ثاني فى قيادة بحر الغزال وطبعا اخوه عثمان الان فى السعودية مع فريق الهلال فى الدورة العربية المقامة فى الرياض باالسعودية ؟ وبعد مرور شهرين على الترقية جات الاشارة من الخرطوم بارسال المرشح للدرجة الاولى لحضور الدورة بعد خمسة عشر يوم ومدة الدورة شهرين ؟ وهنا اوصى العم احمد جيرانو على اولاده طبعاً الخالة سعيدة اصبحت بت بلد وكل نسوان الاشلاق اخواتها وجارتها الاولى سعدية ايضاً زوجها لسع فى المامورية يمكن كمان شهر تاني يقعد فى المامورية ؟ وارسل العم احمد جواب لوالده يخبره بانه بعد عشرة يوم سوف يكون باالخرطوم لمدة شهرين فى دورة درجة اولى واولاده يخليهم فى الفاشر عشان دى مهمة عسكرية ؟ استلم العم احمد آمر التحرك وغادر باالعربات التجارية الى نيالا وركب القطر وبعد وصوله بى اسبوع عاد عثمان من السعودية والهلال محتل المركز التاني فى الدورة لقد فاز فريق النصر السعودي باالمركز الاول بضربات الجزاء بعد انهاء المبارة بتعادل الفريقين هدفين لكل منهم وطبعاً كان مبسوط لانه فى هذة الدورة قدم مباريات عالية المستوى وكمان الهدف الذى تعادل به الهلال كان منهو هو حتى احد فرق المملكة طالب به ولكن حبه للهلال كان اكبر من اللعب لغيره وجاب معاهو ملابس الى الوالد والوالدة والصغيرة علوية وكمان الى اخته حليمة وابنها وزوجها وتلفزيون الى ابوه والنادي اداهو مائة وخمسين جنيه نصيبه فى المباريات ؟ وقال عثمان الى اخوه احمد اسمع يااخوي الحمدلله النادي اداني مائة وخمسين جنيه انا قلت اكلمك عشان تمشى معي الى بحري الى مصنع التلاجات ونشتري تلاجة للبيت قالوا هي بحدود التمنين جنيه ؟ قال ليهو خير وبارك الله فيك يااخوي خلاص خليها مفاجاة لناس ابوي ارحكاك نقول ليهم عندنا مشوار وان شاء الله بنرجع بعد ساعة ساعتين كدا وكانت المفاجاة الحلوة لوالد والوالدة التلاجة الجديدة طبعاً عثمان هو الذى دخل الكهرباء البيت ومرت الايام العم احمد باقى له اسبوع ويرجع الفاشر بعد ان اكمل الدورة وجاب نتيجة كبيرة وهم كلهم قاعدين يشوفوا فى التلفزيون ضرب الباب وقام عثمان يفتح الباب ؟ وكانت المفاجاة الجميلة حضور اخوه بشير وهناعمت الفرحة البيت وبعد السلام سال العم احمد اخوه بشير ان شاء الله خير نقلوك الخرطوم ولا شنو بشير لا ابداً جاي مامورية لمدة اسبوع وان شاء الله طائرة الاتنين الجاية ارجع واو وانتهى الاسبوع وعاد العم احمد الى الفاشر وسافر بشير الى واو بعد اكمال المهمة وان شاء الله لو كان فى العمر بقية نكمل
صورة العضو الرمزية
ابو الملكات
مشاركات: 942
اشترك في: الثلاثاء 2008.7.29 6:16 pm
مكان: الامارات

رد: العم احمد قصة طويلة في فصول

مشاركة بواسطة ابو الملكات »

بسم الله الرحمن الرحيم
وبه نستعين
الفصل الثلاثون
بعد عودة العم احمد من الدورة اوكل له قائده بان يكون المسؤول عن حركة العربات فى السرية وان يساعد البراد هو ( المكانيكي ) باللغة العامة حتى يكتسب خبرة اكتر ومرت الشهور وهو يجتهد فى عمله والكل يشيد به ؟ الان ياسر عنده تلاتة سنوات ونص وآمنه عندها سنة ونص وحان وقت تغير الفصيلة التى تعمل بالجنوب فى بحر الغزال وجاء دور العم احمد بالذهاب الى الجنوب وفى طابور صباح ذلك اليوم صرفت الاوامر الى افراد الفصيلة بان يجهزوا انفسهم بعد عشرة يوم يكون السفر الى الجنوب ؟ وارسل العم احمد تلغراف الى ابوه بان يرسل امه عشان تجي تسوق اولاده لانه قائم الجنوب بعد عشرة يوم ؟ وقام والده بارسال امه ووصلت قبل سفره بتلاتة يوم ؟ وقال لها العم احمد اسمعي يمة انت وسعيدة روحوا على راحتكم يوم تجوا تسافروا الجماعة هنا بوصلوكم حتى القطر فى نيالا ؟ وكان الوداع غادر مع دعوات امه والخالة سعيدة وركبوا القطر حتى البابنوسة ؟ وهناك جات اشارة بان القطر سوف يتاخر يومين فى الخرطوم وكمان يومين فى السكة يعنى اربعة ايام وجمع الرقيب المسؤول الفصيلة وآمر بعمل حراسة حتى مواعيد وصول القطار وقام العم احمد تقسيم افراد الفصيلة الى مجموعات لعمل الحراسة ؟ وفى اليوم الرابع وصل القطر بابنوسة تحرك منها الى واو وكانت سفرية مليئة بالمواقف ووصل القطار الى واو بعد ثلاثة ايام وكانت هناك عربات الجيش بنتظارهم فى المحطة وتم نقلهم الى مقر القيادة فى المنطقة العسكرية ( قيرنتي ) وكان أول عمل قاموا به هو زيارة المتحف العسكرى وهو عبارة عن غنائم الجيش من المتمردين من اسلحة و ملابس عسكرية برتب اصحابها وبعد ان خرجوا مباشراً الى المكتب لكتابة المعلومات عن كل واحد فيهم اقرب الاقربين ومكان سكنه وما شابه من معلومات ؟ والمفاجاة الاكبر كانت عند خروجهم من المكتب وجود اخوه بشير امامه وذلك لاانه اليوم كان ضابط نبطشي وبعد السلام والسوال عن اخبار الاهل قال له بشير باالامس كنت مع دفعة ضابط معاكم فى الفصيلة وقال لي بانه سوف يغير الى الفاشر بعد وصول الفصيلة التى تغير فصيلتهم وسالته عندي اخوى الكبير فى سريتكم الفى الفاشر يارب جاي مع الفصيلة حقتكم سالني عن الاسم وعند ذكرت له الاسم قال لي سبحان الله ايو العريف احمد سعد مع الفصيلة والله يااحمد لو ما كنت ضابط نبطشي كنت تلقاني اول واحد فى المحطة ؟ وقال بشير انا بكرة برسل تلغراف لعثمان اخبره بوصولك واو وجواب للوالده وتم تسليم الفصيلة مهام عملها وافراد الفصيلة المغيرة منحوا اجازة يومين لشراء ما يحتاجوا وهدايا الى اهلهم من اناتيك ؟ ومرت الايام وملاقات العم احمد مع اخوه متباعدة وذلك لظروف العمل العم احمد يوم فى راجا والاسبوع التاني فى التونج ورمبيك وهكذا ؟ وجاء جواب من اخوه عثمان بعد مرور شهر من وصول العم احمد واو يخبره فيه بان الخالة سعيدة حامل لها شهرين الان وعمت الفرحه العم احمد بهذة الاخبار السعيدة وطوالى مشى الى اخوه عثمان فى مكتبه يخبره بالخبر السعيد ؟ ومرت الايام والشهور وجاء جواب من الحاج سعد يقول فيه انه خلاص قدم استقالته من العمل وانه من الشهر الجاي خلاص ما عنده دوام وقع هذا الخبر على الاخوين بالرضاء ؟ وقال بشير اسمع يااخوي طبعاً انت الكبير والكلمة ليك بس عندي اقتراح عاوز اقول ليك وانت على كيفك ؟ العم احمد خير يا اخوى فى شنو ؟ يقول ابداً مافى حاجة كله خير انا قلت من الشهر الجاي دا انا والحمدلله ماهيتي كويسة وماعندي مصاريف كتير وانت عارف انا مابشرب سجائر ولا خمر والحمدلله عشان كدا انا قلت من الشهر الجاي انا كل شهر ارسل للوالد المصاريف وقول ليهو دى مصاريفكم كل شهر من احمد وانا اها قلت شنو ؟ احمد كويس بس انا كمان لازم اساهم معاك ؟ بشير ياخى يكفينى انك توافق ودى اعظم مساهمة منك ؟ العم احمد خلاص يااخوى الفيها خير ربنا يعملها وتقالدوا وبكوا ان شاء الله لو كان فى العمر بقية نكمل
صورة العضو الرمزية
ابو الملكات
مشاركات: 942
اشترك في: الثلاثاء 2008.7.29 6:16 pm
مكان: الامارات

رد: العم احمد قصة طويلة في فصول

مشاركة بواسطة ابو الملكات »

بسم الله الرحمن الرحيم

وبه نستعين

الفصل الواحد وثلاثون

مرت الشهور والجوابات بينهم ما انقطعت الوالد خلاص قعد فى البيت وكل شهر او اقل يمشى البلد يزور اخته الكبيرة واخوه الاصغر وهنا فى ام درمان كل اسبوعين تلاتة يزور اخوه البعده وهو كمان يجي يزوره وقربت ولادة الخالة سعيدة ؟ وكان العم احمد قبل كدا ارسل لوالده جواب قال ليهو فيه لو سعيدة جابت ولد سميه اسامة طبعاً هذا اسم الصحابي الجليل اسامة ابن زيد ولو جابت بت سميها فاطمة طبعاً اسم فاطمة بت رسول الله عليه افضل الصلاة والتسليم وجات البشارة الخالة سعيدة وضعت وجابت ولد والحمدلله هي والمولود بخير ؟ وقام بشير عمل سماية لولد اخوه فى نادي الضباط وبعد اكثر من اربعة شهور جاء آمر بنقل بشير الى القضارف وعليه ان يسلم نفسه خلال اسبوع من آمر النقل للقيادة فى القضارف وودع اخوه متمنياً السلامة واوصى دفعته بان يراعي اخوه احمد ؟ وقال له دفعته يا اخي احمد لايحتاج لوصية انسان مميز ورجل يعتمد عليه بس انت خلى بالك على نفسك وبعد مضى خمسة شهور جاء وقت تغير الفصيلة لقد قضت العامين بسرعة وحان وقت العودة الى الفاشر عشرة يوم جات الفصيلة وعادت فصيلة العم احمد الى الفاشر ؟ وفى خلال اسبوع تم منح كل افراد الفصيلة الاجازة السنوية وقبل السفر طالب العم احمد منحه بيت عشان يجيب معه اولاده بعد الاجازة استلم العم احمد البيت الجديد وكان من بيوت الطوب واشترى له عفش سراير ومراتب وبعض عدة البيت وترك الباقى حتى حضور الخالة سعيدة وهي براها تشتري باقى الاشياء ؟ ارسل العم احمد جواب لعثمان يخبره بان ينتظره فى محطة السكة حديد الاسبوع القادم وسافر العم احمد الى نيالا ونزل عند ابن عمه كمال يوم وسافر وفى الخرطوم قابله عثمان ومعه اثنين واحد زميله فى الجامعة والتاني زميله فى نادي الهلال وعثمان هو الان فى السنة الثالثة جامعة فى كلية الهندسة وكمان احد اللاعبين الاساسين فى الفريق القومي ؟ ويسال العم احمد اخوه اها ان شاء الله ناس البيت كلهم كويسين ؟ الحمدلله بخير بس فاقدين شوفتك يااخوي ؟ احمد وانت عامل كيف مع الجامعة والكورة الحمدلله موفق ان شاء الله ؟ اخبار بشير معاك ؟ عثمان طوالى معي وطبعاً انت عارف بشير ركبه الدبورة التانية ؟ اها حليمة مع زوجها وولدها ؟ عثمان تمام وباقي ليها شهر يمكن وتلدي وهم حسع فى الابيض نقلو طارق هناك بس اخبارهم معانا كويسين وكل مدة بيجوا ام درمان ؟ وناس البلد كيف عمتي وعمي واولادهم والاهل هناك ؟ عثمان تمام لكن انا طولت ما مشيت ظروف الجامعة والكورة بس ابوي بيمشى طوالى والان معاهم ؟ اها الجيران واولاد الحي وعم عثمان سيد الدكان ؟ تعيش انت الله يرحمه ليهو خمسة عشر يوم مات ؟ وصحبي الشايقي بتاع الدكان ؟ عثمان تمام وعم طه سيد الطابونة كويس بتوا الصغيرة عرسوها وولده كان فى السعودية رجع وعرسه الاسبوع الجاي وهنا وصلوا البيت طبعاً عثمان ما كلمهم بان احمد جاي اليوم حبا يعمل مفاجاة اصلوا هو بتاع مقالب فى البيت وفعلاً كانت مفاجاة سعيدة ليهم كلهم امه اخذته فى عناق طويل وهي تبكي وحمد الله بان ولدها رجع من الجنوب كويس ؟ وعاتبت ولدها مالك يااحمد ولدي ماتقول انك جاي ؟ والله كلمت عثمان دا كتبت ليهو جواب ؟ برى ياولدي فى خشمو ماجابو لينا كلو كلو وياسر متعلق فى رقبة ابوه وآمنه تعاين ساكت فى الزول دا منو وشالها العم احمد وهي كاشة منه وعلوية ما شاء الله بقت بت كبيرة وهنا اعلن اسامة عن نفسه ببكاء يعني انا ما شلتني ليه وشالوا وباسو ؟ وطبعاً الحاج سعد فى البلد ليهو يومين اصلوا اخته الكبيرة شوية حاسة ومشى يشوفها ؟ وقالت له امه بانها بتسافر الابيض عشان اختك دايرة تلدى وماشية احضر معها الاربعين وامسك ليها ولدها الخمجان دا مع ضحكه منها ؟ وفى المساء ذهب العم احمد لبيت العم عثمان وشال الفاتحة مع اولاده وغشى صاحبه الشايقي فى دكانو اتونس معه شوية ورجع البيت وعاد عثمان من النادي وقال عنده مذاكرة دخل طوالى وقفل عليه الباب ان شاء الله نكمل لو كان فى العمر بقية
صورة العضو الرمزية
ابو الملكات
مشاركات: 942
اشترك في: الثلاثاء 2008.7.29 6:16 pm
مكان: الامارات

رد: العم احمد قصة طويلة في فصول

مشاركة بواسطة ابو الملكات »

بسم الله الرحمن الرحيم
وبه ستعين
الفصل الثاني والثلاثون
بعد مرور اسبوعين من اجازة العم احمد قرر يمشى البلد يشوف عمته وعمه والاهل وباخذ ليهوكم يوم ويرجع طبعاً الخالة سعيدة فرحانة بالعودة للجذور وملاقات الصحبات وذكريات الطفولة والشباب ؟ وعاد بعد اربعة ايام فى البلد جميلة ؟ وقال عثمان الى اخوه احمد بكرة تمشى معي النادي اول حاجة تسلم عليهم وكمان نضرب تلفون من النادي لبشير فى القضارف اصلو قبل كم يوم اتصل بي هنا فى النادي ونمرته عندى عشان تسلم عليه ؟ وفرح العم احمد عشان حيتكلم مع اخوه وقد كان ؟ وقال العم احمد الى اخوه بشير اها يازول العرس بتين ؟ بشير عرس شنو يا اخوي بدري علينا ؟ ويرد العم احمد مالك الحمدلله شغال وعند ماهية كويسة الناقصك شنو العروس فى مليون واحدة بس انت وافق والباقى علينا انحنا ؟ ويرد بشير طيب بكلمك او بكتب ليك جواب ان شاء الله لما ترجع بالسلامة انا برسل ليك جواب وان شاء الله يصير خير ؟ تبقي للعم احمد عشرة يوم ويرجع ويسافر الى الفاشر مقر عمله وياخذ اولاده معاهو خلاص ياسر السنة الجاية بيدخل المدرسة ؟ قال الوالد الحاج سعد يا احمد انت اخوك بشير دا ما داير يتزوج ولا شنو اتكلم معاهو يا ولدي ؟ ويرد العم احمد ان شاء الله خير يا ابوي انا امبارح كنت بتكلم معاهو بالتلفون من النادى حق ناس عثمان فى القضارف وعدني انو يفكر فى العرس بس انتو شوفو ليهو عروسة حلوة وبت ناس ؟ وكانت الحاجة زينب بتسمع فى الكلام طوالى جات هوى العروس جاهزة بس يقول عاوز اعرس والله كمان متعلمة وكانت بتقراء فى الاحفاد خلصت السنة الفاتت وهادية ورضية وانا والله عاجباني شديدة واهلها ناس كويسين ومعروفين ؟ احمد طيب يمة ان شاء الله خير بس ارجع الفاشر واكتب ليهو جواب واشوف رده شنو وبعدين بوريكم البحصل شنو بس انتو ادعو ليهو عشان ربنا يوفقو ويسمع الكلام الحمدلله هو زول كويس من ما قام بس نشوف رايو عاوز شنو وانا عارفو بيسمع الكلام ؟ وعاد العم احمد الى الفاشر وطوالى استلم مكتب الترحيل فى السرية ومن ضمن مهامو ارسال العربات لتصليح فى النقل المكانيكى وتجهيز العربات للماموريات ومرت الايام والشهور والعم احمد فى عمله يبذل كل جهده وكان العم احمد براسل اخوه بشير طوالى وكل مرة يقول ليهو شوية وبكلمك عن موضوع الزواج وارسل العم احمد جواب الى اخوه بشير بان يعلن له رايو باالتحديد فى موضوع الزواج اصلوا ابوه زعلان وقال عاوز يشوف اولاده وارسل له بشير ؟ وقال خلاص يااحمد انا باخذ الاجازة شهر سبعة مع اجازة المدارس عشان ياسر بيكون فى الاجازة واجي عشان العرس وانا صراحه ما عندي اختيار معين مادام امي قالت البنت كويسة اكتب ليهم انت خليهم يمشو يتكلمو عليها وانت اخذ الاجازة وتعال للعرس خلاص يا اخوي ؟ العم احمد الله يرضى عليك ما انت دائماً كدا ؟ وفعلاً كتب العم احمد جواب للوالد بواسطة عثمان طبعاً وشرح ليهو قبول بشير الزواج وقال امه تمشي الى اهل العروسة وتكلمهم وقال لى انت تكتب لناس ابوي بهذا الموضوع يلا امي تمشى وتشوف راى اهلها شنو وترسلوا لى النتيجة عشان اخلى بشير يكتب ليكم واذا تمت الموافقة ان شاء الله شهري سبعة فى السنة الجديدة نجي للعرس طوالى ؟ تانى يوم ذهبت امه الى اهل البنت وكلمتهم بان ولدها بشير عاوز بنتكم ام البنت قالت ليها ان شاء الله بس نشوف كلام ابوها والبنت زاتها قالت ليها الحاجة زينب طيب يااختي بكرة بجي اشرب معكم شاي المغرب واسمع النتيجة وعشان ابو بشير يجي كمان يقابل ابوكم وان شاء الله خير وفى اليوم التاني ذهبت الحاجة زينب حسب المواعيد معاهم ؟ وهناك استقبلتها ام العروس بفرحة ونادت على بنتها يابت جيبي الشربات لخالتك ام احمد وجات العروس زى قمر اربعتاشر وسلمت على الحاجة زينب وقالت ليها الحاجة زينب تعالى هنا اقعدي جنبي يا بتي وقالت ام البنت خلاص ابوها قال ان شاءلله خير والبنت قالت ما عندها مانع ؟ وهنا اطلقت الحاجة زينب زغرودة طويلة معلنة عن فرحتها وقالت الى ام العروس خلاص بكرة ان شاء الله ابو احمد بيجى بعد صلاة المغرب يقابل ابوها والحمدلله كل شي تم تمام التمام وكتب عثمان جواب الى اخوه احمد يخبره بموافقة اهل البت وبدوره ارسل العم احمد لبشير رد الموافقة وقال ليهو يلا اكتب انت الى ناس ابوي وان شاء الله لو كان فى العمر بقية نكمل
صورة العضو الرمزية
ابو الملكات
مشاركات: 942
اشترك في: الثلاثاء 2008.7.29 6:16 pm
مكان: الامارات

رد: العم احمد قصة طويلة في فصول

مشاركة بواسطة ابو الملكات »

بسم الله الرحمن الرحم
وبه نستعين
الفصل الثالث وثلاثون
مرت تلاتة شهور على الموافقة ؟ وقدم العم احمد للاجازة السنوية وله الان من آخر اجازة سنة واربعة شهور وبشير ايضاً قدم للاجازة وعمت الفرحة الاسرة وعثمان الان فى نهاية امتحانات السنة النهائية فى الجامعة ومنها سوف يتخرج مهندس كهرباء وكمان ماشى كويس فى الكورة والاميرة علوية ماشة تالتة وسطى وطبعاً حليمة جاية تقضى اجازة المدارس بين اهلها وكمان تحضر عرس اخوها بشير واستعدت الحاجة زينب للعرس والحاج سعد كان فى قمة السعادة لقرب زواج ابنه بشير ؟ العم احمد ارسل لبشير يخبره بان يسافر قبل العرس عشان فى حاجات لازم امه تمشى تشتريها طبعاً هذا غير الشيلة والتى بشير كلم دفعته اخوهو يعمل فى الامارات ان يرسلها له وجات الشيلة قبل اسبوعين وهي الان فى بيتهم ؟ وصل بشير قبل احمد بعشرة يوم وطوالى من تانى يوم بعد وصوله قال الى امه يمة احمد قال لى امشى قبلي عشان امي دايرة ليها حاجات اها دايرة شنو هاك القروش امشى اشترى الشى الدايراهو ؟ كويس ياولدي بكرة خالتك بتجي وتمشى معى نشترى الحاجات وان شاء الله بعد وصول اخوك احمد نودى الشيلة طوالى ونحدد العرس ؟ وقالت ليهو امه ان شاء الله بكرة انا بمشي مع اختك حليمة وعلوية لى اهل العروسة واحدد معاهم يوم عشان تمشى تشوف العروسة وهي كمان تشوفك هي قالت شافتك يوم التخريج لكن انت ياولدى مابتعرفها عشان كدا تشوفها وتشوفك ؟ تنادي الحاجة زينب الصغيرة علوية يابت علوية ؟ هوي يمة تعالى جيبي لي موية فوق الشرقرق دا وتلقي الليفة فى كراب العنقريب البر داك جيبيها كمان معاك دايرة اسوي الجبنة لى ابوك وجيبي لى من الكانون الشاده فيه الملاح جمرات ختيها فى المنقد الصغير داك ؟ وتقوم علوية لتحضير المطلوب وطبعاً هي اصلها كانت قاعدة تغني وتضرب فى الصفيحة عاملاها دلوكة ؟ وتقول ليها امها علوية اقعدي ساكت تاني ماتضربي فى القروانة دي عشان ابوك عاوز يشرب القهوة ؟ وترد علوية سمح يمة ويشيل بشير البنبر ويمشى يجلس مع ابوه تحت ضل النيمة ابوه حسع ياولدي كان خليتنا قمنا نضبح ليك مالوا ولما يجي اخوك احمد كمان نضبح تاني خروف الحمد لله البهائم فى كتيرة عثمان يمشي يجيب عشرة ؟ يرد بشير لالا يا ابوي ما مشكلة خرفان بس انا عاوز افرح مع اخوي الكبير سوا يا ابوي ويرد ابوه الله يجعل فيكم البركة ؟ ويقول ليهو الحاج سعد ياولدي اها ان شاء الله كان ربنا حيانا السنة الجاية تمشي طوالى فى الاجازة البلد عشان كمان اهلك هناك يشوف عروسك يرد بشير حاضر يا ابوي انت تامر بارك الله فيك ؟ ومرت العشرة يوم وحضر العم احمد والخالة سعيدة واولادهم ياسر وآمنه واسامة وكان فى استقبالهم فى محطة السكة حديد بشير وعثمان وعلوية وصديق عثمان لؤي زميله فى الجامعة وهو ولد عز واهلوا ناس مبسوطين مازى عثمان ولد كادحين ناس قرعتي راحت وكان القطار وصل الساعة عشرة ونص صباحاً واستقلوا عربية صديق عثمان لؤي والى امدرمان ؟ وهناك كان الوالد الحاج سعد والوالدة الحاجة زينب وحليمة واولادها وبعد الوصول للبيت والسلام طلب صديق عثمان الاذن بالذهاب لانه مرتبط بموعد وهنا اخذ بشير بعيد شوية ودار بينهم الحوار التالى لؤي صديق عثمان ؟ اسمع يا اخ بشير طبعاً دي انا اول مرة اشوفك ولكن من خلال كلام الاخ عثمان انا عرفتكم كلكوم وهو ايضاً بيعرف بيتنا كلو يعنى انحنا اصدقاء من سنة اول جامعة وكمان بندرس انا وهو نفس الاختصاص الهندسة عشان كدا انا من بكرة متفرغ ليكم بالعربية اى مشوار المهم انا والعربية تحت تصرفكم اعتبرني اخوك زى عثمان واحد ؟ بشير اولاً شكراً على تلك المبادرة وصراحه برضوا فى جواباتو او مكالماتو معي بيحكي لى عنك حقيقة ما عندي تاني كلام اقول بس ربنا يقدرنا نجازيك وغادر لؤى صديق عثمان وجات الحاجة زينب اها يا احمد ولدي الحمدلله وصلت بسلامة وبكر العصر اهلك جايين من البلد عشان يودوا الشيلة ويحدد العرس ؟ العم احمد طيب يمة ان شاء الله خير ان شاء الله لو كان فى العمر بقية نكمل
صورة العضو الرمزية
ابو الملكات
مشاركات: 942
اشترك في: الثلاثاء 2008.7.29 6:16 pm
مكان: الامارات

رد: العم احمد قصة طويلة في فصول

مشاركة بواسطة ابو الملكات »

بسم الله الرحمن الرحيم
وبه نستعين
الفصل الرابع وثلاثون
خلاص تحدد اليوم بعد عشرة يوم يكون الزواج عشان يقدروا يجهزوا للعروسة حاجاتها وكمان زاتو عشان كل اهلهم يجوا واحدين فى مدنى واحدين فى القضارف تجار وكمان عندها عمها فى الابيض شغال هناك مهندس زراعي وخالها فى شندي محاسب فى مصلحة الاشغال ؟ يعني الخميس البعد الجاي العرس وذهب بشير الى مقر القيادة العامة وتلاقا مع بعض من دفعتو الشغالين فى الخرطوم ومن مكاتبهم ضرب تلفونات الى بعض زملاء الدفعة يدعوهم واسراهم الى حفلة زفافه والتي سوف تكون فى نادي الضباط بالخرطوم فى يوم الخميس الاول من الشهر الموافق 1\8\ اصبح البيت خلال هذا الاسبوع مليئ باالاهل ؟ وطبعاً لؤي جاب العربية لبشير ؟ بعد ان سال عثمان هل بشير عنده رخصة ؟ طبعاً عنده من زمان ؟ وقال لؤي لبشير خلاص العربية معاك حتي يوم سفرك انت وعروستك لقضاء شهر العسل ولعلمك انا حجزت ليك اسبوعين فى اركويت هدية من اخوك ما تكسفني ؟ بشير والله ما عارف اقول ليك شنو ربنا يقدرني على جزاك ودا من اصلك ؟ ويقول عثمان طبعاً بعد بكرة بتحضر مباراتنا مع اهلى الخرطوم يا بشير وما عندك حجة العربية معاك اها قلت شنو ؟ اكيد بجي ومعى لؤى ؟ عثمان يا بشير انحنا ماشين لؤي يوصلني وهو كمان عندو مشوار مع ناس بيتن وكمان بعد المشوار اسرته جاية تسلم على ناس البيت لعلمك اهلوا طوالى قاعدين يجوا وناس امي بمشوا ليهم ؟ بشير طيب تمشوا وتجوا بسلامة ؟ وتنادي الحاجة زينب ولدها بشير تعال ابوك دا عيان عنده حمي اظنها ملاريا ويجري بشير ؟ مالك يا ابوي ؟ الحمدلله ما فى حاجة تقول على ملاريا ؟ بشير خلاص البس جلابيتك وارح نوديك المستشفى العسكرى لالا يا ولدي بقت كويس ؟ بشير لا يا ابوي لازم نمشى الاسبتالية حسع يلا قوم ؟ ويرضخ الوالد سعد ويقوم يلبس جلابيتو والحاجة تلبس توبها عاوزة تمشى معاهم ؟ بشير انتي خليك يمة اقعدي خلي يمشى معي احمد وحليمة وانتي امسكى اولادها وان شاء الله مافى حاجة يدوا علاج وبنرجع حسع ؟ ونادي بشير ولد اخوه ؟ ياسر تعال اجري امشى لدكان الشايقى ونادي ابوك بسرعة قول ليهو عمي قال ليك تعال ؟ فعلاً مشوا المستشفى العسكري والحمدلله الدكتور طمن بشير مافى حاجة بس شوية تعب وصرف له دواء وبعد استعمال الدواء وفى اليوم التاني كان الحاج سعد تمام طبعاً احمد وبشير قالوا للحاج سعد شوف يا ابوي انت ما تتحرك بس سريرك وتبروكتك يعني الصلاة فى البيت قبلك وخروج برا مافى وما كان فى حلل غير يسمع كلامهم وان شاء الله لو كان فى العمر بقية نكمل
أضف رد جديد

العودة إلى ”سيناريو وأحـداث“