التساب قصة في فصول

يحتوي على كل أنواع القصص والأحداث الواقعية الشخصية .

المشرف: بانه

أضف رد جديد
صورة العضو الرمزية
ابو الملكات
مشاركات: 942
اشترك في: الثلاثاء 2008.7.29 6:16 pm
مكان: الامارات

التساب قصة في فصول

مشاركة بواسطة ابو الملكات »

بسم الله الرحمن الرحيم
وبه نستعين
التساب
الفصل الاول
بطل قصتنا آدم المعروف بأسم التساب بين ابناء الحي من مواليد حي أبو رؤوف في عام 46 سنة الفيضان المشهور ؟ لهذا سميا آدم باسم التساب من أب يعمل في صناعة المراكب وكانت احياء امدرمان العاصمة الوطنية كلها معروفة في تلك الفترة ؟ وكان جده والد والده قد نزح من كردفان معه مراح من اغنامه وضانه وذلك من اجل بيعهم في دار صباح ؟ وتزوج من احد بنات ام درمان واستقر في حي ابو رؤوف بجوار البحر كما كان يطلقون علي النيل زمان اسم البحر ؟ رزق جده بثلاثة اولاد وبنت ؟ آدم ؟ واحمد ؟ ووالده عبد الكريم وبنت اسماها جده فاطنة علي اسم امه ؟ توفى عمه آدم وهو صغير وكان في عمر العاشرة اثر مرض الملاريا ( الحمى ) ؟ وكان والده يحب اخوه آدم حباً شديد وعندما تزوج ورزق الولد اسمهو آدم تمنياً باخوه آدم الذى مات صغير ؟ اما عمه احمد لقد سافر الي كردفان وذلك للعمل في ارض والده التي ورثها من جده حتى لاتضيع منهم ؟ وعمته فاطمة عند بلوغها السادسة عشر جاء تزوجها ابن عمتها اخت ابوه بنت عمه والذي لم يراه والده وسافرت معه واستقرت في كردفان ؟ وعند بلوغ آدم سن السابعة ارسله والده للخلوة لتعليم القرآن الكريم وفي سن العاشرة طلب آدم من ابوه اخذه معه لتعليم صناعة المراكب حتى يساعده في تربية اخوانه ؟ وذلك والده كان عنده خمسة اولاد وبنتين ومع الحاحهو الشديد رضخ والده لطلبه واخذه معه لتعليم صناعة المراكب ؟ وبعد ثلاثة سنوات اصاب صناعة المراكب ركود شديد واصبح العمل قليل فيها ؟ كلم آدم والده بان يسمح له بالذهاب الي المنطقة الصناعية لتعليم نجارة الموبيلية وذلك مع صديقه يعقوب ابن جارهم قسم الله النقلتي الذي يعمل في المنطقة الصناعية صبي مكانيكي وطبعاً قسم الله هو صديق والده ايضاً ؟ وهنا كرس آدم كل جهده بتعليم النجارة وبعد عام ونصف اصبح المعلم يديهو عمل وصار له راتب اسبوعياً واصبح معلم يقوم بكل اعمال النجارة من عمل كراسي ودواليب وفضيات ؟ وفرح به والده فرح شديد وكان صاحب الورشة يعتمد عليه اعتماد كلي في اعمال الورشة والاتفاق مع الزبائن وذلك لانه ثقة في العمل وفي الامانة وانتعشت الحياة معهم ؟ وفي احد المرات جاء عنده احد الزبائن يطلب منه بان يعمل له دولاب ملابس و ايضاً فضية وكراسي جلوس ذلك لزوم زواجه واعجب الزبون بعمله وعرض عليه الزبون العمل معه في الوزارة التي يعمل فيها في وظيفة نجارلانهم يحتاجون فعلاً لنجار في الوزارة ؟ وقدم له طلبه وقبل وفي البيت وبعد مرور عام ؟ قال له والده خلاص ياآدم ياولدي الحمدلله انت الان بقيت شغال كويس وماهيتك كويسة تاني ماناقصك شي وعمرك قارب العشرين اها ماتعرس عشان نشوف اولادك ؟ ويرد آدم لسع شوية ياابوي بس اخواني يكملوا قراية بعدين انا بتزوج بس انت وامي ترتاحو والزواج ملحوق ؟ ويرد والده عمك امبارح جاني منه واحد من الابيض وقال بنته الحمدلله بقت عروسة وقال هو خاتيها ليك انت اها قلت شنو يا ولدي ؟ ويقول آدم انا يابوي ما عندي مانع بس اخواني يكملو قراية كلها ثلاثة سنة واخوي خالد يتخرج وبعدين انا اعرس وطبعاً زمان كان اكمال الثانوي غاية ابناء الطبقة العاملة منها الطالب يتقدم للكلية الحربية او كلية البوليس اوالعمل كاستاذ اوموظف محترم ؟ ويقول له والده خلاص الله يبارك فيك يا ولدي انت اخذ اجازة وامشي شوف البلد وكمان شوف بنت عمك ؟ ويرد آدم طيب يا ابوي من بكرة بقدم للاجازة وان شاء الله لوكان في العمر بقية نكمل
صورة العضو الرمزية
ابو الملكات
مشاركات: 942
اشترك في: الثلاثاء 2008.7.29 6:16 pm
مكان: الامارات

رد: التساب قصة في فصول

مشاركة بواسطة ابو الملكات »

بسم الله الرحمن الرحيم
وبه نستعين
الفصل الثاني
اخذ آدم الاجازة وكانت اربعة وثلاثون يوماً وهي الاولي له بعد مرور عام من عمله ؟ ارسل آدم تلغراف الي عمه بواسطة ابنه الهادي يخبره بوصوله الابيض بعد غداً بالقطار وقام بشراء الهدايا الي ابناء عمه وعمته وايضاً الي عمه احمد وعمته فاطمة وركب القطر وسافر ؟ وفي محطة السكة حديد قابله عمه وعمته اولادهم وكانت فرحتهم به كبيرة وذبح عمه في اليوم الاول خروف فرحاً بقدوم ابن اخيه وفي اليوم التالي ذبح زوج عمته ايضاً خروف ؟ وتوافد كل الاهل لشوفتة ابن عبد الكريم اخ احمد وذلك لانها المرة الاولي التي يزور فيها كردفان ومرت الايام سريعة ؟ وفي احد الامسيات تكلم آدم مع عمه بخصوص الزواج وابدا رغبته بزواج بنته كلثوم ولكن عليه ان ينتظر حتى يتخرج اخوه خالد بعد عامين ويقوم بالصرف علي البيت بعد العمل وبعدها سوف يتزوج وافقه عمه ؟ واحضر الماذون واعلان قرأن بنته الي ابن اخوه آدم وفرحوا كل الاهل انقضت الاجازة سريعة ؟ واستعد آدم للسفر عائد الي امدرمان محمل بكل خيرات كردفان من قنقليز(تبلدي) وام قاره(كركدي) وسمن بلدي مع تحيات الاهل الي والده ؟ وكلم آدم والده بتفاصيل كل ما جرى بينه وعمه بخصوص الزواج وعقد القرآن وفرح والده كثيراً لهذة الاخبار السارة وحمد الله كثيراً ؟ عاد آدم للعمل بعد انقضاء الاجازة وهناك في العمل طلب منه مديره باختيار نجار آخر للعمل معه وذلك لحوجة المصلحة وقام آدم باحضار زميله في العمل وهو نجار ماهر للعمل معه وتم تعينه وتم زيادة ماهية آدم واصبح هو المسؤول الاول في قسم الصناعية بالمصلحة ومرعام وخالد في دراسته متفوق وباقي له عام ويكمل الثانوي وايضاً اخوه البعده يوسف مجتهد في المدرسة وفي تانية وسطى والبنت مريم التي بعد يوسف هي في رابعة الابتدائي وايضاً شاطرة في المدرسة ام عائشة في اولي ابتدائي اما سليم والصغيرة خديجة في البيت ؟ وابتدا آدم العمل في بعض اساس البيت من كراسي وترابيز لتجهيز عفش البيت وكان يعمل بعد عودته من العمل في العصر حتى المغرب وكان يساعده صديقه وزميل في العمل في بعض الاحيان ؟ وايضاً اصبحت امه تجهز الي زوجة ابنها بشراء اساس البيت من ادوات منزلية وذلك من المصاريف التي كان يعطيها آدم لها لمصاريف البيت وكانت امرة حكيمة توفر منها لمساعدة ابنها مرت الايام سريعة وتبقى لخالد خمسة شهور ويمتحن للشهادة السودانية واصبح خالد لا يخرج من البيت بل كل وقته هو للمذاكرة وكان آدم سعيد باهتمام اخوه بالدراسة وجات الامتحانات وبتفوق نجح خالد ؟ وقال آدم الي اخوه خالد اها عاوز تعمل شنو يا اخوي ؟ ويرد خالد عند صديقي وزميلي ابوه يعمل امباشي في البوليس وقال انه سوف يقدم اوراقه الي كلية البوليس وانه كلمه عني وقال له ابوه خلاص جيب شهادتو اقدمهم مع بعض اها قلت شنو يا اخوي اقدم للبوليس ؟ ويرد آدم خلاص يا اخوي ربنا يساعدك ويقبلوك في كلية البوليس فرح خالد بموافقة اخوه الكبير وفي اليوم التاني شال خالد شهادته وذهب مع صديقه الي والده وقدم الاثنين لكلية البوليس ؟ وبعد عشرة ايام تم اخطارهم بالحضور للمعاينة والامتحان بتوفيق من الله اجتازو الاثنين المعاينة وتم قبولهم بكلية البوليس وعليهم الحضور الي مباني الكلية يوم السبت القادم لتقديم انفسهم الي قائد الكلية ؟ وهنا كلم آدم والده بان اخوه خالد قدم لكلية البوليس وتم قبوله وانه بعد ثلاث سنوات يتخرج ضابط وعليه تقديم نفسه يوم السبت لكلية البوليس ان شاء الله وفرح والده وامه وان شاء الله لو كان في العمر بقية نكمل
صورة العضو الرمزية
ابو الملكات
مشاركات: 942
اشترك في: الثلاثاء 2008.7.29 6:16 pm
مكان: الامارات

رد: التساب قصة في فصول

مشاركة بواسطة ابو الملكات »

بسم الله الرحمن الرحيم
وبه نستعين
الفصل الثالث
مرت اربعة شهور وانتظم خالد في كلية البوليس ؟ وفي احد الامسيات قال عبد الكريم الي ابنه آدم خلاص ياآدم الحمدلله اخوك اشتغل يلا اكمل زواجك ؟ ويرد آدم طيب يا ابوي في اجازة المدارس نسافر كلنا الي الابيض ونعمل العرس ونجيب معنا العروسة ؟ ويقول له ابوه لا ياولدي امشي انت وامك وانا بقعد بحرس البيت ؟ ويقول آدم الي ابوه والله العظيم انت اول واحد تسافر وانا من بكرة بقدم للاجازة عشان تطلع لي مع اجازة المدارس ونسافر كلنا ؟ واخيراً يوافق والده وقال له خير ياولدي نسافر كلنا ؟ ويرسل آدم تلغراف الي عمه بواسطه ابن عمه الهادي الذي يعمل بناء في مصلحة الاشغال بالابيض يخبره بانهم في اجازة المدارس سوف يحضروا كلهم للعرس ان شاء الله ؟ وفرح الاهل في الابيض بقرب وصولهم وخاصة كلثوم العروسة ومرت الايام وجات الامتحانات ونجح اخوانه في مدارسهم كلهم وخالد في كلية البوليس في تقدم ؟ وحانت ساعة السفر ذهب آدم وقطع تذاكر القطار الي ابوه وامه واخوانه وهو طبعاً عنده تصريح له والي زوجته من المصلحة التي يعمل بها وكانت رحلة القطار جميلة ورائعه لا تنسى وذلك نسبة لسفر امه اول مرة كردفان وامه اخت ابوه بنت خالتو من ناس امدرمان وهي لم ترى كردفان من قبل وايضاً اخوانه اول مرة يزورو اهلهم في الغرب وكانت دهشة اخوانه بما يرونه من خضرة وفي المحطات من اشياء تباع وتاخر القطار يومين وذلك لوجود امطار تمنع السفروصبحوا اليومين من اجمل واروع الايام التي علقت بالذاكرة ؟ وعند وصولهم كان الاهل في استقبالهم في المحطة وتعانق الاخوين احمد وعبد الكريم عناقاً طويل وحار ابكا الحاضرين من الموجودين بالمحطة وذلك لانهم لهم اكثر من خمسة وعشرين سنة لم يلتقيا وهناك في البيت عند وصولهم نزل الهادي ابن احمد وجري وجاب الخروف وحلف لا يدخلوا قبل ان يذبح الخروف وعمه والاولاده ينطوا الذبيحة حسب تقاليد وعادات اهلهم في كردفان ؟ ومرت خمسة ايام ضيافة اليوم هنا وبكرة هناك ؟ وبدات مراسم الزواج والكل في فرح وسرور ومرت ايام العرس سريعة وتبقى اسبوع ويرجع آدم الي عمله ؟ واجتمعت الاسرة وقال احمد والد العروسة والاخ الاكبر لعبد الكريم بان اخوه عبد الكريم لازم يقعد شوية في البلد حتى يتعرف علي اهله وقال انه سوف يحضره بنفسه الي امدرمان بعد قضاء شهرمن الان وقبل عبد الكريم بقرار اخوه احمد وارسل آدم تلغراف الي اخوه خالد يخبره بالعودة بقطار الجمعة القادمة وجهزت ام العروسة حالها من اجل السفر مع بنتها وغادر العروسين واهلهم مدينة الابيض في ذلك الصباح المشرق مع دموع الاهل بالفرحة بالعروسين والاماني الطيبة لهم بالسعادة والبنين ؟ وكان خالد وصديقه في اجازتهم الاسبوعية من الكلية الخميس والجمعة وذهب معه صديقه الي محطة سكة حديد وذلك لاحضار اخوه وعروستة وكمان امه واخوانه ونبهرت العروسة كلثوم من ما رات في الخرطوم العاصمة ؟ وسال خالد ابوي وينو ؟ وترد امه اخوه قال يقعد معاهم شوية شهر وهو بيجيبو براهو ؟ وطبعاً خالد لم يرى زوجة عمه من قبل وفي البيت قام خالد وصديقه بذبح الخروف فرحاً بقدوم اخوه العريس وجاء اهل امه والجيران واهل صديقه وزميله في كلية البوليس وفي المساء اقاموا لهم حفلة وكان خالد قد اتفق مع احد الفنانين الشباب ابناء الحي وكانت حفلة رائعه اسعدت الجميع ان شاء الله لو كان في العمر بقية نكمل
صورة العضو الرمزية
ابو الملكات
مشاركات: 942
اشترك في: الثلاثاء 2008.7.29 6:16 pm
مكان: الامارات

رد: التساب قصة في فصول

مشاركة بواسطة ابو الملكات »

بسم الله الرحمن الرحيم
وبه نستعين
الفصل الرابع
عاد آدم لعمله بعد يومين من العودة وتلقى التهاني من العاملين معه في المصلحة ؟ ومرت الايام وعاد ابوه من الابيض مع اخوه بعد انقضاء الشهر ؟ وبعد اسبوع رجع عمه هو وزوجته وذلك لانه شغاله بالزراعة الموسميه موسم الخريف ولابد من تواجده هناك ورعايته الزراعه بنفسه حتى لايضيع موسمه هباًء ؟ ومرت ستة شهور وظهرت اعراض الحمل علي كلثوم عاد آدم من الشغل ونادته امه ؟ تعال ياآدم انا دايراك وذهب اليها ؟ نعم يايمة شنو ؟ قالت له اقعد جنبي ؟ اها يايمة ؟ اسمع ياولدي البنت دي حامل ما تزعلها لو قالت ليك كلام حار استحملها دا الوحم يا ولدي ؟ ويرد آدم حاضر يمة مابسالها اصلي مهما عملت والحمدلله انتي كلمتيني ؟ وفرح آدم بحمل زوجته وارسل آدم تلغراف الي ابن عمه الهادي يخبره بحمل كلثوم ؟ ومرت فترة الوحم بصعوبة والان عادت المياة لمجاريها واصبحت الحياة عادية بينهم في البيت وعادت كلثوم الي طبيعتها السمحة واصبح شغلها الشاغل ما تحمله في بطنها ؟ ولانها بكرية ارسل آدم عشرة جنيه لعمه من اجل ان يرسل زوجته لحضور ولادة بنتها ؟ واكتملت فرحة كلثوم بوصول امها وكان آدم عامله ليها مفاجاة ولم يكلمها بحضور امها ؟ وبعد خمسة عشرة يوماً من وصول امها وضعت كلثوم بنت جميلة وبعد الاربعين عادت امها الي الابيض محملة بالهدايا من ام آدم ومن خالد ؟ وكما يقولون جات المولودة برزقها بعد مرور شهرين من ولادتها طلبهو مدير المصلحة يعرض عليه تقديم اوراقه للمصلحة وذلك هناك خطة اسكان جديدة لكل العاملين في الحكومة في امدرمان وتحديداً منطقة المهدية مدينة الثورة الان فرح آدم كثيراً ؟ ولكنه اخبر مديره بانه لايملك الان المبلغ الكافي لشراء الارض والبنيان ؟ اخبر المدير هناك سلفية لكل طالب ارض وقدرها اربعمائة جنيه تقطع منهم بالاقساط لمدة ثلاثة اعوام للبناء ؟ واخبر آدم ابوه الذي بارك له وتمنى له التوفيق وايضاً كلم اخوه خالد ؟ وبعد شهر وعملية القرعة منح آدم قطعة الارض وبدا في عملية البناء ؟ وقال له اخوه خالد اسمع يا آدم انت طبعاً ربيتني مع الوالد والان جاء الدورعشان ارد الجميل ؟ ويرد آدم اسمع يا خالد العملته دا واجب وانت اخوي وانا الحمدلله ظروفي كويسة والمصلحة ادتني سلفية يعني ما محتاج وبعدين انت زاتك اتخرج وقدم عشان يدوك قطعة ارض ؟ ويقول له خالد برضوا دا ما يمنع اني اساعدك وانت اخوي الكبير ؟ ويرد آدم خلاص لو احتجت حاجة بكلمك ؟ اصبح آدم من العمل طوالي علي البيت يشوف العمال عملوا شنو جديد وكمان محتاجين شنو من الطلبات ويرجع قريب المغرب ويلاقي الامورة الصغيرة غادة آخر بكاء عاوزة يشيلوها علي طول ؟ وبعد صلاة المغرب يجي اخوه يوسف ويطلب قروش عشان بعد بكرة عندهم في المدرسة رحلة الي بيت الخليفة وحديقة الحيوانات ( جنينة النزهه ) عاوز عشرة قروش ؟ وتجي اخته ست النساء مريم ايضاً عندها طلبات للمدرسة ؟ وايضاً جات عائشة تطالب بزيادة مصروفها كمان بكرة عشان عندها صحبتها عازماها فطور ؟ ويضحك آدم ويقول لها حاضر يا ستي ؟ طبعاً كل ذلك لان آدم مكلمهم بان لا يطلبوا من ابوه شي او خالد اي حاجة عاوزنها يجوا عنده هو بيجيبها ليهم ؟ وهناك طبعاً اخوانه الصغار الطيب وابراهيم طلباتهم بسيطة هي الحلاوة والداردمة ؟ وكم مرة طلب خالد من آدم بان يساهم معه في مصاريف البيت ؟ وآدم يرفض ؟ ويقول آدم لخالد اسمع يا اخوي انت الان طالب قروشك علي قدر مصاريف لبس واكل ؟ بعدين انت لم تتخرج اتحمل المسؤولية كاملة بس حسع خليني انا براي والحمدلله ظروفي كويسة وان شاء الله لو كان في العمر بقية نكمل
صورة العضو الرمزية
ابو الملكات
مشاركات: 942
اشترك في: الثلاثاء 2008.7.29 6:16 pm
مكان: الامارات

رد: التساب قصة في فصول

مشاركة بواسطة ابو الملكات »

بسم الله الرحمن الرحيم
وبه نستعين
الفصل الخامس
مرت الشهور والعمل في بناء البيت ماشي تمام ؟ وخالد ايضاً ماشي في الكلية تمام ؟ ويوسف جاء الاول في فصله ؟ ومريم ست النساء الثالثة ؟ والاميرة عائشة الخامسة ؟ وطبعاً اسم الاميرة هذا يطلقه عليها دوماً اخوها آدم ؟ وارسل الهادي ابن عمه احمد جواب يخبره بانه بعد الموسم الزراعي سوف يتزوج بنت عمته فاطمة علوية وفرحت الاسرة كلها لهذا الخبر السعيد ؟ وارسل آدم رده الي ابن عمه يعرفه بان الاسرة كلها سوف تحضر العرس بس عليه قبل العرس بشهرين يعرفه هو عشان ياخذ الاجازة مع العرس ؟ وبعد شهرين من الاخبار السارة رجع آدم من الشغل ووجد كلثوم زهجانة وطوالي قالت ليهو ريحتك دي مكرهاني العيشة ؟ وهنا عرف آدم بان الامر فيه أنا طوالي شال بنته غادة والتي لها الان عامين ومشى الي امه طوالي بيهناك ؟ وضحكت امه وقالت ليهو مسكينة ياولدي انا عملت الاكل للبيت كلهو خليها ما تسالها كلثوم طيبة بس دا الوحم ياولدي اها عملت شنو في بيتك ان شاء الله البنيان ماشي كويس ؟ ويرد آدم الحمدلله يمة الشغل ماشي كويس حسع انتهيت من العتب وان شاء الله بعد بكرة بيعملوا الطوف التاني ؟ وتساله اخوك خالد مالوا الخميس الفات ما جاء خير يارب ؟ ويرد آدم قال يمة عنده امتحانات ويقاعد مع صحبه في الكلية بيذاكروا سو لكن الخميس الجاي بيجي ان شاء الله ؟ وتقول امه هوي اخوانك الصغار ديل الطيب وابراهيم قالوا عاوزين حاجات وانت قلت تاني ما يمشوا لي ابوك ؟ ويرد آدم حاضر يمة وينادي اخوانه تعال الطيب ابراهيم اها طلباتكم شنو يلا قولوا ؟ ويقول الطيب اولاد جيرانا جابوا ليهم عجلات نحنا كمان زاتو عاوزين عجلات ؟ ويرد آدم حاضر بعد بكرة الماهية وانا باخذكم انتم الاتنين ونمشي نشتري العجلات من السوق اها خلاص طبعاً انبسطوا الجماعة جروا يلعبوا ما خلاص بعد بكرة حيلعبوا بالعجلات مع اصحابهم ؟ وتقول امه اسمع ياولدي اخوك يوسف دا الايام دي ماعاجبي دايماً يتاخر برالبيت شوفه مالوا ؟ ويرد آدم حاضر يمة بس انتي ما تشيل هم الحمدلله يوسف ماشي كويس في دراسته انا اول المبارحة جيت متاخر شايفو مع اولاد الحلة قاعدين في تحت عمود النور بيتونسوا لكن بتكلم معاهو يمة بس انتي ما تشيل هم ؟ وتقول امه خلاص ياولدي ان شاء الله انا عاوزة اسافر الابيض قبال عرس ولد عمك اشوف عمتك اخت ابوك فاطنة قالوا تعبانة شوية امشي عشرة يوم وارجع ؟ ويرد آدم حاضر يمة بكرة بمشي اقطع ليك التذكرة وترد امه لالا خليها شوية كلثوم تبقى طيبة وبسافر ؟ ويرد آدم طيب يمة بس انتي قولي عاوزة تسافري اجيب التذكرة طوالي ؟ وترد امه بارك الله فيك ياولدي ؟ وتقول له امه خلاص ياولدي اقوم ارص ليكم الغداء امبارح ابوك قال معزوم غداء مع جاره عنده كرامه وصول ولده ما بيجي للغداء ؟ وتحضر ست النساء مريم والاميرة عائشة ؟ ويسال آدم اه طلباتكم شنو ؟ وتقول ست النساء عاوزين يوم الجمعة تودينا جنينة الحيونات قالوا جابوا فيل صغير وغزلان كتار ؟ ويرد آدم حاضر كلكم ان شاء الله تمشوا يوم الجمعة وناس امي وابوي زاتم واخوكم خالد كمان معانا يلا غسلوا ايديكم ونادوا يوسف والطيب وابراهيم وتعالوا نتغداء ؟ طبعاً امه بعد ما خت ليهم الغداء طوالي مشت غرفة كلثوم وشايلة الغداء عشان تتغدا معها والصغيرة غادة ماسكة في جلابية حبوبتها قام يوسف شال الصينية وداها وامه شالت بنت ولدها غادة وطبعاً الصغيرة فرحانة بانها مع حبوبتها ولا يهمها الباقين وان شاء الله لو كان في العمر بقية نكمل
صورة العضو الرمزية
ابو الملكات
مشاركات: 942
اشترك في: الثلاثاء 2008.7.29 6:16 pm
مكان: الامارات

رد: التساب قصة في فصول

مشاركة بواسطة ابو الملكات »

بسم الله الرحمن الرحيم
وبه نستعين
الفصل السادس
مرت الايام والشهور وكلثوم بقت كويسة وسافرت امه الي الابيض والحمدلله وجدت عمته كويسة وجات مبسوطة من الزيارة ؟ وخالد تبقى له سبعة شهور ويتم تخريجه والبيت خلاص قرب من الانتهاء وجات اجازة المدارس وسافر الجميع للعرس ما عدا خالد لانه علي ابواب التخريج ؟ وفي الابيض طلبت كلثوم من آدم بان يخليها تلد في الابيض مع ناس امها ؟ وطبعاً لم يرفض آدم ؟ وقالت غادة بسافر مع حبوبتها ما بتقعد مع امها في الابيض ؟ وعاد آدم مع امه وابوه واخوانه واخواته والصغيرة غادة ؟ ونزل آدم العمل بعد يومين وتبقى عشرة يوم واخوانه واخواته ينزلوا كمان هم المدارس ؟ وكان الباقي لحفل تخريج اخوه خالد اسبوعين ويصبح ضابط شرطة ؟ وهنا كانت فرحة والده وامه بتخريخ اخوه خالد كبيرة ؟ وجاء يوم التخريج واشترى آدم خروف بمناسبة تخريج اخوه خالد وعزم زملاء في العمل وصديقه الموظف المسؤل الذي كان سبب عمله في المصلحة ؟ وجاء من الابيض ابن عمه الهادي مع زوجته لحضورتخريج خالد وزيارة الاهل في دار صباح ؟ وبعد ثلاثة ايام استلم خالد عمله وكان في القسم الشمالي والذي هو قريب من بيتم ؟ وبعد شهرين جاء تلغراف الي آدم يبشره بولادة كلثوم وجابت ولد فرحت امه وابوه ؟ وقالت امه لازم تسافر تشوف ولد ولدها وتحضر السماية هناك وتشارك فيها بنفسها ؟ وطوالي آدم اداها خمستاشر جنيه وقطع ليها التذكرة واخبرها بان يسما المولود باسم صديقه الموظف المسؤل ازهري تقديراً لمساعده له وايجاد العمل له في الحكومة ؟ وطبعاً الصغيرة غادة فرحانة حتسافر وتركب القطر وتشوف امها واصبح تركيز آدم في بيته اكثر وانه خلاص اصبح البيت علي وشك الانتهاء من العمل فيه وعادت امه فرحانة ؟ وطبعاً الصغيرة غادة خلاص لقت اخوها الصغير وقالت عاوزة تعقد مع اخوها الجديد ؟ ومرت ثلاثة شهور وعادت كلثوم مع اطفالها الي ام درمان ؟ وجاء صديق زوجها الموظف المسما الولد باسمه مع اسرته للزيارة ومعهم هدايا الي الصغير و الاميرة غادة وسعد آدم لهذة الزيارة وايضاً ابوه وامه واخوه خالد ؟ وذلك آدم كان دائماً يتكلم عنه بالطيب وبعد اربعة شهور استلم آدم البيت وشاور والده هل ياجر البيت ويكون معهم قريب ولا يرحل الامر عندكم انتم الاثنين امي وابوي ؟ ويقول له ابوه احسن يا ولدي ترحل في بيتك البيت قريب ما بعيد وكمان الحمدلله اخوك خالد ياهو قاعد معانا وكل يوم وتاني بنكون مع بعض ؟ وكان خالد موجود وقال والله كلام ابوي دا صاح احسن تسكن في بيتك ونحنا طوالي معاك وانا كل يوم قبل الحضور للبيت بخشاكم ورحل آدم ؟ وطبعاً خالد كان جاب خروفين من قبل اسبوع واحد لناس امدرمان والتاني لناس الابيض لانهم قالوا جاين يباركم البيت وكمان يتفسحوا شوية في الخرطوم ؟ وزوجه الهادي ابن عمهم عاوزين يقابلوا بيها دكتورة نساء ولادة شاطرة هنا في ام درمان وصفوتها ليها من الابيض جارتهم وهي عالجتها والحمدلله حسع عندها ولد وبنت ؟ واستقر آدم باسرته في بيته الجديد وكون صداقات مع جيرانهم وكل اسبوع يمشي مع اولاده الي اهله في البيت الكبير ؟ ومرت سنتين وجاء نقل خالد الي الشمالية ؟ والان يوسف في اولي ثاوي مجتهد ومريم ثالثة اوسطى وعائشة في الصف الرابع ابتدائي وسليم في الصف الثاني ام الصغيرة خديجة السنة الجاية تدخل اولي ابتدائي ؟ واجتمع خالد بالاسرة قبل سفره وقال الي الوالد انا يا ابوي وضعت ليكم نصف الماهية كل شهر تجيكم في البيت ؟ ويقول له ابوه بارك الله فيك ياولدي بس دي قروش كتيرة ؟ ويرد خالد ابداً يا ابوي ما كتيرة ولا حاجة ولو احتجتوا اي شي بس يوسف يضرب لي تلفون وانا حاضر ؟ ويقول له والده اها يا ابوي العرس بتين دايرين نشوف جديدك قبل نموت ؟ ويرد خالد ربنا يديكم طولة العمر بس يوسف يخلص الثانوية ويدخل الجامعة انا بعد داك بعرس وكلها سنتين ان شاء الله ؟ ويرد ابوه ياولدي احسن تعرس حسع ؟ ويقول خالد يا ابوي الحمدلله آدم شال معك الحمل وهو صغير كمان خليني انا اتحمل المسؤلية واقوم بواجبي العرس ملحوق ؟ ويرد ابوه سمح يا ولدي الله يخليكم وان شاء الله لو كان في العمر بقية نكمل
صورة العضو الرمزية
ابو الملكات
مشاركات: 942
اشترك في: الثلاثاء 2008.7.29 6:16 pm
مكان: الامارات

رد: التساب قصة في فصول

مشاركة بواسطة ابو الملكات »

بسم الله الرحمن الرحيم
وبه نستعين
الفصل السابع
مرت الايام وشهور وخالد كل اسبوع يتصل بي اخوه يوسف ويعرف اخبارهم وآدم كل يومين تلاتة يمشي البيت الكبير يشوف امه وابوه واخوانه ويشوف كمان طلباتهم رغم خالد تارك لهم نص ماهيتو ؟ وجات امتحانات المدارس وكان يوسف من المميزين ؟ وجاء خالد يبارك ليوسف ويشوف والديه في اجازة الخمسة عشر يوم وكمان يخبرهم بانه خلاص ناوي للزواج بعد دخول يوسف الجامعة السنة الجاية وانه تعرف علي البنت بواسطة اخوها الذي يعمل معه في الشرطة ايضاً برتبة ملازم زميله ؟ وانه قال لوالديه انه اتفق مع اهل البنت السنة الجاية البنت تكمل هي الثانوية واخوه يدخل الجامعة ثم يتزوج وان شاء الله شهر ستة الجاي بيجي اجازة ياخذ امه وابوه عشان يشوفو البنت ويتفقوا مع اهلها علي الزواج ؟ وكانت فرحة الابوين كبيرة ودعوا له ان يبارك رب العالمين الزواج ؟ الان ازهري الصغير اصبح عندو سنة وسبعة شهور وظهرت الان بوادر الحمل علي كلثوم للمرة الثالثة ؟ وذهب آدم الي ابوه وطلب منه بان تجي امه وتاخذ كلثوم واولادها عشان هي حامل وما تعمل حاجة في البيت وطوالي زهجانة وهو كل يوم بيكون معهم وبالليل بيمشى يرقد في بيته ؟ وجات الاخبار من الابيض بان زوجة الهادي ابن عمه هي حامل وفي شهرها الرابع ؟ ومرت فترة الوحم الان بخير وعادت كلثوم الي بيتها وكانت فرحانة لحمل زوجة اخوها الهادي ؟ وهنا قالت الي آدم عليك الله خليني الدي في الابيض عشان احضر ولادة مرة الهادي وكمان تاني ما بقدر اسافر خلاص غادة السنة الجاية بتمشي الروضة ؟ ويقول آدم ان شاء الله خير بعد شهرين باخذ الاجازة وبوديك تلدي هناك خلاص مسبوطة ؟ وترد كلثوم وهي فرحانة ربنا يخليك لينا ؟ ومرت الايام سريعة وجاء وقت سفر كلثوم الي الابيض واخذ آدم الاجازة السنوية وسافر معها وفرح الاهل في الابيض بوصول كلثوم ؟ وخاصة زوجة اخوها لانها عرفت بانها سوف تلدي في الابيض عشان تكون قريبة جنبها ؟ وبعد عشرين يوم عاد آدم الي ام درمان وبعد وصوله بااسبوعين ؟ حضر خالد في اجازة ياخذ امه وابوه عشان يمشوا معه يشوفوا العروسة ويتفقوا مع اهلها ؟ كلها خمسة شهور ويوسف يمتحن وكمان العروسة تمتحن ايضاً ويتم العرس ؟ سافر الوالدين وبقى آدم في البيت الكبير مع اخوانه يرعى شؤونهم خمستاشر يوم ؟ وعاد امه وابوه وهم في غاية السعادة ومبسوطين من كرم اهل العروس وجاؤو من هناك بتمر البركاوي والقنديلة وكل خيرات الشمال ومرت الايام والشهور وحان وقت ولادة زوجة الهادي وايضا ولادة كلثوم ايضاً وجاء الخبر السار زوجة الهادي وضعت توام ولد وبنت وبعد اسبوعين وضعت كلثوم وجابت ولد وهنا اخذ آدم اجازة عشرة يوم وسافر يشوف المولود وتوام ابن عمه الهادي ؟ والامتحانات علي الابواب بنسبة ليوسف كلها شهر ونص وتبدا وكمان زواج خالد ومرت الثلاثة شهور ونص ويوسف احرز نتيجة طيبة وفرح والديه وقال الي اخويه آدم وخالد انا عاوز اقدم لكلية الطب وايضا خطيبة خالد نجحت ؟ وعادت كلثوم الي بيتها وغادة طبعاً مع بداية السنة تذهب الي الروضة وهي قريبة من البيت ؟ واكتملت الاستعدادات لعرس خالد وحدد موعد العرس يكون بعد اسبوعين وذلك حتي يحضر اهل ابو العريس من الابيض عمه وعمته واولادهم وايضاً يتجهزوا اهل امه من ام درمان عشان السفر الي الشمالية للزواج وجاء الموعد ؟ وسافر الجميع للعرس وكانت احلى ايام واجمل الليالي وذكريات لاتنسى عن النيل الخالد باقية في ذاكرة اهل كردفان ؟ وانقضت ايام العرس سريعة وعاد ناس كردفان وعاد ناس ام درمان ؟ وقدم يوسف اوراقه للجامعة وتم قبوله وتهيأ الصغار للمدارس ؟ ومرت الايام والشهور وخالد تمت ترقيته الي ملازم أول وتم نقله الي مديرية النيل الازرق والي سنجة وبعد مضي سبعة شهور ؟ يضرب خالد تلفون الي آدم في المصلحة يخبره بحمل زوجته اميرة وفرح والديه وآدم ويوسف بهذا الخبر السعيد ؟ واصرت امه للسفر لتشوف ولدها وزوجته ونادت ابنها الطيب عشان يمشي يكلم اخوه آدم انها ناوية تسافر الي خالد ؟ تعال يا الطيب امشي الي اخوك آدم قوليهو امي عاوزة تسافر الي خالد عشان يجي ويقطع لي التذاكر ويوديني المحطة وسوق معك اخوك ابراهيم ؟ وهنا يقول لها الطيب انا ما بسوق معي ابراهيم انا محاربو وتضحك امه وتقول ليهو حيريب الحرازمع المطر امشي ياولد وسوقو وتعالوا بدري ماتتاخروا ؟ ويذهب الطيب مع اخوه وباله مشغول بموضوع الحراز والمطر ؟ وبعد العودة وهم في العشاء يسال الطيب امه يعني شنو حيريب الحرازمع المطر يمة ؟ وتحكي لهم القصة ويضحك الجميع وان شاء الله لو كان في العمر بقية نكمل
صورة العضو الرمزية
ابو الملكات
مشاركات: 942
اشترك في: الثلاثاء 2008.7.29 6:16 pm
مكان: الامارات

رد: التساب قصة في فصول

مشاركة بواسطة ابو الملكات »

بسم الله الرحمن الرحيم
وبه نستعين
الفصل الثامن والاخير
عادت الوالدة بعد اسبوع في سنجة الجميلة ؟ ومرت الشهور وآدم في عمله وغادة علي ابواب الروضة ؟ وفي سنجة زرق خالد بمولود ذكر واسماه علي اسم ابن عمه الهادي والذي احبه خالد لدثمة اخلاقه ؟ ويوسف في الجامعة في تقدم وايضاً ست النساء مريم والاميرة عائشة هن من المتفوقات والطيب في الصف الرابع وابراهيم في الصف التاني ؟ طلب الوالد عبد الكريم من آدم قطع تذكرة للسفر الي الابيض من اجل يشوف اخوه الكبير وكمان ياخذ ليهوكم يوم مع ناس الابيض هناك ؟ وبعد مرور خمسة عشر يوم علي سفره جاء تلغراف الي آدم بوفاة والده متاثر بمرض الملاريا وسافر آدم وخالد من سنجة الي الابيض وبعد عشرة ايام عاد آدم لعمله وايضاً خالد رجع سنجة لعمله ؟ ومرت السنوات وآدم رزق بولد واسماه علي والده وخالد ولده الهادي في الصف الاول ابتدائي ورزق بتوام بنات ويوسف في السنة الاخير في الجامعة وست النساء مريم في ثالث ثانوي والاميرة عائشة في الصف الاول ثانوي والطيب في السنة الاخيرة في الوسطى وابراهيم في السنة الثانية اوسطى وبعد وفاة الوالد بسنة تخرج يوسف من الجامعة طبيب وتم تعينه وخالد ترقى ونقل للعمل في دارفور وتحديداً الي الضعين مسؤول مركز شرطة الضعين ؟ وآدم طلب منه في المصلحة السفر الي واو وذلك من اجل احضار خشب المهوقني وذلك لعمل مكاتب للمصلحة ؟ وهناك في الضعين استفاد خالد من وجوده بين عمالقة الادارة الاهلية الشيخ موسي مادبو ناظر عموم الريزيقات والناظر بابو نمر ناظر عموم البقارة وذلك لفضهم للنزاعات بين القبائل التي كانت تقوم بين المزارعين واصحاب الابقار بالطرق السلمية وهذا افاده كثيراً في عمله الشرطي ؟ وفي احد الايام عاد آدم متاخراً من الشغل ووجد امه راقدة مريضة في البيت وكان اخوه الدكتور يوسف في المستشفى طبيب مناوب ارسل اخوه الطيب لااحضار تاكسي للذهاب للمستشفى وهناك في المستشفى فاضت روحها الطاهرة بعد ساعة من وصولها وحزن الجميع وخاصة الصغار لفقدانهم امهم جاء خالد واسرته للعزاء وبعد الفراش ذهب خالد الي ادارته في رئاسة الشرطة طالب نقله للخرطوم وذلك حتي يكون قريب من العائلة وقبل طلبه وعليه العودة الي الضعين لتسليم خلفه المركز وكانت المفاجاة بان طلب الناظر موسي مادبو والناظربابو نمر بوجود خالد بينهم لانه انسان خلوق ومميز والكل في الضعين يحبه وذلك لتصرفه بحكمة في فض النزاعات التي كانت تحصل بين المواطنين وهذا ما جعل النظار يتفرغوا لمشاكل المنطقة بدل حل الخلافات ؟ وتمت ترقيته ترقية استثنائية من ادارة الشرطة لشهادة النظار عنه ؟ ومرعام وست النساء مريم نجحت بمجموع كبير لدخول الجامعة والاميرة عائشة ايضاً الي الصف الثاني ثانوي بتفوق والطيب وابراهيم ماشين في المدرسة تمام وابناء آدم غادة الان في الصف الرابع ابتدائي وازهري في الصف التاني ابتدائي وجدو عبد الكريم في الروضة وابناء خالد الهادي في الصف الاول والتومات هادية وراضية ماليات البيت شغب وصراخ ؟ ويوسف نقل الي مستشفى كسلا اخصائي باطنية وهناك تعرف علي زميلته طبيبة من بنات كسلا وطلب يدها ووافقت وايضاً اهلها ؟ وكلم يوسف اخويه آدم وخالد طالب حضورهم وسافر الاثنين وتم الزواج ؟ مرت السنوات وآدم رزق بي احمد وايمان وروضة ؟وخالد رزق بي وجدي واسامة ؟ ويوسف رزق توام ولدين حسن وحسين وايضاً رزق آخر العنقود ولد واسماه آدم علي اخوه ؟ وست البنات مريم اصبحت مذيعة مشهورة في احد القنوات المحلية وتزوجت وعندها بنتين ؟ والاميرة عائشة تعمل في احد البنوك محاسبة وهي الان مخطوبة الي احد اقرباء امها ؟ والطيب اكمل الجامعة وتخرج مهندس الكترونيات ويعمل في احد شركات الاتصالات ؟ وابراهيم ولانه الاصغر ترك الدراسة من اولى ثانوي وتعلم كهربة السيارات واصبح مشهور في مجاله ؟ وآدم نزل المعاش لبلوغه ثالث وستين سنة وغادة بنته البكر اكملت الثانوي وتزوجت ابن عمها اخو ابوها ابن عمه ورحلت الي الابيض ورزقت بولدين ؟ وازهري تخرج واصبح مهندس معماري ممتاز ؟ وجدو عبد الكريم الان في السنة النهائية في الجامعة وسوف يتخرج طبيب مثل عمه يوسف اما احمد وايمان وروضة يتابعون دراستهم في المدارس ؟ وخالد ايضاً نزل المعاش برتبة فريق اول شرطة وتم تعينه في مجلس الادارة الاهلية في كردفان ولده الهادي تخريج طبيب اسنان ويعمل في ام درمان والتومات في السنة النهائية كلية الاعلام ووجدي واسامة هم في المدارس ؟ ويوسف اولاده التوام الان في ثانية جامعة وآدم آخر العنقود الان في اولي ثانوي ؟ واصبح آدم كل يوم يجلس مع ابناءه واحفاده ويحكي لهم عن المعيشة زمان وانه بناء بيته دا بخمسمية جنيه بس وزمان كان الباص بتعريفة من ابو رؤوف الي سوق ام درمان وازهري رئيس الوزارء ماهيته كانت مئتين جنيه وين انتم حسع ولدكم لو عاوز يمشي المدرسة عاوز ليهو تلاتة الف يا حليل الزمن الاصيل ولكن نقول هكذا الحياة لا بد من التجديد مع اشراقة كل صباح استودعكم الله ولو كان في العمر بقية نلتقي في قصة اخري ان شاء الله
الاخوه الاعضاء الافاضل
اتمنى ان تكون نالت اعجابكم القصة والي اللقاء
في قصص آخري ان شاء الله لو كان في العمر بقية
كل الود والاحترام
أضف رد جديد

العودة إلى ”سيناريو وأحـداث“