روائع محمود الجيلي

مرجع لفطاحلة الشعراء

المشرف: بانه

صورة العضو الرمزية
سمر علي
مشاركات: 189
اشترك في: الاثنين 2013.3.4 3:23 pm
مكان: السودان

روائع محمود الجيلي

مشاركة بواسطة سمر علي »


البعرفك بجهلك ..أصحاب و أحباب من زمان .
. ما بحسو بيك في وجعتك .. و لا عن همومك بيسألو
و أغراب عليك يبقوا الحنان .. بالطيبة يمسحوا دمعتك..
حزنك تعيش و تكملو
الصدفة ذاتا مقدّرة ..و آخر طريقك من زمان
..معروف بيكون من أولو
عادي البيلاقوك ثانيتين.. و بعيشوا جواك بالسنين
..في ذكرياتك بفضلو
و عادي البيكونو معاك قراب.. يمكن تكون عشرة سنين .
.في ثانيتين يتحولو
خلي البعرفك يجهلك ..و المابتعرف حبو ليك..
في الدنيا أوعك تجهلو
الدنيا فيها محطتين.. في قلوب بتركب في الطريق..
و قلوب بفوتوا و ينزلو
و عيون تشوفا توصلك .. و عيون بحر عاتي و غريق
.. أصلا محال يوم توصلو
الدنيا ياها دي حالتا.. مستمتعة تحير قلوب .
. في ريدا قالو و أولو
و إنت البتسأل عن حبيب .. المشكلة بتنسى العليك .
.و الما عليكا بتعملو
صورة العضو الرمزية
سمر علي
مشاركات: 189
اشترك في: الاثنين 2013.3.4 3:23 pm
مكان: السودان

رد: روائع محمود الجيلي

مشاركة بواسطة سمر علي »

• بتخاف علي؟؟


بتخاف علي؟؟؟
على قدر خوفي عليك كتير
بتخاف علي؟؟
...
لو مرة جار بي الزمن
...و عيوني بالدمعات بكن
و اصبحت بين آهه و شجن
بتخاق علي؟؟

لو رحت مره من الطريق
لا رفقة حلوة و لا صديق
و السكة كلما تزيد تضيق
بتخاف علي؟؟
علي قدر خوفي عليك كتير
بتخاف علي؟؟
و أنا غير هواك ما عندي غير
بتخاف علي؟؟
يا قدري و أحلام المصير
بتخاف علي؟؟؟؟؟
صورة العضو الرمزية
سمر علي
مشاركات: 189
اشترك في: الاثنين 2013.3.4 3:23 pm
مكان: السودان

رد: روائع محمود الجيلي

مشاركة بواسطة سمر علي »

أسفاً

وعدتك و عمري ما نسيتك و لا بنساك محال أبداً.
.و مهما تغيب عن الميعاد..بقول يمكن يجيني غداً.
...
.و أستجدي الشمس تشرق .. و نيران شوقي ما همدن.
.و لمان شفتو حن علي.. حاسدات الغرام حسدن.
....ظهر لي طيفو نص الليل..و أعراض المحبة بدن.
.شفتو جميل خفيف الروح..ملاك من فوق و حل بدن..
و وسوس لي قلبي كتير.. وقال لي بكرة بتحسن.
.حبيبك لسه بشتاق ليك.. ده أصلا كان دلال و عجن.
.فرحت و رحت لي بيتو.. ويا أسفاً عليو أسفاً..
رحل ساب المحلة خراب..ولا عادت بلادي وطن.
.وسال دمي و كتبت حروف..على بابو الملاني شجن..
حضرت و عشمي كان ألقاك.. حضرت و لم أجد أحداً
صورة العضو الرمزية
سمر علي
مشاركات: 189
اشترك في: الاثنين 2013.3.4 3:23 pm
مكان: السودان

رد: روائع محمود الجيلي

مشاركة بواسطة سمر علي »

أطلّ من المشـــارق وجــه مي بنور مثـلـــما شمــس الضحي
وفــــرع بالمفـــــاتن قــد تدلى ويحــــكي لونـه خــــلك الدُجي
تحــــرّك كل قـــلبٍ كـــان يرنو بأجــــفانٍ يحـــــرّكها الظُــــبي
فقد نضجت ثمار الحسـن فيها و قلبي في الهـــوى ما زال ني
فوا أســفي إذا هي أعـرضــت و يا بشـــراي إن نظـــرت إلي
ويحــملها الجمــــــال بكـلّ تيهٍ على الأكــــتاف كي تقسو علي
و تســأل صاحـــباتٍ كنّ معـها أمات من الهــوى أم بعــد حي؟
فينظــــرن إحتقـــاراً و ازدراءً وباقي أدمـــــعٍ فـي مقـــــــلتي
ويخـــبرن الأمـيرة عن عذابي فترســــــل بسمــــةً وتقول كي
يراعـــي أنـني مــن دون ودي تهون الغالــــيات وكــــلّ شــي
و أني أعـــتلي قــمم المعــالي وأعـــطـــار الورود براحــــتي
وأني أظــمئُ المـــاء المحــلّى وأني قــد رويت الحســــن ري
كذا العـرف الذي يأتي دجـوجاً تعـــــــوَد أن يغـــــازل خصلتي
تفاخـــر بالمحـاســـن فـي دلالٍ و تكـــــوي بالصدود القلب كي
فقد حــنَ العـزول لسوءِ حـالي فما حـــــنّت وما ســــألت علي
فخذ بنصيحتي و أسمع لقــولي ودع حـــبّ النوافـــــــر يا أخي
ووجـــه قلبك الممــــلؤ بشــراً تجـــاه النـــور وضـــاء المحي
تجاه المصطفى من كـان هدياً ومن طـــويت له البيــــداء طي
ومن لولاه ما كـانت نجــــــــاةٌ و ما تـلـــيت تراتـيــــــل بــحي
فأن ســــاقتك أقــــــدار الإلـــه لروضـــــته فحـــــيي عني حي
ففي يوم الحساب يكون حسبي إذا ظهر المشــيب على الصُبي
وخــــــبـّره بـأني فـي حمــــــاه من الأهـــــوال إن غمـــت علي
بعدّ الماء والأحجـــار جمـــعـاً بعـــدّ الرمـــل في بيــــداء صي
صــــلاة الله والتســــــليم دوماً تسـير إلى الضريح مع الشُذي
و ما محمـــود أنشــد في مكانٍ أطلّ من المشــــارق وجــه مي
إلى من قــــال إني عـــبد ربــي وبشــــرٌ مثلكــــــم يوحـــى إلي
صورة العضو الرمزية
سمر علي
مشاركات: 189
اشترك في: الاثنين 2013.3.4 3:23 pm
مكان: السودان

رد: روائع محمود الجيلي

مشاركة بواسطة سمر علي »

يابت

يا بت منقرفة من هموم الدنيا والقشر اليباس
يا بت خلاص أنا جد فتر فيني الصبر
يا بت خلاص حترب مساماتي الجمر
يابت مشطفة من دموع العين وكت تبكيك فجر
يا بت خلاص ما ترجعي
و أغمس عيوني الباقة في بحرك و أعوم
كيتاً علي النجمات عشان النجمات بتضاحكن
ويتوسوسن لمان تكوني بعيدة وبشتهبك
يا بت منقرفة من هموم الدنيا والقشر اليباس
يا بت خلاص أنا يوم رحيلك شلت عكاز من صبر
سهران بحاحي الطيف قدر ما يفر بجبدو علي
أكان يطبظ عيوني الشايله منك طلة الصبحية
قبّال الشمس تتمغّى من نوما وتقوم
يا بت منقرفة من هموم الدنيا والقشر اليباس
يا بت خلاص أنا شفت قبّالك كتير لكنّو زيَك ما بجن
أيامي من غيرك سواد أيامي من دونك سكن
و انا جد سكن جواي شجن وكتين رحلتي من الوطن
يا بت خلاص ما ترجعي
يا بت خلاص انا ذاتي حاس إنو النفس مارق وراك
يا بت خلاص ما ترجعي
يا بت خلاص ما ترجعي
و أغمس عيوني الباقة في بحرك و أعوم
كيتاً علي النجمات عشان النجمات بتضاحكن
ويتوسوسن لمان تكوني بعيدة وبشتهبك
يا بت منقرفة من هموم الدنيا والقشر اليباس
صورة العضو الرمزية
سمر علي
مشاركات: 189
اشترك في: الاثنين 2013.3.4 3:23 pm
مكان: السودان

رد: روائع محمود الجيلي

مشاركة بواسطة سمر علي »

أيوة بخونك
أنا كذبت عليك يا غالية
أنا يوماتى حبيبتى بخونك
لما تغيبي بغازل طيفك
ولما تجينى بدوب في عيونك
أيوة بخونك مع بسماتك
مع رصات الدر في سنونك
أيوة بخونك بيك وبلاكي
وآسف جداً إنى بخونك
أيوة بخونك بينى وبينك
ولما تكوني بعيدة وسارحة
أيوة بخونك مع خصلاتك
وشعرك موجة ليلي الطامحة
أيوة بخونك وإنتى قوامك
هد قوام المهرة الجامحة
أيوة بخونك وعارف إنك
طيبة وإنك ديمة مسامحة
أنا لو خنتك مع زول غيرك
إلاّ أكون أنا واحد غيري
وإلاّيكون القلب إتبدل
وفكري إتغير من تفكيري
وإلاّ يكون الزمن إتحول
وإلاّ أكون موّت ضميري
أنا لو خنتك مع نظراتك
ما من حقك إنو تغيري
صورة العضو الرمزية
سمر علي
مشاركات: 189
اشترك في: الاثنين 2013.3.4 3:23 pm
مكان: السودان

رد: روائع محمود الجيلي

مشاركة بواسطة سمر علي »

غايتو جنس حلاوة. مشيها البي الهداوة

..كلاما يدوب محنة.. وعيونا تفيض شقاوة


غايتو عليها بسمة.. مالياها المحنة.

.و في إيديها رسمة..وفي أطرافا حنة..

قلبي إحتار معاها.. وعقلي وراها جنّ..

لا بالنار حرقت.. لا عايش في جنه


إتلاقينا مره..و عاملة علي تقيلة.

.عارفك مهرة حرة..و بت عزة و قبيلة

..ليه أيامي مُرة..وبي شوفتك بخيلة.

....خليك من نفورك..و أرحمي يا جميلة


غايتو عليها وقفة..يميل في المشية عودا..

لو لاقيتا صدفة..أحمر لون خدودا.

.كل الناس في كفة..و كفة معاي وجودا..

لكن يا خسارة.. بتخلف لي وعودا
صورة العضو الرمزية
سمر علي
مشاركات: 189
اشترك في: الاثنين 2013.3.4 3:23 pm
مكان: السودان

رد: روائع محمود الجيلي

مشاركة بواسطة سمر علي »


ناوي ارحل
ناوي أرحل..ناوي أسرق حبي من قلبك و أدسو

وتبقى تائه..و أي إحساس ريدة ما تقدر تحسو

و تبقى تسأل .. عن مشاعرك و عن معاني الريد و لونو

و تبقى تجهل..لي حلاوتو و لي سهر ليلو شجونو

و كنت أول.. سر جمالو و كنت سجانو و سجونو

و كنت أجمل..من خيالي و كنت روح شعري و عيونو

ناوي أرحل..و كل نظرة و كل ذكرى وراي أشيلا

ناوي أرحل..وإنت تفقد كل لحظاتنا الجميلة

ناوي أرحل..ناوي أبعد فجأة ما بين يوم و ليلة

ناوي أعمل..حاجة تمسح صورتي من جواك تزيلا

إنتهينا..بعد تعبنا بعد سنين في الريدة كملت

و أبتدينا ..نعيش ظروفنا و كل دروب الدنيا صعبت

و ما لقينا.. سوى المسافة و ما في يوم السكة قربت

و ما علينا..و ناوي أرحل و كل جراح الريدة نشفت
صورة العضو الرمزية
سمر علي
مشاركات: 189
اشترك في: الاثنين 2013.3.4 3:23 pm
مكان: السودان

رد: روائع محمود الجيلي

مشاركة بواسطة سمر علي »

يوم سفرك
و يوم سفرك تساهر بي ....مع هدومك ترص نومي

تشيل في شنطتك راحتي...وصعيبة الفرقة يا تومي
..........
أظنك يا الحبيب عارف ..حنيني اليك زائد كيف..

و لا شيتاً بعدل الراس..بلا ريحتك تعدل الكيف..

..وحاتك يا الحبيب مشتاق..و موجة الدمعة مابية تقيف..

و مشتاق في البحر غرقان..ومالك انت بره القيف
............
بعد مرت عليك ساعات ... تعبت من الحنين و النوح

و بيتخلل أنيني سكات... بعد ما دمعي يبدا يبوح

حرام يا نور عيوني الفات..تخلي وراك روح بتروح

وراك لو الفؤاد ما مات... بعيش طول العمر مجروح



...........................
تفوت من غير تودعني ..و تشمت فيني أشواقي

تخلي النوم يطش مني .. و أصلو عيوني ما تلاقي

خلاص كملت حزني وراك..بكوس لزيادة ما لاقي

ولا فاضل من الدمعات.. ولا من الشجن باقي
صورة العضو الرمزية
سمر علي
مشاركات: 189
اشترك في: الاثنين 2013.3.4 3:23 pm
مكان: السودان

رد: روائع محمود الجيلي

مشاركة بواسطة سمر علي »

انا إستأذن

طيب يا ناس أنا أستاذن..

. ما دام الدنيا بقت ناسات .

كفات ميزان ما بيتوازن

مادام الناس و احلاما بقت

ماشين في خطين بتوازن

مادام ساعات اليوم جاريات

خسرن جولاتن ما فازن

مادام عدّن سنواتنا كذب.

.نتجازى أنحنا و يتجازن

مادام بنعيش في زقاق لابدين.

.ميتين عايشين فيهو مجازاً

مادام بنشِّف ريق الطين.

.طيب يا ناس أنا أستاذن

مادام بنحك في ضهر الروح.

. أرواح لا دارن لا عازن

مالن واقفات في بداية الخط..

لا لحقن فاتن لا جازن

لا شبن متل النار في القش.

. لا خربشن الباب لا رازن

..مادام الحالة بقت كيف كيف..

طيب يا ناس أنا أستاذن
صورة العضو الرمزية
سمر علي
مشاركات: 189
اشترك في: الاثنين 2013.3.4 3:23 pm
مكان: السودان

رد: روائع محمود الجيلي

مشاركة بواسطة سمر علي »

طين العذاب:
مع إنو كل الناس سوا..وخلقوها من موية و تراب

لكن عيونك يا جميل..خلقوها من طين العذاب

ــــــــــــــــــــــــــــــــــــــــــــــــــ

مع انو كل الناس معاي..لكني في بعدك وحيد

مع انو ديمه بنادي ليك.. لكن خطاك بعدت بعيد

مع انو صدك لي كتير .. لكني مشتاق ليك شديد

و تعبت راجي المستحيل..و كأني بجري ورا السراب

ــــــــــــــــــــــــــــــــــــــــــــــــــ

مع إنو كل الناس سوا..وخلقوها من موية و تراب

لكن عيونك يا جميل..خلقوها من طين العذاب

ــــــــــــــــــــــــــــــــــــــــــــــــــ

راجيك تحن يا سيد هواي..راجيك يا مرضي و دواي

راجيك بحضن في الدموع..بتحدى في نيران أساي

راجيك يا المحبوب تحن.. و اتهنى بي قربك براي

ما قدرت أنساك يا جميل..ضيعت فيك حلم الشباب

ــــــــــــــــــــــــــــــــــــــــــــــــــ

مع إنو كل الناس سوا..وخلقوها من موية و تراب

لكن عيونك يا جميل..خلقوها من طين العذاب
صورة العضو الرمزية
سمر علي
مشاركات: 189
اشترك في: الاثنين 2013.3.4 3:23 pm
مكان: السودان

رد: روائع محمود الجيلي

مشاركة بواسطة سمر علي »

بتخيل يوم نحن الإتنين:
بتخيل يوم نحن الإتنين

ماشين في سحابة و متماسكين

و نعاين للناس و نتاوق

و نرسل ليهم شوق و حنين

و نوصي المطرة تبل الريق

ما تكسِر لينا بيوت الطين

و تسيل بالخير في زراعة الخير

و تفيض و تكفي المحتاجين

و نشكل بالغيمات أحلام

للشفع ديلك متلمين

و نشاور للعشاق من فوق

و نرسل طيف للسهرانين

و نسوي دليل لي كل أنسان

و نصب الضو للضهبانين

و نجهز لينا شمس بالليل

للزول الكايس لي نورين

و البسمة تكون بين نسمة ولون

بي شوفنا بنقسموا لي لونين

يا أبيض زي لون النية

يا أسود واضح و ماسخ و شين

بي حب و محنة معانا دوام

ايدين بالحنة و متشابكين

ماشين في سحابة أعلى الريد

مرات بي جناح الطير طايرين

يا نعمة رب لي زول ولهان
صورة العضو الرمزية
سمر علي
مشاركات: 189
اشترك في: الاثنين 2013.3.4 3:23 pm
مكان: السودان

رد: روائع محمود الجيلي

مشاركة بواسطة سمر علي »

زول بشوفك في عيونو و انت ابعد ما يكون

زول بيغرق في الأماني و انت تملاو بي الظنون
...
زول بعاند في ظروفو وباني من الفرحة كون

زول معلق من مشاعرو ومشتهيك حد الجنون

زول برييييدك من وريدو زول بصونك ما بيخون

زول بدفيك من لهيبو و صدرو اكتر من حنون

زول بيحميك من شجونو يسكنك جوا العيون
زول:
زول بيولع بيك ضلامو زول بيحرك بيك سكون

زول مقسم في قوامو زول جميل و حواجبو نون

زول بشوفك أحلى لوحه فيها من كل روعة لون

زول بيرسم ليك حياتو وانت يا رب الفنون

زول بقاسي معاك و يضحك بيك كل الهم يهون

زول بتصبح ليهو دنيا بين حواجبك و العيون

زول بحسك في القوافي و في تقاسيم الشجون

في زول بيكرهك المحبة و أصلو ما بحس بي هواك

زول بساسق في ظنونك و عمرو ما قشقش بكاك

زول بخليك تبقى ظالم في شعورك بي المعاك

زول بخادع بي العواطف و العواصف في سماك

زول بفكر يبني جنة و ما مهم بيك أو بلاك

زول يحسسك إنو عالي إنو فوق لي مستواك

زول يخلي دموع و حرقة لما يلبس توب ملاك

زول معاك عامل حبيبك و هو بيلعب بي وراااااك

زول بجدد ليك جراحك و كل يوم هالكك هلاك

زول تحس بي الناس تخافو و ما في زول في الناس هداك

زول يصور ليك بهجة و العزاب ظاهر هداك

زول بغير كل حياتك و تبدا تتكلم برااااك
صورة العضو الرمزية
سمر علي
مشاركات: 189
اشترك في: الاثنين 2013.3.4 3:23 pm
مكان: السودان

رد: روائع محمود الجيلي

مشاركة بواسطة سمر علي »


بسمع في غناها و برجِّع في شريطا

و أتخيل مشاطا و تسريحة شريطا

مناي أحرس عيونا بس لكن شريطة

أكون حارس خصوصي و بوليس بي شريطه

بتصحى مع المشارق و أنشط من نشيطة

بالأحلام غنية و أبسط من بسيطة

عالي علي نخيلا و رامية علي سبيطا

و لما أقول بريدا بتعمل لي عبيطة

و الخدين أزاهر و العينين خريطة

بسرح فيها و أغرق دائما في محيطا

صورة العضو الرمزية
سمر علي
مشاركات: 189
اشترك في: الاثنين 2013.3.4 3:23 pm
مكان: السودان

رد: روائع محمود الجيلي

مشاركة بواسطة سمر علي »



و أنا كان غبيتك يا دروب الريد بطش

و أنا كان ضهبت من العوينات و الرمش

أنا وين أمش؟؟

يا السمحة واضحة زي الشمش

صوتك كمنجات الحنين

صوتك هوى

صوتك دوا

صوتك محطات الأنين

صوتك روى

و لي صوتك إنتي النيل عطش

و الما سمع نمك مع الطير في الصباح

و الما سمع منك حلاوة الضحكة و الحكي و المزاح

في الناس طرش

ياطاعمة في عينيكِ قهوة و جنزبيل

يا ناعمة في خديكِ أزهار الخميل

يا شامخة في الطول و القوام

يا عالية زي شجر النخيل

فرشولك الدرب البسوقك بالقلوب

و كل الجمال عرشوهو من فوقك عرش

و الما بشوفك في بشارة الفال و في الشبال و في الدلوكة و السيف و البرش

في الريد مريض.. ما عندو إحساس بي قرش

و أنا يا أم وضيب

آمنت بالقسمة و نصيب

قاعد بصبّر في القلب بالريد

و واقف مندهش
صورة العضو الرمزية
السودانى الاصيل
مشاركات: 8054
اشترك في: الاثنين 2008.9.1 9:24 pm
مكان: المملكه العربيه السعوديه /جازان سحر الطبيعه

رد: روائع محمود الجيلي

مشاركة بواسطة السودانى الاصيل »

[align=center]سمر


بوست اكثر من رائع

كل القصائد جميله جدا

تسلمى ومتابعين[/align]
صورة العضو الرمزية
سمر علي
مشاركات: 189
اشترك في: الاثنين 2013.3.4 3:23 pm
مكان: السودان

رد: روائع محمود الجيلي

مشاركة بواسطة سمر علي »

قلت أكتب حاجة تانية حاجة لا حب لا غزل

بديت أفتش في المواضيع .. بديت أرصرص في الجُمَل

قلت أكتب في بلدنا.. تهت ما خليت محل

قلت أكتب في جروفنا و ليه بزيد سعر البصل

قلت أكتب في حروفنا .. وفجأة أشعر بالملل

قلت أكتب في المزارع..و لسه ما طلّاها طل

قلت أكتب في المصانع ..و لسه ما دور عجل

قلت أكتب في عمرنا.. لقيتني قصرت الأجل

قلت أكتب في أهلنا و يا حليل زمن الأهل

قلت أكتب في الشجاعة لقيتني ما بعرف بطل

قلت أكتب في الطهارة لقيتني بكشح في العسل

قلت أكتب في الشهامة لقيتني ماليني الخجل

قلت أكتب في شبابنا لقيتني غرقان في الكسل

قلت أكتب في زمنا .. لقيتو مرّ على عجل

قلت أكتب ذكرياتي و كلو ودّعني و رحل

قلت أكتب حلم باكر و فجاءة فارقت الأمل

قلت أكتب في السعادة ألقى دمعي براو نزل

قلت أكتب في طريقنا لقيتني ما ممكن أصل

قلت أكتب في الصداقة و عيني للباب إنقفل

قلت أكتب في الطفولة و بلقى كم طفل إنقتل

قلت أكتب مجتمعنا و كم مشاكل دايرا حل

قلت أرجع ليك أحسن أيوة برجع ليك أجل

لا هموم في حلمي بيك لا في ليت و لا لعل

وأفضل أهرب من عيونك و يوم أجيهن بي مهل

قلت أكتب في عيونك يا حلات أجمل محل

قلت أكتب فيهن أحسن و أحسن أرجع للغزل
صورة العضو الرمزية
سمر علي
مشاركات: 189
اشترك في: الاثنين 2013.3.4 3:23 pm
مكان: السودان

رد: روائع محمود الجيلي

مشاركة بواسطة سمر علي »

حكم الهوى
في الحلوة نضحك بالحنين..في المرة حبنا هو الدوا
جد ما مهم جور السنين..بس المهم نفضل سوا
...
افضل على عهدك دوام..مهما الزمان جار أو قسى
والقاكي انتي معاي ملاك..لا خاني مرة ولا نسى

حاباني في كل الظروف..مالياني* بي نورك مسا
وانا حافظة حبك في الضلوع..لا ضل قلبي ولا غوى

أهديكي أجمل أغنيات..احميكي من غدر الدموع
تشفيني من جرح الزمن..تحفظ خطانا من الرجوع

وارعاكي في ظلمة ظنون..نوقد صوابع الحب شموع
أحباب وما يفرقنا هم..ولا نرضى غير ما نكون سوا
صورة العضو الرمزية
سمر علي
مشاركات: 189
اشترك في: الاثنين 2013.3.4 3:23 pm
مكان: السودان

رد: روائع محمود الجيلي

مشاركة بواسطة سمر علي »


شاي المغربية في قمة بهاهو

و معالق تحرك في قلبي المعاهو

و السكر يشاغب في عيوني الملامح

يداعب في الكبابي و يلعب بي هواهو

و بقة و راها بقة في نشوة و سعادة

ندردش بالمحنة و أشرب من دواهو


شاي المغربية و الصينية تلمع

مقنن ريحتو تعجب و السادة المنعنع

بقة وراها بقة و البوخ البيطلع

و براد للمشاعر يشوف في الريدة و يسمع


شاي المغربية و الونسة الدقاق

طاعم و ما مطعم مسيخ طعم الفراق

و السكر مسكر و الجو ذاتو راق

و كان ظاهر علينا شهقة و اشتياق


شاي المغربية جاني نسيمو هب

وقبل اكب و اشرب كان القلب عبّ

و من نيران هواهو أبردو حبه حبه

شاي لي شاي بيفرق و تجمعنا المحبة
صورة العضو الرمزية
سمر علي
مشاركات: 189
اشترك في: الاثنين 2013.3.4 3:23 pm
مكان: السودان

رد: روائع محمود الجيلي

مشاركة بواسطة سمر علي »

السودانى الاصيل كتب:[align=center]سمر


بوست اكثر من رائع

كل القصائد جميله جدا

تسلمى ومتابعين[/align]
شكرا على المرور
:040: :040: :040: :040: :040:
:040: :040: :040: :040:
:040: :040:
:040:
أضف رد جديد

العودة إلى ”وثائق و شعراء“