حــرف جـر

يهتم هذا القسم بكل المعلومات عن وطننا الحبيب .

المشرف: بانه

أضف رد جديد
صورة العضو الرمزية
طلال الحكيم
مشاركات: 4056
اشترك في: السبت 2010.5.8 11:08 am
مكان: السعودية

حــرف جـر

مشاركة بواسطة طلال الحكيم »

صورة
صورة





لا شك أن الجميع يشعر ويسمع ويرى ما تعانيه البلاد هذه الأيام من غلاء طاحن وارتفاع أسعار ( أي شيء )
والسباق المارثوني المجنون لتجار الجشع وإستغلالهم لكل فرص الكسب الغير مشروع في ظل (حوجة الناس) (وغياب الرقيب) ..
أو بالأصح في ظل إنشغال الرقيب بالجري في أول السباق ...

لازمني إحباط شديد في هذه الفترة وأظن أن الإحباط ملازم للجميع ...
وأسوأ من الغلاء هو فقدان الأمل ...
إحباط أفقد الناس بهجة العيد ... ومسؤوليات لم تدع للسرور منفذا إلى قلوب الكثير من الآباء والأمهات .

وقفت وأنا في تلك الحالة البئيسة قرب أحد المتاجر ... لأشتري بعض الهدايا البسيطة (لأرسلها للأهل هناك)
سمعت بعض الأخوة(من بني جلدتي) يتحدثون بصوت مرتفع (كما هي العادة) ... ويتغالطون ...
وكان محور الموضوع هو ما آل إليه حال البلد ...
ومن بينهم رجل ( بدين جدا ) تبدو عليه آثار النعمة له لحية وجلباب يلمع ...
يتعالى صوته وهو يحلف ويقول (والله أنا جيت الشهر الفات من السودان والناس عايشين أحسن عيشة ... ياخي ده كلام ساي)
فترفع أصوات البقية بالإستهجان والتعجب ...
ولكنه مازال يصر على أن الناس في السودان يعيشون على اعلى مستوى من الرفاهية وأن كل السلع متوفرة وأن الغلاء (في المعيشة والإيجار والدواء والتعليم) هذا شيء طبيعي ...
ويضحك فيهتز ويهتز بطنه الأكرش ..
بدأت أعصابي تفلت مني شيئا فشيئا ً ...
حاولت أن أخرج مسرعا من هذا المتجر ولكن (الغبن) جعلني متسمرا في مكاني أرقب هذا الحوار بعينين ثاقبات ...
لم يكن من طبعي التحدث مع ناس لا أعرفهم أو التطفل على مجلسهم لكن هذا الرجل قال جملة جعلتني أفعل ما لم أفعله من قبل ...
قال في معرض حديثه العجيب المريب (يا جماعة نحن بلد إسلامي واي زول عندو مشكلة مفروض يقرأ سورة نوح ) !!!
فقال له أحدهم متعجبا : سورة نوح ؟!!
- آآآآي سورة نوح
هنا لم أجد مفر من الرد على هذا الرجل السمين ..
بعد أن إمتلأت غيظا ولم أعي بنفسي إلا وأنا أقول (رغم أني كنت أفهم قصده) :
- ليه سورة نوح بالتحديد يعني ؟
- أنت بس أقرأ سورة نوح وح تشوف .
- ح أشوف شنو يعني؟
- حتشوف كيف أمورك ح تتيسر .
- طيب أقراها كم مرة يعني ؟
- أقراها كتير
- لو حتتيسر أموري ... ممكن أقراها طول اليوم ... يعني ممكن أقراها 853 مرة مثلا ً ؟!!
- أنت بتهظر ولأشنو ؟
- والله أنت البتهظر
- أنت ما سمعت الآية ال في سورة نوح ال بتقول (فَقُلْتُ اسْتَغْفِرُوا رَبَّكُمْ إِنَّهُ كَانَ غَفَّارًا . يُرْسِلِ السَّمَاء عَلَيْكُم مِّدْرَارًا . وَيُمْدِدْكُمْ بِأَمْوَالٍ وَبَنِينَ وَيَجْعَل لَّكُمْ جَنَّاتٍ وَيَجْعَل لَّكُمْ أَنْهَارًا ) ؟؟؟؟ الناس ديل لو إستفغروا والله يبقوا أغنى ناس ... لكن الناس دي بتكورك ساي وما جايبة خبر ..

باغته بهذا السؤال :
- طيب أنت قاعد تقرأ سورة نوح كم مرة في اليوم ؟ فلم يجيب
- معنى كده أي زول غنيان حتى لو كان (حرامي ) بكون حافظ سورة نوح (صم) وأي زول فقران حتى لو إمام الجامع معناها أكبر ملعون وإبن ستين منافق .!!!
عم الصمت في المكان ... وأحسست بأن بقية الرفاق يدعموني بنظراتهم كي أوصل الحديث وأجيب على هذا الرجل الذي أتعبهم .. فقال بعد أن شعر بالحرج ..
- يعني أنت عندك إعتراض على كلام ربنا يازول ؟؟!!
- لا طبعا .. حاشا لله .. لكن دي طريقتكم دايما في الحوار لما تصلوا لنقطة حرجة بتخلطو الأمور وتدخلو الدين بطرق تدعم موقفكم ويكون الطرف التاني إذا وقف في صفكم (مسلم من الأبرار) وإذا إختلف في الرأي فهو منافق زنديق لا يفقه شيء في الدين .
- أنا هسه قلت ليك أنت زنديق ؟؟
ثم ضحك وتجلجل البطن الأكرش ..
حاولت أن أتشبث بهدوئي خاصة وأنه كبير في السن ويجب أن ألتزم بالأدب إحتراما لسنه ليس سمنته

فقلت بهدوء :
- طيب المعنى شنو لما تقول أنا معترض على كلام ربنا ؟؟
- ياخي أنت مالك ما قادر تفمهني ... انا طلبت من الناس تقرأ سورة نوح عشان يستغفروا الله وأمورهم تظبط ... بس كده
- طيب والنسوان والرجال العجايز الما بعرفو يقرو يعمل شنو ؟ الأطفال يعمل شنو ؟ الأميين يعمل شنو ؟
- والله يا خ يديل ليهم الله .
لحدي هذه اللحظة كنت أظن أنني يمكن ان اقنع هذا الرجل بشيء ..
أو على الأقل أفرغ ما بدواخلي من غيظ وشحنات سالبة فأردت أن أناقشه في الدين كما يريد هو
وكان سمته ومظهره بما له من لحيه يوحي بأن له علم فقلت له :
- يا سيد مافي داعي للجدل بس عايز أسئلك سؤال واحد ...
- إتفضل
- هل يوجد في كل حكام العالم الآن و السابقين واللاحقين حاكم أتقى من سيدنا عمر بن الخطاب ؟
- لا
- طيب كويس ..... هل في عام الرمادة سيدنا عمر قال للناس أقروا (سورة نوح) ؟؟؟


وكانت مصيبتي في هذا الرجل السمين المتظار بالدين عظيمة ...
فقد كان لا يعرف ماهو عام الرمادة ولم يسمع به من قبل ...
تجاوز الستين من عمره ويتشدق بالدين ولا يعرف شي عن عام الرمادة ..

فكان لابد لي أن أترك هذا المجلس فورا حفاظا على أشياء كتيرة .
صورة العضو الرمزية
طلال الحكيم
مشاركات: 4056
اشترك في: السبت 2010.5.8 11:08 am
مكان: السعودية

رد: حــرف جـر

مشاركة بواسطة طلال الحكيم »

أما عام الرمادة (لمن لم يسمع به)
فهو عام أصاب الناس فيه قحط شديد فيبس الزرع والضرع حتى تحولت الأرض إلى لون الرماد لذلك سمي بعام الرمادة

قال الطبري (كانت الرمادة جوعاً شديداً أصاب الناس بالمدينة وما حولها، حتى جعلت الوحوش تأوي إلى الإنس، وحتى جعل الرجل يذبح الشاة فيعافها من قبحها، وإنه لمقفر)

وقال إبن كثير (وقد روينا أن عمر عسَّ المدينة ذات ليلة في عام الرمادة، فلم يجد أحداً يضحك، ولا يتحدث الناس في منازلهم على العادة، ولم ير سائلاً يسأل، فسأل عن سبب ذلك، فقيل له: يا أمير المؤمنين، إن السُؤَّال سألوا فلم يعطوا، فقطعوا السؤال، والناس في همّ وضيق فهم لا يتحدثون ولا يضحكون)
أيضاً احتشد الناس من خارج المدينة وقدموا إليها يطلبون العون حتى قيل أنه خيم في أطراف المدينة حوالي ستون ألفاً من العرب
لا يجدون إلا ما يقدم لهم من بيت المال أو من أهل المدينة المنورة
وذكر أن عمراً كان يولم لهم كل ليلة حتى حضر في وليمة واحدة أكثر من عشرة آلاف .

طيب ..... ماذا فعل سيدنا عمر بن الخطاب ؟؟؟؟؟ هل طلب من الناس أن يقرئوا سورة نوح وأخلى بذلك مسئوليته ؟؟؟ هل جعل يأكل وحده حتى سمن بدنه وظهر كرشه ... هل قال (والله ياخ ديل لهم الله ) ؟!!!
وهو التقي الطاهر العفيف العالم الورع ... صاحب رسول لله وخليفة خليفة رسول الله وأمير المؤمنين ...

هل هؤلاء أقرب إلى الله منه ؟؟؟
هل هؤلاء أتقى وأعلم منه ؟؟؟
أم لم تنزل سورة نوح إلا في هذا العهد والأوان ؟؟؟؟؟

هذا هو الخلط المنفر للناس من الدين ... (هذه هي كلمة الحق التي أرادوا بها باطل)
هذا هو خطر التجارة بالدين ... تفرز مجتمعا حاكما متلاعبا بالنصوص على حسب هواه ونتيجة لذلك (أمة كاره للدين ) وملتزمة بأحكامه على مضض ...

قال الأمام الشافعي (والعهدة على الراوي) : لأن أتّجِر بالرقص خير لي من أن أتجر بالدين .

إذن ماذا فعل سيدنا عمر في هذا الموقف العصيب ؟
قالت الروايات :

لجأ الناس إلى أمير المؤمنين فانفق فيهم من حواصل بيت المال مما فيه من الأطعمة والأموال حتى أنفذه.

ألزم عمر نفسه أن لايأكل سمنا ولا سمينا حتى يكشف ما بالناس.
فكان في زمن الخصب يبث له الخبز باللبن والسمن ثم كان عام الرمادة يبث له بالزيت والخل
وكان يستمرئ الزيت ولايشبع مع ذلك .
فاسود لون عمر وتغير جسمه .

كذلك أكثر عمر بن الخطاب من التضرع والابتهال كما خرج لصلاة الاستسقاء عدة مرات وفي مرة استسقى بعم النبي صلى الله عليه وسلم العباس بن عبدالمطلب فلم تكد تنتهي الصلاة حتى امتلأت السماء بالسحاب

كتب إلى عمرو ابن العاص في مصر " واغوثاه ..واغوثاه .. واغوثاه " فقال عمرو ابن العاص والله لأرسلن له قافله من الأرزاق أولها في المدينه واخرها عندي في مصر

بعد أن استنفذ بيت المال ولم تنته الأزمة كاتب عمر الأمصار طالباً العون فجاءه المدد من أبي عبيدة عامر بن الجراح ومن أبي موسى الأشعري

فأرسل إليه عمرو بن العاص بألف بعير تحمل الدقيق، وبعث في البحر بعشرين سفينة تحمل الدهن، وبعث إليه بخمسةِ آلاف كِساء

وأرسل إلى سعد بن أبي وقاص فأرسل له بثلاثةِ آلاف بعير تحمل الدقيق، وبعث إليه بثلاثةِ ألاف عباءة
وأرسل إلى والي الشام فبعث إليه بألفي بعير تحمل الزاد، ونحوُ ذلك مما حصل من مواساة المسلمين لبعضهم

واستمر هذا الحال في الناس تسعة أشهر ثم تحول إلى الخصب والدعة
وأنتشر الناس عن المدينة المنورة إلى أماكنهم .


هذا هو الدين يا من يريد أن يتكلم بإسم الدين ... وإلا فأتركوا الدين وشأنه ... وافعلوا بعدها ما تشائون .
فيكفي ما كان من حروف جر جرت الناس إلى ما الله به أعلم.
صورة العضو الرمزية
طلال الحكيم
مشاركات: 4056
اشترك في: السبت 2010.5.8 11:08 am
مكان: السعودية

رد: حــرف جـر

مشاركة بواسطة طلال الحكيم »


قبل سنوات عديدة وعندما كنت في (تانية ثانوي) كنت فرحا ً بـ الزي الدراسي في ذلك الوقت
قميص ابيض وبنطلون بني ..وكانت الفتيات يرتدين الفساتين اللبنية أو الكحلية ..
ألوان جميلة (نظيفة) وهادئة ومتناسقة تساعد على إنفتاح العقل طلبا للعلم ..
كنت حريصا جدا على التأنق كل صباح قبل الخروج إلى المدرسة بملابسي المكوية ..

لكن في السنة التالية انقلبت الأمور وأختلط الحابل بالنابل ..
وأصدرت الحكومة بيانا ألزمت فيه جميع الطلاب والطالبات بلبس الــ زي العسكري ..
فلبس الجميع زي الصاعقة (المرقع والمبرقع )
وكان الهدف من ذلك كما قيل هو شحذ الهمم وبث روح الجهاد في الصغير قبل الكبير ...
وإنصاع الجميع للأمر بطبيعة الحال ... بما فيهم أنا ولكن على مضض ..

ومن الألوان التي تم تغييرها في ذاك الحين (على ما أذكر) ألوان الدكاكين ..
فيجب أن يكون الجدار باللون الأبيض وباب الدكان باللون الأخضر .. ولم نفهم ما هو السر في ذلك ..
وأيضا ألزموا المذيعين بلبس الجلباب والعمامة عندما يقرءوا النشرة الإخبارية
ولكن لم يلبث أن تم إعفاء المذيعين من العمامة بعد أن رأوا أن أكثرهم لا يحسن (لفها )
وإنما يلفوها بطريقة (أخنق فطس) و(زي ما تجي تجي)

لازلت أذكر تلك الحادثة المضحكة التي حدثت لي مع (حاجة العِـينة) ربنا يطراها بالخير .
في أول يوم لتطبيق لبس ال زي العسكري ..

حاجة العينة ... امرأة قاربت السبعين من العمر(في ذلك الوقت ) ... جارتنا ... وتربطنا بها قرابة
تعودت أن تجلس كل يوم (في الشارع) بعد الظهر في أيام الشتاء تحت ظل شجرتنا المطلة على الشارع ..
لم يكن يفصل بين بيتها وبيتنا سوى شارع صغير ..
تشرب القهوة عند الظهيرة ثم تجلس على (البنبر) ترقب المارة ...
تحاول أن تملأ فراغها بأي شيء فهي لم تـُرزق بولد ..
كنت أجلس معها قليلا في ذهابي وإيابي وأسمع حكاويها وأحاجيها المضحكة ...

وفي ذلك اليوم ... (أول يوم من لبس المبرقع والمرقع )... ذهبت إلى الدكان بالقرب من المحطة
ورأت الأولاد والبنات عائدون من المدارس فظنت أنهم عساكر ...
وبخبرتي الطويلة مع العجائز ... عرفت أنه لاشيء يخيف العجائز أكثر من شيئين (العساكر والعربات)
فمن المستحيل أن تقطع العجوز شارع الظلط إن أبصرت عربية حتى ولو على بعد 100 متر ..
وكذلك لا تتواجد في أي مكان فيه عسكري ..
عادت حاجة العينة مسرعة إلى ظلها وهي مضطربة ...
ولسوء حظي أني أتيت في تلك الساعة بتلك الملابس المرقعة والمبرقعة
إقتربت منها كي أسلم عليها كالعادة في كل يوم ... ولكن يبدو أنها لم تعرفني ..
فرأيت عيناها تتسع من خلف نظارتها السميكة ... وهي تحاول أن تغطي بطرف ثوبها شعرها المصبوغ بالحناء فأضحى أحمرا نحاسيا ..
لم يكن هناك شيء ينغص علي (الونسة ) معها سوى أن أذنها كانت (ثقيلة) .. فكنت أصيح بكل ما أوتيت من قوة حتى تسمعني
وبعد خمسة دقائق من الونسة أشعر وكأن (زمارة رقبتي) إنشرخت ..
بادرت بالسلام وبصون مرتفع:
- كيف حالك يا حاجة
نظرت إلي بريبة وهي تقول :
- إنت منو يا زول ؟
- يا زول ؟ إنتي ما عرفتيني ولأ شنو يا حاجة العينة ؟
- ما عرفتك أنت منو ؟
- يا حاجة أنت شربتي القهوة ولأ حاجة تانية ... أنا طلال .
- طلال !؟
- آآي
كنت في هذه اللحظة منحنيا ً عليها وهي في (بنبرها ) أحاول أن أدفع الكلام دفعا ً داخل أذنيها ..
فجأة أطبقت بيديها على (زمارة رقبتي) وهي تصيح :
- إت يا جنا متين دخلت الديش ؟
- جيش شنو يا حاجة العينة ... فكيني .
- إت زاتك معاهم ؟
وزاد الخناق حول عنقي فتملكني الفزع ولكن لم أشأ أن أضرب يديها المتجعدة فقلت بصوت مخنوق :
- مع منو ؟
- (وحاط الله) شوف عيني الحـِلة كلها إتملت ديش
- فكيني يا حاجة العينة
- حتى النسوان دخلن الديش
- فكيني ياخ
- الكتلو منو في الحلة دي وجيتو تكوسو ليهو ؟
- يا حاجة العينة مافي زول كتلو
- نان الدياشه ديل جو هنا لشنو ؟
والمصيبة أنها لا تسمع إلا بصوت مرتفع وأجد صعوبة في رفع صوتي والزمارة مخنوقة :
- فكيني يا العينة ... ديل ناس المدارس ياخ
- بتدخل الديش وما بتكلمنا ؟
- فكيني
- أمك عارفاك دخلت الديش يا السجم ؟
- فكيني
- وأمك لشنو ما بتحدثني ؟ الليلة تصبر لي
- فكيني
صرت أصيح بكل ما أوتيت من قوة فخرج علينا (عم عوض) زوج العينة
من داخل البيت بعدما أقلقنا منامه ... وكان عجوزا مثقفا ً دائم (التكشيرة) فصاح فينا :
- الكواريك دي شنو يا جماعة ؟
فأطلقت حاجة العينة سراحي عندما رأت عم عوض بعدما كادت أن تلفظ أنفاسي وهي تنظر لي شذرا ً...
قال عم عوض وهو (صاري وشو ) كالعادة :
- مالكم ؟ في شنو ؟
التقطت أنفاسي ولم أصدق أني نجوت أخيرا من فك الأسد .. فقلت :
- حاجة العينة دي قايلاني دخلت الجيش وما عارفة إنو دي هدوم المدرسة !!
فقال بصوت خفيض يعلم أنها لن تسمعه :
- ياخي دي مارضاني مرض .. مرض ..
وأخذ يردد الكلمات (بحموضة شديدة وكأن في فمه قشر ليمون)
- دي دايما فاضحاني ومارضاني ... عاملة شعراتا الحُمر ديل ؟
فأنفجرتُ ضاحكا ً ...
فنظرت إليه حاجة العينة بحدة وشعرت أن الكلام عنها وقالت :
- وأنت بتطنطن وبتقول في شنو كمان ؟
صاح في وجهها :
- ما قلت شي ... ح أقول شنو يعني ؟

ثم إلتفت إلي وقال بأسلوبه (الحامض الساخر ) :
- والله البلد بعد كدي بقت كلها عساكر ..نسوان على رجال ... والله تاني
نعومة وعجن مافي .. ما تعرف ... شي دفاع شعبي !! ... وشي خدمة
إلزامية!! .. وساحات الفدا !! وعرس الشهيد ... وأنتو هسه لبسوكم المرقع والمبرقع ...
لأ خلاس الناس دي بقت جاهزة ومدرّبة ... وحات حاجة العينة أم شعرن أحمر دي .. تاني أكان
فرقع لستك في السوق إلا تلقى الناس دي كلها إنبطحت في الواطة ..
لالا لا...لالالا ... خلاس بقو عساكر تب )

ضحكت ودخلت بيتنا وأنا أمسح على رقبتي التي خربشتها حاجة العينة ..

واليوم ........
أصاب الخرف (المتأخر) حاجة العينة فأمست لا تعرف أحدا ...
وأصاب الخرف (المبكر) كثيرا من الرجال فصاروا لا يذكرون شيء ...
وهناك عقول تم (تخريفها ) وتخويفها قسرا وقهرا ...
وأخرى رضت طوعا بالتخريف وحبا ً في التخاريف .
صورة العضو الرمزية
الوردة الحمراء
مشاركات: 11
اشترك في: الخميس 2011.3.24 12:07 pm
مكان: في العيون

رد: حــرف جـر

مشاركة بواسطة الوردة الحمراء »

(حاجة العِـينة) :d: :d: :d:
صورة العضو الرمزية
dream-lady
مشاركات: 25355
اشترك في: الجمعة 2011.4.29 10:32 pm
مكان: الرياض

رد: حــرف جـر

مشاركة بواسطة dream-lady »

ههههههههههههه

طلال بالله خشيت الديش؟ :d:

وخلاص ياريت يخلوا سورة (نوح)في المقرر عشان كلنا نسكن المنشية وكافوري banana.gif

كلام الله لايعلى عليه لكن كده ذوي الكروش بصبروا ذوي البروش
الدغري
مشاركات: 3592
اشترك في: الثلاثاء 2010.4.6 9:14 am
مكان: السعودية

رد: حــرف جـر

مشاركة بواسطة الدغري »

السودان ذاك الوطن المثقل بالجراح

نسال الله ان يفرج عنه ويفرج عن أهله
صورة العضو الرمزية
طلال الحكيم
مشاركات: 4056
اشترك في: السبت 2010.5.8 11:08 am
مكان: السعودية

رد: حــرف جـر

مشاركة بواسطة طلال الحكيم »

الأعزاء ... الوردة الحمراء .. دريم .....الدغري
مشكورين على المرور

وما عدمناكم
صورة العضو الرمزية
طلال الحكيم
مشاركات: 4056
اشترك في: السبت 2010.5.8 11:08 am
مكان: السعودية

رد: حــرف جـر

مشاركة بواسطة طلال الحكيم »

خبر :
اعتبر د. نافع علي نافع مساعد رئيس الجمهورية، نائب رئيس المؤتمر الوطني، الاعتداء الصهيوني بأنه زكاة تطهير وتطهر

صورة

وقال د. نافع خلال مخاطبته معايدة الوطني بدار الحزب - إن تحديات نهضة الإسلام كلها بمعاني التضحية والفداء صغيرة، وتجعل من أي إعتداء مثل الذي فعله الصهاينة الآن زكاة وتطهيرا وتطهُّرا. ودعا نافع للنظر والتدبر في مثل مناسبات عيد الفداء لتجديد الروح، وأوضح أن الابتلاءات تشير لبوادر النصر الكبير وتؤكد قرب موعده. وشكر د. نافع حضور القوى السياسية للمعايدة، ووصف المناسبة بأنها تزيل الحواجز.
(صحيفة الراي العام)


تعليق :

ترى عن أي زكاة يتحدث هذا الرجل ؟ وعن أي تطهير وتطهر؟!
وهل يعني هذا أن البلاد الآمنة أضحت مانعة للزكاة ؟
وعن أي نصر يتكلم ونحن أصبحنا لا نعرف ضد من نحارب أصلا
فقد إمتلأنا بالعداوات
أما المضحك المبكي فهي دعوته لنا بالنظر والتدبر في أيام العيد هذه لتجديد الروح ... روح (الضحية) أم أي روح ؟؟
في ظل ما تحيط ببلادنا من أزمات ... التي تحتاج لمعجزات للخروج منها
وفي ظل اليأس والأحباط الذي يلازمنا
نتمنى من كل مسئول عندما يبدأ بالتشدق بالحديث أن يتكلم ويصرح بتصريح (مسئول) وإلا ففي الصمت (رحمة) لنا من غيظ كظيظ
صورة العضو الرمزية
طلال الحكيم
مشاركات: 4056
اشترك في: السبت 2010.5.8 11:08 am
مكان: السعودية

رد: حــرف جـر

مشاركة بواسطة طلال الحكيم »

أما أطرف الأخبار فكان هذا :

( رئيس البرلمان السوداني أحمد إبراهيم الطاهر : لا يوجد أي اتجاه لمحاسبة وزير الدفاع أو إعفائه لأن الطائرات الإسرائيلية جاءت بدون إعلان مواجهة !)


لن نعلق ونتحدث عن هجمات إسرائل وأمريكا ...
بل نتسائل عن دفاعاتنا ( أين هي ؟؟؟)
ولن نتحدث عن مصنع الشفاء ... فذاك عهد ولى
ولكن ماذا عن ضربة بورسودان !! .. وعن وصول المتمردون إلى أمدرمان !!
ماذا عن إحتلال هجليج !!! ماذا عن ضربة اليرموك الأخيرة والتي يبدو أنها لن تكون الأخيرة !!
كل ضربة من هذه الضربات لم يفصل بينها وبين أختها سوى شهور قليلة !!
ثم ماذا عن التظاهر بالقوة وهز العصا ... وما فائدة عصاة لا تضرب إلا حاملها ؟؟؟
على كل حال : سنطلب من إسرائيل في المرة المقبلة أن تخبرنا بموعد الضربة ومكانها وعن عدد القتلى المطلوب حتى نحضرهم وحتى تعتبرهم الحكومة شهداء (كما إعتبرت قتلى اليرموك) .. (وهل يجدي الإعتبار أو الإعتذار)؟؟
ثم ننتظر ماذا سيفعل وزير الدفاع صاحب أجمل إبتسامة .
وسننتظر ...
صورة العضو الرمزية
نهر المحبه
مشاركات: 6170
اشترك في: الجمعة 2009.5.29 6:15 pm
مكان: في ارض الله الواسعه

رد: حــرف جـر

مشاركة بواسطة نهر المحبه »

السلام عليكم الاخ طلال

بصراحه بوست رائع جدا وبيتناول مواضيع مهمه جدا...


بخصوص الغلاء الحاصل وحتة انه الناس عايشه دي...

عموما الناس في السودان اصبحت كالاتي

عندك مال تتعلم تتعالج تترفه

ماعندك مال تتذل في المستشفيات وفي المدارس وفي اي حتة...

واحنا ساكتين وراضين على الوضع الاحنا فيهو ده

كل يوم الدنيا زائده واحنا ساكتين

فعلا زي ماقالو الشعب جيعان لكن جبان


صورة العضو الرمزية
نهر المحبه
مشاركات: 6170
اشترك في: الجمعة 2009.5.29 6:15 pm
مكان: في ارض الله الواسعه

رد: حــرف جـر

مشاركة بواسطة نهر المحبه »

احنا بنفتقد لشخص قلبه على السودان قبل مايكون قلبه على اي شيء تاني...

شخصيا اصبحت اتوقع من حكومتنا الكريمه اي شي سيء ممكن يتعمل...

كل مره بعد الضربه يجو يتفاصحو في التفليزيون ويقول ليك اجهزتنا رصدتهم

اذا انت اصلا شايف الحاصل المانعك من انك تتحرك وتحمي ارضك شنو؟؟

صورة العضو الرمزية
سماح بله
مشاركات: 35
اشترك في: السبت 2012.10.13 10:37 am
مكان: السودان

رد: حــرف جـر

مشاركة بواسطة سماح بله »

شكر لك طلال يارب اجعلنا من اهل القراء
يارب يسر امورنا وامور السودان
صورة العضو الرمزية
طلال الحكيم
مشاركات: 4056
اشترك في: السبت 2010.5.8 11:08 am
مكان: السعودية

رد: حــرف جـر

مشاركة بواسطة طلال الحكيم »

نهر المحبه كتب:
السلام عليكم الاخ طلال



بصراحه بوست رائع جدا وبيتناول مواضيع مهمه جدا...

بخصوص الغلاء الحاصل وحتة انه الناس عايشه دي...
عموما الناس في السودان اصبحت كالاتي
عندك مال تتعلم تتعالج تترفه
ماعندك مال تتذل في المستشفيات وفي المدارس وفي اي حتة...
واحنا ساكتين وراضين على الوضع الاحنا فيهو ده
كل يوم الدنيا زائده واحنا ساكتين
فعلا زي ماقالو الشعب جيعان لكن جبان


نهر المحبة
ربما فقد الشعب الأمل وخاب رجاه
فضياع الأمل وخيبة الرجاء أكبر باعث على الصمت
صورة العضو الرمزية
طلال الحكيم
مشاركات: 4056
اشترك في: السبت 2010.5.8 11:08 am
مكان: السعودية

رد: حــرف جـر

مشاركة بواسطة طلال الحكيم »

سماح بله كتب: شكر لك طلال يارب اجعلنا من اهل القراء
يارب يسر امورنا وامور السودان
اللهم آميييين .. مشكورة أختي سماح
ونسأل الله التيسير إنه نعم النصير
صورة العضو الرمزية
طلال الحكيم
مشاركات: 4056
اشترك في: السبت 2010.5.8 11:08 am
مكان: السعودية

رد: حــرف جـر

مشاركة بواسطة طلال الحكيم »

نهر المحبه كتب:
احنا بنفتقد لشخص قلبه على السودان قبل مايكون قلبه على اي شيء تاني...
شخصيا اصبحت اتوقع من حكومتنا الكريمه اي شي سيء ممكن يتعمل...
كل مره بعد الضربه يجو يتفاصحو في التفليزيون ويقول ليك اجهزتنا رصدتهم
اذا انت اصلا شايف الحاصل المانعك من انك تتحرك وتحمي ارضك شنو؟؟


جبريل الــ (واطه)

يحكى أن رجلا من الريف زار قريبا له يدعى جبريل في إحدى المدن
وكان جبريل يعمل في إحدى شركات البناء وصادف لحظة وصول الرجل الريفي وجود جبريل في أعلى المبنى الشامخ ذو الطوابق المتعددة
سأل الرجل عن (جبريل) فسار معه بعض العمال ليوصلوه إلى جبريل المتواجد في سطح المبنى
دخلوا به (المصعد ) الكهربائي ودائما ما يكون المصعد في المشاريع الحديثة (مكشوف)
وكان الرجل حديث عهد بالمدنية ولم يحدث أن ركب مصعدا
وعندما بدأ المصعد في العلو أصاب الرجل الذعر وهو يرى الأرض تبتعد والسماء تقترب
فأخذ يصيح بأعلى صوته (يا جماعة أنا عايز جبريل بتاع الـ واطه ما بتاع السما )

وكلمة واطه (لأحبتي من خارج السودان) الذين لا يعرفون العامية تعني (الأرض) وربما إشتقت الكلمة من الوطء أي الأرض التي يطئها الناس فسميت واطه .. والله أعلم

تذكرت هذه القصة عندما قرأت التعليق الرهيب للسيد نائب الرئيس الدكتور الحاج آدم يوسف
عندما قال في مجمل رده على الضربة الإسرائيلية (كانو ينزلوا لينا تحت في الأرض لحسمناهم بالسواطير)
إذن نتمنى في المرة المقبلة أن تواجهنا إسرائيل بـ (إسرائيل بتاعة الـ واطه) وليست بتاعة السماء

بسبب هذه المقولات أصبحنا (أضحوكة) كما قال أخي السوداني الأصيل ..
فالمنتديات العربية تعج بهذه القفشات خصوصا ً القفشة الكبرى والعبارة الأطرف من حكيم الزمان عندما قال (والأنوار كانت طافية)

نحن قوم ليست لنا يد ولا لسان ... والله المستعان
صورة العضو الرمزية
هجره
مشاركات: 5190
اشترك في: الاثنين 2010.10.18 12:16 pm
مكان: بلدى الغااالى

رد: حــرف جـر

مشاركة بواسطة هجره »

الوردة الحمراء كتب:(حاجة العِـينة) :d: :d: :d:

امها قالت فيها شعر

قالت دى العينة الطفت النجفة والرتينة

اظنك بتعرفى النجفه لاكن ما بتعرفى الرتينة

هههههههه :d:
صورة العضو الرمزية
هجره
مشاركات: 5190
اشترك في: الاثنين 2010.10.18 12:16 pm
مكان: بلدى الغااالى

رد: حــرف جـر

مشاركة بواسطة هجره »

[quote="طلال الحكيم"]
قبل سنوات عديدة وعندما كنت في (تانية ثانوي) كنت فرحا ً بـ الزي الدراسي في ذلك الوقت
قميص ابيض وبنطلون بني ..وكانت الفتيات يرتدين الفساتين اللبنية أو الكحلية ..
ألوان جميلة (نظيفة) وهادئة ومتناسقة تساعد على إنفتاح العقل طلبا للعلم ..
كنت حريصا جدا على التأنق كل صباح قبل الخروج إلى المدرسة بملابسي المكوية ..



الاخ الرائع طلال: وانت بتسرد فى الحديث والعقل معاك بيكون شايف المنظر :040:
************************************************************************
1/ : وأيضا ألزموا المذيعين بلبس الجلباب والعمامة عندما يقرءوا النشرة الإخبارية
استاذ عمر الجزلى وهو يلبس الجلبية ( لاكن ماشاء الله عليه وهو يذيع الاخبار :040:

2/ (حاجة العِـينة) ربنا يطراها بالخير .
بالرغم من انه اسم غريب الا انه جميل من الاسماء القديمه الجميلة الغير مكررة .
بتحكى امى فى اهلها وقالت ليينا زمان الواحدة لما تجيب بت ولا ولد بتقول قصيدة فيه ،( ذى العينة الطفت النجفه والرتينة ، اول ماذكرت الاسم اذكرت كلام الغالية وحكاويها).

3/ لم يكن هناك شيء ينغص علي (الونسة ) معها سوى أن أذنها كانت (ثقيلة) .. فكنت أصيح بكل ما أوتيت من قوة حتى تسمعني
وبعد خمسة دقائق من الونسة أشعر وكأن (زمارة رقبتي) إنشرخت ..
الله يجازى محنك اليوديك تكورك كدة شنو :l: :l: :l:


4/ والمصيبة أنها لا تسمع إلا بصوت مرتفع وأجد صعوبة في رفع صوتي والزمارة مخنوقة :

البركة الموديك ليها شنو ؟؟؟ :yar:

الرائع طلال: احيييك على مواضيعك القيمة الجميله التى تربط الجديد بالقديم.




[/font]
صورة العضو الرمزية
طلال الحكيم
مشاركات: 4056
اشترك في: السبت 2010.5.8 11:08 am
مكان: السعودية

رد: حــرف جـر

مشاركة بواسطة طلال الحكيم »

هجره كتب:
طلال الحكيم كتب:
الرائع طلال: احيييك على مواضيعك القيمة الجميله التى تربط الجديد بالقديم.




هاجر :d:
إطلالة مرحة وبهية
بس أنا قاعد أربط الجديد بالقديم كيف يعني؟؟
إنتي مفتكره عمري 800 سنة مثلا ؟ :004: :004:
أنا لسه عمر الزهور والهنا
لو ما قدرك يبقى أكبر منك بساعة ساعتين :d:
مشكورة على البهجة
وفعلا محتاجين ليها في أيام النكد دي ياخ
صورة العضو الرمزية
طلال الحكيم
مشاركات: 4056
اشترك في: السبت 2010.5.8 11:08 am
مكان: السعودية

رد: حــرف جـر

مشاركة بواسطة طلال الحكيم »

إلحاقا ً لما ذكرناه في مشاركة سابقة عن التعليق الخاص بنائب الرئيس عندما قال
(كانو ينزلوا لينا تحت في الأرض لحسمناهم بالسواطير)
نورد هنا هذا الكاركتير الذي نشرته إحدى الصحف
صورة

:d: شر البلية ما يضحك :d:
صورة العضو الرمزية
ليانا
مشاركات: 23
اشترك في: الخميس 2012.11.29 5:07 pm
مكان: الامارات

رد: حــرف جـر

مشاركة بواسطة ليانا »

بوست رائع اخي
نسال الله ان ييسر امور الجميع
شكرا اخي
أضف رد جديد

العودة إلى ”منتدى السودان العام“