رواية احلام مغترب علي شكل حلقات

يحتوي على كل أنواع القصص والأحداث الواقعية الشخصية .

المشرف: بانه

أضف رد جديد
محمد المك
مشاركات: 14
اشترك في: الأحد 2016.8.14 3:03 pm
مكان: السودان
اتصال:

رواية احلام مغترب علي شكل حلقات

مشاركة بواسطة محمد المك »

أحلام مغترب


::هذه القصة من نسج الخيال ولا تمت للواقع بأي صلة كما ان الشخصيات التي بها خيالية اذا حدث اي تطابق اسماء فأعرف انك لست بمقصود:::


الحلقة الاولي

✍محمد المك


......مشعل شاب أهلو مغتربين في السعودية قبل سنتين قال ليهم انا عاوز اقرا الجامعة في السودان واتخصص في مجال الحاسوب،،،في الاول اهلو رفضو لكن مع اصرارو وكلام حبوبتو ابوهو وافق لكن امو رافضة الموضوع بحجة انو السودان ما متطور في مجال الحاسوب والالكترونيات ....

::كل الناس عندها افكار انو السودان دولة متخلفة جدا ورجعية،،وهو من دول العالم الثالث ولكن لو غيرنا نظرتنا شوية حنلقي انو افضل المهندسين في العالم من السودان،،،افضى وامهر الدكاترة من السودان،،،قمة الاخلاق والوفاء بالسودان،،طيب المشكلة وين؟؟::::


......مشعل اكبر ولد عند ابوهو وعمرو 17 سنة،،بعديهو فاطمة 14 سنة،،وآخر العنقود ملك 10 سنين.....

....ابوهو هاشم عبدالله مهندس استشاري في شركة هندسية في السعودية اغترب قبل اكتر من 25 سنة،،وامو ناهد الطيب خريجة مختبرات،،،كان حصاد الغربة دي انو جابو مشعل وفاطمة وملك وبنو ليهم عمارة مكونة من 10 شقق في قلب الخرطوم،،فيها 8 دكاكين وكلها مؤجرة،،،من ضمن العشرة شقق مؤجرين 6 واربعة فاضيات عشان الاسرة والاولاد كل واحد فيهم شقة للمستقبل ان شاء الله....

......اخيرا وبعد مناكفات في البيت بين الاب بأنو الولد لازم يختار طريقو براهو ،،والام البتشوف انو السودان ما مناسب لمجالو وتاني انو حيمشي يقعد براهو في الشقة،،الجدة اختارت انها تمشي معاهو السودان وتقعد معاهو هناك.......

.....اتفقو علي انو مشعل وحبوبتو يسافرو السودان وابوهو يحصلن بعد اسبوع عشان يبدو اجراءات الجامعة،،،مشعل وحبوبتو وصلو السودان واتحركو علي الشقة واصلا كانت مجهزة بأثاث كامل،،،اخدو الليلة راحة وباكر حيمشو السوق يشوفو باقي متطلباتن والشي الناقص،،وبعد كدة ينتظر ابوهو لمن يحصلو وتبدا الرحلة في البحث عن جامعة مناسبة.....

يتبع
محمد المك
مشاركات: 14
اشترك في: الأحد 2016.8.14 3:03 pm
مكان: السودان
اتصال:

رد: رواية احلام مغترب علي شكل حلقات

مشاركة بواسطة محمد المك »

احلام مغترب

الحلقة الثانية

✍محمد المك

.....الصباح الحاجة عملت ليهو الشاي وفطرو واتحركو علي مراكز التسوق يشوفو باقي الحاجات الناقصة،،اشترو اي حاجة ممكن يحتاجو ليها،،ما خلو حاجة ما اشتروها.....

...... الاسبوع قضوهو فسح وتسوق،،،ما خلو حتة ما مشو ليها،،مقرن النيلين وجمال المنظر في التقاء النيلين واللوحة الساحرة الما بيحس بيها الا زول جاي من برة،،ونحنا كل يوم نشوف فيها وما ادتنا اي احساس،،،ومقرن النيلين لوحة ساحرة ......

ﺯﻫﻰ ﻣﻘﺮﻥُ ﺍﻟﻨﻴﻠﻴﻦ ﻫﻴﻤﺎﻥَ ﺿﺎﺣﻜﺎً
ﺗﺪﺍﻋﺒﻪ ﺍﻷﻧﺴﺎﻡُ ﻣﻦ ﻛﻞ ﻭﺟﻬﺔ
ﺗﺒﺮّﺝ ﻓﻴﻪ ﺍﻟﺤﺴﻦ ﻭﺍﻟﺤﺐ ﻭﺍﻟﻬﻮﻯ
ﻭﺗﺸﺒﻌﻪ ﺍﻷﻣﻮﺍﺝ ﻟﺜﻤﺎً ﺑﺨﻔّﺔ
ﻭﺃﺗﺮﻋﺖ ﺍﻷﺿﻮﺍﺀُ ﺭﺍﺣﺎً ﻣُﻠﻮّﻧﺎً
ﻓﻜﺄﺳﺎﻥ ﻓﻲ ﺩﻭﺡ ﻭﺃﺧﺮﻯ ﻟﺰﻫﺮﺓِ
ﺃﺩﻭﺭ ﺑﻌﻴﻨﻲ ﺗﺎﺋﻬﺎً ﻓﻲ ﺟﻤﺎﻟﻪ
ﺃﻫﻠﻞ ﻓﻲ ﺳﺮِّﻱ ﻭﺃﻫﻔﻮ ﻟﺴﺠﺪﺓِ
ﻭﺃﺣﺒﺲ ﺃﻧﻔﺎﺳﻲ ﻋﻠﻰ ﻗﻠﺐٍ ﻭﺍﻟﻪٍ
ﺗُﻐﺮِﺩ ﻓﻲ ﺃﺣﺸﺎﺋﻪ ﻛﻞ ﻓﺘﻨﺔ
ﺗﻨﺰﻩ ﻭﺍﺳﺘﺸﺮﻯ ﻭﺃﻗﻔﻞ ﺭﺍﺟﻌﺎً
ﻭﺃﺑﺪﻯ ﺣﻴﺎﺀً ﻣﻦ ﻟﻬﻴﺐ ﻭﻧﺸﻮﺓ

-ليه يا تيتا بقولو السودان طارد وهم عندهم المناظر الحلوة دي؟

-يا ولدي المناظر ما بتعيش ليها زول،،صحيح ممكن تفتح النفس وتزيل الهم لكن عمرها ما تبقي لقمة تسكت الاطفال...

-ليه؟مش بقولو السودان من اغني الدول بالاراضي الزراعية الخصبة؟

-تراهم بقولوا لكن لغاية السنة دي نحنا بنستورد القمح من دول العالم المتحضر،،بنجيب اغلب منتاجتنا من برة السودان...

-طيب ممكن الحكومة تساهم بمشروعات لتشغيل الاسر المنتجة وبكدة تكون ساهمت في حل مشكلة البطالة وساهمت في انو خلقت مصدر جديد للمال....

-طيب يا ولدي الحكومة دي عاوزة اليديها ما الياخد منها،،يا حليل زمن نميري...

-نميري مين يا تيتا وزمنو كان كيف؟؟

-دا كلام كتير بحكيهو ليك لما نرجع البيت،،،لانو زمن انتو ما حضرتوهو زمن سمح ما زي زمنكم الاغبر دا....

-تمام يا تيتا نصل البيت وتحكي لي كل حاجة،،عنكم زمان وكيف كنتو عايشين لانو قالو السودان زمان كان اجمل من كدة بكتيييير...

....يقطع عليهم الونسة صوت تلفون مشعل وكان متصل عليهو ابوه....


-كيفك بابا...

-ازيك يا حبيبي،،،كيفك انت وماما....

-تمام الحمد لله عاملين جولة في الخرطوم وزيارات...

-يعني نقدر نقول السودان عجبك؟

-طبعا اكيد يا بابا،،السودان حلو واحلي بكتير من الصور البنشوفها في التلفزيون...

-دي حاجة مفرحة يا ابني ،،عاوز اقول ليك انو انا حأصل السودان باكر حوالي الساعة عشرة بالليل،،تقدرو تلاقوني علي المطار؟

-اه نقدر نلاقيك اصل معاي سيارة انا...

-سيارة ازاي،،وجبتها كيف؟

-اجرتها من محل ليموزين في شارع المطار لمدة عشرة ايام....


-ازاي وانت مش معاك رخصة؟

-دا موضوع بحكيهو ليك لمن تصل يابابا

-طيب يا حبيبي خلي بالك من نفسك ومن جدتك وابقي سلملي عليها

-حاضر يابابا يلا باي

يتبع...
محمد المك
مشاركات: 14
اشترك في: الأحد 2016.8.14 3:03 pm
مكان: السودان
اتصال:

رد: رواية احلام مغترب علي شكل حلقات

مشاركة بواسطة محمد المك »

احلام مغترب

الحلقة الثالثة

✍محمد المك


.......بعد ما خلصت مكالمتو مع ابوهو،،الجدة قالت ليهو دا ابوم؟

-ايوة يا تيتا وبسلم عليك

-الله يسلمو من كل شر ان شاء الله ،، قال اجازتو بتين؟

-والله حسب كلامو انا باكر حيكون في السودان....

-الله يجيبو بالسلامة ان شاء الله،،خلاص ودينا سوبر ما ركت نشتري لينا حاجات نعمل ليهو الاكلات البحبها.....

-حاضر يا تيتا يلا بينا،،لكن قبل كدة عازمك سمك الليلة انا...

-سمح ياولدي خلاص نمشي نشتري الحاجات وبوريك محل سمك معروف نمشي ليهو.....

¤تيتا¤

....اسمها فاطمة اصولها من والد جعلي وامها شايقية(وبعد دا كلو ناس النكات يقولو ليك انو الجعلي مابريد الشايقي)ابوها وامها اتزوجو بعد قصة حب عظيمة جدا،،اتقابلو عن طريق الصدفة في واحدة من الرحلات النيلية(زمن الرحلات النيلية وزمن كان عندنا الحاجات دي)واتعارفو وحصل الزواج،،نرجع لتيتا او فاطمة،،،مرة متعلمة ومثقفة وحافظة لكتاب الله،،عندها روح مرحة وشبابية،،وقت الجد جد ووقت الهظار دا ممكن تبقي ليك شافعة،،،اتزوجت وهي عمرها 17 سنة واكبر اولادا هو هاشم،،وبعديهو صلاح مقيم بكندا،،ونايلة آخر العنقود متزوجة ومقيمة بالامارات.....

......اتحركو علي سوبر ماركت واشترة كم حاجة وقالت ليهو يلا اوديك محل سمك انا متأكدة انك ما حتاكل من محل تاني غيرو،،،بقت توصف ليهو لغاية ما وصلو الموردة وهناك وقفو قدام محل(عوضية للاسماك) قعدو ليهم في طربيزة وطلبو السمك العاوزنو....

-المحل زحمة شديد يا تيتا...

-يا ولدي شفت المحل دا اشهر محل سمك في السودان وستو ياها عوضية دي بيعملو سمك رهيب...

-شوقتيني للاكل والله،،حنشوف وان شاء الله ما يخذلوك والسمك حقهم يطلع رهيب زي ما قلتي....

....تلت ساعة وكان الاكل قدامهم بدو ياكلو ومشعل متكيف من طعم السمك ونظافة المحل وفي نفس اللحظة مندهش من الكمية الكبيرة للناس الموجودة في الصالة.....

.....بعد ما انتهو ودفعو الحساب بقو مارقين،،قالت ليهو الاكلة دي عاوزة ليها كباية شاي معتبرة في وحدة قريب بتعمل شاي درجة اولي انا وجدك الله يرحمو لما نطلع بنجي نشرب عندها شاي وكان يقول لي شاي رقية شاي ساموطي يعدل الراس من اول جقمة....

-طيب يا تيتا نمشي نشرب الشاي القلتيهو دا بالرغم من انو ما بحب اشرب شاي النسوان ديل لانو ما بهتمو بالنظافة العامة....

-اول ارح ولو لقيت المحل ما نضيف نخليهو وانا واثقة انو حيعجبك زي ما السمك عجبك.....

.......واتحركو علي محل الحاجة رقية راكوبة مبنية بالحصير والارضية تراب ومرشوش بمويه وريحة البخور السوداني مع اشكال الزينة في الراكوبة كانت شكل فني بديع...

-اها حتقعد ولا نمشي....

-لا اكيد نقعد يا تيتا وكمان حنتصور سلفي وارسلا لماما عشان تعرف انو نحنا مبسوطين شديد.....

يتبع....
محمد المك
مشاركات: 14
اشترك في: الأحد 2016.8.14 3:03 pm
مكان: السودان
اتصال:

رد: رواية احلام مغترب علي شكل حلقات

مشاركة بواسطة محمد المك »

احلام مغترب

الحلقة الرابعة

✍محمد المك

.......الجو المحيط بقعدة الشاي عجب مشعل،،،لانو دي حاجة ما حصلت ليهو ولا شافة قبل كدة،،ريحة البخور السوداني البعملنو السودانيات ليهو نكهة خاصة ،، وشاي رقية الساموطي كان نكهة تانيه،،والناس القاعدين في راكوبة رقية،،مختلف الاشكال،،والاجناس،تلقي الموظف تلقي العامل العادي،تلقي المعلم تلقي المهندس،،حتي بتاع الورنيش قاعد بجنبة ويكورك(ورنيش يا عمك،،لماع يا اصلي)عالم تاني دخل فيهو مشعل،،اتنين بتغالطو في كورة وناس بتغالطو في سياسة كلها احداث ومشاهد اول مرة تمر عليهو وادتو انطباع عن قعدات ستات الشاي....


......في البيت بعد ما رجعو ،،، مشعل كان مبسوط جدا وبيحكي لتيتا عن انبهارو بالسودان والاماكن الشافوها..

-ياولدي انت لسه ما شفت حاجة وكمان لما تدخل الجامعة وتتعرف علي شباب من عمرك حتعرف حاجات جديدة وحتخش دنيا جديدة...

-اكيد ياتيتا حتكون دنيا حلوة وحاسس انو سنين الجامعة حتكون حلوة...

-والله يا ولدي ما اقدر اقول ليك انو كلها حتكون حلوة لكن متأكدة انها حتكون ممتعة ليك،،حتشوف التعليم في السودان عامل كيف،،وحتشوف الجامعات كيف والطلبة الفيها من الشرق ومن الغرب ومن الجنوب ومن الشمال،،حتعرف عادات القبائل وتقاليدن وحتعرف تميز بين الصاح والغلط...

-متشوق يا تيتا للمرحلة دي من عمري،،وعندي افكار كتيرة في راسي ولازم اعملا كلها ان شاء الله....

-ان شاء الله ياولدي،،،اها باكر عاوزنا نمشي وين ...

-محل ما عايزة انا تاني معاك في اي حتة....

-خلاص رايك شنو باكر نمشي المتحف وناكل لينا لقمة وحيكون ابوك علي وصول نمشي ننتظرو في المطار....

-تمام يا تيتا،،بس المتحف فيهو شنو حاجاتنا كلها شالوها الاجانب ما اظن خلو لينا حاجة...

-والله كلامك صاح يا ولدي،،لكن قدر الفي دا بيبهرك ان شاء الله..

-تمام يا تيتا يلا تصبحي علي خير واحلام سعيدة ،،انا بنوم بعد ما ارسل الصور لماما.....

¤الواحد يجينا من برة السودان يتبهر بكل حاجاتنا السمحة وتقاليدنا مقر النيلين،،شارع النيل،،المتحف،،جبل اولياء،،اما نحنا يوميا بنشوف في الحاجات دي ونقول ياخ بلد فقر الله يمرقنا منها¤

......مشعل شال تلفونو ودخل الواتس وطوالي بدا يراسل في والدتو ورسل ليها كل الصور ومن ضمنها صورو مع حبوبتو جتب ست الشاي....

-دا وين المكان دا؟

-المكان دا يا ماما في الموردة طبعا اكلنا سمك مبالغة...

-اوع يكون من السمك البفرشوهو في الارض؟

-لا لا ياماما دا محل محترم جدا والسمك نضيف والاصطاف الفيهو كلهم ناس نضاف جدا....

-والراكوبة القاعدين فيها دي شنو؟

-دا محل الشاي الكان بيشرب فيهو جدو الشاي،،من شابه جده فما ظلم....

-من اسع بقيت تقعد مع ستات الشاي،،انا اصلا رافضة فكرة انك تقعد في السودان براك.....

-براي كيف يا ماما؟؟معاي تيتا وهي بتخاف علي زي ما انتو خايفين علي....

-طيب اسع ارقد نوم وانا عندي كلام مع ابوك...

يتبع.....
محمد المك
مشاركات: 14
اشترك في: الأحد 2016.8.14 3:03 pm
مكان: السودان
اتصال:

رد: رواية احلام مغترب علي شكل حلقات

مشاركة بواسطة محمد المك »

احلام مغترب

الحلقة الخامسة

✍محمد المك


.......مشعل هنا اتضاربت عندو كل الاحاسيس وهو عارف امو لما تقوم في حاجة ،، وعارف انو الليلة البيت حتقوم فيهو مشكلة كبيييرة جدا،،امو حتبدا تتكلم مع ابوهو وحتكون جوطة بس ربنا يجيب العواقب سليمة...

.....الباش مهندس كان برة البيت برتب في اجراءات سفرو،،لما جاء داخل كان متوقع انو يلقي الاولاد وامهم نامو،،لكن لقي الام قاعدة ليهو ولاويه بوزا شبرين قداما....

-السلام عليكم

-اهلا

-اهلا!!!!مالك في شنو امسينا بالله.....

-تعال شوف الصور المرسلا لي ولدك...

-مالو مرسل ليك شنو خلاك زعلانة وحتي السلام ترديهو مسيخ؟

-هاك شوف الصور بس،،ومدت ليهو التلفون وبدا يعاين في الصور،،ومبسوط ما شايف انو فيها حاجة...

-وين المشكلة الولد وحبوبتو بتفسحو عادي يعني حصل شنو؟

-ولدي انا يقعد جنب ست شاي؟؟؟

-وست الشاي مالا؟؟عيبا شنو يعني؟؟مش مراة زيك؟

-كيف عيبا شنو ستات الشاي كلهن عيوب،،مراة زي انا؟والله هانت،،انا تقارني بست شاي!!!!

-ويعني شنو؟ياخ ست الشاي دي مفروض يعملو ليها تكريم لانها بتكافح عشان تربي اولادها بلقمة حلال ، من غير ما تمد يدها تشحد او حتي تمشي في طريق غلط...

-والقال ليك انو ما بتمشي في طريق غلط منو؟؟

-لكل قاعدة شواذ يا دكتورة،،يعني اقرب مثال في عالم الطب بتاعكم دا ممكن تلقي دكتور ملاك قمة في الانسانية في التعامل مع المرضي،،وممكن تلقي دكتور تاني يسرق ويتاجر في اعضاء البشر،،،طيب الفرق شنو؟مشالاتنين دكاترة؟

-الفرق انو دا دكتور ودي ست شاي....

-طيب اوضح ليك حاجة ممكن تكون غائبة عنك،،كتييير جدا من ستات الشاي الانتي وكتير من السودانين ما عادين ليهن قيمة هن بيكون شايلات شهادات عليا وانا بعيني شفت وحدة خريجة محاسبة بتشتغل ست شاي....

-هي حرة بس انا نظرتي ليها ما حتتغير....

-لا لازم تغيري نظرتك وتسيبك من الاوهام الانتي عايشة فيها دي،،،وبقول ليك للمرة المليون ولدك اختار طريقو سيبيهو يعيش في المحل البيريحو وبعدين امي معاهو يعني انا شخصيا ما خايف عليهو....

-امك معاهو!!!

-ايوة معاهو ومالك قلتيها كدة؟؟

-لا لا مافي شي...

-طيب علي العموم انا ما حاتناقش معاك كتير لانو انتي اتولدتي وعشتي في طبقة شايفين انو مافي غيركم بس اكيد حيجي يوم وحتعرفي فيهو الدنيا علي حقيقتها ان شاء الله،،انا عاوز انوم لانو باكر وراي مواضيع كتيرة لازم انجزا لانو مسافر باكر....

¤من المفاهيم الغلط عند السودانين انو ست الشاي دي زولة ناقصة او حتي انها ما تامة زول زاتو ماعارف ليهو وبأي وجه حق نحكم علي انسان من مهنتو؟في ناس بتشتغل اعمال هامشية لكن هم اكتر ناس ممشين البلد دي وبدونهم البلد دي ما عندها طعم¤

.....الصباح في الخرطوم بيختلف عن الصباح في عواصم العالم،،،كمية كبيرة جدا لناس بيطلعو في زمن واحد عشان يمشو الشغل/المدارس/رياض الاطفال/ووحدين بطلعو ساكت لوجه الله تعالي،،تتحرك في شوارع الخرطوم وانت غريب منها لازم يلفت نظرك بتاع المويه وهو بطقطق في الكيزان بحركات وجرس موسيقي معين وكذلك بتاع الورنيش ومن هناك تجيك اصوات الكماسرة وهم بنادو علي جهات معينة ومحددة.....


......مشعل قاعد في البلكونة وبشرب في الشاي مع حبوبتو وعاملة ليهو كعك بنكهة حنية السودانين ،،وبتونسو اخر ضحك وقرقراب،،،تلفونو ضرب الرقم غريب.....

يتبع....
محمد المك
مشاركات: 14
اشترك في: الأحد 2016.8.14 3:03 pm
مكان: السودان
اتصال:

رد: رواية احلام مغترب علي شكل حلقات

مشاركة بواسطة محمد المك »

احلام مغترب

الحلقة السادسة

✍محمد المك


.....اتصال من رقم غريب قطع عليهم الونسة،،،مشعل اتماطل في الرد لغاية ما حبوبتو سالتو دا منو؟

-ما عارف والله يا تيتا رقم ما مسجل عندي...

-طيب رد عليهو يمكن زول من معارفنا وشال رقمك من ابوك...

-ما اظن لانو لو كان كدة بابا كان كلمني بيهو...

.....والرقم بعد المحاولة الاولي تاني حاول وتالت لغاية ما في النهاية مشعل رد عليهو وجاهو الصوت الملائكي.......

-الو كيفك

-عليكم السلام هلا بيك

-ازيك؟

-تمام الحمد لله،،بس ما عرفتك..

-انا رؤي عايزة حبوبة فاطمة ممكن؟

-جدا اتفضلي معاك تيتا...

-مرحب بتي....

-كيفك حبوبة؟؟

-الحمد لله والله،،كيفك انتي....

-تمام والله،،اعرفك بنفسي انا رؤي بت صلاح....

-صلاح الجعلي؟

-ايوة هو ذاتو يا حبوبة.....

-كيف حالك وكيف ابوك وامك....

-والله كويسين يسلمو عليك،،بعد عرفو انكم في السودان فتشنا رقم مشعل لما لقيناهو وبابا وماما بسالو منكم وقالو ليكم تصلونا باكر تتغدو معانا....

-والله كتر خيركم وان شاء الله دايما عامرين وتامين....

-الله يسلمك حبوبة طيب انا حأرسل العنوان لمشعل وحنستناكم باكر ان شاء الله...

-ان شاء الله يابنيتي وسلمي علي اهلك لمن نشوفن....

-يوصل ان شاء الله يلا باي


.......دي منو يا تيتا ومنو صلاح الجعلي دا؟

-ياسلام ياولدي صلاح دا من اعز اصحاب ابوك،،،ما كانو بيتفارقو ابدا ايام كان في السودان بس ظروف الحياة والمشاغل لهت الناس عن بعض....

-ابوي ما جاب لينا سيرة صلاح دا نهائي ليه؟

-ما عارفة والله لكن علاقتن مع بعض حلوة شديد وباكر عازمننا غدا...

-نشوف برنامج بابا لو بسمح بنمشي نتغدي معاهم.....

-برنامج شنو كمان يا ولدي ،، باكر الغدا مع الناس ديل دا موضوع منتهي.....

-تمام ياتيتا واهو جات منهم رسالة بوصف البيت....

-كويس جدا والبت ذاتا امورة الله يحفظها لاهلها ان شاء الله.....

.......عد النهار سرعة والشمس مالت للمغيب مشعل وحبوبتو بدو يجهزو عشان يمشو بعدين المطار يلاقو الباش مهندس.....


......الساعة 10:30 كان الباش مهندس هاشم في صالة الحضور بمطار الخرطوم ،،،، بعد الاجراءات الطويلة والمملة في المطار ركب مع ولدو وامو واتوجهو قاصدين البيت،،الحبوبة قالت ليهو تتوقع ياكر معزومين وين؟

-اكيد في محل راقي ياحاجة...

-لا لا باكر ان شاء الله معزومين عند صلاح الجعلي.....

-صلاح الجعلي شخصيا؟؟

-ايوة يا ولدي كتر خيرو ما نسي العشرة الكان بيناتكم....

-سنين منو الزول دا راجل ود رجال مأصلين والله...

-طيب اقول ليك الاحلي عارف الاتصلت بينا منو تعزمنا منو؟

-اكيد يا هو يا مرتو سهام....

-لا لا ضربت لينا بتو رؤي....

-رؤي دي شفتها لما كانت طفلة يادوب تحبي.....

-اسع بقت عروس ما شاء الله عليها تكيل العين....


¤تلميح من حاجة فاطمة¤

يتبع......
محمد المك
مشاركات: 14
اشترك في: الأحد 2016.8.14 3:03 pm
مكان: السودان
اتصال:

رد: رواية احلام مغترب علي شكل حلقات

مشاركة بواسطة محمد المك »

احلام مغترب

الحلقة السابعة

✍محمد المك


صباحات الله ابت تطلع

من الابرول ابت تطلع

من المدفع ابت تطلع

¤طلع خازوق¤



.......اتصال هاتفي من المهندس هاشم لواحد من الدكاترة بجامعة(......)

-يادكتور صبحك الله بالخير....

-يامرحب والله الباش مهندس،،عاش من سمع صوتك يا راجل.....

-عاشت روحك يارب،،،كيف انت والاسرة الكريمة؟

-نحمد الله والله شنو تجي السودان وما عندنا خبر!!!!

-والله يادكتور جيت امس بالمساء،،عندي ولدي الكبير مشعل مصر انو يقرا في السودان،،وانا شخصيا موافق بس امو زي ما عارف متمسكة بحياة الترف والرفاهية....

-من حقها ياخي انو تشوف ولادها عايشين احسن عيشة،،،طيب رايك ايه تمر علي المساء في البيت وجيب مشعل معاك وحنشوف ليهو جامعة تليق بمقامو ان شاء الله .....

-خلاص وهو كذلك يا دكتور نتلاقي المساء....


........من هناك جاهو صوت مشعل،،دا منو يا بابا الحنمشي ليهو بالمساء؟

-دا دكتور عثمان...

-قريبنا ولا حاجة؟؟

-لا لا دا دكتور في الجامعة وقال نمشي ليهو بالمساء عشان يساعدنا نختار جامعة مناسبة عشانك وحيسهل لينا اللف الكتير الكنا حنلفو...

-تمام يا بابا....

.....الساعة 3 اتحركوا علي بيت صلاح الجعلي حسب الوصف العندهم،،لغاية ما وصلو ليهو،،،بيت تلاتة طوابق في حي راقي من احياء الخرطوم.....

¤صلاح الجعلي¤

......تاجر اسبيرات وسمسمار عربات،،،زول مروق (عندو كاش جد)متزوج بت عمو سهام عندهم بت واحدة هي رؤي ممتحنة شهادة سودانية السنة دي.....

......وصلو البيت واستقبلهم صلاح ببشاشة السودانين المعروفة سلام مليان اشواق وحنية لاعز الاصحاب الافترثو بسبب ظروف الحياة ،،، حاجة فاطمة دخلت علي محل الحريم ومشعل وابوهو في الصالون مع صلاح الجعلي،،،قمة الكرم الغير متكلف او مصطنع....

-ما شاء الله يا هاشم مشعل كبر واختار بلدو....

-والله ما عارف فهمو شنو في انو يختار يرجع بالرغم من انو شاف السودان في الاجازات بس....

-لخير ان شاء الله،،وانت عامل كيف مع الغربة وزحمة الشغل وجري الحياة الما بنتهي دا....

-والله ياهو الحمد لله نجريمن هنا لهنا ربك يسهلا بس....


......جابو الغدا واتغدو وشربو الشاي،،،صلاح نادي ليهم بتو ومرتو يجو يسالموهم:::رؤي الجمال السوداني علي طبيعتو،،، متوسطة في الطول،،،اللون لون الدهب.....

-ماشاء الله نفس سماحة امها ،،،كلام حاجة فاطمة كان ليهو اثر في نفس الام البقت تتبسم ......

......كان جلسه عائلية جمعت عيلتين بعد شتات،،،ومشعل بيعاين لرؤي والحكاية شكلها وقعت ليهو في جرح،،،كل مرة يعاين ليها بطرف عينو يلقاها بتعاين ليهو،،،قريب المغرب استأذنو من صلاح واسرتو علي امل انو يتلاقو قريب.....


.......بعد ما اتحركو دار حوار بين هاشم وحاجة فاطنة(شفت طيبة الناس ديل ياولدي!!

-ديل زي الدهب يا امي والله،،،وصلاح ما شاء الله ما اتغير كتير ياها حالتو ذاتا....

-وشفت بتهم الامورة حلاوة وادب.....

¤مشعل يسمع في الحديث الداير دا وداير ليهو طريقة يدخل في الحوار وما لاقي¤

-ايوة والله شالت جمال امها واخلاق ابوها الله يخليها ليهم

-آمييين ويخلي لينا مشعل...


-يا بابا عمو صلاح دا بتعرفو من متين؟؟

-يا سلام ياخي والله صلاح دا قضينا زمن مع بعض لكن خليهو لبعدين اول خلينا نمشي علي دكتور عثمان ونجي نكمل ونستنا وحكاوي زمان،،،لانو عمك صلاح دا حكاية في حد ذاتو....



يتبع.....
محمد المك
مشاركات: 14
اشترك في: الأحد 2016.8.14 3:03 pm
مكان: السودان
اتصال:

رد: رواية احلام مغترب علي شكل حلقات

مشاركة بواسطة محمد المك »

أحلام مغترب

الحلقة الثامنة

✍محمد المك


تعال قص البلد وارجع
تعال ادي الغبش طله
بقالا الليل غتي ومقنع
قدرتك يا صباح الله



......المغرب كانو مع دكتور عثمان،،،دكتور جامعي من ولاد نهر النيل،،،ومتزوج واب لاربعة اولاد وبتين،،،،كعادة اهل السودان وقعدات شاي المغرب اهل البيت والضيوف اتلمو في حوش واحد وقدامهم صواني الشاي بالخبيز،،،وكانت بداية التعارف بين الاسرتين بعد الشاي،،،الاولاد ساقو مشعل وقعدو بعيد من الناس الكبار......


-كيف السعودية يا مشعل...

-والله السعوديه مازي زمان،،يعني زمان كان اي سوداني بيجي هناك بكون مبسوط اسي شايف الوضع اختلف...

-كيف يعني اختلف،،عشان حنغترب ولا شنو؟؟؟

-دا كلام السودانيين البجو هناك،،،المرتبات مازي زمان حتي طريقة التعامل مازي زمان،،،بس انت حتغترب ليه!!!

-والله يا حبيبنا ياخ البلد بقت طاردة شوف انا خريج هندسة لي سنتين لافي في البلد دي زي الكلب اي شركة تقول عايزة ليها شهادة خبرة عشرة سنة انا شهادة خبرة اجيبا من وين وانا خريج!!!دا غير انو لو عاوز افك الخدمة الحكومة حتشغلني في محل وبمرتب خمسين جنيه!!!دا كلام دا،،،ياخ خمسين جنيه لو اديتا شافع ممكن يحمر فيك مسافة....

-طيب جرب اشتغل اعمال حرة وانت قاري هندسة اكيد بيكون عندك فكرة عن حاجات كتيرة والزمن اتطور يعني ممكن تنجح.....

-طيب لو افترضنا راس المال!!!ياخ لو اشتغلت الحكومة حتقيف لينا في حلقنا،،شي ضرائب وشي ايجار وشئ رسوم نفايات اصلا مافي نفايات بلا الناس الحاكمين البلد دي والله.....


.....الباش مهندس هاشم ودكتور عثمان هناك كان بيتكلمو عن مستقبل الاولاد وغيرو....

-تفتكر يادكتور انسب جامعة ليهو وين؟؟

-هو مايل لدراسة شنو بالضبط؟

-والله يادكتور هو قال عاوز يقرا حاسوب لكن ما عارف حاسوب في السودان دي كيف؟؟؟

-تمام انا حأشوف ليهو الموضوع دا باكر بإذن الله انت ما تشيل هم.....

-كتر خيرك والله،،،اها اولادك وصلو وين وعملو شنو؟؟

-عندي الكبير اتخرج قبل سنتين من هندسة والبعديهو اتخرج من طب السنة الفاتت اما الاتنين البعديهم واحد بقرا بنوك وتمويل والبعديهو محاسبة اما البنات واحدة بتقرا فنون ووحدة لسه في الثانوي.....

-والله ما شاء الله ربنا يوفقهم ....

-الكبير ليهو زمن قال عاوز يغترب اصلا ما مقتنع بالسودان نهائي....

-دا حال الشباب يادكتور واكيد هو عندو اهداف وطموحات عاوز يصل ليها.....

-والله البلد يا باش مهندس بقت طاردة،،،،يعني شوف كمية الكوادر المؤهلة البتطلع سنويا دي كم!!!!.....

-والله فعلا يادكتور حقيقة مؤسفة انو السودان ما قادر يستفيد من الخبرات دي،،شوف العرب ديل استفادو من الخبرات السودانية دي ووصلو لشنو!!!وشوف وضعنا نحنا كيف!!!!

-يعني لو النظام الحاكم دا غير من اسلوبو النمطي البدير بيهو البلاد دي حنصل لمستوي مرموق لكن دا كيف يحصل في ظل الفساد الحاصل دا.....


......عدت اللحظات سريعة ،،،وزي ما قالو اللحظات الجميلة تمر سريع،،،الشباب اندمجو مع بعض في الونسة ونسو مرور الزمن،،،اتواعدو علي انو يتلاقي في فرصة اوسع،،،،اتحركو بعد ما قضو يوم ممتع في حضرة صلاح الجعلي واسرتو وبرضو دكتور عثمان واسرتو،،،،في العربية،،دكتور عثمان قال شنو يا بابا؟؟

-قال باكر حيشوف انسب جامعة ويشوف لينا المتطلبات بتاعتها ويدينا خبر....

-تمام،،اولادو ظريفين جدا والله،،،انت عارف يابابا الشعب السوداني شعب طريف وبيعشق الدعابة....

-اكيد السوداني مرح بس اوعي تزعلو لانو ممكن يبقي ليك اسد عديل....

-طيب ليه الناس دي كلها بتنتقد في الحكومة؟؟

-دا حتعرفو لما تخش الجامعة وتبدا تعيش في السودان.....

¤في اللحظة دي جات رسالة في تلفون مشعل¤







ﻭﺗﺎﻧﻲ ﺗَﺮِﻥْ ﺗﺠﻴﻨﻲ ﻧﻐﻴﻤـﺔ .. ﺻﺒْـﺮﺍً ﺧِـﻠِّﻲ ﻻ ﺗﻨْـﺪﻡ
ﻣﺤﺎﻝ ﺍﻟـﺮﻳﺪ ﻓﻲ ﻳﻮﻡ ﻳُﻬﺰﻡ .. ﻭﺑـﺎﻛﺮ ﺩﻩ ﺍﻟْﺸَﻤِـﻞ ﻳﺘْﻠﻢ
ﻛﺘﻴـﺮ ﺍﻟﺠـﺎﻳﻲ ﺍﺗﻌﺸّـﻢ .. ﻳﻤﻴـﻦ ﺑﺎﻛـﺮ ﺗﻌﻴﺶ ﺗﻨﻌـﻢ
ﻳﺼﺎﻓﻴﻚ ﺍﻟﺰﻣﺎﻥ ﺗﺴْـﻠَـﻢ .. ﻭﻳـﺪّﻳـﻚ ﺍﻟﻘـﺒﻴـﻞ ﺣَـﺮّﻡ

يتبع....
محمد المك
مشاركات: 14
اشترك في: الأحد 2016.8.14 3:03 pm
مكان: السودان
اتصال:

رد: رواية احلام مغترب علي شكل حلقات

مشاركة بواسطة محمد المك »

احلام مغترب

الحلقة التاسعة

✍محمد المك


ﻭﻃﻨﻚ .. ﺍﻣﻨﻚ .ﺍﻣﻚ ﻭﺣﻨﻚ
ﻣﻨﻮ ﻭﻣﻨﻚ ﻭﺍﺳﻤﻚ ﻭﺳﻨﻚ
ﻭﺍﺣﻼ‌ ﺣﻨﻴﻦ ﺑﻲ ﻋﺒﺒﺮ ﻋﻨﻚ
******
ﺍﻧﺖ ﺍﻧﺴﺎﻧﻮ.. ﻭﺻﻮﺕ ﺣﻴﺮﺍﻧﻮ
ﻭﺃﻫﻠﻮ ﺍﻟﺼﺎﻧﻮﻭﺍ ..ﻭﻛﻞ ﺟﻴﺮﺍﻧﻮ
ﻭﻃﻴﻒ ﺍﻟﺮﻳﺪ ﺍﻟﺒﻴﺴﺄﻝ ﻣﻨﻚ


.......تلفونو ضرب كم مرة ومارد علي المتصل لانو سايق بعد كدة جاتو رسالة في التلفون بقي منتظر بتين يصل البيت عشان يشوف الرسائل والاتصال من منو.....

......وصلو البيت وكل واحد فيهم دخل غرفتو،،،مشعل في غرفتو قبل ما يعمل اي حاجة لقي اتصال من رقم غريب لكن مر عليهو قبل كدة،،،فتح الرسالة كانت(وصلتو كيف)،،،اتأكد ليهو انو دي رؤي،،،طوال اتصل بالرقم....

-السلام عليكم.....

-اهليين وعليكم السلام....

-كيفك رؤي؟ولا انا غلطان؟

-لا ما غلطان رؤي ذاتا،،بشحمها ولحمها....

-تمام كيفك....

-والله تمام بس اتصلت اشوفكم وصلتو ولا لا....

-لا وصلنا الحمد لله،،كتر خيرك علي الاهتمام....


.......مكالمة بسيطة جات من نظرة خلت في دواخل كل واحد فيهم حاجة للتاني،،،،وشوق وهيام واصلو الحب لمن يتجسد في العينين مابدور ليهو قرايه،،،مشعل جواهو حاجة لرؤي لكن ما قادر يحدد هل لحظة اعجاب وحتمر او حب وحيمتد ويلم شمل اسرتين فرقتهم الغربة........


.........في بيت صلاح الجعلي الاسرة مجتمعة وبتونسو بعد العشاء ،،،سهام قالت ليهو انت ياصلاح مشعل ولد هشام دا مالو الناس بطلعو برة السودان عشان يتعلمو ويشتغلو هو يجي السودان للشقاوة!!!

-والله يا سهام مشعل دا ما قادر افهمو حتي الآن لكن اكيد زول قعد برة بيكون ضرب حساباتو صاح وشاف انو السودان انجح ليهو.....

-انجح ليهو بشنو يعني اسع السودان دا سماحتو شنو عليك الله...

-والله اول شي السودان سمح بناسو ولمة الاهل والحبان،،وبالنسبة لمشعل ود شاب تربية السعودية ما حتعمل منو راجل لكن في السودان حيشوف حاجات تعلمو وتوريهو.....

.......وهناك السمحة تسمع في حوار امها وابوها وسارحة في خيال مشعل والاحاسيس البتحس بيها كل ما يجي اسمو او حتي طيفو وتردد::::

قليبي انا الولهان عليك
الليلة يوم افراح مشاعرو

يا رجا الروح المعذبة
يا ربيع عمري ونضارو


......انتي يا تيتا ما حكيتي لي عن زمن نميري القلتيهو لي لمن كنا برة البيت ؟

-والله يا ولدي داك عاد اريتو زمنكم ،، كان زمن الرخاء وزمن المحنة ما زي زمنكم اسع جفي وخصام....

-كيف يعني؟؟؟

-اول شي يا ولدي زمن نميري ما زي زمن اسع في كل شي زمان كنا نمشي اي دولة يدونا تعظيم سلام ليه؟؟لانو كان حاكمنا راجل ليهو سمعتو وليهو كلمتو فوق كل زول لا تشوف اسع ناس السعودية ديل رافعين من نفسهم زمان كان نميري دا يودي ليهم الاغاثة والمعونة....

-معقولة يا تيتا الكلام دا!!!

-اي والله عشان كدة بقول ليك الزمن اختلف اسع شوف اي دولة عندها فوقنا دين وجميل لكن زمان ويا حليل زمان كنا حاكمين العرب ديل كلهم،،،زمان حاكم دبي رسل لنميري عشان يرسل ليهو ايدي خبيرة عشان تعمل ليهو دبي زي الخرطوم،،،شفت العز النحنا كنا فيهو دا؟؟

-والله يا تيتا كنتو عايشين في عز ونعيم.....

-طبعا ابوك كان من ناس المعارضة البكونو في الجامعات،،،ولا شنو يا باش مهندس؟؟

-ههههه طبعا لكن داك كان زمن نحنا انضربنا ضرب في الزمن داك..

-احكي لي يا بابا عن المغامرات بتاعتكم ...

-طوالي عملتها مغامرات،،،طيب اسمع يا سيدي....


يتبع
محمد المك
مشاركات: 14
اشترك في: الأحد 2016.8.14 3:03 pm
مكان: السودان
اتصال:

رد: رواية احلام مغترب علي شكل حلقات

مشاركة بواسطة محمد المك »

احلام مغترب

الحلقة العاشرة

✍محمد المك


طلابنا واقلامنا هويتك

قدامنا قضيتك سبورة


-طوالي عملتها مغامرات،،،طيب اسمع يا سيدي....

-هههه اكيد مغامرات يا بابا.....

-طيب نحن زمن نميري كنا عاملين فيها طلبة مثقفين وبنحاول نظهر في الساحة مع المعارضة،،،نعمل اركان نقاش ونسب الحكومة ورئيس الحكومة،،،في يوم العساكر جو داخلين الجامعة ونحنا مسكنا الشارع تاني عينك ما تشوف فكو البنبان...

-البنبان دا شنو يا بابا؟

-دا الغاز المسيل للدموع،،اها نحن بقينا نجري والعساكر ورانا من بيت لبيت ومن زقاق لزقاق في النهاية قبضونا زي عشرة نفر من الناس الاساسين والقايمين علي ركن النقاش...

-والحصل بعد كدة شنو؟؟

-الحصل انو رفعونا في دفار الكشه وساقونا لمصير مجهول....

-واصل يا بابا مالك سكت!!

-طبعا الناس ديل مدربين علي الضرب المبرح يعني عارفين محل الوجع وين،،،نحنا في اليوم داك ودونا لمحل لغاية يوم الليلة ما عارفو شرق ولا غرب انا،،،ادنا اليوم الاول بدون موية وبدون شراب وفي غرفة مقفولة ولا حتة ضو ما فيها،،،ومليانة جنادب وفيران بصورة ما تتخيلا ،،،تاني يوم جابو لينا موية بسيطة جدا حتي انو نحنا اتشاكلنا فيها اما الاكل فحدث ولا حرج........

-واااو مغامرة حلوة يابابا.....

-بس لانو ما كنت معانا عشان كدة قلت مغامرة حلوة.....

-طيب واصل يا بابا....

-اليوم التالت بدو معانا الاستجواب،،،وكانو بسجلو الحاجة الهم عاوزنها ما الحاجة البنقولا نحنا ومضونا عليها،،،وبعد كدة بدا الآكشن انضربنا ضرب الابل نحنا في اليوم دا ،،، وفي كتير مننا حصلت ليهم عاهات مستمرة معاهم لغاية يوم الليلة.....

-طيب ليه تيتا تقول انو زمن نميري احسن من الزمن الحالي دا!!!

-طبعا احسن بمقاييس كتيرة شديد،،،اولا زمان ماكان في جوع وحاليا الجوع في كل بيت!!!!

زمان طلبة الجامعات بتخرجو مثقفين في كل مناحي الحياة ومؤهلين ليمسكو ارفع المناصب وحاليا طلبة الجامعات يتخرجو عشان يقعدو تحت الاشجار او يشتغلو جوكية ركشات!!!!

زمان السودان كان من الدول العظمي!!!اما الآن السودان من دول العالم الثالث!!!!

زمان الخرطوم كانت اجمل من دبي!!!!اما الآن فالحال لا يسر عدوا ولا صديق!!!!

زمان المواطن السوداني كان مطلوب من كل الدول العربية لانو خبرة في مجال عملو سواء دكتور او مهندس،،اما الآن السوداني بطلع برة عشان يشتغل راعي او سواق او بتاع امن!!!!

شفت الفرق وين يا ابني؟؟؟؟

-اكيد الفرق شاسع لكن انا شايف انو العيب ما في الحكومة....

-طيب العيب وين !!!

-العيب في الشعب يا بابا،،الشعب هو البصنع المستحيل،،الشعب هو البغير الحكومات،،،وهو البخلي انو الحكومة تكون كويسة او كعبة....

-يا ابني الشعب السوداني ضاقت بيهو كل السبل ،، الخريج بقي كل همو انو يلقي ليهو عقد عمل برة السودان بأي ثمن،،، شعب قنع من كل خيرات وطنو،،،لانو اصلا الخير كلو ماشي لجيوب الحكومة.....

-الشعب يغير الحكومة بس....

-كيف يغير الحكومة!!!

-ساهلة جدا.....

يانورة العسكر مابتقدر
يانورة العسكر مأمورة
يانورة العسكر ما بتفهم
يانورة العسكر معذورة




يتبع......
محمد المك
مشاركات: 14
اشترك في: الأحد 2016.8.14 3:03 pm
مكان: السودان
اتصال:

رد: رواية احلام مغترب علي شكل حلقات

مشاركة بواسطة محمد المك »

احلام مغترب

الحلقة الحادية عشر

✍محمد المك

-كيف يغير الحكومة!!!

-ساهلة جدا.....

-كيف يعني ساهلة جدا؟؟؟؟

-موش في شعب اذا التغيير حيحصل لو الشعب عمل انتفاضة ضد النظام الحاكم،،والشعب لو اتحد حيقدر يغير كل شي....

-انت بتحلم يا ابني الشعب السوداني لايمكن يتحد بسهولة عارف ليه؟لانو النظام الحالي دا عمل علي تفكيك وحدة الشعب وعمل لهو للشعب بحاجات فارغة جدا....

-كيف دي؟

-يعني بقي كل فترة تظهر حاجة تلهي الشعب عن الحكومة وفعايل الحكومة،،،وآخر حاجة قصة الدهب دي الناس سابت البلد وباعت القداما والوراها واشترت ليها جهاز كاشف للدهب ومشو الخلاء.....

-والله دي حكاية غريبة....

-علي العموم الصباح رباح يا ابني،،،يلا تصبح علي خير.....

......مشعل بقي قاعد براهو يفكر في حياتو وشكلها حيكون كيف في السودان بعد كلام ابوهو عن النظام الفات والبعديهو والجامعات السودانية واركان النقاش،،،دخل غرفتو شغل واحدة من الازاعات السودانية وكانت الاغنية بتقول

بعشقك بعشق جمالك طلتك وبسمة شفاكي

بعشق الريد في عيونك ماعيونك سر هلاكي

بعشق الليل في بلدنا لما قمرو هو ليك يحاكي

كان احساسو انو الاغنية دي جات عشان تهبش وتر حساس وهو بيسمع فيها اتذكر رؤي الملاك ،،،مشية رقيقة خطوة دقاقة،،،وبدون ما يحس رسل ليها رسالة(مساء الخير،،كيف الحال)وبقي منتظر الرد لغاية ما نام،،،الصباح كانت حاجة فاطمة زي عادة الحبوبات صحت بدري وعملت الشاي وكان البخور السوداني حاضر شهود عيان علي روعة وجمال السودان،،،صحي علي صوت حاجة فاطمة بتصحي فيهو،،،يلا ياولدي الشمس شرقت انت وابوك نايمين للضحي مالكم!!!!

-صباح الخير يا تيتا...

-يسعد صباحك ياولدي،،يلا خش استحم وتعال الشاي جاهز.....

....شال تلفونو لقي رسالة فتحها لقاها رؤي(اهلييين نعم الحال)شال بشكيرو ومشي استحم وجاهم يتبسم....

-صباح الخير بابا...

-صباح النور.....

......شاي الصباح عند السودانين اهم من اي شئ ،،، قعدو للشاي واتبسطو مع حكاوي وونسة حاجة فاطمة.....

-يلا يا مشعل عندي مشوار توديني ليهو...

-حاضر يا بابا خمسة دقائق اغير ملابسي واجيك....


......خمسة دقائق وكانو في العربية،،،اول حاجة حنمشي نسلم العربية لاصحابها...

-طيب وانا حتوصل بشنو؟؟

-لو انت صبرت حتفهم،،عاوز اشتري ليك عربية بدل التأجير دا...

-انت جاد يا بابا...

-يعني بهظر ،،، وانت حتختار نوع العربية العايزو.....

-شكرا ليك يا بابا،،خلاص انا عاوز برادو....

-ومالو يا ابني ما تغلي عليك ابدا....

-الليلة دا اسعد يوم في حياتي....

-طيب يلا بينا حنغشي نسلم دي ونركب امجاد نمشي نشتري التانية.....

.....في ظرف ساعة تم تسليم العربية وركبو امجاد واتوجهو علي معرض سيارات في شارع المطار،،،وهناك اختارو العربية العاوزنها حوالي الساعة ١1 تمت الاجراءات بكل سهولة(الكاش يقلل النقاش) مشعل ساق عربيتو الجديدة ومبسوط قمة البسط،،،في اللحظة دي تلفون هاشم ضرب وكان المتصل دكتور عثمان،،،طلب منو انو يجيهو في مكتبو جامعة(.....)وطوالي تم تغيير المسار للجامعة المقصودة.....

.......قدام الجامعة كمية كبيرة من العربات الفارهة،،،مشعل وقف عربيتو ودخلو ،،، اول حاجة لفتت نظرهم تصميم الجامعة والنظافة والاشجار المزروعة في الجامعة.....

-جامعة جميلة يابابا....

-اكيد يا مشعل،،،التصميم جميل جدا حتي الاشجار مزروعة بنظام غريب،،شايف انو الجامعات اتغيرت من زمان في الشكل المعماري حقها لكن ان شاء الله تكون اكاديميا بنفس الشكل حقها دا....

.....في مكتب دكتور عثمان،،،مكتب فخم في الطابق الثاني ،،،مجهز بكافة سبل الراحة مكتب خمسة نجوم.....

-اهلا وسهلا يا باش مهندس....

-الله يديك العافية يا دكتور،،كيف حالك

-نعم الحال والله،،ازيك يا مشعل،،،اتفضلو اتفضلو،،تشربو شنو....

-شكرا ليك يادكتور....

....بعد الضيافة،،،طيب يا باش مهندس انا سالت كم دكتور من معارفي ووقع الاختيار علي كم جامعة وحاليا عملت مفاضلة وبقيت علي اتنين بعد كدة الخيار ليكم انتو،،حددو الانسب معاكم وان شاء الله حنبدا ليكم الاجراءات.....



يتبع......
حوريا
مشاركات: 30
اشترك في: الاثنين 2016.10.10 10:16 pm
مكان: مصر

رد: رواية احلام مغترب علي شكل حلقات

مشاركة بواسطة حوريا »

كل الشكر والامتنان على روعهـ بوحـكـ
..
وروعهـ مانــثرت .. وجماليهـ طرحكـ
..
صورة العضو الرمزية
احلام بت النيل
مشاركات: 3193
اشترك في: الاثنين 2015.6.8 11:50 am
مكان: نهر النيل

رد: رواية احلام مغترب علي شكل حلقات

مشاركة بواسطة احلام بت النيل »

رواية جميلة ورائعة
محمد المك ... بداية موفقة
وفي انتظار البقية......
أضف رد جديد

العودة إلى ”سيناريو وأحـداث“