حلمنتيشيات

يشمل القصائد الشعريه , الشعر الشعبى , الحلمنتيش , والدوبيت .

المشرف: بانه

أضف رد جديد
صورة العضو الرمزية
waya
مشاركات: 14068
اشترك في: السبت 2007.8.11 11:15 pm
مكان: على سفر

حلمنتيشيات

مشاركة بواسطة waya »

السلام عليكم ..

ساحاول جمع أكبر قدر من الشعر الحلمنتيشي .. وبالذات الشعر العجبني

وياريت كل من لديه أضافة ,, ما يبخل علينا ,,

ودي أول قصيدة حلمنتيشية



ممو ,,,,
القليب ما قادر المو
اصلو مجروح جاري دمو
ضربو زايد.. قاسى همو
قالو سبب الرجفة والموت
الحليو الأسمو ممو
واصلو ممو..
كمو كطو
وكطو كمو..
ابوها بابي
مامي امو..
من الجماعه الكل يوم
قاعد استحمو
والعطر خمسين متر
حرم تشمو
ولما تقدل بس تقول
تقلع ترابا التمشي فيهو
عديل تخمو
طبعو رقه
لونو منقه
في اوربا مارادونا
وفي بلدنا مافي زيو
الا تنقا
واصلى مما شفت ممو
قلت يا ناس دي الملائكه؟
ولا خلقه..؟
قالوا خلقه
قلت انو ..ما اظنو
واصلي من ما شفت ممو
عقلى فر وقلبي دقه
وبنطلون الجنيز طقه
اي عجور ضقتو بعدو
لقيتو منقه
باكو السجاير جوه جيبي
لقيتو حقه
الفنيله اللونا ابيض
فجأه جيت
ولقيتا زرقاء
يا ريتني لو من مويتو
القي ليا بقه
ان شاء الله حتي
لو فيها شرقه
يا ريتني لو في بحرو
القي ليا غرقه
كنت بغطس
وما بدور لي تاني مرقه
تاني امرق..؟
وين اقبل..؟ للبعاعيت؟
عليكم الله ديا خلقه؟
ممو يا ناس ما اذانا
بى خدودو البرتكانه
ممو يا عالم جمانه
لا اكل يوم زي عشانا
كسره بى لبن البطانه
ولا شرب من زير مغبر
زي فلانه وفرتكانه
ممو ما فيش منو اتنين
هما مخلوقين براهم
ونحن مخلوقين برانا
الفرق
نحن بنعوس كسره في الصاج
وهم رغيفن
بشتروه من اجزخانه
الفرق
هما بمشوا عديل افوتو
ونحن نترجي البكاسي
ويومي نتلفت ورانا
الفرق...
هم عندهم توليت مكندش
ونحن عندنا أأآنا
ممو حني عليكي بابا
تعالي نعمل حبكانه
امكن اتعلم
احب ناس هاي اروق
بدله فاخره واستكانه
غايتو حاقوليك حالي
كان نفع قولى اوكي
ما نفعت..
قولي ما نافع معانا
عندي شده
وبنطلون واحد مرقع
حالو حالنا ومستوانا
ابوي مزارع
احفر الطين بالطوارى
عرقو نازل
في هجير الدنيا
في الصيف والسخانه
شان القط لقمه .. لقمه
شان اتمتم لي ..عشانا
شان إشوفنا
بنقرأ نتعلم برانا
عمي ترزى ...وكان تمرجي
ولادو دسته
وكلهم ساكنين معانا
ممو يا الجو المكندش
شوفي كتاحه هوانا
واصلي عارف
بكره اظهر مغترب
نأكل النيم والزلط
وانتو بتلوكوا اللبانه
ونحن بنكابد نجابد
ونبقي في الأخر ضحيه
الشواكيش كع ..كرع
اتقول بس بندقيه
والمآسى الفي جوانا
كل يوم بتزيد شويه
الا بس اصبح عزانا
طيبه القلب البينزف
وكتين الناس البتشحد
وكل اطفال التشرد
لما امشوا عشان ارقدوا
ينوموا في نص الشوارع
يعني ما يلقوا المكانه
الا بس اصبح عزانا
طيبه اخلاصنا ووفانا
وكتين اولاد المدارس
يوت ادافروا .. في طريقهم
شان اكتبوا الحصه
في حينا وزمانا
الا بس اصبح عزانا
حب بلدنا
منبت الخير والوداعه
ريحه الطين والزراعه
حب تقاليدنا وطباعه
وفوقا ما بنرضي الأهانه
صورة العضو الرمزية
ودالدسـوقي
مشاركات: 1236
اشترك في: الثلاثاء 2008.4.15 12:24 am
مكان: ارض الله واسعـه

رد: حلمنتيشيات

مشاركة بواسطة ودالدسـوقي »

.

ألسنا خير من ركب المطايا ........ وأندى العالمين بطون راح



حلمنتيش ملطوووووش


بت هندسة

انا راسى جاط ما بين هواك والدبرسه
الفت عشرين الف بيت سبعين قصيده مؤسسه
شان مره الفت انتباهه ومره اقدر احسسه
يا حلوه يا بت هندسه
يا حلوه يا زينت البنات يا نجمه الليل و المسا
انا رغم اشكال الشتات حاضن عواطفك وحارسه
انا فى هواكى بقيت فتات ودخلت عشرين مدرسه
جنيت مع كلمات هواك بى قلبى قاعد اتنفسه
يا حلوه يا بت هندسه
كان شفتى يا بت هندسه........
خطواتى دايما بالغلط وامورى ديما معكسه
يوم داك مساهر فى الهدوم وكويتا جت شان البسه
لقيتا الصباح حقات اخوى وهدومى قاعده مكرفسه
كان للهدوم ما مشكله بشوف لى مصيبتا البسه
لكن هواك اعملو ايه دش دش عضامى وهرسه
داير لى فرصه اكون قريب طبله قليبيك افلسه
عشان تشوفى هواكى كيف بهدل عواطفى ودعفسه
كلماتى ليك اتبشتنت ما زى زمان متهندسه
حتى الشعر الكان زمان كلماتوا حلوه مملسه
هسى اتلخم بقى كيف كده مافيهو كلمه مهندسه
انتى السبب فى كل دا يا احلى اسباب الاسي
يا حلوه يا بت هندسه
انا ياخ بريدك اعمل ايه ورينى يا بت هندسه
امشى واكورك فى الظلط يا ناس بريد بت هندسه
كم مره قلت اقوم براى واقد معاها واحدثه
لكنى ما بقدر عديل مابقدر انضم اونسه
خليك من اشرح ليها حالى وحبى ليك والدبرسه
يا هنايه داير اقوليك كلام اصلو السكوت فيو وسوسه
انا يا ملاك انا بعشقك وما اظن بلاك ارجا المسا
دايرك تكونى لى حبيبه وابقى ليكى حبيب قسا
اكسيك هواى وتلبسينى نعيم هواك اجمل كسا
ويا ربى كل عاشق نبيل تديهو زى بت هندسه
وترعاها من عين الحسود ومن توب جمالك لبسه
ويا ربى تحفظا لى براى ويا ربى تحفظا تحرسه






تاني الدايـرني يلقاني مع اخـوي waya
ده هــنا .... ده بوسـت انا بفتش ليهـو سـنين

ملحـوظـة :-
انـتي مامعـاهـم
.
صورة العضو الرمزية
waya
مشاركات: 14068
اشترك في: السبت 2007.8.11 11:15 pm
مكان: على سفر

رد: حلمنتيشيات

مشاركة بواسطة waya »

ود الدسوقي ,,

أبقى لاصق يا أخوي ,, وخليا مجادعة ,,



هاك بتاعت اليوم ..


التالية


كل ما أقبّل وأعاين

ألقى عينيك جات في mine

حاجة very good

حاجة fine

يا suger مصنع كنانة

يا flour مالية البطانة

إنتِ fantastic banana

إنتِ my eyes رتينة

إنتِ where is مابتجينا

إنتِ عينيك فيها light

إنتِ شعرك dark night

إنتِ طبعك كولو right

إنتِ my heart إنتِ نورو

إنتِ my love البدورو

عايز أشوفك more tomorow
صورة العضو الرمزية
ودالدسـوقي
مشاركات: 1236
اشترك في: الثلاثاء 2008.4.15 12:24 am
مكان: ارض الله واسعـه

رد: حلمنتيشيات

مشاركة بواسطة ودالدسـوقي »

.


الاخ Waya
اولا اشـكرك للترحـيب بـوجـودي بهـذا البـوســت الرائـع


ثانيا .... وهـذا الثانيا مهـم جـدا جـدا ...
فرغـم تذوقي للشعـر الحلمنتيشـي وتاثري به تاثرا دقـيقا
وانفعـالي مع كل سطـر اقـراءه منه ... فلم احـاول يومـيا
الخـوض في غـياهـب هـذا المثلث الغامض وان كان لـي
كـثير من الصداقات مع بعض الاخـوة الحالمـيين تيشــيأ

علمتني الحياة أن لا أرضى لنفسي إلا بأحسن الأشياء
فذلك علو الهمة


مااود ان اذكره هـنا هـو ان اسـتاذنا حساس محـمد حسـاس الملقـب
بـ د. محمـد عبدالله الريح .. وبالعكس ..
وهـو المكـون او المؤسس الرسـمي لهـيئة حلمنتيش العـليا بجامعة الخرطوم
كـان قـد سـن بعض القـوانـين للاشـتراك بالهـيئه وبما انه لم يكـن في ذلـك
الوقـت

مـنتديات ولا بوسـتات ولا كـلام سمحـات علي النتات ولا ماسنجـرات
ولا كمبيوتـرات ولانكـران للذات بالنك نيمــات
وكـان زمانهم صافي كاللبن .. غـني بالافكار كالسمن علي الزبده

فقررت اللجـنة العمـومية الاولي لهيئة حلمنتيش العليا قائله:-
تم التكـوين(( يعني عملوها ))

ولهذا فقد أعددنا (منفستو) نوضح فيه هوية الأشخاص الممنوعين
من دخول وطن الإبتسامة على النحو التالي

.................


المبوز والمكشر ... ما معانا
البدخن ... ما معانا
المطرم والمبرطم ...ما معانا
والسياسة سيادا ما داخلين معانا
والموسوس ... ما معانا
والبلاقي الدنيا متجهم .. دا قطعاً ما معانا
والمتلش والمخاصم والمشاكس والمكاجر
والمقلق... ما معانا
والبجيب اكياس بلاستك... ما معانا
والبخلي الهم يعشعش... ما معانا
والمسيخ الجافي ما محسوب معانا
والبخلي الدمعة تنزل ما معانا
والبزيل البسمة.... ما حيكون معانا
غير كدا .. مرحباً بيكم معانا



احببت ان احـيطكم علمـا لعـدم معاصـرتنا
لـتلك الفـترة
والله الموفق




اخـوك
ودالدســوقي






تـوقـيع اليـوم
...............
البريدك مـوت قالـوا بـتريدو
الا سـمح القـول فـوق خشـم سـيدو

.
صورة العضو الرمزية
محمد نعيم
مشاركات: 9345
اشترك في: الجمعة 2007.5.18 10:35 pm
مكان: البلد الامين

رد: حلمنتيشيات

مشاركة بواسطة محمد نعيم »

مشكووور يا مبدع
صورة العضو الرمزية
فجر
مشاركات: 3632
اشترك في: الأربعاء 2008.2.13 9:33 am
مكان: فى العياده النفسيه

رد: حلمنتيشيات

مشاركة بواسطة فجر »

:076: واياخان وود الدسوقى :076:
ضحكتونى من الصباح بالجد بتبالغوا حسه ده شعر والا شعريه
المهم واصلوا وما تقيفوا وفى انتظار الباقى:D
ودمتم احبتى بود
صورة العضو الرمزية
waya
مشاركات: 14068
اشترك في: السبت 2007.8.11 11:15 pm
مكان: على سفر

رد: حلمنتيشيات

مشاركة بواسطة waya »

ود النعيم ,, فجر ,,
مشكورين على الطلة ,, وكل يوم تعالو ,,


ود الدسوقي ,, ( أخوك طبعا مشهور بالعريس )

عشان كده النديك دي ,, في

الزمن الضائع

متين يا الله ألم الفكه
أجيب الشيلة واسوي الشبكه
وأمي تزغرد بي طول صوتها
وأنا مبسوط وظابط الشكة
هدومي معطنة بالأرياح
ريحة الخمرة وريحة الدلكة
واطبع للعيزومة كروت
حاشاها الما زي كرت البنزين
جميله زاهية في ورق التوت
وتحت الإمضاء مشكورين
لأنها لحظة ما بتفوت
وإلا تكونوا مبسوطين
ويجوا الأولاد بوجوهاً نادية
يقشوا الفسحة الواسعة وهادية
نرًكب فيها الصيونات
ونعمل حفلة بود البادية
ولازمن حفلة تكون صباحي
أشفي غليلي وأداوي جراحي
من زمن العذابة الأغبر
السًود عيشتي وزاد لنواحي
أفك القيد من قلبي وأغني
حبيب الروح وغني يا صاحي
وفي العصرية نمرق سيرة
خلوق منتظمة ماشة مسيرة
زي صف دكانأً ناصية
فيه سجاير بالتسعيرة
بناتنا يغنن مبسوطات
دور بينا البلد ده
يلفن يدورن العربات
ولمن أصل بالسيف اتقدم
زي الفارس ماشي ملجم
وشي بينضح لمعه ونضرة
قميصي نضيف وماه مجلبط
بملاح خدره
أهز في البنوت بي سيفي
وابخبخ فيهن لبن البدرة
وفجأة يدق صوت الدلوكة
وتبقى الناس بالجد مربوكة
واحدة تصفق واحدة تزغرد
وواحدةتلوك في لبان بازوكة

جابوا عروسي وبدت الوقفة
سرحت بعيد في حق القفة
جابت قون بي رقة وخفة
ما اتجرست كلا وحاشا
الا هناك واقفين شماشة
قالوا اكيد شارب حرباشة
زعلت شديد وغلبني اللعب
لانو كلامن كلو كضب
قاموا اصحابي بصوت عالي
يا عبد الله اطلع بره إشاعة إشاعة
وحتماً يوم لي أمك عايد
قونها حقيقي ما اوف صايد
صوت أصحابي أثر فوقي
بحركة ذكية جبت القون
وانا والحلوة بقينا درون
وفجأة أضفت الهدف الثاني
وغمر الساحة فرح رباني
مرقوا اصحابي يكوركوا ويهتفوا
فاتوا الفسحة وسدوا الشارع
صوتهم طاغي ظاهر وطالع
يا عبد الله هايل ورايع
جبت القون في الزمن الضايع
صورة العضو الرمزية
ودالدسـوقي
مشاركات: 1236
اشترك في: الثلاثاء 2008.4.15 12:24 am
مكان: ارض الله واسعـه

رد: حلمنتيشيات

مشاركة بواسطة ودالدسـوقي »

waya كتب:

ود الدسوقي ,, ( أخوك طبعا مشهور بالعريس )

عشان كده النديك دي ,, في

الزمن الضائع

متين يا الله ألم الفكه
أجيب الشيلة واسوي الشبكه


شـهـره سـاكـت ولا نـاوي تفعـلها

تقـعـد تمـاطل في الوكـت ..وتحـلم... لامن تحصـل عـليك
قصـة ابو الشـوايقـه .

اديتك فرصـة بـوسـت بوسـتين كما لحقـته نفسـك
حاكلم سعـديه بت جـبريل

وما اظـنك تقـدر علي (شـمار سعـديه بت جـبريل)

المهم هسع خلينا مع ابو الشـوايقـه الحـالم
يلملم فوق الملاليم ويجهــز فـوق البيت
الحرامي نط بالليل وسرق بيتو ..
وصاحبنا زعل زعلاً شديد وقام يشتم في الحرامي


تعيقني انا ؟؟


تعيقني انا ؟؟
يعيقك الله يا مجرم ..وكيف هسه تسرقني ؟؟
تسرقك بطنك ان شا الله ..تخليك ديمه متألم
حضيري ان شا الله يبراك ..وفلساً للجيوب يخدم
والعطش اليحرق الجوف..يخليّ الفقرا قايمي وقاعدي ليك تعزم

تعيقني انا ؟؟
يعيقك الله يا مجرم..بمدفع كلاشنكوف ..يواليك في المسيمع عاد
يخليك لاسمع لا شوف

تعيقني انا ؟؟
نان بالله لو سألوك ..نان عميان من الاسواق ؟؟؟
تسوق اروتّي في ساقيه تورها يقطّع الخناق
تسوق لك داف تدقشوا ترلّه في عقبه .يخليك لاضهر لا ساق
حكمت تجيني انا المسكين ..البلقط بي قرش وقرشين
تقرشك عقرباً تلقاك فوق الريق يكون جسمك مرطب تب
تقرشك سمومة صيف ..تخلي وشيك قايم حب
وقرشاً يبلعك يسرع يلف بي جده والصومال ويجيبك لينا تاني هنا
يرميك في الرصيف بي جاي يخليك بس عضام وعصب

تعبقني انا ؟؟
تطرشق ليّ برنامج اخطط فيه لي سنين ؟؟
يطرشق فيك كمبرسور يخليك انت بس سردين
يطرشق فيك بوتوجازاً يكون جمبك صفيح بنزين
وترقد ما نشوف لنا زول يقول لنا ماشي في تحسين

تعيقني انا ؟؟
كمان تسرق ملاياتي المن كيسها ما انفكت ؟؟
ولا عارف نقوشهن كيف ؟؟يفكك مننا الله اليوم قبل باكر
يخليك لاف صيف وخريف ..
يفك ضلعك ..تفارق عقلك تسك الماشي فوق عدلك
زي جملاً عشاه الزيف
نفسك فاااااااااتحي ترقد فوق ملاياتي
ترقد يابا في عنبر نصيحو يشابي كايس ايدو
ترقد يابا في قبراً اعوذ ربي من هولو وعذاب سيدو
ترقد يابا في غرفه ..تكون مفروشه بالصرفه
ونملها يخمّو بالقفه ..
ولا تشوف جنّه بي عينك ولا في العتبه تتعتب
عشان عملك تملّي كعب ..تسرق الجيب
تسوي العيب
انت حرامي ود الكلب












تـوقـيع اليـوم
سـت اللهـيج السـكري .. انتي الجمـال بتسـكري
وجـوه القـلوب بتعســكري
وببراءة تصـتادي البرئ .. وتردي لو سـألوك بري



مع الاعـتذار للشـياليين

.
صورة العضو الرمزية
waya
مشاركات: 14068
اشترك في: السبت 2007.8.11 11:15 pm
مكان: على سفر

رد: حلمنتيشيات

مشاركة بواسطة waya »

ودالدسـوقي كتب:


شـهـره سـاكـت ولا نـاوي تفعـلها

تقـعـد تمـاطل في الوكـت ..وتحـلم... لامن تحصـل عـليك
قصـة ابو الشـوايقـه .



.

هازول اتصبّر
وقوم إتنفض وقول يا لطيف

البـِنيات الحـِليوات
كان عصير ما تشربن

وإن رويحتك دار تموت
وقامن كده
بِقن الحياة
ما تلبسن

وكان لـِقيمات في جـِويعتك
خلي جوعتك تبقا زايده
وبرضو زايده ،
أخير تجوع
واللقيمات خلي روحك تبعِدِن

والنـِـدوه الشايفه روحا السمحه بس
ما تكترث قوم خـلـّـها
أصلو القرود في بعضهن واقعات شكل ... متــ
قـارٍبـِن

شيتن غنج
وشيتن
تـِشِلهت للمخاليق الرويحاتن ضعيفه وغالِبُن حق الزواج
حق العِرس
حق إقتران بشاكِـلِن

كيفن نلوم ناسن مساكين مفلِسه
والجوف حِرق
والمويه قاعده مونِسه
صورة العضو الرمزية
ودالدسـوقي
مشاركات: 1236
اشترك في: الثلاثاء 2008.4.15 12:24 am
مكان: ارض الله واسعـه

رد: حلمنتيشيات

مشاركة بواسطة ودالدسـوقي »

waya كتب:
هازول اتصبّر
وقوم إتنفض وقول يا لطيف

البـِنيات الحـِليوات
كان عصير ما تشربن

وإن رويحتك دار تموت
وقامن كده
بِقن الحياة
ما تلبسن

وكان لـِقيمات في جـِويعتك
خلي جوعتك تبقا زايده
وبرضو زايده ،
أخير تجوع
واللقيمات خلي روحك تبعِدِن
.



بعـد ماحـلفته يازي حـفلة وايـا الفـوق د ييك... يامفـيش عرس
بعـد مابديت اجمع فوق شعـوري.. واطـرح فوق حق الفـنانه والمشاطه
والبوباره والشمشاره والطباخـه والحـنانه والدلاكـه والدلوكـه والمفراكـه
واعـرض فـوق ضفاف النيل .. واجيب عجـلا سمـين بالحـيل
واتـربرب واتسـبسـب واتدسدس تقـول عـقرب بدور الدغ
واتكـبكـب واقـول يارب ...سـترة الحـال
واعـزم waya والاخـوان ... ويكـون عـرسـا عـرس خـمجـان
تقـوم تفحـمني بالقصـيده التانيه دي وتقـول لي
البـِنيات الحـِليوات
كان عصير ما تشربن

,,,,,,,,,,,,,,,,,,,,,,,


سـاعـتين وتلاتـه غـوايش oooops اقصـد سـاعـتين وتلاتـه دقـايق
انـا اقـرأ فـوق القصـيده بتـاعـتك دي
ومامصـدق عـيوني ده وايا العريس

لما لقـيتك كاتب الكلام ده بعـد حـداشــر
قلته هااااااااا الود يكـون .......
ماقـلنا ليـك مية مره كـتابة انصـاص اللـيالي دي خليها


ولا
تـكـون حصـلت عـليك قصـة عـبدو


في الليلة ديك القصة ذاتها بقت عليك
يا عبدو وأدوك الشريط
يوم قولنا ليك أنضم معاها وكلّما
أبيت تسمع كلامنا وبقيت لميض
وقلته أحسن أكون تقيل أنا ما جميل
وبقيت تقيل لامن سقوك موية الغسيل
وجيت تنطط زي زمان وتباري بقعور الشجر
كايس كراسي الخيزران ..
وقعدته يا زينة الرجال.. كهربجي قال
رفعوا الستار والبت تجي ومرات تقيف
ومعاها يا زول زلداً حريف
والوقفة كانت وقفة ولف
صاحبنا بالاحساس عرف
سألته والناس كلّموك
ووقعته في شارع الزلط
تبكي وتجعّر والعيون اتورّمت
ويد القميص ضهر القميص كم القميص
حتى الفنيلة اتشرّطت
يا عبدو عيب
قوم يلا صلي على الحبيب
الواطه صبحت دايرين ننوم
يا أخوانّا لأ أنا عايز أموت أقع البحر
يا عبدو عيب
الدنيا حر .. والموية بتسخّن عليك
ثلاثة ساعات زولنا يسب ويكيل
ودموعو سايلات بالكفوف
وشرايطو تلمع في الكتوف
بقى فيلسوف
في علاقة بين يوم السبت وعين الحسود؟!
ومقارنات بين الجهل والجمال!!
وسوء الإختيار
قال شينة قال ...!
قال شينة قولنا كلام صحيح
وخطيبها زاتو ولد قبيح
بس ياخي قوم اصبحت دايرين ننوم
قام تاني جاب سيرة البحر
وقام تاني جاب سيرة البحر


,,,,,,,,,,,,,,,,,,,,,,,,,,,


ربي يجـيب العـواقب سليمـه
انا بقـيت من مااجـي خـاشـي البوسـت ده
عـيني ترفني
ولي هسع ماقادر اقـول لـيك

شمـار سعـديه بت جـبريل


تـوقـيـع اليـوم

قالو زهجانه واظنك ....ما عرفتي سؤالي عنك
يا اللِذّيْذَه الكلكي جنك
عايز اكون انا ابقى منك
اي حاجه قريبه منك
تبقي بوليس ابقى بمبان
تبقي كبده ابقى مصران
ابقى حفله وتبقي سكران
فرتقيني
وجهجهيني
وبهدليني
ومامهم
هي تفـرتقـينـي
بس مهم شوفت عيونك وابقى اي حاجه قريبه منك

.
صورة العضو الرمزية
waya
مشاركات: 14068
اشترك في: السبت 2007.8.11 11:15 pm
مكان: على سفر

رد: حلمنتيشيات

مشاركة بواسطة waya »

عبدو ...

إلا كان هي بقت ندى ,,
نـــــــدى!
قلتي ليّ سموك ندى!؟!
وده منو السمّاك ندى؟
ده أكيد أبوك
إنعل كِدة!
فيك شنو يسمّك ندى!؟
في صوتك أتخن مننا
إضنين كُبار زي دِشّنا
وتقولي ليّ سمّاك ندى!
خشمك ده ريحتو معفّنة
ايدين كبار حقات بُنى
وتقولي لي سمّاك ندى!؟
المشية كتّاحة وعلال
كرشك تقول شايل جَنى
وتقولي لي سمّاك ندى!؟
قالت لي "ها هدى في البطاقة إسمي ندى"
شوف يا أخ..
مافيش علاقة بينك وبين ندى
خلّيها ندى ..
خالت قريبة جارت صديقة ناس ندى
ما فيش علاقة
ندى في العيون أكحل مجعّد مسوّدة
انتي العيون فوقن قضى
ندى في الحواجب زي هلال
قصة نصوم دي مؤكدة!
انتي الحواجب دلجة بس
قلم الحواجب هاردها
وتقولي لي سمّاك ندى!؟
ندى تبتسم آلالاف مؤلفة تسعدها
وانتي الخشم شارّة التلاليش
بس طبق ومغطّي صينية الغدا
ندى في الوشيش نظرك بشيش..
ما يعقّدها
وانتي الوشيش وش الجحيش
نخرين كُبار كُرعين ردا
وتقولي سمّاك ندى!
قاتلي "آي أنا إسمي ندى"
شوفي أوعك تقولي اسمك ندى
ندى ما بس الاسم
ندى الجمال زايد الأدب زايد العلم زايد الفهم
ندى في الجمال ما شُفنا أجمل من كِده
ندى في الدلال خصّاها بيو رب العباد حين أوجدها
ندى في الأدب ..
ربّوها بيو رجال ياكلو النار مولّعة موقدة
ندى في الكلام
طبيعي صوتا بيجيب صدى
ندى في "البزاغ" ..
شربتي "سفن أب" ياهو ده !
وتقولي لي سمّاك ندى!
صورة العضو الرمزية
ودالدسـوقي
مشاركات: 1236
اشترك في: الثلاثاء 2008.4.15 12:24 am
مكان: ارض الله واسعـه

رد: حلمنتيشيات

مشاركة بواسطة ودالدسـوقي »


انت ياود بقـيت مابتنقـدر كـل ماجـيك فوق الكلام البتقـولوا
تروح مطـفر لي فـوق محـله تانيــه فمـا شايـف لي حل معاك
الا






شمار سعدية بت جبريل


ناس البيت
هوووووي ياناس .
يا عشمانة
يا إخلاص
بنات كلتوم
يا فوزية
كيف حلكن ؟
مشتاقين
سلااام بالكوم
.........
جات سعدية
شايلة شمار
معاهو (التوم)
مشت شهرين
تنفس بتها
الخمجانة
في الخرتوم
..........
تمام شهرين
بيوت الحلة
لا سمعت خبار
لا شمار
ولا قرقر ضحك
حلقوم .
ولا طقطق لبان
هيمان
في مبخر
بخور تيمان
ولا شالن حريم
فنجان
وسيرة زول
علي قدوم
لا ضحكو الصغار
في حجوة
لا سهروا الكبار
في حكوه
وأتمحن وطار
النوم .
.........
نان سعدية
بت جبريل
كان عارفين؟!
رويحة الحلة
والطلة
لا قدمت
ولا هملت
لا مسخت
لخلق الله
لا عرفت
بيوت الحلة
ليها مثيل
..........
كان غابت
تقول نامت
عيون القمرة
أو ترتر
وفات النيل
.......
هي المشاطه
والحنانه
والدلاكه
والدباره
والشمشاره
والسمساره
والطهاره
بي موسا
ما خلت
في هذا الشان
لبت في الحلة
شي مطلوق

هي الجهازه
للعرسان
ما بتقعد عروس
في حفرة
لوسعدية
ما وقدت
طلح دخان
هي ديمه الراس
القيدومه
دق الريحه
سبت الشوره
والطايوق
مرسال النقص
للسوق
عرق الهَمه
للحبان
خبيرة الخمره
بي ميزان
لو شم العريس
عوسا
تسيل دميعاتو
ويتجرس
تقول ولع
عديل بمبان
.....
كان رفًت
إيدين سعدية
في التعليمة
دلوكه
تلاقي النخله
تتفنس
وعودها يميل
تبوس سعفاتا
موج النيل
وكان شالن
بنات الحله
غنوه معاها
تتقطع عديل
قمصان
ويتكشف
ضهر شبان
يولول في الجلود
السوط
يركز في البضان
عاشق
تزغرد ليهو
زولتو السمحة
ست الفوت
يفور عشقو
ويقول
يا سوط
أريدك موت
تهز فوقو الايدين
طايرات
تولع نار
في وسط الدار
تجن زغرودة
من سعدية
ويتلهلبغنا البنوت

ناس البيت
هووووي ياناس
يا عشمانة
يا فوزية
يا إخلاص
بنات كلتوم
كيف حالكن
مشتاااااقين
سلااااام بالكوم
.....
إنفتحن
عيون البيت
وإنجدعن
إيدين الأوضه
والراكوبه
وإتسرح
شعر لالوبه
رجعت شابة
فاتا الشيب
وركت رشه
فوق صفقاتا
شديرة الحنه
وإتمسح
غباش الحنه
وإتجمع
حمام الحله
وإتراصص
تقول قرقول
صدح قوقايو
بي تهذيب
........
جات سعدية
جات سعدية
جرًت عشمانة
لي سعدية
حفيانه
وجات إخلاص
تنقز
زي وليد الريل
وطربانه
ضحك قرقار
ودمع الشوق
نزل سرسار
وصار شهقي
السلام
دوبيييت
........
جات سعدية
جات سعدية
سباليق البيوت
رفعت عديل
تعظيمها
بالترتيب
وشوفو الشامه
بت كلتوم
وكت سمعت
سلام سعدية
بالدهشة
قد الإبره
إتغاتت
وأتسمر رويس
الخيييت
وإتنخجت
تقول راجياله
بس هبشه
ومن بين إيدين
فوزية بت كلتوم
وبالهجمه
كمان طارت
عديل كمشه
ونص السهله
بت الريله
إتنفضت
وإتنفشت
وجات زغرودة
إنبهلت
إتقسم
ضليل شدره
وإبتسم
خشيم مفركه
في حله ملاح
خدره
وإتشرشر
في نص الطوه
وإتطاير
حنين الزيت
..............

جات سعديه
جات سعدية
أتعنكش
في عود سعدية
كل الناس
الشُفع
حريم البيت
الجيران
تقول نخله
سبايط خيرها
إندلت
وتِقلو خلاص
وهاك يا سلام
وهاك يا شوق
وهاك يا كلام
إتجمع
في رمش العين
هوي الأرحام
وإتجدع
وطال الضل
فرش لي برشو
لي قدام
واتردت
رويحة البيت
قلع توب زهجو
بالايدين
..........
اتفرشت
في غمضة عين
عناقريب الاهل
صفين
وكم سجادة
كم بنبر
ومن مبخر
مستف
بي بخور تيمان
طلح صفق
سحاب دخان
وإتحكر
في نص تربيزة
جك ليمون
مندي قزازو
زي حتل
دموع مكنون
ووسط الرجه
والضحكه
إتماسك تمام
الكون
صبح موزون
.......
جات قراصه
بي دمعه
وإترجف
صحن لقمه
وكت دلقن
إيدين نعمه
عليهو ملاح
نعيميه
وإترصت
صحون الفول
تقول لمه
وبالفرحه
ضحك سرويس
وقت ردمن
إيدين شامه
بت كلتوم
تلات مرات
تل من نار
طعميه
..........
وهاك يا ونسه
يا قرقار
ويا سعديه
ست القعده
أنفتحي
تقول رادي
وهاك يا نشرة
الشهرين
من الخرتوم
جنس أخبار؟!
توم وشمار
حتى الضل
وقف شمشار
..........
صواني تفوت
صواني تجي
قصص بالكوم
ضحك وحكي
ويا سعديه
ما خلت
نفس يتشال
ولا إيدا
تحك الراس
جنس قصصاً
تجيب هلواس
........





وديي حالــتو الشـمـار بتاعـه لسـع ماقالتـو
وكـان سعديه دي ما عـدلت راسـك بعـد ده الا الحكما




توقـيع اليـوم



يا اللي ريدك فيني طبعة .... يا المكسرة فيني ضلعة
يا البجيك في الجامعة دايش .... يوم خميس ألقاه جمعة

.
صورة العضو الرمزية
ودالدسـوقي
مشاركات: 1236
اشترك في: الثلاثاء 2008.4.15 12:24 am
مكان: ارض الله واسعـه

رد: حلمنتيشيات

مشاركة بواسطة ودالدسـوقي »

.,
[motr]
شمار سعدية بت جبريل
الفصـل الثاني
[/motr]


جات سعدية
شايلة شمار
معاهو (التوم)
مشت شهرين
تنفس بتها
الخمجانة
في الخرتوم
ويا سعديه
ما خلت
نفس يتشال
ولا إيدا
تحك الراس
جنس قصصاً
تجيب هلواس


راس البيت
وقف مشطوب.
في عين النخله
كان الزير
خروف دبدوب
وبالهجمه
إنزلقن
من الايدين
كبابي الشوب
واتلخبط
حمار مربوط
نهق في الخُلعه
بالمقلوب.
صهل
ضحك الحريم
كورس
وكت فرقع
تقول في الحته
نُص القصه
كان مكتوب.
***
يا سعديه
هاك الرص
وراهو الرص
وتتجادع
حريم البيت
سؤال وسؤال
تقول دوبيت
***
- سجم خشمي
مسك إيدينها
جوه البص؟!
***
- أجي يا يمه؟!
كمان قلعن
عديل التوب؟!
***
- سجم أُماتن
الخايبات
شن راجيات؟!
***
- أخير واحسن
يقولن روووب
***
- قلتي شنو؟!
واحدات شربن
عديل الـ......
شنو؟!
الشيشه
ولاّ حشيش؟!!
***
- سجم أمي
يا سعديه
قلتي الشي الورا
داك
سموهو برضو
شنو؟
الدِش؟!
***
يا سعديه
بت جبريل
تقول حاوي
اتحكرتي
شلتي الجو
حريم البيت
بضحكه طويله
سَوّن شوووو
وكت سعديه
إتفَنَست
وقالت
- أيّا
اسمو الدِش
وحاة الله
شفت بنيّه
نُص السوق
وبالفستان
تَقَلِّب ليها
في دِشّاً
تقول عتالي
شايل ليهو
قنطار عيش
جوه الخيش
***
ويا سعديه
بت جبريل
وكت كِتْر
الطَعِن في الضُل
إتعدلت
في نص الداره
زي ملْكه
وخَشّت توووش
عديل في الفيل
***
- هي يا يمه
نان ما نسيت
أقول ليكن
حكاية الزاكي
ود قنديل
- الزاكي منو؟
- ود قنديل
جار التوم
- التوم
راجل بتك
«الخمجانه»
في الخرتوم؟
- أيّا
***
وانعصرن
حريم البيت
على سعديه
جايى شمار
كبار مردوم
معاهو التُوم
وشِيهن رارا
للاخبار
***
يا سعديه
خُشي عديل
طَعِن في الفيل
***
- هو زول سمسار
قروشو كُتار
وخالو وزير
- سمسار سوق
ولاّ بيوت؟!
- في شيتاً
ما بسمسر فيهو
ود قنديل؟!
من الخرفان
لحدي الخُرده
والعربية والتلاجه
والدكان.
سواقي
لواري
طيارات.
بيوت للبيع
بيوت تأجير
حصين
وحمير
كمان أكشاك
تجارْة الشنطة
والتمباك.
جزم
قمصان
ورق
أقلام
كمان دخان.
***
وكت دقّت سديرها
الشامه
بت كلتوم
كمان
كل الحريم تبعوها
في ذا الشان
***
- سجم خشمي
سجم خشمي
وا خجيلتي
وا خجيلتي
يا نسوان
- كمان دخان؟!
***
سعديه غمزت
ليها
غمزه طَرَف
وزي حاوي
وبي حركة صوابْع
الإيد
سوّت ليها
ورقة لف
ومطّت للحروف
تبيان
- دخاااااان
ما دخااااان
فهمتن حسه
يا نسوان؟!
- سجم خشمي
حتى البنقو
باعو كمان؟!
- أصُبْرَن
أصُبْرَن
وقالوا الساترو
وساندو
خالو وفاهمو.
وسمعت شمار
قالوا استوردو
البمبان
***
الشامة شهقت
وصوتها عشرق
والريله نَفّت
دموعها سالت
وفوزيه قَحّت.
عشمانة عطست.
***
وسعديه ضحكت
- سجمكن
مالكن حسه
يا نسوان؟!
شان قلت بس
بمبان؟!!
***
- وخالو وزير
- أيّا
مكنكش
في الكراسي عديل
لا شالوهو
في تعديل
لا نقلوهو
بره سفير.
ولو ساط البلد
بي حالها
ما سألوهو
من تفسير
- مساخْر الدنيا
في ناس ديل
- ناس مدفوره
يوت لي فوق
وناس بنيانها
درب السيل.
***
ويا سعديه
زيدي شمار
لسه الرادي
فيهو خبار
***
- أها اتذكرت
حاجة كمان
والله لو حجُّونا
ما بتدخل
عَقُل وأضان
***
اتفتحت
عيون شباك
وصَنُّو اتصّنتُو
البيبان
واتمدّت
إضين نسوان
ويا سعديه
اتشمرتي
واتحكرتي
واتمهلتي
واتوكلتي بالرحمن
شمارا الجاي
صنفو تقيل
عديل يكسر
رقيبة الفيل.
***
- قالو الزاكي
خَشّ عديل
يسمسر
في مقابْر البكري
وأحمد شرفي
وحمد النيل
***
في تربيزه
نص القعده
منّ الخلعه
انكسرت كبابي
الشُوب
وطارت ليك
صواني الشاي
وقعت رُب.
***
- عشان الموت
صبح بالكوم
وموت الجُمله
صار معلوم
ناس الزاكي
شان ما يبقوا
يوم في لوم
قالوا الناس
تقدم لي قَبُر
بدري
وما تْسهِّى
ويشيلك نوم
تخُت دمغات
في طلب التُربه
تدفع للحجز
ورسوم
ويدوك....
ويدوك....
شن سموها يا سعديه
بت جبريل
شن سموها يا سعديه
بت جبريل....
أيّا
«شهادة بحث»
مكان عايز.
تُرب فاروق
ود البكري
أحمد شرفي
حمد النيل
***
إنْقَلَدن
حريم البيت
وانفقعن
دموع وعويل
***
صوت النخله
بالمليان
زِعِل كورك
- يا نسوان
بدل تبكن
على الخرتوم
بدل تبكن
على امدرمان
أخير تبكن
على السوداااان
«و...تتوالى الفصول»

»



الفصل الثالث قريباً
شمار سعدية بت جبريل
>> كضبة ناس.. في شهر ابريل <<

.
توقـيع اليـوم

صورة

,
صورة العضو الرمزية
waya
مشاركات: 14068
اشترك في: السبت 2007.8.11 11:15 pm
مكان: على سفر

رد: حلمنتيشيات

مشاركة بواسطة waya »

شمار سعدية ,, لكن ما شمار ,,

هاك دي حسب الظروف ,,

يا دنيا ليه

يا دنيا ليه دايما كده
كل الظروف متمردة
حظ الشقي الما خلّا باب
في الدنيا لافي مُحّددة
لا طال حلم لا طال نصيب
بقراية كوم متعددة

يا دنيا ليه دايما جري
ما تقيفي مرة واصبري
مستعجلة ولاحقة الشنو
ما كوم حصادك مُهتري
والفايدة مبلوعة في كروش
تاجر ضلال أو مفتري

يا دنيا ليه دايما عذاب
أسفار بعيدة واغتراب
كان فيها ايه لو خير بلد
بالعدل مقسوم بالحساب
ما الخير كتير ما بدور سفر
وضياع عمر محسوب سراب

يا دنيا ليه دايما حزن
دايما دموع وقلوب تئن
وسواد كثيف دخان ألم
نابع من القلب السِخِن
وغراب كلام بوم الفقر
ساكن معشعش في البدن

يا دنيا ليه دايما ضلام
وغيوم مكدسة ليلا دام
وسكون عجيب مبتور لسان
محروم بيهمس بالكلام
وعيون مقدقدة بالسهر
عميانة تسبح في الظلام

يا دنيا ليه ما فيك أمان
والظلم آمر في الزمان
والخوف دخل نخر العضم
والسوس ده هو الندل الجبان
والروح مُعّذبة بالسكوت
سِكّين عذاب وسياط هوان

يا دنيا ليه دايما كلام ..

صورة العضو الرمزية
سحر محمد
مشاركات: 3108
اشترك في: الجمعة 2008.8.8 2:10 am
مكان: مصر

رد: حلمنتيشيات

مشاركة بواسطة سحر محمد »

يا سعديه
خُشي عديل
طَعِن في الفيل
....
- هو زول سمسار
قروشو كُتار
وخالو وزير
- سمسار سوق
ولاّ بيوت؟!
- في شيتاً
ما بسمسر فيهو
ود قنديل؟!
من الخرفان
لحدي الخُرده
والعربية والتلاجه
والدكان.
سواقي
لواري
طيارات.
بيوت للبيع
بيوت تأجير
حصين
وحمير
كمان أكشاك
تجارْة الشنطة
والتمباك.
جزم
قمصان
ورق
أقلام
كمان دخان.
صورة العضو الرمزية
كجووول
مشاركات: 239
اشترك في: السبت 2008.4.26 7:03 pm
مكان: الفريجاب الخوالدة
اتصال:

رد: حلمنتيشيات

مشاركة بواسطة كجووول »

الله يخليكم ياخي والله أنا لي زمن بعيد جدا ما ضحكت من اعماقي
وربنا ان شاء الله يحفظكم من العيون الساحرة
عشان نسمع الكلام الجميل دة يا جماعة
لكن هاكم دي عربون محبة وكدة

مالكم ومالي
يالداخلين توش طوالي
ساكت كدة تتكلمو معاي
ان شاء الله اشكها جلابية واقعد مع بت عمي
ان شاء الله اتسوك بعد الشاي
كمان اكل لي ستين كيلو عجالي
وابقى سمييين ذي مرت خالي
هي مش مرت خالي
مالكم ومالي
ارسل جواب لعنواني
وبعد يومين الجواب اجيني
واقول هي الجواب الرسلتو جاني
انشاء الله اقيف في صف الرقيف
واجر نفسي واقول منو الجراني
انشاء البس لس عراقي برتقالي
لبست لي قيص مخطط
وجيت كايع بالزلط
واحد كورك قال غلط
هوي يا طير يا ضكر البط
قيصك دا حق صقط
يا ناس قميص اصفر
وقلت الليلة فقري وخطر
وجيت كدة اتعكر
في السلم عشان اظهر
اول زول لاقيتو سحر
قالت هي يا اشتر
حنبوكة ولا قالب كستر
ولبست مرة شبط وجيت الجامعة
شوف الشغل ابتداء
كيف اول زول لاقيتو ندي
قالت واي سجمي الليله
مالك عامل في نفسك كدة
رديت ليها والله المرة الجاية اجيكم بردا
مالكم ومالي يال خاشن توش طوالي
حلقت قالو شجرة نيمة
خليت الحلاقة شبعت شتيمة
اعمل شنو اي حاجة بقت قديمة
اعمل شنو اي حاجة بقت قديمة
اعمل شنو اي حاجة بقت قديمة
صورة العضو الرمزية
ودالدسـوقي
مشاركات: 1236
اشترك في: الثلاثاء 2008.4.15 12:24 am
مكان: ارض الله واسعـه

رد: حلمنتيشيات

مشاركة بواسطة ودالدسـوقي »

.


انتـو الواحـد بس يقـول يصـوم ليهـو تلاته فـوق نص
شعـبان ويجـي راجع ... يجـي يلقاكـم مولعـناهـا كـدي ..
والبنيه الحليـوه دي من وين ياوايـا يا اخـوي .. ماتعـرفـونا
شـنو انتـو ..



اخـتنا سحـر
القصـه كلهـا حلمنتيـش في حـلمنتيـش ... وده السـبب
الخـلاني في البـدايه اكـتب منفسـتو هـيئة حلمنتش
هوية الأشخاص الممنوعين من دخول وطن الإبتسامة
واظـنه من اهـم بنـود هـذا المنفـســتو البند الاول القـائـل
المبوز والمكشر ... ما معانا
المطرم والمبرطم ...ما معانا
والبنـد الخـامـس من اجـندة الهـيئه
البلاقي الدنيا متجهم .. دا قطعاً ما معانا
فدخـولك لهـذا البوسـت يعـني انـك موافقـه علي المنفسـتو
نشــيلك فـوق عـيونا ... بس زعـل مافيـنا


وهـذه القصـيده اعـتبريها اهـداء خـاص بس ماتكـلمي زول
الـيومـين ديـل انا حـاسـي اني مراقـب من القـوات الخـاصه
فهـمتيـني


المستعرب الخلوي /عضو هيئة حلمنتيش العليا


أصبحت خيراً يا بلومةُ وأسلمي
من كل فظٍ ذي لسانٍ أبلم

يا ويح بوزي كيف يهجو نفسه
إنّ الهجاء لمِن فعال المجرم

فإذا هجوتُ فإن هجوي ناشفٌ
ينمو بجلدِك مثل حبِّ البُرجم

ولإن مدحتُ فإن مدحي طاعمٌ
كلُبانِ ماكسي في خشيمك فافهمي

كيف الهجاء وانت حلوةٌ كفتةٍ
والكستليتةُ فيها زيتُ السِمسِمِ

ولقد رأيتُكِ مرةً منشرةً
والآيسكريمةُ والقزازةً في الفم

تتلمَّظين بجغمةٍ وللحسةٍ
تتمطَّقين .. ومرةً تتبسمي

فهريتِ مُصراني بعاجل نظرةٍ
من مقلتيك فيا بلومةُ فارحمي

قلباً إذا ما شاف زولاً قطعةً
تلقاهو يمرُقُ طائعاً مستسلمِ

أنسيت ساعات خَلَتَ بِجِوَارِكُم
أشكو إليك بصوتي المتلعثم

ويدوش رأسي مثل ساكن دَردَرٍ
ويكون حِسِّي كبالعِ دُردُم

أنسيتِ يوم رجالتي قِدَّامكُم
نافخ جضيماتي كجوز طماطم

يا من سلقتي كاحلي ككوارعٍ
خذي رأسي فإنه هو ((باسمي))




كجـوول لي قـدام ... ولااقـول ليـك ارحكـه حـوش الرجـال
البنات مايكـتمن نفسـنا ونفكـها بي مزاج

وقلته كمـان

انشاء البس لي عراقي برتقالي
طـييييييب
تـباري فوق كتابة Waya ده حتمشي ليها بالشرابات بس



بعـديـن اليـومـين ديـل شـايف اخـتنا فجــر لاااااابــده
واظـنيتـو الهـدؤ البسـبق الكـتاحـه..
انـا غـتسـاته دي ماقاعـد اتطامن ليها من عـيادة المجانين
الدخـلتني فوقـه لاايـدي لاكـراعي
وخـلتني فـوق أخـر الصـف مع اني حاولته افهمها
انـو أخـر الصـف فوقـوا زول


يا طبيبة

يا اللي ريدك فيني طبعة .... يا المكسرة فيني ضلعة
يا البجيك في الجامعة دايش .... يوم خميس ألقاه جمعة

يوم أشوفك ... قلبي ينتف .... عرقي ينزف
وابقى اشوفك سبعة سبعة
" أصلو ريدك جاني فجأة " .... وأدى لي صنقوري كبعة

****
يا طبيبة ... يلا شيلي القرقريبة
ويلا عوسي قليبي كسرة
ويلا دنكلي منو لقمة .... والعبيبا

عل بس شيليها مرة .... وابلعيها كالجاتوه
خليهو يسأل جوة يسأل .... والبيسأل ما بتوه
ولما جات المعدة تهضم .... قيل مهلاً اتركوه
أنه لا يطلب شيئاً
إنه قلبُ ُ متيم .... جاء يسأل عن أخوه

*******
قد سألتك لا تجافي .... إنه حب خرافي
ما بسيبك .... كان بترضي وكان تخافي
ما بسيبك كان رضيتي وكان أبيتي
كان وقعتي .... وكان جريتي
كان عقب طلعتي زيتي

ما بسيبك .... كان خلطتي الأمة جملة
كان طلبتي المهر عملة
وإن طلقتي علي نملة

ما بفوتك إنت ملي
كان بترضي وكان تملي
ما بفوتك إنت للي

إنتي أقري .... وكل معلومة بتفيدك
يا حلاوة المايكروبايو .... جاري في موية وريدك
كل جرثومة بتريدك .... صارو هيلك من عبيدك
وإنتي للباثولوجي تقري .... أصلو شيتاً دمو بقري
علة جنبك يبقى ساهل .... وفيهو تجري

******
وإنتي يا أشطر طبيبة .... يلا شرحي فيني حلي
فرتقي الجواي وسلي

تلقي روحي مناها ريدك
والعلاج جاهز في إيدك

ماهو كم كبسولة "فاليوم"
إسبرين أو كان يورانيوم

العلاج جاهز في إيدك من سنين
العلاج يا انتي آخذ حقنة حُب أو حبتين
من عيونك .... من كلامك .... كلو ريحة بنسلين
واشفى من كل المواجع .... وأبقى زين





شـئ مهـم جـدا جـدا اود ذكـره هـنا ولم اذكـره من قـبل
تماشـيا مع البنـد السـابع لهيئة حلمنتيـش وهــو :
والبخلي الدمعة تنزل ما معانا
هـو ان قصـيدة
شـمـار سعـديه بت جـبريل
هـي آخـر قصـيده قام بكـتابتـها اســتاذنــا ودأمـدرمــان
هـاشــم صــديق


ولكـم ودي

توقيع اليـوم

صورة
.
صورة العضو الرمزية
سحر محمد
مشاركات: 3108
اشترك في: الجمعة 2008.8.8 2:10 am
مكان: مصر

رد: حلمنتيشيات

مشاركة بواسطة سحر محمد »

بووووبي!
السابقة
التالية

احيييييييييييينا!

أحي أنا ! ويا بختنا ! ويا حظّنا!

وأحي أنا!

قالوا في تعليمة في حيّنا

اتلمن أُمات عيون فيهن هَنا

وأُمات جضوم حديهن هِنا

سيقاناً زي القَنا ..

والله أخير حقاتي أنا!

ديل كمان منو الجابوم هِنا!؟

وبدت التعليمة ..

يا بِنيّة يلاّ .. فرفشي وما تختشي

"أدوك فلّة؟" نحمد الله

"أبوكي في؟" متوفّي!

"ماما في؟" ما بتقول شي!

"أخوك في؟" ده لي شنو، ما بسو شي!

وإظنّك كمان بتكفّتي!

"كلبكم في؟" ما بعضّي!

هو كيف يعضّي..

هو زاتو من عمايلك يا فلانة

عقلو منّو طشّ فرّ

بقى لا بفرز الجوّة جوّة ،

لا بعرف البرّو برّة

هو زاتو استغفر الله

وسط كلاب الحِلّة ليهو زِلّه

اتلمّوا ليو كلاب الحِلّّة

يا بوبي "هَو" بي الجنبة دي!

ويا بوبي "هَو" بي الجنبة دي!

واحنا بنقول يا بوبي لأ ، حبّة إختشي

لو إنت سِتّك ما بتختشي

إنت إختشي

يا بوبي "هَو" أهما شي

وا خسارة مجتمعنا

وا خسارتك يا قيمنا

والما بقول "بي الجنبة دي"

هم فقط فيهم أملنا

ويلاّ أكبر يا أملنا

ويلاّ فرهد يا أملن
يا ود الدسوقى انا لا مبوزه ولا مكشره اما بنسبة لفهمتى ما فهمت شي \\\ يا زووووووول \\\ تحياتى
صورة العضو الرمزية
waya
مشاركات: 14068
اشترك في: السبت 2007.8.11 11:15 pm
مكان: على سفر

رد: حلمنتيشيات

مشاركة بواسطة waya »

يمكن هي ذاتها يا ود الدسوقي ,,

كدي وحاتك .. وحاة سعدية خلني الاتغزل شوية ,, في العيون الساحرة دي ,,

حــبــيـــبـــتـــي I love you
ومـــــن حـــبـــك I shall die
مــن شِــدّة مـــا إنـــتِ beatiful
شــعــري الــفــي راســــي fly
I see فـــــي عــيــونــك sea
I can't swim بــــــــــــراي
when I see you فـــــــي الـroad
going to the shop بــــي جــــاي
cutting the زلــــــــــــــط
on foot with shoes small and high
I don't know what I can do
I can't believe my eye
سـمـاحـتـك عـقّـدتـنـي عــديــل
أعـايـن لـيــك دمـوعــي تـسـيـل
أكُـر فــي الحـمـدو عشـريـن مــرّة
وأقــرى معـاهـا ســـورة الـفـيـل
ولمن تمسكي المنديل وتمسحي بيو كحل عينيك
لـمّـي الـدمـعـة فـوقــوا تـسـيـل
أعـايــن فـــي عـيـونـك ديـــل
وأقــول أريتـنـي كـــان مـنـديـل
مــا بنـفـع كــلام يـــا ريـــت
نـوعـي ده مـــا شَـبَــه مـنـديـل
مـلامـحـي قـريـبـة للـصـارقـيـل!
كـيـفـن بـــس أكـــون مـنـديـل
ولــمّــا تـقـومــي مـنـعـدلــة
وتـقـدلـي لـيــك كـــم قــدلــة
أفـنـجــط بــــي وراك ســــاي
الــتـــقـــول ســـخـــلـــة
أعــايــن وأقـــــول هَـمَــلــة
وحـــلاة الـقـدلـة فـــي أهـلـهـا
حلـيـوه وتـمـشـي بـــي جَهـلـهـا
وتـتـقـصّـد مــشــي الأصــلــة
وأنــا الفجـغـونـي بـــي عَـدلــة
أنــا الـيـادوب فــي دنـيـا الـريـد
منـاي يــا رب ســلام فــي الإيــد
عـيـونـك زي عـيــون الـصـيــد
كُـبــار زي خــــروف الـعـيــد
تـكـهـربـي بـيـهــا خــلــق الله
ونـوعـي ده عــاد جنـونـو يـزيــد
وأقـول يـا رب تسلّـم لــي أو سـاكـت
تأشّر لـي، وكـان غمـزت ده يـوم العيـد
وعينـيـك طالـعـا بينـهـا طـــوّاف
لا الـكـبـكـابــة لا الـــرجّـــاف
تـقـول رشّـونـي بـــي البـفـبـاف
يــجــيــنــي رعــــــــاف
وأقـعـد ألــف، عـيـونـي تـــرِف
وأقـول أكيـد ده أثـر فـطـور الـفـول
لـمــنّ تضـحـكـي فـــي نُـكـتـه
التـقـول لبـعـونـي بـــي شـنـطـة
وأكــب فــوق العـصـيـر شـطّــة
وأقـرطـع مـــا أسـيــب نُـقـطـة
وأقـول "يـا ســلام عصـيـر لُقـطـة"
وإنتِ تقولي"بالغت وشربت الشطّة يـا إنـتَ"
مالها الشطّة، مـا شربـات عصيـر كُفتـه
عصـيـر جـركـان مـــن الـدُكّــان
يـتـرشّـه فـــي صـحــن فـتّــة
مـــا مـهــم شـرابــي الـشـطـة
والـمـهــم الـكـلـمـة "بـالـغــت "
و "شـربـت الشـطّـة يـــا إنـــتَ"

صورة العضو الرمزية
waya
مشاركات: 14068
اشترك في: السبت 2007.8.11 11:15 pm
مكان: على سفر

رد: حلمنتيشيات

مشاركة بواسطة waya »

كجوول كتب:الله يخليكم ياخي والله أنا لي زمن بعيد جدا ما ضحكت من اعماقي
وربنا ان شاء الله يحفظكم من العيون الساحرة
عشان نسمع الكلام الجميل دة يا جماعة
لكن هاكم دي عربون محبة وكدة
يا كجوول بمناسبة عربون المحبة ,, والضحكة ذاتها البتنحبة ,,
النحكي ليك شمار ود الدسوقي مع العيادة النفسية بعد الحقنة والحبة ..
من أول يوم في العنبر ,, جات الدكتورة مارة تتفقد ,, لقتو بنقد في الرغيف
قالت ليهو :
بتاكل الرغيف صغار..صغار..انت فار؟
قال:
بقيت مجنون بقيت محتار
بعد مازول طويل وعريض
اكون انا فار؟
يا احلى كديسه في الدنيا
عليك ربك تبلعيني
وما تفضلي شي
ولو دا حصل
بكون يا بره اسعد فار
وانطط جوه في بطنك
وانقب فيها للاسرار
واقيف اتامل الكبده
والطوحال تقول رادار
اخزن جوه في المعده
وافتش لي كسره
وما القى
اقلب جاي دا همبيرجر؟
كمان بي جاي
جلي وكستر
اقلب جاى
عصير منقة وكمان اصفر
مصارينا عدال
مستفه بي عسل ..سكر
ما عامله زي كوكو ..مصارينو
ملفلفه زي حبال بنبر
واطير ليك فوو
وفي الفشفاش واتحكر
وانط طوالي جنب قلبك
واشوف الدم هداك احمار
ابحلق جوه في قلبك
اعاين
القي صورتي انا
صوره الفار
هه يا عالم
دا ما سبب البلع ذاتو
اقول يا بره خارجيني
تقول لي نو
بحبك يا خى خارجيني
تقول لي ناو
وتتوكل تتطلعني
من اجمل فيلا
واحلي سجن
يمين من جوه فيها بطن
مفرهده زى زهور الفل
بتحمل نكهه النعناع
مطعمه بي طعم لبتون
وفيها نسيم بجيك بارد
مكندشه .. بس تقول هلتون
دا من جوه
ومن برا
تحلف بس تقول يا زول
بس واحد .. شال ليهو حبل
وربطو في القمر جرا
ولما تجي وهناك تقعد
تقوم من تاني تنفرا
اطول وتاني انصرا
واشوف الخاش ماش برا
واحس بي قلبي فرر..فرا
سجنتيني؟؟ ما بنساك واتخلا
حت لو الزمن عاند
وحت لو السهم جلا
بموت فيك موت
لانك انت افريقيا
وانا البهواك مانديلا
أضف رد جديد

العودة إلى ”همس القصيد“