الرسالة
وقفت بعد حلبت لبينة الشاي تكورك يا الحسن
يا ام الحسن وينو الحسن
لمن صفت رغوة شخيبات اللبن في حلتا المبني من طبق السكن
واقفي في حوش البهايم ولسع تكورك يا الحسن
جاها حسا من بعيد مارق من القاطوع ورا
قال ليها خير يا الحاجي خير
قالتلو خير تعال لي جاي دايراك تعنون لي جواب يا الراسي لي ولدي الخدير
لا تبقي زي شافع السرير يقول لي زين آيمة زين وزين تبقي بعد شهير
وان جاني يكتب فد سطير
اقولو يا سجم السجم انا زي قرايتك ما قريت لكن عويناتي بيفرزن الوريقة البيضاء من لون القلم
بعد المغيرب بي شوي جاها الحسن تعبان يسير
دا العشى غنمو من الدرب سرقت ندي وشو الهجير
سوتلو شايا بي لبن قرض معاهو حرف فطير
قالتلو بسم الله قول واكتب وصيتي انا للخدير
الزمن يا ولدي ماحقاهو السنين
البعيش في الدنيا ما بعيش مرتين
العمير فاضلي بس منو اليقين
وانت طول في البنادر يا الحبيب لا متين
تعال اوريك حق ابوك الجم حقيق حاج اللمين
ان عرفتو بلا عمار يقولو ولدا عندو طين
العلاج لا تنسي رسلو لي دحين
العوينات آجناي شوفن ضنين
سلامنا ليك مطرز للبنيات والبنين
ولو الارض يا ولدي تنشال في الايدين انا كت برسلا ليكا
في لوري الخزين
يوم فى الغربه ماشى براى وشاقى الحى
لقيت وحـــــيده زى امى
ترضع فى وليدا صبى
ويعصر قوق ضريعا شديد
يناتل فوقو يصرخ وي
وجيتا قريب لقيتو ضريعا ضريع امى
دارى غزييييير أظنه لبي
وقفت شويه وأتاملت فيها كتير
لقيت فى وشيها اغرب شئ
عيون امى
وكت ماتغوص جفون الليل تفتش لى
وفى حدقاته تلاقانى
أحفظ فيه اشعارى
ويدندن بى قصيدة لى
واشوف فى قمره وش امى
واشوف دمعاتا فى شلاخا جاريات لى
بقيت كان شفته بادى هلال
تجرى الدمعه فى عيني
واتذكر دموع امى
يقالدونى ويشابن لى
وتنقز دمعه من شلاخا
ترقد لى فوق خدي
مافى احن من أمى
أجيها صغير ،، أجيها كبير
تفلينى و تقردن لي
تحجينى وتوسوس لى
تكبر لى ياولدى
واشوفك ضاوى متل الضئ
تحججنى وتشيل كُبرى
وأشوف اولادك يفرحوا بى
أحجيهم والوليهم
ينومو العافيه فوق إيدي
يوم أسمع كلامك داك
أحس بالعبره تخنقنى
وتحسي جوابى فى عينيى
وأقع فى حضُنك الدافئ
واسلم ليك فوق راسك
و أضمك انتى بى يدي
واحقق ليك أمنيتك
مهما تقسا تصعب لي
واوديك مكه الفين مره
لو الالف يبقى شوي
وكان كُبرك أساهر الليل
واشيلك يما بى يدي
وتكبرى لى .. تحضرى عروسى واولادى
ويفخروا بيك متل ما كنتى تفخرى بي
ولو ما الدنيا قوقا شويه متل املا
أكان القمرى يبقى حدي
ويعيش الناس ضلام فى ضلام
يفتشوا شمعه بس للضئ
شمعه يتفنى متل امى
عشان بس نورا يفضل حى
أكان ما جيتا من بطنك
اكان الدنيا حتى الاخره ضاقت بى
عشانك انتى يا امى
وعشان بأبوك متسمى
وابوك العارفه مازول نئ
عشانك انتى قلبى كبير وضيه كتير
وماخد من شمعتك ضئ
بنده الله
انتى تعيشى يا امى
وكل الباقى خليه على
عشانك انتى يا يما
وعشان ما انتى نور عينيى
تشيخيى وتعيشى بيناتنا
واشوفك قيمه ماشه علي
قيمه بتقصد المحتاج
وفضلة خيرك يبقى هو حي
وخيرك يغشا ك الناس
من الماشى بالعكاز لا عند البحبا حبيى
وأشوفك فى عيون الناس
عبيراً صافى جائي نقي
احس نسامو فى جوفي
تخش بى سهولة فى رئيتي
شعرى القلته يما حزين
وكلو مآسي مرت بي
الا غناك يا أمى
زفره ونبضه
نبضه وزفره
زفره ونبضه
فى دمى
وبسمه عريضه فى شفتيى
محمد النصري
يا حسرة قلبي الجريح ما بان في دربك شعاع
كيفن بعد ريده وحنان آخر المطاف يبقي الضياع
أديني من زمنك زمن قبال يحين وقت الوداع
** ** **
بين يوم وليله آيه الحصل وريني ما سبب النزاع
احلامك الكانن معاي مالن بقن لوعه وصراع
وايامك العشقن صفاي يا غالي ليه مرن سراع
** ** **
خليني لي همي وشقاي خلي اليكون قلبك شعاع
مهما يكون ريدتك صدود لي حكمك الامر المطاع
باكر يجود تاني الزمان يرحم يجيب سمح الطباع
** ** **
والواقع الما بيرضي زول خلي اليروح ما دام متاع
أخديهو من عابر كلام وهاتي المفيد من وضياع
القالك الريده انتهت في الريده ما عبرلوا باع
** ** **
والبيك بلا حن كيف يكون مادام احساس ساسو الخداع
والباني ريدو علي النفاق دي الريده ما بتجنيلو صاع
اسباب اساي وسر بكاي العيد يمر
للناس فرح ولى ترح من حالى كر
الناس تقوم تمرق تحوم قبل الفجر
بين هاش وباش انا دمعي راش لازم الصبر
الطير نضم رش النغم فوق التمر
شوف يا رفيق كم بي ضيق العيد فقر
شيشك بشيش لو لى ريش كت ليك زر
كنتا عاد بجيك واتهنا بيك طول العمر
انا حالى حالى ما في بال مشغول كتر
بي زول نجع لى ما رجع من كم تشر
جوفي اتحرق انا ما مرق حدى العصر
لى مافي زول يهدي ويقول ياخد الأجر
زولى الحنين القالو وين عاد العذر
خلاني تب اه ما كتب لي فد سطر
انا ما بلوم لو جيتني يوم فوقى النذر
قبال اموت والروح تفوت وامشي القبر
وسط السحاب اتلاشي غاب ضى البدر
سود على دنياي حى عز الضهر
مبروك عليك العيد يجيك في حال يسر
يلقاك معاي في بيت هناى الليك در
هوي كان شايف اشارات الوداع فى العين
قدر جايي وامل راحل حزن قدر الفراق والبين
نذر قدرو المداقر عمرو لازم عمرو يتودر
ونتر جرحو بيبشر دمو باكر دمو بيتقطر
عرف فرحو السقاهو حنانو والراجيهو بيتأخر
شعر حلم السنين العاشو قدام عينو يتبخر
حس هو لمن ضمع ايديه بي شوق العمر بيجري
وحس كمان ضياع آمالو فاجأو فى قلب بدري
كأنو عيونو كان بتقول وداع ياحبنا العزري
غمد ان كان يداري دموعو تخزلو دمعي منحدري
بسم رغم الفراق الجايي ياها عيونو زي اول
ضحك املو الزمان الضاميهو رغم انو الآلم طول
سخر من الحياه الوداره عمرها مابتتأول
سكت حتحت دموعو الحاره عن عينيهو ما اتحول
ورجع لى أيام زمان لاقاهو فى درب العمر صدفه
ايديهو الراده ياها ايده تضمه و بينا يندفي
عيونو الحزن ماهداها بل زاد الوجع لهفة
وقليبو وفي فراقو الابدي فارق حتي بي ألفة
فضل جمب الحبيب ساهم فضل ساهر قريب منو
وشرب علي قدر ما اداهو الله من القليب حنو
فضل فى كل ثانية يريدو ابداً ما انشغل عنو
ونذر كل العمير والعافي لو يفداهو لكنو
حبس كل الكلام فى جوفو خلي عيونو تتكلم
وكتم بوخ الانين واللوعة نار جواهو بتألم
صبر لما النهاية المرة حانت وبالمصير سلّم
مسك قلم اليقين من حبو رغم اسآهو اتعلم
وقفت بعد حلبت لبينة الشاي تكورك يا الحسن
يا ام الحسن وينو الحسن
ولمن صفت رغوة شخيبات اللبن في حلتا المبنية من طبق السكن
واقفي في حوش البهايم ولسع تكورك يا الحسن
جاها حسا من بعيد مارق من القاطوع ورا
قال ليها خير يا الحاجه خير
قالتلو خير تعال لي جاي دايراك تعنون لي جواب يا الراسي لي ولدي الخدير
لا تبقي زي شافع السرير يقول لي زين آيمة زين وزين تبقي بعد شهير
وان جاني يكتب فد سطير
اقولو يا سجم السجم انا زي قرايتك ما قريت لكن عويناتي بيفرزن الوريقة البيضاء من لون القلم
بعد المغيرب بي شوي جاها الحسن تعبان يسير
دا العشى غنمو من الدرب وسرقت ندي وشو الهجير
سوتلو شايا بي لبن قرض معاهو حرف فطير
قالتلو بسم الله قول واكتب وصيتي انا للخدير
الزمن يا ولدي ماحقاهو السنين
البعيش في الدنيا ما بعيش مرتين
العمير فاضل لي بس منو اليقين
وانت طول(ت) في البنادر يا الحبيب لا متين
تعال اوريك حق ابوك الجم حقيق حاج اللمين
ان عرفتو بلا عمار يقولو ولدا عندو طين
العلاج لا تنسي رسلو لي دحين
العوينات يا جناي شوفن ضنين
سلامنا ليك مطرز للبنيات والبنين
ولو الارض يا ولدي تنشال في الايدين انا كت برسلا ليك
في لوري الخزين