الشاعر / مدنى يوسف النخلى

مرجع لفطاحلة الشعراء

المشرف: بانه

أضف رد جديد
صورة العضو الرمزية
nourelsalam
مشاركات: 776
اشترك في: الأحد 2006.11.12 5:08 am
مكان: مابين الصين وامريكا
اتصال:

الشاعر / مدنى يوسف النخلى

مشاركة بواسطة nourelsalam »

الشاعر / مدنى يوسف النخلى

وهج الشعاع / مدنى يوسف النخلى

يا ريتنى زى وهج الشعاع تمتد سحابات الغروب سر روعتو
وزى قدر المسافر لمدن محهولة لما تضيع خطاوى البهجة
فى همس الكتوم
حبك صبح أشتات ظلال وأطلال خيال خرافات قصتو
برحل عشان أنساك وأسيب الذكرى فى وجع الطريق
وأمسح دموع شمس الهوى المصلوبة فى صمت الغروب
وأمسح دموع قلبى التعب كان فى هواك
يقدر يتوب ما كان عشم قلبى الحزين
مترجى من عينيك حدود كان عندى فى سفر الأمل
تلقى البودع ليك وعود والليلة يا قلبى اللى راح
بروعة أشراق الورود مد الغروب المادى أيدو
ضاعت أحلام الورود زى ما بموت وهج الشعاع
====================================
إحساس بالأمل / مدنى يوسف النخلى
أدينى إحساس بالأمل
فى كل رحلة شوق .. تطو
وأدى الخطاوى الراجعة ليك
فى سكتك عشم الوصول
ما الدنيا كلها إنتظار
والإرتحال قدر الفصول
الموجة تحلم بالضفاف
والغيمة تحلم بالهطول

********

جايى ومعاى ضى الأمانى
وذكرى للأيام .. هناك
لحظات بتذخر بالأمانى
وكيف أنسى تذكارات هواك
نتحمل الغربة .. ونعانى
ونصبر عشان نكسب رضاك
ونغنى لو زاد الحنين
ياريتو كان سفراً .. معاك
==========================================
عشم باكر / مدنى يوسف النخلى
فى عينيك عشم باكر
وزغرودة بتزف لى الناس
خبر زمناً جديد مولود
لقيت غيرك .. بضيع إسمى
وبقيت أنا حى .. وزى مفقود

*******

لاقينى يا عشقى الخرافى
لاقينى قبال الزوال
لاقينى فى كل المرافى
زفاف ربيع .. وفرح قوافى
وإنشرى فى حزن السنابل
غيمة يا كل المشاعل
وأمشى قبّال الصباح
وزعى الطل للأزهار
وأبقى يا شوقى الخرافى
خير .. وضمى شقا البيادر

*********

لاقينى يا شوقى الخرافى
لاقينى قبال الزوال
غنوة من أزمان بعيدة
طالعة من صخب الدميرة
تلقينى راجيك فى الأماسى
وفى المراسى
.. وفى الملمات الخطيرة
=====================================
واقف براك / مدنى يوسف النخلى
واقف براك
والهم عصف
ريحاً كسح زهرة صباك
ليلاً فتح .. شرفة وجع
قمراً رحل فارق سماك

*******

مطر الحزن عاود هطل
جدد عذاب الأرصفة
ضى المصابيح البعيد
أتعب عيونك .. وإنطفا
لمتين مواعيدك .. سراب
والريد شقا .. حرقة .. وجفا

********

بعد المشاوير البقت .. ممدودة فى نبض التعب
بتعود وتلقى رِجاك زول
حفظ الوداد زمناً صعب
والباقى من ليل الهوى
وعطر الصبابة الما أنسكب
والباقى من كل الغنا
وسيل الكتابة ..
الما نضب
==========================================

سفر العمر / مدنى يوسف النخلى
مـا بــان عــليـك سـفــر العـمـر
لســة الربـيـع يـادابــو زار
لسّــة الضـفـاف المـتـرعــة
بـتـفـيـض نـدى ... وتـطـرح ثـمــــار
الـنـاس عـلـيـك نــاداهـا .. فــــال
فى عـيـونـا نـام الإنـبـهـار
وأنـا جـّــوة قـلبى الـمـشـتـهـيـك
.... نـزفـت جـراحـات الـودار

********

جــّوة العـيون غــطـّى الـفـرح
... لـمّ الـزفـــاف
جـــّوة العــيــون تـشـرق شـمـوس
... يـرحـل جـفـاف
أزمان بـتـغـرق فى الـنـعـيــم
... وحـنـان غـمر عـاشـقـيـن رهـاف

*********

يـازهـــرة طــالت بى الـفـــرح
بـتـراقـص أنـوار الـمســـــــا
مـا بــان عـــلـيــك أثــر الــقــطــاب
... ولا جـاتــك أيــام الـقســــا
ما أروعـــك وإنـتى الـشـــبــاب ..
بى حــمــرة الـريــد إكـتـســـــا
==========================================

لحظات ندية / مدنى يوسف النخلى
فى خاطرى لحظاتنا الندية
وإنتى ساعة المغربية
قعدتك جنبى وعيونك .. سارحة فى الدنيا البهية
وخوفنا من سفراً بودى
للمسافات القصية
وسكة الزول البسافر
وقلبو عشرة .. على البنية

*******

كنت جد .. ناوى الرحيل
إلاّ شايل ذكرى منِّك
خفت فى الغربة البعيدة
المسافات يبعدنك
العيون الشايلة سيرتك
بكرة يبكن .. ويفقدنك
والأماسى الحالمة .. ترحل
والمشاوير يتعبنك

********

شفتى كيف
لما الشمس لمت نوافير الشعاع
والضفاف بعدت كتير
والريح ملت .. جوف الشراع
كيف هناك بدت الضفاف
تتلاشى فى زمن الضياع
وإنتى ساعة المغربية ..
وخايفة من كلمة وداع
============================
nourelsalam
صورة العضو الرمزية
حزن السنين
مشاركات: 4294
اشترك في: الأحد 2006.12.3 11:05 am
مكان: ~ معبد الاحزان ~
اتصال:

رد: الشاعر / مدنى يوسف النخلى

مشاركة بواسطة حزن السنين »

رائعة هي الكلمات التي تخرج من شاعرنا الكبير / مدني يوسف النخلي مشكور يا نور علي الاختيار الموفق
صورة العضو الرمزية
nourelsalam
مشاركات: 776
اشترك في: الأحد 2006.11.12 5:08 am
مكان: مابين الصين وامريكا
اتصال:

رد: الشاعر / مدنى يوسف النخلى

مشاركة بواسطة nourelsalam »

أملنا الباقى / مدنى يوسف النخلى
=============================
أملنا الباقى يسرح بى
وأسافر لى زمن تانى
تبقى الدنيا فى عينى
هجعة خطوة .. فى سكة فرح مفقود
ورحلة موجة فى بحر الأسى .. الممدود
ورجعة غنوة من درب الضنى المهدود
.. وأفتش ليك

*******

وأفتش ليك حنانى معاى
أمانى تصارع المكتوب
عشانك لا مسافة تطول
ولا بتصعب معاكى .. دروب
وقلبى عليك
وعلى الوعد الحزين .. مصلوب
وراجع ليك

*******

وأفتش ليك
أجوب الدنيا .. وأرجع ليك
أجيك فارساً يشق صمت المتاهة .. الطال
يواعدك بى حكاوى الشوق
وبى شمساً .. وراها منال
وبى فرحاً يغرد .. فى سماك ألحان
ويجيب البهجة للأطفال
========================================
مـــن جـديــد / مدني يوسف النخلي
من جديد جيت تانى تكسر صمتى .. بالنظرة الخجولة
يا أمل عمرى القبيل .. ويا سنين عامرات .. فصولا
ما قدرت أنساك من زمان
بس ضاعت أحلام الطفولة

********

الحنين الجيتنى بيهو
جانى فى لحظات ندم
ما زمان ضيع صبانا
وكل لحظات العشم
من جديد جيت تانى ليه .. تبنى فينى الإنهدم
وما قدرت أنساك من زمان
بس ضاعت أحلام الطفولة

*********

ما بفيد لو ألملم من عيونك .. ذكريات
أو أصحى الماضى فيهن
وأنسى حزن الأمسيات
برضو زمن البهجة عدّى
وعمرى فات فيهو الفوات
================================================

علمـي عيونـي السفــر / مصطفي سيد أحمد ومدني النخلي
علمى عيونى السفر
ما البسافر فى عيونك
سكتو بتبقى السلامة
ينسى أحزانو .
ويعرف الدنيا جنبك إبتسامة
ظللى الناس بى حنانك
أبقى ليهم ضل غمامة
*********
الشقا اللاّزمنى .. مدة
يوم بفوت .. والفرحة تبدا
ما بقول .. فارقنى عدّى
عشان بخاف ترحل عيونك
وتنهزم فينى الأمانى
وبى أساهو.. وبى شقاهو
تانى يتوشـّح زمانى
أصلو غير عينيك .. وحاتك
مافى للأفراح .. معانى
********
جينا ليك شوق فى عيونـّا
وفى عيونك شوق يناغِم
الشجون باكر بترحل
والزمن يصفا .. ويسالم
والحلم يصبح حقيقة
وتنسجم فى الحب ظروفو
والحنين تزهر غصونو
والعشم .. دانيات قطوفو
شوفى كيف يوم بكرة .. عامِر
هاتى إيدك .. شان نطوفو
==============================================
صرخة
مدني يوسف النخلي
-------------------
مردودة من صرخة وصدى ..
مولودة في الزمن العقيم ..
رغم المسافة .. الدهشة ...
والشوق والندم ...
أدمنت تحديق السراب ..
هدمت في ليل الحزن ..
أوغلت في الزمن الغياب ..
أدمنت فيك عشق الحروف ...
رغم إنهزامي مع الظروف ..
لا المدارات المسافر فيها لعيونك مداي ..
لا هواك كان مبتداي .. لا مداك كان منتهاي ..
كنت فارد للحلم في ليل رحيل مليون جناح
كنت فاتح صدري ديمة ..
وما بخاف في الزمن الخرافي ..
ودمي كان باقي المداد ...
نبضي في حزن القوافي ..
وصبري في الليل الودار ..
وديمة أنسج في الغناوي ..
والتواشيح القديمة ..
أعشق الأمل البعاين ..
في المسافات الأليمة ..
تسخر أقداري العنيدة ...
وتبكي أحزانها القصيدة ...
لا زفافك كان مطاف .. للأماني وللعفاف ..
وخاصمت عيني الغمامة ..
وداس فرح عمري الجفاف ...
=========================================
إنتظــار
مدني النخلي
-----------
كم بفتش عنى عنك فى مداين ما بتعرفك
أُم بتسال عن ضناها
غيمة هجت من سماها
وزحمة المدن الحزينه
وصرخة الكلمة وصداها
وكم بفتش عنى عنك
انتظرتك ياماياما والمواني ابت تجيبك
لا تعبتَ من المسافه
ولا بفكر يوم اسيبك
روحى حامت زى فراشه
جات تحلق فوق لهيبك
كم بفتش عنى عنك
مرة شفتك والمسافه الليل يوزع أمنياتك
قلت زولتى الماغريبه
رغم همك باكى ذاتك
كنتى عاوزة تقولى حاجه
وكلمة ابلغ من سكاتك
وجيت افتش عنى عنك
أمشى والهم الغلبنى
مالى روحى وشايلو كتفتك
الكلام تاهت حروفوا
فى النعاس الغاشى طرفك
لا ملامح صدحى صوتك
ومنى ضايع حتى وصفك
كم بفتش عنى عنك
فى مداين ما بتعرفك
=============================================

أصل الحكاية
--------------
لـو عـليك الريدة هانت
قـصة بـحكيها وبـقولا
وابـكى فى اخر فصول
قـصة الـقمر الـمسافر
من مدن فى الحسرة نامت
دمـعة الشوق فى عيونك
الـحنينة وطـيبة كانت
بـحكى لـلناس عن وداد
ومـا بقول سابتنى فاتت
قـصة بـحكيها وبـقولا
وابـكى فى اخر فصولة
قـالو فـى الامثال زمان
عـن حـكاية بدون نهاية
انـتى يـا اصل الحكاية
فى الحقيقة العايشة غاية
لـما كـانت فى عيونك
دنـيتى زفـرحة هـوايا
كـنت يا ريدى الخرافى
الـحكاية بـدون نـهاية
والـبداية بـدون نـهاية
يـا الـعليك الريدة هانت
دمـعة الشوق فى عيونك
الـحنينة وطـيبة كانت
يـحكى للناس عن ودادة
مـا بقول سابتنى خانت
قـصة بـحكيها وبـقولا
وابـكى فى اخر فصولة
===================================
ندى الفكرة,
مدنى النخلى
-----------
سرق زمن الفجعة صباك
وامـس واقف تشد الحيل
قـابض جـمرك الاحمر
امـل نـاساً بعزو غناك
امـس دافر اصيل الخيل
وراجع فى المفازة صداك
جـالب لـلضفاف الخير
وصـادح وترك الضحاك
ايـا عـايد مـن الغربة
مـوشح بـى ندى الفكرة
شـايـل لـلـبلد قـنديل
وبـاقات من اسى الذكرى
غناك يفضح وشى العتمة
ويـنزل فـى ارض بكرة
تـقول لا غـبّ مسدارك
ولا اتـرمد وهـج نارك
ولا الـغبن السكن صوتك
دخـــل مــوتـك ..
وجـفت نـضرة ازهارك
وحـلّـق بـلبلك طـاير
يـراقـص درة اقـمارك
وشـالو الـضفة سمارك
ايـا لابس قميص الضى
رزازك غـطى حزن الفل
وطـالع مـن هتاف الكل
ونـازل فى الهجاير ضل
حـداك اتـمدد الـياسمين
وفـاح الـنرجس الحباك
بكى الغيم فى غناك ومعاك
وغـرد وتـرك الضحاك
ونـوم مرتاح قرير العين
===========================
صورة العضو الرمزية
nourelsalam
مشاركات: 776
اشترك في: الأحد 2006.11.12 5:08 am
مكان: مابين الصين وامريكا
اتصال:

رد: الشاعر / مدنى يوسف النخلى

مشاركة بواسطة nourelsalam »

lزهرة بخيلة
-------------
لـو مـتلى هـداك الـحزن
او غـاب حبيب عن موعدك
لـو عـشت افراحك سراب
وابـت الـظروف ما تسعدك
كان يوم عرفتى ضنى الجرح
جـوايـا وكـتـين افـتقدك
يـا زهـرة بـخلت بالاريج
الـليلة مـات فـينى الاجيج
وفـتر حـنينى الكان زمان
عـودت كـالنوم فى العيون
وسـهرت مـحزون ما بنوم
لـو لـيلى من بعدك حزين
الـعشتو جـنبك كـان هموم
لا بقيت انا الراجى السراب
لا الـرامىاملو عـلى الغيوم
الـليلة مـات فـينى الاجيج
وفـتر حـنينى الكان زمان
يـاما الـترقب طـال وزاد
والـزاد مـواعيد فى الخيال
والـليلة فـى درب السلامة
مـن الاسـى ولـيل المحال
ارتـحت مـن شوق الغمامة
الـيـاما عـانت ارتـحال
الـليلة مـات فـينى الاجيج
وفـتر حـنينى الكان زمان
جـيتك مـعاى جانى الزمان
كـــل الـمـشاعروالمنى
تـقدر تـرجع لـيك خطاى
الـعايدة مـن درب الضنى
لا الـشوق فتر فى ليل اساى
يـقـدر يـعيد لـيك الـهنا
الـليلة مـات فـينى الاجيج
وفـتر حـنينى الكان زمان
==============================
ظليلـــه
----------
يا ظليله ومبعث الدفء والحنان
في جبينك راقد النيل الممدد
شاغل الروح والمكان ...
وفي دواخلك نامت الاحلام هنيه
وصفقت روح الزمان...
إشتهيتك...
اشتهيتك قبلما ايدي توادعك
وتحضن الشمس الغروب
واحتويتك قبلما اغرق وتصرخ
لهفه الروح في الدروب
وبانت احزان المسافه الفاصله بينا
وراميه في وجهي الشحوب
ورف نبض اللحظة هاتف
شع نجم اللقيا باهر
رن صوتك صادق النبره
البقطر من عسل روح المشاعر
نادي من عمقي المواقف
وشحنة الفرح الموزع في البنادر
ضمه فيك شتله الامل
المعشعش في الهجاير
ولمه نبضك شعلة الحب
البتوقد في حشا الحزن المثابر
وكان قليب قلبك منور
في رحاي مفتوح وشاغر
وفي جنبيك راقد النيل الممدد
شاغل الروح والمكان
وفي دواخلك نامت الاحلام هنيه
وصفقت روح الزمان
================================
لأنك ضل سحابه جميل
---------------------
لأنك ضُل سحابه جميل
موشح بي حنانو النيل
لما يمر على الشتلات
مطر دفاق عليها يسيل
مشيت كل المدن كايسك
لقيتك مافي ليكي مثيل
لانك ضل سحابه جميل
رجيتك يا قماري تنوح
على الحب الي كان مجروح
سلْمتك قليب حزنان
وسكْنتك مداين الروح
لانك ضُل سحابه جميل
معاي عداي محل ما أروح
يجول بصري الكفيف قبلك
يلاقي مداهو بيك مرسوم
تحلقي فوق جفاف حلمي
وتنزلي في هجيري غيوم
لانك لي ثبات خطوات
بترجع من لهاث محموم
صدق غنايك الوصاف
صباح وجهك جميل وضاح
وزي ما الليل بعج أسرار
نهار عينيك كمان فضاح
فضح ريداً كتمتو زمن
واهدي الكون حنان وسماح
لانك ضل سحابه جميل
موشح بي حنانو النيل
=================================

الزمن الجميل
---------------
ودخلت بيك من جرحي للزمن الجميل
إنسان بحس بي قربو ليك
إنو الفرح بغشاهو بيك
وإنو المسافات القست
بي حبو بتقرب عليك
ودخلت بيك من حزني للزمن الجميل
فسرْتَ ايه معني الالم
قبل المشاعر تبتدى
وعرفت ايه يعني الحزن
لمان اعيش زمنو الردي
لكن معاك إنتي العمر
راجع مع الفجر الندي
ودخلت بيك من جرحي للزمن الجميل
الدنيا ساحات للمنى
وانا يا ما شديت الرحال
شيّدت ليك قصر الأمل
وزرعت شتلات الوصال
ورسمت قدامي الطريق
اجمل مساحات المنال
ودخلت بيك من جرحي للزمن الجميل
عديت بعيد شايلك معاي شمعه وأمل
في ظلمة الليل البهيم قنديل هواك بدر اكتمل
ضمدت بيك جرحي الاليم
وصممت ليك لازم أصل
ودخلت بيك من جرحي للزمن الجميل
====================================
الاماني البعيده
-------------------
بخيله الأماني . . الدروب الطويله
وحزينه الليالي ام نجوماً بخيله
وسعيد البكحل عيونو بنجومك
ويلملم شتات الأماني القليله
ويصادم عشانك رعاع القبيله
لانك حبيبتو الوفيه وأصيله
جسوره الحروف البترفض هوانك
وقاسي الطريق البتوه خطانا
اكوسك رفيق الزمان المعاند
أخاصم خريف النزيف الغشانا
خريف المداين يباس البطانه
وكتيرة الاماني البعيده وبخيله
كئيب الزمان البأرخ شقانا
غياهب بيوتك جديده وغريبه
وضوح المعاني البتصبح مريبه
وقلب المغني البغني وممزق
يغرد عشانك لانك حبيبه
يوسد وهادك غمامه وظلال
ويكوس الاماني البخليه وعجيبه
كتير الكلام البأسس حقايقك
ويطير الغمام البظلل حدايقك
واردد معاك الاغاني الوفيه
كفيفاً بغالب دموع الأسيه
مشاغلو الرعيه وهمومو القضيه
==========================================
صباحيه
----------
صباحيه وغيمة خير خريفيه
تحلق في الصبـاحيه
جمال نيلين وكت سكب الشروق ضيو علي الموجه النهاريه
جمال زولاً قليبو وطن دواخلو ملانه حنيه
أمل ناسا على الغيمات همومم ديمه مرميه
صباحيه...
تصادفك تفتح الابواب على الزمن البجي وموعود
تسالمك روعة الترحاب مع الفرح اللي ما محدود
تشيلك في البريق والضي تسافر بيك بلود وبلود
وترجع بيك صباحيه..
امل ناسا على الغيمات همومم ديمه مرميه
تحسها زي دخول الضل وهبة نسمه فجريه
وزى شدر الفريق وكتين تقيل فوقو قمريه
وزي حوش الصريف حاضن فروع النيم وقطيه
وتضحك ليك مع الايام
أمل ناساً على الغيمات همومم ديمه مرميه
صباحيه..
سمار النيل وتحنانو يشوفا الزول تهاجر منو أحزانو
يشوفا الطيف بيهرج بيها الوانو..
أمل ناساً علي الغيمات همومم ديمه مرميه
=====================================
جميل المعنى
------------
يا جميل المعني غرد احكي للاطفال حكاية
خلي ذاتك أغنياتك ساطعه في حزن المرايا
أنسي أحزانك كفايه ما السنين الحلوه جايه
فينا أرحل ضل سحابه وغابه من حلم الغلابا
أدمن التحديق وجيهك والرحيل عبر الأمانى
جافت التغريد طيورك أعلنت حزن الاغاني
لازم الجرح القصيده ونزف ازهار المعاني
وفينا ترحل ضل سحابه وغابه من حلم الغلابا
قيفك النيل المبهرج والرياح الموسميه
صوتك الطاوي الفيافي الطعنه في قلب الأسيه
وانت راحل ضل سحابه وغابه في حلم الغلابا
شد حبال الروح وغرد المس احساس القصيده
هد جدارات القطيعه البينا والفرحه البعيده
مد مساحات فال تغالب سكة الوهم العنيدة
وفينا ارحل ضل سحابه وغابه يا حلم الغلابه
يا وتر قلب الحقايق يا زهر فجر الحدايق
دندن المطر المسافر جوه نيران الحرايق
وفينا ارحل ضل سحابه وغابه في حلم الغلاب
nourelsalam
صورة العضو الرمزية
nourelsalam
مشاركات: 776
اشترك في: الأحد 2006.11.12 5:08 am
مكان: مابين الصين وامريكا
اتصال:

رد: الشاعر / مدنى يوسف النخلى

مشاركة بواسطة nourelsalam »

نهار العز
----------
شفتك وين . . أنا شفتك وين؟
يمكن طاله من الاسوار
يمكن ضاحكه مع الاشراق
يمكن صادحه مع الأطيار
ولا تصارعي مع الضايعين
اسوأ ظروف وزمن غدار
جايز شفتك قبل اشوفك خوف الناس من ناس مسعوره
تنهش جسد الكفره النبتت بي دمي ودمك ممهوره
وجايز كنتي الامل الجوه معشعش ونابت في المطموره
شفتك وين انا شفتك وين؟
إنتي اكيد الغضب الكامن في اعماقنا محكر وساكن
ويمكن انتي الامل الباقي ممد فينا عمار ومداين
ولا البحر الموجو معدي وعدت عن مرساهو سفاين
انتي المعني الفي المحاره لما يبين بتبين أسرارو
انتي سراب العشم الباقي ومتوجس من ليل أقدارو
انتي ربيع الزمن القادم واحنا نجوم فوحو وأزهارو
إنتي
العز
بتطلي
نهارو..
================================================
كل النجوم
-----------
فرحانه بيك كل النجوم لا نام بريقا ولا انطفى
ما الريده يا ام قلبــاً ندى ذاد القلوب المرهفه
وانشاء الله طول ما حبي ليك لا يطل حزن لا يكون جفا
شفتيني كيف.
شفتيني كيف انا ببقى بيك سيد الفرح والريد براى
تشرق شموس زمن الهنا ويرحل جفاف عمرى وصباى
وانشاء الله طول ما عمري ليك ما تنجرح عزة هواى
بحلم معاك...
بحلم معاك انو الحزن غيمه وخلاص رحلت بعيد
وانو اللي باقي من الزمن ومن عمرى كلو بعيشو عيد
انشاء الله طول ما حبي ليك ما نعيش زمن قاسى وعنيد
جيتي ومعاك..
جيتي ومعاك جاني الصباح عْم الشروق حزن الحروف
يا طيبه زي دفقة طمي بالخير غشت جدب الجروف
انشاء الله طول ما عمري ليك ما نلاقي يوم قسوة ظروف

-------------------------------------------------------------------------
صورتك الحلم الحقيقه...
-----------------------
السفر باب العبور للحنين لهب الدواخل
عايني في عمق الحقايق ووهدة الليل والمجاهل
تلقي إنسان في إنتظارك ضيعت حلمو الشواغل
لاسفاينو عليك تعدى ولاوصل بيها السواحل
البحر وطن النوارس والضفاف ساحات نديه
الوطن في عيون جميله وفي القلوب نبض الوصيه
ورغم إنك رد ندايا ولمسة الحب الوفيه
برضي فاقدك لما أبكي وتمطر الدمعان رويه
شلت ريشتي بديت الون
صورتك الحلم الحقيقه
مدت الغيمه الظلال
وضحكت النسمه الرقيقه
الجدوال سمفونيه
دافقه أشجان الموسيقي
والشجر مرسي ومطارح
للعصافير الصديقه
وصورتك الحلم الحقيقه ...
صورتك
الحلم
الحقيقه...
=======================================

كلمتنا الوردة
--------------
يا موزعه في الفصول والبطاقات والهويه
شن بلم فرح البنفسج بالرياح الموسميه
شدي حيلنا على المسافه وهدي جدران الاسيه
وعلمي الاطفال كلامك والحروف الابجديه
كلما تمر فوقنا غيمه تغني للمطر الخرافي
وكلما يغازلنا خاطر نهدي ليك فرح القوافي
يا موزعه في الفصول والمسارات والمرافي
ردي للشتلات نضارا ورجعي الفرح المجافي
مره أهديتينا ضيك والبشارات والاماني
احنا فتشناك حقيقه في الصباحات والاغاني
ياموزعه في العوالم والمداين والمواني
العمر لوعدي راحل بالامل ناديهو تاني
كلمتنا الوردة قالت
النسايم ما بخيله
والبحبك يا أصيله ..
يعشق الخطر المسور
غيمتك الحبلي وظليله
يا موزعه في المنا في
والمسافات الطويله
مدى بيناتنا الوصال
ورددي
الغنوة
الجميله ...
=====================================
أمل البنفسج
--------------
واقفه بين الليل وصمتو
نازفه من جرح القصيده
شمعه في قلب العتامي
تبكي في الشرفات وحيده
إنتي يا أمل البنفسج
يا صدى الغنوه البعيده
زافه للناس البشاره
وللطفوله الضايعه عيدا
وواقفه بين الليل وصمتو
جايه يارش السحايب
في عوينات الازاهر
وساطعة يا شمس البداري
الناشره ضيك في المشاعر
داخله اكواخ المساكين
المشتته في البنادر
زافه للناس البشاره
وصارخه في كل المنابر
واقفه بين الليل وصمتو
نازله عز الزمهرير في زحامات الشوارع
تشبهي القطن المندي ودابو فرهد في المزارع
عازفه الحان الجداول
رافعه هامات المعاول
زافه للناس البشاره وصامده في وش المدافع
وواقفه بين الليل وصمتو ...
=====================================
بوح
-----
قولي قولي وكلميني جيبي لي فرحاً نساني
قبلك الايام ظلومه ليلا حالك وكم طواني
يا الرميتي طلال جميله في هجير عمري البحرق
ويا البقيتي امل تواصل في الزمان الكان بفرق
قولي قولي وكلميني...
مدي ايدك يا غمامه رشي في دربي السلامه
وكوني يا امل القصايد للفرح سكه وعلامه
شوفي وين انا شلتو ريدك وطفت بيهو الكون أهلل
وشوفي كيف أنا برضو بحزن لما ليل الشوق يفلل
وابقي اكتب في القصايد وفي الخيال أرحل وأأمل
قولي قولي وكلميني..
يا فرح في السكه عايد يا نزيف قلب القصايد
يا سنا اللحظات وعيدا يا أمل عمري المواعد
قولي قولي وكلميني جيبي لي فرحاً نساني
=========================================
شــــروق
---------
فرح لميت حروف مغناي
نضمتها شوق وحنيه
فتحت على الأمل شرفه
تغرد فيها قمريه
عشان زولتي الوجيها شروق
.يزور الكون صباحيه . . .
ترافقني ومعاي تمشي تشق صمت الزحام فيني
معاها أغني للاطفال وللزمــــن البصافيني
أمد الشوق جزر أحلام على الفرح البلاقيني
وحبيبتي انا الفرايحيه . . .
حبيبتي أنا الربيعيه . . . أمل حرفي البغنيلا ..
ويطير بالشوق يعديلا . . .
تمس الريشه بالالوان
أحس اللوحه تتكلم
تداعب حسي بالالحان
اطوف في روعتا وأحلم
حبيبتي أنا الربيعيه . . .
بشاير غيم خريفيه
مداين ضي . . تعاين لي
تواعد جد بي فيضا . . .
حبيبتي أنا الفرايحيه
تزور الكون صباحيه . . .

with all my best
nourelsalam
صورة العضو الرمزية
حزن السنين
مشاركات: 4294
اشترك في: الأحد 2006.12.3 11:05 am
مكان: ~ معبد الاحزان ~
اتصال:

رد: الشاعر / مدنى يوسف النخلى

مشاركة بواسطة حزن السنين »

مشكور يا نور
منير
مشاركات: 180
اشترك في: الأحد 2007.1.28 2:06 pm
مكان: السعودية - الرياض

رد: الشاعر / مدنى يوسف النخلى

مشاركة بواسطة منير »

شكراً حزن السنين ... النخلي جار وحبيب وابن منطقة؟
صورة العضو الرمزية
nourelsalam
مشاركات: 776
اشترك في: الأحد 2006.11.12 5:08 am
مكان: مابين الصين وامريكا
اتصال:

رد: الشاعر / مدنى يوسف النخلى

مشاركة بواسطة nourelsalam »

الشكر كل الشكر على المرور على الموضوع
تحياتى
نور الاسلام
صورة العضو الرمزية
النور ابوكدوك
مشاركات: 20
اشترك في: الأربعاء 2007.10.3 12:50 am
مكان: استراليا
اتصال:

رد: الشاعر / مدنى يوسف النخلى

مشاركة بواسطة النور ابوكدوك »

مشكور يا رائع والله يعينك
صورة العضو الرمزية
ندى البيلسان
مشاركات: 1578
اشترك في: الخميس 2009.1.29 11:17 am
مكان: أرض المحنة الشاربة من النيل

رد: الشاعر / مدنى يوسف النخلى

مشاركة بواسطة ندى البيلسان »

والله يا يا نور إختيارات روعة وذوق وإبداع وكلمات أروع من الروعة .. لك الإمتنان
صورة العضو الرمزية
محمد سليمان
مشاركات: 765
اشترك في: الاثنين 2009.2.2 12:07 pm
مكان: مدينه الحب العالميه
اتصال:

رد: الشاعر / مدنى يوسف النخلى

مشاركة بواسطة محمد سليمان »

امات الحب عشاقا وحبك انتا احياني ولو خيرت في وطنا لقلت هواكي اوطاني



شكرا
صورة العضو الرمزية
محمد سليمان
مشاركات: 765
اشترك في: الاثنين 2009.2.2 12:07 pm
مكان: مدينه الحب العالميه
اتصال:

رد: الشاعر / مدنى يوسف النخلى

مشاركة بواسطة محمد سليمان »

مـــــــــــــــــشكو اخي العزيز
صورة العضو الرمزية
اسير الغربه
مشاركات: 49
اشترك في: الخميس 2009.7.9 3:38 am
مكان: ksa

مدني النخلي

مشاركة بواسطة اسير الغربه »

أدي^&)§¤°^°§°^°¤§(&^ـنـى إحـساس بـالأمل
فى كل رحلة شوق تطول
وأدى الخطاوى الراجعة iiليك
فـى سـكتك عش الوصول
مـا الـدنيا كـلها إنـتظار
والإرتـحال قـد الفصول
الـموجة تـحلم بـالضفاف
والـغيمة تـحل بـالهطول
********
جـايى ومعاى ضى الأمانى
وذكـرى لـلأيام .هـناك
لـحظات بـتذخربالأمانى
وكيف أنسى تذكارات iiهواك
نـتحمل الـغربة .ونعانى
ونصبر عشان نكسب رضاك
ونـغـنى لـو زاد الـحنين
يـاريتو كان سفراً ..معاك
^&)§¤°^°§°^°¤§(&^
ودعازة
مشاركات: 763
اشترك في: الأربعاء 2009.6.17 3:31 pm
مكان: الرياض

رد: مدني النخلي

مشاركة بواسطة ودعازة »

مدنى النخلى عصفور غرد بسماوات دوحة مدنى الظليلة..
أضف رد جديد

العودة إلى ”وثائق و شعراء“