[grade="4b0082 ff1493 4b0082 ff1493"]يا ريس صباح الخير وياها الحاله
خمسة سنين نجابد في القراية رجاله
خلاص كمل الصبر بقت الأمور بطاله
وإحنا ولاد رواعيه وعقاب ترباله
قضينا الخدمة في الميدان كتال وبساله
ومضغنا الصبر في صي نسايمو علاله
بعد جبنا الشهادات البوظف شاله
ود ناسك مدير ... إلا الكفاءة عطاله
الدكتور وحاتك جوكي سايق الرقشة
وأب شنبات مصاقر البيت مع ناس عشه
يا حرس ام مسور الا كديب لا حشه
ولـ أنقد بالسنبك تجيبو الكشه
أكلو لحمنا ناس الحله قالو عطاله
مراتاً طلب مرات كتار عتاله
بعد ما رضينا يا ريسنا نبقى عماله
فتحولنا الحدود للحبشه والبنقاله
بطانتك خمرت فوقنا القبيله فطير
واقع المغصه والغبنه الملازمو خطير
شباب أتلزم العركم ودوا وقصطير
بعد ما عيشو فتق ليش بتدي الطير
يا ريس جزم شعبك رقد موجوع
ولا هماهو تاني حضارة المشروع
الظلم والمرض علمنا لحس الكوع
والسد أبره في قش للمضايقو الجوع
جوامع الفشخره البتصلو فيها براكم
تسو كم مدرسة لشعب جاري وراكم ؟
الحرص المدجج اهس كان ضاراكم
يوم البعث قابلني ان بقيت باراكم .
جت استوزرو الكيزان وملكو السوق
ناسين ساقية الدنيا الدوام بتسوق
الصفاقه اسه والنقايزه عسوق
ما ببروكه ساعة جره الواسوق ..
ما بتتوظف الولد الحكومة اتخلت
شومالك ضهر ساساق وروحن سلت
خلاف الطلبه والمهن الحسابه مخلت
إن الجيش أباك ضعت وقنيصتك جلت
بنات العفه والعزه وسترت الحال
إن أبن العوج والشين تراهو الحال
إما يخوضن العوجه ومشي الأوحال
ولا تحفي ساساقه جري وترحال
سيد المكتب الضروه وتلاته سراير
عقب الباب مظلل نازله فوقو ستاير
بره تشوف سكرتيرتو ام سديرن فاير
قبيل كار الحبش واسع زعماتو حراير
التعيين قبيل فوقو الشروط منسجمه
شهادة وكمبيوتر فوق لغات العجمه
اسه شروطو في الكفل البصد الهجمه
والسوق أنزرد بالميسجور والنجمه
أول مره تتمنع تقول مي دايره
يوم يومين تلاته تره المريكب سايره
هبشه وهبشتين قلده وتدور الدايره
ولـ تشيل دبيليمها وتقبل غايره
والله دي نصيحة قاسية.. تكفي من افريقا لعن اسيا
دايرا البسمع ويحكم ويعدل و يخلي الحقوق متواسية
المسئولية كبيرة ووراءها النفس بس تتعب
عشان في دروب الآخر تب ما تضهب
دحين يا ريس الكلام كل اتقال
والنفوس جاها منو طمام وسعال
وما فضل غير كلمة منك فيها فصال
شاملة قاطعة فيها جواب لكل سؤال
الحالة دي ح تستمر كده والله محال
شوف لينا مخرج والله والوضع بطال
والحق العمير كم فيه والله هناك سؤال
المسدار ده , لا ادري من قائله , ولكنه بالتأكيد أحد المغبونين الموجوعين من الـ............ " إنتو عارفين من شنو "
المهم .. هاكم ده سبب المسدار
. .
.
.
.
مسدار الحفرة
.
نص جديد للشاعر الكبير أزهري محمد علي زخة رصاص في الراس من سلطة معطوبة ما بتثني عزم الناس لو عزا مطلوبا في دولة الرصاص كم خيمة منصوبة حرس الرئيس الخاص متغطي بي توبا ولدا رضي و وناس شايلنو لي حوبة في ليلك اب كباس شاهد خراب سوبا شاهد وطن بنداس عينيهو معصوبة في يوم شديد الباس والدنيا مقلوبة مجبور رمي الكراس دنقر رفع طوبة شاف لحية القناص بي دمو مخضوبة تمتم قري الاخلاص كتب الخلاص بالدم طلع القمر بوبا
ياشعب رقد موجوع
كترت عليك مصائب ولحس الكوع
حضارتك آفلت ومعاها جموع
اموال منهوبة دماء برئية وكم مشروع
ياشعب رقد موجوع
بعد ماكنت سلة عالم الليلة اتوشحت لباس الجوع
شمس حريتنا الغابت ولا قمر فرحنا بان ليه طلوع
اليوم عيد ميلاد ك خمسون وثمانية من مخلوع
بس عاد كيفن الفرح وكل البلد موجوع
يا ود البشير عبدالله ظنّي ودرت .. في شربوت ضحيّتكم بشوف كتّرت .. الخلّاك تهضرب ماكا واعي البتّ .. شربوت الضحيّه وغير شك إت سكرت ..
بعد العيشه والبيت اللّكان جالوص .. وعقبا فيتريته الكسره ليها تموص .. بقيت صالون حلاقتك يا التجزّوا الرّوس .. القطعيه كيف ؟ ليزر ؟ زبائنك روس ؟؟
صالونات شنو البتسوّي قدر العندك ؟؟ وقّف فيهو خط المنطق أثبت عندك .. مالك حقّنا السوّيتو من خير جندك .. وتسرق فينا يااللواء والحكومه تسندك ..
دام بيت الرئيس ليك حق تسف وتألّف .. وتسرق فينا قوةّ عين كمان بتخرّف .. تقول حر مالنا !!! للحريه يازول عرّف .. مال الحوش ده ولّا السارقوا يا متخلّف ..
الماغسني يا ود البشير في القلتو .. مالك قّت من صالون حلاقه الجبتو .. يسألك الله : صالون وييين ده ياخي الشفتو ؟ يبني الفيلا لي بشّه واخوهو واختو ؟؟؟
بتحلقوا كيف وبيكم: الدّقن والرّاس ؟؟ وبالدولار حلاقاتكم اكييد للناس !! بعد السرقه لي مالنا افتريتو خلاس .. بقيتوا تقول حر مالنا ومأصّل وساس !!
بيوت كافوري من وييين ورثه من (الحوش) ؟؟ ايا البالليل اخوك جانا ودخلّّنا توووووش .. غايتو الليله ياسكران ويامهبوش ... صالون إيييه ده بي المليار يسوّي قروش ..
وعقبا يسألوك بتقول قديم من ساسنا .. مالنا وبالحلال: خلّيتنا نهبش راسنا .. أكان صالون حلاقتك هو اليبلّوا يباسنا .. كان كدي غربه ليه ؟؟ راجعين وبي امواسنا ..
ما وريتنا بالليزر حلاقتكم دي ولا هي عااادي .. يا السارقنّوا مال العالمين في بلادي .. خبرك جانا في النت والقناه وفي الرادي .. حلّاق ببقي ملياردير دي كيفن عاادي !!
علي آآآ القرحه اوعي تهيجي هوي لا تفوري .. وما تشتغلي بي تخريف لصوص كافوري .. وحاة الله اللي شال عبّود وشال جعفوري .. قدر ما نمتي يا أمتنا يوم بتفوري ..
أتاري الصلعه يا خلق الله والقطعيه .. بتبني فلل وفي كافوري مال مو شويّه .. بعد البيتو في الحوش طين ونومو عشيّه .. يبقي فطورو هوت دوق مو مراره وشيّه !!!
ورّيتونا يا عبدالله اخو الحجاج .. كيف المال بجي بعد السعايه نعاج .. اريتو هو كان حلال ما كان حديثنا احتاج .. غايتو الليله يا سكران ده يا مرضان بدورلو علاج ..
ماورّيتنا: صالون السرور العينه .. حجزو ده : بالنت ولا فيلّتو بينه .. قول لي شبابنا تاري الشغله تب مي هيينه .. امشوا عليها تب وكت الملاييين بينه ..
مال السرقه يا عبدالله ظاااهر وباين .. حلاقة الراس دي كيفن تبني قصر وجناين ؟؟ يكون يعني (الوليد) و (بيل قيتس) ليكا زبائن .. عشان تبني الفلل وتخلّي عينّا تعاين !!!