اتحداك ..
انت الساكن الاعماق..
وانت الفارس التائه ..
فى غمام ريدى ..
اتحداك ..
تلف الدنيا ..
كان تلقاهو ..زى قلبى ..
وزى ريدى السكن فى المقل احلام ..
ونظم في القوافى كلام ..
لا قالوه لا سمعوا بيهو انسام ..
اتحداك ..
كان تكتب حروف غناى ..
دى المكتوبة بدمى ..
وكان تسكن فى عيون الصيد ..
دوام محفوفة بنبضى ..
وشايلة القليب فى يد ..
هادياهو ليك حبى ..
وكاتباهو بى محاية شوق ..
كان تفهم ..كان تزيد شوقى ..
اتحداك ..
كان تلقى لقليبى بديل ..
وكان تتوسد الاحلام ..
وتسمع معاها هديل ..
وكان شمسا عليك طلت ..
مااظن تلقى زى جناحى ظليل ..
وزى قلبا ينادى عديل ..
من مطر الحزن ..يضارى جميل ..
زى ريدك ..
زى ريدك وكت صبح جواى
وانت مشيت ..
زى نبضك ودع خطاوى الشوق ..
وكت ودعت احلامى ..
امشٍ ..
بلاك الدنيا مسخت زين ..
امشٍ ..
بلملم فى حواف الجرح الهبش صبرى ..
وبفتح باب من تانى ..
تشرق على شمسى ..
اتحداك لو ترجع ..
تلاقى قليب ..
لا مشتاق ..لا الدرب القبيل
يرجعو ليك ..
اتحداك ..
كان تقدر تلملم جراحاتو ..
وتنفخ فى جواهو الروح ..
اتحداك ..
يوم باكر يلاقى زولا غيرك يهواه ..
زولا يسوقو من تانى فى خطاوى الريد ..
ويفرح بيهو من اول ..
اتحداك ..
تندم ..حد عمرك ..
على الضيعتو من ايديك .[/grade]