إتكاءة على الزمن الجميل

يحتوي على كل أنواع القصص والأحداث الواقعية الشخصية .

المشرف: بانه

أضف رد جديد
صورة العضو الرمزية
الفردوس المفقود
مشاركات: 6827
اشترك في: الأربعاء 2012.1.4 8:59 am
مكان: مهبط الوحي

إتكاءة على الزمن الجميل

مشاركة بواسطة الفردوس المفقود »

صورة

[align=center]كان وطني السودان جميل وكبيييييييييير. كان بلد ناسو حنان وطيبين وعائشين بسلام بتقاسمو اللقمة بيناتم،
وحتى الطير البجيهو جيعان من اطراف تقاويه بشبع وبصُد ،
واحدين كان بقومو من الفجرية بشيلو الكدنكة والمولود والطورية
و بزرعو العيش والقمح والقطن والفول بياكلو الكسرة والعصيدة والرغيف
والقراصة والمولوص الحبوبات بغزلن القطن بالمُترار يعمل خيط وبالإبرة
يخيطو التوب لا بعرفو (دليني كان بقيت راجل ولا الجلابية ام جهتين ولا المركوب الاصلة ولا بوب شارلي)
عشان عرضهم مزيون التوب ما يهم والناس ما بتنقاس بي تيبانا
(الناس في العروض ما تقيسها بتيبانها ما يغرك لباسهم والعروض عريانة
ديل حراس رِزِق زي اتكنوا امانة زي ابل الرحيل شايلة السُقا وعطشانة).
بزرعو البصل والخدرة والبامية والشطة والتبش والعجور والطماطم والجزر
والبنجر وآلخ ، لا توقفهم الأمطار ولا هجير الشمس (بزرع في الهجير لا ضُل ولا شمسية)
بياكلو في ضل السدرة جنب الترعة وابعشرين وبشربو من موية الطمى الملوث طين،
لا بشتكو لا بعرفو طبيب، حياتم كانت بسيطة وجميلة بتلمو ساعة الحارة والفرحة
يفقدو الزول، وعندهم الغنم والبقر والضان والإبل مِرحات مِرحات، واحدين بشتغلو
في المصانع (في الباكرية طالع بزرع في المزارع بصنع في المصانع احب صُناع بلدنا).
اها الناس ديل كانو طيبين طيبة لا تعرف اخو من جار كل اخوان خالات وخلان،
ضيفم كان نزل عيب يتفات، يتلمو عليه زي النحل بما لذ وطاب والما عندو ملاح
ولا رغيف برضو ما بندس ب(بليلة مكاشر) بجي عشان زمااااان اهلنا قالو (عيب الزاد ولا عيب سيدو)

نواااااااااااااصل happy0005.gif
[/align]
صورة العضو الرمزية
هجره
مشاركات: 5190
اشترك في: الاثنين 2010.10.18 12:16 pm
مكان: بلدى الغااالى

رد: إتكاءة على الزمن الجميل

مشاركة بواسطة هجره »

وكمان بقولو (الجود بالموجود)

كلامك جميل وحبيت اشارك فيه


وكمان ( أخير من الزول يقعد ساي) :smiels0:
صورة العضو الرمزية
الفردوس المفقود
مشاركات: 6827
اشترك في: الأربعاء 2012.1.4 8:59 am
مكان: مهبط الوحي

رد: إتكاءة على الزمن الجميل

مشاركة بواسطة الفردوس المفقود »

[align=center][quote="هاجر يوسف حسين"]وكمان بقولو (الجود بالموجود)

كلامك جميل وحبيت اشارك فيه


وكمان ( أخير من الزول يقعد ساي) :smiels0: [/quote]

جوري
تشكراتي على المشاركة ومنها زي ما قلتي تملي فراغ

شكرا كتير

وتابعينا happy0005.gif[/align]
صورة العضو الرمزية
صلاح محجوب عبداللطيف
مشاركات: 4154
اشترك في: الاثنين 2010.9.27 6:09 pm
مكان: مصر - السويس

رد: إتكاءة على الزمن الجميل

مشاركة بواسطة صلاح محجوب عبداللطيف »

تسلم الفردوس المفقود على الاتكاءة
اتكاءة جميلة زكرتنا بالايام التي خلت
وواصل ونحن في انتظار بقية الحديث
أرجو أن تونسنا بما عندك من حلو الكلام
الله يعزالمنتدى بيك يا عززي الفاضل
للعلم أنا قعت فتره في السودان بعد الزواج 84 م
صورة العضو الرمزية
الفردوس المفقود
مشاركات: 6827
اشترك في: الأربعاء 2012.1.4 8:59 am
مكان: مهبط الوحي

رد: إتكاءة على الزمن الجميل

مشاركة بواسطة الفردوس المفقود »

[align=center][quote="صلاح محجوب عبداللطيف"][align=center]تسلم الفردوس المفقود على الاتكاءة
اتكاءة جميلة زكرتنا بالايام التي خلت
وواصل ونحن في انتظار بقية الحديث
أرجو أن تونسنا بما عندك من حلو الكلام
الله يعزالمنتدى بيك يا عززي الفاضل
للعلم أنا قعت فتره في السودان بعد الزواج 84 م
[/quote]

الله يبارك فيك استاذ صلاح
وشكرا كتير على التشجيع
ياريت ترجع السودان رائع ما بتفات [/align][/font][/align][/size]
صورة العضو الرمزية
الفردوس المفقود
مشاركات: 6827
اشترك في: الأربعاء 2012.1.4 8:59 am
مكان: مهبط الوحي

رد: إتكاءة على الزمن الجميل

مشاركة بواسطة الفردوس المفقود »

[align=center]إتكاءة أولى :

في رحاب قرية
صورة

الله اكبر الله اكبر أذن آذان الفجر ...
وعلى صوت (الصلاة خير من النوم )
اوقدت البيوت....
والما عندها جاز اوقدت مُسراتها
من قطعة قطن مبلولة زيت
جات الفرحة هائمة ما خلتلا بيت
وزعت التهاني والبركات
والصمت القبيل لملم بعضو فات
بدأ اليوم جديد وإتعالت الهمسات
... قوم يا جِنّى يلا على الصلاة ...
يا بت قومي خلاص ..
جيبيلي الإبريق وختيلي الفروة
ما تفوتني الرقيبة.
حااااضر يابا حااضر ...
كيف اصبحتي يمه
كيف حالك حبوبة...
اريتك طيبة يا بنيتي
تصبحك السعادة والبخت السمح
قام الحاج وركَّع ... وكمل الرقيبة
شال سبحتو همهم والجنى بوراه
همو متين يصل ويخلص صلاة
ما عشان ينوم .. او يرميها بي وراه
همو هناك بعيد.... همو في الخلا
الموية الفي الجرف والزرع الصغار اللسه ما اتعرف
خوفو تشيلو موية وتموت احلامو معاه
وهناك ام الحسن
لاقتم ببسمة ما بي وجهن يصر
ما طلبوها شي قالتلم صبر
حلبت غنيماتها وشدت كفتيرتا
شايها اب لبن قنانتو الرهيبة
ما تحتاج لي هيل لا غِرفة لا (جنزبيل)
شربو شاي وقامو شد الولد حمارتو
وعرعر للخلا
والحاج قال يصبح وبجي بوراه
في عز الضهر....
الولد السعيد يجرجر في الأرض
بي طوريتو يرسم ينضف في الزرع
ما ماتت عزيمتو لا ما قال انوم
همو النجيلة يشيلها بيتم
للبقرة ام ضرع
شان ما يجف الضرع
عشان الشي اب لبن
العشا اب لبن
فطيرة القمح
مر اليوم سعيد ووقعت الشمس
فات الحاج وبدر شان خوف من الضلام
عشان نظرو الضعف ... بمسك دربا طويل
(درب سلام)
ام حممد رجع يسمع في القماري
ساعة القمرة طالعة تدوبي ( البلالي البلالي)
ناس زنوبة وام سترين
ناس فطومة ناس امونة بت جادين
ما قال النَمُر اشغالن
ديل ناس عزاز وكل الناس اهل
الجاهم من الرهد او من الضعين
كان الخير كتير والناس في آمان
لا هديم اتسرق لا اشتكو جيران
وفجاءة تسمع
هولبا يا هولبا
عمي يا جمالي سرقو ليك جُمالك
سيفي تحت راسي ما سامع ليك كلامك
اتلمو الولاد بفرحة اتلمو
في ساعة اللعب ما بقولوا دا
ود خال ما بقولوا دا ود عم
كل الناس أهل كل الناس حنان
دودبا يا دودبا
شليل يا شليل
شليل وينو ...اكلو الدودو
شليل وين راح اكلو التمساح
ذهب اليوم ونامت النفوس الطيبة في ارتياح
[/size][/align]
صورة العضو الرمزية
الفردوس المفقود
مشاركات: 6827
اشترك في: الأربعاء 2012.1.4 8:59 am
مكان: مهبط الوحي

رد: إتكاءة على الزمن الجميل

مشاركة بواسطة الفردوس المفقود »

اليوم العُقب .... بدأ بالجديد
والناس اتلمو جو...
الجا من الغرب
والجا من الدويم
والجا من الصعيد
جو بالفرحة يشاركو
عرس امونة بت سعيد
صبحو بالضبيحة
تور وخروفين كُبار
وناس على ود التلب
والتوم "ابرسن"
شدو الصيوان دُغش
والطير ما نضم
واتلمو الناس كتار
لعرس الحلال
لى "فرح العشم"
صورة العضو الرمزية
الفردوس المفقود
مشاركات: 6827
اشترك في: الأربعاء 2012.1.4 8:59 am
مكان: مهبط الوحي

رد: إتكاءة على الزمن الجميل

مشاركة بواسطة الفردوس المفقود »

الخالات فجر ولعن دوكتن
بالجردل الكبير عاسن كسرتن
سارقات الزمن قبل الشمس تجي
ويبقى الناس حضور
بي براد شاي
وزلابية وكعك
ووجوه بشوشة
بالفرحة تشع
صورة العضو الرمزية
الفردوس المفقود
مشاركات: 6827
اشترك في: الأربعاء 2012.1.4 8:59 am
مكان: مهبط الوحي

رد: إتكاءة على الزمن الجميل

مشاركة بواسطة الفردوس المفقود »

في الساحة الكبيرة
اتلم الناس جموع
اترصت صفوف
وزغاريد الفرح ملت الكون علت
صفقة ونقارة ودفوف
وكل الناس حضور
لا منتظرين عزومة
لا كروت دخول لا دفتر مرور
بقلوب حنينة صافية..
اتشاركت الفرح
صورة العضو الرمزية
ninar tato
مشاركات: 9099
اشترك في: الاثنين 2013.10.21 5:27 pm
مكان: كسلا

رد: إتكاءة على الزمن الجميل

مشاركة بواسطة ninar tato »

يا زمن وقف شوية

صورة العضو الرمزية
الفردوس المفقود
مشاركات: 6827
اشترك في: الأربعاء 2012.1.4 8:59 am
مكان: مهبط الوحي

رد: إتكاءة على الزمن الجميل

مشاركة بواسطة الفردوس المفقود »

ninar tato كتب:
يا زمن وقف شوية


كان زمن ليته يعوود d010.gif
حوريا
مشاركات: 30
اشترك في: الاثنين 2016.10.10 10:16 pm
مكان: مصر

رد: إتكاءة على الزمن الجميل

مشاركة بواسطة حوريا »

لقد كتبتِ وابدعتِ
كم كانت كلماتكِ رائعه في معانيها
فكم استمتعت بموضوعك الجميل
بين سحر حروفكِ التي
ليس لها مثيل

دمت بألف خير
صورة العضو الرمزية
احلام بت النيل
مشاركات: 3193
اشترك في: الاثنين 2015.6.8 11:50 am
مكان: نهر النيل

رد: إتكاءة على الزمن الجميل

مشاركة بواسطة احلام بت النيل »

إتكاءة جميلة

....

ويا حليل زمن الزمان الزين
أضف رد جديد

العودة إلى ”سيناريو وأحـداث“