قصص للكاتب فيفد ... من حلة البهلة ...

يحتوي على كل أنواع القصص والأحداث الواقعية الشخصية .

المشرف: بانه

أضف رد جديد
صورة العضو الرمزية
لحــ غروب ـظة
مشاركات: 585
اشترك في: الأحد 2007.6.3 10:13 am
مكان: أم درمان

قصص للكاتب فيفد ... من حلة البهلة ...

مشاركة بواسطة لحــ غروب ـظة »

هي قصص أعجبتني للرائع فيفد وقد وجدتها في منتدى آخر ...

بالجد قصص روعة وعجبتني ...

وحبيت تشاركوني الضحكة ....


بسم الله نبدأ...


[align=center]1. برطوش خالي بلة ....[/align]

برطوش خالي بلة . . معلم بارز من معالم الاسرة الكريمة . . صنع بمدينة رفاعة . . بأيدي بلدية مية المية . . على يد النقلتي المتمرس . . و صاحب الرقبة الطويلة . . و الباع الطويل في صناعة البراطيش . . المغفور له بإذن الله ود الجعيل . . يتميز برطوش خالي بلة يجمع بين جميع فصائل الأحزية . . الجزمة . . و الشبشب . . و المركوب . . و به ريحة من ريحة الشبط . . و لهذا السبب كان من الإستحالة معرفة نوع هذا البرطوش بالتحديد . . و أطلق عليه لفظ برطوش عن جدارة . . تيمناً بهذا الجسم الغريب . . يقولون . . الله يسترنا من يقولن دي . . أن ود الجعيل لمن جاء عشان يصنع هذا البرطوش . . صب فيهو كل عصارة علمه و جهده في علم البراطيش . . و أخرجه في هذه الصورة الرائعة . . التي أكسبته الشهرة و السمعة الحسنة . . صنع هذا البرطوش من جلد حيوان غريب . . غالباً ما يكون حيوان منقرض . . في وقت الزنقة و الحيرة يستخدمه خالي بلة في سقيا بقرته الحلوب الكنانية بدلا من جردل الموية. . هذا البرطوش صلب كالفولاذ . . تقيل كصاج المونة . . عفن كما ريحة الفطيسة . . أفووووووو . . أذكر تماماً ذلك اليوم . . عندما كان خالي بلة يمشي الهوينا مع بقرته الحلوب صوب ساحة السرحة . . و صادف أن بقرته هذه قررت أنها تبرطع من غير هدى . . فما كان من خالي بلة إلى و أن ملص برطوشه آنف الذكر . . و قعد يرطع معاها . . مش بقرتو؟؟؟ . . خلوهو يبرطع معاها زي ما داير . . البقرة تبرطع و خالي بلة يبرطع معاها . . و صادف اثناء ذلك انو الود جمعة كماين . . جاء لي مكان السرحة عشان يلم الزبالة بتاعت البقر . . قام لقى البرطوش بتاع خالي بلة . . افتكرو في اللوال انو دا كوم بعر . . اتكيييييف و انبسط . . و طار صقرية . . و قال : و الله بقرة ناس فيفيد دي الليلة بطنها ما كويسة . . و الله الليلة جابت ليها بعر شكلوا غريب خلاس . . و ريحتو ‍‍‍‍‍‍‍- أشهد أن لا إله إلا الله . . قام شال معاهو المركوب في قفة الزبالة . . وحاااات سيدي الحسن ناس حي البهلة يا الله و يامين فكوهو منو . . لمع صيت هذا البرطوش في اوائل الثمانينيات . . و بالتحديد يوم ولادة البنت سمسمة . . اليوم داك و الناس فرحانين بي ولادة سمسمة . . قاعدين يرمرموا في السماية . . جاهم دبيب طولو مترين . . عشان كدا سمسمة دي لي يوم الليلة بناغموها بالدبيبة . . الشفع شافوا الدبيب الزيطة و العيطة ضربت . . النسوان لفحن تيابن و شتتن . . الرجال جابوا العكاكيز الغلاد . . و كسروها للدبيب في هامتو . . بس انت يا الدبيب راسك و ألف سيف ما تموت . . دبيب راسو قوي زي ناس البهلة . . في النهاية كدا جاهم خالي بلة داخل . . كان جاي من الحواشة بتاعتو . . شايل إبريقو في يدو و مخلاتو فويق كتفو . . و حاشر مسواك في فرقات سنونو . . الساعة السمع ليك صوت صفية بت أم هلاهلا قاعدة تصرخ . . و قالت وووووووووووووب علي . . يا أبو مرووووووة . . خالي بلة شالتو الجعلية . . زمان كان في طراطيف أخبار ناعمة . . قالوا صفية القاعدة تسرخ من شوفت الدبيب دي . . كانت فردة خالي بلة . . بس شاتتو ضفاري من دائرة السنتر . . قالت السنون بتاعات خالي ما عاجباتنها . . سجمك يا صفية و التربة دي في خشيمة العريض دا . . يا الخيخة السمينة . . المهم كدي خلونا مع الدبيب الجاء داخل دا . . الله يكفينا شر الدواهي و النصايب . . خالي بلة لمن سمع السكلي بتاع صفية . . جاهم جاري زي التور الهائج . . و ماسك طرف جلابيتو بي سنونو . . و سروالو كاري بالواطة . . قال : انا موجود و البنت صفية تسرخ!!!!! . . و الله كان كدي الرجالة طارت يا رجال . . قال كدا و ملص فردة برطوشو الشمال . . و نتح الدبيب بي طرف البرطوش بتاعوا . . قسموا نصين. . و من ديك و عيييييك . . برطوش خالي بلة بقى حديث ناس الحي بتاعنا . . لا يكتمل الحديث بدونه . . كان جات مطرة و قفلت السكة . . انت يا بلة شيل برطوشك أفتح بيهو السكة . . كان جاء كلب سعران يجيبو ليهو برطوش بلة يكتلوهو بيهو . . لو في حيطة دايرة لياس . . يجيبو برطوش بلة يعملوهو طالوش . . داك الليلة الكهرباء قاطعة . . جات فطينة بت ود الدايخة . . تتحمدل لينا سلامة غنامينا جابت ليها سخلين مبرقعين ظريفونااااات . . المرا الغبيانة دي . . جات تتكاوش ذي التركتر . . الساعة الدقشت ليك برطوش بلة شالوها دلقان للستبالية . . دخلوها العناية المركزة . . و خيتوها ليها بي خمسة غرز . . العمى اللداقسك يا فطينة . . انتي ما تعايني قدامك . . داك الليلة . . شلنا انا و خالي بلة الخرتوم . . كسرنا ركبة مع جماعة لينا هناك . . ناس حلوين و مرتاحين . . الجماعة ديل من طيبتهم . . قعدونا في الطابق الآخير . . لكن خالي بلة بقى ليهم في تولاتهم . . و ندموا علي اليوم الجابنا ليهم . . خالي بلة دا عندو عادة ثقيلة . . لمن يجي يقلع البرطوش بتاعو . . برفعو فوووووق و دللللل بضرب بيهو الواطة . . قرايبنا ديل بقن عيونن ما بتغمد عيلا خالي بلة يقلع برطوشو . . بقى ليهن زي ساعت بق بن . . اليوم داك جينا أنا و خالي متأخرين من مبارة الهلال و المريخ . . و أهلنا الخرتوميين ديل مستنين خالي بلة يقلع برطوشو . . طلعنا فوق . . في الدور اللاخير . . وكتين بقينا علي النوم . . خالي بلة قال كدا و ملص فردة برطوشو الشمال . . و دللللللل . . ضرب بيهو الواطة . . أهلنا تحت اتكيفوا . . و بلة قلع الفردة اليمين . . الساعة الداير يضرب بيها الواطة . . اتذكر ليك قون المريخ في الهلال . . سرح مع مع القون . . و أهلنا تحت منتظرين خالي بلة يملص الفردة اليمين . . و خالي بلة ساااارح مع القون . . و تحت الروح مشحتفة . . انت يا خالي بلة قووووم و خت فردة برطوشك اليمين . . بكل هدوء زي قون المريخ . . بدون ما يخبط بيها الواطة . . و الجماعة بي تحت مشحتفين . . أنا نمت . . و خالي بلة . . غرق في النوم . . و شخريهو يجيب الضهبان . . و الأهل بي تحت مشحتفين و ممحنين منتظرين الفردة اليمين . . وكت غلبهم كلو كلو . . جونا طالعين أذان الصبح . . كو كو كو دقوا لينا الباب . . انا صحيت مخلوع و مهجوم . . قلت يمكن في واحد جايب لينا خبر موت . . فتحت الباب لقيت أهلنا الخرتوميين واقفين يحننوا . . قالوا لي : يا فيفيد . . الله يكسرك حتة حتة . . قول لي خالك بلة دا يملص الفردة التانية عشان ننوم.[/color]
صورة العضو الرمزية
لحــ غروب ـظة
مشاركات: 585
اشترك في: الأحد 2007.6.3 10:13 am
مكان: أم درمان

رد: قصص للكاتب فيفد ... من حلة البهلة ...

مشاركة بواسطة لحــ غروب ـظة »

[align=center]2. بت جيرانا[/align][/u]

بت جيرانا . . نوباوية . . بت عينها زايعة و مطلوقة بالحلة . . جنها حفلات . . و تجي داخلة البيت مع قعور الليل . . البنت الوطواطة . . وكتين تتأخر ليها في حفلة قاعدة تتلب بي فوق الحيطة . . عشان أبوها ما يحس بيها . . داك الليلة و أنا جاي من السيلما . . شفتها تتدبا تحت حيطتهم . . اتكيفت . . و انبسطت . . و قعدت في الواطة و فقعتها ضحكة . . و قلت نوبة منار لن تنهار . . وكت تميت ضحكتي . . شفت البت النوباوية دي رفعت كراعها تسعين درجة . . و ختتها فوق راس الحيطة . . و شبّت في راس الحيطة . . الفستان مع رفعة الكراع وووررررررر انشرط . . اتلفتت بي قفاها . . يا رب ما يكون واحد شافها . . لقتني واقف جمبها . . قاعد في الواطة و أبحت من الضحك . . حمرت لي و صرت لي وشها . . و مدت يدها . . سختتني في وشي . . و قالت لي . . فييييفييييد؟؟؟!!!!!! . . أصبر لي بكرة بنظمك!!!!! . . قمت دخلت البيت و انا محتار فوق كلام البت النوباوية دي . . النوبة ديل أنا من زمان بخاف منهم . . و بكجننهم . . خاصة جيرانا ديل . . جنهم شراب مرايس . . الله يكفيني شركم . . رقدت في سريري . . نمت . . حلمت بي البت النوباوية . . جاتني و مسكتني من نصي . . و كتفت لي يديني وراء ضهري . . و عضتني في حلمة أضاني الشمال . . و أنا جااااااااااااااااك سرخت . . صحيت من النوم مخلوع . . لقيت جمبي ما في أي زول . . و حلمة أضاني اليمين تنتح . . و تنقط في الدم . . قلت يا ربي النوباوية بت الحرام دي . . تكون تلبت علي بالليل و أنا نايم ؟ ؟ ؟
الإشاعة جزء لا يتجزأ من نفسية المجتمع السوداني . . داك الليلة كنت راكب في مواصلات الحلة الجديدة . . سمعت لي مرأة قالت لي جارتا في المقعد . . سمعتي الخبر دا ياختي!!! . . الركاب وكتين سمعوا كلمة خبر . . اتلفتوا جت . . بي السواق تنى فقرتو و رخى أضانو . . قالت بعد ما ختت الخمسة فوق الاتنين . . قالوا في مرأة زعّلت راجلها . . الواطة انشقت نصين و بلعتا جب . . بتها شايلاها في فحتا . . وكتين الواطة انشقت . . سبحان الله انملصت من صفحتا . . و نطت تقول مترين من محل الشق . . و ما طالباني حليفة يا دي . . قالوا المرأة زعلت راجلها . . فوق سوات جبنة . . قال ليها سوي لي جبنة . . قالت ليهو أبييييت . . قال ليها ببو يشرطك . . قومي سوي الجبنة دي . . المرأة زعلت و قالت ليهو طظ فيك . . قالوا مع كلمة طظ دي . . الواطة انشقت و بلعتا . . شفتو المحن دي . . الحافلة وكتين المرأة انتهت من قصتا دي . . كلها قعدت تتشهّد و توحد في الله . . الكمساري نسى يشيل من المراة ست القصة الحساب . . و هي رفعت نخريها مترين في كبرياء نسائي واضح . . عشان قدرت تثير فضول الركاب . .اليوم التاني البلد كلها تتحدث عن الواطة البلعت المرأة فوق سوات الجبنة . . الحاجة دي كيفتني شديد و قلت بكرة أمشي أعمل لي أشاعة زي دي . . كان تفك لي زهجتي دي . . مشيت زنكي الخدار . . البشتري منو شيء أقول ليهو . . سمعت بي المرأة الشايقية الولدت ليها قرد؟؟؟ . . يقول لي لا . . أقوم أقول ليهو . . أجري روح شوفو الناس منكسرة فوق حي الشوايقة . . الأعمى شايل المكسر . . اليوم التاني . . لقيت خبر المرأة الشايقية الولدت قرد وصل بيتنا . . اتكيفت و قعدت أعرض في سهلة بيتنا من إشاعتي اللذيذة . . خالتي السعدية قالت لي يا فييييفيييد سمعت بي الشايقية الولدت ليها قرد؟؟؟!!! . . قلت ليها و أنا مدعي عدم المعرفة لالالالا يا خالة . . قالت لي كان كدا ورحكاكا من دربنا دا لي حي الشوايقة و نشوف الشايقية دي و ولدها القرد . . مشيت معاها حي الشوايقة . . دقينا الباب . . خالتي قالت ليهم . . دا بيت الشايقية الولدت قرد . . قالوا ليها آآآآآآي . . خشي اتفضلي . . الجماعة الشوايقة ديل شكلهم استفادوا من إشاعتي دي . . خاتين ليهم واحد عندو إضنين عراض فوق خشم الباب . . البجي داخل كلو بخلس منو حق التظراكر . . النفر بي خمسمية . . شالوا مننا أنا و خالتي السعدية ألف جنية . . دخلنا في أوضة الشايقية النفسة . . لقيناها منتكية و مكوعة و قدامها . . شافع شكلو زي القرد.
بريد العرقي . . لكن أصلو ما حصل ختيتو العرقي دا فوق خشمي . . بس بريد أشوف الناس و هي قاعدة تسكر . . و أي واحد بتعرف عليهو . . أسألو في اللوال انت بتسكر . . كان قال لا . . روحتي تتشحتف و أقوم أشجعو على السكر و شراب العرقي . . البلقاهو كلو أحمسو و أشجعو على خوض تجربة السكر . . كان قال لي لا . . أقول ليهو كان كدي انت ماك راجل . . قربة مقدودة و منفسة . . و فيك إن . . و إن كبيرة خلاس . . العرقي دا حق الرجال كان ماك عارف . . و أقعد أدودر فوقو لحدي ما أوديهو بيت النوبة جيرانا . . و أشتري ليهو نصية . . و أقعد أتفرج فوقو و هو قاعد يسكر . . و انتظرو لحدي ما يشبع . . و يترررررع و يدشا . . وكتين يترررررع و يدشّا قلبي يرقص طرباً على هذه النغمات ذات السلم السباعي . . و أنقنق ليهو تاني و أدودرو تاني و أخليهو يتسند فوق كتفي . . و يقول لي ست العرقي . . يا نوباوية هل من مزيد . . أتكيف و أقول ليهو . . نوباوية شنو . . أنا بجيبو ليك . . و أمشي لي النوباوية . . أقول ليها أديهو نصية تانية و صلحيها . . كان عندك بنج حصين و الا حجار بطارية سويهن . . و ما تخافي عليهو . . الترابة دي ما بتجيهو . . و الحساب كلو سجليهو علي . . بعد ما يسكر و يقيف لط . . أدرجو و أتكلو لحدي ما أوصولو بيتو . . و أقول ليهو . . هيييييع و الله انت راجل جنس رجولية . عوض الكريم ساعي ليهو كلب . . قاطع موية و نور . . لا بتحرك و لا بنبح و لا بهوهو . . جنو نوم . . ما قاعد يطرى النبيح و الهيوهيو عيلا وكتين يشوفني . . ياربي الكلب دا شامي فيني شنو . . في اللوال قلت ممكن الكلب دا معجب . . و الا مشبهني علي واحد تاني . . داك الليلة جاهم حرامي . . و الكلب ود اللذينا دا افتكر الحرامي دا فيفيد . . ياالله و يامين قرر أنو ينبح و يصحي حاج عوض الكريم . . و عوض الكريم كان نايم مع مرتو و يشخر . . مرتو قالت ليهو . . سجمنا ياحاج . . قوم جانا حرامي . . قوم يا حاج شوف كلبك قاعد ينبح . . قال ليها نومي يا ولية يا مطرطشة . . نومي دا ما حرامي دا فيفيد الزفت . . اليوم التاني حاج عوض الكريم صحى من نومو لقى بيتو خاوي على عروشه.
فيفيد في
31/05/2006م[/color]
صورة العضو الرمزية
لحــ غروب ـظة
مشاركات: 585
اشترك في: الأحد 2007.6.3 10:13 am
مكان: أم درمان

رد: قصص للكاتب فيفد ... من حلة البهلة ...

مشاركة بواسطة لحــ غروب ـظة »

3. نسوان الحلة ... السمنة في شنو؟؟؟
كانن مكومات حول صينية القهوة . . ما أحلاهم . . شالوا معاي الهم بالجملة . . و هتفوا . . و هتفت وراهم . . البحر البحر البحر . . و اتمنيت لو كنتوا معاي . . نقطة سطر جديد . . في معرض حديثها مع صويحباتها في تلك الحلقة العامرة . . عن السمنة . . و شبح السمنة . . حاولت محاسن الدبشة الوقوف علي حيلها . . للتعبير عما يجيش به صدرها الرامي العاتي . . لكن ما قدرت تقيف . . حاولت مرة تانية . . هيييييييييع . . برضو مافي فايدة . . دي شنو الورطة دي . . و محاسن العنيدة مصممة علي الوقفان . . عاد يا محاسن ما بسعلك . . نان تقومي كيفن!!! . . الصلب الصلاة علي النبي . . قدر دا . . شايل شيل السبت و الأحد . . و محاسن بالعزيمة و الإصرار . . وقفت . . لكن متنية . . و النسوان المعاها ما بريحن . . قعدن يقولن ليها . . هييييييلة هوب . . هييييييلة هوب . . و هررررردلب . . محاسن تاني وقعت علي مؤخرتها الجبارة . . النساوين . . قرقرقرقر قعدن يضحكن . . و انتهزن فرصت شنقيلة محاسن . . و قعدن يقرصن فيها . . قالت ليهن . . و هي تتسند بي كتف عشة الدلالية . . انتن أقعدن لي كدا للضحك . . إن شاء الله متل دا يقوم ليكن اتنين . . تضحكن؟؟؟ . . إن شاء الله تضحكن بلاهن . . بي بركة سديد الحسن . . و محاسن الزعلانة تمسك فوق كتف عشة الملحم . . محاولة منها للوقف تارة أخرى . . عيلا لكن الصلب داير ليهو ونش (كرين) يرفعوهو بيهو . . و هرررررردلب . . انتي يا محاسن أقعي لي عشة الدلالية في طرفها . . و محاسن الدبشة قنعت من الوقفان . . سرخت فوق النسوان . . ياااااااا نسواااااااااان هووووووي ما تلحقني . . شاحد الله يلحقن عزراييل . . يا نعمات . . يا بلالة . . تعالن لي أرفعني انتن خفيفات . . و نعمات و بلالة الخفيفات فنترب . . يقيفن علي حيلن . . متل الغزلان . . و يجرن لي محاسن و يرفعنها من أباطاتا . . وقفت محاسن . . بي قدرة قادر . . و خاطبت جموع النسوة المتحلقات . . يا نسوان هووووي . . أسمعن و أعن . . انا حالي و حالكن دا ما عاجبني . . و حا ادخل ليكن في صلب الموضوع مباشرة . . وحات نظري يا نسوان . . السمنة الوقعت فوقنا دي . . بتسكنا الآخرة قوام قوام . . نحنا لازم نشوف لينا حل جزري للنصيبة الوقعت فوقنا دي . . و محاسن قالت كدا و مدت . . يدها طويييلة . . و قبضت . . مريم من فقرتها . . و هزتها . . هسي النبي فوقن يا نسوان كدي قولن لي . . جنس دا نوديهو وين . . الربيت دا فايدتو شنو . . غير سجّمنا و رمدنا . . يا كافي البلا رجاجيلنا ديل في البيت كرهو خلقتنا دي . . و صلبتنا ديل غير طعين الحقن ما شايفة ليهن فايدة تاني.

أنا الوقت داك جيت سايق لي ترتار . . كوركت لي النساوين المجمهرة . . يا نسواااااان . . خالتي السعدية قالت ليكن . . جيبن ترامس القهوة نعبيها ليكن تاني . . و محاسن تتلفت وراها . . و تشوفني سايق ترتاري . . و تناديني . . يا فيييييفيييييد . . تعال لي يا وليدي . . قمت جيتها . . ترتاري في يدي . . و أكرف في مخاتي . . محاسن الله يطول عمرها و يمد ايامها . . و يديها الفي مرادها محل ما قبلت . . مسحت لي مخاتي . . و لشقت وشي بي موية . . و مسحتو بي طرف توبها من الغبشة . . و قالت للنساوين المتحلقات . . أها يا نسوان . . شوفن فيفيد دا حلاتو كيفن . . شوفنو ضعيف كيفن . . الله بسعلكن . . في زييييو . . صيييييييييدا يا نسوان صيييييييييدا . . يا الشول صنيتي و اتبلمتي كدا مالك. . كان عندك كليمة قوليها . . كلتوم البوم . . من قبيل ما كنتي بتتفاصحي . . مالك كضمتي . . و انا يا نساوين هوووووي . . و الله متنضرة و متقسمة . . وليداتي ديل كان أربيهن علي الضعفة . . دايرة ليهن ضعفة متل ضعفة فيفيد دا . . الله يقطع السمنة و سنين السمنة . . الشول جرتني من يدي و وقفتني في نص الحلقة . . و ختت أصابعينها في خشمها و صفقت و صفرت صفارة زات أيقاع سباعي . . و سرخت فوق النساوين . . يا نسوان . . دي الضعفة المثالية . . دي البنكوس ليها . . شايلات دششتكن المتل اسنام البعير دي . . المفروض تكون الواحدة مننا ذي فيفيد دا . . و نطت سعاد صاحبة الخلفية المبهولة . . و ضربتني في صلبي . . و قالت . . يا فيفيد . . أجري أجري شيل ترتارك دا ألعب بيهو بعيد . . النساوين العجاز ديل . . بسحرنك.

و تقعد محاسن . . و تقوم الشول . . و تدلو بدلوها في موضوع السمنة . . و تقول . . يا نساوين . . انتن عارفات . . انو الواحدة فينا ما بتسمن عيلا بعد يطهروها . . الطهور دا التقول قاعدين يعملوا لينا فوقو سماد . . و الواحدة من يوم يطهروها تتنفخ و تدردم . . و كان طهروها و ما بقت سمينة . . تاني ما بتسمن عيلا بعد العرس . . العرس دا . . هو الدوامة الخترية . . الواحدة فينا تتربع و تتكوم بعدو طوالي . . و تسرخ فيها كلتوم من بعيد . . يا الشول هوي . . بطلي فصاحتك دي . . انتي سمنتي بعد الطهور . . و اتكومتي بعد العرس . . هسي الرسول فوقك شوفي جنس الشخت الواقع فوقك دا.
و تجلس الشول و تقيف سعاد . . و تقول سعاد . . لازم يا نسوان . . نضع جدول مكافحة للنصيبة دي . . أولا . . نحنا نمتنع من أكل المدايد . . خسوساً مديدة الحلبة . . و مديدة الدخن . . الدخن دا بالذات يا نسوان . . أختنوا كدا و الا كدا . . تاني شي ناكل وجبة واحد في اليوم و يكون أكل مسلوق . . و تالت شي . . نعمل برنامج جكة صباحية.

و تجلس سعاد . . بعد موجة من التصفيق . . و كلمات الاستحسان.

و خالتي السعدية . . تجيهم من بعيد و تكورك ليهن . . يا نسوان هوووووي . . ألكعن . . ألكعن . . المديدة جهزتها ليكن . . ألكعن قبل كلب فيفيد . . يدخل فيها خشيمو.

و أنا شايل ترتاري . . ما حسيت بي روحي . . عيلا و الشول فاشقاني في صفحتها . . و جارية بي لي مديدة خالتي السعدية . . و بي وراي سامع صوت كرعين نساء حلقة القهوة و هن يسرعن للمديدة . . يسون دل دل . . دل دل . . دل دل.
صورة العضو الرمزية
لحــ غروب ـظة
مشاركات: 585
اشترك في: الأحد 2007.6.3 10:13 am
مكان: أم درمان

رد: قصص للكاتب فيفد ... من حلة البهلة ...

مشاركة بواسطة لحــ غروب ـظة »

دي ما حقت فيفد .........


دا الجنن عبد القادر


أحبو وأحب نوناتو.. نوناتو الفى وجناتو... وهل يا صحابى أبقى لنا (البوش) و(الدكوة) و(الشنو ما بعرف داك!) وجنات (عشان تكون فى نونات)؟؟ إختفت (النونات) بل إختفت (الوجنات ذاتا).. صارت الوجوه (شاحبة) يلتصق (اللحم) فيها (بالعظم) كما (الإستيكر) بزجاج العربة.. حكمت الله حتى (نونات الأطفال) التى كانت تتوسط (وجناتهم) الندية عندما يضحكون إختفت؟؟ وكيف لا تختفى (نونات الصغار) والطرقات ملأى بالألبان (المشعة) و(البسكويتات) منتهية الصلاحية؟؟ وكيف لا تختفى (نونات) الكبار ومعظم الأسر صارت تعيش على (طقة واحده) – وكمان من غالب قوت أهل البلد!! مما جعل (أهيف فيروس) كفيروس (النزلة) مثلاً (يبرم فى شنباتو ويعمل فيها أبوعرام)!! ويحتل (هذه الأجساد الواهنة) لأيام وربما لأسابيع.

لا أدرى لماذا إسترسلت فى موضوع (النونات) ده مع أنو قصدى (عبدالقادر) الذى ورد أسمه (ورد إسمو دى حلوة الأيام دى) فى الأغنية والتى يؤديها (عميد الفن) أحمد المصطفى هذا (العبدالقادر) فقد صوابه كما جاء فى الأغنية و(جنتر) أو (إتلحس) لسبب غير معروف لنا معشر المستمعين. تذكرت قصة (عبد القادر) صاحب الأغنية وأنا أستمع إلى حكاية (عبد قادر) آخر رأيته وهو يحتل أحدى (الصوانى الناصية) وهو يشير بكلتا يديه إلى الذين يمرون من أمامه وهو يصرخ فى تشنج حتى تنتفخ (عروق رقبتو) قائلاً:

- هسع دى تجى كيف؟؟ هسع دى تجى كيف؟؟

بالأمس وجدته وقد (ترجل) عن (الصينية) بعد أن لسعته حرارة الشمس الحارقة ليقطع الشارع ويقف تحت ظل (البقالة) التى قصدتها لشراء (علبة سجائر).. كان يبدو

أن حالته فى ذلك اليوم (أحسن شويه) لذلك فقد خطرت لى فكرة أن أدخل معه فى نقاش علنى أستنطقه وأعرف قصة سؤاله (التاريخى) الذى يردده وهو: (هسع دى تجى كيف؟؟).. طلبت له زجاجة (حاجة باردة) أمسك بها وإتجه إلى جدار (البقالة) حيث الظل وجلس.. (قويت قلبى) وجلست فى مواجهته فى هدوء وترقب سائلاً أياه إسمك منو؟؟

- إنت هسع خلينى من إسمى.. أنا إسمى هين!! لكن بس دى تجى كيف؟ - مواصلاً فى تشنج – دى والله أصلها ما بتجى؟

- هى شنو الما بتجى؟؟

- إنت بس جيبا ليا.

قلت فى نفسى على طريقه الفنان عادل إمام (والله لو أعرف أقول) إلا أننى وبعد أن (راق شويه ونزل منو) عرفت إنها ما بتجى (كلو كلو)!!

قال لى وهو يبدأ الحكاية... أنا إسمى (عبدالقادر) أمى ولدتنى وماتت فى الوضوع قام أبوى ربانى وأصلو ما فكر يتزوج قمت أنا كبرت وإشتغلت وإتعرفت ليا على (أرملة) وقمت إتزوجتها – ياخد ليهو بقة من البارد- أها زوجتى دى عندها (بت) قام أبوى شاف البت وعجبتو وإتزوجا - مواصلاً – أها يا زول بعد سنة كده زوجتى ولدت ليا ولد وكمان (أبوى) برضو (بت زوجتى) جابت ليهو ولد.. – يستعدل فى جلسته متسائلاً- أها ولد (أبوى) ده أخوى – وهو ينتظر إجابتى – مش كده؟؟ فأجبته بالإيجاب – مواصلاً – وولدى أنا ببقى لى أخوى ده (أخو أمو) يعنى (خالو) مش كده؟؟ فأجبته بالإيجاب – مواصلاً – وزوجتى أنا بتبقى لى أخوى ده (حبوبتو) أم أمو مش كده؟؟ فأجبته بالإيجاب – مواصلاً – وأبوى ده ذاتو ببقى لى (ولدى) جدو أبو أبوهو مش كده؟؟ فأجبته بالإيجاب!

هنا نظر إليا وقد إتسعت حدقتا عينية وكأنه فى طريقه لحالة (الجنون) تلك قائلاً: طيب لمن ولدى أنا يا أستاذ يكون (خال أخوى) مش معنى كده إنو أنا (جد) أخوى – وهو يقيف على حيلو- ولمن أكون أنا (جد) أخوى مش معنى كده (يا أستاذ) أنا جد (نفسى).. – ثم رافعا كلتا يديه متسائلاً:

- أها بس دى تجى كيف؟؟ أها بس دى تجى كيف؟؟

- (أجبته وأنا أتجه صوب عربتى): قوم.. قوم يا عبدالقادر (أطلع صينيتك) والله دى ما تجى كلو كلو!!
صورة العضو الرمزية
لحــ غروب ـظة
مشاركات: 585
اشترك في: الأحد 2007.6.3 10:13 am
مكان: أم درمان

رد: قصص للكاتب فيفد ... من حلة البهلة ...

مشاركة بواسطة لحــ غروب ـظة »

عادة بايخة


السودانيين وكتين يركبوا في المواصلات عندهم عادة بايخة خلاس . . هي المداقرة في قرايتة الجرايد . . الواحد كان اشترى ليهو جريدة عشان يستمتع بيها في سفرو . . يكرهوا السفر . . و يكرهوا قراية الجرايد . . و كان لقوا فيك فرصة يشيلوك من كراعك . . و فنننننننن يفنوك بي شباك العربية الراكب فيها و يقلعوا جريدتك . . و يستولوا عليها . . أنا من الناس ما قاعد استمتع بي قراية الجرايد . . و من يومي بكره قراية الجرايد . . لكن وكتين أكون مسافر قاعد اشتري جريدة . . عشان أحندك بيها الركاب في المواصلات . . و استمتع بي منظرهم و هم يتصارعوا في جريدتي . . بتذكر . . . وكتي الكنت مسافر فيهو الخرتوم لي عرس ود عمتي . . اشتريت لي جريدة . . عشان أمارس هوايتي في التمتع بي منظر الركاب لمن يشوفوني شايل جريدة . . شلت الجريدة و مشيت للحافلة . . وقفت في خشم باب الحافلة . . و شنقت نضارتي في راسي . . ختت كراع في باب الحافلة و الكراع التانية في الواطة . . و قعدت اتهبب بي جريدتي . . عشان يعرفوا عندي جريدة . . طبعاً الحندكة فرع من فروع الإرهاب و انتهاك لي حقوق الإنسان . . و أنا بعتبر نفسي من المنتهكين لحقوق الإنسان عن جدارة . . . قمت . . اتلفت لي الركاب . . و لويت ليهم بوزي متعجرفاً . . و قال ليهم بي طرف نخريني . . مقعدي وينو يا بشر . . و أنا لسة قاعد اتهبب بي جريدتي . . ركاب الحافلة وكتين شافوني شايل الجريدة قعدو يجقلبو في بطن الحافلة . . و الكاروشة و النارية إنطلقت فوقهم . . التقول زارقين ليهم ملحة . . كلهم فرحوا بي و دايرين يقروا و يتفرجوا في جريدتي . . ملح . . و أنا طبعاً متكيف و مستمتع بالمنظر الرومانسي دا . . شفتوا ليكم انتهاك لي حقوق الإنسان أكتر من كدي . . شدة ما اتكيفت و انبسطتا قلت انشاء الله الليلة سيد الحافلة دا يودينا السماء . . أنا ما عندي مانع . . الحافلة تجقلب . . و انا واقف في خشم باب الحافلة . . شانق نضارتي في راسي . . و كراع في الحافلة و كراع في الواطة . . و اتهبب بي جريدتي . . بعد ما اتنفخت و اتهببت كويس بي جريدتي . . ختيتا في أباطي . . و نظرت لي ركاب الحافلة استصغاراً . . الركاب قعدوا يجضوا . . و لسة قاعدين يعاينو لي الجريدة و هي في أباطي . . قعدوا يقولوا لي . . يا أبو الشباب أركب . . الحافلة دايرة تدور . . و أنا من يومي حريف عملت روحي ماني سامعهم . . يا أبو الشباب انت الجرايد دي طايرة . . أصلو أبيت أهبب ليهم . . في مراة كبيرة قاعدة في مقعد نص . . حرقها منظر الجريدة في أباطي . . سرخت فيني . . و الله جرايد اليومين ديل شن طعمن . . خسارة ورق و حبر بس . . ركبت نضارتي و عاينت ليها بي استهزاء . . و غمزت ليها في حناني . . غمزة شفوت عشان أحندكها بالجريدة . . و أنا لسة واقف كراع في خشم باب الحافلة و كراع في الواطة . . و كل ساعة زمن أرفع نضارتي أشوف تأثير حركتي البايخة دي على وجوه ركاب الحافلة . . و متكيييييف لي حدي . . واحد من ناس بحر أبيض قاعد ركن . . قعد يبرم في شنبو . . ظنيتو حركاتي دي ما عجبتو . . قال لي سواق الحافلة . . انتو الجنا سيد الجريدة دا مالو ؟؟؟ أضانو تقيلة؟؟؟ . . و الله انا كان نزلت عليهو . . عيلا أنجّمو نجام قبورة . . انا هنا أديتا ضحكة عالية . . عشان قدرت استفز ركاب الحافلة . . قمت ركبت الحافلة . . و فريت جريتي . . و قعدت أمسح بيها في كرسيني بي حركة مسرحية . . الجمعة لسة يتململو . . دايرين فيني فرصة . . عشان يلهفو الجريدة . . الراجل أب شنب القاعد في الركن لسة يبرم في شنبو و يعاين لي و يعضي في شلوفتو . . المرأة الغمزت ليها قبيل . . تعاين لي جريدتي و تمرق راسا بي شباك الحافلة و تتنخم و تبزق . . و أنا متكيف جنس كيف ذي التكنو سلمت علي في جضمي . . رفعت جريدتي فووووق و قعدت اتهبب بيها تاني . . كية ليهم كلهم . . جاري في المقعد داير يصاحبني عشان يلهف مني الجريدة . . قال لي . . أفتح ليك شباك الحافلة يا اللخو؟؟؟ . . قلت ليهو و أنا اتأفف في عجرفة . . لا لا لا خليهو مقفول يا ابن العم أنا بتهبب بي جريدتي الكبيرة دي . . الراجل من الزعل داير يمعّط شعر راسو . . و أنا مبسووووط بي جوة . . قمت فتحت جريدتي على أوسع أبوابها . . سواق الحافلة راسو بقى زي مروحة الطربيزة . . يوزع في النظرات يمين و شمال . . مرة يعاين لي جريدتي بالمراية . . و مرة يعاين في البت القاعدة وراهو . . و مرة يعاين عشان يكشف الشارع . . في بت كانت قاعدة قدامي ختيت ليها طرف جريدتي في تفة راسها . . قعدت تضحك و تقرقر مبسسسسوطة . . ذي التكنو ختيت ليها ضريرة في راسها . . قامت رجعت لي وراء قايلاني بخليها تقراء ليها سطر و الا سطرين . . لكن أنا من يومي فهلوي و بفهمها و هي طايرة . . البت وكتا الترجع لي وراء عشان تقراء . . أنا أسحب جريتي لي وراء . . لحدي ما خليتها مسنقعة في سقف الحافلة . . أتاريها البت دي شينة جنس شنة . . وشها كلو حبوب و حفر . . بت ذي دي شبهة . . مفروض أصلو ما يخلوها تسافر الخرتوم . . المهم أثناء ما أنا فاتح جريدتي و مستمتع بي منظر الركاب الجميل دا . . كان أشوف لي رقبة طولها مترين سيدها ختاها لي فوق كتفي اليمين. . دون أدنى خجل من منظر رقبته الطويلة . . و بينما أنا مستعجب و مندهش من منظر هذه الرقبة الطويلة . . كان أحس لي بي وش مراة قدر طش الغسيل . . مختوت في راسي بي فوق . . قالت لي . . الرسول فوقك ما تقلب الصفحة يا وليدي . . الراجل أب رقبة طويلة زعل من كلام المراة ست الوش الكبير . . قال لي . . خلاس يا أبو الشباب أقلبها و ما تشتغل بي المراة دي . . و المرأة تقول ليهو . . خليني أكمل الفقرة دي بعدين أقلبوها . . قلبا الجن . . الراجل أب شنب القاعد في الركن اضايق من الراجل أب رقبة و المراة أم وش . . قام سرخ فيهم . . يا حاج جر لينا رقبتك من كتف الوليد عشان تدينا معاك فرصة نقرأ . . أب رقبة أشر ليهو بي أصبعو و قال ليهو هُسسسسسسس . . يعني ما تتكلم معاي . . و البت الشينة القدامي . . استفادت من الوضع بتاع الهرجة الحاصلة . . قعدت تقرأ في ضهر الجريدة . . و أب رقبة يقول لي أقلب الصفحة يا جنا . . المراة أم وش تقول ليهو . . الرسول فوقكم كمان خمسة دقايق . . و سواق الحافلة يصرخ فيني . . يا ولد نزل جريدتك خليني أكشف الشارع . . و بعد ساعة زمن يقول لي . . خلاس أرفع الجريدة كان داير . . الكمساري المريخابي سحب الصفحة الرياضية و قعد يضحك . . و الله الهلال دا مسخرة . . غير الفضايح ما قاعد يجيب لينا شيء . . الكرسي الجمب السواق قاعد فيهو واحد مولانا . . اتغاظ من منظر النسون و الرجال الملمومة في جريدة فيفيد . . يشيل و يتنفخ و يفرغ زعلتو بي شباك الحافلة . . وكت غلبو . . اتلفت و سرخ في الركاب . . يا جماعة اتقوا الله . . النسوان بي جمبة و الرجال بي جمبة . . و انت يا بتاع الجريدة خليك في النص . . المراة القاعدة وراي تقول لي راجلها . . يا حاج خلي بالك من جيبك قبل ينشلوك في الكبسيبة دي . . الرجل سيد الرقبة طلع حقتو و كرضم ليهو سفة صعوط قدر حبة الطعمية . . و ختاها في شلوفتو الفوقانية . . و قشة يدو في طرف الجريدة . . و قال لي . . عدم المؤاخذة منديل مافي . . الراجل أبو الشنب القاعد ركن سرخ فوقو . . يا أب رقبة جلبط لينا الجريدة تمباك . . بقينا ما شايفين شيء . . البت الشينة القاعدة قدامي . . طلعت ليها ملقاط حواجب . . . و قطعت صورة محمود عبد عبد العزيز و دستها في شنطتا . . المراة أم وش . . وشها شدة ماهو تقيل وقع لي فوق طرفي و هاك يا نومة . . و ريالتها سالت لي فوق هدومي . . الكمساري بعد ما كمل قرايتة الصفحة الرياضة . . اتمخت بيها . . و جدعها بي شباك الحافلة قال عشان فيها صورة فريق الهلال . . و أنا متكيييييف و مبسووووط . . أعاين لي باقي الجريدة في يدي . . مكتوب بالفونت العريض . . المشروع الحضاري بالسودان.
صورة العضو الرمزية
رغودة
مشاركات: 2733
اشترك في: الخميس 2009.10.8 9:35 pm
مكان: السعودية

رد: قصص للكاتب فيفد ... من حلة البهلة ...

مشاركة بواسطة رغودة »

قصص جميلة .....
صورة العضو الرمزية
معتبر
مشاركات: 11934
اشترك في: الخميس 2009.8.13 8:03 pm
مكان: حته كدة

رد: قصص للكاتب فيفد ... من حلة البهلة ...

مشاركة بواسطة معتبر »

لحظة غروب

فيفيد دا صاحبي
وبجيبو ليكم هنا
صورة العضو الرمزية
لحــ غروب ـظة
مشاركات: 585
اشترك في: الأحد 2007.6.3 10:13 am
مكان: أم درمان

رد: قصص للكاتب فيفد ... من حلة البهلة ...

مشاركة بواسطة لحــ غروب ـظة »

عليك الله يا ابو سن جيبو
Batta
مشاركات: 3299
اشترك في: الاثنين 2011.1.10 10:17 am
مكان: umdurman

رد: قصص للكاتب فيفد ... من حلة البهلة ...

مشاركة بواسطة Batta »

61.gif 61.gif 61.gif

61.gif 61.gif

61.gif

الود فيفيد دا مسخوت.

انا خالتو سعدية بتاعة المديدة.

ابوسن خسمتك بالنبي تجيبو :040:

يجازي محنك والله ضحكت لما مصاريني وجعتني وعيوني

اتورمو من الدموع.
أضف رد جديد

العودة إلى ”سيناريو وأحـداث“