رجل لن انساه ابدا.....!

يحتوي على كل أنواع القصص والأحداث الواقعية الشخصية .

المشرف: بانه

أضف رد جديد
صورة العضو الرمزية
صلاح يحيى سليمان
مشاركات: 3213
اشترك في: الاثنين 2006.10.23 11:47 pm
مكان: المانيا
اتصال:

رجل لن انساه ابدا.....!

مشاركة بواسطة صلاح يحيى سليمان »

الاخوة الكرام....!
طيب نقول بسم الله ...وابدا ليكم منتدى القصص الواقعية...بقصة حدثت لى شخصيا وانا طالب ايام الدراسة
الجامعية فى مدينة بازل السويسرية.
كنت فى يوم مع احد الاخوة من الكاريبيك...من جزر جاميكا بنتجول فى مدينة بازل على نهر الراين ، فى اثناء واحنا ماشين على الشاطئ ..اوقفنا رجل فى حوالى ال70 او ال75 سنة...وسألنا من اى بلد انتم؟؟؟؟؟
لاحظنا فورا ان الرجل وبالرغم من هذه العمر المتاخره.....سكران طينــــــــــــــــــــــة.
الزميل الجاميكى كان راجل جنو ونسه ومناقشات ومشاغلات.....مقدده تمام ( ناس الرقى والراسته)
وقف مع السويسرى وبدوا فى الونسة باللغة الانجليزية ...انا واصلت بهدوء شديد فى المشئ...وبعد خطوات وقفته انتظر زميلى.....بعد حوالى 5 دقائق اصريت عليه ان يحضر نواصل مشوارنا ...ورجوته ان يترك ذلك السكير فى حاله...وان لانضيع وقتنا.....!
زميلى يلح على من البعد ان انتظر قليلا.....ولعته سجارة....وقفت انظر فى نهر الراين...البط...الوز...والقوارب.....وزميلى والعجوز آخر ضحك وضرب على الايادى....!
ناديت على زميلى ...يله ياخى....فك منو....مشيهو.......وزميلى يلح عليه ....دقيقة....العجوز ظريف
يتحدث اللغة الانجليزية مثل اهل بلادى......!
اخيرا تحرك الاثنين من مكانهم صوب اتجاهى....وبمجرد ان وصلوا ليه ...سالنى العجوز باللغة سكران
ومن اين انت؟؟؟؟؟؟؟؟؟؟؟؟؟؟
رديت عليه بلهجه بارده جدا باللغة الانجليزية....من الخرطوم ....السودان.....بتعرف ديل وين؟؟؟؟؟؟؟؟
نظر العجوز السكران اليه...وبابتسامة اعرفها جيدا.....وبلهجة الحبوبات والجدود....اى والله...وقال.....
ها ..هازول ....دحين ان قلتلك ....والله الخرطوم دى ما كنت بصله ...الا فى الاجازات........!!!!
ها زول.....انا لا خليت ..نيالا ....لا الفاشر.....لا مريدى.......وشيتن اقولو ليك.......! انا البنيت استراحات
جبل مرة........!
اتخلعت......اتجمدت.....ما مصدق......لهجت ناس زمان .....كلام الحبوبات.....نهر الراين.....سويسرى
عجوز سكران.....فمى مفتوح......ودخان السجارة بقه قحة.......!
يا جد ...الكلام ده كيف؟؟؟؟؟؟ انت منو؟؟؟؟؟؟اسمك منو؟؟؟؟؟؟اوع تكون سلاطين باشا ....بس ده قالوا كان نمساوى ......كلام كتير ما قدرت اقول ولا كلمة.....والرجل لم يعطينى فرصة....واصل فى حديثه
يرفع يديه مرة.....ويحلف بالطلاق تلاته.....ويبصغ.......( متصورين المشهد معاى...!!!)
والناس يمرونا بجانبنا ...يتوقفون ....وينظرون للعجوز وهو يتحدث معى بالغة لا يعرفوها....وبطريقة
لهم فيها رايئ......وانا وزميلى زنوج .....وسويسرى عجوز سكران.....وزميلى بعد حوالى ساعة على ما اعتقد يلح عليه بان نواصل مشوارنا......وصرت انا الح عليه ان يكمل مشواره لوحده.....!
انا من العجوز ده ما بمشى شبر واحد.
الرجل عاشى فى السودان ...كان يعمل كمهندس مع الانجليز لمدة 31 سنة ....حام فيها السودان شارع
شارع....حسب كلامو.
من الاشياء الجميلة الحكاها ....انو كان بالدس بساعد الحركة الوطنية فى السودان ..وكانت له صلات واتصال بالزعيم اسماعيل الازهرى الذى زاره مرة فى سويسرا ايام كان رئس جمهورية السودان.
كذلك تحدث كثيرا عن الدكتور عبد الحليم محمد وعن فكرة تاسيس اتحاد لكرة القدم السودانية ( دكتور عبد الحليم كان رئس الاتحاد الافريقى لكرة القدم لااكثر من 20 عام وهو من مؤسسسيه.)
الرجل ...سالنى اذا كان لديه غنى سودانى.....اجبت طبعا....وذكرت له مجموعة من الفنانين....طبعا ما عرف واحد فيهم.....بل رد .....لا مش غنى العود والكمنجات ده......مديح ....ان شاء الله ...ياوليدى.....
يكون عندك كاست مديح.....!
حلفت له ان اكتب لاهلى فى السودان واترجاهم ان يرسلوا لى شرائط مديح.
الرجل اعطانى رغم تلفونه ...وترجانى ان اتصل به ...لكى يعرفنى باسرته......!
للاسف الشديد رقم التلفون ...اتمسح مع غسيل الغسالة فى جيب البنطلون.....وكل محاولات استخراج
رقم التلفون من الارقام الممسوحة بعد الغسيل بأت بالفشل...ولم اقابل ذلك الرجل مرة اخرى.
رجل حقيقة لن انساه ابدا........!

مع تحياتى
صورة العضو الرمزية
بت أبوظبي
مشاركات: 983
اشترك في: الجمعة 2006.11.3 3:32 pm
مكان: مدينة الأبراج

رد: رجل لن انساه ابدا.....!

مشاركة بواسطة بت أبوظبي »

سبحان الله ..
القصه فيها اكتر من إيحاء ومعنى
بس ماوصلت ليو
صورة العضو الرمزية
نورا
مشاركات: 117
اشترك في: الأحد 2006.12.24 10:23 am

رد: رجل لن انساه ابدا.....!

مشاركة بواسطة نورا »

يااااااااه حكايات كتيره عندي ..
ومواقف كول
لما اعمل ليها كوليكت اي ويل كم باك
ثانكس
صورة العضو الرمزية
الدكتوره
مشاركات: 799
اشترك في: الثلاثاء 2006.12.26 3:56 pm
مكان: الامارات

رد: رجل لن انساه ابدا.....!

مشاركة بواسطة الدكتوره »

سبحان الله
حقا صدفه غريبه والاغرب انك ماتلقاه تانى
طبعا انا حسيت بيك كيف فرحت لمن وجدت واحد
بيتكلم لغتك وقد يكون حافظ تاريخ بلدك كله
احساس جميل وانت فى الغربه يمر بيك موقف ذى دا
وفعلا صدفه غريبه .
تحياتى لك صلاح


تقبل مرورى
صورة العضو الرمزية
شاربة توت ولابسة بوت
مشاركات: 1202
اشترك في: السبت 2006.11.4 10:50 am
مكان: ابوظبي

رد: رجل لن انساه ابدا.....!

مشاركة بواسطة شاربة توت ولابسة بوت »

المشرف العام كتب: للاسف الشديد رقم التلفون ...اتمسح مع غسيل الغسالة فى جيب البنطلون.....وكل محاولات استخراج
رقم التلفون من الارقام الممسوحة بعد الغسيل بأت بالفشل...ولم اقابل ذلك الرجل مرة اخرى.
رجل حقيقة لن انساه ابدا........!
مع تحياتى
شاء القدر ان يختفي الرجل من حياتك .. بغسيل البنطلون في الغسالة !

ودمتم سالمين ...
Still I Need U
مشاركات: 503
اشترك في: الثلاثاء 2007.6.19 11:19 am
مكان: بلاد الله الواسعه

رد: رجل لن انساه ابدا.....!

مشاركة بواسطة Still I Need U »

مبالغة لكن يا ابو صلاح اقسم بالله اثناء ما انا بقرا في الموضوع ده وحيات الله ماداير الموضوع ده يخلص نهائي ، ياخي عشت معاك جو الصورة الرسمتها بالملي ، والحاجة التانية شعورك وانت بتقابل شخص يتكلم لغتك وغير كده رجل في سن كبيرة وبعدين يبادلك الحديث عن وطنك ويوريك الكان حاصل شنو ايام الإنجليز ، وحفظو لبعض الشخصيات بالاسم ،، يعني حقيقة يمكن انا الوحيد العشتا الاحساس دا بالكامل ،، لانو لمن تكون في بلد غير بلدك ولو كان اى دولة انشاء الله السعودةي القريبة دي ، لمن تلقي ليك زول سوداني بنتابك احساس جميل جدا الناس بتقعد تتكلم وتتعارف على بعض وربما تذيد المعرفة الي ابعد من كده فم بالك في دولة اجنبية تعتبر نسبة العرب فيها قليلة جدا ناهيك عن شخص يعرف اشياء كثر وطنك ، حقيقة احساس جميل وصدفة اجمل ، لكن زعلت بفقدان التلفون ولو اجتهدت مع صاحبك وحاولتو ترجعو المكان الاتقابلتو فيهو لو مكان عام حاولو اسالو الناس القريبين من الحتة دي ، ولو ما عام انشاء الله ربنا يقابلك بيه تاني لأنو ده المعلومات الحتلقاها منو لو كنت في السودان ما كنت حتعرفها صدقني ،، عليك الله حاول فتشو ولو لميت فيهو حاول بقدر الامكان تعرف منو ايام كان في السودان معلومات كتيرة ،،

تقبل تحياتي ،،
صورة العضو الرمزية
صلاح يحيى سليمان
مشاركات: 3213
اشترك في: الاثنين 2006.10.23 11:47 pm
مكان: المانيا
اتصال:

رد: رجل لن انساه ابدا.....!

مشاركة بواسطة صلاح يحيى سليمان »


الاخوة الاعزاء....!
جد والله انا آسف جدا جدا وزعلان شوية منى فى حقكم ، من يوم ما افتتحت منتدى القصص الواقعية وسجلت هذه المشاركة كاول مشاركة فيه ، انشغلت كتير ببعض امور المنتدى ونسيت خالص امر على المشاركة....! اليوم وما شاء الله مررت بالصدفة ودخلت هذا المنتدى وكانت بالنسبة لى مفاجأة كبيرة ان اجد كل هذا الاقبال لمنتدى القصص الواقعية.
اود ان اشكركم جميعا ( معليش جملة واحده ) على المرور وعلى ردودكم.
عاوز ازيد حاجه بسيطه على القصة............!

بعد فترة من الشهور مرت...قابلنى احد الاخوة الفلسطينين واخبرنى بانه قابل هذا الرجل فى الطريق وتحدث معه وساله ان كان يعرفنى وطلب منه ان يخبرنى بانه فى انتظار ان اتصل به تلفونيا.......عندما سألت صديقى
اذا كان اخد منه رقم التلفون ؟؟؟؟ فا خبرنى بالنفى........!!!!
الكلام ده يا استيل كان قبل حوالى 15 سنة........!!!!!

مع تحياتى
بوحه
مشاركات: 12
اشترك في: الخميس 2007.4.12 6:38 pm
مكان: دبي

رد: رجل لن انساه ابدا.....!

مشاركة بواسطة بوحه »

يااااااااه ولا قصص يوسف السباعي ونجيب محفوظ والاهم النهايه كانت غير متوقعه
كيمو
مشاركات: 623
اشترك في: الأحد 2007.4.22 10:09 am
مكان: الســــــــودان

رد: رجل لن انساه ابدا.....!

مشاركة بواسطة كيمو »

سبحان الله يا حاج شوف انت اول كنت ماشي
ولمن عرفتوا داير تتونس ههههههههههههههه
تسلم يا ابـــــــــــــــــــــــــــــــــــــــــــــــــــوي
صورة العضو الرمزية
sarona
مشاركات: 1776
اشترك في: الخميس 2007.2.15 1:14 pm
مكان: المملكة العربية السعودية

رد: رجل لن انساه ابدا.....!

مشاركة بواسطة sarona »

الاخ صلاح ....لك التحية...

اشعر تماما بما شعرت به عندما فقدت رقم الهاتف .....

واشعر بك ايضا عندما علمت ان الرجل برغم حالة السكر.....تذكر مادار بينكما....

حقا هو رجل عشق بلادي.....


.
.
صورة العضو الرمزية
نغم
مشاركات: 452
اشترك في: الأحد 2006.12.3 1:03 pm
مكان: السودان

رد: رجل لن انساه ابدا.....!

مشاركة بواسطة نغم »

سبحان الله قصه غريبة وجميلة مشكور يا مشرفنا.
صورة العضو الرمزية
سالى
مشاركات: 915
اشترك في: الأحد 2007.6.3 6:29 pm
مكان: الا مارات

رد: رجل لن انساه ابدا.....!

مشاركة بواسطة سالى »

حاجه غريبه فعلا سبحان الله صراحه حاجه تشرف انو الواحد كون بعرف زول زى يده


ومشكوووور
صورة العضو الرمزية
عاشقه الحب
مشاركات: 47
اشترك في: السبت 2007.10.27 7:15 pm
مكان: ابو ظبي

رد: رجل لن انساه ابدا.....!

مشاركة بواسطة عاشقه الحب »

سبحان الله سبحان الله
والله ما اجمل الصدف
ويسلموووووووو
أضف رد جديد

العودة إلى ”سيناريو وأحـداث“