ليه العرب بعتبرونا كدا

يهتم هذا القسم بكل المعلومات عن وطننا الحبيب .

المشرف: بانه

صورة العضو الرمزية
سودانية نار
مشاركات: 653
اشترك في: السبت 2007.2.24 1:06 pm
مكان: السودان

ليه العرب بعتبرونا كدا

مشاركة بواسطة سودانية نار »

ليه العرب بيعتبروا السودانيين ادني مرتبة منهم ، ليه دائما بيتخيلوا السوداني محتاج ومقطع ن ليه بيعتبروا السوداني جاهل وما مواكب التكنلوجيا والموضة ، ليه بعتببروا السوداني محدود الافق والموهبة والقدرات .
مرة في الطيارة كان في المقعد الجنبي واحد لبناني بعد شوية بقي يتبادل معي الحديث وسالني جنسك شنو سعودية قلت لا ابدا والله انا سودانية استغرب وسالني سودانية تماما والا فيك دم تاني الرد الاوالله سودانية اصلية وكمان جعلية وشرحت ليهو معني جعلية ودخلنا في تفاصيل عن السودان والقبائل السودانية والمدهش انه شغال في مجال الاعلام فستغربت من جهلوا التام عن السودان وتصوروا عن بلدنا والاسود والنمور والافيال الحايمة في الشوراع والقطاطي السكانين فيها السودانيين ، والادهي انه قال لي انا ما بعرف عن السودان غير جواهر ( مغنية سودانية مقيمة بمصر ) والطيب صالح اتخيلوا ؟؟؟؟فرديت عليه باني البعرفه عن لبنان بيعمل كتاب .
ودي ما اول مرة ياخي المصريين الجنبنة ديل ما بيعرفوا شيء عن السودان واحد مصري قال لي السودانيين بيقلدوا المصرييين شديد حتي في الاكلات المصرية زي الملوخية والبامية ياخي دا بقي اتيتو محاضرة عن السودان من زمن الاهرامات وبعانخي وتهراقا وكيف ان جزء من مصر كانت تحت حكم السودانين .

انا ما بيفرق معاي فهمهم المغلوط فالعارف عزو مستريح لكن بجدمغيوظة من الوهم ديل . وانا قريت موضع مشرفنا العام عن كوننا عرب ولاافارقة وعجبتني كل الردود وبعتبر روحي سودانية عربية افريقية يعني الافارقة مديننا حقنا وبيتعملوا مع السودانيين بطريقة راقية جدا
والعرب العايشين في السودان فاهمين السودانيين صاح وبيتعملوا معهم برضوا بطريقة راقية ، المشكلة في البنلقاهم برة اوالعايشين في بلدهم انا باعتقد المشكلة هي عدم معرفة الناس ديل بينا ومن واجبنا تعريفهم بالسودان دا حق والتزام اخلاقي ووطني اذا الفضائية السودانية مقصرة لازم نحنا السودانيين ما نقصر لازم كل سوداني يكون سفير لبلدو ما ضروري يبالغ بس يكون سوداني علي طبيعتوا عشان النائمين ديل يصحوا ويفهموا يعني شنو سوداني
صورة العضو الرمزية
احمد يس
مشاركات: 2931
اشترك في: الأحد 2006.10.29 9:34 am
مكان: المملكة العربية السعودية

رد: ليه العرب بعتبرونا كدا

مشاركة بواسطة احمد يس »

الاخت سودانية نارين

المشكلة زى ما قلتى هى مشكلة اعلام من الدرجة الاولى ........... ليس الا
وتأكدى اننا كا سودانيين فى كل بلاد الغربة لا نألو جهدا فى التعريف عن السودان فى جلساتنا مع كل من هو غير سودانى ........................ هذا من حيث المعلومة.....
اما عن عاداتنا وتقاليدنا كا سودانيين فنحن نعرفهم بها بطريقة غير مباشرة عن طريق ممارستها كاملة ...
تأكدى انو سوداننا معروف على الاقل فى الدول التى عملنا فيها ...... او حتى قمنا بزيارتها ......
ولكن قد يكون حظك قد اوقعك فى ناس لا تعرف شيئا عن السودان ................ ليس ذنبنا انهم ليس على اطلاع كافى عن وطنهم العربى.................. وتأكدى كذلك ان هناك من السودانيين لا يعرفون شيئا عن بلدان عربية كثيرة ..........................
ان ذلك لا يقلل من شأن السودان ......................فالسودان عريق عراقة التاريخ
صورة العضو الرمزية
ابوبكر
مشاركات: 719
اشترك في: الاثنين 2007.2.12 1:20 pm
مكان: السودان

رد: ليه العرب بعتبرونا كدا

مشاركة بواسطة ابوبكر »

الأخخت الكريمة :
سودانية نار
أحييك واتفق معك في ما زهبتي اليه .
ولنسأل انفسنا هل يجهلنا العرب أو الأفارقة او حتى الأوربين رغبةً منهم أم تقصير منا في توصيل المعرفة والمعلومات عن بلدنا وعن انفسنا .
أختي الكريمة :
أن الشعوب والأمم تفرض وجودها بما تقدمه في مجالات العلم والثقافة والفن والأدب وهي بذلك ترسم تاريخها بنفسها وتفرض وجودها وثقافتها ونحن نمتلك هذا العنصر الموروث فينا ثقافةً وعلماً وفناً راقيياً وماضٍ تليد وتاريخ أبيض ولكننا لا نملك الوعاء الراقي الذي يمكننا أن نقدمه فيه للعالم كافة .
لذلك أتمنى أن تكون رسالة كل سوداني على وجه الأرض هي ابراز وجه السودان المشرق الجميل لكل العالم وعلى اجهزتنا الأعلامية أن تقوم بهذا الدور في المناطق التي لا تشهد وجوداً شعبياً سودانياً ، وليؤدي كل منا رسالته على أكمل وجه ، ولنر ماذا سيكون ؟
صورة العضو الرمزية
Halimeek
مشاركات: 165
اشترك في: الاثنين 2006.10.23 2:31 am
مكان: الخـــرطـــوم - بـــري
اتصال:

رد: ليه العرب بعتبرونا كدا

مشاركة بواسطة Halimeek »

شوفي يانار السبب كله في وسائل الإعلام البتوصل السودان بصورة مشوهة للعالم وبس
صورة العضو الرمزية
سودانية نار
مشاركات: 653
اشترك في: السبت 2007.2.24 1:06 pm
مكان: السودان

رد: ليه العرب بعتبرونا كدا

مشاركة بواسطة سودانية نار »

الخلييجين وخاصة الكوايتة والسعوديين بيتعملوا معانا بفوقية شديدة ودا من واقع تجارب عدة ،

شاكرة لك من مر علي الموضوع
صورة العضو الرمزية
ابوبكر
مشاركات: 719
اشترك في: الاثنين 2007.2.12 1:20 pm
مكان: السودان

رد: ليه العرب بعتبرونا كدا

مشاركة بواسطة ابوبكر »

نحن لا ننكر أن التعالي والسطحية موجودة في تصرفات العرب معنا وهو امر طبيعي حتى الخواجات يعتبرون كل ما هو غير اوربي عبارة عن حثالة او نوع من البشر خلقوا لخدمتهم وهو مفهوم متأصل متجزر فيهم ولازالوا يعانون من عقدة الجنس الري الى الأن حتى بين بعضهم البعض . لذلك فالتعامل بين الشعوب على تلك الشاكلة امر لا يثير الهتمام ووارد فكل يعتز بنسبه وجنسه ويعتبره الأفضل ، لكن طريقة التعامل يجب أن تحكمها قوانين واداب التعامل البشري الراقي والحضاري .
سبق وذكرت أن الشعوب تفرض حضورها بما تقدمه من علوم وفن وادب وحضارة تاثر بها على غيرها ونحن لا نزال نتغنى بماضينا التليد فلو امسكنا بدفة العلم الذي كنا رواد فيه لما جهلنا احد ولما تطاول علينا باغيٍ.
صورة العضو الرمزية
roza
مشاركات: 19
اشترك في: الاثنين 2007.2.12 10:44 am

رد: ليه العرب بعتبرونا كدا

مشاركة بواسطة roza »

كان تقولي ليهو ( القاهرة تكتب و بيروت تطبع و الخرطوم تقرأ ) و دي مقولة شهيرة و كان كدة أعلامو ده مانافع أبدى ل
أنو الاعلامي لازم يكون ملم بكل التفاصيل الصغيرة و الكبيرة و المهمة و المهمشة و الا ما بكون اعلامي ناجح.. طبعا كلامو حرقني شديد ماعلينا و الله يا سودانية نار انا ما بتفق معاك في نظرة العرب للسودانيين لأنو العرب أو الناس الفاهمين عارفين السودان شنو (مساحة و طبيعة و ثروة اقتصادية و زراعية و حيوانية ) و فاهمين الناس السودانيين شنو ثقافة و أخلاقا و أدبا و تعاملا و طيبة قلب .... و ازا في نظرة جات جديدة أسع للسودانيين فدة نتيجة نمازج سودانية سيئة أو مشوهة أخدها العرب كواجهة للسودان و عمموها و طبع ده فيهو ظلم كتير للسودان مجملا و تفصيلا ...و اما بكون راجع لأنو الببدو بي رايون عن السودان أصلا ناس ما عارفين السودان شنو و نظرتم دايما سطحية ... و شكرا ليك على اللفتة المهمة دي ...
صورة العضو الرمزية
ابوبكر
مشاركات: 719
اشترك في: الاثنين 2007.2.12 1:20 pm
مكان: السودان

رد: ليه العرب بعتبرونا كدا

مشاركة بواسطة ابوبكر »

يا روزا ارجع واقول رغم ان الموضوع بتاع سودانية نار ده حار جداً وحساس
ارجو انو الموضوع ده ما ياخذ حيز كثير من حياتنا أو من روحنا المعنوية
حتى أننا نستطيع أن نصحح مفاهيم العالم كله عننا
العصبية والتعامل بحدة في المواضيع دي ما بولد الا المزيد من الفهم المغلوط
والعقل اننا نصحح الخطاء بالعقل وبالراي الحكيم
صورة العضو الرمزية
احمد يس
مشاركات: 2931
اشترك في: الأحد 2006.10.29 9:34 am
مكان: المملكة العربية السعودية

رد: ليه العرب بعتبرونا كدا

مشاركة بواسطة احمد يس »

الاخت سودانية نار

موضوع تعالى الخليجين وخاصة السعوديين والكويتين ...... والنظرة الفوقية..........
والله انا ما تعاملت مع الكويتيين ولكن لى مدة طويلة جدا فى السعودية ......... نعم بعضهم عندهم التعالى والفوقية وفى فترة زمنية سابقة ......... وقت الطفرة ........
لكن...............لا يجب علينا ان نعمم صفة ما لشعب ما...........
عموما الجنسية السودانية هنا فى المملكة اجبرت الجميع على احترامها من خلال احترامنا لانفسنا ومن خلال عدم اعطاء الاخرين فرصة للتعالى او النظرة الفوقية.........
لى اصدقاء سعوديين منذ سنوات طويلة ........ اناس افاضل ..... يعرفون قيمة الانسان السودانى
ولكن اصابع اليد ما زى بعضها
صورة العضو الرمزية
سودانية نار
مشاركات: 653
اشترك في: السبت 2007.2.24 1:06 pm
مكان: السودان

رد: ليه العرب بعتبرونا كدا

مشاركة بواسطة سودانية نار »

انا بتفق معاك يا ابوبكر في انو الموضوع دا ما مفروض ياثر علي روحنا المعنوية واعتقد دا حاصل مافي سوداني بياثر فيهو كلام زي دا بس دي ملاحظة لحقيقة ثبتت لدي بعد تعاملي مع عدة اجناس خلتني افكر يالله السبب فينا ولا فيهم وانا ذكرت انو السبب عن جهل سببو نحنا او هم وبعدين برضو راجع لتصرفات بعض السودانيين ؟
اما الخواجات فانا ابدا ما لاحظت من واقع تجربتي واحد فيهم اتعامل معي بتعالي .
اول ايام لي بالعمل يا اخ ابوبكر لاحظت طريقة المعاملة دي واترسخت مع الايام ومجال عملي بيضم زملاء اجانب وعرب من مختلف الجنسيات الاجنبي من اول يوم بيحاول اتعلم كل شئ منك عن بلدك وكمان بيحاول يجرب وبشوف بعينه و بحترمك عمري ما سمعت واحد فيهم سخر من البلد كل شكواهم اللهم من
السخانة اما العرب وخاصة الكوايتة فحدث ولاحرج البلد وسخانة ويالله الاسواق فاضية مافي شء يتاكل السودانيين وايد صعبين يعني يعني وعلي هذا الوزن من التعليقات
مرة حاولت اضبط اعصابي ورديت عليه بانو اذا كانت بلدنا وسخانة وبلدكم نظيفة احتمال لانو الكويت تقريبا في حجم المبني مقر عملنا فبالتلي سهل جدا نظفتها وانو غريبة ما يلقي حاجة ياكلها لانو الارز وين ما يقبل بيلاقه لانو بيزرع في بلدنا ما بنستوردوا من الخارج واذا كلن السودانيين صعبيين احتمال لاننا ناس بقدر ما بسيطين بقدر ما جاديين بنقيم الحاجة القدام عيونا بسهولة وعليه بنتعامل معها فاعتزر لي ومن اليوم داك يقينا شبه اخوة بس القصة بلسه بتتكرر وانا والله لو حكيت ليك هاتعرف ليه انا حساسة اتجاه المسالة دي ليه بالشكل دا
القصد من الحكاية ابوبكر اني دائما بلقي روحي في موقف دفاع ليه ؟ اتجاهل صعب دمي بتحرق
صورة العضو الرمزية
سودانية نار
مشاركات: 653
اشترك في: السبت 2007.2.24 1:06 pm
مكان: السودان

رد: ليه العرب بعتبرونا كدا

مشاركة بواسطة سودانية نار »

كلامك صحيح استاذنا احمد يس ما من المنطق او العدل تعميم صفة ما لشعب او اشخاص
شاكرة مرورك الكريم والحكيم
صورة العضو الرمزية
سودانية نار
مشاركات: 653
اشترك في: السبت 2007.2.24 1:06 pm
مكان: السودان

رد: ليه العرب بعتبرونا كدا

مشاركة بواسطة سودانية نار »

الاخوة الاعضاء الاعزاء روزا حليم تسلموا وشاكرة ردودكم علي الموضوع ربنا يديكم العافية
صورة العضو الرمزية
مهند عبد الرحمن
مشاركات: 377
اشترك في: الثلاثاء 2006.12.12 1:36 pm
مكان: السعودية جدة

رد: ليه العرب بعتبرونا كدا

مشاركة بواسطة مهند عبد الرحمن »

الا لا يجهلنا احد علينا فنجهل فوق جهل الجاهلينا
SNGAM
مشاركات: 101
اشترك في: الجمعة 2007.2.2 9:44 am
مكان: الرياض

رد: ليه العرب بعتبرونا كدا

مشاركة بواسطة SNGAM »

الاخ احمد

السلام عليكم ورحمة الله
كلامك جميل وطبعا التعميم لا يجوز ففى كل الشعوب هناك افراد يسيئون لاوطانهم بحكم تصرفات
فردية لان تنم عن ثقافة الشعوب نعم هناك تصرفات من البعض وحتى عندنا فى السودان نجد امثال ذلك
وهذا لايمثل ثقافة الشعب السودانى وانا طبعا مقيم فى المملكة وهذة التصرفات التى ذكرت تتم على من لايحترم نفسة وكما اسلفت السودانيون الذين قدمو فى الاوائل هم النخبة وفرضوا انفسهم واحتلرامه
على الشعب السعودى وكل الشعوب وانا اعتقد ان السودانيون محترمين فى عيون اغلب الاجناس فى الخليج وباقى دول العالم

وشكرا لكم



اخوكم SNGAM :Sudan:
صورة العضو الرمزية
ابوبكر
مشاركات: 719
اشترك في: الاثنين 2007.2.12 1:20 pm
مكان: السودان

رد: ليه العرب بعتبرونا كدا

مشاركة بواسطة ابوبكر »

سودانية نار احيي فيك روحك وعزتك السودانية الصيلة لكين يا اختي لو تعاملت مع مثل هذه المواضيع والأمور بحدة فأنتي لن تستفيدي شيئاً .
نحنا كمان بنحب بلدنا وما عندنا شك ابداً في انو كل السودانيين بحبوا بلدم ومستعدين نخوض النار في سبيلها ونفديها بارواحنا وبدمائنا .
لكين هوني علي نفسك أصله النسان الفيه نقص وبيتعاطى مثل هذه المواضيع انسان ناقص ما بجوز انو تحرقي اعصابك عشانو وتزكري انك غالية علينا يا بنت النيل؟
صورة العضو الرمزية
سودانية نار
مشاركات: 653
اشترك في: السبت 2007.2.24 1:06 pm
مكان: السودان

رد: ليه العرب بعتبرونا كدا

مشاركة بواسطة سودانية نار »

تسلم جميعا وتسلم يا ابوبكر ياسوداني اصيل
ام بترى
مشاركات: 20
اشترك في: السبت 2007.2.24 9:55 pm
مكان: الرياض / السعودية

رد: ليه العرب بعتبرونا كدا

مشاركة بواسطة ام بترى »

الاخت سودانيه نار

انتى سودانيه جمره عشان نحن حقيقة جمره بنحرق الواطئها
شوفى يا عزيزتى المسأله موش مابعرفونا بس هم اصلا ما حيقدروا يعرفونا عشان نحن تركيبة معقده

يصعب فهما وعشان نحن فى الثريا ما حيقدروا يطولوها وعشان نحن مافى زينا

كنت بتناقش مع واحد سعودى متعلم وقلت نحن رسول عندنا رساله للعالم كله

وسبب بنتناقش انا موهندس سودانى فى ليه هم بيخلوا مواد كيمائيه مثل الاسيد وحامض الكلور السام ومهاه مدخلات صناعيه فى الصرف الصحى وهو بسع الكلام ده اى السعودى

بقول ليه انت ماعارف ان المياه الجوفية ممكن تتلوس بمثل هذه المواد

بقول الى انا ماعملتها بس البنغالى قال السعودى قال ليه دفقه هنا

انا ليه انت ماعارف كده غلط

المهندس بس هم عايزين كده

ياخى نحن روسل عشان نعلم الامم دى

يدخل السعودى ويش بتقولوا يا زولات

قلت ليه خليك ما حاتفهم المقصود شنه

انتو بتحبو الكلام والسرسره يلسودانين

يا سودانيه نار

هل يمكن ان نتساوى نحن وديل نحن فوق فوق فوق ويصعب عليهم ان يصلونا

معليش التس العزرفى التعبير الكديس لمن مايصل للحليب بيقول رئحته عفنه

ولك تقديرى
صورة العضو الرمزية
أود
مشاركات: 151
اشترك في: الاثنين 2007.1.8 1:47 pm
مكان: الوطن الكبير

رد: ليه العرب بعتبرونا كدا

مشاركة بواسطة أود »

المشكله الاساسيه ليس فى جهل العرب او الافارقة فى معرفة السودان اوالسودانيين انما المشكله فينا نحن.
فالغالبيه العظمى منا ينظراليهم بانهم افضل منا وننظر لانفسنا بنظره دونيه فالنظره هذه لانعرفها طيبه منا ام من الطريقه التى تربيناعليها.
فنحن نشانا فى مجتمع عنده حتى الان عقدة الخواجه وياريت لو وقفت على الخواجه وبس فنحن اذا اتانا اصغر مسئول عربى او افريقى فتقوم الدنيا وتقعد ويبدا الاستقبال من اعلى المستويات, بينما هم وانتو طبعا عارفين لو ذهب اكبر مسئول منا فكيف يكون الاستقبال.
فاقرب مثال للاستقبالات الخرافيه الاستقبال الذى تم به استقبال الممثله ليلى علوى فى دارفور . :072:

ياسودانيه يانار العارف عزو مستريح زى ماقلتى , كويس الغياظك شنو :027: ,

صورة العضو الرمزية
ابوبكر
مشاركات: 719
اشترك في: الاثنين 2007.2.12 1:20 pm
مكان: السودان

رد: ليه العرب بعتبرونا كدا

مشاركة بواسطة ابوبكر »

لو تكرمت يا أود انا عندي تعليقبسيط علي كلامك الجميل ده
لكين لو ممكن اضيف حاجة بسيطة نحنا لمن نستقبل زول بحفاوة ده ما عقدة نقص عندنا أنما ده كرم زايد اتوارثناهو من جدودنا وبحب اضيف في الحتة دي ابيات بسيطة من رائعة الشاعر السوداني الرائع الراحل اسماعيل حسن ابن السودان الأصيل :-

[align=center]بلادي أنا بلاد ناس مواريث في أول شئ
كتاب الله وسيف مسنون حداه درع
وبرضو احب اضيف البيت البيقول :-
بلادي سهول بلادي حقول
حتى الطير يجيها جعان
من اطراف تقيها شبع[/align][/size]

فنحن ناس الكرم والأصالة وحسن استقبال الضيف قيم موروثة ومتأصلة فينا من الجذور لو تركناها أو اتخلعنا عنها نكون تركنا جزء من هويتنا .
صورة العضو الرمزية
أود
مشاركات: 151
اشترك في: الاثنين 2007.1.8 1:47 pm
مكان: الوطن الكبير

رد: ليه العرب بعتبرونا كدا

مشاركة بواسطة أود »

بكرى اخوى اولا مشكور على المداخله .

ثانيا كوننا نحتفى بالضيف دا جميل لكن نحتفى بى ناس يستاهلو ولا رايك شنو.
أضف رد جديد

العودة إلى ”منتدى السودان العام“