الحافلة..الهاوية باللفة..

يحتوي على كل أنواع القصص والأحداث الواقعية الشخصية .

المشرف: بانه

ودعازة
مشاركات: 763
اشترك في: الأربعاء 2009.6.17 3:31 pm
مكان: الرياض

الحافلة..الهاوية باللفة..

مشاركة بواسطة ودعازة »

الحلقة الاولى..

عجت محطة الحافلات بالزحام..تكدس الناس امام الابواب المغلقة ..السائق باحدى البرندات يشرب عصير الليمون البارد والكمسارى بجواره..الكمسارى ذو الملامح الافروعربية لولا فطس انفه وسمارة سحنته لحسبته من اهل الجزيرة العربية..قدمه التفت بشريط طبى توشح وتعبق بالتربة ولكن لونها اسود!!من اين اتى اللون الاسود والتراب اقرب الى اللون البنى؟
السائق : تعرف ياتفتيحة نعمل مقص من الشارع فى الرجعة للبيت..
الكمسارى: مالسة الوقت بدرى شنو يامعلم الرجعة بدرى بدرى ؟
السائق: شنو نسيت حنة الجيلى؟ خلينا النتفكفك بدرى ونشوف الحاصل شنو ببيت العرس..
ومؤكد المقص كان سببه ارتياد خط غير مصرح للحافلة شق دربه..هاشم شاب بالثلاثينات لم يحظى باكمال تعليمه واكتفى بالمتوسطة ..عمل باعمال عدة ولسنوات عدة حتى انه لم يوفق بالاغتراب..اقنع اخيه المغترب بشراء حافلة تضمن له عمل وتنمى رأس مال لاخيه..
الكمسارى: يامعلم مانحمل لاخر المحطة ونقلب من هناك مقصات..
السائق: الغلة عملت كم؟
الكمسارى: يادوب طرادة (يقصد خمسة وعشرون جنيه)..
يقتنع السائق بكلام تفتيحة ويتجهان الى الحافلة..
عوض: ياولد انتا شنو شنات الطبع العليك قبل شوية مافطرتا فى البيت؟ اى حاجة تشوفا الا تعوزا؟استنى نرجع البيت بتشرب هناك ..عطشك دا انا ماعندى ليو قروش..والعصاير الشايفا دى كلها امراض وبلاوى..
الابن: ابوى ان شاءالله موية زرقا ساكت ..والله عطشان شديد..
عوض: اب ميى ماقلنا ليك اصطبر النصل البيت..دا شنو المابيسمع الكلام دا!!
لآمة موظفى الدولة امست اهم سمات موظف الضرائب..لايتحمل ان تكسر له كلمة او اعادة الطلب اكثر من مرة..رجل تقليدى بلاطموح ولا اهداف سوى ان يمضى الشهر مستورا بلاكسور ولا فروقات وهذا مالم يحدث معه منذ زواجه..ولربما صعوبة طبعه هى نتاج حياة التقشف التى جانبته طويلا..
يتبع....
صورة العضو الرمزية
بسمة الحياة
مشاركات: 2006
اشترك في: الخميس 2009.3.26 10:15 pm
مكان: K.$.A
اتصال:

رد: الحافلة..الهاوية باللفة..

مشاركة بواسطة بسمة الحياة »

اها كمل
منتظرنك
ودعازة
مشاركات: 763
اشترك في: الأربعاء 2009.6.17 3:31 pm
مكان: الرياض

رد: الحافلة..الهاوية باللفة..

مشاركة بواسطة ودعازة »

عوافى اختى بسمة الحياة..
الاجزاء التالية بتلاقيها قريبا ..
شكرا لمتابعتك ومرورك على الراس،،،
ودعازة
مشاركات: 763
اشترك في: الأربعاء 2009.6.17 3:31 pm
مكان: الرياض

رد: الحافلة..الهاوية باللفة..

مشاركة بواسطة ودعازة »

الحلقة الثانية..

فاطمة وسعاد حائرات بالموقف..فاطمة شابة قوية الشخصية ..اختلطت ثقافتها مابين القديم التقليدى المفيد والمستور ومابين المعاصرة المعتدلة..جريئة ولا تخاف قوالب المجتمع العتيقة..ترتدى عادة البنطال الجينز الواسع مع بلوزة فيها العصرية والحشمة..باحثة دوما عن شيئا ما يملأ فراغات حياتها ويعبئ شغفها بالمعرفة ايا كانت..لعل دراستها الجامعية بالخارج هى مااكسبتها تعدد الرؤا للقضية الواحدة..متمردة على كل شئ ليس له مرجعية دينية او علمية او حتى فلسفية متزنة..
عكسها تماما سعاد المسجونة خلف حوائط العيب والناس تقول شنو..قانعة حتى الثمالة بأن المجتمع الذكورى هو سيد الموقف..خانعة لكل اوامر كبيرى السن كانوا رجالا او نساء..كل احلامها بالحياة عريس يسترها ويستتها ويوقف سعيها لطلب الرزق التى اضطرت اليه لحالة اسرتها المادية لدون مستوى الصفر..
سعاد: يافاطمة احنا اتاخرنا كتير ومافى اى سواق راضى يطلع..
فاطمة: طيب نعمل شنو غير نستنى الفرج؟ يااخينا الحافلة دى مش حقت حى المستقبل..
عوض: ماشايفة مكتوب عليها السوق المستقبل وبالعكس؟..
سعاد: طيب السواق بتاعا وينو؟
فاطمة(بصوت واطى):شوفى الراجل ومساختو ..سم التقول شاحدنو..سعاد اصبرى انتى كمان شوية..
عوض: بيكون بيشرب ليو فى شاى ..يشرب السم الهارى ولا تلاقيو قاطع ديزل مشا يجيبو..سواقين شنو ديل المابعرفو فى عرباتم فى ديزل ولا مافى!!
ميرغنى:(بصوت متصنع) ماتقلقى يااخت بتجى حافلة هسع وبنمشى كلنا..
الابن: ابو العطش ياابوى كتلنى ..يابا عليك الله اشترى ليى بارد..
عوض:ياولد قلت ليك استنى النصل البيت..انا عشان مناهداتك دى مابدورك تطلع معاى..كلو من امك ..هسع فى زول بيطلع جارى معاو شافع فى السخانة دى؟ نسوان آخر زمن!!
يحضر هاشم وتفتيحة بهذه الاثناء الى الحافلة ويتدافع الجميع امام الباب..
تفتيحة: الحافلة ماماشية المستقبل يااخونا روقو ماتكسرو لينا الباب ساكت..
يهدأ الجمع خارج الحافلة محبطا ويبتعد ماعدا قلة منهم..تفتيحة يعلم بأن الركاب ليس لهم خيار آخر سوى حافلته لذا لجأ الى حيلته حفاظا على باب الحافلة من مدافعات الركاب..وعندما احس بقلة الركاب خارج الحافلة فتح الباب بخفة مناديا بصوت خافض الركاب بالصعود الى الحافلة بهدوء ومن غير مدافرات وزحام..ركبت فاطمة وسعاد اولا..ثم عوض وابنه..فميرغنى فعباس فمنى حتى امتلأت الحافلة بهدوء..ونجحت حيلة تفتيحة للركوب بطريقة حافظ بها على سلامة الباب..
عوض: انت شنو ياولد بتلعب بينا كدا؟ مرة ماماشين ومرة ماشين!!
تفتيحة: ياعمكك انتا ماشايف الناس مزحومة كيف؟ عايزم يكسرو الباب ولاشنو؟ والله حق الفردة كلها ماتصلحو لو باظ..وهسع انتا ماركبتا فى شنو مالك؟
عباس: والله انتا تنفع بوليس حركة كنتا اقلاها لقيت ليك طريقة فى الصوانى الواقفةومزحومة دى
: ياتفتيحة اقفل الباب دا خلينا النتحرك.. ادى الزول دا(الكومسنجى) حق الفردة خلينا النتخارج..
الكومسنجى: شنو كل مرة ناقصة ؟؟والله غير خمساية مابشيل..
تفتيحة: هيى احنا طايرين لما نرجع بنكملا..شنو يازول مافى صبر؟
الكومسنجى: من هنا مابتطلعو لو ماتميتا..تفتيحة على نفسك..عايز تدقسنى زى كل مرة وتتحلف ليى اداتك ومااديتك..تماها يازول مخارجة الليلة مافى..
تفتيحة: يااخوانا حاسبونا خلونا النتحلا من الزول دا..
يجمع تفتيحة الاجرة من الركاب ويناول الكومسنجى باقى المبلغ لتتحرك الحافلة فى طريقها الى المستقبل..
تفتيحة: الشباب الورا ادونا باقى الاجرة..
طالب: اديناك يازول ماشايف اللبس دا احنا طلبة..
تفتيحة: خمسة طلبة بس وانتو ستة..ادونا حق السادس..
طالب اخر: يافردة باركا..يعنى منو فينا هسع السادس..ماركبنا كلنا سوا..
تفتيحة:ياتدفعو حق السادس ياتنزلو كلكم..حركو بالله ادونا حقنا..
ملتحى: ياولد باركا واعتبرا صدقة..
تفتيحة: ياعم الحاج الصدقة دى بالجامع ..كل يوم فارقا معانا والمعلم مزرزرنا..اطلعو بالباقى ياشباب..يامعلم وقف الناس دى ماعايزا تدفع..
عوض: يوقف كيف ؟ ناقصين عطلا؟
تفتيحة : ايا بنوقف ..شنو نطلع من غير مايدفعو؟ خلاص تم ليهم انتا..
عوض: اتم انا ليه؟ ذنبى شنو؟
تفتيحة : طيب بالله ماتدخل وخلينا نشوف شغلنا..
هاشم: كم واحد مادفع؟
تفتيحة: واحد ماتم ..راكبين ستة طلبة..
هاشم: خلاص انساو..بتتعوض فى الطريق..
وتتحرك الحافلة مرة اخرى اسرع بعد ان هدأت سرعتها عندما طلب تفتيحة التوقف من سائقها..
يتبع........[
ودعازة
مشاركات: 763
اشترك في: الأربعاء 2009.6.17 3:31 pm
مكان: الرياض

رد: الحافلة..الهاوية باللفة..

مشاركة بواسطة ودعازة »

الحلقة الثالثة..

سعاد: ووب عليا الليلة اهلى بيضبحونى الليلة..
فاطمة: يابت يضبحوك ليه؟ انتى عويرة !!المواصلات ماكل يوم يازحمة يا مافى..شنو الجديد يعنى؟
سعاد: بس الليلة اتاخرنا زيادة ابوى بيقتلنى..ماحيصدقونى شنو ماقلت ليهم..
ملتحى: اساسا شنو البيطلعكم من بيوتكم؟ حريم آخر زمن!!
فاطمة: البيطلعنا هو زاتو البيطلعكم..بنشتغل وبنفتح بيوت..
ملتحى: ومنذ متى المرأة بتشتغل ؟ الم تسمعى وقرن فى بيوتكن؟
فاطمة: سمعنا بيها بس منو البأكل اهلنا؟ زمن الرسول صلى الله عليه وسلم بيت مال الممؤمنين كان مابيحوج العندهم ظروف بناتم يشتغلو ..هسع منو الجايب خبر زول؟
منى: دا شنو التخلف دا؟ البنات يقعدو فى البيوت وبس؟
ملتحى: تخلف ايتها السافرة..لاتتحدثى معى فأنا لا اخاطب من هم بشاكلتك..
منى: سافرة مالى؟متحشمة ومغطية راسى..كعب العاملين متدينين ومابيعرفو يتكلمو ولا ينصحو باللتى هى احسن..
ميرغنى: شنو ياشيخنا بالهداوة المفاهمة ماكدا..
ملتحى: الم تسمع كلام هذه المتبرجة تبرج الجاهلية..
عوض: يابت الناس هايى ماتلمى لسانك عليك وتتحشمى..
منى: انتا الدخلك شنو؟ خليك فى حالك ولدك ريقو نشف وماجايب ليو خبر ..جاى تتشطر على انا!!
ملتحى: الم اقل لك انها سافرة وناشز؟
عباس: ياشيخنا البت لا سافرة ولاشى اهى قدامك محتشمة..وبعدين ناشز كيف ؟النشوز دا مابكون بين الراجل وزوجتو ولا كيف؟
ملتحى: من كان يؤمن بالله واليوم الآخر فليقل خيرا او ليصمت..وسكوتك يااخونا بيكون احسن..
عباس: انتا لاعاجبك راجل يتكلم ولا مرة ..شنو حكايتك ؟ومنو العينك وصى على الناس؟
ملتحى: الم تسمع :من رأى منكم منكرا فليغيره بيده اوبلسانه او بقلبه وذلك اضعف الايمان؟
فاطمة: ياشيخنا التغير باليد لولى الامر وباللسان بيكون بالمناصحة باللتى هى احسن..الم تسمع قول الله تعالى: لو كنت فظا غليظ القلب لانفضوا من حولك..وبالقلب عندما يخشى الانسان اذية المنصوح ان كان اقوى منه ومتجبر..
ملتحى: والله عال الحريم بيورونا الدين!!
المسطول: فى شنو ياابو الشيوخ؟ من الصباح نازل سافرة ناشزة ..هدى اللعب ياشيخنا..كل شاة معلقة من عرقوبا ولا كيف ياحاج؟ البدخل الجنة لنفسو والبمشى النار لنفسو..بالله ماتقلب لينا الحافلة ندوة دينية..
ملتحى:اصمت ياعدو الله ..سكران وتتحدث عن الدين..لعنة الله عليك وعلى امثالك..
هاشم: يااخوانا بالله استهدو بالله لما تنزلو اعملو الدايرنو بس جوا الحافلة دى بالله اهدو لينا شوية خلونا النعرف نسوق..
يستمر الهرج والمرج بين الركاب ..الكل يريد ان يتكلم والكل لا يسمع ماذا يقول الآخر..وفجأة تهتز الحافلة اهتزازات متتالية ثم تتوقف..
يتبع......
ودعازة
مشاركات: 763
اشترك في: الأربعاء 2009.6.17 3:31 pm
مكان: الرياض

رد: الحافلة..الهاوية باللفة..

مشاركة بواسطة ودعازة »

الحلقة الرابعة..

المسطول شخص غريب ليس لأنه مسطول فحسب..فهو شاب فى الثلاثينات من عمره..ملامحه تحمل جمال وحسن ..شاب تقاسيمه تعجب معظم الفتيات الحالمات بعريس بملامح وسيمة..لكن سواد الهالات حول عينيه أذهبت الكثير من جمال عينيه التى كانتا متسعتين يوما ما..كان يدرس بإحدى جامعات اوربا حتى المرحلة ماقبل النهائية ..ليموت والده ومعيله الاوحد فيعود مضطرا الى البلاد ..وظل مابين الجنة والنار..لم يستطع ان يعود فيكمل دراسته..او يعود ليرجع ملفه الدراسى ليكمل حتى ببلده..حاول اصدقائه استخراج اوراقه من جامعته وارسالها له..لكن طلبت منهم ادارة الجامعة باقى اقساط الدراسة المتراكمة والغير مدفوعة..
فإن فشل هو بتسديدها لما كان هناك فمن تراه يقدر عندما غاب وارتحل؟..
غرابته تكمن فى وعيه الكبير وثقافته الثرة التى لم تقنع عقله الجريح بالابتعاد عن الادمان ولو صباحا ..يفيق من نومه ليبتدر يومه بلفافة البنقو على الريق..
يتكسب قوت يومه من حرفة اعمال الجبس التى برع فيها لاشتغاله بها ايام دراسته بالغربة..يمكنه كسب الكثير والكثير من المال من عمله..
ولكن تكونت فيه قناعة مافائدة المال الزائد وكل حوائجى مقضية..
جل همه اكفاء بطنه وامه وكيفه الجديد..كان وحيد ليس له اخ او اخت ..
ولم تفد نصائح امه المكلومة بغياب الزوج ان تعيده الى الرشد والى الطريق القويم..
سعاد: اها الحافلة دى كمان مالا؟ احنا ناقصين عطلة؟
ميرغنى: خير يااخونا (محدثا السائق) مالا الحافلة؟
هاشم: شكلا جرت هوا..بالله اخوانا القاعدين فوق المكنة انزلو لينا تحت عشان نفتح الغطا نشوف الحاصل شنو..ياتفتيحة تعال افتح الغطا وشوف الجاز كان موسخ ..
ينزل الركاب الجالسين فوق غطاء الماكينة ومن حولها..يفتح تفتيحة غطاء الماكينة ويدخل يده ثم يسحب احد التوصيلات البلاستيكية الخاصة بسريان الديزل من خزان الوقود الوقود الى الماكينة..
تفتيحة: يامعلم العربية جرت هوا..الوصلة الجاية من التنك مافيها جاز..
هاشم: ليه احنا امبارح مامعبيين التنك؟
تفتيحة: نسيت يامعلم الجركانة السحبناها لاب دراع الصباح؟
هاشم: طيب وقت انتا متذكر مالك ماكلمتنى نعبى جاز قبيل؟
تفتيحة: يعنى يامعلم انا زاتى مابنسا ..وانا قايل الجاز بيوصلنا آخر المحطة وهناك نعبى..
هاشم: سيب الكلام والنقة الكتيرة شيل الباقة من ورا وامشى بسرعة عبيها من المحطة اديييك ليها مابعيدة..
تفتيحة: يامعلم كيف امشى المشوار دا كلو وكمان شايل الباقة؟ رجلى ماشايفا معوقة؟
هاشم: اها شنو يعنى ..امشى انا ولا كيف الحكاية؟
سعاد (قلقة جدا): يااخوانا عليكم الله حلو المشكلة بسرعة انا اتاخرتا شديد ..
عباس: والحل يااخوانا كيف؟ العمل شنو ؟
عوض: يااخى معقول ماعارفين عربيتكم فيها جاز ولا مافيها!!ناقصين عطلة احنا..ماكفاية وقفتا ساعة لغاية ماجيتو فى الموقف؟
هاشم: بالله يااخوانا ماناقصين تقطيم..العندو كلام مفيد يقولو والماعندو يلزم السكات ويلم خشمو عليو..
عوض: يعنى معطلننا وكمان عايزننا ننطم؟
عباس: ياود العم دا ماوقتو خلينا هسع فى بلوتنا..
المسطول: بلوة شنو يااخوانا؟ دى هسع بلوة؟ مايمشى واحد بس يتناول الجاز ويرجع..
فاطمة: طيب ماتمشى انتا..وتحل لينا المشكلة..
ملتحى: يمشى كيف هو قادر يصلب طولو؟يمشى الشاب ده (يقصد ميرغنى)..
ميرغنى: امشى انا ليه؟ انتا مالك محنن؟ ولا العندو دقن بس يتشطر فى الافتا؟
ملتحى: اتأدب يازول واتحشم..
ميرغنى: انا مؤدب قبل مااشوف خلقتك دى..ولا قايلنى زى البنات المستقوى عليهم؟
عباس: استهدو يااخوانا الحل مابيجى بالمشاكل..خلونا النلاقى حل بهدوء..
سعاد (بدأت تبكى): رجال شنو من الصباح بتتشاكلو ومافى واحد عايز يجيب الجاز..هسع لو واحد فيكم عندو بت ولا مرة هنا كنتو بتخلوهم كدا؟ ..وتجتهش بالبكاء..
فاطمة: هسع انتى البكا حقك دا بيحل المشكلة؟ يلاكى ننزل نشوف حافلة تانية على الطريق..
يتبع..
ودعازة
مشاركات: 763
اشترك في: الأربعاء 2009.6.17 3:31 pm
مكان: الرياض

رد: الحافلة..الهاوية باللفة..

مشاركة بواسطة ودعازة »

الحلقة الخامسة..
سعاد: هو انتى ماشفتى المحطة ولا حافلة ماراضية تطلع ..يعنى هنا حنلاقى مواصلة؟
فاطمة: طيب وقت عارفة كدا ليه بتبكى!!استنى ياشيخة هسع بتتحل المشكلة وربك بيهونا..
الابن : يابا يابا ..امشى انا اجيب الجاز؟
عوض: دا الفضل!!انتى قادر تشيل نفسك لما تشيل باقة جاز مليانة؟
الابن: طيب يابا ماتمشى تجيبا انتا..
عوض: ياود بطل لماضتك دى..امشى كيف واخليك براك؟
المسطول: هو فى زول نصيح اليومين ديل بيسرق ليو شافع!!هى الناس ناقصا شفع؟
عوض: والله دا الفضل !! المساطيل بيورونا الواعين والنصاح بيعملو شنو..ماتمشى انتا..
المسطول: ماسمعت فتوة شيخنا؟ ليس على المسطول حرج طالما هو ماقادر يشيل نفسو..وبعدين منو القال ليك انا مستعجل؟
عباس: يااخوانا وقت مافى زول عايز يجيب الجاز انزلاكم نلز الحافلة لغاية المحطة..
فاطمة: اسهل الناس كلها تلز ولا واحد يمشى يجيب الجاز؟!!!
عباس: اسهل واحد يمشى يجيب الجاز..بس منو البيمشى..انا راجل كبير وعندى غضروف مابقدر على الشيل..
ميرغنى: يمشى شيخنا واهو يكسب فينا الاجر..
ملتحى: لاتخاطبنى ياملعون..
ميرغنى: دا بس انتا الفالح فيو ..ياسافرة ..يامتبرجة..ياملعون..اعمل ليك شى مفيد مرة فى حياتك..
ملتحى: اتنصحنى انت ياقليل الحياء والدين؟
منى: يااخوى انساك منو دا بس بيعرف يتكلم فصحى ويسب فى الناس..
ملتحى: اصمتى والا سوف ترين مالايعجبك..
منى: شنو حتعمل ليى؟ حتضربنى؟ ابقى راجل ورينى شنو حتعمل..
ميرغنى: بالله قوم اضربا..عشان الليلة تعرف الله حق..
عباس: يااخوانا احنا فى شنو وانتو فى شنو..باركوها وخلونا فى الاحنا فيو..
هاشم: تفتيحة قوم شيل الجالون الصغير طيب وقت مابتقدر تشيل الباقة..
تفتيحة: يامعلم ماقلنا ليك معوقين..والمشوار شوفو كيفن طويل..
هاشم: سيب الدلع..هدييك المحطة بالعين بتتشاف ..مشوار شنو البعيد..دى هسع لو عضة كنت جريت ..
تفتيحة: انا بشيل الجالون وباستنى عربية معدية..
ينزل تفتيحة من الحافلة ويتجه لموخرة المركبة فيتناول الجالون الصغير ثم ينتظر على حافة الطريق..
منتظرا مرور عربة او حافلة يتقدم بها الى محطة الوقود..
يتبع..
روايات الحب
مشاركات: 22
اشترك في: الأحد 2009.7.12 7:56 am
مكان: السعوديةـ أبها

رد: الحافلة..الهاوية باللفة..

مشاركة بواسطة روايات الحب »

اها كمل انا معاك للنهايه ان شاء الله
ودعازة
مشاركات: 763
اشترك في: الأربعاء 2009.6.17 3:31 pm
مكان: الرياض

رد: الحافلة..الهاوية باللفة..

مشاركة بواسطة ودعازة »

روايات الحب كتب:اها كمل انا معاك للنهايه ان شاء الله
اختى روايات الحب سلام..
شكرا لمتابعتك وان شاء الله القصة تعجبك..
سعيد بمتابعتك ويلا نواصل..
ودعازة
مشاركات: 763
اشترك في: الأربعاء 2009.6.17 3:31 pm
مكان: الرياض

رد: الحافلة..الهاوية باللفة..

مشاركة بواسطة ودعازة »

الحلقة السادسة..

ميرغنى شاب بالعشرينات..اتم دراسته الجامعية ويعمل بشركة خاصة بالعلاقات العامة..
يعشق المرأة وكثيرا مايتودد إليها محاولا استدراج انتباهتها إليه..مهندم دائما حتى أن مشط الشعر ومنديل مسح اتربة الحذاء لايفارقا جيبه الخالى منهما وبعض ماتبقى من راتبه المتواضع..
متكلف بحديثه ..يميل الى التنميق وقعيد الكلام ..ففهمه يقنعه بأن المرأة تستمال بالمظهر واللباقة..
متوسط الثقافة بل يصنف مع فئة أشباه المثقفين..جل اهتماماته بمظهره الخارجى اعاقته كثيرا من النهل
من المواضيع الاخرى التى قد تكون سبب ازدياد معلوماته ..
الابن: يابا طيب ماننزل نشوف مواصلة تانية..
عوض: مستعجل مالك؟ عندك شنو لاحقو ؟ ولا هى بس زيادة مصاريف..
الابن: ابوى العطش قتلنى ..عليك الله خلينا النمشى البيت بسرعة..
هاشم: هاك ياشاطر اشرب من الموية دى ..بس هى شوية حارة..
عوض: اها اشرب وفكنى من عطشك ونقتك الكتيرة..ولد ماعندو صبر..
فاطمة: ياعم الاطفال مازى الكبار بيقدرو يستحملو العطش..الله يخليهو ليك بكرة بفيدك وبتتعكز عليو..
عوض: اولاد الزمن ديل بس اليشيلو نفسن..احنا بنقدر على روحنا..بكرة يتخرج ومايكون همو غير العرس..
فاطمة: العرس ماسنة الحياة..والزول مابينسى اهلو وافضالم حتى لو عرس..ماكفاية بس تلقاهم جنبك
وقت الناس الحوليك ينشغلو عنك؟ ياهم الاولاد البيسندو فى الكبر..
عباس: والله يابتى كلامك صاح..انا هسع معاشى مابيغطى مصاريفى انا وام العيال.
.والاولاد الله يطرح فيهم البركة بيتخاتتو وبيرسلو لينا مصاريف ساترانا وكافيانا شر السؤال..
عوض: ديل اولاد الحلال..والله فى اولاد بعد مايضوقو الماهية تانى خبر اهلم مابيطرو..
المسطول: سلف ودين ياابو الحجاج ..البتعملو كريت بتلقى فى جلدا..
عوض: قصدك شنو يالواعى؟
المسطول: ازرع هسع بتحصد بكرة..
عوض: هو وينو حق البذور ولا حق السقاية..يااخوانا الفى البر عوااام..
عباس: يااخوى كلام الشباب صاح ولو كانو لسه بالبر..بس اهندا عندك انا..انا راجل بسيط قريت اولادى
مسارقة..مرة فى ومرة ماف..وبتمشى الامور بس الاخلاق اكان عدمت لابنفع علام ولا مال..
سعاد: يااخوانا الوقفة ماطالت شدييد..عليكم الله شوفو لينا حل قوام..ساعتين واحنا واقفين..
ميرغنى: يااخت ماتقلقى اهو الكمسارى واقف فى الطريق وبيجيب الجاز..كان قلقانة شديد اتفضلى انا
بوصلك لغاية بيتكم بتكسى..
ملتحى: لما انت بمثل هذه المروءة والشهامة لماذا لاتذهب وتحضر الجاز؟!!!
ميرغنى: مستنيك انتا التمشى تجيبو ..مش برضو الدين بيقول اتعاونو ؟ماتتعاون بدل تقطيمك الكتير دا..
منى : حليل زمن المروءة..عاد النسكت سااى..
فاطمة: يابنات يلا ننزل ونتشارك تكسى لغاية آخر المحطة..
منى: والله فكرة ..انا عن نفسى موافقة..يلا..
علوية: هو احنا كان عندنا حق التكاسى من اول ماكنا ركبناهن..
فاطمة: التكسى الطلب حقو بيكون على واحد ..لكن هسى لو اربعة مننا ركبن تكسى بيكون نصيب الواحدة
الربع واقل بكتير من لما يركب واحد..
ميرغنى: انا معاكم وبركب قدام واربعة ورا..وبكدا بينقسم حق التكسى على خمسة بدل اربعة..قلتو شنو..
سعاد: برى مابيركب معانا راجل ..واحد من اهلى ولا زول من ناس الحلة لو شافنى راكبة تكسى مع راجل
يقول عليا شنو؟
فاطمة: هو انتى راكبة براك معاو مافى اربعة راكبات معاك..
منى: عاد مابسألك هو شنو دا؟ انتى لسة فى شافونا وشوفناهم؟ هسع انتى ماراكبة مع اكتر من راجل
وينا المشكلة..مادى زى دى..
سعاد: لا مازى بعض..دى مواصلة عامة..والتكسى مواصلة خاصة..
فاطمة: هسع لو لقيتى حافلة كلها رجال وانتى الوحيدة فيهم مابتركبى؟
سعاد: البركبنى شنو واتحشر وسط الرجال..
ملتحى: مادا القلناهو قبيل ..لزومو شنو مرقتكم اصلا..
منى: مخير الله الشيخ بيعرف يتكلم زينا!!وينا الفصحى؟
ملتحى: انتى يابت غير المقارعة وقلة الحياء ماعندك شغلا؟
فاطمة: عليك الله ماتردى..خلاص ماحتفيدك المناقشة اصلا..خلينا فى موضوع التكسى..
عوض: العايز ينزل يركب تكسى ادا الباب مفتوح الينزل..ماناقصين نقنقة..
ميرغنى: شنو ياعمنا الناس بتتناقش تلاقى ليها حل..وبعدين دى مركبة عامة..
المسطول: مركبة عامة..يعنى الناس من حقها تعمل اى حاجة فيها؟ طيب يااخى انا عايز هدووووء..مامن
حقى؟
ميرغنى: انزل استنا تحت بتلاقى الهدوووء ..
المسطول: ماتنزلو انتو الماعايزين هدووء..وحركة العربات واصواتا بتكمل ليكم الناقصة تحت..
عباس: ياناس ماتستهدو بالله وتباركوها..يااخونا السواق: الولد دا واقف فوق النص ساعة ومافى زول وقف ليو..شوف لينا حل يااخى..
هاشم: الحل العندى تاخدو قروشكم وتتيسرو تلاقو ليكم طريقة تصلو بيها..العايز ينزل ياخد قروشو من الكمسارى..ياهو دا حلى يااخوانا..
يقترب من الحافلة شاب يريد الركوب..
تفتيحة: وين ماشى ياالاخو؟
الشاب: اركب ..ماماشين المستقبل؟
تفتيحة: ماشين..بس العربية قاطعة جاز..
الشاب: مامشكلة بستنى لما يجى الجاز..
تفتيحة: قلنا ليك قاطعة جاز وتانى حاجة مافى كرسى فاضى..
الشاب: مامشكلة يافردة بستنى وبنقيف سدارى..
ويدخل الشاب الى الحافلة...
يتبع......
ودعازة
مشاركات: 763
اشترك في: الأربعاء 2009.6.17 3:31 pm
مكان: الرياض

رد: الحافلة..الهاوية باللفة..

مشاركة بواسطة ودعازة »

الحلقة السابعة...
تفتيحة صبى لا يعرف له اهل..وكلما سؤل عن اصله كان يجيب انا من بلد بعيد خلاص ..جيت العاصمة مع اخوى الكبير وانا صغير عشان نزور ناس عمى ..قمت ضيعتا اخوى قبل نصل بيت ناس عمى..ماعرفت ارجع بلدنا ولاعرفت الاقى عمى ودردقتا هنا وامورى ماشية..هل قصته حقيقية؟..لا احد يدرى..هل هرب من بلدته لا احد يدرى..كل مايدرى عنه انه يسكن مع هاشم واسرته منذ ان كان طفلا..
جلبه والد هاشم بيوم ما وعامله كإبنه..وعندما جاءت الحافلة اتخذه هاشم معه كمسارى..
لذا لايستطيع هاشم الا يعامله الا كأخيه الصغير وإن كان يقسو عليه أحيانا..
الشاب: سلام يااخوانا..(ويرد عليه من سمعه ومن لم يسمعه رد على رد من سمع )..
عوض : دا كمان شنو؟يعنى ماشايف الحافلة متسجمة وواقفة!!
الابن : يمكن يكون صاحب المساعد..
عوض: وقتين انتا بتعرف الناس ديل (يقصد المساعد والسائق) ماتجيب ليهم الجاز..
الشاب: ليى لا؟ بس انا لو جبتو بتدونى كم؟
ميرغنى: نديك كم!! انتا حتجيب الجاز لينا ولا للسواق؟
الشاب: ولاتزعل ياابو الشباب ..امشى جيبو انتا واحنا بنتخاتت وبنديك حق المشوار..
ميرغنى: انتا مانصيح؟ انا مستنى منك ولا من غيرك يرسلنى بقروش؟!!
الشاب: انا بقى مستنى..قلتو شنو؟
عوض : لو فيها دفع اليدفع ليك السواق..
هاشم : شنو يااخوانا البنقولو نعيدو؟ انا قلت ليكم الحل العندى وماعندى غيرو..تدفعو ماتدفعو مخيرين..
المسطول: مع انو انى مامستعجل انا موافق ادفع بس بشرط بدفع بعد ماتجيب الجاز..
الشاب: يااخى معقول ولو جبتو ومادفعتو اقبل انا وين؟
سعاد: يااخوانا سيبو الكلام وخلونا ندفع ليو يجيب البنزين..
ملتحى: حسبى الله ونعم الوكيل حتى المروءة بقت بقروش!!
الشاب: ياشيخنا هديك الطرمبة ورينا مروءتك ام بلاش..
عوض : انا غايتو عن نفسى مادافع..ماتحسبونى معاكم..
علوية: وانا آخر قروش معاى ركبتا بيها الحافلة..
عباس: اها ياولدنا والمشوار دا بيكلفنا كم؟
الشاب: انتو كلكم نظر..شوفو حق المشية والرجعة والعتالة بيستاهلو كم ومابنختلف..
ميرغنى: جنيه كويس؟
الشاب: بالله الجنيه دا قدر تعب المشية؟ بنقول المعقووول..
المسطول: انا عن نفسى مابدفع الا لما اشوف الجاز جا..جنيه اتنين تلاتا مافارق معاى..
الشاب: الدفع كاش ياابو الشباب..ولو ماعايزين انتو مامجبورين..
سعاد : طيب قول عايز كم وخلصنا..
الشاب: جنيه للمشية وجنيه رجعة واتنين جنيه عتالة..يعنى الحسبة اربع جنيه..
ملتحى: هذا ابتزاز..انا مابدفع..
الشاب: يااخونا فى الحافلة..واحد اتنين..اااااااا..فى خمسة وعشرين راكب تلاتا مابيدفعو يعنى اتنين وعشرين..قول عشرين..يعنى كل واحد حيدفع عشرين قرش بس..وينو الغلا هسع؟
فاطمة: والبيضمن لينا انك ترجع تانى شنو؟
المسطول: جاوب ياابوالشباب شنو ضماناتك لينا؟
الشاب: ماعندى ضمانات ليكم..عندكم حل تانى؟اقول ليكم انسو الموضوع خلاص..
سعاد: لا لا استنى..شنو يااخوانا عاجباكم قطعتنا كدا؟ ادفعو خلونا النخلص ..هاك دى عشرينى..
ميرغنى: ودى عشرينى..
عباس : ودى عشرينى..
الشاب: اها والباقين شن الراى؟


يتبع....
صورة العضو الرمزية
gladness
مشاركات: 44
اشترك في: الجمعة 2008.10.10 11:21 am
مكان: قلوب الناس

رد: الحافلة..الهاوية باللفة..

مشاركة بواسطة gladness »

في انتظارك :)
ودعازة
مشاركات: 763
اشترك في: الأربعاء 2009.6.17 3:31 pm
مكان: الرياض

رد: الحافلة..الهاوية باللفة..

مشاركة بواسطة ودعازة »

gladness كتب:في انتظارك :)
سلام ايتها السعادة والانبساطة وعوافى عليك..
يلا نكمل..
ودعازة
مشاركات: 763
اشترك في: الأربعاء 2009.6.17 3:31 pm
مكان: الرياض

رد: الحافلة..الهاوية باللفة..

مشاركة بواسطة ودعازة »

الحلقة الثامنة..

المسطول: اها معاك ستين قرش..اعتبرن عربون ولما ترجع تاخد باقى حسابك..
الشاب: قلنا كاش كاش ياابو الشباب..
فاطمة: شنو انتا ماضامنا؟
الشاب: الحرص ابو الفطنة ولا كيف يااخت؟
فاطمة: طيب مانحنا زاتنا لازم نحرص منك..وعلى الاقل عندك فى زمتك شى ولا شنو؟
الشاب: طيب النستنى لما تكملو المبلغ وتبقو كلكم على راى واحد..هاكم قروشكم يااخوانا لما تتفقو كلمونى..
عباس: طيب واحد فينا يلم القروش ونديك نصها ياولدنا ولما ترجع نديك الباقى..
سعاد: يااخوانا الوقت راح وانا اتاخرت ..حرام عليكم حرام عليكم (ثم تبكى)..
المسطول: نعمل استفتا ونشوف الناس رأيها شنو..منو المستعد يدفع هسع ومنو بعد ماترجع..كيف معاك؟
الشاب: يااخوانا شنو القصة دا مشوار لطرمبة ولا تقرير مصير؟
فاطمة: منو يااخوانا الحيدفع اول شى؟ يرفع لينا يدو..
المسطول: واحد..اتنين تلاتا اااااااااا خمسطاشر..شنويااخوانا بس خمسطاشر؟ يعنى ياابو الشباب 3 جنيه..
الشاب: الاتفاق على 4 ما 3 جنيه..
فاطمة : دا الفى قلتا شنو؟
الشاب: بس ماتقولو ليى نص هسع ونص لما ارجع..
المسطول: والله اصرارك تاخد القروش بعد مااتأكدتا الناس حتدفع فيو كلام..
فاطمة: انتا كنتا خايف الناس ماحتدفع وهسع اهو اتأكدتا انهم حيدفعو خايف من شنو..
عباس: انا ياولدى بلم ليك القروش امشى وتعال..وانا راجل كبير ماحأبيع ضميرى عشان 3 جنيه..
الشاب: يااخوانا الاتفاق كان 4 جنيه وكان الواحد بيمشى ويجى ياخدم لكن 3 جنيه الا كاش قلتو شنو؟
عوض: نقنقة فى الفاضى هو فارق معاكم شنو تدفعو هسع ولا بعدين؟
ميرغنى: يعنى مادافع وكمان بتتحشر..بالله نقطنا بسكاتك واركن جنبا..
عوض: دا ياهو العلموكم ليو فى المدارس؟ تلامضو الاكبر منكم؟ والله اولاد آخر زمن..
ملتحى: جيل لا يعلم به الا الله..
ميرغنى: يااخى حاجة غريبة الاتنين مادافعين وقاعدين يفتو!!
عباس: يااخوانا الزمن بيمشى وانحنا لينا تلاتا ساعات ومافى حل..
سعاد: ايا عليكم الله ادفعو وخلصونا..خلصونى حرام عليكم..
هاشم: ياتفتيحة شنو الحكاية ماتتصرف يااخ..
تفتيحة: يعنى انبرش فوق الزلط عشان العربات تقيف؟ مافى زول راضى يقيف.. انا اعمل شنو؟
هاشم: بس انتا افلح فى ملامطتى يا فقرى..اقول ليك نطلع البيت ماكان اخير من الشلهتا دى يافقرى..
تفتيحة: يعنى هو البيت القريب ؟ مابرضو كنا قطعنا جاز وبشارعنا طرمبة ماف..
هاشم: الله يقطع راسك الكبير دا..دومة على الفاضى..شنو البنسيك الجاز ؟ يجزوك صلعا..
تفتيحة: يامعلم ماتقفلا معانا ..انا نسيت زيك ..مابشر انحنا؟
هاشم: خلاص قطم يافقرى الله ينعلك..غير النقة ماعندك فايدة..
علوية: يااخوى هسع الوليد دا عمل ليك شنو؟
هاشم: يااخت خليكى فى حالك..كفاية الهموم العندنا..
عوض: هو جيل الزمن دا ماهو كلو كدا..اديهم اللماضة والفصاحة وبس..

يتبع...
ودعازة
مشاركات: 763
اشترك في: الأربعاء 2009.6.17 3:31 pm
مكان: الرياض

رد: الحافلة..الهاوية باللفة..

مشاركة بواسطة ودعازة »

الحلقة التاسعة.. والأخيرة..

الملتحى هو محجوب رجل تبدو عليه القوة الجسدية..لذا لا يتوانى فى إظهار غضبه علانية مرتكزا على قوته الجسمانية التى يهابها كل من بحوله من أبناء منطقته..
منذ أن كان صغيرا كانت به ملامح الشراسة ..
كان الأطفال يتجنبون اللعب معه..كان كثير التساؤلات عما يحدث حوله وبمنزلهم..الأب توفى حتى أنه لا يذكر ملامحه..أمه كانت إمرأة ذات حسن وجمال..كان بيتهم لايخلو من الأقرباء ولكن معظمهم من الرجال..لا يأتون فى جماعات ولكن فرادا..لم يرى أمه تمتهن أى مهنة وبرغمه كانوا ميسورى الحال..
تساؤلاته لا تجرؤ الخروج عن حيز تفكيره..كان يخاف الإجابات..
سعاد : أها يااخونا قلتا شنو الحاج دا يمسك القروش ولما تجيب البنزين يديك ليهم..
الشاب: الجاز أنا مابجيبو الا اقبض القروش ومخيرين انتو ضيعو فى زمنكم..
ميرغنى: يااخوانا نعمل تصويت على الدفع..منو الموافق نديو القروش طوالى ومنو المصر بعد مايجيب الجاز..
عباس: الموافق على الدفع هسع يرفع لينا يدو..
ميرغنى: واحد اتنين مممممممممممممم ستة سبعة..سبعة من خمسطاشر يعنى الاغلبية غير موافقة..
الشاب: مايمكن فى ناس مافارق معاها..
ميرغنى: يعنى شنو؟ مابرضو الاغلبية ماموافقة..
الشاب: طيب المافارقا معاهم ديل ليه تحسبن مع الماموافقين..ماتحسب الما موافقين بس..
ميرغنى: طيب يااخوانا الماموافق يرفع يدو...واحد ممممممممم سبعة..شنو الحكاية تعادل ولا كيف؟
الشاب: وانتا مع منو؟ ماحسبتا نفسك لا مع ديل ولا مع ديل..
ميرغنى: انا انا ..
سعاد: عليك الله وافق وريحنا خلينا النخلص..
ميرغنى: انا مع الموافقين..
الشاب : يعنى تمانية موافقين وسبعة غير موافقين..اطلعو بالقروش..
عباس: يلا يااخوانا ادونا مشاركاتكم وخلونا الننهى القصة دى..
الشاب: هسع فى داعى للعطلة دى من الصباح ماكنتو تدفعو كنا هسع رجعنا..
عباس: ياولدى هاك القروش وعليك الله استعجل المشية.. والرجعة
ينزل الشاب من الحافلة مخفيا نشوة فوزه على الركاب المعترضين على الدفع مقدما..يحمل الباقة ثم يتجه للسائق..
الشاب: اطلع يامعلم بحق الجاز..
هاشم: تفتيحة اديو حق اربعة جوالين..
تفتيحة: والله بايضا ليك فى قفص ..امسك هاك..
الشاب: ياناس الحافلة مافى زول عايز من دكان الطرمبة حاجة؟ ماتخافو ماعليو رسوم المشوار ..فوق البيعا..
عوض: يااخى انتا مالك زول بتحب النقة..ماتمشى تجيب الجاز وتنتهى..
الشاب: ياعمنا انا شايفك مع اللبدو ومادفعو مالك عامل لينا ارضى؟
عباس: ياولدنا بارك الله فيك مادايرين حاجة ..بس انتا شهل وجيب لينا الجاز ومشكور..
يتحرك الشاب موازيا للطريق متباعدا عن الحافلة بإتجاه محطة الوقود التى لاتبعد سوى مئات الخطوات..
الابن: ابوى هسع الزول دا لو مارجع حيعملو شنو؟
عوض: ياشافع ماتقفل خشمك الكريه دا..ناقصين شوم احنا..
المسطول: مابنعمل حاجة ياشاطر..قروش وطارت والله كريم..
فاطمة: الله ماقال يستغفلكم الناس..التوكل مطلوب لكن العقل مطلوب..
ملتحى: لاتفتى فى الدين بلا دليل..
فاطمة : من الصباح ياشيخنا بتفتى وماسمعنا ليك دليل..حلال عليك حرام علينا؟
المسطول: وبعدين ياخى وينا الفتوة هسع؟
ملتحى: لا تخاطبنى ايها المخمور..
الابن: ابوى شوف الزول هداك ركب ركشة..
عوض: طيب كويس كدا برجع بسرعة..
تفتيحة: عليك الله شوف الحظ دا..انا ليا ساعة مامرت جنبى ركشة فاضية والبمر كلو مابيقيف..ارزاق..
هاشم: مااصلك كج من يومك..كان ماكج ماكان مشينا بيت العرس واتذكرنا نكب الجاز..
تفتيحة: يامعلم تانى بتلومنى؟ اها انا تانى خشمى دا بلمو على نشوف بكرة الدبارا كيف..
هاشم: شنو قلتا ؟ الدبارة!! والله دا الفضل ياحكيم زمانك..الدبارة التفرتق راسك الكبير دا..
الابن: ابوى ابوى الحق الركشة عدت الطرمبة..
عوض: يمكن مافى جاز فى الطرمبة ماشى للطرمبة البعدا..
تفتيحة: دى الطرمبة الوحيدة الفيها جاز وبنزين فى الخط دا..
المسطول: كيف عرف مافى جاز والركشة حتى ماوقفت فى الطرمبة؟
سعاد: لا بيكون ماشى طرمبة تانية..
علوية: كدا استنو وبتعرفو شنو الحكاية..
فاطمة : نستنى شنو؟ هو لسا فيها استنا؟
ميرغنى: بيرجع يااخوانا يمكن الركشة كان فيها زبون نازل قدام وبيرجعو للمحطة تانى..
عباس: وارد برضو..
الابن: ابوى الزول دا دقس الناس وماراجع تانى..
عوض: ماقلت ليك سد خشمك يابوم..
هاشم: يانحس انتا اديتو الباقة الكبيرة ليه؟ماكنتا تديهو الجالون..عارف دى حقها كم؟
تفتيحة: يامعلم الزول دا ماجاك بالشباك وانتا القلت ليا اديو حق اربعة جوالين.. انا غرضى شنو هسع؟
ملتحى: تفاءلوا خيرا تجدوه..
المسطول: هو لسا باقى فيها صبر؟ وينو اخونا الجاب فرق التصويت؟ نصوت تانى منو اليمشى يجيب
الجاز تانى..واحد يضيع الجميع!!!
ينزل بعض من ركاب الحافلة إلى الطريق لعلهم يجدوا وسيلة أخرى تأخذهم إلى المستقبل..
البعض الآخر مكث ينتظر ..فهل يعود الشاب؟
وهل يصل هذا الركب إلى المستقبل ولو متأخراً؟؟
وتظل الحافلة على حافة الطريق..أو على حافة الهاوية تنتظر المغيث..

النهـــــــــــــــــــــــــــــــــــــــــاية..
صورة العضو الرمزية
عاشقة توتيل
مشاركات: 1566
اشترك في: الاثنين 2008.7.28 9:05 pm
مكان: كسلا

رد: الحافلة..الهاوية باللفة..

مشاركة بواسطة عاشقة توتيل »

[align=center]تواجد أول،،،
وقراءه من أول السطر،،،
،،
سأكون هنا،،،[/align][/u][/size]
صورة العضو الرمزية
عاشقة توتيل
مشاركات: 1566
اشترك في: الاثنين 2008.7.28 9:05 pm
مكان: كسلا

رد: الحافلة..الهاوية باللفة..

مشاركة بواسطة عاشقة توتيل »

[align=center]عارف ياودعازه،،،
الموقف والحافلات بتسمع فيها حكاوي عجيبه جداً،،،
وفيها ناس من كتر الهم العليهم تلقى الواحد بتكلم براو،،،
يضرب ويقسم وبرضو ماتلفق معاو وفي الاخر يقوم يشتم نفسو،،!!!
،،،،
عينة السواق وتفتيحه موجودين في كل مكان،،
والمقص بالنسبه ليهم زيادة دخل،،،
والله لاوراك كان لم فيهم بتاع حركه،،
،،،،
سعاد وفاطمه،،،زي كل بنات البلد،،
وبرغم المفارقه الجميله في الطبع والافكار،،
الا انهم بياخدو الحيز الكبير في الحكايه،،،
اما الطلبه ،،، (الله في)،،
البسمعو كتير،،،نفتح ليكم فصل!!!
كرهتونا المواصلات!!!
،،،،،
المسطول،،،
عارف نحن عندنا حسن المجنون،،،
برغم انو بيقولو عليو مجنون،،
لكن تلقى شفع الحي كلهم منتظرينو العصر تحت شجرة النيمه،،،
بيجي شايل ليهم الحلاوه والبسكويت ويقعد يلعب معاهم بلي،،،
ولما يغيب يوم تلقى الناس كلها تسال منو،،،
ومافي زول عارف حكايتو شنو،،
لاعارفين جا من وين،،ولااهلو وين،،ولا الخلاو يبقى كده شنو،،،
اتعودنا عليو،،،على ضحكتو،،وصوتو،،
،،،،،،،
أما الملتحى ده فحكايتو عندنا غريبه،،،
بعد ماركب الحافله،،،حلل وحرم،،شرع وافتي،،
قال داير يمشي ناس المحليه،،
عشان يصدقو موقف خاص بالنساء،،!!!!
لانهم ضايقو الرجال في كل شيء وكرهوهم العيشه!!!!
شفت جنس المحن دي،،،
،،،،،
والبحصل في الحافلات كتير،،
اللستك بنشر،،،الجاز قطع،،،
وعندنا في الخريف يقول ليك المكنه دخلتا مويه!!!
،،،،،،
بجد أنت ابدعت،،،
الحافله الهاويه باللفه،،حكاية حياة،،،
من عمق تفاصيلنا اليوميه،،
وصياغتك ليها جميله جداً،،،
واصل،،وأتحفنا بالمزيد،،،
،،،،،،
عارفه بريتك كتير،،،
لكن قصتك بتجبر الواحد يطلع كل الجواه،،،
،،،،،
يديك العافيه،،،وتسلم من كل شر،،،
،،[/align][/u][/size]
ودعازة
مشاركات: 763
اشترك في: الأربعاء 2009.6.17 3:31 pm
مكان: الرياض

رد: الحافلة..الهاوية باللفة..

مشاركة بواسطة ودعازة »

عاشقة توتيل كتب:[align=center]عارف ياودعازه،،،
الموقف والحافلات بتسمع فيها حكاوي عجيبه جداً،،،
وفيها ناس من كتر الهم العليهم تلقى الواحد بتكلم براو،،،
يضرب ويقسم وبرضو ماتلفق معاو وفي الاخر يقوم يشتم نفسو،،!!!
،،،،
عينة السواق وتفتيحه موجودين في كل مكان،،
والمقص بالنسبه ليهم زيادة دخل،،،
والله لاوراك كان لم فيهم بتاع حركه،،
،،،،
سعاد وفاطمه،،،زي كل بنات البلد،،
وبرغم المفارقه الجميله في الطبع والافكار،،
الا انهم بياخدو الحيز الكبير في الحكايه،،،
اما الطلبه ،،، (الله في)،،
البسمعو كتير،،،نفتح ليكم فصل!!!
كرهتونا المواصلات!!!
،،،،،
المسطول،،،
عارف نحن عندنا حسن المجنون،،،
برغم انو بيقولو عليو مجنون،،
لكن تلقى شفع الحي كلهم منتظرينو العصر تحت شجرة النيمه،،،
بيجي شايل ليهم الحلاوه والبسكويت ويقعد يلعب معاهم بلي،،،
ولما يغيب يوم تلقى الناس كلها تسال منو،،،
ومافي زول عارف حكايتو شنو،،
لاعارفين جا من وين،،ولااهلو وين،،ولا الخلاو يبقى كده شنو،،،
اتعودنا عليو،،،على ضحكتو،،وصوتو،،
،،،،،،،
أما الملتحى ده فحكايتو عندنا غريبه،،،
بعد ماركب الحافله،،،حلل وحرم،،شرع وافتي،،
قال داير يمشي ناس المحليه،،
عشان يصدقو موقف خاص بالنساء،،!!!!
لانهم ضايقو الرجال في كل شيء وكرهوهم العيشه!!!!
شفت جنس المحن دي،،،
،،،،،
والبحصل في الحافلات كتير،،
اللستك بنشر،،،الجاز قطع،،،
وعندنا في الخريف يقول ليك المكنه دخلتا مويه!!!
،،،،،،
بجد أنت ابدعت،،،
الحافله الهاويه باللفه،،حكاية حياة،،،
من عمق تفاصيلنا اليوميه،،
وصياغتك ليها جميله جداً،،،
واصل،،وأتحفنا بالمزيد،،،
،،،،،،
عارفه بريتك كتير،،،
لكن قصتك بتجبر الواحد يطلع كل الجواه،،،
،،،،،
يديك العافيه،،،وتسلم من كل شر،،،
،،[/align][/u][/size]
عاشقة توتيل مساءاتك سعيدة..
اشكرك اولا لقبول الدعوة ايتها الكريمة..
ابرينى كيفما شئتى فمؤكد مثل بريك لن تجزع منه الاستيكة لفنائها وكل خطوط دفاعاتها الخشبية
والرصاصية لأن الكلمات لن تذهب ادراج الريح بلا معنى..بل ستبقى قيمة..
تحليلك بسيط جميل ومباشر يلخص مشاهدات سودان غريب..جميل ..متداخل ومتناقض..وحقيقى..
سأظل اكتب حتى ادعو من مثلك للقراءة فذلك يرضى كل غرورى..
سلمتى وغنمتى ولك كل التشكرات،،
صورة العضو الرمزية
بسمة الحياة
مشاركات: 2006
اشترك في: الخميس 2009.3.26 10:15 pm
مكان: K.$.A
اتصال:

رد: الحافلة..الهاوية باللفة..

مشاركة بواسطة بسمة الحياة »

يصراحة قصة رائعة
تحكي يوم من حياتنا اليومية


والى الامام ومنتظرين ابداعاتك
صورة العضو الرمزية
السيسبانة
مشاركات: 179
اشترك في: الثلاثاء 2009.5.12 7:27 pm
مكان: السعودية

رد: الحافلة..الهاوية باللفة..

مشاركة بواسطة السيسبانة »

والله ياود عازة اهنيك علي السرد الأكثر من رائع وبالجد اسلوب ممتع
يجبرك علي المتابعة ومواصلة الحلقات واحدة وراء الاخري ولانها بالجد بتحكي الواقع
بس والله من بين الجماعة ديل كلهم حننتني سعاد الله يكون في عونها
ومشكور ويديك العافية
أضف رد جديد

العودة إلى ”سيناريو وأحـداث“