الركشة..

المشرف: بانه

ودعازة
مشاركات: 763
اشترك في: الأربعاء 2009.6.17 3:31 pm
مكان: الرياض

الركشة..

مشاركة بواسطة ودعازة »

سلسلة من القصص المستمرة والاحداث تحملها الركشة وراكبيها ومااكثر راكبى الركشة ومااكثر تبايناتهم..
تصور مشاهد وصور وافكار من مجتمعنا بشئ من المبالغة احيانا لايظهار الفكرة والى اين يمكن ان تقودنا..
[frame="7 80"]فاصل اعلانى..
قريبا جدا بانا سودانى الركشة..الركشة فخر الطرطرات الوطنية ..
الركشة القصة التى حازت على جائزة الخطوط الفرعية..
اخراج وتاليف وتمثيل سودانى مازى البستنو فيهو الكميرا
..[/frame]

انتظروا الحلقة الاولى لما يسهل ربنا..
صورة العضو الرمزية
bintalsudan
مشاركات: 268
اشترك في: السبت 2009.5.30 8:59 pm
مكان: الامارت/ دبي

رد: الركشة..

مشاركة بواسطة bintalsudan »

هههههههههههههه طيب يا ود عازة نحن في الانتظار
ودعازة
مشاركات: 763
اشترك في: الأربعاء 2009.6.17 3:31 pm
مكان: الرياض

رد: الركشة..

مشاركة بواسطة ودعازة »

[frame="7 80"]فاصل اعلانى..
قريبا جدا المسلسل الذى طال انتظار جماهير انا سودانى له الركشة..
الركشة ..قصة للكاتب المزهلل ودعازة..

الركشة ..سلسلة من البرى والصب الذى نأمل أن يصيب ولا يخيب..

الركشة..
(أغنية): ركشة ركشة ركشا..........اوووو ركشا
ركشة ركشة ركشا..........اوووو ركشا
انحنا ما مجانيين .............اوووو ركشا
نشخبط عشان فاضيين......اوووو ركشا
عشان مانعمل واعيين.........اوووو ركشا

الركشــــــــــة قريبا بس الله يهون يهون .[/frame].[/size
]
ودعازة
مشاركات: 763
اشترك في: الأربعاء 2009.6.17 3:31 pm
مكان: الرياض

رد: الركشة..

مشاركة بواسطة ودعازة »

[frame="6 80"]RAKSHA ....Aha Aha
RAKSHA....Aha Aha

I LIKE IT

SOOOOOOOOOOON
The lovely stories of RAKSHA[/frame]
ودعازة
مشاركات: 763
اشترك في: الأربعاء 2009.6.17 3:31 pm
مكان: الرياض

رد: الركشة..

مشاركة بواسطة ودعازة »

الحلقة الاولى..
(بوليس الحركة)


وقف امين بمحطة اول الخط مهموما شارد الذهن..يفكر فى كيفية تسديد باقى اقساط الركشة..
نعم لم يتبقى الا خمسة اقساط ولكنها لازالت دين على عاتقه..يصبر نفسه بما خطه بموخرة ركشته (الرزق على الله)..(وفى السماء رزقكم وما توعدون)..
هجس وانشغل بالسعى برغم ذلك اليقين بما كتب..يالغرابة الانسان..يدرى بأن الرزق بيد يد الله ويكتب ذلك وبرغمه يحمل الهموم حين تذكر حصار متطلبات الحياة له..
امين شاب بسيط مكافح متعلم بل وخريج جامعى..لم يدرك وظيفة حكومية لأن أمره لا يعنى الكثير من الملتحين من المدراء ..
وحتى القطاع الخاص وجد نفس اللحى وكثير من عبدة المادة منهم ومن غيرهم..يريدون موظف يبيض ذهبا لا خريجا يتعلم ويتدرب ليملأ فراغ منصب ما قد ينجح به او لا..

حافظ: وين يافردة سارح؟ شنو جاك مرض حامد ولا شنو؟


امين: مرض حامد!! والله شكلك فايق ورايق..الزيى بجيهو مرض حامض..مرض جامد ..مرض حامد شنو البجينى..
حامد ومرضو منو الفاضى ليهم عليك الله؟


حافظ: امك..شنو يافردة مالك ؟ الحاصل شنو؟ خير الليلة اصلك مابراك..
القصة دى عايزا ليها كباية شاى متينة..نشربا ونسمع حكايتك المزهجاك براااحة..


امين: ماقلت ليك انك فايق ورايق..المحاصراو ديون الركشة الماعايزا تخلص دى بجيو مزاج يشرب شاى؟ الشهر قرب يخلص والقسط ماعايز يتم..الواحد خلص والاقساط ماعايزا تخلص..
من صباح الرحمن راكبين الركشة لما تضلم والواحد ضهرو اتخشب من القعدة والدقداق غير بواليس الحركة التقول مشاركننا..وتقول لى مرض حامد!!

حافظ: يازول قول بسم الله..شنو الجديد ماياهو دا الحال..شنو الجدا؟


امين: الحال ياريت زى الحال..الركشة كانت جديدة وغير كب البنزين والزيت ماكانت بتحتاج شى تانى..
هسع بين المشوار والمشوار عايزا قطع غيار..

حافظ: يازول هونا بتهون وخليها على ربك..


امين: ونعم بالله..بس الظروف بقت اصعب ياحافظ يااخوى وماشا على وين الواحد ماعارف..


حافظ: كدى يلاكا نضرب الفطور ونتفاكر فى الموضوع..

امين انا فطرت..اتسهل انتا افطر وبعدين بلاقيك فى اخر الخط انا دورى شايفو جا..

لم يفطر امين ولكن تحرج ان يفصح عن ذلك..اصبح يأكل مايجد عند خروجه من منزلهم حتى يتمكن من سداد القسط ..
التقشف اصبح صديقه بآونته الأخيرة..أصبح يأكل نصف الوجبة أو أقل..وكل مايهمه أن تمتلأ بطون ناس البيت..
والده موظف صغير لا يكفى راتبه لتموين الشاى والسكر ووجبة فول مرة باليوم..
كيف إستطاع هذا الرجل تعليم اولاده لا يستطيع احدا الرد وحتى هذا الرجل نفسه..
الله كريم ..هى الجملة التى أعانة حاج عوض والد امين ومئات مثله للإستمرار بحياة لا ترحم الفقراء والموظفين..

يتبع.........
__________________
ودعازة
مشاركات: 763
اشترك في: الأربعاء 2009.6.17 3:31 pm
مكان: الرياض

رد: الركشة..

مشاركة بواسطة ودعازة »

الحلقة الثانية ..
(برضو بوليس الحركة)

الكسونجى : يامين حرك يااخى ..تعال قدم لقدام افسح فرقا خلى الناس تلاقى مكان..

امين : حافظ بنتقابل بآخر المحطة وبنواصل كلامنا بعدين..

حافظ : ماش يافردة ..بس زى ماقلتا ليك هونا بتهون..

امين: شنو ياتعريفة الدنيا طارت!! وينم الزباين الواقفين طوابير؟

الكمسونجى: النظام ياابو الشباب..تعريفة دا واقف هنا كراع بنبر؟ قدم يافردة وانضبط خلينا نحلل رزقتنا..

امين : ماشى يامايسترو..ونشوف اخر نظامك دا بودينا وين..

بهذه الاثناء تقترب ثلاثة نساء ..أو قل إمرأتان وشابة..الأولى كبيرة بالسن بملامح سودانية حميمة..المطارق الثلاثة المتوازية بكل خد..وكما تقول حبوباتنا حلات الدمعة فى شلختا..شفتان مسودتان من أثر الدقة ..
جسم ممتلئ بلا بدانة ..هى أم الشابة والأخت الكبرى للأخرى..أما الأخرى فهى المحامية المتأنقة بوقار..
تحيطها هالة من الجدية والثقة..حسنة الملامح وطويلة القامة..أما الشابة فملامحها طقت عليها البراءة وجمالها..
ليست فاتنة الوجهه بقدر جاذبيتها..لم تضع من مساحيق التجميل شيئا..إنما إكتحلت مقلتيها وحسب..
تبدو فتاة لازالت تدرس بالجامعة..

الكمسونجى : الدور هنا ..الركشة السوداء..عجلو شوية يااخوات..

الام : ياولدى المهلة ماسمحا مالك مستعجل؟الدنيا طايرة!!

الكمسونجى : الحركة مابركة ياحاجة..والرزق بنادى ومحبوبى قصد عنادى وكدا..

امين : ياتعريفة روشتك دى اصلو مابتخليها..ياوالدة على مهلك وماتسمعى كلام الزول المرووش دا..
اصلو هو كدا مستعجل بدون سبب..

الام : والله ياولدى انا ركوب الركشات دا مابدورو..لكن مخيّر الله البنات ديل جابراتنى عليها..
ركشاتكن ديل حوادسم كترن وربنا يحفظنا عاد منهن..

امين : انتى الليلة اركبى معاى وشوفى تانى كان تركبى غير الركشة..

البنت : أمى خلينى أركب ليك أول عشان تقعدى بالطرف..

الخالة : وأنا بركب بالجهة التانية..

الكمسونجى : نظام والله كلام..ايو كدا ..دا الشغل..

تخطيط عفوى فطرى..الجميع سهل للأم ركوبها غريزيا..كل من الشابتين لعبت دورها كأنه دور مكتوب بنص ما..
ماذا لو عرف كل منا كيف يلعب دوره بعفوية وبساطة وإبتعد عن التعقيد ووصايته على مايجب أن يقوم به الآخر..
ماذا إذا لعبت الحكومة دورها بشفافية والمواطن صمت قليلا عن أخطاء الآخرين وفهم دوره بالأنظومة..
لتغيّر الكثير والكثير..

امين : تعريفة..بحاسبك لما ارجع يافردة..سلام..

الام : ياولدى النبى فيك سوق على مهلك الطريق دا كلو دقداق..ودرب السلامة للحول قريب..

امين : جدا ياوالدة..ماتشيلى هم ان شاء الله بتصلى بالسلامة..وماتفتكرى انى زى الكمسونجى متصربع..بس اهم حاجة تدينا دعوة ربنا يسهلا علينا..

الام : الله يبعد عنك شر الطريق ياولدى ويكتب ليك بكل خطوة سلامة ويرزقك من اوسع ابوابو ويغطى عليك..

امين : الله يديكى العافية ياوالدة..كدا الواحد يسوق بمزااج بعد دعواتك البركة ديل..اها السرعة دى كدا كيف ياوالدة؟

الام : ايا خليك ماشى كدا ياولدى..العجلة مامن الشيطان والتأنى فيو السلامة..

الخالة : غايتو يااخ الله يكون فى عونكم مع زولكم الفى الموقف..دا شنو دا ؟ خشمو مابيقيف وجنو نقة فى الفاضية والمليانة..

امين : ياأخت ماتشيلى فى خاطرك اصلو الزول دا حركتو كتيرة ونقتو كتيرة ..ماالنقة الحاجة الوحيدة البقت ببلاش فى البلد دى..

البنت : زمان كان بيقولو النسوان هم النقناقات..لكن رجال الزمن دا فاتوهم بهناك..

امين : الناس يااخت بقت معصورة وشايلا كتير..واهو بتنفس بالنقة..مادى الفاضلا ليهم..ولو مانقنقو والله بالزمن دا الا يطرشقو..

وبينما الحوار مستمر..تصل الركشة الصينية التى توسطها عسكرى المرور بزيه الأبيض الغير ناصع البياض..
الأتربة إتحدت مع عرقه لتصنع ذلك اللون الأسود بأطراف أكمامه وحول لياقته التى يحاول جاهدا الا تتسخ بوضع المنديل بينها وبين عنقه المتعرق..
من ياترى من إختار الزى الأبيض لرجال المرور؟..أترى عند إتخاذ هذا الإختيار وقتها كانت الأجواء أكثر برودة..
ألم تكن الشمس حارقة او لا توجد الأتربة التى عفرت كل جزيئات الهواء..
لعمرى أعتمد هذا اللون لعكسه حرارة الشمس التى لامحال متغلغلة بدون أى إنعكاسات..
ماضير إتخاذ لون فاتح ولكن لايظهر فيه الإتساخ بهذه الصورة المنفرة..
تنطلق صافرة تقطع كل الحوارات بكل المركبات بالصينية..والكل أحس بأن الصافرة له..المخطئ والبرئ..

العسكرى : أقيف يابتاع الركشة وأطلع من الشارع..

امين : خير ياجنابو ..فى شنو؟

العسكرى : الخير يجى معاكم كيف يابتاعين الركشات؟ ماشى ليى بمهلك زاحم الطريق..شنو إشتريت الشارع؟
كدا اولن ادينى الرخص..

امين : (يخرجها من تحت شمسية الركشة)..إتفضل اهندى رخصتى..ودى رخصة الركشة واوراقا..

العسكرى : الاوراق دى مالا مبهدلة كدا..دى شوية وتتقطع..

امين : من كترت دخيلا وطليعا..مالا مابتتبشتن؟

العسكرى : شنو شايفك كمان معترض نشوف شغلنا..

امين : هو فى زول لاسمح الله بيقدر يعترض ولا يتكلم؟ إنتا سألتا وانا جاوبتا..

العسكرى : انتو بتاعين الركشات ديل غير الاعتراض والنقة ماعندكم شى..والمرايا دى مالا ملخلخة كدا..دى مخالفة ياابو الشباب..
تعريض الطريق للخطر..

امين : ياجنابو مالا المرايا ؟ ماهدى مثبتة!!

العسكرى : يعنى انا كضاب؟ شوفا دى هسع مابتتحرك؟ دى هسع لو وقعت ليك فى حفرة مابتطير وتعوق ليها مشاه ولا تكسر ليها قزاز عربية؟

يتبع..........
ودعازة
مشاركات: 763
اشترك في: الأربعاء 2009.6.17 3:31 pm
مكان: الرياض

رد: الركشة..

مشاركة بواسطة ودعازة »

الحلقة الثالثة ..
(ايضا بوليس الحركة)


امين: المرايات مالازم تتحرك عشان تتظبط ..انا الدقداق مسؤل عنو!!
يعنى مكسر الركشة وكمان ماراحمنا نتخالف عشانو!!



العسكرى: يازول ماتعمل ليى محامى..دى مخالفة..حتدفع ولا تستنى الضابط والدورية؟



الام : ياولدى مخيّر الله فيك !! المرايا دى هسع ملخلخة!!ماهدى قدامك سليمة ومااتحركت من ما ركبنا الا لما هبشتها.
.الله يرضى عليك خليو اليمش..


العسكرى : ياحاجة خليك فى حالك خلينا النشوف شغلنا..اها ياابو الشباب قلتا كيف؟


الخالة : شغلك كان بتعرفو صحى المرايا اهدى سليمة..ومخالفتك تقديرية مامبنية على شى سليم..
بتفترض انو المرايا يمكن يمكن تطير..طيب بنفس المبدأ العربات الماشة دى كلها ممكن يتفجر تكنى البنزين وتحرق الماشين كلهم مش تهدد لسلامتم وبس.
.امشى اديهم مخالفات هم كمان..


العسكرى : دا كلام شنو دا؟!!وبعدين يااخت انتى راكبة شنو البيدخلك اساسا فى الموضوع؟ تكونى ست الركشة؟يازول بتدفع ولا شنو؟


الخالة : انتا بس جارى ورا الدفع..ومتسبب ساكت..يااخو ماتدفع ونشوف اخرتا شنو..


امين : يااخت هدى شوية..وبعدين انتو ماناقصين عطلة ذنبكم شنو؟ ياجنابو خلينى اوصل الجماعة ديل وبجيك راجع..


العسكرى : سنتى واحد مابتتحرك ..وخلينا نشوف الزولا دى مالا..بأتسبب كيف يااخت قصدك شنو؟


الخالة: اول حاجة لو مامتسبب من نص الصينية كيف شفتا المرايا بتتحرك؟ وهى هسع مابتتحرك الا اذا حركتها بقوة؟
تانى حاجة البيعمل مخالفة بيكتبا وبعدين بيطلب السداد مش العكس..انتا لهسع ماكتبتا المخالفة لانو ماعندك شى بينكتب..
وماتفتكر انى بخاف منك ولا من امثالك..البلد فيها قوانين..


العسكرى : الكلام دا خطير ودا تعدى على رجل مرور اثناء تأدية واجباتو..وانا بوريك القانون ..
ياجماعة انزلو اتيسرو شوفو ليكم مواصلة تانية..عندنا قعدا طويلا مع السواق والاخت دى (يقصد الخالة)..


امين : كيف ينزلو فى الصينية!!يازول خلينى بوصلم وبرجع ليك خلى الرخص معاك..
والزولا دى كمان مالا حتعمل ليها مخالفة كمان عشان الكلام؟!!


البنت: الو.. ايوا ياخالى فى صينية النخيل..........العسكرى مامعلق اسمو فى القميص...هاك ليو....يااخو هاك كلم..


العسكرى : انا ماعايز اتكلم مع اى زول..هو شنو كل واحد نوقفو يتصل ويخلنا نتكلم فى الموبايل..مابتكلم..


البنت : خالى ماعايز يتكلم معاك.....اقول ليو شنو...........يااخو دا العقيد عاطف حيدر..


العسكرى : سعادة العقيد عاطف مدير مرور المنطقة..


الام : ايا ياهو زاتو..


العسكرى : الو ..اهلا سعادتك..نعم..نعم..نعم..تمام سعادتك..مافى مشكلة..حاضر سعادتك..
مع السلامة سعادتك..يااخوانا اتفضلو امشو..مامن الاول تقولو قرايب سعادة العقيد..


الخالة : اساسا ياماجدة (الابنة) ماكان تتصلى لانو الموضوع مامستاهل من الاول..وعلى فكرة انا محامية وبفهم فى القانون ..
ولو مامستعجلين كنتا وريتك شغلك ..بتورينى انتا القوانين!!والزول دا ماتفتكر بتقدر تحقرو لما ننزل لانو بنديهو تلفوناتنا وانا مستعدة ادافع عنو وبلاش فى محكمة المرور..


العسكرى : يااخت المابعرفك بيجهلك..ومعليش يااخت كنا ماعارفين قدرك والسماح..


تتحرك الركشة بعد ان اخذ امين كل اوراقه من شرطى المرور ..


يتبع..
ودعازة
مشاركات: 763
اشترك في: الأربعاء 2009.6.17 3:31 pm
مكان: الرياض

رد: الركشة..

مشاركة بواسطة ودعازة »

الحلقة الرابعة..
(الاخيرة مؤقتا من بوليس الحركة)



حافظ: تعرف ياتعريفة امين دا الليلة ماعاجبنى مهموم هم شديد خلاص..


تعريفة: يافردة هو منو المامهموم؟ تلاقى الحبة عاملا ليو شوية ارضى..


حافظ: انتا يازول مطرطش ؟ امين بيغباك؟ حبة شنو وجكسوية شنو معاو..الزول دا غير الركشة والجامع بتشوفو تانى وين؟


تعريفة: يافردة ماتدافر ..شنو يافردة دى ونسة ولا شكلا..عارفنو زول مولانا هو المولانا دا ماعندو قلب فى حنانو؟


حافظ: والله انا زاتى الماعندى شغلا البناضمك انتا ياابو الرواشة..


تعريفة: يازول هدى اللعب واطلع بسجارة خلينا النوزن الداموغ ونشوف قصتك صاحبك..


حافظ: هديك الطبلية قدامك ياجلدة..كوكبتك وملحك الكتير دا بجيب ليك ضغط..
بتدخل اكتر مننا كلنا وقروشك دى اصلو ماظاهرة بتوديها وين..


تعريفة: دا كلو عشان سجارة!!سجارة خلتك تدق طارة..ابوك ياخوة ..خوة مافى ..خوة فرتك..
اطلع يازول بالسجارة وبردها ليك بعدين مامعاى فكة..


حافظ: هاك ليها..والله لوبترد ليى السجاير الطفحتو كنتا انا زاتى عملت بيو طبلية..


تعريفة: تسلم يافردة..ايا خليك كدا تمام واحكى بعد كدا بمزاج ..صاحبك مالو؟


حافظ: الزول دا انا ملاحظ ليو من فترة يااخى الفطور بقى مابيفطرو معانا..ويقول ليك فاطر ديما..
مع انو انا بعرفو بيحب اللمة ومامن عوايدو ياكل براو..اليومين ديل مشغول ليو بكبيرة..


تعريفة: شنو بيكون الشاغلو؟ الركشة وهانت تلاتا اربعة شهور وبيجيب حدها ..


حافظ : مادا زاتو المحيرنى..وهو قال مهموم بالركشة..بس الكلام دا ماداخل لى مخ..يكون مالو يالله؟


وفى هذه الاثناء امين يواصل مشواره الى اخر المحطة يملؤه احساس وشعور عظيمين بأن أمة محمد لازالت بخير لصنيع ركابه..


امين: والله ياخوانا انا ماعارف منو القال المرة ان بقت فاس مابتشق الراس..لكن الشفتو الليلة والله تشقو شقة..
الله يديكم العافية ماقصرتو معاى والعسكرى المتلحنى دا تانى ماظنيتو بيعترض لى طريق..


الام: ياولدى انتا شكلك ولد حلال عشان كدا ربنا مسهل ليك خطوتك وبيسخر ليك خلقو..


الخالة: ياود العم انتا ماغلطان من الاصل وانحنا ماعملنا حاجة غير وقفنا مع الحق..


امين: تعرفو العسكرى دا مامعاى انا بس كدا..دا من شدة ازيتو للناس بقى معروف حسنين ابو جيبين..
جيبو اصلو مابيكون فاضى..وجيب الحكومة مابيدخلو قرش الا لما يكون الضابط فى..


الخالة: انا حسيت بكدا..قاعد ساعة يقول ليك بتدفع وهو اصلا ماعمل المخالفة..تهديدو ظاهر كان..ومافهمك العبيط لما قلت ليو بوصل الجماعة وبرجع ليك..لكن يااخو انتو بتشجعو على كدا طالما بتدفعو..


امين: الناس مرات بتتطرا..انا عن نفسى مابأدفع عشان كدا عرفنى لما قلت ليو برجع ليك عرف انى حأجى عشان استنى الضابط..
اصلو الضابط بتاعو ود حلال وزل دوغرى ..عشان كدا حاول يضغضنى بيكم..الرشوة الله لايكتبا علينا..
وبعدين المخليو مستقوى معظم ناس الركشات بقو مامرخصين خط..
المرور بيرخص ليهم ملاكى عشان كدا لما يلم فيهم زى العسكرى دا بيدفعو عشان يقدرو يشتغلو..


الخالة: كيف يعنى المرور بيرخص ليهم ملاكى ما بيرخص ليهم خط؟


امين: دا الحاصل..الركشات معظما ملاكى والسايقينها شغالين عليها جوكية..ومشكلة التراخيص ماعايزة تتحلا عشان كدا الناس مجبورا..
المعايش ماصعبة..


البنت: دا كلام شنو دا!! يعنى المرور بيقولو للعساكر هاكم هدية اسلخو السواقين..هو منو دا البيجيب ليو ركشة ملاكى!!
!يكون ياربى جايبا يفسح بيها اولادو!!!


وتقترب الركشة من اخر المحطة ولم ينتهى حوار ولم تحل ايضا معضلة الركشات الملاكى..


الخالة: يااخو عندك موبايل؟


امين: عندى اي..


الخالة: طيب عليك الله ادينا ليو لو عندنا مشوار بنتصل بيك لانو بيتنا اهنداك قريب من اخر محطة..


امين : جدا رقمى (.........) وانا بوصلكم لحدى البيت عشان اعرفو كمان..


الام : والله ياولدى سواقتك سمحة الله يغطيك..


امين: يعنى خلاص مابتحاربى الركشات ياوالدة؟


الام: هى بعد ماشلنا رقمك البركبنى مع غيرك شنو..انتا ولد حلال..


امين: الله يديك العافية ياوالدة..


البنت: داك البيت الفيو سبيل برا داك..


الخالة: ودا رقمى (.........) لو العسكرى الثقيل دا اتعرض ليك بس ادينى مس كول وانا بوريك فيو..


امين: بعد كلامك داك ماظنيتو تانى بتشبك معاى..


الام: انزل ياولدى النسقيك موية..


امين: مرة تانية ياوالدة الشغل بنادى ..


الخالة: اتفضل يااخونا (تدفع الاجرة)..انتا لهسع ماقلت لينا اسمك منو عشان اسجلو مع رقمك..


امين: ماتخلى اول مرة علينا..


الخالة: اها دا الكلام الماحيخلينا نتصل بيك لو عندنا مشوار..


امين: خلاص خلاص..انا اسمى امين عوض..


الخالة: وانا حنان المحامية عشان لو اتصلتا تعرف منو المتصل..


الجميع: مع السلامة..


امين: الله يسلمكم ويديكم العافية وماقصرتو..


ثم تتوجه الركشة الى اخر محطة محملة بامين وهمومه العراض والثقال...



يتبع
.....
ودعازة
مشاركات: 763
اشترك في: الأربعاء 2009.6.17 3:31 pm
مكان: الرياض

رد: الركشة..

مشاركة بواسطة ودعازة »

ترقبوا الحلقة القادمة من الركشة فيها:
راجل المرة ..قصة للكاتب المرشح لجائزة الكمسونجى الكبير..
جميل العامل بريد مرتو ..وبثينة الدفار العاملا تتى..
ودعازة
مشاركات: 763
اشترك في: الأربعاء 2009.6.17 3:31 pm
مكان: الرياض

رد: الركشة..

مشاركة بواسطة ودعازة »

الحلقة الخامسة ..


(أضان القفة-راجل المرة)


وصل حافظ الى اخر المحطة..وكان لازال هم صديقه امين شاغله الكبير..حافظ تربطه علاقة مهنة مع امين وايضا هما ابناء نفس الحى..
لم يكمل تعليمه الجامعى مع سبق الاصرار والترصد..اراد ان يختصر طريقه بالعمل بالتجارة ..
وعندما كان ينصحه امين بفائدة الدراسة..كان يجيبه :عندما تتخرج بشغلك معاى..وياللمفارقات..
امين يمتلك ركشته بينما حافظ يعمل عليها بالايجار..فحافظ لم يوفق بالتجارة ولم يكن شجاعا ليرجع ليكمل مشواره التعليمى..


امين: والله اليوم مافاتك فيلم..صاحبك اب جيبين وقع فى شر اعمالو..


حافظ: الله لا يوفقو يستاهل..بس شنو القصة..احكى..


يحكى امين القصة بإستمتاع المنتصر وكيف كان وجه اب جيبين تتغير ألوانه وهو يهاتف العقيد..
وكيف كانت ردود أفعال نساء بتفاوت ثقافاتهن وأعمارهن مع المشكله بمنتهى الشجاعة والشهامة..


حافظ: والله المحامية ما مرة..عافى منها..مرة من ضهر راجل صحى..(الخيل تجقلب والشكر لحماد..دا انا فى سرى)..


امين: كمان ادتنى رقم موبايلا وقالت لى اتصل فى اى وقت لو اب جيبين اعترض ليك طريق..


حافظ: والله كلام..لكن ماظنيت صاحبك تانى بيعمل ليك ملاوزات..عقيد ومحامية والله يلحقو الزينين..
كدا خلينى من اب جيبين ..انا شاعر بيك مهموم وماعشان اقساط الركشة زى ماقلتا..
لانها حاجة ماجديدة..قول لى الحقيقة شنو؟


امين: مافى شى..بس شوية قرفة والاقساط ياحافظ يااخوى..


حافظ: على راحتك ماتتكلم..بس حتلف وحترجع لى عندك منو غيرى..سيبو الظروف بتجيبو وكراع البقر جيّابة..


امين: يعنى متين كنتا بدس عليك شى؟ بقيت براى خلاص عاداك تعريفة بنقتو الكتيرة ديك..


حافظ: الله يرحم ايام بريك وشعرك القديتنى بيو ايام الجهل..لو نسيت انا مانسيت..
يامفترى فى زول بيصحو الساعة تلاتا صباحا عشان يقرو ليهو قصيدة!!وجاى هسع تتكلم عن البرى !!
والله انتا عندك دكتورا فيو..


مابين إجترار احلى ذكريات الماضى ومابين قساوات متطلبات الحاضر مر الزمن بالصديقين حتى جاء دور امين ..
جالبا إليه رجل نحيف وإمرأة من ذوات الأوزان الثقيلة..


الكومسنجى: الدور فى الركشة السودا ديك..


امين: (بصوت منخفض) ..شوف الحظ دا الركشة الليلة ماودتنى المنطقة الصناعية بعد مشوار المرة دا..


حافظ: (محاولا الا يضحك بصوت عالى) جلّى المشوار ..والله دى عمرة مابتخارجك الليلة..

امين: مابتبقى ظاهرة والمرة بتتغقد ياخى..خلينا الناخد الاجر وربك كريم على الركشة وعليا..


المرأة: ماتقدم ياانتا شنو الدور ماعليك؟


امين: جدا يااخت جدا..شنو الحكاية دى راكبة دى ولا كمسونجى(فى سره)..


الرجل: اركبى على مهلك يابثينة..


بثينة: شنو شايفنى شافعة بتوصى فينى!!مااحسن التجى تشيلنى تركبنى..(هى انتى بتتشالى!!دا انا فى سرى)..


الرجل: انا خايف عليك ماتعوقك الركشة..(منو اليعوق منو؟دى حتفتل شاسى الركشة مش تعوقا..انا برضو فى سرى)..


بثينة: ياراجل خلاص بطل النقة الكتيرة وانجرا اركب بهناك..ماتضيع لى زمنى فى نقتك الماعندها طعم دى..


امين: طلب ولا ماشين اول المحطة..


بثينة: اول المحطة..


الرجل: مانمشى المشوار من هنا طوالى يابثينة؟مش انتى مستعجلة؟


بثينة: عليك الله ياجميل انطم واسكت..لزوما شنو بعزقت القروش نصل اول المحطة ومن هناك نقاول الزول دا..
وبعدين مستعجلة دى انا البحددا انتا تركب وتسكت وبس..


امين: بس يااخوانا كدا لازم نستنى زول تالت عشان الركشة تتملى..


بثينة: والتالت دا ان شاءالله حيركب وين يااخوى؟فى راسى؟


امين: طيب بتدفعو حق تلاتا ركاب..


جميل: بندفع اتوكل على الله امش..


بثينة: انا ياراجل ماقلت ليك تنطم..منو البيدفع انا ولا انتا؟ندفع كيف لتلاتا واحنا اتنين؟انتا مابتفهم؟
انطم احسن ليك عشان مااوريك ليو..


امين: خلاص نستنى التالت..ويركب معاكم ورا..


بثينة: انتا يازول مانصيح..الركشة دى بتشيل ليها زول تالت؟


امين: يااخت مافى داعى للغلط..ياتدفعى حق التلاتا ياتستنى يجى زول..


جميل: خلاص يابثينة عشان راحتك ادفعى حق التلاتا..


بثينة: انتا ياالفقر مابتعرف تسكت كلو كلو..ادفع من وين ؟من قريشاتك الكتيرا ولا من راتبك الناقز ليا بيو اخر الشهر المابيجيب حق الفول؟


امين: اها قلتو شنو؟


بثينة: امش وسيب النقنقة خلاص بدفع..ناس عايزا بس تغنى بسرعة..

امين: تغنى !!ركوب الركشة بيغنى!!على كدا انتى مرتاحة البتركبى ركشة..

بثينة: يااخو بالله اطلع وخليك فى روحك..


تتحرك الركشة بتثاقل..فالوزن لم يكن خفيفا عليها..وامين مابين التساؤل والحيرة..هل هذا الجميل زوج هذه الشريرة بثينة..
ام تراه اخاها..ولم يقبل على نفسه كل هذه المهانة!!..بجميع الحالات كان اخا او زوجا او حتى عاشقا..وماذا تراه يعشق فى هذه السليطة اللسان..
لاجمال ولا اخلاق ولا حتى وزن معقول ومقبول..


يتبع....
صورة العضو الرمزية
ملاك الورد
مشاركات: 5979
اشترك في: الجمعة 2009.5.29 3:26 pm
مكان: السودان الحنون

رد: الركشة..

مشاركة بواسطة ملاك الورد »

طبعا الزول المنتج الناجح بيعمل اعلاانات في اي مكان و بعدين بيعرض شغله
المسلسل ماشي تمام
وااااااااصل
صورة العضو الرمزية
ابن عوف
مشاركات: 7729
اشترك في: الخميس 2008.6.19 7:51 pm
مكان: وسط اهلى الطيبين وسمحين

رد: الركشة..

مشاركة بواسطة ابن عوف »

ود عازة

رمضان كريم

ليس غريب ان تجد روايتك منى اهتمام من اول حرف الى اخره تلك الراوى وهو ودعازة يكتب عن واقع

معاش بينا بكل تفاصيله وانا متتبع لقصتك وكاننى جالس على طرف دكان ونتجاذب اطراف الحديث وكان الاحداث تمر امام اعينى وابطالها وتفاصيلها كانى اسمع منهم

دمت قلما يعكس الواقع بتفاصيله

مودتــــــــى
صورة العضو الرمزية
ناني
مشاركات: 175
اشترك في: الجمعة 2009.8.7 5:13 pm
مكان: السعوديه

رد: الركشة..

مشاركة بواسطة ناني »

هههههههههههههههههههههه
حبوبة
مشاركات: 1274
اشترك في: الثلاثاء 2008.5.13 11:03 am
مكان: Damscus

رد: الركشة..

مشاركة بواسطة حبوبة »

ودعازة كتب:
الحلقة الخامسة ..


(أضان القفة-راجل المرة) :smiels0:

العنوان مابشبهك ياجنا العازة :064:

حافظ: والله المحامية ما مرة..عافى منها..مرة من ضهر راجل صحى..(الخيل تجقلب والشكر لحماد..دا انا فى سرى)..
؟؟؟ الحتة دي ماوقعت لي !!! وان كان فهمتها صح :064: اعمل حسابك واكسب الانثى :D

امين: جدا يااخت جدا..شنو الحكاية دى راكبة دى ولا كمسونجى(فى سره)..

بثينة: ياراجل خلاص بطل النقة الكتيرة وانجرا اركب بهناك..ماتضيع لى زمنى فى نقتك الماعندها طعم دى..

بثينة: عليك الله ياجميل انطم :004: واسكت..لزوما شنو بعزقت القروش نصل اول المحطة ومن هناك نقاول الزول دا..
وبعدين مستعجلة دى انا البحددا انتا تركب وتسكت وبس..
مهما كان ما قدر دا ؟؟؟؟
بثينة: انا ياراجل ماقلت ليك تنطم..منو البيدفع انا ولا انتا؟ندفع كيف لتلاتا واحنا اتنين؟انتا مابتفهم :004: ؟
انطم احسن ليك عشان مااوريك ليو..

بثينة: انتا يازول مانصيح..الركشة دى بتشيل ليها زول تالت؟
امين: يااخت مافى داعى للغلط..ياتدفعى حق التلاتا ياتستنى يجى زول..

جميل: خلاص يابثينة عشان راحتك ؟؟؟؟؟ ادفعى حق التلاتا..

بثينة: انتا ياالفقر مابتعرف تسكت كلو كلو..ادفع من وين ؟من قريشاتك الكتيرا ولا من راتبك الناقز ليا بيو اخر الشهر المابيجيب حق الفول؟ :001:

بثينة: امش وسيب النقنقة خلاص بدفع..ناس عايزا بس تغنى بسرعة..

امين: تغنى !!ركوب الركشة بيغنى!!على كدا انتى مرتاحة البتركبى ركشة..

بثينة: يااخو بالله اطلع وخليك فى روحك..

يتبع....


عوافي عليك ياأستاذنا ... بشوفك شطحت في الخامسة دي ..
الاول كلو ماعندي عليهو قول .. وسردك رهيب .. علة الخامسة دي اكان حاصلة تبقى مصيبتنا مصيبة ,,,

:D شتان ما بين حميل ويثبنة وجميل وبثينة ... لقيتك خطييير 61.gif

تحفظاتي الوضعتها داخل الاقتباس شوف ليها معالجة حتى لاتشوه روعة المضمون ... ولييي قدام
صورة العضو الرمزية
أبو أحمد
مشاركات: 1287
اشترك في: الجمعة 2008.5.9 8:35 pm
مكان: الخرطوم_السودان

رد: الركشة..

مشاركة بواسطة أبو أحمد »

والله يا ود عارة قصتك جميلة جداُ والله
أرجو انك تستمر ...
ودعازة
مشاركات: 763
اشترك في: الأربعاء 2009.6.17 3:31 pm
مكان: الرياض

رد: الركشة..

مشاركة بواسطة ودعازة »

فاصل اعلانى..

فايزة: ماشفتى يابتول اليومين ديل فى حلاة مسلسل..

بتول: مسلسل شنو ياانتى ؟ تركى ولامصرى؟

فايزة: مسلسل سودانى و باناسودانى واسمو الركشة كمان..

الركشة ..فخر الدراما الركشاوية..الآن بقناة اناسودانى ..

ركشة ركشة ركشا..او ركشا
ركشة ركشة ركشا..او ركشا

انحنا احلى مشاهدين ..او ركشا
نعاين ومصنقرين .. او ركشا
الركشة طول السنة والسنتين الجايات..برى للأساتيك..
الركشــــــــــــــــــــــــــــــــــــــــــة هى هى ركشة لكن..
ودعازة
مشاركات: 763
اشترك في: الأربعاء 2009.6.17 3:31 pm
مكان: الرياض

رد: الركشة..

مشاركة بواسطة ودعازة »

الحلقة السادسة..

(اضان القفة-راجل المرة)


بثينة: شوف ياراجل لما نصل عند ناس اختى فتحية اوعك تجيب سيرة شوال الطلح الجبتو من الدمازين..


جميل: اجيب سيرتو كيف!!دا طلح بثينتى انا وبس..انا ماجايبو ليك انتى ياست القيافة
(ود الكضااابة قيافة!!قيافة فى عينك-انا فى سرى)..


بثينة: انتا خشم وبس..اكان عامل مكسر فينى كدا ليه لهسع مااتسلفت ليا حق التوب لعرس بت اسمى؟


جميل: يخسى عليك يابسبس..انا ماقلت ليك حتسلف من احمد صاحبى بس مستنيو يجى من المأمورية بتاعتو..


بثينة: واحمد بتاعك دا لو اتأخر وماجا قبل العرس امشى العرس بشنو..
ياراجل شوف ليك زول غيرو وماتجهجهنى ساكت العرس الخميس الجاى يعنى باقى ليو تلاتا ايام..


جميل: ان من متين بتأخر على طلباتك..حاضر ..بكرة بمشى ناس عبد الرازق اخوى وبتصرف..


وفى هذه الاثناء تتجاوز الركشة عربة من الموديلات الحديثة بسرعة شديدة مما جعل الغبار يبدو كعاصفة ترابية..


[frame="2 80"]فاصل اعلانـــــــــــــــــــــــــــــــــــــى

بوبارة : ماشفتى يا فلهمة ماعملو مدرسة خاصة ..

فلهمة: النبى فيك ودى بيدرسو فيها شنو دى..

بوبارة : دى مدرسة ثانوى بس للناس العندها قروش الزينا كدا..

فلهمة : دا مفروض يحصل من زمان لانو التعليم لمة كمان..

مدارس الحناكيش ماعندنا اول و طيش

الفرص محدودة وكراسى للغبش مافيش

ثانويات الحناكيش بكل الاحياء الراقية مش احياء الدراويش

ماتأليش ماتأليش غير مدارس الحنكيش ماتلائيش
[/frame]


امين: الزول دا مالو؟ شن لاحق عججنا كدا!!


جميل: بثينة غطى وشك بالتوب التراب مايأزيك..يااخى ديل ناس ديل..عشان عندهم عربات سمحة يبهدلو فينا كدا؟؟


بثينة: تلاقيو سواق..ولا ود امو عجباو عربتو..ازانا الله يئزيو الحمار..


جميل: دا ماسواق ماشفتى البت الراكبة معاو قدام؟


بثينة: انتا الوداك تعاين للبت شنو؟ راجل مابتخجل على شيبتك..وهى زاتا شن البت..
بنات الزمن ديل بنات؟غير الصعلكة وركوب العربات مع الرجال عندهم شغلا؟تلاقيها واحدة من اياهم..


جميل: يابسبس انا ماشفتها كويس ..صدفة هى وقعت فى عينى لما العربية عدت..هو انا بشوف غيرك؟وهى دى منو الزيك بالله..
(احييا من كضبو الراجل الخايب دا ضافراو مطلعة زيتو وبيكسر لسة فى تلج!!فى سرى لكن بعد شوية بجاهر عديييل كدا)..


امين: يااخت ماتتذنبى ببنات الناس ساى..ممكن تكون اختو ولا زوجتو..


بثينة: وليه ماتكون واحدة من اياهم..هو فى راجل اليومين ديل بطلع اختو معاو؟؟


امين: ليه مافى!!ماهسع اهو اخونا مطلعك معاو..


بثينة: دا ماظااهر انو راجلى..


امين: ظاهر ليك انتى لكن هسع الناس الماشة فى الشارع ديل بيعرفو كيف انو راجلك؟


بثينة: اي انا صغيرة ومابيظهر على العرس لكن توبى دا مابورى انى متزوجة..


امين: بيورى انك متزوجة يمكن..بس مابيورى الاخو المعاك انو زوجك..


بثينة: بعد دا الناس بطريقتا..يعنى امشى معلقة ورقة مكتوب عليها الراجل الجنبى دا راجلى ولا كيف؟


امين: بس كدا وصلنا..يعنى لا التوب ولاغيرو بيورى الناس انو الواحدة متزوجة والمعاها بيكون زوجها..
عشان كدا حقو الواحد مايتسرع فى الحكم على غيرو ولا ماكدا؟


بثينة: بس البت ظاااهر انها مازوجتو..(دى يفهموها كيف- امين فى سرو)..


جميل: يااخو بالله شفتا مرتى دى كيف نجيضة ومابتتغلب..والله يابسبس مفروض تبقى محامية..
(ان شاء الله تموت انتا وهى ياحمار-خلاص ماقادر استحمل الزول الغبى دا فى سر امين وفى سرى)..


تمر الركشة بصينية النخلة ولازال اب جيبين بوسطهابصافرته اللعينة..


يتبع...
__________________
ودعازة
مشاركات: 763
اشترك في: الأربعاء 2009.6.17 3:31 pm
مكان: الرياض

رد: الركشة..

مشاركة بواسطة ودعازة »

الحلقة السادسة..

(اضان القفة-راجل المرة)


بثينة: شوف ياراجل لما نصل عند ناس اختى فتحية اوعك تجيب سيرة شوال الطلح الجبتو من الدمازين..


جميل: اجيب سيرتو كيف!!دا طلح بثينتى انا وبس..انا ماجايبو ليك انتى ياست القيافة
(ود الكضااابة قيافة!!قيافة فى عينك-انا فى سرى)..


بثينة: انتا خشم وبس..اكان عامل مكسر فينى كدا ليه لهسع مااتسلفت ليا حق التوب لعرس بت اسمى؟


جميل: يخسى عليك يابسبس..انا ماقلت ليك حتسلف من احمد صاحبى بس مستنيو يجى من المأمورية بتاعتو..


بثينة: واحمد بتاعك دا لو اتأخر وماجا قبل العرس امشى العرس بشنو..
ياراجل شوف ليك زول غيرو وماتجهجهنى ساكت العرس الخميس الجاى يعنى باقى ليو تلاتا ايام..


جميل: ان من متين بتأخر على طلباتك..حاضر ..بكرة بمشى ناس عبد الرازق اخوى وبتصرف..


وفى هذه الاثناء تتجاوز الركشة عربة من الموديلات الحديثة بسرعة شديدة مما جعل الغبار يبدو كعاصفة ترابية..


[frame="2 80"]فاصل اعلانـــــــــــــــــــــــــــــــــــــى

بوبارة : ماشفتى يا فلهمة ماعملو مدرسة خاصة ..

فلهمة: النبى فيك ودى بيدرسو فيها شنو دى..

بوبارة : دى مدرسة ثانوى بس للناس العندها قروش الزينا كدا..

فلهمة : دا مفروض يحصل من زمان لانو التعليم لمة كمان..

مدارس الحناكيش ماعندنا اول و طيش

الفرص محدودة وكراسى للغبش مافيش

ثانويات الحناكيش بكل الاحياء الراقية مش احياء الدراويش

ماتأليش ماتأليش غير مدارس الحنكيش ماتلائيش
[/frame]


امين: الزول دا مالو؟ شن لاحق عججنا كدا!!


جميل: بثينة غطى وشك بالتوب التراب مايأزيك..يااخى ديل ناس ديل..عشان عندهم عربات سمحة يبهدلو فينا كدا؟؟


بثينة: تلاقيو سواق..ولا ود امو عجباو عربتو..ازانا الله يئزيو الحمار..


جميل: دا ماسواق ماشفتى البت الراكبة معاو قدام؟


بثينة: انتا الوداك تعاين للبت شنو؟ راجل مابتخجل على شيبتك..وهى زاتا شن البت..
بنات الزمن ديل بنات؟غير الصعلكة وركوب العربات مع الرجال عندهم شغلا؟تلاقيها واحدة من اياهم..


جميل: يابسبس انا ماشفتها كويس ..صدفة هى وقعت فى عينى لما العربية عدت..هو انا بشوف غيرك؟وهى دى منو الزيك بالله..
(احييا من كضبو الراجل الخايب دا ضافراو مطلعة زيتو وبيكسر لسة فى تلج!!فى سرى لكن بعد شوية بجاهر عديييل كدا)..


امين: يااخت ماتتذنبى ببنات الناس ساى..ممكن تكون اختو ولا زوجتو..


بثينة: وليه ماتكون واحدة من اياهم..هو فى راجل اليومين ديل بطلع اختو معاو؟؟


امين: ليه مافى!!ماهسع اهو اخونا مطلعك معاو..


بثينة: دا ماظااهر انو راجلى..


امين: ظاهر ليك انتى لكن هسع الناس الماشة فى الشارع ديل بيعرفو كيف انو راجلك؟


بثينة: اي انا صغيرة ومابيظهر على العرس لكن توبى دا مابورى انى متزوجة..


امين: بيورى انك متزوجة يمكن..بس مابيورى الاخو المعاك انو زوجك..


بثينة: بعد دا الناس بطريقتا..يعنى امشى معلقة ورقة مكتوب عليها الراجل الجنبى دا راجلى ولا كيف؟


امين: بس كدا وصلنا..يعنى لا التوب ولاغيرو بيورى الناس انو الواحدة متزوجة والمعاها بيكون زوجها..
عشان كدا حقو الواحد مايتسرع فى الحكم على غيرو ولا ماكدا؟


بثينة: بس البت ظاااهر انها مازوجتو..(دى يفهموها كيف- امين فى سرو)..


جميل: يااخو بالله شفتا مرتى دى كيف نجيضة ومابتتغلب..والله يابسبس مفروض تبقى محامية..
(ان شاء الله تموت انتا وهى ياحمار-خلاص ماقادر استحمل الزول الغبى دا فى سر امين وفى سرى)..


تمر الركشة بصينية النخلة ولازال اب جيبين بوسطهابصافرته اللعينة..


يتبع...
__________________
ودعازة
مشاركات: 763
اشترك في: الأربعاء 2009.6.17 3:31 pm
مكان: الرياض

رد: الركشة..

مشاركة بواسطة ودعازة »

الحلقة السابعة ..

(نفس الشى اضان القفة)

تنطلق صافرة اب جيبين مرة اخرى كعهدها دوما..
يلتفت السائقين كالعادة ولكم تبهج تلكم الالتفاتات الخائفة اب جيبين..تشبع غروره بأن الكل يرهبه ويخشى صافرته..


[frame="3 80"]فاصل اعلانى..


الخدمة الوطنية هى سند البلاد
هى فرصة البنات كى تسبق بالدراسة الاولاد
هى الحل لبورة الشابات..تتخرج اولا وتؤسس نفسها لك ايها الشاب..
الخدمة الالزامية..هى حل كل المشكلات..
ماكل شارب نايم ملح ولاتحاسب الجرسونات.. [/frame]


اب جيبين : اقيف ياركشة ..

امين : خير اللهم اجعلو خير..الزول دا مابيفتر من تصفيرو الكتير دا..لو عندو احساس هسع مفروض يكون طرش ..

جميل : يازول اسكت مايسمعك يعمل ليك مشكلة..

امين : انحنا وين وهو وين ..اصلو يسمعنا كيف؟

بثينة : انتا ياراجل بتتحشر كدا ليه؟ مخيرين هم مع بعض..الا تدخل بوزك دا فى كل شى؟!!

اب جيبين : شنو يافردة كيفك؟

امين : (مستغربا) تمام ياجنابو فى شى؟

اب جيبين : هو ناس العقيد ديل بيبقو ليك؟

امين : كيف ديل اهلنا (الحرب خدعة) فى شى؟ عايزنى اوصيهم ليك بشى؟

اب جيبين : مابتقصر ياابو الشباب..بس بالله فهمن انو مافى مشكلة بيناتنا ..

امين : الله لا يجيب مشاكل يازول..ماعندك اى مشكلة..فى شى تانى؟

اب جيبين: لا مافى بس اتوصى بينا وكدا..اتفضل الله معاك..

سبحان المغير من حال لحال..يتغير اب جيبين مع امين كل هذا التغيّر..كيف لا ..
والواسطة قد مددت ارجلها وتمطت بكل الاماكن والطرقات..كيف ولا ..
والقانون امسى نسبى والدساتير تتغير مابين ليلة وضحاها..من ياترى الاقوى الواسطة ام الضمير؟


[frame="1 80"]فاصل اعلانى..


التمساح لاستجلاب العمالة الاجنبية
استرح ايها السودانى ودعنا نجلب لك من يعمل بدلك
التمساح يهنئ الشعب الكريم بوصول باقة من البنغال والنيبال
التمساح يعينكم على الاستمتاع باوقاتكم
لم تعمل وتتعب وانت تستطيع ان تجعل غيرك يعمل
التمساح رائد العمالة الاجنبية وياسعار لا تقبل المنافسة
التمساح اسم فى عالم الاستقدام
[/frame]


امين : والله الزول دا منفوخ تراهو على الفاضى..معقول دا اب جيبين المؤذى!!سبحان مغير الاحوال!!

بثينة : هسع دى العسكرى المطرطش دا موقفنا ومعطلنا عشان كلمتينو الفاضيات ديل؟

امين : احمدى ربك على كدا..والله انا فى الفردة الاخيرة موقفنى ساعة عشان قال المرايا مامثبتة ويمكن تطير تضرب ليها زول ولا عربية..

بثينة : هم اصلم كدا واقفين لجنس دا ..الماشى يشيلو منو والجايى يشيلو منو..

جميل : وهسع مالو اتغير معاك كدا؟

بثينة: ياراجل انتا ماعندك فهم ولاشنو؟ ماظاهر عرف الزول دا قريبو ضابط عشان كدا جارى ناعم معاو..
انتا مخك دا وين ماسمعت كلامن؟

امين : زى ماقالت الاخت افتكر انو قريبى ضابط ودى قصة طويلة..

بثينة : اها يااخو بعد مانصل اول المحطة بتودينا مشوار لطرف النخيل؟

امين : جدا مافى مشكلة..

بثينة : احنا ماشين جنب محطة الدايش..بتودينا بكم؟

امين : مافى مشكلة ادفعو المعقول..

بثينة : والمعقول دا يااخوى كم؟ عشان مابعدين نقعد نتفاصل قول بتودينا بكم عشان من اول نكون متفقين..

امين : انتو بتمشو المشوار دا بكم؟

جميل : والله بنم..

بثينة : (مقاطعة لجميل) بنمشيو بتلاتا جنيه..اها بتودينا؟

امين : المشوار دا حقو خمسة جنيه..بس ادفعو الاربعة بوديكم..

بثينة : ياود الناس ماتبقى صعب وباركا بالتلاتا..(هامسة لجميل) دا كلو من تشوبرك ..

امين : والله لو بتخارج كنتا وديتكم..

بثينة : طيب بنديك تلاتا ونص..

امين : يااخت المشوار انتى عارفاو واكيد مامشيتو قبل كدا باقل من اربعة جنيه..

بثينة : والله انت صعب خلااس..اتفقنا ..اربعة اربعة مجبورين..عاد نسوى شنو..

جميل : يااخى ماتراعينا شوية..

امين : والله راعيتكم يااخونا..

بثينة : انتا ياراجل الموضوع ماخلص شنو تانى ليك ..ماكلو منك ومن خشمك المابتعرف تسدو دا..

الركشة تغير اتجاهها المعتاد لتتجه الى طرف النخيل..امين محتار لامر هذا الرجل وخنوعه المهين لزوجته..فهو لايستطيع حتى ابتدار حوار معه..او حتى اكمال جملة لاترتضيها هذه البثينة المفترية..
ترى ماذا يجعله يستحمل هذه المعيشة مع إمرأة مثلها..نعم لولا إختلاف الآراء لبارة النساء..
ولكن ابهذه البثينة رأيان مختلفان؟!!

يتبع....


__________________
ودعازة
مشاركات: 763
اشترك في: الأربعاء 2009.6.17 3:31 pm
مكان: الرياض

رد: الركشة..

مشاركة بواسطة ودعازة »

[الحلقة الثامنة..


(اضان القفة-الاخيرة)

بينما الركشة فى طريقها الى طرف النخيل تمر بمنطقة كأنها بحيرات متقطعة..الامطار مياهها راكدة غير مصرفة..الركشة تسير بدروبات متعرجة تاركة خلفها ثلاثة خطوط كأنها آثار حيّاتٍ على الارض..

[frame="2 80"]
فاصل اعلانى..

وليد دارفور للتدريب الحربى وفنون الملشيات

وليد دارفور يأخذك الى العالمية وفنادق الخمسة نجوم الباريسية

نمدكم بالتاتشرات المجهزة بالراجمات والمضادات للطائرات

وليد دارفور عالم جديد فى فن التعامل مع المحكمات الدوليات[/frame]


جميل : بالله شوف المطر دا عامل بالشوارع دى كيف!!


امين : بس فالحين يشيلو ضرائب فى الفاضية والمليانة..هسع الشوارع دى منو المفروض يعملا ردميات؟ياخى اقلاها يعملو مصارف للموية دى ماتتجمع وتعمل للناس امراض..


جميل : ياخى انا لما كنتا فى الخليج الشوارع تفتح النفس..جنس البهادل دى اصلو مابتشوفا..


بثينة : انتا وقتين الخليج دا شارققك كدا الرجعك شنو لو ماغاوى فقر..


جميل :الرجعنى ماعارفاو؟ مارجعتينى انتى يابسبس..


بثينة : شوف الراجل وكضبو..انا زاتى ماكنتا معرساك لما كنتا مغترب..رجعتك كيف يعنى؟


جميل : مارجعتا عشان اعرسك يابسبس..


بثينة : اها اتسجمتا وعرستنى..مالك مارجعتا تانى؟


جميل : ارجع كيف وانا اتلميت فيك؟ ارجع واسيبك كيف؟


بثينة : ارجع زى مخاليق الله..مابيجو يعرسو وبعدا بيرجعو يستقدمو نسوانم..


جميل : لكن يابسبس اقامتى ماكانت بتخلينى اعمل ليك استقدام..وبعدين بعد وفاة الوالد ارجع كنتا يعنى واسيب امى براها كيف؟


بثينة : ياخوى ابوك مات بعد عرسنا بسنة يعنى دا ماكان سببك..


جميل : ماقلنا ليك السبب الاقامة..


امين : مالا الاقامة؟


جميل : اقامتى كانت عامل تربية مواشى..ودى اقامة لا بتتغير لمهنة تانية ولا بتقدر تجيب بيها مرتك..


امين : معليش للتطفل بس انتا اصلا الوداك باقامة راعى شنو وشكلك موظف؟


جميل : الغبا وموضة الاغتراب..


بثينة : الغبا ولا غشاك ودحلتكم؟ قال ليك المهنة بتتغير وشال قروشك سااى..


امين : هو كمان الاقامة بتاعت الراعى دى بيشتروها؟!!


جميل : والله ديل لو لقو اقامة ناقة كانو باعوها..


امين : والله الكويس رجعتا واشتغلتا فى بلدك معزز مكرم..


بثينة : معزز مكرم!! وينو التعزز دا؟ ياها الماهية البتطير قبل يوم خمسة فى الشهر؟ولا البطن البتقوم بنصها من الاكل؟


امين : هنا مامرتاح وهناك مامرتاح..اقلاها الواحد يكون بين اهلو..


بثينة : وهم الاهل ديل وينم؟ كلو واحد شال نصيبو من الميراث ومابتلاقو الا فى المناسبات..راعى راعى اخير من هنا والمعيشة الصعبة دى..


جميل : يااخونا البيت ماتفوتو..البيت هداك القدامو شجرة النيمة..


بثينة : عليك الله قربنا من الباب الطين دا مايوقعنا يكسرنا..


امين : جدا يااخت..


تقيف الركشة امام الباب اللبنى وشجرة النيمة ..


[frame="1 80"]فاصل اعلانى..

الدحدوح لاحدث وسائل التفتيح والمسووح

الدحدوح لكريمات تظليط الوشوش وعمل الجروح

الدحدوح يهنئ الشابات والخالات والعمات بوصول كريم فتوح

كرم فتوح الكريم السحرى لقلبك لميرندا ولو كنتى بيبسى

الدحدوح رائد عالم التظليط والتظليل وشفاء الجروح[/frame]



بثينة : هاك دا حساب المشوار الاول ودى الاربعة جنيه بتاع المشوار دا..

امين : شكرا ..يديك العافية..

جميل : ماتتفضل معانا شوية يااخو..

امين : مابستغنى ..بس الواحد اليمشى يسك رزقو..

جميل : طيب مع السلامة..

امين الله يسلمك..فى امان الله..

ثم تستعدل الركشة مستعدة لمشوار العودة الى اول المحطة ..


يتبع....
مغلق

العودة إلى ”مكتبــــــة ودعازة“