امي ثم امي ثم امي ..
اسألك العفو عني ..
يا من حملتني وهنا علي وهن ..
لتكون الجنة تحت قدميك
عندما يكون الكلام عنك
تهرب الحروف لعدم قدرتها للصمود امام عظمتك
ويا يمة رسلي عفوك ينجيني من جور الزمان ...
شـــــــــــــــــــــــــــــــــــــــــوق
وحنــــــــــــــــــــــــــــــــــــــان
وريـــــــــــــــــــــــــــــــــــــــد
(علاء الدين عبد الرحيم)
رويان من قليبك يمه شوق وحنان وريد
غرقان فى عفوك والله من ماقم وليد
***************
يفضل فى القلب ذكراك مهما اكون بعيد
كل مازاد عفوك عليّ اقول هل من مزيد
ماسافرت شان ارتاح اعيش هاني وسعيد
ولا هم العرس يايمه كان بيت القصيد
***************
لا تقولي إنو فات خلاكى جافاك الوليد
شاغلاه المداين العايمه آسراتنو غِيد
ما بشغلني عنك حاشا لا مال لا وليد
ولا بتمنعني شوفتك يمه أغلال الحديد
*************
ما كان قصدي هجرك يمه لما رحل بعيد
قصدى امسح دموع بالحسرة جارية على الخديد
لا تلومينى إن قصرت او اتأخر بريد
ما هو جفا السبب والله ما نسيان أكيد
************
بين اتنين وليدك يما بالو صِبح شريد
بين يرضيك وبين يا والدة يرضى طموح عنيد
رضاك يايمه كل منايا وغاية ما أريد
تحقيق الهدف ما ببقى بالتمن الزهيد
***************
يومي قليبي فى ذكراكِ يجترً ويعيد
طيفك ما ببارح لحظة حاميني الغميد
الله براهو عالم يمه مشغول بيك شديد
ومنايا جنبك اعيش والله لو كان ليا ايد
**************
لازم يمه انسيك الشجن واللوعة والفرح الوئيد
لازم تنسي زمناً فات وتعيشي زمن ولِيد
لازم كل تعبك فينى اتعبو فيك وازيد
ولازم اشيلا همومك والبسك الجديد
************
دينك فوقى ما بتحلا لا يوم الوعيد
شبابي فِداكي وكان ما كفى ليك عمري الوحيد
ما بتلهيني عنك دنيا وما بمسكني قيد
ما إنتي الفرح والراحة والهوى والرصيد
***********
ليكى سلامي ما محدود من الأرقام يزيد
عدد ذرات تراب الكون جبال وسهول وبيد
عدد ما أشرقت أنوار وطلّ صباح جديد
وعدد ما نسمة هبت باردي داعبت الجريد
***********
كلو منايا تلقى العافية والعمر المديد
تفرحي بيا يوم الفال تباركيلي الجديد
يوم داك بالفرح نتباكى ونتقالد شديد
وتبقى الدنيا بسمت ليا وجات زي ما أريد
**********
جاييك جاي لي عينيكي منها ما أحيد
ومنها نستمد الراحة ومنك نستفيد
ويتمدد فرحنا ويبقى عمري انا كلو عيد
وفى حضنك أكيد للدنيا لون وطعم جديد