اعترف..
هيمان في ريدك منجرف؟
في العاشقين جايل تحوم
بجناح خيال..
حلَّقت حصَّلت النجوم
شان قلبك الحاني اتخطف؟
يا للأسف..
موت بي حنانك والهموم
الأمر هسع إختلف!
والجو ملبد بالغيوم
# #
كان كفاك ريد الأهل
وحنانهم الفايض بحر
كان كفاك طيف الأمل
العاش جواكا وما انحسر
كان كفاك قصص العشق
المنها بناخد العبر
كان كفاك قصص الألم
الياما قصرت العمر
كان كفاك قصص الغرام
الياما وصَّلت القبر
كان كفاك كونك فراش
من وردة لي وردة بتمر
تعشق تفاصيل الطبيعة
وتوصفا..
ترسم كمان أجمل صور
تنثر حروفك..
في البساتين والزهر
وإنت حر!
تمنح الود للجميع
نشوان قليبك بالفرح
من غير مقابل تنتظر
.......
بس إنت من جنس البشر
محال في يومن تعتبر..
عملت إيه؟!
غرقت في بحر الهيام
وانتابتك حمى الجنون
إعصار شعر
والريدة زي أغزر مطر
مالك فترت من الغرام؟
عايز شوية إهتمام؟
يا للأسف..
موت بي حنانك والهموم
الأمر هسع إختلف!
والجو ملبد بالغيوم
# #
اعترف..
إنو الغرام.
زي بحر ما ممكن يجف
اعترف..
إنو العشق..
لا بتنسي لا بتحذف
وإنك ضعيف..
من يوم ما قلبك انسرق
فضلت مسلوب الإرادة
ولسة لسة بتحترق..
حلفت كملت الحلف..
إنك سعيد..
لكن الحقيقة المرة جد
إنك تعيس
رغم المكابرة للأسف!
...........
ومشيتو مشوار العشم
علقت في نص الطريق!
لا وصلت لي سابع سما
لا رجعت أرضك تتعرف!
# #
اعترف..
هيمان في ريدك منجرف؟
في العاشقين طايف تحوم
بجناح خيال..
حلَّقت حصَّلت النجوم
شان قلبك الحاني اتخطف؟
يا للأسف
موت بي حنانك والهموم
الأمر هسع إختلف!
والجو ملبد بالغيوم