الفار وقف جنب القفص.. سافر خيالو سرح بعيد ..لو أكرمو رب العباد ..
جكسوية واحدي من الجداد يتزوجا ..
ويعيش سعيد تكفيهو لا شركا يصيدو .. ولا كديسة تحميهو من حظو التعيس ..
فطورو بيض ..
غداهو بيض ..
عشاهو بيض ..
وأحلامو بيض ..
صاحبنا ما إتردد وقال : يا الجدادة تعالي جاي أنا عندي ليكي كلام كتير ..
قالتلو: هاي يا الفار أخوي إن شاء الله خير.. قاليها: خير ..
بس منكسف ..
قالتلو: قول ما تنكسف..
الفار رجف .. طقطق أصابعينو ووقف ..
قال: للأسف أنا مابقول .. إحساسي واضح ومشاعري ماعايزة الفضول ..
الجدادة استغربت ، إتنفضت ، وإتهوززت ..
قالتلو: ياخ ماتقول يافار ..
صاحبنا قام ، قاليها: طمعان في الجوار .. الجدادة إتدللت.. قالتلو ..هييي ما إنت جار ..
الفار سرح .. راح الكلام منو ووقع .. قال للجدادة : بلاش دلع ..
لو جاكي فار طالب القرب .. طالب إيديك ..طالب الغرام من مقلتيك .. رايك شنو ؟؟
قالتلو: إييييييييك .. مايسمعك في الحلة ديك ..
الفار كضم ..شم الوضع .. شتت مشى .. وعيونو من كتر الزعل ماشايفة حاجة .. مطششة
ومشاعرو كيف متخربشة ..
حرد الفطور .. حرد العشا .. ورسم على جدار الزمن صورة الجدادة ونقشا ..
وقال الجدادة قست علي .. وعملت علي متحنكشة ..
باكر بعرس ستها .. تمسح دموعي تقشقشا
ودكبوشيــــــــــــــه