حكاوي مدرسيه

المشرف: بانه

أضف رد جديد
صورة العضو الرمزية
لمسة جمال
مشاركات: 3654
اشترك في: الأربعاء 2011.5.4 4:55 pm
مكان: الرياض

حكاوي مدرسيه

مشاركة بواسطة لمسة جمال »

صورة

المدرسه وماادراك ما المدرسه
طبعا للناس الدرسوا واتخرجوا بيشتاقوا للمدرسه
وبحنوا لايامها وبتمنوا لو يرجعوا ليها ويعيدوا ذكرياتها
وللحاليا بدرسوا العدو اللدود هي المدرسة :017:
واحلى كلمه بسمعوها الاجازة قربت banana.gif
ومن هنا عاوزين نسمع حكاوي عن المدرسه happy0005.gif
سواء للدرسوا وخلصوا او للحاليا بدرسوا(الله يعينكم ويعيني يارب :001: )
احكي اي موقف لاصق في الذاكره بخصوص المدرسة والدراسه
والمدرسين والمدرسات والزملاء والزميلات
موقف طريف....حزين....ممل...مفيد....اي حاجه
او حتى لو عارف موقف لاحد من معارفك وحصل ليهو في المدرسه
وارجو تفاعل الجميع .... banana.gif
وانا شخصيا الحكاوي حقتي بالكوم والردوم وخصوصا بعد المدرسه ماتفتح
يومي الدراسي كلو مواقف :004: .....الله يستر :001:
صورة العضو الرمزية
ابن عوف
مشاركات: 7729
اشترك في: الخميس 2008.6.19 7:51 pm
مكان: وسط اهلى الطيبين وسمحين

رد: حكاوي مدرسيه

مشاركة بواسطة ابن عوف »

عايزنا نرجع زى زمان قول للزمان ارجع يا زمان

والله كتيرة وعايزة ليها تبحت فى الذاكرة

اما انا ذكرياتى كلها هرجلة وضرب

موضوعك روعة وبرجع ليك بعد التذكرة

مودتى
صورة العضو الرمزية
لمسة جمال
مشاركات: 3654
اشترك في: الأربعاء 2011.5.4 4:55 pm
مكان: الرياض

رد: حكاوي مدرسيه

مشاركة بواسطة لمسة جمال »


اها انا ابدأ......
في يوم من ايام المدرسه الاعتياديه...
انا وشلتي كنا عباره عن 6بنات وقاعدين في الفصل
والونسه بأعلى الصوت والضحك وفي النص شكل ونقار
وتبادل الشمارات والقيل والقال وكل مايخطر في بالك
المهم وفوق راسنا العريفه(نفسي اعضيها)
اسكتوا اسكتوا مشان مااعطي الاستاذة اسمايكم(سوريه وكده يعني)
وطبعا نحنا ماخدين بقول طنش تعيش تنتعش
لانو معروف انو تهديد وحياخد ورقة الاسامي
وحيطلعوا بره الفصل وحيعملو فيها ودوها
في حين انهم مستحيل يعتبوا مكتب الاستاذات
وحيقولوا الكلام المعتاد الاستاذة قالت لو ما سكتوا
حتكتبوا تعهد وحنتصل على اهاليكم والى اخره من الكذبات......
المهم وقامت اللي ماتتسمى العريفه ادت الورقه لنائبتها(الخدامه حقتها)
وقالت وديها للاداريه ومتفقه معاها انو تغشنا وماتوديها بجد
والنائبه الغتيته كان بينا وبينها حساسيه فظيعه
والمصيبه انها سودانيه يعني مفروض تقيف معانا مش ضدنا
وقامت سيادتها ودت الورقه للاداريه الغول (دي اكتر اداريه مخيفه)
وجات قالت لينا استاذة بسمه عاوزاكم واحنا طبعا ماصدقنا
قامت قالت والله قالت لو مامشيتوا ليها حتجيكم وماحتشوفوا خير
بقينا مابين انو نمشي والبت تكون كذابه ماودت الورقه
وحنكشف روحنا برانا
وبين انو مانمشي وهي تجينا وحنسمع كلام فاضي
والتهزيء حيكون قدام الفصل كلو
قمنا دقينا قلبنا واتحركنا والله كنا زي السايقنهم لحبل المشنقه
ووصلنا غرفة الاعدام وبسمه هانم بدت تكورك بطول حسها
وانا وصحبتي لمن هي كوركت بقينا نضحك بطول حسنا
وكل مانضحك هي عفاريتها بقوموا زياده
وطبعا احنا داسين وشنا عشان مانظهر انو انا والبت القاعدين نضحك
المهم بسمه هانم اتحمقت بضحكنا وفتحت الدرج
واتت لحظه النهايه المره
وطبعا متوقعين انو الحيطلع من الدرج
دفتر التعهدات ومنه الاتصال على الاهل
وقلبي صوتو بقى مسموع
والحمد لله ماهو الطلع
الطلعت عصايه خشب طول الباب
واااي الله يستر علينا
لكن مامشكله ضربه وحتوجعنا شويه ولامن شاف ولا من دري
المهم جات والبنات كل واحده ترجع ورا التانيه
عشان معروف يدها زي المرزبه
وانا عملت فيها البطل الهمام ومديت يدي بكل شجاعة
واخدت خبطه الله لا وراكم
وبقيت راجعه الفصل وانا بضحك باعلى ماعندي من صوت
وبسمه لقطت ضحكي وتنادي يابنت تعالي هنا
وانا عملت فيها طرشه ولا كإني سامعه حاجه
ودخلت الفصل وطبعا بنات الفصل متوقعين اجي زعلانه او باكيه
وعيونهم نططت لما لقوني داخله بضحك
وبعدها شرفت باقي الشله وكل واحده شكلها براها
وعرفت انو رفو(صحبتي وروح روحي وده دلعها برفو)
لما جا دورها في الضرب قعدت تزوغ يدها لما
ادتها نهره واستسلمت للوضع الراهن وللحقيقه التي لامهرب منها
واخدت نصيبها....
والتانيه اضربت مرتين مره عشان السبب الانا اضربت بيهو
والمره التانيه عشان اظافرها كانت اطول من المسموح
وطبعا البنات دخلو بقينا انا وثلاثه بنات بنضحك حد الدموع
والخامسه بتبكي بطول حسها والدموع عشره عشره
والسادسه تبكي شويه وتضحك شويه(حننتني والله)
واحنا المجموعه الضاحكة لما نشوف ردة فعل البتين
بزيد الضحك وبغلبنا نسكت وديك يزيدوا بكا
وطبعا بدينا تنتيف للنائبه الغبيانه ولغايت اليوم لما نتذكر
الضربه بنشاكلها من اول وجديد
وتصدقوا لغايت اليوم يدي محمره(الهي اشوف فيكي يوم يابسمه)
وفعلا كان ضربه حاره وحركه نائبه بايخه بس برضو ذكرى روعة والله
صورة العضو الرمزية
لمسة جمال
مشاركات: 3654
اشترك في: الأربعاء 2011.5.4 4:55 pm
مكان: الرياض

رد: حكاوي مدرسيه

مشاركة بواسطة لمسة جمال »

ود ابنعوف كتب:
عايزنا نرجع زى زمان قول للزمان ارجع يا زمان

والله كتيرة وعايزة ليها تبحت فى الذاكرة

اما انا ذكرياتى كلها هرجلة وضرب

موضوعك روعة وبرجع ليك بعد التذكرة

مودتى

الروعه مرورك ياغالي
وفي انتظارك وانتظار ذكرياتك
على احر من الجمر
ولك خالص الود والتقدير
ودمت ودام تواجدك العطر
صورة العضو الرمزية
dream-lady
مشاركات: 25355
اشترك في: الجمعة 2011.4.29 10:32 pm
مكان: الرياض

رد: حكاوي مدرسيه

مشاركة بواسطة dream-lady »

جيبي لي بنبر وامشي جيبي لي فنجاني خليتو هناك عند ابنعوف.....

عندي قصص بس ارتبها :d:
صورة العضو الرمزية
ود النصر
مشاركات: 1636
اشترك في: الأربعاء 2007.6.13 9:31 am
مكان: قطر
اتصال:

رد: حكاوي مدرسيه

مشاركة بواسطة ود النصر »

[align=center]زمااااااااااان يا لمسة
كنا نذهب للمدرسة بي شنطة
صناعة منزلية لها اياد طويييييلة

فكانت الرحلة من المنزل للمدرسة
عبارة عن منافسة علي من يحمل
شنط البقية عندما يهزم في منافسة
لعب البلي.
هُزمت يوم السبت وحملت اربعة
شنط فتوقفت عند محطة البصات
وعلقتها جميعاً في السلم الخلفي
للبص واعتقد انا الى يومنا هذا
مربوطة في سلم البص.[/align][/size]
صورة العضو الرمزية
لمسة جمال
مشاركات: 3654
اشترك في: الأربعاء 2011.5.4 4:55 pm
مكان: الرياض

رد: حكاوي مدرسيه

مشاركة بواسطة لمسة جمال »

dreem-lady كتب:
جيبي لي بنبر وامشي جيبي لي فنجاني خليتو هناك عند ابنعوف.....

عندي قصص بس ارتبها :d:
ههههههههههههه سمح ياحبوبه عجوز الا تتذكري لي محو الاميه banana.gif
واحنا في الانتظار ياغاليه بس اتذكري قصص عنك يعني ماتجيبي
سيره اي قصة تخصني
صورة العضو الرمزية
لمسة جمال
مشاركات: 3654
اشترك في: الأربعاء 2011.5.4 4:55 pm
مكان: الرياض

رد: حكاوي مدرسيه

مشاركة بواسطة لمسة جمال »

ود النصر كتب:[align=center]زمااااااااااان يا لمسة
كنا نذهب للمدرسة بي شنطة
صناعة منزلية لها اياد طويييييلة

فكانت الرحلة من المنزل للمدرسة
عبارة عن منافسة علي من يحمل
شنط البقية عندما يهزم في منافسة
لعب البلي.
هُزمت يوم السبت وحملت اربعة
شنط فتوقفت عند محطة البصات
وعلقتها جميعاً في السلم الخلفي
للبص واعتقد انا الى يومنا هذا
مربوطة في سلم البص.[/align][/size]
هههههههههههههههههههههههه
لكن طلعت تفتيحه THUMBUP.gif
واكيد اصحابك ماخلوك :064:
نورت البوست بتواجدك
وفي انتظارك ...
وماتحرمنا من قصصك
صورة العضو الرمزية
مسلمة وافتخر
مشاركات: 9423
اشترك في: الخميس 2008.11.13 5:16 pm
مكان: حيث اكون نفسى

رد: حكاوي مدرسيه

مشاركة بواسطة مسلمة وافتخر »

هااااى لموستى حبيبتى كل سنة وانتى طيبة ومضان كريم

هههههههههههه
انتى عارفة يا بت يا لمووس انا مصايبى ايام المدرسة من كترتها

حتى بوستيكى دا ما بكفيهو :smiels0:

اقول شنو يا لموس جرى لى بنبر وختيهو لى جنب بنبر دريمو دى
عشان اقعد واطلع المستخبى كلووووو :d:
صورة العضو الرمزية
عمار ود الشرفه
مشاركات: 2218
اشترك في: السبت 2009.7.25 11:08 pm
مكان: محل تمسي ترسي

رد: حكاوي مدرسيه

مشاركة بواسطة عمار ود الشرفه »

هع هع ,,, انتي عارفه يا لمسه ,, انا السنه الجايه خريج من الجامعه بس اجمل ايامي العشتها كانت ايام الثانوي واكتر اصحاب عندي اصحاب الثانوي حتي لما جيت الجامعة سكنت مع اصحاب الثانوي ,,
والمواااااقف كتيره ,, ولو علي ضربكم ده والله انتو عايشين في نعيم ,,
طبعاً كل زول درس الثانوي في الارياف بكون اخد ليهو عركه كدا لما قرا موضوعك ده لانو هناك المدارس عالم تاني ,,


اخر جلده بتذكر اخدها ,, كانت من مدير جابوهو جديد من خارج حلتنا
ويوم كدا جاتنا استاذة الفيزياء وتقريباً كنا في تانيه ثانوي ,, ووزعت الكتب ,, اكتشفت انو في كتاب ناقص ,, مشت للمدير وقالت ليهو الاولاد ديل سرقوا كتاب ,,,( بي قلبي قولت ليها كتاب ولأ بطيخه :d: ) المهم المدير احمق ,, قال جابت ليها سرقه كمان ,, هع
كورك للاساتذه كلهم واعلنو حالة الاستنفار في المدرسه ومرقوا الطلاب طابور نص النهار ,, ووقفونا ليك صف ,, والاساتذه وقفو صف ,,
نظام الجلد : يمر الطالب علي الاستاذ الاول 7 سيطان في الفخز
الاستاذ الثاني : 7سيطان في اليدين
الاستاذ الثالث : 4 سيطان في الظهر
الاستاذ الرابع : 5 سيطان فلقه (ترفع رجليك وانت جالس في كرسي وتنجلد)

عندي صاحبي كان قاعد جنبي في الفصل ,,, قدر ما نلاقي بعض بيقول لي انا من ما اشوفك جلدي بكش وباخد لي انكراشه من اليوم داك ,,

المعبود بالحق نحن لما دخلنا الفصل الواحد زي العندو كاروووشه يحكحك في جسمو كلو
والمفاجئه الاستاذه اكتشفت انو الكتاب ما انسرق ,,, نستو هي في المكتب

وغاااااااااااغ انا من الثانوي ... المدارس هنا بربوك والاستاذ ببقي ابوك ,, بس حالياً التعليم في الارياف انتهي (الله ينهي الكان السبب)
صورة العضو الرمزية
لمسة جمال
مشاركات: 3654
اشترك في: الأربعاء 2011.5.4 4:55 pm
مكان: الرياض

رد: حكاوي مدرسيه

مشاركة بواسطة لمسة جمال »

ذات الشجون كتب:
هااااى لموستى حبيبتى كل سنة وانتى طيبة ومضان كريم

هههههههههههه
انتى عارفة يا بت يا لمووس انا مصايبى ايام المدرسة من كترتها

حتى بوستيكى دا ما بكفيهو :smiels0:

اقول شنو يا لموس جرى لى بنبر وختيهو لى جنب بنبر دريمو دى
عشان اقعد واطلع المستخبى كلووووو :d:
هلاا وغلا بالغاليه وانتي طيبه والله اكرم وتصومي وتفطري على خير يارب

ههههههههههههههههه وااااو حمستيني اعرف المستخبي
ههههههههههههههههه احكي احكي ولايهمك نسوي ليك عشرين بوست
اها ياحبوباتي سمح حجيب لي دستت بنابر شكلي
واحنا في الانتظار ياغاليه
صورة العضو الرمزية
لمسة جمال
مشاركات: 3654
اشترك في: الأربعاء 2011.5.4 4:55 pm
مكان: الرياض

رد: حكاوي مدرسيه

مشاركة بواسطة لمسة جمال »

عمار ود الشرفه كتب:هع هع ,,, انتي عارفه يا لمسه ,, انا السنه الجايه خريج من الجامعه بس اجمل ايامي العشتها كانت ايام الثانوي واكتر اصحاب عندي اصحاب الثانوي حتي لما جيت الجامعة سكنت مع اصحاب الثانوي ,,
والمواااااقف كتيره ,, ولو علي ضربكم ده والله انتو عايشين في نعيم ,,
طبعاً كل زول درس الثانوي في الارياف بكون اخد ليهو عركه كدا لما قرا موضوعك ده لانو هناك المدارس عالم تاني ,,


اخر جلده بتذكر اخدها ,, كانت من مدير جابوهو جديد من خارج حلتنا
ويوم كدا جاتنا استاذة الفيزياء وتقريباً كنا في تانيه ثانوي ,, ووزعت الكتب ,, اكتشفت انو في كتاب ناقص ,, مشت للمدير وقالت ليهو الاولاد ديل سرقوا كتاب ,,,( بي قلبي قولت ليها كتاب ولأ بطيخه :d: ) المهم المدير احمق ,, قال جابت ليها سرقه كمان ,, هع
كورك للاساتذه كلهم واعلنو حالة الاستنفار في المدرسه ومرقوا الطلاب طابور نص النهار ,, ووقفونا ليك صف ,, والاساتذه وقفو صف ,,
نظام الجلد : يمر الطالب علي الاستاذ الاول 7 سيطان في الفخز
الاستاذ الثاني : 7سيطان في اليدين
الاستاذ الثالث : 4 سيطان في الظهر
الاستاذ الرابع : 5 سيطان فلقه (ترفع رجليك وانت جالس في كرسي وتنجلد)

عندي صاحبي كان قاعد جنبي في الفصل ,,, قدر ما نلاقي بعض بيقول لي انا من ما اشوفك جلدي بكش وباخد لي انكراشه من اليوم داك ,,

المعبود بالحق نحن لما دخلنا الفصل الواحد زي العندو كاروووشه يحكحك في جسمو كلو
والمفاجئه الاستاذه اكتشفت انو الكتاب ما انسرق ,,, نستو هي في المكتب

وغاااااااااااغ انا من الثانوي ... المدارس هنا بربوك والاستاذ ببقي ابوك ,, بس حالياً التعليم في الارياف انتهي (الله ينهي الكان السبب)

ههههههههههههههههههههههه لكن ماعجبني ليك
وانت عشان كده داخل هنا بتتشاكل اتاريك عاوز تتسد الاتعمل فيك
وانا لو منكم اطالب برد اعتبار بعد ده كلو يطلع الكتاب مامسروق
بس جد ماللدرجه دي كدي الواحد بيكره المدرسه اكتر مماهي مكروها
وفي انتظار البقيه.....
ونور البوست بوجودك...
صورة العضو الرمزية
عمار ود الشرفه
مشاركات: 2218
اشترك في: السبت 2009.7.25 11:08 pm
مكان: محل تمسي ترسي

رد: حكاوي مدرسيه

مشاركة بواسطة عمار ود الشرفه »

لمسة جمال كتب:

ههههههههههههههههههههههه لكن ماعجبني ليك
وانت عشان كده داخل هنا بتتشاكل اتاريك عاوز تتسد الاتعمل فيك
وانا لو منكم اطالب برد اعتبار بعد ده كلو يطلع الكتاب مامسروق
بس جد ماللدرجه دي كدي الواحد بيكره المدرسه اكتر مماهي مكروها
وفي انتظار البقيه.....
ونور البوست بوجودك...
ابداً بالعكس والله ,, كنا بنكره الاساس بس لما دخلنا الثانوي وحسينا بالمسؤليه كنا افضل , وحتي علاقتنا بي اساتذتنا الي الان قويه ,, وبتذكر اخر مره مشيت فيها حلتنا كان عندنا كورس (رابطة الطلاب بالجامعات) ومشيت انسق مع الاساتذه ,, والله لما دخلت المكتب الاساتذه كلهم وقفو وسلمو علي سلاااااام لحدي ما انا خجلت ,,, وقعدنا نذكر في ايامنا وايام الجلد والله ضحكنا ضحك ,,, تحسي زي الناس الكانو بمثلو في تمثيليه وبعد انتهت قعدو يحكو في كواليسها ومواقفها ...
علي الرغم من المعاناة العنيناها في الزمن داك
صورة العضو الرمزية
لمسة جمال
مشاركات: 3654
اشترك في: الأربعاء 2011.5.4 4:55 pm
مكان: الرياض

رد: حكاوي مدرسيه

مشاركة بواسطة لمسة جمال »

عمار ود الشرفه كتب:ابداً بالعكس والله ,, كنا بنكره الاساس بس لما دخلنا الثانوي وحسينا بالمسؤليه كنا افضل , وحتي علاقتنا بي اساتذتنا الي الان قويه ,, وبتذكر اخر مره مشيت فيها حلتنا كان عندنا كورس (رابطة الطلاب بالجامعات) ومشيت انسق مع الاساتذه ,, والله لما دخلت المكتب الاساتذه كلهم وقفو وسلمو علي سلاااااام لحدي ما انا خجلت ,,, وقعدنا نذكر في ايامنا وايام الجلد والله ضحكنا ضحك ,,, تحسي زي الناس الكانو بمثلو في تمثيليه وبعد انتهت قعدو يحكو في كواليسها ومواقفها ...
علي الرغم من المعاناة العنيناها في الزمن داك

انا شخصيا احلى مرحله مرحلة المتوسطة كانت روووعه وشلتي كانت رهيييبه
انت قول اساتذة السودان متواضعين بس هنا الله لا وراك بحسسوك انت شغال تحتهم
وفعلا انا قبل كده لما مشيت السودان مشيت مع بت عمتي مدرستها ولقيت تعامل راقي
واجمل من الجميل مابين الطالبات والاساتذة احترام واسلوب في الكلام وتواضع
وقمة الاحترام بصرااحه ولما جيت عملت مقارنه مابينهم وبين اللي هنا لقيت مافي وجه شبه
غير انو الاتنين بنادوهم استاذ
صورة العضو الرمزية
Keeptown
مشاركات: 3882
اشترك في: الثلاثاء 2008.12.9 6:15 pm
مكان: الخرطوم

رد: حكاوي مدرسيه

مشاركة بواسطة Keeptown »

ايام الاساس والثانوي كانت ماسأوية...

جلد وتسميع واكتر حاجة كنت بكرها قوم اعرب الجملة الفي السبوره...

ولا اقرأ من ما تيسر...

دي تعرف طوالي بعديها في جلد...

والعجب المشاكل ناس اطلع معاي بره ويجيب ليك اولاد حلتهم وتأخد علقة ما تنسى...

ولا يقول ليك المدير عاوزك وانت تصدق وقلبك يقيف وقت تقرب من المكتب يقول ليك معاك الكاميرا الخفية...

فاصل واواصل
...
صورة العضو الرمزية
لمسة جمال
مشاركات: 3654
اشترك في: الأربعاء 2011.5.4 4:55 pm
مكان: الرياض

رد: حكاوي مدرسيه

مشاركة بواسطة لمسة جمال »

Keeptown كتب:ايام الاساس والثانوي كانت ماسأوية...

جلد وتسميع واكتر حاجة كنت بكرها قوم اعرب الجملة الفي السبوره...

ولا اقرأ من ما تيسر...

دي تعرف طوالي بعديها في جلد...

والعجب المشاكل ناس اطلع معاي بره ويجيب ليك اولاد حلتهم وتأخد علقة ما تنسى...

ولا يقول ليك المدير عاوزك وانت تصدق وقلبك يقيف وقت تقرب من المكتب يقول ليك معاك الكاميرا الخفية...

فاصل واواصل
...
ههههههههههههههههه وبتحب ياتو ماده طيب :d:
طبعا حكاية المدير عاوزك دي اتسوت معاي كتير والله فترة قلبي ماببقى طبيعي
مع اني بكون في السليم لكن مابعرف ليه خوفه سااي خاشاني :004:
واحنا في انتظار حكاويك شكلك معبأ حكاوي banana.gif
ومنوووووور البوست happy0005.gif
صورة العضو الرمزية
ابن عوف
مشاركات: 7729
اشترك في: الخميس 2008.6.19 7:51 pm
مكان: وسط اهلى الطيبين وسمحين

رد: حكاوي مدرسيه

مشاركة بواسطة ابن عوف »

لمسة جمال كتب:

الروعه مرورك ياغالي
وفي انتظارك وانتظار ذكرياتك
على احر من الجمر
ولك خالص الود والتقدير
ودمت ودام تواجدك العطر
تسلمى يا غالية
ومن قصتك تذكرت قصة عالقة فى الذاكرة لليوم

نحن كنا فى الصف الخامس ابتدائي عندنا معلم لغة عربية بجى من قرية مجاورة لينا زمن الاساتذة اساتذة طبعا المهم قال تجو الساعة ست صباحا عنده حصة تسميع وتقريبا تلات اربع الفصل ما جا والاستاذ زعل زعل شديد قال بادبكم اى طالب جا متأخر سجل اسمه فى الورقة ووين على المدير شخصيا والمدير عنده يد ما بزيد من جلدتين والله لو ما اخاف من الكضب اقوليك جلداتو لسة قاعدة وانا اصلا الجلد باكله عادى ولا يهم عندنا طالب صاحبنا نصحنا قلنا ليه اقيف للجلد ما تخت اى مضادات للجلد ما سمع الكلام ادوهو سوطين عامل فيها نظام ببكى عشان يموه المدير كشف لعبتو وجابه سوطين قعد يبكى بطول حسه واليوم داك الفصل بيت بكاء بس هسي صاحبنا كل ما نلاقيه نذكرو بالموقف يقعد يضحك

والجاى كتير
صورة العضو الرمزية
لمسة جمال
مشاركات: 3654
اشترك في: الأربعاء 2011.5.4 4:55 pm
مكان: الرياض

رد: حكاوي مدرسيه

مشاركة بواسطة لمسة جمال »

ود ابنعوف كتب:تسلمى يا غالية
ومن قصتك تذكرت قصة عالقة فى الذاكرة لليوم

نحن كنا فى الصف الخامس ابتدائي عندنا معلم لغة عربية بجى من قرية مجاورة لينا زمن الاساتذة اساتذة طبعا المهم قال تجو الساعة ست صباحا عنده حصة تسميع وتقريبا تلات اربع الفصل ما جا والاستاذ زعل زعل شديد قال بادبكم اى طالب جا متأخر سجل اسمه فى الورقة ووين على المدير شخصيا والمدير عنده يد ما بزيد من جلدتين والله لو ما اخاف من الكضب اقوليك جلداتو لسة قاعدة وانا اصلا الجلد باكله عادى ولا يهم عندنا طالب صاحبنا نصحنا قلنا ليه اقيف للجلد ما تخت اى مضادات للجلد ما سمع الكلام ادوهو سوطين عامل فيها نظام ببكى عشان يموه المدير كشف لعبتو وجابه سوطين قعد يبكى بطول حسه واليوم داك الفصل بيت بكاء بس هسي صاحبنا كل ما نلاقيه نذكرو بالموقف يقعد يضحك

والجاى كتير

الله يسلمك من كل شر يارب
هههههههههههههههههههههه
هو فعلا الموقف في لحظتو بكون بيغيز وببكي بس بعد داك بيبقى ذكرى حلوه
وانا شخصيا لما الحكايه يبقى فيها ضرب الضحك بشرطني وبتورط زياده
وفي انتظارك ياغالي....
وطله مانعدمها يارب.....
ولك خالص الود....
صورة العضو الرمزية
ابن عوف
مشاركات: 7729
اشترك في: الخميس 2008.6.19 7:51 pm
مكان: وسط اهلى الطيبين وسمحين

رد: حكاوي مدرسيه

مشاركة بواسطة ابن عوف »

لمسة جمال كتب:

الله يسلمك من كل شر يارب
هههههههههههههههههههههه
هو فعلا الموقف في لحظتو بكون بيغيز وببكي بس بعد داك بيبقى ذكرى حلوه
وانا شخصيا لما الحكايه يبقى فيها ضرب الضحك بشرطني وبتورط زياده
وفي انتظارك ياغالي....
وطله مانعدمها يارب.....
ولك حالص الود....
ولكى من الود اجمله واطيبه

فعلا ذكريات حلوة بالرغم انه مر عليها سنين
انا الجلد كنت محير الاساتذة والالفة كان لو كتبنى مع المهرجلين بنجلد ولو ما كتبنى برضو بنجلد
واطرف مافى الامور لما يجيبو المهرجلين الاستاذ من ما يشوفنى هوووى انتا ارجع الضرب على الميت حرام احتارو معاى ما يكتبنى هسي يقولو ليه معقولة يسري ما هرجل happy0005.gif

مودتى
صورة العضو الرمزية
لمسة جمال
مشاركات: 3654
اشترك في: الأربعاء 2011.5.4 4:55 pm
مكان: الرياض

رد: حكاوي مدرسيه

مشاركة بواسطة لمسة جمال »

ود ابنعوف كتب:
ولكى من الود اجمله واطيبه

فعلا ذكريات حلوة بالرغم انه مر عليها سنين
انا الجلد كنت محير الاساتذة والالفة كان لو كتبنى مع المهرجلين بنجلد ولو ما كتبنى برضو بنجلد
واطرف مافى الامور لما يجيبو المهرجلين الاستاذ من ما يشوفنى هوووى انتا ارجع الضرب على الميت حرام احتارو معاى ما يكتبنى هسي يقولو ليه معقولة يسري ما هرجل happy0005.gif

مودتى
هههههههههههههههههه واااي معناها كنت عينه غريبه في المشاغبه
بحكايتك دي ذكرتني واحده من زميلاتي كل مايجوا ياخدو المشاغبات
لازم ياخدوها معاهم حتى لو نايمه يصحوها وياخدوها
وفي اي مشكله تحصل لازم يجيبوا اسمها ويورطوها في المشكله
وانا نفسي اعرف السبب البت لما حاسه بيها قعد تجن
والله بتحنني السوتو والماسوتو معلق فيها
تسلم ياغالي وفي انتظارك.....
وتسلم لتفاعلك الجميل....
ومنتظره باقي مشاغبتك....
أضف رد جديد

العودة إلى ”منتدى الراكوبة“