مكتبة الشاعرة أسماء الجنيد

مرجع لفطاحلة الشعراء

المشرف: بانه

صورة العضو الرمزية
بعد الزمن
مشاركات: 16470
اشترك في: الثلاثاء 2010.3.9 4:30 am
مكان: الضواحي

مكتبة الشاعرة أسماء الجنيد

مشاركة بواسطة بعد الزمن »

عروس النيل
زمان

فى مره نادتنى حبوبة ....

منتكيه فوق ضل الضحى..ومتوسده توبا..

فارشالا برشاً من سعف ..

فوق عنقريب تاكلاه بى طوبه...

تقلالا بناً فوق جميراتاُ تشطشط ...

طاشه لما تهب نسيمه او هبوبا....

وريحة القلوة تعكل...

والفنيجينات تهلل..

جاهزه للبكريه لما تجيها مصبوبه ...

وجبنة الطين محكره فوق وقاية السكسك..

البلخرزه معصوبه ..

قات لى..

تعالى يا بنيتى جمبى حداى ..

بدور احكيلك الليله ..حكاية السمحه زينوبا..

بنيةُ من بنات الحله جاهله صغيره يا دوبا ..

فريعة بانا منقسمة ...

غزال نافر جبال التاكا والنوبه ..

يغنيلا الفريق كله..وحياتا ديمه حلفوبا ..

جنيات البلد يتلمو..ساعة الورده..

فوق البير يحلموبا ..

كتير من دق باب بيتا .

.وكتير من صدً جارى الخيبه والتوبه ....

شى يقولولو لسه صغيره يا دوبا ..

وشى يقولولو مخطوبه ..

رباية عز..جدودا رجال .

.ركيزه الحله وكت الحاره والحوبه ...

الا القسمه لما تحين تجيك عديل .

.موبى سكة مزروبه ...

***********

فى يوم عصريه جاتنى التومه بت احمد ..

تجر توبا..

تقول كرعيها مكروبه ...

وبى آخر نفس قات لى ...

سمعتى الليله بت العازه زينوبا ....

جاها عريس قدر جدى ..

وابوها اداها بت امى..

بنيه رضيه مغلوبه ...

فى شان شيخ من قبيله مأصله...

ياختى القصه ياها عديله محسوبه ..

عليك الله . . !!!!

.واشرى بت العازه..

يالدفنوك حليل الكان بغنوبا ..

وجات السيره شايله الشيل ..

دفوف وطبول ترز قدامهم النوبه ..

شى زغاريد... وشى نواحات ...

عليك يالزينه بت الحله محبوبه ..

عيون شاردات.... وناس واجمات ...

وكل الحله مقلوبه ....

وفجأة تدوى صرخة تشق سواد الليل ..

تصحى الكان فى غيبوبه ....

الحقو على يا جنيات ..الحقو على جنايات..

الحقو على انا الموجوعه احىى ووبا ..

فى ديك الساعه كان النيل..

ختف نوارة الحله عروسنا السمحه زينوبا ..
صورة العضو الرمزية
بعد الزمن
مشاركات: 16470
اشترك في: الثلاثاء 2010.3.9 4:30 am
مكان: الضواحي

رد: مكتبة الشاعرة أسماء الجنيد

مشاركة بواسطة بعد الزمن »

أم الزين





ضلاله بي طرقه

مشروره في حيطة

متكوله بي مرقه

رقراقا بيتاوق

بيناغم ألفرقه

حداها أم الزين

لابساها نص فتقه

بلامه في وجيها

ملتوقه بي لفقه

شايلالا خماره

في حليلة متحرقة

وقودا في اليدين

حازماه بي بتقه

جهالا بي غادي

تشابا في شفقه

تغنى وتهاتي

لصغيره بي رقه

تحجي يوماتى

خايفالو من شرقه

مقسومة في العينين

ما بتعرف ألمرقه

معيشة زى همين

تبداها بي طرقه

وحليلة في منقد

بصلاتها متفرقة

قفيفه مقدوده

مرقوعه بي ورقه

تتناول الفندك

تنادى للرفقة

كريمه أم الزين

بتقسم ألنبقه

حنينه للمسكين

تسقيه بالبقة

دمعاتها جوه العين

فرحانة مى حرقه

تلولى في الكرعين

ما بتعرف النقه

تحجي بالوالدين

لا صرخة لادقه

السمحة نواره

مرسومة ألخلقه

تتفقد ألجاره

بالنية مي زرقة
صورة العضو الرمزية
بعد الزمن
مشاركات: 16470
اشترك في: الثلاثاء 2010.3.9 4:30 am
مكان: الضواحي

رد: مكتبة الشاعرة أسماء الجنيد

مشاركة بواسطة بعد الزمن »

شدر الهشاب


شدر الهشاب ..

اتشابا لي ضل السحاب

داير المطر ..

خايف اليباب ..

شاف ليه غيمه .. قال سراب .

ماظن تمطر كوم تراب ..

فجأة انهمر ..من غير حساب ..

بل الندى وعطر هضاب ..

بكت السماء..

رحل الرهاب

دنت الطيور من

الضباب ..

ركت تحت رسمت رحاب

رحل اليباس رحل الخراب ..

شدر الهشاب فرهد طرب

من تانى بى عودة الشباب

جدع صميغاتو ورقص..

رقصة غريب عاد للوطن بعد الغياب
صورة العضو الرمزية
بعد الزمن
مشاركات: 16470
اشترك في: الثلاثاء 2010.3.9 4:30 am
مكان: الضواحي

رد: مكتبة الشاعرة أسماء الجنيد

مشاركة بواسطة بعد الزمن »

انا يابلد

ليك بنتمى .. وفيك احتمى ...

انت السند ...

احلف اقول انت البلد ...

انت البوادى والمدن ...

انت المرافى والسفن ..

انت الولـد ...

يصرخ يقول ..انا يا بلد ..

افرح اكون .. ليك الولد ...

...

منك بكون

لوح الحفظ سبحه وعدد ...

شيخ الذكر ..مدد ..مدد ...

شدر الصمغ طعم الشهد ...

لوزة قطن زى الورد ...

******

انا يا بلد ..

ليك بكون ..

ضهر البنيات والعرض ...

سلوكه تحفر فى الارض ...

نيلك بيسقى كل نبض ...

زولا تقى صلى الفرض ...

شدر اللبان شدر القرض ..

لى كل مريض سدً الغرض...

عالج شفا من كل مرض ...

*****

انا يا بلد

انا فيك بشوف

ابواتنا فى الحاره بتسد ...

كيفن تصد .. كيفن ترد ..

اماتنا زى مطر الدغش ..

نازل غزير مليان برد ...

جنياتنا فى الحوبه الرعد...

بنوتنا لى ضيف الخلا ...

تعزم تشد عز البرد ...

شفعنا تيراب اب كرد...

ترفع تشيل تسمع ترد ....

اعلامنا راياتاً ترفرف من بعد...

*******

انا يا بلد

داير اكون ..

ود البلد .. بت البلد

ام البلد .. اهل البلد .. نهتف نقول...

نحن البلد .. نحن البلد ...

وانا يا بلد .......
صورة العضو الرمزية
بعد الزمن
مشاركات: 16470
اشترك في: الثلاثاء 2010.3.9 4:30 am
مكان: الضواحي

رد: مكتبة الشاعرة أسماء الجنيد

مشاركة بواسطة بعد الزمن »

نهارات الفريق ..

يا دروب شاقه الخلق ...

والخلق ما بتتلحق ..

دايشه فى دريب الرزق ..

والرزق لى خالق الخلق ..

فى نهارات الفريق ...

.والعرق وصل الحلق ...

ناس جهالا بتتشرق ...

وناس تجر ..ما بتتلحق ..

مرات تقوم .. مرات تقع ..

فى مطامير الورق ..

تجمع تعد .. تشرط تشق ..

تصرخ تهيج .. تزعل تطق ..

همها الدنيا ام قدود ..

ناسيه يوم.. بتمر برق ...

وناسيه يوم جمعاً كبير ..

كل زولا ليه حق ...

الدروايش الكتار ..

لا بتنوم .. لا بتتفرق ..

سبح لالوب تجر ...

فى سواد الليل تطق ..

تذكر المولى الكريم ..

والايادى بتتسبق...

نوبه ترزح من بعيد...

تشرح القلب البرق...

والعيون تعطف ..ترق..

والدميعات تنهمر ..

زى مطيرًة فى الشرق...

زى مطيرةً فى الشرق...
صورة العضو الرمزية
بعد الزمن
مشاركات: 16470
اشترك في: الثلاثاء 2010.3.9 4:30 am
مكان: الضواحي

رد: مكتبة الشاعرة أسماء الجنيد

مشاركة بواسطة بعد الزمن »

صدقنى يابا ..

دمعاتى جارية و لسه كابا..

كاسرة زى سيلاً دفر..

دمر شتول نوارو شابا ..

قطع حشا الفرع الرطب ..

حتحت خضر.. نديانه دابا ..

شرد عصافيراَ بنت ..

اعشاشها من اخرالسرابا ..

صدقنى يابا ..

ليلى مفروش الاسى..

ضلى معروش الكآبا..

فاقدة الحنان الفيك رسى..

تايهه زى شفع ضهابا ..

شارده فى دروب الشقا ..

مقطوعه زى شدرات فى غابا

خايفة من صوتا مشا ..

باكية الامان الكان سحابا ..

صدقنى يابا ..

الكون بلاك كاسى الجفا..

مسكون ضنى وممزوج رتابا ..

والفرح مرسوم صور..

لا روح ترف لا صوت ربابا ..

والبسيمات المحجرة فى الضلوع..

مسجونه فى ضلمة عذابا ..

صدقنى يابا ..

بتشابا لى الذكرى القبيل..

ارويها بى نفسك شرابا ..

القاك فى الحلم الدليل ..

والقاك فى الآهه.. هضابا ..

تنسج معاى المستحيل ..

ارجاك بى قولة حبابا..

افرد ادياتى لشقن ..

من الوهن خط الكتابا ..

انادى فيك طول الزمن ..

حليلو يابا ..

حليلو يابا ..

صورة العضو الرمزية
بعد الزمن
مشاركات: 16470
اشترك في: الثلاثاء 2010.3.9 4:30 am
مكان: الضواحي

رد: مكتبة الشاعرة أسماء الجنيد

مشاركة بواسطة بعد الزمن »

فى شان ود المك


يا عزة ..

عزك للبلاد شد الرحال سوح

شايلاو عصافيرنا المهاجرا ..

تهاتى بيه تمرح ..

تدودى الكلمه بالاحزان .

ومره تعود تنم تصدح ..

تناغم الشوق ..

تتاتى لفوق ..

تبارى الغيم معا وتسرح ..

عديلة الليله يابلدى ..

عديلة وزين ..

شباب اتلم فى المطرح ..

قلوبهم عامره بى حبك .

كتير القالو فيك يمدح ..

زى جنياتنا.. ود المك ..

شالك فى حشاه فرح ..

نضمك غنوه فى الافواه

وشتلك فى البرارى بلح

بارى النيل غنا واشراق

ضامى الليل بشعرو سبح

ليك يا المك .. شوقنلطال

فرد جنحيو تياب و طرح

وحات البين وضى العين

سيرتك فى البلود تشرح

وحات البين فراقك شين

نارك فى الضلوع تنتح..

ود المك .

لزوم الليله نوفيك..شوية حق

فشان تفرح ..

لزوم الليله نوفيك .. كلمة حق

تصون الكان زمان روح

قبل ما تبقى احلامنا

سراب مدفونه ما تبرح ..
صورة العضو الرمزية
بعد الزمن
مشاركات: 16470
اشترك في: الثلاثاء 2010.3.9 4:30 am
مكان: الضواحي

رد: مكتبة الشاعرة أسماء الجنيد

مشاركة بواسطة بعد الزمن »

جديات








ناس ليلى جن..

شايلات فرح عمرى الموشح بالزمن..

يتراقصن… يتمايلن ..

مرات يمين ..مرات شمال يتفدعن..

يتسابقن بين المرافىء والحقول.

لا توب وقع من الكتيف لا اتعترن…

جريهن المثل الغزال ..

نافرات ولى كوم الضفائر يجدعن ..

ضحكاتن الرنانه زى وتر الصباح ..

يمسح جراحات المدائن .. والمحن ..

همساتن الحان الغروب .

صافات وزى طير البرارى يدندنن ..

مرات يفرن زى فراش ..

مرات يجن يتجمعن ..

يتماسكن ..يتلاصقن ..

نضمة عقد لولى ومضفر بالحنن …

*****

لمن خلاص تعبن..

وبى نفسا طويل اتنهدن ..

قعدن تحت فى ضل شديره ..

ولى القديمات مددن ..

اتنحنحن ..اتاوهن ..

ضربن كفوف فوق كفوف .

ما صفقن …

لمن طريفات توبن المجدوع ..

وليه اتوسدن …

اتضاحكن .. واتغامزن …

والبسمه تضوى والخدود يتلالان ..

حكن الحكاوى .. اتمازحن …

والقمره صافيه يقصقصن ..

فى جلستن ما اتزحزحن ..

بعد العشا اتونسن ..

******

ديل هن بنيات البلد ..

اللى الشباب كيف بهدلن …

رضعن تميرات النخيل …

من الارض عبن ملن …

صانن بداوة الحله ..

ما يوم بالحضاره اتشوهن …

صورة العضو الرمزية
بعد الزمن
مشاركات: 16470
اشترك في: الثلاثاء 2010.3.9 4:30 am
مكان: الضواحي

رد: مكتبة الشاعرة أسماء الجنيد

مشاركة بواسطة بعد الزمن »


سكة الزمن الصعب



دفرت مشاويري المأرجحه

بين الأرض وراحة السحب ..

زحمت دروب فوق لى دروب

مسحت كلامنا ألفى الكتب

دمرت سرابات المدن ..

غاصت هناك ... تحت الترب ..

نزفت شرايين البلد..

قطعت وريد وسط العصب ..

ضاقت صدور .. عبرات تزور..

حلقا نشف جف و تعب ..

زفرات تمر فوق الحلق ..

مأموره تجرح بالغصب ..

ساقت خطانا في انحدار..

لى هاوية الخوف والرعب

طبعت قوانينها الغلط

في صفحة الزمن الكعب..

والليل طويل شايل الوجع..

ضلت خيوط صبحو الدرب..

والنيل هداك صامت حزين

عبرات تسد حلقا شرب..

والجوف هضم .. مر السكات ..

لمن شبع جوعا ضرب..

ولا الفراق .. الكان حرب

من غير سلاح رغم الضرب

مدفور تلملم في الخطى..

تتعتر .0

.تصارع الشوق الغلب

تتضارا تحبس في الدمع..

السال حنين كيفن سكب

يا سكة الزمن الصعب

معووجه من أول طريق

لا فيكى صحبه ولا رفيق

إلا المتل مسيلمه ..

ومعروف كلامو بالكضب




صورة العضو الرمزية
بعد الزمن
مشاركات: 16470
اشترك في: الثلاثاء 2010.3.9 4:30 am
مكان: الضواحي

رد: مكتبة الشاعرة أسماء الجنيد

مشاركة بواسطة بعد الزمن »

الدنيا حر




لمن تكون صافى المطر

تسقى الحنين غيمات ضهر

تجنى الأمر آخر العكر..

مافى مفر .. ما الدنيا حر..

حين تنشتل في قيف بحر

للموج رفيق للطين وزر

ما تفتكر صفق الشدر

عايش معاك فصل العمر

ما الدنيا حر..

لازم يجف لونو السمح

يصبح كتر ..

والضل يهيم تارك الشدر

واقف حزين نصو انشطر

يمكن يعود بعد الفجر

وامكن يكون مر وعبر

ما الدنيا حر ..

لمن تلم نصين شتر

تغزل خيوط صبحت وتر

ما تفتكر نسجك غنا

لحنك عطر..

ما الدنيا حر

وكيف تنتصر وانت النفر

وسط الجيوش جاتك دفر

مزروع دريبك شوك سدر

طعناتو في نص الضهر

والدنيا حر ..

وكتين يفيض شوقك دفر

ضامى الخدار حزمة زهر

ضافر النخيل جرتق نضر

ما تفتكر الكون حضر

والنيل طمح غطى الصخر

ما الدنيا حر ..

وكتين تصوم كايس الفطر

عز الهجير ريقك حجر

ما تنتظر فجر القدر

ما قال صبر

لكن صبر لمن فتر

ما الدنيا حر ..

ما الدنيا حر

الدنيا حر

صورة العضو الرمزية
بعد الزمن
مشاركات: 16470
اشترك في: الثلاثاء 2010.3.9 4:30 am
مكان: الضواحي

رد: مكتبة الشاعرة أسماء الجنيد

مشاركة بواسطة بعد الزمن »

كيـف بتنكر



الله اكبر .. الله اكبر

كيف بتنكر .

ما الاماكن والمعالم واقفه تظهر.

والمساجد والمآذن ..

والمصليين البتذكر..

والعيون الشاربه ..

من طرف البحور الجاريه تعبر..

كيف بتنكر .

الدريبات البتحفر..

طمى الجروف الدافق اخدر .

والنفوس الراويه ..

من بطن العقول الما بتودر .

والقلوب الضاويه ..

بى رعشة شعاعا ..

الكان بيجهر.

والمطيرات والبروق ..

الشاقه نص الليل تنور .

كيف بتنكر .

فى سمانا وفى ضحانا ..

و رجعة نهارتنا التحمر .

كيف بتنكر .

والجدود الا نحنت . . تحضن ..

ترابنا الفيه نكبر .

والملامح فى عيونا ..

وفى وجوها اشكال تسطر .

هيبة قبيله . . وملحمة ..

تاريخ بلادى اللونو اخضر .

علما برفرف فى سماها ..

الاصلو زاهر وديمه انضر .

والنزيف المن شهيدنا ..

قبره طاهر مسك و عنبر .

والدموع الناخره ..

لى خد البنيات البتصبر .

والشقوق مدفونه عمرا ..

ذكريات اياما تمطر .

كيف بتنكر .

الحنين الكان رضعنا ..

وبيه نعمر وكيف بنغزر .

والنفير الفى فريقنا ..

وفى بيوتنا وفى شوارعنا ..

بتكبر .

الله اكبر .. الله اكبر

كيف بتنكر وليه بتكفر ..

الا ماك اغبش وماك من

قبايل حاره تنتر .

بالسيوف تضرب تحارب ..

والنياب بتصك تكشر .

وكيف بتنكر.

بالله اذكر ..

بالله كبر ..

الله اكبر .. الله اكبر
صورة العضو الرمزية
بعد الزمن
مشاركات: 16470
اشترك في: الثلاثاء 2010.3.9 4:30 am
مكان: الضواحي

رد: مكتبة الشاعرة أسماء الجنيد

مشاركة بواسطة بعد الزمن »

الزمن الفلانى




قبضة الزمن الفلانى..

وكم تاشرات منو تانى

سافرت خترت بعيد..

بالاحاجى و بالاغانى

دمدمت غيم البلد . .

كومت فرحتنا

فى آخر ثوانى

لملمت بسمات

تأمل بى شروقا الاولا نى ..

هاجرت .. واتهجرت

مدفوره بى شوق الامانى

لى ضل نهاراتا شتر

ممزوجه لونا .. برتكانى..

فرفرت خايفه فى قلب

المطارات والموانى

معصورة بى خاطر الامل

لى رجعة فى عتمة زمانى

تضارا منو . .

وتانى ترجع ليه تانى

مسكونه بى فتر المسافات

والدريب الكان بعانى

ركنت مشاعرا المحبوسه . .

بالوجع المكانى

وانتكت تنفض

غبارا الكان مكندك بالمعانى .

سكتت تعدد فى سنين . .

مشلوله بالصمت المحجر زى اوانى

مضروسه بى هم السكات

نضما كتر كيفن ضنانى

والآهه فى نص الهجير

والخوف ضرير المنو دانى

ختم الحروف لناخره فى

عضم الشديرات بالتهانى

يا زمانى الكان فلانى

ضرضر عريسا ..

كان مجرتق..

بالتراب الاسمرانى ..
صورة العضو الرمزية
بعد الزمن
مشاركات: 16470
اشترك في: الثلاثاء 2010.3.9 4:30 am
مكان: الضواحي

رد: مكتبة الشاعرة أسماء الجنيد

مشاركة بواسطة بعد الزمن »

عز الظلام



عز الظلام .. والليل هجع ..

تطعن همومك زى سهام ..

جوه الضلع ..

تحسب تعدد في الايام ..

كم يوم طلع ..

تهمس مواويل الغرام..

والكون سمع

حتى الودع وصلوا الكلام

جلس استمع ..

ودع السماء تحت الغمام

ابيض نصع..

مرات يشع ..

مرات يفر زى الحمام..

مرات يحن جاييك رجع

مرات يقيف سارق السمع

شايل معاك خوف الضلام ..

منك دنا جالس ركع..

كيمان نجوم زى الخيام

تحلف تقول في منتجع

صمت السماء وهمس الأنام

لولايو زى طفلا رضع ..

نفس الزهر لحظة وئام

ودع خلاص صوت الوجع

تبداها بى حرف السلام

تسرح تهيم زى طيف فزع

لى زول هناك شايلو المنام

ساند على حيل انفدع

وانت في ليلا بهيم .

تتوهم الغفوة وتقع

سارح مع الحلم النعيم

تترجى ضيا لو طلع

تترجى ضيا لو طلع

صورة العضو الرمزية
بعد الزمن
مشاركات: 16470
اشترك في: الثلاثاء 2010.3.9 4:30 am
مكان: الضواحي

رد: مكتبة الشاعرة أسماء الجنيد

مشاركة بواسطة بعد الزمن »

شمس النهار




لو عارفه يا شمس النهار

طلة شعاعك من بدار ..

طوت الظلام كشفت ستار

خجلن فراشاتنا الكتار

طارن بعيد تركن ديار

حزن الورد جف الخدار

والزهيرات النضار

اتلفحن توب الوقار

حتى العصافير الصغار

ا تلملمن سربين وسار

*****

لو عارفة يا شمس النهار

كنتى بدلتى القرار

وكنتى اخرتى المسار

شلتى الصبر والانتظار

رغم الصبر كيفنو حار

حتىالبلوم من عشه طار

شايل الحنين فى كفو نار

خايف الضياع خايف الودار

لو عارفه يا شمس النهار ..

طلة شعاعك من بدار..

طوت الظلام كشفت ستار..
صورة العضو الرمزية
بعد الزمن
مشاركات: 16470
اشترك في: الثلاثاء 2010.3.9 4:30 am
مكان: الضواحي

رد: مكتبة الشاعرة أسماء الجنيد

مشاركة بواسطة بعد الزمن »

لوحات عينيك يا انت ..

رموش الليل تضاريها ....

تجيب البسمه فى الواحات ..

وتفرش شوقها فى الساحات ..

وتمسح دمعه بى ايديها

وتحلم ديمه بى لحظات ...

فيها النيل يلاقيها ..

يسور ليها عشة طيب ..

يشيل من لونو يديها ..

وحات عينيك يا انت ..

عيونك ساحره بهرتنا ..

نشوف جواها سر الكون ..

مساحات ريد..

حنان جواها ضمتنا ..

نسافر فيها ما نرجع ..

ندندن غنوة عجبتنا ..

نعيش فى الدنيا بس اتنين ..

وعيونك لسه دنيتنا ..

عصافير شارده بتغرد ..

دوام افراح معزتنا ..

لما نكون مع العينين ..

نشوف الدنيا جنتنا ..

ولما تفوت ونتفارق

.بنلقى دموعنا سبقتنا

بنلقى دموعنا فاتتنا ..

بنلقى دموعنا فاتتنا ..
صورة العضو الرمزية
بعد الزمن
مشاركات: 16470
اشترك في: الثلاثاء 2010.3.9 4:30 am
مكان: الضواحي

رد: مكتبة الشاعرة أسماء الجنيد

مشاركة بواسطة بعد الزمن »

العيون الفيهن نعاس

هن اساس معنى الجناس

هن يثيرن فى الناس حماس

هن يقودو الزول لى الجنون
صورة العضو الرمزية
بعد الزمن
مشاركات: 16470
اشترك في: الثلاثاء 2010.3.9 4:30 am
مكان: الضواحي

رد: مكتبة الشاعرة أسماء الجنيد

مشاركة بواسطة بعد الزمن »

عاطفه





الحنان البينى بينك

لا بكيفى ولا بكيفك

والصلات الطاهره نابعه

من غيومى ومن خريفك

والجمال الفيهو نحن

من شعاعى واصلو طيفك

والحرير الفى ستارنا

نسجو من خيطان قطيفك

والحنين الاصلو انت

جارى من نيلك وقيفك

والكلام الجاى منى

نبعو منك ومن شفيفك

والاريج العطرو فايح

زهرو من بستان جريفك

والنجوم الفى سمانا

لوحة فى رملة مصيفك

والرموش الفينى ديمه

واحة لى نارك وصيفك

والغنيوه المن لهيجك

شاربة من بحرك و ريفك

وفى النهاية:

اصل الحكاية:

قصة مبدية فى رصيفك

صورة العضو الرمزية
بعد الزمن
مشاركات: 16470
اشترك في: الثلاثاء 2010.3.9 4:30 am
مكان: الضواحي

رد: مكتبة الشاعرة أسماء الجنيد

مشاركة بواسطة بعد الزمن »

الزمن الفقرى



يا دريبا مطوى بى آهات الزمن الفقرى ..

قايدنى معاك غصبا عنى مو بى خاطرى ..

سايقه الخطوه ووراها التانيه ..

وحر الرمض البهرى ..

حارق جوفى وزايد خوفى ...

ودمعى الحارالنازل يجرى ..

ودمى البغلى وقلبى البنزف

طاير من صدرى..

اعد ايامك يوم واسبوع ..

شهراً عربى وعامًا هجرى ..

اعاين فوق واتلفت جاى...

واتلفت جاى ..

لا شجيره تضللنى .....

ولا سحابة المطر الضهرى ..

لاجريفاً اخضر يبرد لى ....

ولا طين البحر البروى ...

يبلل ريقى ويودر عطشى ....

ويسند ضهرى ..

واشم ريحة النسمه البارده ....

من البستان الزهرى..

تلملم شملى ..تودر همى ....

وتمسح غبار العهد الحجرى ..

واعود من تانى واقول لى رويحتى ...

ده ما قدرى ..ده ما قدرى ....
صورة العضو الرمزية
بعد الزمن
مشاركات: 16470
اشترك في: الثلاثاء 2010.3.9 4:30 am
مكان: الضواحي

رد: مكتبة الشاعرة أسماء الجنيد

مشاركة بواسطة بعد الزمن »

ضيّ القمر

يا بنيه يا ضى القمر ..

يا واحة فى شمسا وحر ..

يا كلمة ما انكتبت شعر ..

ويا نغمة ما دقاك وتر..

يا احن من كل البشر ..

يا بنية يا نور البصر..

طليتى زى وهج البدر..

ضويتى ساحات السمر

ناديتى نجمات الفجر..

سقيتى ارواحانا العطر..

بسيمتك الكاسية الثغر ..

لهيجك الناعم درر..

مشيكى فى الواطة بيسر ..

بناجى اغصان الشدر

ويحاكى غيمات الضهر

يا بنية يا دغش المطر

جواك انفاس الزهر

شايلاه للماشى وعبر

حاضناه طفلا فى حكر..

يا لينة يا طين البحر..

لا لايه ليلك ما فتر..

ضوايا ضوك كم بهر..

غنايا صوتك كم سحر

صوفية نبراتك ذكر

شاشايا شيشك يا بكر

حورية عينيك الحور

نوريه نوارك نضر ..

بدوية مضمورة الخصر

معجونه بى عنبر ندر

فطينة فكرك من فكر

حاشاكى من كلمة بطر ..

وحشاكى مبروم زى كور..

اديبة غضيتى النظر.

وفية وعدك زى نذر..

حنينة عطفك منهمر

يا ناعمة يا ضل الضحى

يا ناعسة يا نسمة عصر

سامحينا وصفك مختصر

منك بنطمع فى العذر

حافظك القادر قدر ..

من كل حاسد ومن كفر

ومن كل لله ما ذكر

يا بنية يا آية وصور

يا بنية يا ضى القمر

يا بنية يا ضى القمر
صورة العضو الرمزية
بعد الزمن
مشاركات: 16470
اشترك في: الثلاثاء 2010.3.9 4:30 am
مكان: الضواحي

رد: مكتبة الشاعرة أسماء الجنيد

مشاركة بواسطة بعد الزمن »

لحن الخاطر ..

مدفون جواك..

فى عمق الخاطر ..

لامى معاك ..

الريد الدافر..

بتهجاك..

واجمع فيك ..

بقدرة قادر ..

واستناك ..

افكر فيك..

لى يوم باكر

واترجاك ..

تشيلنى معاك .

غيما ماطر.

اتوه فى سماك ..

وليك اسافر ..

اعيش جواك..

الملم فيك

ونبضك طاهر..

اتمناك

اغنى معاك

لحنا عاطر

حروف منثوره..

درر وجواهر ..

وبيك اتحدى

قيس الشاعر ..

واحلم ديمة

باجمل حاضر ..

يحلق يرفرف ..

بى جناح طائر ..

يناجى الماضى..

ويفضل فاكر ..

كلمة رواها ..

البدر الدائر ..

عم شذاها ..

النسم الحائر..

يا يوم باكر .....

انت الامل

الاخضر ناضر

وانت الريد

الفيه بذاكر

وانت القلب

الكلو ازاهر

يا يوم باكر....

انت النيل

البجرى مشاعر..

وانت الحلم

الليه بخاطر

ادمر بيه

قيود وعساكر ..

اكسر تحته

الحظ العاثر..

وابدأ معاك

العمر الزاخر

بالافراح الليها بداية

ومن دون آخر ..

بالافراح الليها بداية

ومن دون آخر ..
أضف رد جديد

العودة إلى ”وثائق و شعراء“