العودة   منتدى أنا سوداني > منتدى الاغانى والكليبات > منتدى الأغاني والكليبات السودانية

منتدى الأغاني والكليبات السودانية كل الأغاني والكليبات السودانية ، حفلات ، بنات ، واغاني الشباب والرواد

   ماذا ستكتب للشخص الذي في بالك الآن (اخر مشاركة : محسية - عددالردود : 36894 - عددالزوار : 2467684 )           »          من أوراد المشايخ (اخر مشاركة : ناجي عثمان عبد الرازق - عددالردود : 545 - عددالزوار : 1768 )           »          ابتهالات (اخر مشاركة : *نظرة ثاقبة* - عددالردود : 361 - عددالزوار : 12373 )           »          دعــــــاء اليـــــــــوم ،،،،، (اخر مشاركة : *نظرة ثاقبة* - عددالردود : 7752 - عددالزوار : 323391 )           »          سجل دخولك بالشهادة والدعاء وذكر الله والصلاة على النبي (اخر مشاركة : *نظرة ثاقبة* - عددالردود : 19946 - عددالزوار : 839766 )           »          ارٍآٍئگٍمٌ وبُمٌنًتٍهًيِ آٍلّصِرٍآٍحًهً (اخر مشاركة : بانه - عددالردود : 33 - عددالزوار : 436 )           »          متصفح اوبرا الشهير Opera 26.0.1656.60 (اخر مشاركة : مروان ساهر - عددالردود : 0 - عددالزوار : 14 )           »          نـبضــــات راكـوبـية (اخر مشاركة : شذي زهر - عددالردود : 982 - عددالزوار : 23884 )           »          منوعات....راكوبيه (اخر مشاركة : شذي زهر - عددالردود : 83 - عددالزوار : 993 )           »          بين الحب والاعجاب (اخر مشاركة : شذي زهر - عددالردود : 8 - عددالزوار : 115 )           »         

الإهداءات
dany من الشوق : رساله شوق لاهل الزوق ذات الشجون من اشتقت لامى : يا هلا فيك انتى تنورى يا اشتقت لامى اشتقت لامي من المملكهالدمام : السلام عليكم اقبلوني صديقه لكل بنات حواء الموجودين بالمنتدي

رد
 
أدوات الموضوع إبحث في هذا الموضوع طرق عرض الموضوع
  #1  
قديم 05-04-2012, 16:54
الصورة الرمزية فائزة
فائزة فائزة غير متواجد حالياً
 
تاريخ التسجيل: 12:15, 31st Dec 2011
الدولة: الخبر -المنطقة الشرقية
الجنس : أنثى سودانية
المشاركات: 2,251
قـائـمـة الأوسـمـة
افتراضي هنا نحكي قصة أغنية- بوست متجدد

أحبتي الفكرة نحكي قصة أغنية مشهورة مع كتابة الاغنية حتي تعم الفائدة
أتمني الفكرة تنال الرضي
نرجو التفاعل التام

 

 

من مواضيع فائزة

 

 

 

توقـيع فائزة

رد باقتباس
  #2  
قديم 05-04-2012, 16:56
الصورة الرمزية فائزة
فائزة فائزة غير متواجد حالياً
 
تاريخ التسجيل: 12:15, 31st Dec 2011
الدولة: الخبر -المنطقة الشرقية
الجنس : أنثى سودانية
المشاركات: 2,251
قـائـمـة الأوسـمـة
افتراضي رد: هنا نحكي قصة أغنية- بوست متجدد

أغنية في غفلة رقيبي
سنة 1970م تعود شاعرنا ان يزور إحدى السيدات في منزلها كلما حان له ذلك وسمحت الظروف وفي إحدى المرات ذهب إليها كا المعتاد ووجدها تلزم سريرها تشكو من الإنفلونزا ( الإنفلونزا وبس ) فقال ليها وقالت ليه وعندما همَّ بالرحيل قالت له : مافي قصيدة : على طول جات القصيدة دي وهي مجرد حوار برئ بينه وبينها كما وصفه الشاعر في ديوانه . وهذه هي القصة الحقيقة للأغنية كما ذكرت في ديوان أيام صفانا للشاعر محمد بشير عتيق تقديم البروفوسير علي المك
في غفلة رقيبي رُحت أزور حبيبي لقيتهُ شوية حاسي
** ** **
ضاجع في سريره . متوسد وثيره . بين طيات حريرهُ
حَييتُه وجلسْتَ . من حُسنُه إختلستَ . في سِحرُه أنغمستَ
بحديث ( دبلوماسي) قالى نوري ماسي وأحذر إلتماسي
** ** **
قلتلُه في جمالك سحروك وله مالك ؟ صار ياحبيب لونك
فاتر زي عيونك
قال لي عندي حُمه . وبىَّ صداع آلمَّ
من أثر إنتكاسي . أتعذر نعاسي . ولي يومين أقاسي
** ** **
قلتلُه في وسامتك . وحلاوة إبتسامتك كفارة وسلامتك
والف عزيز كرامتك يالحافظ كرامتك
مهما كُنتَ قاسي . او لى عهدي ناسي . ليك يذداد حماسي
** ** **
قال لي انت عاقل ومافي لزوم تشاغل وانا في روحي شاغل
قلتلُه انت روحي
وانت سبب جروحي
وانت لشعري مُوحي
ياروعة جناسي . ياحُبي الأساسي . يالنسيتني ناسي

 

 

من مواضيع فائزة


التعديل الأخير تم بواسطة : Control 5 بتاريخ 07-04-2012 الساعة 23:40.
رد باقتباس
  #3  
قديم 05-04-2012, 16:58
الصورة الرمزية فائزة
فائزة فائزة غير متواجد حالياً
 
تاريخ التسجيل: 12:15, 31st Dec 2011
الدولة: الخبر -المنطقة الشرقية
الجنس : أنثى سودانية
المشاركات: 2,251
قـائـمـة الأوسـمـة
افتراضي رد: هنا نحكي قصة أغنية- بوست متجدد

رائعة إسماعيل حسن -بعد إيه
بدأ الليل أطول عما كان عليه عند شاعرنا الاستاذ الراحل اسماعيل حسن ؛ وذلك
بعد إنفصاله عن زوجته ومحبوبته "فتحية"؛ تسارعت خطى الأنفصال برغبة زويهما؛ لذلك
ضاق منزل حي السجانة بشاعرنا فقرر أن يتركة ويرحل بعيداً الى شمال الوادي علّه
يرتاح من شدة ماكان عليه من لوعة وإشتياق..
جرح شاعرنا كان أكبر من أن يندمل بالتسفار والنسيان .. عاد الى حي السجانة ثم
الى منزل محبوبته "فتحية" وقد قابله بالباب شيقيقها"مصطفى" الذي لم يحسن استقباله
وعندما ذكر له شاعرناأنه راغب في أن يرد"فتحية" أجابه مصطفى أنها قد خطبت لشخص آخر
لم يحتمل "أبوالسباع"هول الصدمة فأدار ظهره عائداً مكسور الخاطر.. ولكن سرعان ما لحقت
به "نعمات" صديقة فتحية تحمل إعتذار فتحية عن ما حدث ؛ وقتها تملّك الكبرياء من شاعرنا
الذي ظن أنها فعلاً قبلت بغيره فبدأ يتمتم بالقصيدة ..
بعــد أيــــه؟؟؟



بعــد أيــــه .. رائعة إسماعيل حسن

بعد أيه جيت تصالحني .. بعد أيــــه
بعد ما ودرت قلبي الكنت فيـــــه
جيتا تبكي .. جيتا تشكي .. لي ليـــــه
إعتذارك ما بفيدك .. ودموعك ما بتعيدك
العملتو كان بإيـــدك أنا مالي ذنب فيـــــه

أنا خلدتك بشعري في زمانك
ياما غنيتك وكان كلو عشانك
كان جزاي منك صدودك وهوانك
أنا أستاهــــل .. وضعتك في مكاناً ما مكانك
روح .. الغــدر بنفسو ما ببكـــوا عليه

جيتا تايب يا حليلك .. والفؤاد ملكوه غيرك
ربي يعدل ليك سبيلك .. كل منـــاي في الكون عديلك
ونهـــاية الخير مصيرك
أصــــلي عهد العشرة ما إتنكرت ليـــه
ليــــه .. ضيعوك .. ودروك
إنت ما بتعرف صليحك من عدوك
إستغلوا الطيبة في قلبك وبإسم العواطف خدعوك
حتى من كلمة حنانهم ووداهم .. حرمــــوك
الله ياخد ليك حقوقك
ويجــــازي الظلمـــــــــــــــوك

 

 

من مواضيع فائزة


التعديل الأخير تم بواسطة : Control 5 بتاريخ 07-04-2012 الساعة 23:42.
رد باقتباس
  #4  
قديم 05-04-2012, 16:59
الصورة الرمزية فائزة
فائزة فائزة غير متواجد حالياً
 
تاريخ التسجيل: 12:15, 31st Dec 2011
الدولة: الخبر -المنطقة الشرقية
الجنس : أنثى سودانية
المشاركات: 2,251
قـائـمـة الأوسـمـة
افتراضي رد: هنا نحكي قصة أغنية- بوست متجدد

اسمعني واشجيني


اسمعني واشجيني وبذكرة الأحباب بلاهي ناجيني وغرد يا الحمام ...
أغنية يتحدث فيها الشاعر محمد على عبدالله الامى عن التبريح وألمه
والشوق وعذابه والهموم وحرقتها....ويخاطب فيها الحمام ويترجاه
أن ينقذه من قاع الهموم الذي أصبح سجنا له....وان يسمح للهناء
والسعادة أن تجد طريقا إلى قلبه....ويصف حالته المزرية من ضعف
ووهن في جسمه وسهر في عيونه وألم نفسي وجسدي سببه الهيام
المتضاعف والتبريح والجوى والبين والفراق...ويدعو دموعه التي
حبست في مآقيه أن تهطل وتنزل لتبلل وتطفئ نيران وجده وهيامه..
.وهاهو يتذلل ويتوسل الأيام وقسوتها التي فاتت الحدود أن تلين...
في تعبير رائع وجميل..(يا دمعة بليني ويا قسوة الأيام فتى الحدود ليني )

ويتحدث الشاعر عن ضياع معالم الطريق عنه بعد أن غاب رشده ويدعو
الحمام لمساعدته ليتلمس طريقه إلى ملتقى النيلين والى جزيرة توتي
حيث الأدب الفطري والحياء والتدين ويدعوه أن يتقدمه إلى رياض و
بساتين شمبات حيث يندب هنالك حظه وسعادته ....ويترجاه أن يزوره
صباحا ومساءا وان يجلب إليه الأفراح وان ترويه حنانا وعطفا كما
يروى العطيش في مشرع أبو روف...ويتذكر الشاعر البساتين وخضرتها
وشذاها ورائحة المسك والتين...وليس هنالك من يشفيه ومن يعيد له
صبره غير الحمام....ويطلب من الحمام أن يقوم برثائه في حالة وفاته
والى القصيدة...





اسمعني واشجيني...... وبذكرة الأحباب...... بلاهي ناجيني
وغرد يا الحمام
*
رحماك نجيني......ومن تلك الهموم البى....في قاع سجيني
خلى الهنا يجينى.....وخلى السرور يصبح....في طيه زاجينى
*
تبريحي صالينى .....وهيامي زاد أضعاف......ومنامي سالينى
قول انت سالينى.....خلى اليزول منى ........آلمي الموالينى
*
الشوقو مالينى......والبين برا جسمي............بنوائبه بالينى
يا دمعة بليني....ويا قسوة الأيام.............فتى الحدود ليني
*
من غيرك يشفيني ....ومن غيرك يعيد......صبري المجافينى
قول انت صافيني.....زمني القصد هجري.....وفى هاوية خافيني
*
غاب رشدي اهديني......وعلى ملتقى النيلين......أتغنى واشدينى
على توتي....عديني......تجد الأدب فطرى......وتجد الحياء الديني
*
اصعد وناديني.....واقصد رياض شمبات......سير بى عديني
بغناك افديني.....واندب هناك حظي....... وسعدي المعادينى
*
صابحنى وماسينى......ويا جالب الأفراح.......لا تبقى ناسينى
سجعك يواسيني.......ورجائي فيك ياحمام.....إن مت ترثيني
*
بطرا البساتين......وبطرا الشذا الفواح....المسك والتين
ياجنة فتيني.....وهل بعد ذلك أرجوك......يا حظي ابكيني
*
إن رمت ترويني ...ري العطيش في ابروف.....وبجرعه داويني
في جوفي كاوينى ....حب أم عفاف أم در......من قبل تكويني
[/size
[/color]

 

 

من مواضيع فائزة


التعديل الأخير تم بواسطة : Control 5 بتاريخ 07-04-2012 الساعة 23:45.
رد باقتباس
  #5  
قديم 05-04-2012, 17:04
الصورة الرمزية فائزة
فائزة فائزة غير متواجد حالياً
 
تاريخ التسجيل: 12:15, 31st Dec 2011
الدولة: الخبر -المنطقة الشرقية
الجنس : أنثى سودانية
المشاركات: 2,251
قـائـمـة الأوسـمـة
افتراضي رد: هنا نحكي قصة أغنية- بوست متجدد

أغنية العيون النوركن بجهرا من أغاني أبو صلاح
التي تدفقت فيها دموعه وسالت كالأمطار وقال إن سبب نزول هذه الدموع هي الشلوخ العشرة المسطرة والنسائم المتعطرة برائحة المحبوبة الجميلة والشلوخ العشرة المسطرة يشرحها مبارك المغربي ويقول إنها المطارق وهى ستة شلوخ على الخدين ثلاث على كل خد مع عارض أفقي ليكون المجموع ثمانية وتحت ذلك العارض عارض آخر ليكون المجموع عشرة والمقطع الذي سكب فيه الدموع هو السادس ويقول فيه ...
هل حبيبي نسى أم لي طرا ......يا ام شلوخا عشرة مسطرة
النسائم بالند عطرا.........دا الدفق لدموعي ومطرا
يقول الأستاذ مبارك المغربي إن هذه الأغنية لا ترتقى إلي مستوى أغنيات أبو صلاح الأخرى بالرغم من انتشارها ولكنني أقول إنها أغنية جميلة وقوية وصادقة وذات ألفاظ ومعاني جميلة أبدع أبو صلاح وصف محبوبته وهى في ساحة الرقص وفى الأغنية صورا بديعية جميلة وللأغنية قصة رواها لي الفنان مبارك حسن بركات حيث قال إن أبو صلاح طلب من إحدى البنات الرقص ولكنها استنكرت ذلك وعابت عليه حول عينيه فانشد أبو صلاح هذه الأغنية على الفور وقال إن سبب حول عينه وسهره هو نور وجمال هذه الملهمة وقال الأستاذ مبارك حسن بركات إن كرومه لحن وغنى هذه الأغنية في نفس الحفلة ورقصت هذه الملهمة على إيقاعها ....وفى الأغنية وصف رائع لقوام هذه الملهمة حيث يصف صدرها بانه عالي وكبير حتى انه اتعب الأعطاف وبرا الخصر حتى اصبح رقيقا وعلى هذا الصدر جوز رمان جل الذي خلقه وهذه النهود باعت واشترت في الشاعر اى أنها أتعبته وسلبته لبه وفكره أما الشعر فمن طوله فانه يستر الأقدام وطلب منها أن تلقط القلوب التى بعثرها هذا الشعر ويصف الشاعر الجزء الأعلى من قوام الملهمة مع الأرداف كأنها خطيبة في منبر والمنبر هو الأرداف.... أما الرشيم والرشمة كما يشرحهما مبارك المغربي فالرشيم هو فصدتين تحت شلخ صغير على اعلى الخد ( نقرابى ) اما الرشمة فهي سلسلة ذهبية تصل ما بين الزمام والميسرة ويقول الشاعر إن الرشيم لشدة خضرته غير لون السلسلة الذهبية فصارت خضراء اللون مثل فرع الشجرة الأخضر على سطح المرآة... أما ابو الحاج المذكور في الأغنية فهو الحاج محمد احمد سرور وهبة هو عازف الملوديكا وهى نوع من الأكورديون ابوزراير كما يسميه البعض ووهبة هو والد لاعب المريخ المشهور بشرى وهبة اما عبدالرحمن فهو العريس .... الأغنية من الحان كروم وسجلها للإذاعة مبارك حسن بركات كما أبدع فيها الفنان محمد الامين .اخبرنى الاستاذ مبارك حسن بركات ان ملهمة الاغنية اسمها جواهر وقد قابلها فى الستينات فى تاكسى اجرة وبالصدفة كانت هذه الاغنية تذاع على راديو السيارة بصوته فقالت هذه المراة كل شئ فى الدنيا يفنى عدا الشعر فسألها مبارك انت بدور ام جواهر فقالت انا بدور اما الشاعر مبارك المغربى فقد اشار ان اسم الملهمةهو مدينة ومذكور فى الاغنية (مدينة الجوف) ولكنى ارجح رواية الفنان مبارك حسن بركات.
د . /أحـمد القرشـى

 

 

من مواضيع فائزة


التعديل الأخير تم بواسطة : Control 5 بتاريخ 07-04-2012 الساعة 23:49.
رد باقتباس
  #6  
قديم 05-04-2012, 17:06
الصورة الرمزية فائزة
فائزة فائزة غير متواجد حالياً
 
تاريخ التسجيل: 12:15, 31st Dec 2011
الدولة: الخبر -المنطقة الشرقية
الجنس : أنثى سودانية
المشاركات: 2,251
قـائـمـة الأوسـمـة
افتراضي رد: هنا نحكي قصة أغنية- بوست متجدد

قضينا ليلة ساهرة ..
محمد بشير عتيق
امتاز شعراء الحقيبه بالمواكبه وسرعة البديهه ...

جلسن شوف ياحلاتن ... وبدات الحفله ... وكان احد اولئك الفطاحله من ضمن الحضور ... لاحظ ذلك الشاعر ان اسماء البنات الخمسه

اللاتى كن يجلسن فى الصف الامامى ... ليلى ... محاسن ... روضه ... عينه ... زهره ... فقام بصياغة اغنية ... قطع اخدر ... تم

تلحينها وغنائها فى نفس تلك الحفله .

قمة الروعه تجلت فى ان الشاعر ذكر اسماء البنات الخمسه فى مطلع القصيده .

قضينا ليله ساهره ... تضمنت محاسن ... من كل روضه عينه ... من كل عينه زهره .
الي كلمات الاغنيه:


قضينا ليلة ساهرة ..
تضمنت محاسن ..
من كل روضة عينة ..
ومن كل عينة زهرة ..
قضينا ليلة ساهرة ..
تتوجت قياصر ..
تلالات كواكب ..
من اطيب المناظر ..
وكل مرة آهة ..
تبالى بى هواها ..
صبح شعورو سائر ..
وفكرو ظل حائر ..
مابين دى واحدة صفرة ..
ومابين دى واحدة خمرة ..
الروضة لابسة حلة ..
من الزهور طرائف ..
بيها المكان تجلى ..
والجو نسيمو رائق ..
والغيم نشر وظل ..
بالمسكرات الا ..
نخبات عرب واجلة ..
وناس عليها فرحة ..
وناس صريعة جرحة ..
وناس قلوبها اسرى ..
والف الف عاشق ..
يذوب وراها حسرة ..
غزال عيونو كاحلة ..
رشيق قوامو احلى ..
ملك زمام فؤادى ..
ترك اعضاى ناحلة ..
وافكارى ديمة راحلة ..
ما اجمل ارتسامو ..
واحلى ابتسامو ..
تسكرنى راح كلامو ..
فى قلوبنا استقر ..
ونجم السعود تجلى ..
لحبيبنا ولصديقنا ..
التهانى مستمرة

 

 

من مواضيع فائزة


التعديل الأخير تم بواسطة : Control 5 بتاريخ 07-04-2012 الساعة 23:50.
رد باقتباس
  #7  
قديم 05-04-2012, 17:08
الصورة الرمزية فائزة
فائزة فائزة غير متواجد حالياً
 
تاريخ التسجيل: 12:15, 31st Dec 2011
الدولة: الخبر -المنطقة الشرقية
الجنس : أنثى سودانية
المشاركات: 2,251
قـائـمـة الأوسـمـة
افتراضي رد: هنا نحكي قصة أغنية- بوست متجدد

أغنية سمحة الهيبة فوق مختار

يقال ناظر العبيدية مختار كان راكب في القطر والقطر زحمة شدية اظنو قطر تاسوع - المهم راكبة قريب منو مرا (امرأة) الظاهر ما عرفتو - اها فجاة في حرامي نشل المرا مبلغ كبير من المالي في ذاك الزمن..... المرا بكت وكوركت والناس اتلموا .. قالوا ليها النشلك منو؟؟؟
قالت ليهو الراجل ابعمة دا..
- زولك طوالي قال ليها قروشك كم؟
قالت 20 جنيه (وكان مبلغ كبير)
زولك طوالي راح مطلع ليها عشرين جنيه.
المرا: رفعت حسها وبقت تشتم - زول قدر دا تنشل قروشي - دي قروش الشهر كلو وأصلها ما سكتت..
وزولنا خشموا ما فتحو..
- وأثناء ما هي بتكورك وتهرج مع العمدة مختار... جا البوليس سايق ليهو واحد بيسال فيهو : (المرا النشلتها وينا في ديل)
الحرامي قال ليهو ياها دييييييك.
وجا العسكري رجع للمرا العشرين جنيه.
- المرا (خجلت من نفسها شديد) وبدأت تعتذر وشالت العشرين جنيه عايزه ترجعها ليهو ..
زولك حلف ما يشيل القروش مرة تانية.
وعندها عرفت المأة ان ذلك الشخص هو عمدة العبيدية (مختار ود رحمة) زعيم الميرفاب. فكتبت في حقه هذه الأغنية التي سنكتبها لاحقاً.


** اما الرواية الثانية للأغنية الشهيرة
في قرية من قرى السودان في الشمال القريب من مدينة عطبرة حيث مرابط الميرفاب كان يعيش مختار ود رحمة وهو من أعيان قبيلة الميرفاب وفي ذات ليلة شتوية وقف القطار القادم من الشمال في المحطة وأقلع سريعاً وجاء الرجل الذي نزل من القطار ليقضي حاجته خلف شجرة ولكن باءت محاولاته للحاق القطار بالفشل فأبلغه المحولجي المسؤل بعدم جدوى الانتظار في المحطة حيث أنه لا أمل لقطر آخر يقدم من ليتجه به ناحية عطبرة وأوصاه بأن يذهب لمنزل مختار ود ورحمة بعد أن حدد له مكان المنزل وصفاً عله يفلح في إجاد وسيلة تنقله ناحية عطبرة من لورى أو خلافه ، وصل لدار ود رحمة بعد أن قطع مشواراً طويلاً انهك قواه فوجد باب الدار مغلقاً ومنعه تأخر الوقت الذي دخل في النصف الثاني من الليل من أن يزعج سكان الدار بطرق الباب ولم يساعده طول المشوار وما يحس به من رهق من أن يعود أدراجه للمحطة فتوسد التراب أمام دار مختار ود رحمة ، ومع أشراق أول خيوط الصباح الجديد خرج مختار ود رحمة من داره قاصداً مسجد القرية لأداء صلاة الفجر فوجده غارقاً في النوم ايقظه وأستوضح أمره فذكر له أنه جاء للمبيت معه وقص له قصته مضيا سياً للمسجد وبعد أن عادا للدار لم يقم مختار بفتح باب داره ولكنه أمسك بأعمدة الباب المثبتة على الجدار وقام بنزع الباب ورمى به وقال من ( الليلة بيت مختار ود رحمة بابو يكون فاتح وما في باب ينقفل إلا الباب البدخل للنسوان ... أنا مختار ضيفي يرقد برة ) مما حدى بعمته أن تقول معقبة عارفاه ما فشار فكانت موحية للشاعرة والتي من قرابته أن تكتب قصيدة عصماء خايلة الملكة فوق مختار فشدى بها فنان عطبرة محمد الحسن قيقم فراقت لكل من آنس وسعد بكلماتها ومعاني الكرم فرددوها ابناء البنا فيما رددو من جميل أغنيات ومعاني (( ما بدي وبقول أديت وما أتفشر وقال سويت خايلة الملكة فوق مختار ))

سمحة الهيبة فوق مختار


عرش دود مراقد السار
لي الموفشار
خايلة الملكة فوق مختار
سيد الأبيض النهّار
سيد المهرة والقرقار
إيدك الما بتخون الجار
إيدك ترجم الحقار
لي المو فشار

عرش زي أبوك يا دود
أحسب لي تمانية جدود
إت فوق الرجال بالعود
ضربك جلة مو بارود


قالت أمو جيد لي
لي ناظر العبيدية

جدك يغفر السية
وخالف للرجال كية

ما بيدي ويقول أديت
ما اتفشر وقال سويت
القنديل سراج البيت
حمدالله بسلامتك جيت

العنتيل جا يتقنت
من شوفتو الرجال جنت
عرس فوقن إتعنت
ولا تخيب رجاء الظنت

ميرف ود ملوك بربر
خت الكرسي وإتحكر
قال للمستر إتذكر
مك في دارنا ما بتظهر

يا الماسك الدريب طلش
ديل ناس رحمة لا تنغش
ضربك جلة مو بالرش
شن جاب الحديد للقش

[/align]

 

 

من مواضيع فائزة


التعديل الأخير تم بواسطة : Control 5 بتاريخ 07-04-2012 الساعة 23:52.
رد باقتباس
  #8  
قديم 05-04-2012, 17:11
الصورة الرمزية فائزة
فائزة فائزة غير متواجد حالياً
 
تاريخ التسجيل: 12:15, 31st Dec 2011
الدولة: الخبر -المنطقة الشرقية
الجنس : أنثى سودانية
المشاركات: 2,251
قـائـمـة الأوسـمـة
افتراضي رد: هنا نحكي قصة أغنية- بوست متجدد

قصة أغنية من الاسكلا وحل
يقال أن الشاعر الكبير ود الرضي بعد رحيل مليم إلى جنوب السودان وهى فاتنة شعراء الحقيبة في ذلك
الوقت في أغنية من الاسكلا وحلا.... وقصة الأغنية أن سرور رأى مليم وهى
تتجه مع أسرتها على الباخرة المتجهة إلى جنوب السودان من الاسكلا التي هي
مرسى السفن الذي كان يقع جنوب منطقة فندق الهيلتون الحالي .....فتألم سرور
كثيرا لفراق مليم فطلب من قبطان السفينة أسماء المدن التي تمر بها الباخرة
ثم أخذها مسرعا إلى ود الرضي الذي كان يجلس مع الشاعر احمد حسين العمرابى
في دكانه بالخرطوم وكان سرور حزينا وحكي لهم خبر سفر مليم وطلب من ودالرضى
تأليف أغنية بهذه المناسبة بعد أن أعطاه أسماء المدن ....وعلى الفور جادت
قريحة ود الرضي الشعرية بأغنية من الاسكلا وحلا وكان الوقت منتصف النهار
فحفظها سرور وتغنى بها في المساء....بعض الرواة قال إن البيت الأول من
الأغنية من تأليف سرور لكن حسب رأى الشخصي إن سرور لم يعرف عنه قول الشعر
الغنائي لذلك استبعد هذا الرأي ...والبعض يقول إن العمرابى شارك في تأليف
الأغنية ...ولكن مفردات الأغنية تنفى هذا الرأي.
الاستاذ مبارك المغربى سمى هذه القصيدة بالقصيدة الجغرافيا لذكرها حوالى
العشرين مدينة سودانية من الشمال إلى الجنوب عكس مجرى النيل....لكن مبارك
المغربى في كتابه رواد شعراء الأغنية السودانية عاب على القصيدة ارتجالها
وقال إنها مصنوعة ولا تمثل الصدق الشعوري عند الشاعر فجاءت بسيطة الكلمات
قريبة المأخذ لاترى فيها روح التجديد والتطوير
من الطرائف المرتبطة بالقصيدة إن سكان أم جر عاتبوا الشيخ ود الرضي لعدم
ذكره اسم قريتهم فقال لهم ( عاد لا حوله لا قوة دى من منو ...ما منكم
انتو)..والى القصيدة...

من الاسكلا وحلّ......قام من البلد ولّى
دمعي للثياب بلّ
********
بى داهى العذاب حلّ....وبى تذكاره بتسلى
قلبي الذاب واختلّ.....وين بدر التمام هلّ
*******
صفر ودع الوابور......حاجزين قمره أتنين دور
الوابور مرّ بالمجرور....شال ظبيا سكونو خدور
*********
جبل أوليا حبيبي غشا.....وحصل في القطينة عشا
يا قلبي الطفش وفشا.......الما آليته......... ينكفشا
********
حل زى الصقر خوى......بالبدر الدويم ضوّى
عاد لا حوله لا قوّه......حبيبي الليله في الكوه
*******
صباح الخير على ام نفلين.......أهني البيها محتفلين
سيد الحسن رب اللين.......شرف كوستى والجبلين
********
هنيئا حان وقت زهاك.........الرنك احتفل ببهاك
وين الليله يا النشهاك......يا ليت كنت في جلهاك
********
يا كاكا الحبيب طلاك......بعده الزاد نفوسنا هلاك
يا ملوط حليل نزلاك........يازمن الفراق نسلاك
*********
بقدومك كدوك أصبح.......سوقو من الكساد ارباح
انا من نياحى صرت ابح........كأنى فى مبرك المذباح
**********
زاد من بعدك الانكال......قلبى البالهموم..... انكال
شاطري العاصمه يا ملكال.....توفيقيه صبرى انا كال
*********
شامبى أضحى بيك مسرور.....بعد المنقلا يا سرور
يا جوبا حي أنا المضرور....بعده النوم بقى لي ضرور
************
من دا الهم ما بنجى.........حبيبي الليله في تونجا
يا خالق الخلق تنجا.......تركاكا..... حلت العنجا
********
سلام متنامى ما غبّ.....ما مرّ النسيم صبّ
يرضى ال للعفاف ربى....ويخدم كامل الرتبا
*********
صب يا دمعي لا تكون جاف......وياقلبى البقيت رجاف
البدر الخفا....... الانجاف.....اليوم شرف...... الرجاف
********

الأغنية كما ذكرنا لحن وغناء سرور لكن سجلها للإذاعة أولاد شمبات وأولاد المأمون ومبارك حسن بركات

 

 

من مواضيع فائزة


التعديل الأخير تم بواسطة : Control 5 بتاريخ 07-04-2012 الساعة 23:54.
رد باقتباس
  #9  
قديم 05-04-2012, 17:14
الصورة الرمزية فائزة
فائزة فائزة غير متواجد حالياً
 
تاريخ التسجيل: 12:15, 31st Dec 2011
الدولة: الخبر -المنطقة الشرقية
الجنس : أنثى سودانية
المشاركات: 2,251
قـائـمـة الأوسـمـة
افتراضي رد: هنا نحكي قصة أغنية- بوست متجدد

شفت الملاك
قيل ان د/كوباني حدثت له هذه القصه الغريبه الزي كانت في مستشفى أبوظبي الزي كان يعمل فيه وفي يوماًمن الايام جيئ له بجثه فتاه حسناء كانت في مقتبل العمر(حسب وصفه) ليقوم بتشريح جثتها وتحديد سبب الوفاه، ولكن بعد أن كشف عنها الغطاء لم يستطع على فعل شيئ سوى أن يصافح يدها باكياً على شبابها متنمياً الرحيل معها في عالمها وخرج من المشرحه متصوباً منزله ثم تسربل بهذه الأغنية الجميلة..

انا شفت الملاك بـ إيدي سالمتو
بهرني بي نوري
خلاني مأسورو
انطعتا في بحورو
انا عقلي فارقتو

لو طلاك صباحو
او ضماك جناحو
اكيد القلب بجفا
وتاني تطيب جراحو
كمان لو شفت لونو
سحرو الفي عيونو
تدور ترحل في كونو
من حسنو ونضارتو

الراقي بوسامتو
مرسومة ابتسامتو
تفوق البدر صورتو
آية الحسن هامتو
دلال من غير تعالي
رقه وزوق مثالي
زي الدر بيلالي
في اصلو وداعتو

من يوم ما لقيتو
كل الفات نسيتو
في قلبي اصطفيتو
دون الناس هويتو
صار لي حياتي معنا
في احلامي جنة
بس الحظ تجنا
شال قلبي وسعادته

 

 

من مواضيع فائزة


التعديل الأخير تم بواسطة : Control 5 بتاريخ 07-04-2012 الساعة 23:56.
رد باقتباس
  #10  
قديم 05-04-2012, 17:19
الصورة الرمزية فائزة
فائزة فائزة غير متواجد حالياً
 
تاريخ التسجيل: 12:15, 31st Dec 2011
الدولة: الخبر -المنطقة الشرقية
الجنس : أنثى سودانية
المشاركات: 2,251
قـائـمـة الأوسـمـة
افتراضي رد: هنا نحكي قصة أغنية- بوست متجدد

أغنية ( يفرق كتير )

للشاعر التجاني حاج موسي ,,, غناء محمد ميرغنى
مناسبة الاغنية

قصة حقيقة حصلت لي واحد قريب الشاعر التجاني حاج موسي وكان متزوج ورزق بي بت صغيرة وحصلت مشكلة مع زوجتة وطلقة وسافر للقاهرة بسبب المشكلة دي . وكان في الغربة اكتر حاجة بحن ليها بنتة الصغيرة . وهو في القاهرة جاء خبر انة البت عيانة شديد ولازم يجي ويشوفة . اها نزل السودان ومن المطار للبيت طوالي ولمن جاء قريب للبيت شاف الناس كتااار قدام البيت وفي بكاء وعويل قام يهذي : بسم الله في شنو .في شنو يا ناس
لمن وصل باب البيت جاءت جنازة بنتة طالعة وبقي يبكي وهو ماسك الجنازة

يفرق كتير تمر بي من غير سلام --- يفرق كتير طعم الحلو لما يبقي مر ---
كلمني حاول حسي عاتبني وخت اللوم علي --
كلمني والكائن يكون
كلمني يا حلو العيون

كلها معاني حزينة لمناسبة حزينة لكن الناس تسمع الاغنية تقوم تجبجب ساااي
طبعا الشاعر اده الأغنية للفنان محمد ميرغني , ولكن محمد ميرغني احتفظ بيها وفي البداية ما غناها, بعد فترة اتوفي ولد الفنان محمد ميرغني , وبعدها جات مناسبة لابراهيم خوجلي وطلب من محمد ميرغني ان يحيي الحفل لكن محمد ميرغني رفض لظروف وفاة ابنة ، واصر ابراهيم خوجلي ان ياتي محمد ميرغني وتحت الحاحه اتي واحي الحفل وكان اول مرة يغني الأغنية دي ويتزكر بعض الحضور ان محمد ميرغني بكي عندما كان يردد ,,كلمني والكائن يكون,, يفرق كتير طعم الحلو لو يبقي مر,,

كلمنى يا حلو العيون
حيرنى صمتك يا حنون
ارقنى سهرنى الليالى
غرقنى فى بحر الظنون

وين العبارات الجميلة
ورنة الحب والجمال
وينن مشاوير العصارى
والخطى الفوق الرمال
ومنظرالنيل فى الغروب
ينادى ليك يقول تعال
صدقنى ما بحمل براك
ما عندى قدرة على الظنون
كلمنى خت اللوم على
أنا برضى بالكائن يكون

بفرق كتير وبتحسب كل يوم يمر
بفرق كتير طعم الحلو لو يبقى مر
وتفوت وما ترد السلام
وتسيبنى فى وسط الزحام
لو بس تخت اللوم على
أنا برضى بالكائن يكون
كلمنى يا حلو العيون .

 

 

من مواضيع فائزة


التعديل الأخير تم بواسطة : Control 5 بتاريخ 07-04-2012 الساعة 23:58.
رد باقتباس
  #11  
قديم 05-04-2012, 17:22
الصورة الرمزية فائزة
فائزة فائزة غير متواجد حالياً
 
تاريخ التسجيل: 12:15, 31st Dec 2011
الدولة: الخبر -المنطقة الشرقية
الجنس : أنثى سودانية
المشاركات: 2,251
قـائـمـة الأوسـمـة
افتراضي رد: هنا نحكي قصة أغنية- بوست متجدد

قصة اغنية العجكو؟

اغنية العجكو.. هي اغنية مردودم (مردوع بلغة اهلنا الحوازمة) بسيطة..في كلماتها و في معانيها..و الأغنية في البدء ظهرت في فرقان البقارة في اواخر الخمسينات..و التقطها ثنائي النغم..و قدمها للإذاعة السودانية..و ليس فيها ما يخدش الحياء و الذوق العام..

اول مرة اثارة مشكلة في جامعة الخرطوم.. في اواخر الستينات تقريبا..و كان من اعترض عليها هم طلاب الأخوان المسلمين في ذلك الحين..و تكرر المشهد في منتصف الثمانينات.. ابان اسبوع كردفان الثقافي في دار اتحاد طلاب جامعة الخرطوم..و كانت من ضمن الفعاليات مشاركة الفنانة امبلينا السنوسي..و التي ذهب طلاب الإتجاه الإسلامي الى دراها و تحذيرها من الحضور.. فأثارت تلك المسألة طلاب كردفان في الجامعة..و ذهبوا الى امبلينا في منزلها و قالوا لها.. حينما نفنى جميعا في جامعة الخرطوم.. بعدها يمكنك عدم المجئ..و بعض الخبثاء طلب منها أن تغني اغنية العجكو هذى..و حضرت امبلينا السنوسي..و غنت العجكو من ضمن ما غنت.. الطريفة في تلك الليلة.. أن ابناء كردفان اتفقوا على علامة معينة..و هي أنهم طلبوا أن يكف كل واحد منهم جانب من ياقة قميصه..و عرف طلاب الإتجاه الإسلامي بتلك المسألة و قرروا عدم الدخول في مواجهات مع طلاب كردفان..

في الأسبوع الثقافي الثالث في اغسطس 1989 (كنت نائب رئيس اللجنة العليا فيه).. طلب منا البعض احضار ثنائي النغم.. او امبلينا السنوسي..و ذلك مخصوص لأداء اغنية العجكو..و لم نوفق في الإتصال بأي منهما..لأن امبلينا كانت في الأبيض..و كانت لها اسباب وجيهة في عدم القدرة على المشاركة..و لم نجد قناة اتصال تجمعنا مع ثنائي النغم..

و اليوم .. اذا قام اسبوع ثقافي بواسطة طلاب كردفان في جامعة الخرطوم .. صدقوني سيذهب لهم احد الخبثاء و يطلب منهم أن تجئ امبلينا او ثنائي النغم.. لتؤدي اغنية العجكو..!!

بالرغم من أن الإغنية مسجلة و موجودة في مكتبة الإذاعة السودانية (اذا فضل فيها مكتبة حية)..و لكن يظل السؤال قائما: ما هي مشكلة ناس الإتجاه الإسلامي مع اغنية العجكو؟..و نسأل ايضا ناس كردفان الذين عاصروا الواقعة الأولي..ان يخبرونا عما حدث..و لماذا ناس كردفان بيصروا دائما أن العجكو لازم تتغني في جامعة الخرطوم (نظام كيه و كده)؟..

 

 

من مواضيع فائزة


التعديل الأخير تم بواسطة : Control 5 بتاريخ 07-04-2012 الساعة 23:59.
رد باقتباس
  #12  
قديم 05-04-2012, 17:25
الصورة الرمزية فائزة
فائزة فائزة غير متواجد حالياً
 
تاريخ التسجيل: 12:15, 31st Dec 2011
الدولة: الخبر -المنطقة الشرقية
الجنس : أنثى سودانية
المشاركات: 2,251
قـائـمـة الأوسـمـة
افتراضي رد: هنا نحكي قصة أغنية- بوست متجدد

ماتهتموا للايام

تقريباً في القصيدة إتكتبت في أيام السيول والفياضانات الشهيرة ..
الشاعر الكبير عوض جبريل ساكن في الثورة بالشنقيطي الحارة 11وأيام الفيضانات بيتو رماهو السيل زي أي بيت من بيوتنا البسيطة في الثورة وطبعاً الحيط البيت وقعت وأصبح البيت مكشوف ..
تقريباً جاءوجد زوجتوا حزينة علي الوضع عفشم برة وسرايرهم برة وهي متحسرة علي الوضع ده ..
جاها وفكا ليها محنتها وقال ليها:
ما تهتمي للأيام ظروف بتعدي..
طبيعة الدنيا زي الموج تجيب وتودي..

وما تهتمي أصلو الناس حياتا ظروف ..
بتتعود تغير كل خط مألوف..
مصير الزول حياتو ياما فيهايشوف..
وفي دنيانا بنلاقي الفرح والخوف..


مصير الزول عشان يفتح طريق يادوب ..
بكون زادو البشيلو معاهو شوق مشبوب
عشان يلقا إنتصارو يا زمن محبوب..
يضووووق المرة ويتوشح بي صبر أيوب ..


ومهما تظلم الأيام ضياها الفال ..وما تهتمي للأيام ظروف بتعدي....

وأذكر إني قلت ليهو يا أستاذ انا بي الجد عاجبني كتييييير المقطع بتاع صبر أيوب ده !!! قال لي فهمت يعني شنو شوق مشبوب ؟؟؟قلت ليهو أبداً ..
قاللي مش بيقولوا ليك الزول ده (بيشابي)ليالحاجة يعني بيحاول ينط عشان يحصلا ؟؟؟ قال لي بس انا قاصد كده (يكون زادو البيشيلومعاهو شوق مشبوب)

طبعاً الأغنية إشتراها منو كمال ترباس وبي القروش قام بنا الحيطة ..
كمال ترباس أول مرة غنا الأغنية غناها للمساجين في (كوبر أو أمدرمان) وعملت ضجة كبيرة جداً وبكت الناس لأنو ترباس حوول الأغنية لي :

ما تهتمواللأيام ظروف بتعدي..
طبيعة الدنيا زي الموجتجيب وتودي ..
فكانت فعلاً زي الكأنها مكتوبة لي المساجين

 

 

من مواضيع فائزة


التعديل الأخير تم بواسطة : Control 5 بتاريخ 08-04-2012 الساعة 00:01.
رد باقتباس
  #13  
قديم 05-04-2012, 17:28
الصورة الرمزية فائزة
فائزة فائزة غير متواجد حالياً
 
تاريخ التسجيل: 12:15, 31st Dec 2011
الدولة: الخبر -المنطقة الشرقية
الجنس : أنثى سودانية
المشاركات: 2,251
قـائـمـة الأوسـمـة
افتراضي رد: هنا نحكي قصة أغنية- بوست متجدد

إسم الأغنية: قائد الإسطول ..
إسم الشاعر: سيد عبد العزيز ..
قصة الأغنية :سيد عبد العزيز واحد من الشعراء اللي ظهروا في زمن كان الناس فيهو بتقول عن الشعراء إنهم صعاليك وبتاعين هلث ومجون وكانوا بـيـتعبوا جداً من الحكاية دي ..
أعجب سيد عبد العزيز بي واحدة من بنات ال المهدي في حي الأمراء وتقدم لي خطبتها فقوبل طلبه بي الرفض وكانت الحجة إنو زول (شاعر) وبتاع غنا وووووو الخ ..

كانت البت بتقرا في كلية المعلمات في أمدرمان (جوار سجن أمدرمان وخلف حوش الخليفة)وطبعاً أبو السيد كان كل يوم ينتظر في حوش الخليفة بيقيف بعيييييييييييد عشان بس يشوفا من بعيد لي بعيد ويملا عينو وبعد داك يمشي ..
أهاالبت طبعاً كانت أول ما يخلصو دراسة بتطلع أول واحدة وما بتمشي مع باقي البنات عشان تصل البيت بدري ..
وطبعاً كلكم عارفين شكل الطلاب لمن يخلصو من الدراسة ويبقو طالعين (البيوت) بتلقاهم ماشين في شكل مجموعات مجموعات ناس قدام وناس وراوووو..
أها البت دي أول ما خلصوا طلعت برااااااها وبقت ماشة قدااااااااااام وبعدها بقوا البنات ماشت في شكل مجموعات فبقت هي في المقدمة وهم خلفها ..
سيدعبد العزيز لاحظ المشهد وصورو في أجمل لوحة وقال :



يا قائد الأسطول تخضع لك الفرسان
ياذو الفخار والطول أرحم بنى الإنسان
مين لسماك يطول ما يطولك اللمسان
معناك شرحه يطول والله يا إنسان
أصدق كفانا مطول ياذو الحسن إحسان
أنا عقلى بيك مختول والناس عقول ولسان
ما بنكر المعقول آمنت بالأيمان
بالطلسم المصقول بدل لخوفى أمان
بالنور سحرت عقول كانت صميمة زمان
يا من تحق القول قتل النفوس حرمان
وما الجندى والمكتول و طالب الغفران
من أيده راح منتول واتوهد النيران
فاقد الصواب مبتول مما رأى حيران
أصبح زهر مشتول وفاح ملا الجيران
يا علة المعلول كم أومى ليك بنان
كم من أٍسير مغلول مالاقى فى لحظة حنان
يرى وعدك المحلول زى حجة الوسنان
والكان سكونه تلول ما ببدلهم بجنان
يا حبيبي كون ممهول وليكون ماكان
الفى غد مجهول والماضى أسمه الكان
نفديك شباب وكهول ونبقى ليك أركان
فى حبك المأهول ونخدم السكان
يالفى سماك مفصول تنشاف عيان وبيان
ما عرفنا ليك وصول وما دنيت أحيان
إنت الخطاك أصول يعلم الديان
مثلت فينا فصول ما بدرسها النسيان

 

 

من مواضيع فائزة


التعديل الأخير تم بواسطة : Control 5 بتاريخ 08-04-2012 الساعة 00:03.
رد باقتباس
  #14  
قديم 05-04-2012, 17:31
الصورة الرمزية فائزة
فائزة فائزة غير متواجد حالياً
 
تاريخ التسجيل: 12:15, 31st Dec 2011
الدولة: الخبر -المنطقة الشرقية
الجنس : أنثى سودانية
المشاركات: 2,251
قـائـمـة الأوسـمـة
افتراضي رد: هنا نحكي قصة أغنية- بوست متجدد

قصة اغنية .. جلسة ريد .."عاطفة وحنان ياناس انسان رقيق حساس "

كلمات الشاعر: محمد عبد القادر ابو شورة

الحان الاستاذ: السنى الضوى
اداء الفنان:محمد ميرغنى

هى قصة لتجربة حقيقية واقعية وكل ماحدث فيها معاش ،تحكى الاغنية قصة حب انتهت نهاية سعيدة والشيء الذى يميز هذه الاغنية انها تناولت مفردات جديدة وجريئة فى ذلك الوقت الذى كتبت فيه فى العام 1981م وقام بتلحينها الاستاذ السنى الضوى وكان من المفترض ان يتغنى بها مع رفيقه ابراهيم ابودية"عليه الرحمه" ولكن نسبة لانشغالهم باربعة اعمال حينها وكل هذه الاعمال كانت تحتوى على كلمة ياناس(ناس قراب منك- ناس افراحا زايدة- ناس ناسيننا- يانا الزمان ياناس) فقد تغنى بها الاستاذ محمد ميرغنى الذى حضر بروفة التلحين بحكم علاقة الصداقة التى تربطه بهم واصرّ و(حلف طلاق) على السنى الضوى بانه من سيؤدى هذه الاغنية وقد كان وذكر الشاعر انه كان مسافرا وعندما عاد اخبره الضوىّ أن محمد ميرغنى من سيتغنى بالاغنية فلم يمانع. ومن الطرائف التى صاحبت ظهور هذه الاغنية ان شاعرها تلقى عددا من البرقيات من عدد من الاشخاص رزقوا بتوأم واطلقوا عليهم (عاطفة وحنان) ومنهم من رزق بطفلة واحدة اطلق عليها اسم عاطفة ولكن شاعرها يؤكد ان عاطفة وحنان هى صفات لشخصية واحدة وليست اسماء لشخصين ويقول مطلع الاغنية

عاطفة وحنان يا ناس وإنسان رقيق وناس
وعيون تضوي الليل وقليب رقيق حساس
ضمتنا جلسة ريد .. نستنا دنيا الناس
ما شفنا فيها ملل .. ولا طاف علينا نعاس

جاد الزمان عطّر ليلتنا بالأفراح
هبّ النسيم أسكر أرواحنا من غير راح
وقصّر علينا الليل ليل الأحبة صباح
أدينا حق العين وشوق السنين إرتاح

أمضينا باقي الليل مشوار يفوح أنغام
وسرحنا متقاودين نتساقي أحلي كلام
ينثر علي ألحان من فم رقيق بسّام
بين رعشة الأنفاس وحلاوة الأنسام

 

 

من مواضيع فائزة


التعديل الأخير تم بواسطة : Control 5 بتاريخ 08-04-2012 الساعة 00:05.
رد باقتباس
  #15  
قديم 05-04-2012, 17:34
الصورة الرمزية فائزة
فائزة فائزة غير متواجد حالياً
 
تاريخ التسجيل: 12:15, 31st Dec 2011
الدولة: الخبر -المنطقة الشرقية
الجنس : أنثى سودانية
المشاركات: 2,251
قـائـمـة الأوسـمـة
افتراضي رد: هنا نحكي قصة أغنية- بوست متجدد

سايق الفيت

إبراهيم العبادى
أغنية سايق الفيات للشيخ إبراهيم العبادى لها قصة بروايات مختلفة حيث أورد
الأستاذ مبارك المغربي في سفره القيم رواد شعراء الأغنية السودانية إن سرور
كان سائقا ومعه أمين نابرى وزين العابدين كوكو وقد تحركوا من سنار إلى سنجة
في عربة فيات خاصة عن طريق الرماش ....أما محمد الحسن الجقرفى كتابه روائع
حقيبة امدرمان فلقد ذكر أن سرور خرج مع الخواجة مستر برسى لورين المندوب
السامي في مصر ا لرحلة صيد في كنفوى من سيارات شركة الفيات العاملة في السودان
في ذلك الوقت إلى سنجة ...وتخلف منهم سرور وانضم إلى العبادى والأمين برهان
في ضيافة زين العابدين كوكو نائب المأمور و انضم لهم محمد البنا وأمين نابرى وكان
سايق الفيات سرور...بينما ذكر معاوية حسن يسن في كتابه الغناء والموسيقى في
السودان نفس قصة محمد الحسن الجقر مع إضافة أن العبادى كان يعمل في حسابات
المقاولات المرتبطة بأشغال خزان مكوار (سنار) وحلّ عليه الأمين برهان ضيف
ا فتحركوا جميعا إلى سنجة مع سرور...أما مبارك حسن بركات فلقد ذكر لبرنامج
ظلال التلفزيوني إن سرور كان سائقا بشركة الفيات وطلب منه أن يقوم برحلة من
سنار إلى سنجة لعمل دعاية للشركة فاصطحب معه العبادى والتقيا في سنجة بنائبي
المأمور زين العابدين كوكو وأمين نابرى وواصلا الطريق إلى سنار....والروايات
لاتختلف عن بعضها كثيرا ومما لاشك فيه إن العبادى عمل بخزان مكوار والتقى
بالشيخ محمد ودالرضى هناك الذي قال قصيدته المشهورة متى مزاري أوفى نذارى
واجف هذا البلد المصيف فشطرها العبادى الذي انتابه نفس الإحساس في سنار..
المهم ان القصيدة قيلت بين سنار وسنجة والى القصيدة.....


ياسايق الفيات عج بى وخد سنده.....بالدرب التحت تجاه ربوع هنده
*****
أوصيك قبل تبدا سيرك داك .......طريقك سابق الربده
منك بعيد جبده حى هنده.....المراد عج بى ربوع عبده
*****
اطوى الارض واضرع من......افكارنا سيرك يالفيات اسرع
ميل على المشرع لا تريع...........القطيع..... بتجفل الادرع
******
شقا حشا الطريق وأتيمم الحلال....زفنو الكلاب مانالن إلا علال
فاضلات ثواني قلال بينك..........والغروب داك مشرع الشلال
******
شوف سايق الفيات الليله كيفن هاش.......والشجر الكبار بقى شوفنا لينا طشاش
قولي دح وين ماش فارقت.................... الطريق......... أتيا من الرماش
******
يازين الشباب ياطيب الأخلاق......يا أمين الصديق والناس على الإطلاق
من ايدى الصناعة يبعد المعلاق..............انظر للطبيعة ومجد الخلاق
******
شوف النهر مار بخشوع تقول هجسان.......أو مر المنام بى مقلة النعسان
جلت قدرته ما اكفر الانسان.......كم ينسى الجميل ويجحد الاحسان
*******
انزل ياصديق وشوف يد القدرة....شوف حسن البداوه الما لمس بدره
وراد النهر اردونى ما بدرى.......الكاتل الصفار أم نضرة الخضره
******
مانفرن تقول سابق الكلام الفه......عطشان قلت ليهن وصحت البلفه
مافيش كاس قريب قالن دون كلفه........تشرب بكفوفنا لما تتكفى

 

 

من مواضيع فائزة


التعديل الأخير تم بواسطة : Control 5 بتاريخ 08-04-2012 الساعة 00:07.
رد باقتباس
  #16  
قديم 05-04-2012, 17:37
الصورة الرمزية فائزة
فائزة فائزة غير متواجد حالياً
 
تاريخ التسجيل: 12:15, 31st Dec 2011
الدولة: الخبر -المنطقة الشرقية
الجنس : أنثى سودانية
المشاركات: 2,251
قـائـمـة الأوسـمـة
افتراضي رد: هنا نحكي قصة أغنية- بوست متجدد

اندب حظي أم امالى.

أكثر قصائد احمد حسين العمرابى حزنا وتشاؤما
وألما أغنية اندب حظي أم امالى...وفيها يحمل
الشاعر ضياعه وعدم تحقيق آماله وطموحه في
الحياة لسوء حظه وليس الإهمال وعدم الاهتمام
لأنه رجل عرف عنه الحزم والعزم والاجتهاد..
..وهنا يظهر تأثير الثقافة السودانية حيث يعزى
كل مشاكله للسحر والعمل لذلك يدعو ضارب الرمل
ليكشف خيرته ( لسيد خليفة أغنية مشهورة تحمل
هذا المعنى وتقول اضرب رملاك يارمالى) ولكن
الأيام لم تبتسم له والهموم تثقل عليه ....وفى
القصيدة أيضا يفتخر العمرابى بأخلاقه الحميدة
وسيرته العطرة بين الناس لأنه من أسرة عريقة
ذات حسب ونسب ...ويصف الشاعر حالته من
العذاب الذي لم يستطيع تحمله ويتمنى الموت حتى
يتخلص من هذه المعاناة القاسية... وكيف أن قلبه
كان خاليا من الوساوس فأصبح مشغولا مهموما...
ويطلب من محبوبته ألا تحزن عليه بعد موته...ويعود
للشاعر في الأبيات الأخيرة بعض من تفاؤله المفقود
ويتحدث عن جمال الملهمة ومحاسنها التي يلهج بها
لسانه...وهو لا يخشى الصد والهجران ومع ذلك كتوم
في حبه لا يصرح به لولا الدموع التي تفضحه دائما
(حبك كاتمه زاد انحالى من فرطه الدموع فاضحالى)
وهذا المعنى سبقه فيه محمد على عثمان بدري في
أغنية مرضان باكي فاقد (دمعي إذا طريتك بين الناس فضحنى)....
ويعزى الشاعر سبب شقائه وتغير أحواله هو جمال الحبيب
الذي لايستطيع أن يناله قلبه ....وبؤسه وألمه وحزنه جعل
عدوه يعطف عليه خاصة والدموع تتساقط من عيونه ينابيع
ا.....أغنية مليئة بالأحاسيس والمشاعر الصادقة بالإضافة
أنها متماسكة و رقيقة الألفاظ...التزم الشاعر فيها لزوم
ما لا يلزم حيث تتكون القافية من أربعة أحرف مما يدل على
شاعريته وتمكنه من اللغة .....تغنى بهذه القصيدة الفنان
عبدا لله الماحي كما سجلها للإذاعة الثنائي ميرغنى المأمون
واحمد حسن جمعه وكذلك غناها الفنان المبدع الطيب عبدا لله
ولم يكن اختياره لهذه الأغنية جزافا وإنما لأنه وجد فيها نفسه
وحياته وآلامه وأحزانه وتجربته التي عاشها والتي عبر
عنها شعرا في أغانيه الحزينة ..والى كلمات هذه الأغنية...

اندب حظي أم امالى.....دهري قصدني مالو ومالي
*******
شوف الخيره يارمالى....أظن كاتبني عن عمالي
عارض يعترض اعمالى.....أبنى وأملى ما تمالي
********
لا تقول ضعت من اهمالى ...أنا عامل الحزم رأس مالي
بس ايامى ما با سمالى..........همومي الزايدة متقاسمالى
********
بين الناس حميدة افعالى..........أصلى من الجناب العالي
حبك وحبي مانافعالى................يوم ينعوني لا تنعالى
********
قلبي المن الوساوس خالي............اليوم انشغل ياخالى
لو كان في اللحد ادخالى.............أحلى من العذاب ياخالى
********
دوام آيات محاسنك تالي...........زيد في هجري لا ترتالى
مقسم عن هواك ما تالي.......... طرفك بالهلاك أفتى لي
*******
حبك كاتمه زاد انحالى.......من فرطه الدموع فاضحالى
الشاقنى ومغير حالي.............حسنك واللهيج الحالي
*******
هاك شكواي لو تصغالى...............العدو حن لي رقالى
سهران والدموع راشقالى.........وحياة حبي ليك يا غالى

 

 

من مواضيع فائزة


التعديل الأخير تم بواسطة : Control 5 بتاريخ 08-04-2012 الساعة 00:08.
رد باقتباس
  #17  
قديم 05-04-2012, 17:41
الصورة الرمزية فائزة
فائزة فائزة غير متواجد حالياً
 
تاريخ التسجيل: 12:15, 31st Dec 2011
الدولة: الخبر -المنطقة الشرقية
الجنس : أنثى سودانية
المشاركات: 2,251
قـائـمـة الأوسـمـة
افتراضي رد: هنا نحكي قصة أغنية- بوست متجدد

حكاية نور النوار ...

الكلمات والالحان والاداء للاستاذ ابو عركي البخيت الطيب ...
في احدي احتفالات الاصدقاء اصرت الشله علي دعوة عركي لحضور عيد ميلاد وكان ذالك قبل يومين او ثلاثه من اكمال اربعين يوما علي رحيل المناضل جمال عبد الناصر ..وكان عركي حادا علي رحيل هذا الزعيم فخرج مع الاصدقاء جبرا لخواطرهم ....كانت لحيته تنعم بشعر كثيف ...فجلس في... الحفل منزويا وقد ذاد عليه الحزن فارسل له الاصدقاء بنت صغيره اصرت علي ان يراقصها هذا العركي ..ومع الحاحها الشديد قام عركي ورقص معها ...حركت اشياء كامنه في هذا الشاعر...واستفزت احاسيسه (فقد حاول ان يكتب ما يرثي به المناضل جمال لكن الحزن طغي عليه ) فخرجت الكلمات كلمة تلو الاخري

سهرنا الليل وكملنا
في ظلال عينيك... النعسانه ...الخ

ومرت ثلاث عقود علي الاغنيه الجيليه ذات الايقاع الراقص ...وفي اوئل الشهر المنصرم اي اكتوبر ذهب الفنان ابو عركي الي بروكسل ليحي حفلا هناك ....فكانت بين الحضور سيده ترقص وتشير الي عركي وتضحك مما ازعجه ذالك كثيرا وبعد انتهاء الفاصل الاول حضرة الي كواليس المسرح وسلمت علي عركي وقالت له يا عركي انتي ما عرفتني ياخ ....فتعذر لها ولم تتركه ليكمل اعتذاره فقالت له ياخي انا (نور النوار )وذكرته تلك الليله ...فكان ان صعد بها الي المسرح وحكي للجمهور حكاية نور النوار
سهرنا الليل وكملنا فى ظلال عينيك النعسانة
مرحنا كتير فى ساحاته فرحت اعمقنا الحزنانة
يا نورة النوار يا نورا يا فرح االافراح يا بنورة اه لالا

غنانا جمالك فى غنوة فى البيت فى الشارع فى المسرح
واروحنا عانقت النشوة طربنا سعيدة وبتمرح
يا نور النوار يا نورة يا فرح الافراح يا بنورة اه لالا

يا نورنا ونور الكون كله يا غنوة لفرح الاطفال
ياعصفور الجنة الصباح لعيون غنى وكام قال
يا نور النوار يا نورة يافرح الافراح يا بنورة اه لالا

سهرنا الليل وكملنا فى ظلال عينيك النعسانة
مرحنا كتير فى ساحاته فرحت اعمقنا الحزنانة
يا نورة النوار يا نورا يا فرح االافراح يا بنورة اه لالا

 

 

من مواضيع فائزة


التعديل الأخير تم بواسطة : Control 5 بتاريخ 08-04-2012 الساعة 00:10.
رد باقتباس
  #18  
قديم 05-04-2012, 17:43
الصورة الرمزية فائزة
فائزة فائزة غير متواجد حالياً
 
تاريخ التسجيل: 12:15, 31st Dec 2011
الدولة: الخبر -المنطقة الشرقية
الجنس : أنثى سودانية
المشاركات: 2,251
قـائـمـة الأوسـمـة
افتراضي رد: هنا نحكي قصة أغنية- بوست متجدد

قصة قصيدة سحابات الهموم
الشاعر يحي فضل الله شاف الشاعر الدوش قاعد على تل الرملة وعلى ضؤ القمر بيكتب ويمسح على الأرض ..
وعرف انو ميلاد قصيدة او مشروع مهم لما وصل يحي فضل الله على الدوش ، لقاهو بيكتب ويمسح بي اصبعو ..
سحابات الهموم .. ياليل
بكن بين السكات والقول
وباقات النجوم الجن
يعزن فى المطر
طبعا يحي فضل الله بقى يتابع في الكلام المكتوب وفي لحظته ما كان في ورقه في ايدو شان يسجل الكلمات
لانها كانت بتتكتب وتتمسح ..
فاستعان بي ( صندوق سجاير ) فاضي وبقى يسجل في الكلام البيكتب فيهو الدوش ...
سحابات الهموم .. ياليل
بكن بين السكات والقول
وباقات النجوم الجن
يعزن فى المطر
فاتن عزاك رجعن
وشوق رؤياك زمان مشدود
على أكتاف خيول هجعن
وصوت ذكراك مكان يجرى
يلاقى السيل
وسر مدفون بصدر النيل
ولولا الذكرى مافى أسف
ولا كان التجنى ... وقف
وصوت ذكراك رزاز صفق
على خطوات بنات سجعن
وشوق رؤياك
حنين لى رحلة فى المجهول
ولولا الذكرى مافى ..وصول
ولولا الذكرى مافى إصول
ولولا الذكرى مافى شجن

 

 

من مواضيع فائزة


التعديل الأخير تم بواسطة : Control 5 بتاريخ 08-04-2012 الساعة 00:12.
رد باقتباس
  #19  
قديم 05-04-2012, 17:44
الصورة الرمزية فائزة
فائزة فائزة غير متواجد حالياً
 
تاريخ التسجيل: 12:15, 31st Dec 2011
الدولة: الخبر -المنطقة الشرقية
الجنس : أنثى سودانية
المشاركات: 2,251
قـائـمـة الأوسـمـة
افتراضي رد: هنا نحكي قصة أغنية- بوست متجدد

حاول يخفى نفسه
للشاعر ابوصلاح

حاول يخفي نفسه وهل يخفى القمر في سماه ابدا وطبعا لا شفناه شفناه
حاول يخفي نفسه وغير اتجاه سطع النور في افقه وكل انسان راه
خلنا البدر اشرق كامل في علاه وخلنا الزهر فتح من انفاس شذاه
جذاب حسنه رايع لادن خلقه مايع
· رقص البان مشيه تحب تنظر وشيه
عيونك تختشيه من قوة ضياهو
· ومن شدة حياهو
مرة اذا نظرته ونظرو اليك رناه
· قلبك ينشرح له وترتاح لي لقاه
دون تشعر تحبه وتلهج في ثناه
مرة تقول كبدري ومرة تقول كزهري
· مرة تسمي سحري ومرة تسمي شعري
مهما تقلب فيهو اسما
· برضو تشوفو اسمى
كل وصف تراه اقل من مستواه
· مترفع عظيم عالي بعيد مداه
ملأ العين جماه الزاهي
· رشح نداه يلالي والكواكب تتناثر حداه
فيه الحسن اودع ما ملكت يداه
مفرح وشوفتو تفرح
بتلقاك باسم
· كالزهر المنسق في زمن المواسم
تشوف في مقلتيه حياه دلاله تيه
واللحظ البجرح والوجد المبرح
· انا من دون اصرح
لي قلب اصطفاه
· وهسة هناك معاه

مناسبة القصيدة

وقصة أغنية حاول يخفي نفسه …
والعهدة على الراوي أن الشاعر
كان يتمشى في أحد الشوارع مع صديقه ..
وفجأة وفي أثناء ذلك فتح أحد أبواب البيوت وظهرت خلف الباب فتاة كالقمر ..
حاولت رمي شىء في الشارع وتفاجأت بوجود الشاعر وصديقه قريبان منها ,
وهنا أغلقت الباب بسرعة حتى لا يراها أحد
( نسبة للعادة الإسلامية ..
أن تستر المرأة نفسها حتى لا تمكن أحدا من رؤيتها )
وهنا بدأ الشاعر مطلع القصيدة …
(حاول يخفي نفسه … وهل يخفى القمر في سماه .. أبدا لا … وطبعا لا … شفناه … شفناه

 

 

من مواضيع فائزة


التعديل الأخير تم بواسطة : Control 5 بتاريخ 08-04-2012 الساعة 00:14.
رد باقتباس
  #20  
قديم 05-04-2012, 17:45
الصورة الرمزية فائزة
فائزة فائزة غير متواجد حالياً
 
تاريخ التسجيل: 12:15, 31st Dec 2011
الدولة: الخبر -المنطقة الشرقية
الجنس : أنثى سودانية
المشاركات: 2,251
قـائـمـة الأوسـمـة
افتراضي رد: هنا نحكي قصة أغنية- بوست متجدد

قصيدة شتيلة ريد {قصتها}
ابنة حيِّه يكبرها ناصر بخمس سنوات ربطت بينهما علاقة حب منذ بزوع فجر الشباب وما إن تعود عليها وهى كذلك حتى اصبحت الحياة لا تصفو الا بعد لقائهما
تملك الحب منهما حتى صارا لا يتحملان الفراق ..
حدث نفسه يوما عن البعاد عن ماذا سيحدث اذا فقدها (الله لا قدر) ماذا سيحدث اذا تزوجت من شاب
آخر خاصه بعد ان نضجت انوثتها واصبحت مثار حديث شباب الحى ..
نفض رأسه وكأنه بذلك ينفض الفكره خوفا من عشعشتها فيه لتسود حياته وتظلمها ...
قرر خطبتها نعم قال سأخطبها لكى اضمن ارتباطى بها لكننى بذلك سأجرح قلب بنت عمى التى تحبنى واحس بحبها لى لكننى لاابادبها الحب فماذا اعمل مع قلبى الذى لا يعشق الا معشوقته!!!!!
نعم ساخطبها وماتوانى فى ذلك اخبر والده بنية ارتباطه بها ففرح والده ووالدته بذلك فهى نعم الخطيبه ونعم الزوجه وسرعان ماتمت مراسم الخطوبه بحفل صغير ومختصر ...
ثم سافر الى بلاد المهجر ليعود فى اقرب وقت ممكن ليتم الزواج ولكن ماذا حدث ؟؟؟
سمع ابن عم الخطيبه بخطبتها من ناصر ذلك الشاب الذى لايطيقه ولايحبه ودائما فى اختلاف معه فى كل شئ فلم يتردد فى اخبار والده بانه يريدها زوجة له رغم علمه بأنها لاتطيقه ونكاية فى ناصر قرر الزواج منها وفعلا ذهب والده لابيها وقال له( ابن العم اولى من غيره)
فلم يجد والدها بد من تزويجها بمن لا تحب ..
وفعلا تم الزواج وبقيت معه ثلاثه اشهر كأنها ثلاثه قرون لم يتفقا فيها ابد
فلم يجد زوجها بد من ان يطلقها بعد ان حبلت منه ...
جاء ناصر شاكيا بما لحق بهما من عذاب....

فكانت
شتيلة ريد
(الشاعـــر المرهف والمبدع علاء ابسير)

غناء
جعفر السقيد

ماتت شتيلة ريد جواك مشتولة
لاجنبها اتهنيت لاضقت محصولة
صادوها صيادين قبال تتم حولة
ورموها جم عينيك بى قسوه مكتولة

يا ناصر الاحزان ايامة ممهوله
وزول ماشبع اهات ما بيدرى بى طولة
تبره الهموم بتضيع فى سكة مجهولة
ويوم تبتسم بتكون ابطلت مفعوله

رغم انك انت رهيف والدمعه ماك زوله
وروحك ملانه يقين وبالرقّه مأهوله
الا الفراق هزاك دى الدنيا منعوله
دايما تضيق بالزول بى عرضها وطوله

خلى الدموع تنساب تتجارى لى حوله
واحزن على المحبوب واعلن فراق زوله
تهواكا بى اخلاص بى فعلها وقوله
واجمل مشاعر ريد حاويه مرسوله

ناصر دروب الريد ليك ماها مقفوله
اعشق بنيت العم قود انت اسطوله
حلوه وقوامه بديع مفدوعه مجدوله
وراقيه وتريدك موت وبالعفه مغسوله

اديها ريد وحنان بالجمله مبهوله
خليها فى ذكراك لاتبق مجهوله
خليها فى عينيك طوالى محموله
وخليها ديمه تكون فى خاطرك الاولى

اما القصد يازيك مشكلتو محلوله
لو يحمل الآلام ويصبر على هوله
يلقاها منو بعيد من جيهتو معزوله
ومن نوع فعايلو اكيد لى الليله مزهوله

العيشه ماها قروش ولا كلمه معسوله
العيشه ريد ووئام ومحبه مسئوله
حلقات شعور واحساس بى دقه موصوله
والفه وموده يبين فى النظره مدلوله

كيف يرتبط انسان بى واحده مو هوله
ويقدر يحبها كيف وبى غيرو مشغوله
وعارف قليبه معا وفى حبو مكتوله
يقدر معاها يعيش يا اخوانا معقوله؟؟؟

 

 

من مواضيع فائزة


التعديل الأخير تم بواسطة : Control 5 بتاريخ 08-04-2012 الساعة 00:16.
رد باقتباس
رد

أدوات الموضوع إبحث في هذا الموضوع
إبحث في هذا الموضوع:

البحــــــث المتقــــــدم
طرق عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
رمز [IMG] متاحة
رمز HTML معطلة

الانتقال السريع إلى




Schopfheim , Germany, 23.10.2006
Powered by vBulletin® Version 3.8.2
Copyright ©2000 - 2014, Jelsoft Enterprises Ltd anasudani
Adsense Management by Losha

كل ما يكتب فى المنتدى لايعبر عن اراء ادارة المنتدى وانما يعبر عن اراء كاتب الموضوع او المشاركة

Security team