وهم الغربة

يشمل القصائد الشعريه , الشعر الشعبى , الحلمنتيش , والدوبيت .

المشرف: بانه

أضف رد جديد
صورة العضو الرمزية
سمر علي
مشاركات: 189
اشترك في: الاثنين 2013.3.4 3:23 pm
مكان: السودان

وهم الغربة

مشاركة بواسطة سمر علي »

ياغربة يا بكاية يا غشاشة يا مستهبلة
تغرينا بدرهم قروش ووراهو قنطار بهدلة
جيناك لسنتين وبس او قول تلاتة نكملها
نلقى المراد ونودعك نرجع حياتنا نبدلها
نبنى البيوت فى العاصمة وبكوم اثاث بنجملها
وكرونا حاارة بنحضرها اصلو التنقل مشكلة
ونكمل الدين بمهل ....والسمحة جاهزة نحصلها
غير القروش اللى الاهل عبر الشهور حنرسلها
والباقى يدخل فى البنوك نشوف زيادة نشغلها
ناس فكرت تجنى العلم تبدا الدراسة تواصلها
احلام كتييرة وشيقة ......وامال كبيرة ناملها
لكن حساباتنا الغلط...... فى كل عام بنرحلها
مرت سنين من العمر...... بنعزها وبنفضلها
والحسبة وصلت طاشرات يمكن نعيش وندبلها


وتعال نحاسبك ياوهم..... من غير رقم او امثلة
كان للقروش نمشى ونحوش.... لكن تقول بنشاكلها
ما راضية تقعد فى الجيوب ...وتقول حرامى بينشلها
لكن بترقد فى الضهور........بى ديون كتيرة مطولة
ممحوقة ما تقضى الغرض........ واقل حاجة تكملها
كملانة بطحاء وحق وزن........ ومجاملات مستقبلة
وضرائب ابعاج ندفعها ......والزامى حمدى تحولها
واحلامنا صبحت زى سراب نمشى ونجر ما نحصلها
ياريت يكون هم القروش ياغربة فيك دى المعضلة
لكن تعال شوف الهموم .........الما افتكرنا نقابلها
ذلة ومهانة واحتقار خلو ..........النفوس متململة
سجنا كبير فيهو الكفيل......... سجان قيودو مكبلة
شغلانة شاقة ومؤلمة ........ودايما تكون مستعجلة
ما عاد يكفيها النهار............. تحتاج ليالى مليلة
امراض كتيرة بدت معاك ..........قبل الالم تستقبلها
ناس الضغط والسكرى ......وفوق القلب وجع الكلى
مصران وقرحة واكتئاب .........ونفوسنا ما متحملة
وبقينا فيك كيمان لحم........... تحت الهدوم متندلة
واكيد يكون اكل العلب......... واكل المجمد عاملها
عدم الرياضة مع المشى....... لابد يكون ليهم صلة

وكمان تعال لمعادلة........... ما قدرنا اصلو نعادلها
سجن العيال جوة الشقق ...........ولا الفراق للعائلة
فى كل طرق تلقى القرف.......؟ تلقى الخيوط متداخلة
جيب العيال بجيبنا مال........... وجيوبنا غيرو مميلة
وصغارنا صبحت بالزهج........... متوحشة ومتجفلة
لاقادرة تلعب فى خلا.......... لا ضل شديرة يضللها
ولا قادرة تدرس بنفس ........من الدروس المذهلة
تلقى الولد غالبو الكلام.......... والبت كبيرة مريلة
كل الضغوط جاتهم سوا....... وما قدرنا حتى نقللها
اما الفراق اصل الوجع........ ومشاكلو باينة مقيلة
كل زول مفارق عارفها وما اظن فى داعى اوصلها

ياغربة اديناك كتير............ ادينا خاطرك يسهلها
خلينا نرجع بالفضل............. نلحق حياتنا نعدلها
امالنا فيك بدرى انتهت.......... الا الرجول متوحلة
وبقينا زى اهل القبور .....لا البره عارف الداخلها
لا الجوه يرجع لورا .......ويحكى الحقيقة يوصلها
لكن خلاص هان الخلاص... غيرك نزل مهما علا
وان شاء الله نحيا نودعك... وتكونى اخر مرحلة
ياغربة يا بكاية يا غشاشة يا........... مستهبلة


( تأليف معتصم الامام- الرياض 16-4-1995)
HANDESA2002
مشاركات: 32
اشترك في: الخميس 2013.2.28 12:19 pm
مكان: sudan

رد: وهم الغربة

مشاركة بواسطة HANDESA2002 »

لا حول ولا قوة الا بالله العلي العظيم
انا لله وانا اليه راجعون

ليه كدا بس - نرجع ولا شنو ؟؟؟
صورة العضو الرمزية
القلب الملك
مشاركات: 9797
اشترك في: الجمعة 2009.7.31 1:40 am
مكان: بعد سن الأربعين ،،،

رد: وهم الغربة

مشاركة بواسطة القلب الملك »



عسى أن يبدلنا الله حالا خيرا من حالنا

ويؤتينا الدنيا بخيرها ويصرف شرها
Control 3
مشاركات: 559
اشترك في: الجمعة 2009.7.10 10:17 pm
مكان: 1

رد: وهم الغربة

مشاركة بواسطة Control 3 »

الغربة ألم حرقة وجع نار لهيب - خليط من الحزن
ليتهم في الغربة فقط بل في العذاب والاضطهاد والاذلال بدون وطن بدون هوية
نتمنى أن يعودوا ونعود ونجتمع ونبتهج
تحياتي لك سمر
أضف رد جديد

العودة إلى ”همس القصيد“