من الاخر

يشمل القصائد الشعريه , الشعر الشعبى , الحلمنتيش , والدوبيت .

المشرف: بانه

أضف رد جديد
صورة العضو الرمزية
سمر علي
مشاركات: 189
اشترك في: الاثنين 2013.3.4 3:23 pm
مكان: السودان

من الاخر

مشاركة بواسطة سمر علي »

للشاعر : نصر محي الدين

زهجنه من الكلام والقول

وفعل الفعل بدون مفعول

حنضرب...وننضرب نحنا

كرهته حياتنا في محِنه

حِلمنا تقيف كوابيسنا

ننوم نهنا....

حلم ابسط من التبسيط

وحزب الوطني في التجديد

وبين حرب الفساد..

...ومِعيط نطير نحنا...

.تقع فوقنا...المصائب كوم...

احاول افهم ...اقرب اجن

كيف تكفينا ماهيه؟؟

بتكمل قبل متم يوم!!.

.وتضحك انو ريسنا

قال لزياده الاسعار

حدكيم كمان ميه

يعني خلااااااص...حتنقذنا..

.وحناكل تاني طعميه

ياخي الحال صبح كيف كيف

لا شعبا تعرفو جبان

ولا بمبان...ولا ثوره.....

. ولا بطيخ

وانوم والمغسه قاتلاني

كيف تحكمنا فطريه

وجرتومه وبكتريا

كيف نتقاد من الآفات

يبنفثوا فينا سم حيه

بيقتل في الضمير والروح

تضيع النخوه...حق النوح

علي عز الزمان الفات

وكيف تقدر تنوم مهموم

ووطنك غربه في زاتك

وحالك شابفو رب الكون

وزادك هو ترحالك

لحدت مالقيامه تقوم

بين ذنبك واحسانك

وبين كابوس تعيشوا نهار

وطنك ماصبح دارك

عزابك تحيا فيهو غريب

بكل فوضي وبلا ترتيب

بلاش تهريج بلاش احلام هلاميه

والثورات تعم العالم العربي

وشعبنا لافي صينيه

بين حق الملاح والكيف....

اكيد ثورتنا في النيه

ومامعروفه تطلع كيف

طلعت مننا ظروفنا

واتغلفنا جوابات..

.تعيش مرصوصه في رفوفنا...

..يوم باكر اكيد حنكون

نعيش الليله لي روحنا

ولا باكر بيغشانا ولا هم بيمشوا يختونا

بعد سكن الضلام فوقنا

واتحولنا اشباح خوف واشباه ناس..

.وعد مخلوف

نصُر حرقتنا جوه الجوف

نموت نحنا ويعيش ليلنا

يمد كرش الحرام بينا

ونسرق حتي والدينا

دي العن عيشه واقسي ظروف

وقت تعفَن تراب بلدي

واعيش مجروح ومن غير روح

اتوه في بحر من الآم

طريق مسدود نهايتو جروف

ولا فجرا يجيبو شليل

ولا واقع صبح مالؤف...

ولا نفع الكلام مني

ولا وفي القلم وعدو

انو خلاص يبطل بوح

ويخرس بي بقايا الفيو

عشان ما ازيد حياتي جروح

كفايه اقول بدون قافيه

تعدل المائل المملول

وقت راحت حلاوه الروح

اكيد الصمت احلي حلول

اقلاو يبقي عندي دهب

وقت ماعندي حق الفول
صورة العضو الرمزية
سمر علي
مشاركات: 189
اشترك في: الاثنين 2013.3.4 3:23 pm
مكان: السودان

إمتهان

مشاركة بواسطة سمر علي »

للشاعر : أبو بكر الصادق
وشن فايدة نكون لابسين وجوانا الضمير عريان
بيوت الحلة يا السمحة سكن فيها الوجع كيمان
نسج فيها الحزن خيتو وشنق بيهو الحنان الكان
حليلو نص وطني الوقع في بحر خوفنا وماطلع
لا جيل يجيبو من الغرق لا شعب للشارع مرق
زي التقول الشعب مات .. يا إما إستحلى السكات
ولا الوطن أصلا لقيط ؟؟
كان غلطة بي شعب وحكومة .. شعبي العزيز هو المغتصب
الحانية ما لاقيا البلوما .. والمجني مات مغسة وتعب
خلف وراهو وطن يتيم فاقد هوية فقد نسب
خدعوك يا شعبي الكريم زادوك في النيران حطب
لبسو الجلاليب والعمم .. ربو الدقينات لي فهم .. وقامو يخطبو في الأمم
( جبنا الدين وجيناكم .. إنتو الدنيا غاشاكم
سيبو الدنيا لي ناسا .. وأبقو الآخرة حراسا
عليكم بالصبر والدين .. وقضو اليوم أخير بالدين
وباكر أنتو موعودين .. بالجنات وحور العين
تقول شافوهو علم الغيب .. ومن المولى شالو يمين )
الفرق والله كبير .. عمر الزمان فاروق وعمرنا قالو بشير
فاروقنا كان بحكم بالسنة والقرآن .. حتى البغال كانت في عهدو عايشة أمان
وبشيرنا حاكمنا بالظلم والطغيان .. وانت لو ما كوز ما تعتبر إنسان
وإمتهنا الإمتهان .. وعرفنا أيه معني الهوان
معنى الهوان ؟؟
أنك تكون عايش غريب جوة الوطن .. دمك رخيص من غير تمن
وإنو الوطن ثلة غذاء وتنوم جعان
معنى الهوان ؟؟
إنك تكون أرخص بضاعة .. ويرضعوك الذُل رضاعة
ويخلو خوفك يحتويك وتعيش جبان
معنى الهوان ؟؟
إنك تكون شايف الغلط وتقول ده صاح .. إنك تسيب أرضك وعرضك يستباح
والمغسة تقتل نخوتك وتموت مُهان
أضف رد جديد

العودة إلى ”همس القصيد“