عكير الدامر

مرجع لفطاحلة الشعراء

المشرف: بانه

أضف رد جديد
صورة العضو الرمزية
أود
مشاركات: 151
اشترك في: الاثنين 2007.1.8 1:47 pm
مكان: الوطن الكبير

عكير الدامر

مشاركة بواسطة أود »

الشاعر عكير الدامر هو علي إبراهيم عاكير والده من البجا، وأمه من الجعليين بالدامر، وارتبط اسمه بالدامر، ككثيرين غيره من البجا، مثل آل أبوهاجة، وهو من أوائل خريجي مدرسة غردون لذا تجده يجيد الإنجليزية، وبالطبع البجاوية ، والعربية، هناك قصة طريفة تحكى عنه :
كان يجلس يوماً في سوق الدامر في بوتيك لأحد أقربائه الشباب، فدخلن مجموعة من الفتيات وسخرن من الشاعر وصديقه البجاوي (يعني قطعن فوقو مع الشاب بتاع البوتيك) وكانت لغة الحوار بينهم الإنجليزية، ولم يعرفن أن الشاعر عكير يفهمها، فعندما انتهى حديثهن رد عليهن بالإنجليزية ، ووبخهن بأن العلم إذا أتخذ للسخرية من الناس لا فائدة منه، وهو كما تعلمون حكيم ووقور جداً، وهنا لم يفهم صديقه البجاوي شيئاً، فالتفت إليه ووضح له كل ما دار ... لكن باللغة اللبجاوية ... ولم يفهمن شيئاً ..


نبدا بقصيدة عكير الدامر في وصف الدنيا
----------
سرورك ما بتم عاقباهو ديمة الفجعة
وظاهرك لينا سكر الا طعمك وجعة
كم طفشتي مرتاح وقلبو مابي الهجعة
روحو تشابي وانت قطعت خط الرجعه
.....
تقابلك عروس تعشق معاني رقيصه
تملاك بالمحبة وتمشي نازله نقيصه
ما يغريك دلاله وتوب جمال بلقيسه
عاين للقبور وبعدين سماحته بتقيسه
...
بتقابلك جنينة تمتعك بي ثماره
وترقد في امانا وتنهمك بعمارا
باكر تبقى ليك حنضل تشوفو دمارا
تسحب منك .... وتدق مسماره
...
زولاً شاف رقاد العبروهو مشبر
والزول البرص فى الطوب ووشو مغبر
إتأكد دة بكرة مصير غير إتكبر
إنسى الموت والمال والبنون إتبتر
...
دى الغدارة دى الحقارة دى العقارة
كم قلبت زغاريد عرسه بي نقارة
أعلِنا بالحرب قبال تشب الغارة
وقبل الروح تغرغر وتبقى في الغرغارة
...
إتغشينا بي حبك لبسنا عباية
يا موية الرهاب الما ملت كباية
عجيب يا دنيا أمرك الا نحنا غباية
عاشقين الجمال في لمعة الحرباية

صورة العضو الرمزية
waya
مشاركات: 14068
اشترك في: السبت 2007.8.11 11:15 pm
مكان: على سفر

رد: عكير الدامر

مشاركة بواسطة waya »

مشكور ست شهور

كلام عجيب وفيهو تهذيب

انشاء الله تعود يا أود
صورة العضو الرمزية
أود
مشاركات: 151
اشترك في: الاثنين 2007.1.8 1:47 pm
مكان: الوطن الكبير

رد: عكير الدامر

مشاركة بواسطة أود »

waya

تسلم على السؤال والمرور

صورة العضو الرمزية
الهنوف
مشاركات: 20559
اشترك في: الأحد 2009.10.18 1:19 pm
مكان: ..........

رد: عكير الدامر

مشاركة بواسطة الهنوف »

شكرا لك اخي أود علي موضوعك الرااائع وسلمت انااملك
الي الامااام في ابداااعك اخي
عبد المعز محمد احمد عجب
مشاركات: 3
اشترك في: الخميس 2009.12.3 5:08 pm
مكان: جده

رد: عكير الدامر

مشاركة بواسطة عبد المعز محمد احمد عجب »

تسلم



يدك



موضوع

رائع
صورة العضو الرمزية
( ود البورت )
مشاركات: 2466
اشترك في: الأحد 2009.6.7 7:28 pm
مكان: سودان العزه و الكرامه
اتصال:

رد: عكير الدامر

مشاركة بواسطة ( ود البورت ) »

مشكووووره علي البوست الرائيع
د احمد
مشاركات: 39
اشترك في: الاثنين 2009.4.13 11:38 pm
مكان: السعودية الرياض

رد: عكير الدامر

مشاركة بواسطة د احمد »

توثيق رائع لنوادر.....مشكور والمزيد
صورة العضو الرمزية
لبيب
مشاركات: 3506
اشترك في: الجمعة 2009.8.28 10:13 am
مكان: الخرطوم

رد: عكير الدامر

مشاركة بواسطة لبيب »

[align=center]والله حكم وبوست عجيييييب جدا جدا والله العظيم
بالمناسبة انا عندي في الدوباي قصيدة
فيها توجيهات ونصايح بس لما أسجلا باسمي في المصنفات ح أنشرا ليكم لانو مرت على الشعراء الفطاحلة في شعرالدوباي وأجازوها
وبصراحة خايف عليها من السرقة
[/align][/size]
صورة العضو الرمزية
أود
مشاركات: 151
اشترك في: الاثنين 2007.1.8 1:47 pm
مكان: الوطن الكبير

رد: عكير الدامر

مشاركة بواسطة أود »

قصيدة الِحكَم ْ عكير الدامر
غاب نجم الاهل بقت العداوة اقارب
البتجيبو فزعه يكون دبيب وعقارب
البتقول صباح الخير تلق بكره مغارب
دبرة صُرة وجعَه جُوه حربة غارب

**********
يبس شجر المحنة وراحت الاهليه
ود اختك نصيحتي تقاطع بالكليه
ود العم نصيبه وبي المرض ممليه
والعجب ان قبيل عدمان ولِق ماليه

**********
الجنى في المحاكم شفنا خاصم ابوه
والحق الجلي الشياب قبل بابوه
الشبان بقوا البيصلي ما بحبوه
والدين المحمدي اصبحوا يسبوه

**********
الصبي قاطع الوالدين ولم حباله
والاخو بي البترمي اخوه مشغول باله
الخال انسحب ود الاخت سباله
والعم ود اخوه يدُور نسب يا باله

**********
الجار قاطع الجار والحيط علوها
وان قلت النصيحه الفي الكتاب قتلوها
الاخوان على بعض السيوف سلوها
واموال اليتيم اهل السبح اكلوها

**********
ما يتقدم اللى عله ديمه عطاه
والبهتك عرض مكشوف تملى غطاه
البزرع له شوك لابد يتوطاه
والبطبخ له سم لابد يتعاطاه
**********
ود بيت المحل ما تجر معاه موده
وما تتغش بي رزقه الحجرما انكده
كل يوم الفرح لي لاصلو ياخذ رده
مو زول ستره ود الايده قاطعه المده

*********

كافح في حياتك ولي البزاحمك راكب
واتدور مع الايام نجوم وكواكب
امش قرابى مرة مرة خليك راكب
اصلوا الدنيا طوفان والمعيشة مراكب

**********

ونسة العالمين يا ريبه ولا نميميمه
والانفس على الشهوات كتر تصميمه
الايد البترحم ما بيقولوا هميمه
والبزرع جميل ببقاله لوم وزميمه

*********

الحرة المؤصله اصبحت فجريه
ولدت بالحرام وسط الفريق عصريه
الوليان يقنتوا وديمه في ناريه
خايفين كلمة الضابطيه دي الحريه

**********

الافكار بقت فوق الحساده جريها
واللي الله راحت وما في زول طاريها
انطفت النصيحه وبدري طار طاريها
اما شهادة الزور حاضرة لي البشريها

*********

عمر سوق النفاق سرت وسيعه تجارته
انبهل الفساد الجار قمز فوق جارته
الما تم سبع سنين يبخ في سيجارته
ود التسعه صاحب رخصه واجبه فجارته

*********

الجور والضلال بين الخلائق شرن
الانفس على الشهوات جميع انجرن
ربات الخدود ومن الحجاب اتوارن
السوق فيه باعن واشترن واتعرن




**********
جميل خوف الله راح واهل العلم رضيانه
وبي هتك العروض واحدين بقت عيانه
كثير الامنوه وسوى كل خيانه
حاكي المرفعين قال العبور تقيانه

**********

اب عمرا طويل ما بنقتل بي ظروفه
واب عمرا قصير موية شراب مغروفة
سو عيشتك توكل والرزق مصروفه
بيض ديمه والعند الله مي معروفه

***********

تجارة اخر الزمن فانيه وعميره قصير
المال ما بيعز ود القبيل مو خير
الشبع بعد الجوع سيده ديمه صغير
الريش البقوم بعد الكسر ما بطير

*********

تجار اخر الزمن زابله ومتاعه قليل
اخذوا ايامكم اصله طيره في ايد عيل
ما دام شبعوا ناس ود الريالتوا تسيل
الافضل على الخلا وام شديده نميل

*********

عمل الخير اجر والنية مركب وصله
والشر دار خراب لي الديمه بتقنص له
رفق الدون ودار دواه قطعه وفصله
والعب والكلب لو طار يعود لي اصله
صورة العضو الرمزية
انس عبدالقادر
مشاركات: 98
اشترك في: الأحد 2010.10.17 9:57 pm
مكان: الحلاوين

رد: عكير الدامر

مشاركة بواسطة انس عبدالقادر »

سلااااام هااااااااااااائل
أضف رد جديد

العودة إلى ”وثائق و شعراء“