الخريف الفات الناس عدت منو بخنق فطس ومشت الامور علي خيرو وصرح الوالي كتر خير في جميع وسائل الاعلام وعلي الملا انو الخريف دا فاجانا قلنا مامشكلة عسي ان تكرهو شئ فهو خير لكم وقلنا خلاص الوالي ده اكيد من بعد الخريف حايبزل قصاري جهده كي يتدارك خريف العام المقبل ويثبت للجميع بانه كان متابع تمام وشغال بكفاة عالية ...
الحيرني جاتنا مطرة واحدة لقينا ناس امبدات كلهم في الصقيعة وناس الكلاكلات صواني خبيز العيد حقتهم ماحصلوها شاله السيل وفي ناس كتيرة وقعوا جمبلق في حفرة وماتوا ولحدي هسع ماوجدوا الهيكل العظمي حقهم وناس كتيرة كانت نائمة في بيوتهم اصبحوا الصباح ولقوا انفسهم في بيوت جيرانهم بدون احم ولا دستور وشوف عيني وعلي الهواء مباشرة تشوف الحيط طااااااااخ تقع والبيت غير ركيزة الباب مايفضل منو حاجة والاغرب من ده كلو طلع المسؤل وهو يتفقد المتضررين ويقول لهم الله اكبر ابشروا بالخير في ناس كانوا تاني ناصية اصبحوا ناصية ده كل الهماه الناس تخططها السيول بدل وزارة التخريب العمراني
دي الناس من كترة الامطار بقت اشكالها مابتتعرف الراجل لو تثأب ممكن عادي يقع طاااخ من طولو والعجب النسوان الواحدة لو مشلخة شلوخها اختفت ليس بعمليه جراحية وتجميلية ولكن بكثرة هطول الامطار عليها اصبحت مجاري للسيول والفيضانات
قطر مشكورة تبرعت لينا بكم طيارة واستبقلها المسؤلون بالتكبير والتهليل ووزعت علي ناس غير برضو بالتكبير والتهليل انا غايتو خريف العام ده ماشاهدتو لكن كنت متابع ناس البيت ف كل لحظة
يفقلوا في الحفرة دي تنفتح دي يدعموا للحيطة دي تقع طااخ ديك ودا كلو عداد رامي وحاسب لي انا
الشكلي مش حا اقدر احضر خريف العام القادم
وزي ما قال المثل الماغرق في خريف السودان يغرق في الديون ( علي فكرة ده مثلي براااااي )
التائب كتب:بس ان شاءالله حله العدس الشيل ما شالا
مشتاقين قدر صفيحه طماطم
حمد لله على سلامتك
اوووو حبيبنا والله ليك وحشة ياخي
علي الايمان هسع كنت بقطع فيها الطماطم دي
اصلها مش مفارقاني وكمان بالدكوة والزبادي وجبت كمان كسرة وشطة خضرا
وعينك ماتشوف الا النور
هسع انا بكتب ليك ولساني من الشطة جاه حول عديل جك الموية جنبي كل مرة اقرطع
يزول وحشتك بالدنيا والله
لك حبي وودي