حكاية مغترب

واحة المغتربين...كل ما يتعلق بالمغتربين من اسئلة،استفسارات،،،تعارف،،،،تهانى،،تعازى واخبار

المشرف: بانه

أضف رد جديد
صورة العضو الرمزية
bdri77
مشاركات: 40
اشترك في: الأربعاء 2007.7.4 4:08 am
مكان: UAE

حكاية مغترب

مشاركة بواسطة bdri77 »

سنوات التيه
الاغتراب... والمغتربون عالم تاني... المغترب يشيل شنطتو ويشرّق... قاصد ديار الزيت... يمشي هناك عشان ياخد لو سنتين تلاتة ويعرس ويشتري بيت وعربية... ويجي راجع يقعد عند اهلو... لكن يلقى نفسو ورط في الغربة... والزمن يجري بهنا وبهناك... مغتربين الخليج... ولقوانين دول القّطرة والعقال... يلقى نفسو لا هو خليجي ولا هو سوداني... يلقى نفسو حاجة كدا ما معروفة شنو... هناك لاهو مواطن عشان يقعد ويتوهّط سمح... وهنا يلقى نفسو مواطن مع وقف التنفيذ... ضايع... بين الاتنين يضيع هو... مغتربين السعودية حاجة تانية... حاجة تجنن الما يجن... خليط من الشعور بالدونية وشعور بالفوقية في وقت واحد... شعور بالدونية للبلاقيهو من الغربة... وبالفوقية لانو كان لما يرجع هنا بيتعامل كانو حاجة تانية وزول فريد في نوعو... يحيط به الناس من كل جانب... واول ما يفلس ويعلّم الله يبدو يسالوهو انت راجع متين؟... عشان يمشي يخم ويجي تاني... هذا المخلوق المغترب في حياته يمر باربع مراحل رئيسية هي المرحلة القردية... ثم المرحلة الحمارية... ثم المرحلة القُرادية... هذا المراحل لها التأثير في تكوينو الوجداني وسلوكو....
المرحلة القردية
تبدأ هذه المرحلة اول ما يبدا المغترب في اجراءات السفر... يبدا يحس انه اصبح جزءا من فصيلة المغتربين... ويتصرف على هذا الاساس... واول ما يقول بسم الله ويخت كراعو في قفص اغترابو... يبدا يحاكي من سبقوهو في الاغتراب... .يبدا يفكر يشتري عربية... ثم ستالايت في اوضتو براهو... ثم المتزوج يفكر يجيب مرتو بهناك ويقعد يجهز في البيت من العفش زي الجماعة القبالو بالضبط... من غرف نوم وعرف جلوس وسراير وموكيت وملايات امريكية وايطالية ولو في ملايات امم متحدة يشتريها زي الكبار والقدرو من المغتربين... ثم يبدأ في التوالد... التوالد هناك يتم في موسم معلوم ومعروف حسب خبرتي يتم اغلبه في فترة الشتاء اما فترة الصيف فهي للاجازات والعُمرة لمن لم يستطيع للاجازة سبيلا حكمة ربنا قعدت في منطقة حضرت فيها موسم توالد في اسبوع واحد كان هناك خمسة ولادات ضكور... والخمسة أي واحد فيهم ابوهو سماهو محمد ودا كان نتيجة تأثير المرحلة القردية... وقد حباني الله بان اتعرف على احد المغتربين في السعودية عندو تلاتة من الابناء يحملون اسم محمد... محمد سادة.. ثم محمد المامون..ثم محمد الامين... واقترحت عليه مساعدة مني في حل ازمة الاسامي ان يسمي الولد الجايي محمد وردي... ولو انزنق والحكاية جرت وورت معاهو يسمي البعدو محمد فرفور... العجيبة انو اسمو هو براهو محمد عثمان... المرحلة القردية مرحلة قصيرة الامد... والغربة والشغل وجهاز المغتربين وضرايبو والكفيل ما بيخلو أي مغترب يستمتع بهذه المرحلة... لهذا نجد ان المخلوق المغترب يدخل في المرحلة الحمارية سريع جدا...
المرحلة الحمارية
تتميز هذه المرحلة بالسكون والهدوء و الطاعة العمياء... وهي اطول مرحلة من مراحل تطور المغترب... ويكون المغترب فيها حمار شغل... البيت الشغل وبالعكس... ويكون عارف من تشرق الشمش هو الليلة حيسوي شنو... وقد استفاد بعض الكفلاء من هذه المرحلة ومميزاتها الحمارية... بان يطلبوا من المخلوق المغترب... ان يشتغل أي حاجة في أي وقت... ويقوم هذا المخلوق بالعمل بهمة عالية ونفس راضية ورضى عنها... كما ان بعض الذكيات من نسوان المغتربين استفادت من هذه المرحلة والطاعة بان كانت تطلب من بعلها كل ما تتمناهو وهو ما بيقول لا... يتمنى المغترب السعودي في هذه المرحلة بان ينادوهو بابي فلان... ابو محمد.. ابو عادل... ابو فاطنة... ابو نفيسة... ابو كديسة... كما وانه تبدو عليه ملامح تقالة الدم... . بدءا من الدقن المشغنفة.. وانتهاء بالنكت البايخة التي لو استمعت لواحدة منها تقوم عليهو تعضيهو في نص قنقونو ولما تمشي البيت تقفل عليك اوضة وتقعد تبكي لمن الله يغفر ليك تبكي عشان بياخة النكتة وعشان ربنا ابتلاك ببلوة وهي عظيمة الا على الخاشعين... ايضا قد حباني الله باحد النكتنجية من مغتربي المرحلة الحمارية... يحكي النكتة ويضحك فيها هو لحدي ما دموعو تجري... حتى لو حكاها عشرين مرة في الدقيقة... وكنت لما اشوفو جايي علي اسال الله سبحانه وتعالى ان يلزمني الصبر الجميل والسلوان... وان يجعل استماعي الى نكته في ميزان حسناتي... ويتميز مغترب المرحلة الحمارية بدقة وسرعة تحويل قيمة الريال الى العملة السودانية مرورا بالدولار... تتم هذه العمليات بسرعة جدا في راسو... ويديك نتيجة تحويل أي مبلغ بكل دقة وامانة حتى الكسور ما يخليها... ايضا مغترب المرحلة الحمارية يكون شغوف جدا ومعجب جدا بكفيلو... يقعد وسط الناس ولو بيتكلمو في الكورة ينط هو ويقول يا زول ها والله الكفيل كفيلي انا... وبس... ثم يحكي عن احترامو ليهو وكيف بيتعامل معاهو مع انك تكون واثقا تمام الثقة انو نضمو دا كلو اماني... واضغاث احلام... ثم تبدأ بوادر انتهاء المرحلة الحمارية تلوح في الافق وتظهر بوادر المرحلة القرادية... بان يبدأ المغترب يفكر في البديل في حالة الاستغناء عنه... والبديل داخل بلد الاغتراب.. وتظهر عليه القرادية جلية عندما يستغنى عنه فعلا...
المرحلة القُرادية
وهي مرحلة قد تطول وتقصر حسب عمر المغترب... المصّر ان يكون قُرادة للنهاية... وهي تتميز بان يقوم المغترب بالتشبث بالشغل والبقاء اطول فترة في بلد الاغتراب... يرفدوهو من شغل يشعبط في شغل تاني... يسفروهو يكون شال معاهو فيزا ويرجع تاني.. يكشوهو يرجع عُمرة او حج ويكسر ركبة هناك... لاحظت ان هذه المرحلة ليست حكرا على السوداني... ايضا هناك القراد المصري والقراد الهندي والقراد الباكستاني... ما يميز القراد السوداني انه يتكاثر ويتوالد في العائل وهو ياخد فترة طويله متشعبط في الهدف... عكس القراد المصري الذي يكون فترة تطفله قصيرة لكنها مجزية ومضرة حد الضرر ما يقيف لو حد...
المرحلة الكلبية الاستثنائية او (مرحلة كلب الحر(
وهي استثنائية لانها تتم خارج بلد الاغتراب وداخل السودان... المخلوق المغترب يقرر ان يرجع الي السودان... مصدقا نضم التلفزيون بان المغتربين يرجعوا والبلد محتاجة لخبراتهم وان السودان احسن بلد ممكن الواحد يستثمر اموالو فيهو... ثم تبدأ رحلة الجري... لو عندو بيت قاعد يبني فيهو يقعد يتجارا عليهو وقتو كلو ورا لواري الطوب والاسمنت... وبعد كدا يقعد يتجارا.. ثم يبدا الجري في السهلة عشان يعرف البلد والناس بتسوي في شنو؟... ويشتغل شنو؟ يجري كما يجري كلب الحر يجري عشان يشوف مدارس وجامعات لي وليداتو... ثم يستمرئ الجري قد يكون اشد عدوا من كلب الحر زاتو... ثم ... ثم بعد فترة يمشي الحج للمرة الاخيرة ثم يعمل عمليه بروستاتا... ثم يتوفاهو الله الى رحمته
صورة العضو الرمزية
ibn batoota
مشاركات: 1429
اشترك في: الاثنين 2007.2.5 1:02 am
مكان: on sea

رد: حكاية مغترب

مشاركة بواسطة ibn batoota »

حبيبنا توحه الزمن ضايقني أمشي أفطروأجيك بي رواقة كده,,,,,,

أسمع شكلك كده إنت في المرحلة القردية,,,هههههههه :076: :D

أمشي وأجيك,,,,
صورة العضو الرمزية
بت أبوظبي
مشاركات: 983
اشترك في: الجمعة 2006.11.3 3:32 pm
مكان: مدينة الأبراج

رد: حكاية مغترب

مشاركة بواسطة بت أبوظبي »

واحنا ناس الماعرفين نفسنا في اي مرحله من المراحل دي !
أها نحن تحت ياتو قائمه ؟؟؟؟؟؟؟
صورة العضو الرمزية
سودانية نار
مشاركات: 653
اشترك في: السبت 2007.2.24 1:06 pm
مكان: السودان

رد: حكاية مغترب

مشاركة بواسطة سودانية نار »

الاخ الكريم badri
عارف رغم انك كتبت الموضوع دا بشكل طريف
لكنه يقطر مرارة وسخرية
لابنا يهون علينا جميعا
مغتربين
وغير مغتربين
بنت دار النيل
مشاركات: 34
اشترك في: الثلاثاء 2007.8.28 3:40 pm
مكان: الامارت ابوظبى

رد: حكاية مغترب

مشاركة بواسطة بنت دار النيل »

والله يا اخوى انا ما شفت وصف دقيق لالغتراب والمغتربين اكتر من كده بس ربك يستر الجميع ويهون علينا اجمعين
صورة العضو الرمزية
bdri77
مشاركات: 40
اشترك في: الأربعاء 2007.7.4 4:08 am
مكان: UAE

رد: حكاية مغترب

مشاركة بواسطة bdri77 »

الكورى رمضان كريم وتصوم وتفطر على خير
وانت ياما ن فى المرحله الكم
صورة العضو الرمزية
bdri77
مشاركات: 40
اشترك في: الأربعاء 2007.7.4 4:08 am
مكان: UAE

رد: حكاية مغترب

مشاركة بواسطة bdri77 »

بت ابوظبى رمضان كريم
مشكوره على المشاركه والمراحل دى انتى مالك وماله دى خليها لى ناس ياسر
وتسلمى
صورة العضو الرمزية
bdri77
مشاركات: 40
اشترك في: الأربعاء 2007.7.4 4:08 am
مكان: UAE

رد: حكاية مغترب

مشاركة بواسطة bdri77 »

سودانيه نار
تصومى وتفطرى على خير
الموضوع ممكن يتحول لى فيلم هندى رايك شنوا
صورة العضو الرمزية
bdri77
مشاركات: 40
اشترك في: الأربعاء 2007.7.4 4:08 am
مكان: UAE

رد: حكاية مغترب

مشاركة بواسطة bdri77 »

دار النيل
رمضان كريم
اديك العافيه
صورة العضو الرمزية
ibn batoota
مشاركات: 1429
اشترك في: الاثنين 2007.2.5 1:02 am
مكان: on sea

رد: حكاية مغترب

مشاركة بواسطة ibn batoota »

bdri77 كتب:الكورى رمضان كريم وتصوم وتفطر على خير
وانت ياما ن فى المرحله الكم
ياحبيبنا أنا في الفاينل,,,وشايف الركن والمسطبه في مراية الجنب,,,,, :Sudan:
عقبال باقي الفروكسات يتخطو المرحلة القردية,,,,,:D
صورة العضو الرمزية
sarona
مشاركات: 1776
اشترك في: الخميس 2007.2.15 1:14 pm
مكان: المملكة العربية السعودية

رد: حكاية مغترب

مشاركة بواسطة sarona »



bdri77

وصف دقيق جدا ممزوج بمرارة وسخرية ......

برغم قساوة التسميات ولكنها للاسف تصف أوضاع االكثيرين في الغربة .....

وانا على ثقة لو لم يكن واقعهم مر لما ارتضو بالامر ....

ربنا يهون ويخفف على الجميع .....

موضوع جميل وعجبني جدا تناولك لموضوع شائك بشكل راقي

تقبل مروري



.
صورة العضو الرمزية
bdri77
مشاركات: 40
اشترك في: الأربعاء 2007.7.4 4:08 am
مكان: UAE

رد: حكاية مغترب

مشاركة بواسطة bdri77 »

saronaمشكورا على المرور ورمضان كريم...................
صورة العضو الرمزية
bdri77
مشاركات: 40
اشترك في: الأربعاء 2007.7.4 4:08 am
مكان: UAE

رد: حكاية مغترب

مشاركة بواسطة bdri77 »

الكورى الف مبروك وصولك الى الفاينل
ورمضان كريم والى كل الفروكسات
توحه.......................................
صورة العضو الرمزية
سودانية نار
مشاركات: 653
اشترك في: السبت 2007.2.24 1:06 pm
مكان: السودان

رد: حكاية مغترب

مشاركة بواسطة سودانية نار »

ibn batoota كتب:ياحبيبنا أنا في الفاينل,,,وشايف الركن والمسطبه في مراية الجنب,,,,, :Sudan:
عقبال باقي الفروكسات يتخطو المرحلة القردية,,,,,:D
:019: :019: :019:
أضف رد جديد

العودة إلى ”ملتقى المغتربين بالخارج“