عياده نفسيه

[فجر]

:صباح ملئ بالامل معطر باريج الورد والياسمسن لانبل واصدق واحلى مشرفين واعضاء
ياجماعه ايه رايكم نفتح عياده نفسيه فى المنتدى لانى لاحظت ان فى ناس كتيره حزينه
وناس مكتئبه وناس بتحب وناس بتكره وناس ماعارف هى دايره شنوة الناس ديل كلهم احنا ممكن نساعدهم بارانا وتجاربنا الشخصيه وممكن نزرع البسمه على وجوههم من تانى
وانا ممكن اساعدكم من واقع خبرتى فى هذا المجال واى زول ممكن يساعد يتفضل
ياريت تدونى ارائكم واقتراحاتكم ولكم كل ود وتقدير

[ibn batoota]

الاخت فجر صباحك زين

كلام زي العسل

بث ماورتينا المطلوب شنو؟

يعني الواحد يجي يحكي الحاصل ليهو شنو ولا كيف النظام في عيادتك؟

[فجر]

الاخ الكريم ابن بطوطه
اسمها عياده نفسيه يعنى تدخل تقول اللى فىنفسك وتطلع
واذا فى ناس عايزه استشارات خاصه برضوا ممكن
وعموما زى ماقلت ليكم انا عايزه اسمع اقتراحاتكم برضوا

[ابراهيم الجيو]

فجر،،،،
يازولة يارائعة،، سلامات وعوافي،،،

الكلام الفوق دا ليك،،، ثمح

النصيحة ليك يادكتورة،،،
شباب البورد ديل كلهم


لو حبيبك فات نساكا،،
والزمن سابك جفاكا،،،
أصبر الأيام تعدي،،،
وخلي باب الريد متاكا،،،

جنث حالـــــــــة،،،،


ندى القلعة،،،،

[فجر]

والحاله دى بتجيك كتير ياابراهيم والا احيانا؟
وكلام فى سرك الموضوع خطير وماتتهاون فيهوا
وربنا يشفينا ويشفيك
اللى بعدواااااااااااا

[ابراهيم الجيو]

[img][img]http://up3.m5zn.com/uploads/3db584c037.jpg[/img][/img]


نسرين سوركتي،،،

[اساور]

غاليتي الاخصائية النفسية فجر
اولا يا ريت تعملي لي بطاقة عشان انا حاجيك كل يوم
اولا الاعراض :
1/بحب امشي لوحدى لحد ما اتعب من المشي
2/مرات كثيرة بكون ما عايزة اكلم حد
3/باكل كثيييير (بسبب مجاعة في البيت لما اكون في اجازة) وفي الدوام طلبات الاكل طالعة نازلة
4/بكره البيت (لان مافيه بابا ولاماما ولا حتى حد تربطني به صلة دم)
5/بخت راسي في السرير بصحة الصباح
المطلوب :
عايزة افرح
العلاج سريييييييييع
مع خالص ودي

[فجر]

زيزتى الغاليه اساور ز مرحب بك وحبابك عشره وبدون بطاقه
الفرح موجود جوانا بس احنا اللى ما بنفتش عليه . ولو جينا لشكواك حنمسكها واحده واحده
كون انك بتحبى تمشى لوحدك لغاايه متتعبى دى مامشكله كل واحد فينا بيحب ينفرد بنفسو احيانا يابيفكر فى حاجه شغاله اوبيراجع نفسو او حتى بيحاسبها وكون انك بتمشى لغايه ماتتعبى فده شى كويس لانك بتفرغى الطاقه المكبوته فيكى فى حاجه مفيده
اما كونك مادايره تكلمى حد فده لانك اكيد مالقيتى حد يفهمك ويتفهم مشاعرك واحاسيسك فتشى حواليكى والا ماتلقى واحده قريبه منك ولو مالقيتى فليكن الورقه والقلم خير معين لك وليكن الكتاب جليسك
اما حكايه الاكل الكتير فده دليل انك مكتئبه وزعلانه وبتفرغى زعلك ده فى الاكل والافضل من كده انك تفتشى على الشئ اللى مضايقك وتحاولى تحليهوا
وكونك بتكره البيت ليه وين بابا وماما وين اخوانك والا انتى عايشه لوحك؟
اما انك بتحطى راسك ومابتصحى غير الصبح فدى نعمه ونعمه كبيره لازم تشكرى ربك عليها لان فى ناس كتيره محرومه من نعمه النوم بسب المرض او الهم اوغيروا وناس مابتنام غير بحبوب منومه ومهدئه
وعموما الزول اللى بينام طوالى ده علامه على ان نفسه ودواخله صافيه ونقيه زيك اتمنى اكون ساعدتك ولوبالقليل وربى يسعدك ويهنيك ويحققلك امانيك وزى ماوريتك فتشى جواك حتلقى الفرح اللى بتدورى عليه. وربنا يوفقك
اللى بعدوووووووووووووووووا

[ودالدرديري]

دكتورة فجر

اول هام مرحب بيك وحبابك 1000 بين اهلك وناسك وكدا
تاني هام داير اشرح ليك مشكلة المشاكل العندي كلها
والله يادكتورة من الآخر كدا مشكلتي انو عندي واحد صاحبي شليق شلاقة مبالغ فيها
وكلما اجي اهديهو واخليهو يروق المنقا زي باقي خلق الله
القاهو نط بالشباك وعمل ليهو كم مصيبة كدا
نمشي يمين يجينا شمال
نوديهو العمرة عشان الله يهديهو مافي فائدة
نوديهو الحج يجي راجع يوم الوقفة
نوديهو المطار عشان يمشي السودان ينزل في جدة
نلحقو في جدة نلقاهو مشى السودان
والمشكلة كلها في النهاية بتجي في راسي انا
غايتو نقول الحمد لله
صاحبي دا اول حرف من اسمو الجيو
اعمل فيهو شنو الزول دا ؟؟


يديك العافية



وليييييييييييييييييي قدااااااااااااااااام









و................الباقي على الله

[فجر]

العزيز ود الدرديرى
اولا شكرا على مرورك للعياده واله يعينك على ماباللاك مشكلتك صعبه شويه لانها من زمان عشان كده دايما بنقول اتخيروا اصحابكم واختبروهم قبل ماتصاحبوهم وياريت لو تودوهك للكشف النفسى والعصبى كمان لان دى بتبقى علاقه عمر
عموما مامشكله الحل كتير ساهل ولانوا زى ماقلت صاحبك فما ينفع تتخلى عنوا يبقى الحل ياتطخوا ياتكسر مخوا
لالا كنت بهظر بس حاقولك كلام فى سرك عشان مايسمعنا انا بابعت ليك حبتين منومتين تحطهم ليهوا فى الشاى وبعد ماينام تكون حاجز ليهو فى اول طياره ماشيه السودان وهناك وبالتحديد فى مستشفى التيجانى الماحى فى قسم خاص للنوعيه دى من الاصحاب بس وصلوا لينا وسيب الباقى علينا. واوعدك بعد سنتين بيرجع ليك ميه فل وعشره .
وزى ماقاليك اسال مجرب لانى عندى صحبتى بعتها قبل فتره والحمد لله بقت فله
اللى بعدووووووووووووووووا

[ابراهيم الجيو]

[quote="فجر"]اللى بعدووووووووووووووووا[/quote]

نــــــــــــــدى القلعــــــة،،،،

[فجر]

محمد منيرررررررررررر
اللى بعدووووووووووووووا

[فجر]

شنوة ياجماعه مافى زول جاء العياده الليله والاشنوة. والاخلاسسسسسس كلكم خفيتوا وبقيتوا كويسين عشان احنا قررنا نسترزق وناكل عيش. عموما مامشكله دى برضوا حاجه كويسه ودليل على انى شاطره وسرى باتع واللى بيجى بيخف من اول زياره.مع تمنياتى لكم بايام كلها سعاده وهناءوسرور

[ibn batoota]

المطلوب :
عايزة افرح
العلاج سريييييييييع
مع خالص ودي

اساور يا

علاجك عندي سمح

يا فجر بعد اذنك البنت دي انا ماخد فيها ماستر

وكانت بحث التخرج حقي

[ibn batoota]

شنوة ياجماعه مافى زول جاء العياده الليله والاشنوة. والاخلاسسسسسس كلكم خفيتوا وبقيتوا كويسين عشان احنا قررنا نسترزق وناكل عيش. عموما مامشكله دى برضوا حاجه كويسه ودليل على انى شاطره وسرى باتع واللى بيجى بيخف من اول زياره.مع تمنياتى لكم بايام كلها سعاده وهناءوسرور

عايني يادكتورة

انا كل ما اشوف لي طرحه حايمه بي جاي

بتجيني اكوله في القلب ما بقدر احكها

وتاني شي بحس بالحجاب الحاجز بقي ما حاجز

اها تفسيرها شنو دي والعلاج اهم شي بالله

[فجر]

صباح الخير يابطوط
شوف ياسيدى مرضك ده اسموا مرض حامد وباين عليه كده من الاعراض اللى بتقولها انوا لسه فى اوله
وعلاجوا بسيط جدا انك تعرس وسريع وياريت العروس تكون اللى اختاروها ليك ناس المنتدى واوعدك بعد اسبوع واحد بس حتكره اى طرحه حايمه حواليك. اما بالنسبه للحجاب الحاجز فمامشكله ممكن تمرنا
العياده ونغيروا ليك بواحد جديد وما تخاف قطع غيارنا كلها اصليه ويعتمد عليها.ومبروك مقدما

[اساور]

الغالية فجر صباح الخير يا بت امي
طبعا اليومين الفاتو الحالة كانت مستعصية شديد وما قدرت اجييك
اها طبعا عندي احساس انو انا زي ما انا
وحاسه بالدنيا واسعه واي زول يتكلم معاي يجيني صوته بعييييييد
وجابت ليها صحيه نص الليل طبعا دا جديد علي
اي شيء ولا النوم كويس
ومع خالص ودي

[المياسة]

تحياتي يا دكتورة فجر
اسمحي لي اتمدد على السرير اول شي
و بعدين انا عندي اعراض لمرض حامد
اعمل شنو كل ما اعرف انو موجود احوالي تتلخبط و غير كده بطني بتوجعني
و لما يكلمني اسمموا بكلام يقتل بس من جواي بكون مبسوطة اني بتكلم معاه . شنو كمان ؟
ايوا اتذكرت اكتر شي بزعلني منو ؟ بحب البنات شديد
عندي سؤال يا دكتورة
صح كل الاعراض دي اعراض حامد ؟والمصيبة انو ماما حاسة علي
اعمل شنو عاوزة اقتل الاعراض دي
حالتي مستعصية ..........................
يا عسل انتهت المسرحية الي من فصل واحد دا كلو من تأليفي الخاص قولي لي انفع كاتبة
عليك الله انا وين و الحب وين .

[فجر]

حبيبتى مياسه
دى انتى مش تنفعى كاتبه بس لا الا وتغطى على الكتاب اللى فى السوق باحييك وفى انتظار ابدعاتك اما مساله فىن الحب فانا دائما وابدا بانادى بان الحب موجود فى دواخلنا بس احنا نفتش عليه وساعتها بنلقاها مع تمنياتى لك بايام كلها حب وسعاده وهنا:079:

[فجر]

الغالية فجر صباح الخير يا بت امي
طبعا اليومين الفاتو الحالة كانت مستعصية شديد وما قدرت اجييك
اها طبعا عندي احساس انو انا زي ما انا
وحاسه بالدنيا واسعه واي زول يتكلم معاي يجيني صوته بعييييييد
وجابت ليها صحيه نص الليل طبعا دا جديد علي
اي شيء ولا النوم كويس
ومع خالص ودي

حبيبتى اساور
معليش اتاخرت عليك فى الرد بس يابت امى انت شكلك كده ومن اعراضك دى انك بتدورى العرس
فاتكلى على الله واقبلى اول زول يتقدم ليكى وساعتها حتلقى واحد تنشغلى بيهوا وتقلبى ليهوا ليلوا نهار ونهاروا ليل وحتنسى مشاكلك دى كلهاوصدقينى اساسا ماحتلقى وقت تشكى فيهوا.واذا ماعندك زول معين نشوف ليك واحد من ناس المنتدى ديل