الحب في الباص

[منير]

بسم الله الرحمن الرحيم
معليش حا أحكي بالدارجي:
في عام 2002 كنت ماشي السودان وما جاي تاني ونهيت وعملت تأشيرة الخروج وقبل ما أسافر بكم يوم توفيت حبوبتي العزيزة حاجة هيطل بعد معاناة لعدة أيام مع المرض وحبوبتي هذه قصة بذاتها هي حبيبتي وهي أمي الحقيقية وهي طبعا أم أمي ربتني هي وكانت تحبني لدرجة الجنون ولدرجة إخواني وأبناء الخالات والخيالان كان يغيروا مني ويحسدوني على هذا الحب الذي ألقاه من حبوبتي .. أهـ حبوبتي الحنينة .. الله يرحمك يا أمي هيطل ويديك الجنة ........
المهم كانت الصدمة الكبرى لي وكانت دائماً تقول لي متين يجي يوم عرسك وكلما اتصل عليها في التلفون تقول لي عاوز ليك فلانة وعاوز ليك علانة ........ ولكن قبل ما تتوفى اتصلت يعني قبل أسبوعين ... من الوفاء .. وقابلتها وقالت لي كلمة لن أنساها طول عمري أبداً بعد ما سألتني عن تاريخ مجيتي للسودان عشان أعرس وأجبتها والله ما عارف فما كان منها إلا قالت لي يا منير تاني ما حا نتشاوف ... المهم ضحكت معاها وانتهت المكالمة وبعد أسبوعين انتقلت إلى المولى عز وجل ..
المهم بعد الصدمة دي جهزت كل أموري عشان السفر .. وبالفعل كنت مسافر على سيارة خاصة صغيرة ......... وتحركت من الرياض وفي كل دقيقة ابكي وأبكي ........ وأنا في الطريق أتذكرها أمامي وأوقف السيارة وأبكي وأبكي حتى وصلت بحمد الله إلى جدة ونزلت مع عمي وعمتي حيث يسكنون سواء وهم تبع باعبود في جدة وبعد ما بكيت مع عمتي وأولاد عمي وبنات عمي جلس معي العم والعمة وسألوني عن سبب ذهابي للسودان نهائياً وشرحت لهم وصاح عمي وقال لي لازم تلغي الكلام ده وهاك يا نهير وهاك يا شتم عمتي بي جاية وعمي بي جاية ولكن .. ما اشتغلت لي بي زول قلت خلاص يعني خلاص ............ ومشيت وعملت إجراءات السيارة والتربتك وطبعاً هم سهلوا لي أي حاجة هم في باعبود بتاعت البواخر ذي ما قلت ليك ... وبعد يومين وكان يوم الثلاثاء أتحركت على الباخرة ووصلت الباخرة وسمعت منادي ينادي بالميكرفون ويقول: على منير الحضور في كابنة الباخرة .. وبالفعل ذهبت والتقيت بقائد الباخرة وكان اسمه عمرو وهو من بور تسودان وهو صديق لي عمي سراج وابن عمي منتصر سراج وقال لي عندك غرفة خاصة ليك محجوزة وذهبت للغرفة وكانت رائعة وبحمد الله نمت بعد تعب السفر من الرياض .... وثاني يوم وصلنا إلى سواكن .... وبقدر ما أنا فرحان عشان جئت البلد بعد ثلاثة سنين إلا شوية ولكن كان الحزن هو سيد موقفي ........ نعم جئت إلى السودان العزيز ولكن ما حا ألقى حبوبتي هيطل العزيزة أمي الحنونة .. وهاك يا بكى ودموع وغايتو خليها على الله ......... المهم طبعاً ما مكن تتطلع عفشك وسيارتك في نفس اليوم ........ ركبت التاكسي وذهب إلى بورسودان ... ووصلت وكنت بعرف ناس لأني جئت قبل كم سنة ......... المهم مشيت وعجزت في فندق أسمو: دنقلا غايتو اسم الفندق ..... وكان عندي جهاز مسجل كبير خالص وكنت شايلوا في يدي في الباخرة ومعاه بعض الشرائط ........ محمد الأمين .... زيدان إبراهيم ........ فرقة الصحوة وجلست كل اليوم اسمع مرة أبكي مرة ..... واتصلت على الخرطوم على ناس البيت واتصلت على اخوي في سنار وهو مهندس معماري كان عندو مكتب تصميم وكان ماسك مشروع تبع صندوق دعم الطلاب ولكنه الآن معنا هنا جيبتوا قبل سنتين عشان الأمور هناك ما نفعة معاها... المهم ... في اليوم الثاني ذهبت إلى سواكن عشان اخلص إجراءات السيارة والعفش وكانت المفأجاة أنو في مشكلة في الميناء ما في طريقة للسيارات إلا بعد أسبوعين .......... اتلفت كدة واتلفت كدة كيف الكلام ده أنا اقعد أسبوعين هنا ده مستحيل خصوصاً كانت الموية حكاية بطالة والذباب والجو حار المهم على طول مشيت مكتب بتاع خدمات وسلمتوا ورق السيارة عشان يخلصها هو ... وحجزت في سفريات اسمها يسرا ... المهم قالوا: لينا التحرك بكرة الساعة 4 صباحاً.. ومشيت رجعت الفندق ... وفي الليل ذهبت إلى نادي الشبيبة وعاينت في التلفزيون شوية ولعبت شوية تنس.
رجعت الفندق وكانت الساعة 9 ليلاً وعملت شوية اتصالات إلى الخرطوم والرياض.. وشغلت المسجل ونمت ...............
ونواصل في حلقات..

[moony]

متابعين معالك
ومنتظرة التكملة

[منير]

تسلمي يا عزيزتي وطبعاً قصة مثيرة وحقيقية وفيها عجائب بكرة تعالي بدري عشان الكراسي شوية وعندنا الجنا نيتر ما تخافي الكهرباء كان قطعت لك التحية والشكر على المررو

[الغريبة]

بتبالغ يا منير
يعنى تخلينا معلقين كده
نعمل شنو عاد
الصبر من عندك يا الله

[منير]

يا لغريبة لازم تصبري وهي عبارة عن حلقات و الله كلها جاهزة لكن انا بحب المكاواة فخليكم كدة في الهواء لي بكرة الحلقة الثانية ولك شكري وتقديري وودي على المررو يا عزيزتي

[مهند عبد الرحمن]

شنو يا اسامة انور عكاشة الحلقة التانية متين هههههه

[اصيله]

منير
سرد جميل وشيق
وهادى قعده ماقايمه من هنا لمن تخلص الحكايات الحلوه

[sarona]

منير البركة فيكم

اها وبعد كده ......
منتظرين البقية

[ibn batoota]

الأخ منير
أولا ربنا يرحمها يغفر ليها..

تاني حاجة عيشتني الجو معاك بي طريقة حلوه...
بكره بــــــــــــــدري و سمحت..

[منير]

مهند وأصيلة لكم التحية على المرور وطبعاً والله القصة حاتشوفوا فيها حاجات ذي الخيال ونهايتها حزينة بشكل المهم خليكم كدة الشمار قاتلكم وبكرة الحلقة الثانية ..

[ترطيبه]

ارح يا منير منتظرين البقيه
بس اوعا تقول لى فى بت سمحه ركبت جنبك فى البص وكسرته ليها تلج :D:D

[منير]

أخواني سارونا وترطيبة وابن بطوطة لكم التحية على المرور وانا فرحان بيكم ودعواتكم للحبوبة الغالية وبكرة تعالوا بدري يا احباء عشان تشوفوا الحلقة الثانية وهي مثيرة جداً

[معتز]

تسلم يا اخى منير بس لو جيت حالقى كرسى فاضى والاهم مايقعد جنبى راجل

[سودانية نار]

يا منير نحنا منتظرين الباقي

[منير]

اخي معتز لك التحية والشكر على المرور وما تستعجل القصة لقدام لو عرفتها حا تقول ما داير اركب في الباص كلو كلو بكرة بتشوف الحلقة الثانية..
عزيزتي سودانية نار كل الشكر والتقدير على مرورك الانيق زيك كدة بكرة حاتشاهدو الحلقة الثانية لك ودي وتقدير

[منير]

عند الساعة الرابعة صباحاً استيقظت وصليت الفجر وكنت قد اخبرت صاحب تاكسي لكي يأتني الساعة الخامسة ليذهب بي إلى السوق الشعبي حيث الباص .. وبالفعل قدى اتى صاحب التأكسي وكان اسمه (عباس) وهو من أبناء قبيلة الهدندوة (أدروب) وكان انساناً ظريفاً كريماً.. ركبنا التأكسي بعد ما أنزل معي الأخ عباس بعض العفش وتحركنا صوب السوق الشعبي وبعد حوالي عشرون دقيقة وصلنا إلى السوق الشعبي ووجدنا الناس واقفين والباص واقف ووأعطيتهم التذكرة وجاء المشرف واخبرني بمكاني جلوسي وكان الكرسي الرابع من السائق على اليسار .. وبعد ذلك ذهبت إلى قهوة صغيرة وطلبت شاي وجلست .. وبعد حوالي نصف ساعة امرونا بالركوب إلى البص وبالفعل ركبت وجلست على مقعدي المخصص لي .. وبعد دقائق بدأت الرحلة وقدموا لينا أول شيء الحلاوة وعصير ليمون.....
إلى اللقاء في الحلقة الثالثة..
منير

[khalo]

..........

[منير]

تشكر يا خالو على مرورك وخليك متابع!!

[moony]

عليك الله يا منير زود الجرعات شوية
ما تشتغل لينا بالقطاعي
شحتفت روحنا
وبطلة القصة وينه لهسي ما ظهرت :mad:

[منير]

انت شفتي شحتفا يا مووني والله حاشتف ناس المنتدى ديل كلهم بس اصبري والبطلة جاية اصبري شوية والله جنس بطلة ميرفت امين عديل كدة ههههههههه