الاخ ودالطيب حسب وعدى معك سوف أكتب للمريخ وهذه هى القصيدة الثانية ومازال إحساسى ان المريخ هو الاقوى وفرصه فى وصول دور المجموعات أكبر بغض النظر عن اللقاء القادم مع من من الفرق ؟؟ ودليلى النتائج التى حققها الفريقين :
جانا الخبر وأنا فى (بروكسيل ) مريخنا حقق إنتصار
مريخنا حقق إنتصار وبالتلاتة فى أروع ديار
فى (البقعة ) مقبرة الجميع لو كان صغار أو كبار
مريخنا مريخ الوهج مريخنا يا الحارق كنار
نجومك الابداع عديل نجومك الرفعو الشعار
أهل الكؤوس محموله جواً وأهل ... الصفار
لعب الهلال وفاز 3.1 وصراحة ورغم أننى تابعت المباراة مع هلالابى متحمس هو الاخ طارق ابوالحسن كان معنا فى ميونيخ سابقاً وغادر الى النرويج ومنها الى بيرمنجهام قبل عام . أجمع كل من تابع المباراة أن الهلال (جنازة بحر ) ولذلك كتبت هذة الابيات ولمن لايعرفنى أننى لاأجامل إطلاقاً وعندما يكون الهلال نار أكتب قصيدة ذى النار وكلها ثناء ومدح وفى حاله الفشل والعرض المرض ماعندى غير هذا الهجاء وربما يعتقد بعض الهلالاب قصيرى النظر أننى (حولت للمريخ ) والى المسدار :
حققنا ليهو الانتصار
بى عرض ضعيف ما شفنا نار
هلالنا ماشى فى إنحدار
يالديبة أدينا إعتذار
وخافين عليك من الشمار
مالو الهلال فى الدارة حار
وين الشباب وين النضار
وين المفرهد ذى خضار
ياسيدا راجيك كم غمار
وتيمك بشوفو بلا عمار
وبعد الخضار خوفى يطلع لى عدار
وما أشوف من الدهب السوار
وما أشوف من الدهب السوار
تنقد الرهيفة إن شاء الله ماتترقع
وأصبح حالنا حال الفى لبسو ماشى مرقع
مشاطيبنا الغلبونا وقعادنا خلو مسكع
يالارباب (كلتشى ) حالف علينا مربع
كل مايشوف شباكنا يدينا نامن نشبع
أنضرينا منك والبديل مابشفع
بعد قودوين كلتشى كانوا الثنائى البدّع
لو دفع المشجع من جيبو خلا مشّلع
كان قودوين كلتشى للهلال ما ودّع
وكان فرحتنا واصلة نضحك وكمان نجدّع
بى كأس التوالى والفرق كان الاوسع
وفارقنا الفرح وكلتشى راوغ وزّع
لى شعارو القديم خلاهو صافى منقّع
وركب نجم السعد والوالى هو الاجّدع
وركب نجم السعد والوالى هو الاجّدع
وغنو ليهو نجم السعد وين نجم السعد
ياهو الحبيب ياهو الرصد قدّ الشباك قداها قدّ
ياكلنشى واصل وموج عنيف وكمان زبد
وطمبل معاك وعجبكو داك يا هو السند
والله أيامك حليل أمواج هلال ماليها حد ؟إ
الدنيا كلها ما حاتحلى وأحلامنا نشبع فى النكد
دى سانتوس ..السامبا وين وأخو حمد؟؟؟؟؟؟
الديبة ما شفنا العجب إإ وين الخطط يامعتمد ؟؟؟؟
فى قطر شفت الهلال ما سمعنا منك أىّ رد
ماتقول كلام وعدادنا نازل عدو عد
ماتقول كلام أرباب صلاح إنت ما قالوا أبزرد
وإنت ماقالوا أبزرد مافى المطر من غير رعد
عايزين نغنى هلالنا هو الامواج تشيلك بى وكد
وتسماح جزائر الكرد .. مامثلك ولد
وتسماح جزائر الكرد إنت بتشيل بى وكد
وياهو الهلال رغم الهزائم ياهو الهلال سيد البلد
ولو شيلتو لى كأس السدود .... شيدتو سد
برضو الهلال سيد البلد ....... برضو الهلال سيد البلد
لم أتمكن من حضور مباراة هلال مريخ فى كأس السد واتصلت على أحد الهلالاب فى العشر دقائق الاخيرة وكان الخبر الغير مفرح فقلت لللاخ هل يمكن أن يتعادل الهلال فى باقى الزمن ؟ فقال لى الله يستر مايجيب المريخ الهدف الثالث إإإإ وبعد نهاية المباراة كتبت وقلت
كأس السد
مالك يالهلال ماجبت لينا السعد
وخليت المريخ رفع لكأس السد
الديبة العجيب ماتشوف أخوك حمد
أصبح حالنا شين وأصاب عيونا رمد
وناس النجمة كسحو وفاتو حد المد
حانقول يالطيف والمولى زيدنا مدد
أتنين ما كتيره وكمان بدون الرد؟؟
يالارباب كلتشى مطروا زايدو رعد
مالك ما دفعت ودفعت ليهو العد
نسيت قودوين أخوة صارخو مابنصد
خليت الاهلة بالحسرة ماتو كمد
يالارباب وقفت وقفت عند الحد
أدى الراية غيرك داخلين فى ساحة جد
فى أفريقيا كورة تخاى الرهيف يتقد
ونشد كرابنا بدرى ودفاعنا مابنهد
والمريخ عنيد فى اللفه ديمه لبد
والوالى معاهم ولى كل صغيرة رصد
تلاتة مليون شوية وملعون أبوكى بلد
تلاتة مليون شوية وملعون أبوكى بلد
حقق حى العرب بورسودان بالامس فى بنغازى الفوز على الاهلى 1.صفر وكانت المباراة الاولى قد إنتهت بفوز الاهلى فى بورسودان بنفس النتيجة من قدم (إيفيانى رجل الثوانى لاعب الهلال السابق) وفاز أهلى بنغازى بركلات الترجيح 3,2 ليتأهل للدور الثانى وقلت فى حى العرب :
حققت التعادل واخفقت فى اللفه
كان فى دارك تركّز ترجح الكفه
ما واصلت سيرك أحسنت للدفه
مالك فى أول طريق رجعت للمرفأ
ألف مبروك للمريخ التأهل بعد أن أنهى المباراة مع أتراكو الرواندى بالتعادل صفر /صفر فى كيجالى والان أكتب والدقيقة 30 من الشوط الثانى وحى العرب بورسودان متقدم 1.صفر على الاهلى بنغازى وربنا يستر حى العرب مزنوق !!!!!! والمباراة فى بنغازى وحى العرب حتى هذه اللحظة يعادل النتيجة التى انتهت عليها المباراة الاولى 1.صفر لصالح أهلى بنغازى وهاكم المسدار ده :
المريخ تأهل أستحق كل تقدير
واصل لى كفاحك معاك شعب ووزير
والوالى الامين جهز صغير وكبير
وياناس نهى فى النيمة دون تأخير
الارباب أخوى الانسحاب خليهو
وركّز فى الهدف المرمى ماتجليهو
والساب الهلال زورو وكمان رضيهو
إستاد الهلال ركّز على وعليهو
المريخ جنوب العرضة بى واليهو
مقصورة وطوابق إنجاز كمان تاليهو
ركز فى الصغار سودانا فى عاليهو
أسس للقدم والعالم كمان ضاريهو
الكأس من زمن جارين وراء نباريهو
مانمرق ملوص وعيبنا مانضاريهو
جمهور الهلال واقف مع ساريهو
ما خذل النجوم رايع العروض حاريهو
يقدّم فى الشباك الدورى هو الصاريهو
ما نفرّض فى كأس سودانى هو الراعيهو
وسودانى ياروع إسم فى جيبنا بنضاريهو
لو كنت فى حلفا نغماتو بتباريهو
ولو كنت فى نمولى سودانى بس شاريهو
ولو ضاع الطريق سودانى ليك داليهو
ما تفرّض تسيبو أو تقول راميهو
هو الراعى البطولة والاسم حاقيهو
وناس الاتحاد الدورى بى غاليهو
وماعايزين تخبط والغلط وريهو
أحسم للقرار مايطول ولاتلافيهو
والعامل الغلط ماتكوس على تراضيهو
********************
الاعلام كمان واعى وأمين ومواكب
يراعى المنطقية ويبرز لكل مواهب
ومايطبّل ويمدح يغرّق لكل مراكب
ومايصبح شعارك فى الحرب إنت محارب
أخلاق الرياضة أمثالة إنت الضارب
أخلاق الرياضة أمثالة إنت الضارب
6/ بشرى مبارك ادريس - (المانيا بون) - 8/2/2009
الف مبروك للسودان ولهولاء الابطال ووالله العظيم أننى السكرتير الرياضى والثقافى والاعلامى للجالية السودانية بالمانيا (بون) ونشكى سفارتنا (النايمة ) لى منو ما عارف وهو تصدقوا أن السفارة لم تشاركنا الاحتفال بالاستقلال والسلام ونحن الجالية الوحيدة فى المانيا التى اعتقد أنها احتفلت بهذة المناسبة كنا جاهزين للمشاركة ببص كامل وفى إنتظار إشارة من السفارة ولكن !!! أتمنى أن تكون السفارة على علم بالحدث وأكرر اسفنا كجالية فى عدم حضور هذا الحدث الهام والقومى
الجدير بالذكر أن مدينة (اشتوتقارت) هى معقل الشركة التى تصنع السيارات المرسيدس الالمانية المشهورة وأمر بها وبمطارها وادخلة لزوم العمل فى الاسبوع أكثر من ثلاث مرات وهى مدينة رائعة ولكن عيبها أنها من أبرد المدن فى المانيا وبردها يفوق ميوينخ وكنت أعانى من بردها شديدأً واسع انا فى الاجازة لما جات سيرة (اشتوتقارت ) جريت على البطانية الى اللقاء وأتمنى أن تصبح (جياد السودانية ) ذى (اشتوتقارت الالمانية ) وعايزين عمل وجدية
أبطال القوى والله الدهب جابو
وحطمو كم رقم وكل الوفود هابو
فى درب الدهب طريقنا يادابو
نفوت ناس العجب وهيثم وناس كابو
فى ال800 متر شادين لى كرابو
كاكى اولم وفات لى اترابو
وإسماعيل بطل أفرح لى أصحابو
وعايزين نكرمم نزيدم عشان جابو
رفعونا البلد ونسونا أتعابو
وعايزين بس معاهم الرامى نشابو
نكون ابطال رماية نصيب مع الصابو
أبطال العاب قوى النصر وأسبابو
أبطال العاب قوى النصر وأسبابو
مباراة المريخ أمام زيسكو لظرف أرتباط بزيارة هامة لم أتمكن من حضورها وحضرت فى الدقيقة 77 من عمر المباراة فى مطعم سودانى كبير (مطعم النور عضّه ) وفيه كمية من السودانيين تحلف تقول انت فى السقاى أو العيلفون أو الحلفاية أو نيالا أو الفاشر.......!!!!!!!!! المهم سألت من جلست جوارة ويبدو انه مريخابى (كان مدخن وزعلان ) فردّ على المريخ مغلوب تلاتة اتنين!!!!! وتسمرت تماما وبدأت أتابع وأملى فى التعادل والذى كان متاحا للمريخ بصورة أقرب من قريبة بل والنصر أيضا ولكن تطايرت كل الفرص بصورة فيها (رعونة وشفقة وتسرع ) حتى جاءت الطآمة الكبرى بطرد (أحمق الهادى سليم ) وبعد ذلك أحداث الشغب الجماهيرى المرفوض طبعا !!!! وتواصلت المباراة بعد تدخل الكابتن العجب ولكن وقتها كان لاعبى زيسكو قد أستأسدوا تماما ومنعوا كل شاردة وواردة حتى أنتهت المباراة بفوز زيسكو 3.2 وكتبت هذه القصيدة :
قدّم عرض غريب عجيب..... وكان مهزوم
من زيسكو العنيد فى العاصمة... الخرطوم
المريخ مرق جمهورو ........لاف ويحوم
كنا عشمنا يلحق يلحق المسكو داك مختوم
شوف كيف الهلال لمن تفارقو تفارقو نجوم
*********************
من أعماق فؤادى ...... كنت ليهو أشجع
وزاد الحسرة لينا ...... أظنو قرّب يودع
كم فقد النقاط ...... فى بلدو فيها ممضّع
وكيف يقدر يجيبه .... ومافى ليهو مشجع
يا أكرم عيب عليك... عجبك تشوفو يجدع
والجمهور حزين شاف زيسكو شافو يبرطع
وأحرز كم هدف ناقص عدد ..... ومبدّع
وأحرز كم هدف ناقص عدد..... ومبدّع
الخميس 30 .7 .2009 دخلت على منتدى السقاى والذى كان سلواى وفى المنتدى الرياضى وجدت الاخ والابن حسن محجوب يسأل عن قصائدى للهلال وكانت مباراة زيسكو غداً .... أتصلت على الاخ الاستاذ عماد محمد إدريس لكى أعرف موقف وإستعدادات الهلال فلم يطمأننى!!!! وبما أننى سوف أذهب للاخ طارق أبوالحسن ويسكن على بعد ثلاثة محطات منى وهو هلالابى (مرضان عدييييييل كدة ) وقبل أن تبدأ المباراة بدأت القصيدة وقلت :
الليلة الهلال.... عندو كلام يازيسكو
مع أخوان أمين وأخوانو داك الديسكو
نحرز كم هدف قبل الختام والمسكو
ويفرح ناس عماد... وللحابيب يسقو
واوعه من الحرام من شراب الوسكو
******************
ومجان نتصل (سودانى ) يالمحبوب
ونهاتف كل حبيب مانخلى ود محجوب
أصلو سودانى رايع مافيهو أى عيوب
لاتفقد شبكتك ولايقد ليك ليك جيوب
أسال منو ناساً .. فى دامر المجذوب
ولو فتحو الخطوط يكفى البلاد وجنوب
******************
وأرجع للهلال .. يا لاهف المكروب
تدينا انتصاراً نفرح ....ومافى ذنوب
نودع زيسكو حار ونردم عليهو الطوب
نخلى نجومو... يلبسو الشعار مقلوب
ويا طارق هلالك إن شاء جد مكروب
والان أتحرك على الاخ طارق أبو الحسن وبدلاً من ركوب البص مشيت كدرواية خاصة أن الجو فى بيرمنجهام (أروبى بحق وحقيقة ) وتقريباً من البتلاب حتى مدرسة عبدالجليل وأتمنى أن أضيف ماهو أجمل بعد نهاية المباراة . وصلت طارق وتابعنا المباراة والهدف المبكر وقلنا الليلة أقل شىء 5 أهداف ولكن قدم الهلال مباراة باهتة وكنت بصدد كتابة قصيدة هجاء لنجوم الهلال والذين كانوا أشباح عدا الدفاع وخاصة الاولاد الصغار وقد عبرنا كل الحضور بما فينا طارق عن الاستياء من عرض الهلال رغم أنه كسب الثلاثة نقاط .
ذكرت لكم أننى أحضر المباريات مع الاخ طارق أبو الحسن وشقيقة معتصم ومجموعة طيبة من الهلالاب والمريخاب .تحركت وأخذت دفترى وكنت كعادتى أكتب مقدمة للقصيدة قبل المباراة وأختم القصيدة بعد المباراة وكتبت :
ما عندى البقولو .......... وما متابع خبرو
سألت من اللقاء يارب يكونو... يكونو الهبرو
ملو الافراح قلوبنا .... كل الجموع الحضرو
فى بيت طارق حضور.... نسأل أخوة وخبرو
وان شاء عروض هلالنا قاصه الدرب فى اترو
***********************
دفاعنا يكون مكرّب .......لايدخل هدف لا قون
وسطنا فيهو هيثم لى هجومو أحسن أحسن عون
وهجمنا أصلو كاسح بين وسطو ربط ربط البون
ويحرز كم هدف ......ومن بدرى مافى الزون
ما أصلو الهلال فيهو الصعاب الصعاب بتهون
بعد أن أنتهت المباراة وكانت حقيقة مباراة رايعة قدّم فيها أبناء الهلال مجهود طيب وذكرونا عروض الاهلى والزمالك فى 2007م وكمان النجوم (قودوين وكلتشى ) والحمد لله أن الهلال الآن مرصع بالنجوم وقد واصلت القصيدة فى اليوم الثانى للمباراة وقلت :
رجع عرض الهلال .... لى أصلو دايما رايع
وشفنا يمين فنون ....... أهداف كمان وبدايع
هيثم قاد هلالو وللهدف ....للهدف كان صانع
وفى الزمن العديل . ما يقولو كان فى الضايع
وقعدنا فى الصدارة.. نشبع نشبع وندى الجايع
ما أصلو الهلال صيتو دايما ..... دايما زايع
والارباب رئيسو ...... صاحب البنوك ودايع
ما قصّر يمين وكلامو ........ حاضر سامع
ومن الفرحة جمهورك بكاها بكاها ....مدامع
**********************
وحمودة ودبشير شبالو شبالو كان كان فى محلو
هدف رايع جميل فلّ الحديد ........ كيف فلو
ومهند بالشمال .......... ناس كانو هربو ولّو
ما أصلو الهلال هو الغالى ....... زيدو وغلو
ما أصلو الهلال هو الغالى .......زيدو وغلو
وما ظن نرضى غيرو ....... أو نفارقو نملو
وما ظن نرضى غيرو....... أو نفارقو نملو
كتبت مقدمة القصيدة للمباراة قبل المباراة كعادتى وقلت :
ما كان عشمنا هيثم القايد يكون فى...... الجوله غايب
وندعو فى شهر الصيام ندعو ونقول...... القيم حبايب
يكفينا هو المولى الرحيم شر الكواديك..... والمصايب
شر الظلم من الحكم معروف عموم أفريقيا ....سايب
يارب يكون وسط الهلال ماسك اللعب .. شاد الركايب
ونحنا فى حبّ الهلال من صغار نامن... راسنا شايب
**************************
أمتعنا بى أحلى العروض .... وسيدا دايما هو قايد
يارب يكون فرحة وعبور ........... بالنصر عايد
بالنصر أو بى نقطة غالية غالية ....... يكون محايد
وبعد المباراة الرايعة التى قدمها الهلال وفرّض فى النصر والتقدم بهدف سيف مساوى الرايع والتحكيم الذى تحدثت عنه لم يخذلنى وكان الحكم الليبى جائرا على الهلال مثل جور الزعيم القذافى على السودان والسودانيين وحديثة الذى سوف يخدم أعداء الوطن وأعداء الوحدة . والى القصيدة :
سيف الدين على ادريس فرح مساوى ما اتبرّم
وبكّر بالهدف شبال .......... شبال وما بتلمّ
قدّم عرض جميل ........ راقى وخفيف الدم
لكن التعادل التعادل ....... كان بطعم السمّ
وفى قرب النهاية ...........غلبونا بالمنّجم
وحكم الساحة ظالم ..... والغيظ علينا كظم
وماكان يدخل مهند ....... ما منسجم حرّم
وكت الكوع حمى جيبو البخمها ...... خمّ
زعلتو الاهلة وزعلت ........ناس عم شمّ
ناوين التأهل نشيلو من ....... من ود عمّ
فى أستاد هلالنا جمهورو .......كيف ينتمّ
وبى اذن الكريم فى الكاس.. عشمنا عشم
أعلن وأشهر لاعب الهلال السودانى الكنغولى (أمبيلى ) اسلامة وهذا الامر أدخل الفرحة على نفوس المسلمين عامة وعلى جمهور الهلال بصفة خاصة، وبما أن الارباب صلاح ادريس رئيس نادى الهلال هو الذى دفع قيمة التعاقد للاعب (أمبيلى ) أسال الله أن ينعم بفضل الحديث الذى يقول لان يهدى بك الله رجلا للاسلام خيرا لك من حمر النعم ولذلك كتبت هذا المسدار :
الارباب سبق........... الوالى بى أمبيلى
أسلم وأشهرو واسلامو ..........هو دليلى
شوف وارغو وكلتشى... أشفى بيهو غليلى
الاسلام خير دين وخاتم الرسل هو كفيلى
تأهل الهلال بجدارة بعد أن فاز على المريخ 3.1 فى مباراة تعتبر من أقوى المباريات التى لعبها الفريقين فى الفترة الاخيرة وتفوّق الهلال بالهجوم الكاسح والاهداف الملعوبة وحقيقة طرد الباشا أراحنا كثيراُ وهذا الموسم موسم الطرد عند المريخ فى كل مباراة مطرود لاعب ولابد للمريخ أن يبحث علاج لهذه الظاهرة الخطيرة ويعاقب وبشدة كل لاعب حصل على كرت أحمر . والان دعونا نبتهج شعراُ :
الهلال مع هلال رمضان
حللنا الصيام........ وما شين لى هلالنا
يسوّى لينا عرضاُ .....يستر فيهو حالنا
ويعلن للتأهل أصلو الكان .... فى بالنا
وباى باى باى وصيف.. مايلحق هلالنا
تلاتة سنين بسيطة.... وفرحانين عيالنا
وكتبنا كم قصيدة ..... وحانكتب مقالنا
نذكر فيهو عرضو وكيف الكأس حلالنا
يارب ليهو نرفع... وسيدا يكون مثالنا
مع أخوان معز.... وكل نجومنا فالنا
مع أخوان معز.... وكل نجومنا فالنا
******************
وتغنى ندى ويبشّر .... يبشّر هناك برجاس
والله الضرب فوق الفقر فوق الفقر والراس
ونتأهل عديل مانحنا أصلو .. أصلو أساس
وديمة مع الكبار ... مانخافو أصلو دواس
وتغنى كمان سمية .. ويغنى كمال ترباس
وكامبوس كنت رايع قفلت..... كل أنفاس
أهديت لى هلالنا نصر معاهو ألف نحاس
وما همينا خفنا ....... وخفنا من وسواس
ونحنا فى الصدارة...... لبسنا ليها مقاس
ونحنا فى الصدارة .....لبسنا ليها مقاس
رأينا نحن أهل القبيله الزرقاء وقد جمعنا بين الكؤوس الدورى الممتاز وكأس السودان وقال المريخ عايز يعمل التوالى الخامس !!! تشموها قدحة لا ممتاز ولا سودان بس أنتو فى الوصافة ملوك لذلك تابعوا هذه القصيدة وفى جاه الملوك!!!!:
بعنوان ما بغلبو ومابغالبو هلالنا الحلو
ما بغلبو وما بغالبو هلالنا الحلو هلالنا الحلو
جمع الكؤوس مرتين وجمع الكؤوس نستاهلو
سادومبا يا رايع جميل يا اخى الحلو ما تكملو
أدى الوصافة معاك حبه أحسن بيحردوا يزعلو
ما بغلبو ومابغالبو هلالنا الحلو هلالنا الحلو
مهما صعب درب الدفاع لشباكو قادر يوصلو
أكرم الهادى السليم وين الرقيص من أولو؟؟؟؟؟؟؟
هدفين تمام هدفين تمام ولجن شباكك وبهدلو
ما بغلبو ومابغالبو هلالنا الحلو هلالنا الحلو
مبروك على كل الاهله شفنا الهلال فى منزلو
زى البدر ظاهر عديل والنجمة غابت وعزّلو
مساوى يا نجم النجوم باصك خطير ما تبدلو
بارى ديمبا صخرة دفاع خلى الهجوم يتسولو
هدف هديّة من الحكم ورأى الحكم حانقبلو
وما بغلبو مابغالبو هلالنا الحلو هلالنا الحلو
