منتدى أنا سوداني

كنت ابث الطمأنينة فى الجميع.......... وانا فى قمة الرعب....... تجربة جديدة.....
كدا نستريح يا جماعة والصباح رباح او زى مابنقول الصباح له عيون.......................
يتسأءل البعض لماذا يحصل المديرين على رواتب عالية جدا مع انهم ما بيشتغلوا مثل الآخرين.........
الاجابة بسيطة جدا......... فى تلك الليلة تعمقت اكثر فى الاجابة التى كنت اعرفها سابقا.............
الادارة مسئولية كبيرة ............... واصعب ما فيها كيف تقود مجموعة عمل لمهمة معينة او مشروع محدد
دون ان تفقد القدرة والسيطرة فى اى مرحلة من مراحل المشروع........بل مطلوب منك يا مدير ان تنجح ..

نام الجميع.........الا المدير يتقلب يمين ويسار فى السرير.............. قد يتصور البعض ان السبب هو القلق او التفكير فى بداية المشوار................. لا لم يكن كذلك
كنت افكر فى محاضرات الادارة العامة ....... وانا طالب........ بصراحة ما كنت بحب المادة على الاطلاق..........بل كنت اشعر انها مملة جدا.......... كلام كتير وكبير ما بيدخل الدماغ................
كانت بالنسبة لى مجرد مادة لا اكثر ........ لم استمتع يوما بها.............. ياريت كنت ركزت فى المحاضرات.... الادارة بدل ما انا لايص.............. بس استفدت برضو من محاضرات الادارة للونسة
مع البنات.................
سبب تانى لعدم النوم................. هو تسليم ابنتى بعد تلك الفترة الطويلة الى شخص اخر..........
شعور صعب ان تسلم قطعة منك الى الآخرين.........................
مشوار طويل منذ ليلة الولادة.............. الفرحة الكبيرة.........الروضة ......... المدرسة........البنت كبرت...............ارتباط الاب ببناته اكثر من ارتباطه بالاولاد..............
العريس ابن اللذينا يجى كدا يشيلها بكل سهولة ................. بعد تعبنا ده

احمد احمد الفجر اذن قوم يالله ياراجل.........................

ولنا عودة

الدكتورة
شكرا لمتابعتك المذكرات...................
يادوب حسع شعرت انو البنت ضيفة فى بيت ابوها...............................
شعور ممزوج بالفرحة والحزن ................. سنة الحياة
بحاول اكمل المذكرات ........ حسب وقتى وانشالله ما بطول عليكم كتير.............

مشرفنا صلاح
شرف كبير لى ان يكون اسلوبى قريب من اسلوب الاديب الكبير الطيب صالح.........
يمكن اولاد الشمالية اسلوبهم مشابه .......... او يمكن انا بقيت اديب وما عارف
شكرا لمرورك من هنا

دائما الصعوية تكمن فى نقطة البداية..........................
اذا كانت البداية صحيحة فسوف تضمن نجاح مشروعك بنسبة كبيرة.............
قد يتساءل البعض..............مشروع شنو يازول ... ما تخليها بالبركة وكل شىء بيمشى عادى ....... انت مكبر الموضوع مالك ...................
معليش يا اخونا................ تجربة جديدة................احساس غريب........مسئولية
كل ده بيحتاج اذا لتخطيط جيد...................وتنفيذ جيد...........فقررت
== تكوين فريق عمل
== تحديد تقريبى (موازنة) للمشروع .......( اتضح لى انها خطوة غير موفقة ...... فى ظل الاسعار
المجنونة فى السودان.................. وما تقولوا لى السودان بخيره
== تكوين قوة تدخل سريع تحسبا للطوارىء وادارة الازمات..

كنت اعلم جيدا ان العنصر الاساسى فى الموضوع هو العروس.........
اهم شىء معنويات العروس ......... اسألونى ليه............
بسبب بسيط لانها تعيش ايام صعبة ....... اكيد تفكيرها مشتت........اكيد زعلانة وفرحانة............ مقبلة على حياة جديدة مجهولة الملامح............. حتخلى بيتها وغرفتها وسريرها ودولاب ذكرياتها..
شعور بالانفصال عن البيت الكبير.............. طى عقود من حياتها بكل ما فيها من حلو ومر........ ابنتى انا شاعر بيكى تماما .................. انا كمان شاعرة بيك يا ابوى ........ نظرات بيناتنا ونحن نتقابل بالصدفة فى الصالة او على باب المنزل ......... صدقونى كنت اتحاشى النظر اليها............
هند........ بنود الميزانية مفتوحة لكى كما تشائين...............ليه يا ابوى كفاية اللى صرفتوا على طول حياتى ...... بعدين عريسى مشالله ما مخلينى محتاجة شىء......دفع حق الحنانة بالزيادة ومركز التجميل كمان بجلسات البشرة وخلافه.................. تسلم يا ابوى...........
خلاص كدا دورك انتهى يا زول بقى فى ناس تانية بتدفع لبناتك.............. الدنيا كدا

ما علينا
فريق العروس اللى كونته كان فريق صغير وبسيط ومكون بطريقة ذكيه ( العروس واختها الاصغر)
بينهم الفة ومحبة ............ فاهمين بعض تماما ........ يمكن الصغيرة تستفيد من التجربة ولمن ربنا يسهل ويجيها نصيبها ما راح نحتاج لفريق عمل سوف تكون هى الفريق بالكامل............

استوليت انا على السيارة............... ما بقدر على المواصلات.......... اها يابنات حا تسووا شنو فى التنقلات...............ما عارفين بس كلك نظر يا ابوى....... حاضر.....
اول اصطدام بالواقع............................... الحل تأجير سيارة........................
وين يا ابنى محلات تأجير السيارات......................والله يا ابوى الدنيا عيد ويمكن ما نلقى محلات ولو فى ما بتلقى سيارات ولو فى بتلقى الاسعار مولعة............. يا ولدى ما تسدها فى وشى ....... ارح نشوف

...... كلامك صح .........محل واحد اللى فاتح.................اتفضل يا استاذ........طلباتك........سيارة صغيرة.........كم يوم ....... اسبوع والله السيارات الصغيرة كلها متأجرة بنستلمها بعد العيد.......
عندكم شنو طيب ...........عندنا ساتيرو...............ودى شنو كمان سيارة كبيرة شوية .......قلتى لى ماركتها شنو..........ساتيرو يا عمنا نوع من الكيا......................اها
كم الايجار........150 الف فى اليوم.................ليه عندى نسبة من الارباح معاكم...........
يا عمنا الدنيا العيد والناس ما لقيين عربات............ ودى زاتها زول طالبها بس اتأخر............
وين صاحب المحل ....................فى المكتب جوه................
سلام عليكم..........................عليكم السلام................. صحيح السيارة الساتيرو دى ايجارها 150 الف
......... اى يا استاذ الدنيا عيد ......... طيب فى الايام العادية بكم..............والله ممكن تصل لى 100 الف فى اليوم........................
بصراحة يازول انا ماشاعر انو فى عيد فا ايدينى بالاسعار العادية..............هههههههههه
مالك ما معيد والا شنو.................. لا ابدا معيد بس ما شاعر بيهو................
اها اكتب العقد .................... الدفع مقدم ................. مائة كيلو يوميا وما زاد عن ذلك 500 جنية للكيلو
ما اظن بنكمل الميه ذاتها نحنا مشاورينا كلها جوه الخرطوم....................
كدا اكتب لى فى خدش فى الرفرف القدام اليمين................. خبطة فى باب العربية الخلفى.......
مالك يا ابوى كدا بتدقق على كل حاجة ................. بعدين بفهمك القصة.........
يا استاذ دايرين ضمان...................زى شنو
ممكن شيك او جواز سفرك........................... شيك
اتفضلى يا عروس دى وسيلة تنقلك انتى واختك................... ما كان فى لون احلى من كدا..........

ولنا عودة......................

عندما تبدأ الصرف فى السودان فتأكد انك لن تتوقف الا وانت على سلم الطائرة عائدا من حيث اتيت واكاد اكون جازما ان الصرف لن يتوقف الا على آخر درجة من درجات سلم الطائرة ........
اذا لابد ان تسجل مصروفاتك فى حساب الارباح والخسائر حتى لا تتعدى بنود الصرف على بنود الايرادات فيحصل عندك عجز فى الميزانية.................. وتخرج علينا فى برنامج تلفزيونى تتلعثم عند الرد على اجوبة السادة المشاهدين.................

انتظرت طويلا انا وام العيال............... ان يكون هناك اى لاعبين من الاسرة الكبيرة حتى نضمهم الى فريق العمل ..............ولكن اتضح ان هناك مصابين وهناك اخرين حاصلين على كارتين اصفر وبالتالى محرومين من اللعب فى المبارة حقتنا................وبعضهم اعتزل وبعضهم احترفوا خارجيا..........
فقررنا ان نلعب المبارة بفريق ثلاثى انا وهى وابنى ................

كنت قد وصلت بحمدالله الى السودان يوم الخميس ليلة الوقفة وطبعا البلد كلها اجازات وما شغال الا النوادى المقام عليها الاعراس والفنادق وبعض محلات الصرافة المتزاوية فى الاحياء او محلات الصرافة الجديدة فى مطار الخرطوم.....................

كانت نقطة البداية توفر السيولة حتى اتحرك...................... ذهبت الى مطار الخرطوم لاستلام حقائبى المتأخرة وبالفعل وصلت على الرحلة .......... فقررت ان اتمهل قليلا فى ادراج طيران الخليج فى قائمة الشركات التى اقاطعها................................
الغريب فى الامر اننى استلمت جميع حقائبى بدون وجود مندوب للخليجية وبدون ان يسألنى اى شخص فى مطار الخرطوم او يراجع التيكت الخاص بالحقائب والذى دائما يرفق مع تذكرة الاركاب ....... وما زلت احتفظ بمحضر الفقد مختوم وموقع من موظف الخليجية ويمكننى المطالبة بالتعويض ...... فوضى

قبل ما اخرج من المطار قمت بتحويل بعض القروش من الصرافة................. لزوم لعب دور الاب فى المنزل فقط..................... الصرف الثقيل تم تجهيز ما يقابله من البنك قبل اجازة العيد بواسطة ام العيال............. حساب مزدوج............... نصرف سويا ونودع سويا............ويتحرق دمنا سويا...
شريكة العمر.............

تم تعيين زوجتى العزيزة كسكرتير عام لفريق العمل المصغر .................. فأنا اخدت عهد على نفسى ان لا اتدخل ماديا مع اى من انسبائى .......... لا مجال للحديث المادى ............ اذا كنت تريد رجلا يحافظ على ابنتك ويحترمها ............... فالبداية ان تحترم نفسك كا اب.............. مهمتى فقط الاستقصاء عن المتقدم ......... اخلاقة ...........اسرته............اصله............. وقبل ذلك دينه.............. ثم يأتى السؤال عن وظيفته................. الخدمة الالزامية......ههههه

التقارير تقدم فى نهاية اليوم................... الخطوات التى تم تنسيقها مع فريق العريس .......الانجازات
......... جدول عمل اليوم التالى ................ حصر مصروفات اليوم............

كان التقرير الاول بعد استبعاد ابنى من المناقشة............. لمناقشة بنود سرية يجب ان لا يطلع عليها الا انا وزوجتى فقط................... اها اتفقتى على شنو................
طبعا ان بحاول ان اتحدث عن التفاصيل ...... عشان يستفيد اكبر عدد ممكن من اللذين يطلعون على هذه المذكرات سواء اباء او امهات او ابناء او بنات.................
فقد قال البعض ان عادات الزواج فى السودان قد تقلصت كثيرا واصبح هناك اختصارات شديدة فى الموضوع ................لا تصدقوا ذلك.............

كان الاتفاق على ان يوم الاربعاء خامس ايام العيد هو مخصص لعقد القران فى مسجد السنهورى بالمنشية وفى نفس الوقت فطور العريس
يوم الاحد الموافق 7 يناير هو يوم العرس.................. فى احدى النوادى بشارع المطار ........ ده بعد بحث وواساطات نسبة للحجوزات المسبقة للاعراس.......
تم الاتفاق على عمل الجرتك........ ( هو طقوس سودانية) لمن لا يعرف من الاعضاء يرتدى فيها العريس والعروس لبس خاص وطقوس خاصة........ وقد يسبقه رقيص العروس........

ممكن فنجان قهوة عشان استوعب الموضوع................. حاضر يا ابو العروس.........

ولنا عودة

بالهنا..................... اخر شفطة مع اخر نفس دخان ......... الراس اتعدل
اها .....قلت شنو..............
قلت لا اله الا الله...............................
كدا انا متعود من ايام الدراسة انى ما الخبط راسى كتير فى كلام الكتب الكتير......................
حضور محاضرات وتلخيص كتب ..................... يعنى بهتم بالخلاصةاو الزبدة على حسب كلام السعوديين.........................
كدا نلخص الموضوع فى نقاط
** فطور العريس
** العقد
** حفلة العرس ( العشاء)
** الجرتك
صح الكلام يا ام العروس ......................... صح
بس كمان نسيت اكلمك........................ اها فى شنو تانى
اتصلت ام العريس وقالت انهم دايرين يجيبوا شيلة الدكان ( الماعارف برضوا شيلة الدكان عصاير ومشروبات ودقيق وفحم وخروف ولخبطة كتيرة)

طيب يا ام العروس ....... نحنا لينا كم سنة فى الغربة ............... يعنى قول مشالله اكثر من 20 سنه
طيب كان كدا خلينا نفكر تفكير حناكيش.................. يعنى شنو
يعنى خلينا نكون عمليين شوية..............................

انتى الجرتك ناوية تسويهو وين............................ فى الدور التانى عندنا فوق............
عندك حق انا مصمم الدور التانى بطريقة الحناكيش...........مساحات مفتوحة بارشات وغرف قليلة......
طيب ...... انتى محتاجة لشيلة الدكان................لا انا ما دايرة اى مواد تموينية والا خروف والا كلام من ده................ اوكى
اتصلى بام العريس تغير شيلة الدكان الى شيلة جرتك.................. مجرد تغيير فى المسميات........
تجيب فاكهة كاملة ....................... وعصاير بس

عندك يوم صعب ومزدوج................فطور العريس والعقد

بت ابوظبى
شكرا للمرور من هنا ...............
الحقيقة انا قررت ان انشر تلك المذكرات هنا..............ليس من باب القصة او الرواية.........
ولكن لانى وجدت ان معظم الاعضائ هنا من الشباب بنات واولاد..........ومقبلين على الزواج.......
وعندهم بالتأكيد اسئلة كثيرة جدا فى هذا المجال........................
خدى راحتك واقرائيها متى تشائين....................... وسوف تعيدين قرائتها اكثر من مرة..............
لانها من الواقع...............بها من المعلومات عن طقوس الزواج فى السودان............عادات ناس السودان
ما يميز تلك المذكرات انها من واقع الاسرة السودانية دون رتوش خارجية

ومنتظر رأيك ورأى الاعضاء ومداخلاتهم

بهدوء انسحبت من الجلسة لافكر فى يوم الغد...........................
احب دائما ان اختلى بنفسى اذا كانت هناك امور تستدعى التفكير العميق................
رجعت بذاكرتى للشهور الثلاث الماضية من شهر رمضان عندما حضرت عروستنا الى الدمام لتحضير الشيلة.......تذكرت المعناة والتعب من جميع الاطراف وخاصة ام العروس .........
كانت عملية مسح شاملة لاسواق الدمام والموولات ومحلات العطور السودانية فى حملة استكشافية عن الاصناف والاسعار..........................
مطاردة المحلات الشهيرة فى تنزيلاتهم السنوية..............
طيب................... كفاية معناة...................
قررت ان اتخذ قرارات ديكتاتورية............ من اجل راحة زوجتى.............
بينى وبينكم كنت ادخل فى تفاصيل المواضيع والقرارات جاهزة فى راسى................
يعنى ببساطة مبدأ الشورى الخادع............. مثل ما يحدث فى البلدان العربية..................
ولكن كان هدفى اراحة الناس ............. بعد التعب.......
القصد سوف اوضحه من خلال المذكرات...........................

طيب فطور العريس مفروض يتكون من شنو...............................
طبعا ناس السودان.............. متبرعين بالادلاء باراءهم دون طلب ذلك.................
رنين التليفون لا ينقطع ................ سواء الثابت او الجوال ................
الخالات والعمة والحبوبة................... اها حتسواا شنوا فى فطور العريس............
نحنا عندنا طباخ ممتاز.............. عمل فطور لعادل ولدى كان ممتاز.................
لا يا بت طباخ شنو ونحنا قاعدين نسوى شنو فى البلد دى................
بس انتى جهزى عدة الفطور........................ زى شنو يعنى................
جيزان كبيرة ( حلل طبخ )......................وكمان متوسطة.................
صحون كميات وصوانى عشان الخبيز..................وما تنسوا ورق التغليف.................

اها يوم الثلاثاء من النجمة انا عندك انا وامال .................. بس خلى احمد يكون مجهز الطلبات
طلبات شنو يابت .......................... انتى بتستهبلى والا شنو..........اولا يكون الخروف متقطع وجاهز
السمك يكون متنظف على القلى..................الدجاج متبهر .................الدقيق البر عشان اللقمة.......
ماتنسى اسطوانة غاز اضاقية................. انشالله الفرن عندك شغال عشان الفطاير والخبيز.......
بس الرجال يجهزوا الحاجات دى ويورونا عرض اكتافهم ......... نحن دايرين نقعد براحتنا........
بس يكونوا قريبين فى الحلة عشان لو احتاجنا اى شىء.....................
اشترى ليكى حلل كبيرة (جيزان).................... بدل البهدلة مع الجيران ولائمتهم................
اسمعى.................. لو ممكن احمد يمشى يبيت عند اخته فى الطائف عشان دايرين نفرح احنا كمان ونهيص ونرقص.................. والله منتظرين بس نفك عن نفسنا......... رأيك شنو..........

اها يا احمد ........... اظن مفيش احسن من كدا.....................ام العيال
احسن من شنو..........................
انت بس جهز الطلبات وانا واخواتى بنقوم بكل حاجة.................
تفتكرى نعمل العشاء حق حفلة العرس وين.......................... انت دايما كدا انا فى وادى وانت فى وادى
انت يا راجل ما قاعد عملى مجلس ادارة وتخطيط وتنظيم وجدول اعمال وخطوة خطوة ...........
نحن حسع فى فطور العريس ....... احنا وين والحفلة وين......................

احنا اجازتنا كم يوم.................................. يا راجل انت حا تجننى............. اسبوعين ....راح منها يومين................... بتسأل لشنو..................

عشان داير احسب الساعات اللى حا نضيعها فى الكلام الفارغ ده ........ هل بتساوى دقيقة واحدة نقعد نتونس فيها مع اولادنا وبناتنا اللى حا نسافر وما حا نشوفهم الا فى اجازة الجامعات.........

والله انا ما عارفة اعمل شنو...............دايرة ادبر لهم حالهم واملاء ليهم الثلاجة والديب فريزر حاجات تكفيهم شهر ........ مساكين بيرجعوا من الجامعة بعد العصر هلاكنين ياداب ياكلوا اندومى ويناموا عشان يصحوا يقروا ليهم كم درس ...................

يبقى اتفقنا............................... على شنو ياراجل
المبدأ اللى بيقول هين قرشك والا تهين نفسك............................ بتقصد شنو
ما معقول ما فهمتى.................... انتى دايما بتفهميها وهى طايرة...................
من الآخر كدا .......... نفس المتعهد اللى بيعمل لينا العشاء حق الحفلة نتعاقد معاهو على فطور العريس
............ بس ديل اسعارهم مولعة................ عارف .............. بس انا بالسعر ده بشترى لحظات حلوة اقعد اتونس فيها مع الاولاد................. بشترى بيها هدوء البيت ....... بشترى بيها راحتك وراحتى

وطبعا المبلغ اللى دفعته سجلته فى القوائم الماليه فى الجانب المدين مصروفات مقابل فطور العريس وفى الجانب الدائن سجلت ضعقف المبلغ ايرادات ونسة وشبع من اولادى
ولنا عودة

اللى عنده قرش محيره........... يجيب حمام ويطيره............... ده كلام حماتى
والله انتو مخرمجين خرمجة ولحمكم بقى سمح شديد....................برضو كلامها
يعنى القروش العملين تبعزجوها شمال ويمين ....... ما اخير تدفعوا جزء من مصاريف الجامعات ( القبول الخاص) اللى بيقولوا عليه ده..................

والله اختى دى راجلها لحس عقلها................شنو التقاليع الفارغة دى................. اختها
والله عين العقل يا احمد..................بلا زروطة ولمة نسوان وقرف ..................اختى

يحيروك ناس الخرطوم ..................... ما ممكن يرضوا عنك مهما عملت فالنقد جاهز ........
شعرت عيونهم بتقولى يا حنكوش...................... عشان ايكادوللى ما تزعل.................
بالله عليكم ............... حساباتى صح والا غلط.....................

كدا اتعاقد مع الهليتون عشان طلبات العقد ................... واحدة بتتريق....................

رضا الناس .......... غاية لن تدركها ابدا..............................
انا مؤمن بالكلام ده...................... عشان كدا بريح الناس وبريح رقبتى ...... اسمع الاقتراحات والتوصيات من اى اذن سواء اليمين او الشمال بس على شرط........... مرور الكلام سريع بين الاذنين
والخروج بسلام وهدوء الى الهواء الطلق من الجهة الاخرى................ وما اراه صح اسويه.......

موضوع فطور العريس اخد حقه من الشمارات اكتر من العرس ذاتو................. الناس هنا وقت فراغ بالكميات................. بس اديهم طرف الخيط...................

فى تلك الليلة بعد ما اتعاقدت مع متعهد حفلات على الفطور ووجبة عشاء العرس ودفعت ما دفعت نمت فى هدوء وسكينة ما عارف يمكن كنت شايل هم والا يمكن دايخ من كتر القروش اللى اندفعت.............

الفجر اذن .......................... يا فتاح ياعليم يارزاق ياكريم................. اصطبحنا واصطبح الملك لله
طابور الصباح انهاردة غير مزدحم الامام ووراه زوجة الامام والعروسة................
مصحيك شنو بدرى يا عروس ....................هو انا نمت ي ابوى.............ليه........ بس كدا
دايرة اتونس معاكم ............... الونسة دى بلقاها وين تانى.......................
الشاى جاهز.................حالا يا ابوى........................
اها رأيك شنو يا ام العيال ........................ والله انت رحمتنى من الدوشة والزيطة والزمبليطة ( الزمبليطة دى مقتبسة من فيلم عربى )................ تانى ما عندنا شىء الا العقد والجرتك........

واحد من فريق الازمات صحى من النوم ................. يابوى انت وزعت الكروت الخاصة بالعرس على ناسك...................... هى وين الكروت ذاتها..................... انت ما شفتها والله دى مصخرة ...... ابو العروس بجلالة قدره ما شاف الكروت............... صحيح مصخرة

اها ورونا الكرت مكتوب كيف.......................
الديباجة المتعارف عليها.............تصميم جميل..........غلاف ولا اروع..............
فى نهاية الكارت..................دعوة للعقد ....... ونفس الدعوة لحفلة العرس................
الكلام دا معناتوا.....................مزيد من الجهد................... اسألونى ليه.........
العقد يوم 3/1.......................... الحفلة يوم .................7/1
كنت مهيأ نفسى لزيارات محددة ومعدة مسبقا لتقديم الدعوة .......... وقائمة اخرى للدعوة هاتفيا..........
حسع اتغير الوضع................. لان الدعوات الهاتفية سوف يظن متلقيها اننى لم اقدم الكرت لحصر دعوتهم فقط للعقد................
اذا الله يعين انى امر على جميع ناس العاصمة بمدنها الثلاث..................... الكيلو الزيادة بى 500 جنيه
هههههههههه ..... لا وانا بكل ثقة بقول لسيد معرض السيارات ال 100 زاتو ما بنكملها.........
داير كم كارت يا ابوى......................... خت الكرتونة فى العربية........ ما عارف كم
يومين من الشغل اللذيذ.....................كل متعتى فى زيارتى للخرطوم......كانت خلال توزيعى لكروت الدعوة.................. قابلت كل من اريد ان اقابل............. اتونست مع الجميع عن ذكريات انشرح لها قلبى..............زرت اماكن وبيوت لم ازرها منذ عقود............... قعدت فى الراكوبة.......شربت شاى على الحطب..............احضان الحبوبات كنت مشتاق ليها كتير...........انتظرت فى غرف السكرتارية
لاصدقاء كنت العب معهم الدافورى فى الحلة وحسع من الصعب مقابلتهم...............
حصلت على كمية من الاخبار عن الاصدقاء لم اكن احلم ان احصل عليها.................
نسيت الغربة وشئون المغتربين والضرائب ........... وقربت انسى العرس ذاتو...................
امتع شىء ان تقدم الدعوة لحضور عقد قران ابنتك.................. والتعليقات الذ ما فيها............
كل هذا الشريط مر على وان اسلم التسليمة الاخيرة فى مسجد السنهورى بالمنشية...............
وين ابو العروس ....................... وين ابو العريس ................. موجودين.............
وكيل العروس وينو.......................... انت وكيل العريس .............. كل الكلام ده معلن رسميا بميكرفون المسجد...................ده الاشهار.............................
ناس كتيرة بتهنى ..................... بالاحضان........................ناس بعرفهم وناس اول مره اشوفهم
اتفضل يا ابو العروس نسختك من العقد.......................والله شىء جميل..........انك تحصل على نسخة من العقد فورا ...................... حلم ........ والراس دايشة..............
خلاص كدا سلمت الامانة بورقة وشهود................. يعنى نحنا نربى ونعلم ونكبر وغيرنا يجى يشيل على الجاهز............................... الجاهز دى اخر مكالمة من متعهد الحفلة ......... يا استاذ احمد انشالله يوم الاحد انا وفريق العمل بنكون جاهزين.................. فى النادى 800 وجبة و 100 مجانية
.... العدد اللى شفته بالمسجد................ واللى قدمت له كروت الدعوة ما ممكن يكون كدا بس ........
الو ...... الو ........ كمال ...... بالله زيد عدد الوجبات 200 وبكره الصباح بمر ادفع ليك الفرق .......

ولنا عودة ...........

وليد بابكر

شكرا لمرورك من هنا.......................وعقبالك وعقبال كل العزابة
وياسيدى ملحوقة بعزمكم فى عرسى انا.................
امشى الراكوبة بتلقى ليك عروس ..........عندك كل الاصناف ..فيهم الرضيانة واللى ما راضيانة واسأل ود القبائل.......وفيه اللى بتقولك ثانكس ...............وكان انت ولد استايل امشى على ناس الموضة......
وكان داير........تعرس حقيقى ....يا خوى اعلنها صراحة .......... انا شايف الشباب خجلانين يقولوها
مع انى شايف مبادرات نسائية تنضوى تحت ....... خفة الدم ...... والتأنق والاجابات الدبلوماسية وخلف البودرة والميك اب................
انا بطالب مشرفنا بفتح باب طلبات الزواج............... ونقفل المنتدى ونفتحها مزوجة.....

بس انا داير اعرف بت ابوظبى عدلت شنو فى البوست حقك ................. انا بشك فى العبارة الاخيرة دى ..... هممممممممممممممم ........ اصلها الليلة اووف من الشغل وفاضية للمناكفات