منتدى أنا سوداني

مرسل: **الأربعاء 2010.2.17 5:43 pm**

[ الهلال الرايع يحرز كأس بنى ياس align=center][color=0000FF

]أحرز لكأسو.... وعرض جميل
بجدارة فى الزمن....... البديل
ياهو الهلال الهلال ياهو الاصيل
ما بعرف اليأس ........ ياحليل
خليفة خليفة كان بالجد.... مثيل
جاب الهدف الهدف رغم العويل
ركلات مع الحارس ...... يميل
وكان الهدف الهدف أحسن دليل
تحكيم هو ظالم ظالم....زيو ليل
ناقص عدد عدد لكن .....أصيل
مبروك عليك عليك كأسك جميل
مبروك عليك عليك كأسك جميل[/align][/color]

مرسل: **الاثنين 2010.4.12 11:07 am**

كنت صراحة ومازلت وسوف إظل إن شاء الله من المعجبين بأداء فتية وشباب الامل عطبرة الذين قدموا العروض الرايعة وقد كتبت هذه القصيدة يوم الاحد 4 أبريل 2010م بعد الانتصارات الهلالية والمريخية والتأهل للامل بعد الهزيمة بشرف 3.2 وصراحة بدأت القصيدة بفريق الامل لانه كان الفريق الذى أحرز أكثر الاهداف حتى تأهل والان الى القصيدة :

فعلاً أمل......... أمل وبدر إكتمل ما أروعه
مريخنا حقق إنتصار.... باصات جميلة موزعه
هلالنا كان بدر التمام ..وصل الشباك بالاربعه
وابحرنا فى دنيا الكفر.... ورفعنا كل الاشرعه
الكل يشجع مافى لون اللون.... فنوننا الممتعه
من عطبرة كان الامل...... وأملنا نارو مولعه
مريخنا بالنفطى الخطير باصاتو كيف ما أسرعه
ومساوى بالرأس كم هدف وأهدافو دايماً مقنعه
أمبيلى خلخل للدفاع ....وأهدافو زاده ووسعه
نتخطى نتحدى الفرق هدفنا هدفنا أدوار أربعه
مريخنا ناوى على الترجى نقوله والكل يسمعه
مريخنا يا مريخنا صاح وكلتشى جاهز يصنعه
أهدافنا للخصم فى الشباك ما اظن دفاعو بيمنعه
وهلالنا جاهز لى مصر ثلاثة فى البنك أودعه
إسماعيلى كان أو أهلى عارفنا كيف حانصرعه
ومرمانا قدامو الدفاع لى كل شاردة حايدفعه
وماظنّو جايب لى هدف ..الخصم مهما طوّعه
وهجومنا كاسح .. وفى أرض خصومنا نولعه
والوالى والارباب جوارو كل الوصافة نودعه
الكأس منانا عند هلال أو عند مريخ ما نمضّعه
ويبقى الامل كأس الكؤوس.. الكؤوس حايرفعه
وإن شاء منصورين دوام وافراحنا ديمه نوزعه
نهديها للفايز رئيسنا ...ورئيسنا والفايزين معه
حدق العيون ليك يا وطن ولى وطنا نبكى الادمعه
حدق العيون ليك يا وطن ولى وطنا نبكى الادمعه

مرسل: **الأحد 2010.4.18 6:43 pm**

أتألق ولدنا القالو إسمو التاج
وبشّة كمان معاهو وكان عدييل أبعاج
دراجيين محن وركابين هجن والله ما بحتاج
إسماعيلى أركز أركز للضرب تلقى الهلال هجاج
وما ظن نرضى بتلاته واصلين ليها خمسة وننفض شباك وعجاج

مرسل: **الأحد 2010.5.16 6:05 pm**

قصائد رائعه

مشكوووووووورين شباب

مرسل: **الأحد 2010.8.29 3:25 am**

جاء فى الاخبار اليوم أن الامل العطبراوى العنيد لقن المريخ الدرس المفيد وهزمة بهدفين زى السم والله عجبنا وسر بالنا نامن كتبنا المسدار الاول وأكيد ضربة البداية حاتكون مسدارين بعدد الاهداف
والان إليكم المسدار الاول :

عاجبنى الامل زاد الهدف هدفين
ويينك ياالمريخ الليلة وينك وين؟؟؟
فارقت الصدارة بكوك بدمع العين
والله الهلال أصبح بطل بطل دارين
وحايكون البطل فى الحول .. كمان حولين

والان الى المسدار التانى مع الهدف التانى

المسدار ماكفاية عايزين كمان أتنين
وليك إنت الامل .. يا قمر دوريين
ما قال فى الصدارة .. وينه يا حلويين
وما ظن تانى ترجع ده هلالنا ما بدرين
ويارب بكرة فايز وتفرح أم نفلين

مرسل: **الأحد 2010.8.29 4:57 am**

--------------------------------------------------------------------------------

يلتقى اليوم الهلال السودانى مع الجيش النيجرى وهو الفريق الذى أقصى المريخ بالتعادل معه فى أمدرمان 2 .2 والفوز فى النيجر بهدفين مقابل هدف !! الهلال أمامه مجموعة تحديات الفوز لكى تصدر المجموعة والفوز بأكثر من هدف لكى يكرر إنتصارة على كابس يوناتد العريض ذهاباً وأياباً وكذلك فوزة الغالى على الاتحاد الليبى ولكى يثبت للمريخ أن فريق الجيش النيجرى لاجيش ولا سلاح بل (فشنك وأكبر فشنك ) وفى ظل تداعيات هزيمة المريخ من الامل عطبرة وفقدانه الصدارة تكون المباراة ذات طابع خاص !! أذكر أننى قلت لأحد المريخاب وأعتقد التاج الشايقى أن تأهلنا العريض للكنفدرالية لو مرقنا بدون كأس حانفوز بالدورى!!!!!! لاننا سوف نرهبكم بالانتصارات وقد كان فالمريخ الان فارق الصدارة بنقطين وأصبح الوصيف وهذا هو مكانة الطبيعى وزمان قاعد بالغلط ساكت إلا بس صبرنا عليهو !!! كنت قد كتبت قصيدة للهلال وأنا بالسودان ولم أجد الوقت لكى أنزلها فى المنتديات بعد فوزة على كابس يونايتد العريض 5 . صفر والان أعود لكى أقّدم لكم القصيدة وكلى تفاؤل بفوز عريض على الجيش النيجرى فإلى القصيدة والتى تقول :

ما بغلبو وما بغالبو هلالنا الحلو هلالنا الحلو
أهدافو خمسة بالكمال ولسع الحلو حانكملو
سادومبا هاتريك يا جميل بالله شوفو أتأملو
وخليفة بكّر بالهدف وبالسرعة قال حا يوصلو
كاريكا هدّف فى الشباك وصّل هلالو لمنزلو
وهلالنا كان بدر التمام بالله أفرحو هلاللو
الكأس هدفنا بكل صدق وكل النجوم يستاهلو
جمهور وفى حاضر كمان تابع هلالو من أولو
ولسع فى أول كلام والجاى أحلى من الحلو
وصلاح يا أرباب سلام دايماً حضورك سطرو
سطرت إسمك فى القلوب واسمك صلاح كيف نجهلو
سطرت إسمك فى القلوب واسمك صلاح كيف نجهلو

مرسل: **السبت 2010.9.25 8:06 am**

تتابعون المستوى الذى ظهر به أخيراً إستيفن وارغوو اللاعب النيجيرى المحترف فى نادى المريخ منذ 5 سنوات (لم يحرز فيها أى هدف فى الهلال وهو لاعب للمريخ وهذا هو سر غنا إعارته للاهلى أو بيعة للاهلى المصرى !!!!) وارغو فى أخر مبارة أمام حى العرب بالامس فى بورسودان قال لى إدارة المريخ (شغلكم شغل عرب !!!!) وأحرز هاتريك فى المباراة وأحرز نجوميتها وأهداها لجماهير المريخ فى بورسودان !!!!!وقال ليهم ربما شوفتونى السنه الجاية بلون زى لون فريق حى العرب !!! الظروف ما معروفة وأسألو صاحبى كلتشسى !! أنا زول فكه وما بعرف الجكة !!زول جرى ساكت وبعرف أرقص الحارس وخريج مدارس (فى نيجيريا ). كتبت هذا المسدار وأهدية الى الجهاز الفنى وإدارة المريخ حتى يبقى لهم (سلوى ) الى حين عودة وارغوو .
بعد ما لبّنت لبّنت مريخنا أدى الطيييير
وكيف وارغوو الحريف للاهلى ليهو يعيير
صبرتو على سنيين سنيين آيه الصبر حايضيير
لو واصل فى فنو فى لعبو والله والله لسه لسه صغير
ودعكم ودعكم بهاتريك وكان نجم المباراه وقرّب يقول يا مجير

مرسل: **السبت 2010.9.25 8:37 am**

seeeeeeeeeeeeeeeeeeeeeeeeeeeeeeeeda

مرسل: **السبت 2010.10.2 1:16 am**

بعد الانتصار الباهر الذى حققة الهلال على الموردة بالامس 30 سبتمبر 2010م بحصيلة بلغت 6 أهداف جعلت الهلال يقف على الصدارة وبجدارة كتبت هذه الابيات وهى سوف تكون بإذن الله إمتداد للافراح ما بعد الاحد أمام الاتحاد الليبى والآن الى القصيدة والتى تقول :

الهلال زى ده أصلو أصلو ما ما معقول
يلا قوم يا وصيف يلا جيب جيب بندول
هدفو كيف مضمون بالله شوف يا زوول
فى لمحه هزّ شباك هدافو خاتى القول
أمتعنا بى فنونو الرايعة طول طول الحول
ما فيهو أصلو كلام ذكرنا ذكرنا ود منزول
دايماً سريع الحل يعرف يجييب لى حلول
خلى الفرح أفراح عند الهلال مامول
وغنى لى فرفور يا قائد قائد الاسطول
يا سيدا يا رايع كيف إنت كيف مسؤول
جيب الفرح عود بي خلى الفرح مشتول
في كل ديار عاشق فيهو الهلال مكتول
وأشفى كل سقيم كل عليل حتى لو منزول
قرّب سفرنا الطال خلى الشباك مبهول
الدورى هدافو كاريكا كاريكا أروع موول
وسادومبا ماشى ورا لى كل دفاع حايصول
زرع الفرح أطنان أداهو لى كل زووووول
زرع الفرح أطنان أداهو لى كل زووووول

مرسل: **السبت 2010.10.2 1:59 am**

فوق فوق هلالنا فوق

مرسل: **الأحد 2010.10.3 9:09 pm**

هاكم خلال دقيقة بعد إنتهاء اللقاء النارى مع الاتحاد الليبى هاكم هذا المسدار:
شوف الهلال كيف بى إنتصار
ماشى وتعال والتيحا أصبح فى بوار
ولّع هجومو من البداية أهدافو أهدافو نار
تصدر المجموعة بى عرض جميل وبى إقتدار
سادومبا كان نجم اللقاء وبشة كان صاحب صاحب قرار

مرسل: **الاثنين 2010.10.4 10:28 pm**

فى المقبرة التيحا تاه .... !!والله سمحه المقدره

--------------------------------------------------------------------------------

بعد أن قدّم الهلال بالامس ملحمة كروية رائعة أمام الاتحاد الليبى رأيت أن أوثق هذا الحدث بقصيدة ولكن قبل القصيدة دعونا نتحدث عن أجواء ما قبل المباراة .
كان على أن أفتح مقر الجمعية مبكراً فحضرت التاسعة صباحاً وكنت قبل الوقت المضروب بنصف ساعة رتبت مايمكن ترتيبة والساعة التاسعة والنصف بدأ أولياء الامور فى إحضار الابناء والعاشرة بدأت الفصول والمعلمين فى الدروس وكنت أتابع أعمالى الادارية من تسجيل إحتياطى وغيره . كان من المقرر أن تكون هناك ختمة على روح والد زوجة الاخ الدكتور طارق طه محمد وأقترحنا وحتى نتمكن من متابعة المباراة أن تكون الختمة بعد صلاة الظهر خاصه أن هناك فصل واحد فقط مشغول فى الحصه المسائية للكبار من سن 10 فما فوق وبالفعل وافق الجميع بما فيهم الدكتور صاحب الامر وأتفقت مع الاخوان الذين يرغبون فى حضورها الذهاب معى للمنزل لانى عندى الجزيرة الرياضية .
سارت كل الامور على مايرام وكانت الختمة رائعة وكذلك الحضور والذى وصل 20 شخص تقريباً وبعد الختمة والصلاة والدعاء والغداء أنتهت الحصة المسائية قبل ربع ساعة من بداية المباراة وسريع على منزلى وللاسف وصلنا ووجدنا الهدف الاول ففرحنا وكان حضورنا فى الدقيقة 6 بعد دقيقة من الهدف الذى أحرزه سادومبا.
حضر مع خالد على بسيارتة الفولفو الزرقاء شعار الهلال وبكرى (وكنا نقول له بكرى المدينه ) وعبدالسلام والذى رغم لونه الاحمر شجعنا بصدق ، إضافة الى إبنى أحمد
تابعنا مبارة قمة فى الروعة وللامانة من الفرييقين لم يكن الاتحاد صيداً سهلاً ولكن فى كل مره دفاع الهلال يقول له مهلاً مهلاً والهجوم يردد أهلاً أهلاً وسهلاً يا شباك ويا مراوغة ويا كونر خطر وفاول أخطر وكروت صفراء وكاريكا يعزف المزيكا وكا كا كا كاريكا وسا سا سا دومبا وما ما ما بكرى المدينه وصراحة دى مش الموج الازرق والله ده أظنو (الجن الازرق عديييييل !!) مبروووووك للهلال ولا نرضى غير الانتصار على الجيش الذى أصبح (فشنك يحمل فى جعبته (الموز أبونقطة !!) والآن الى القصيدة وعنوانها :

فى المقبرة .... !! والله سمحه المقدره

فى المقبره والتيحا تاه ...!!! والله سمحه المقدره
دفاعنا واعى .....وباصاتنا زى المسطره
وهجومنا كاسح كاسح وكاريكا أخر فرفره
جمهورنا حائز للكؤوس أعلامو رايع منظره
مجلسنا كلو إنسجام يعرف عبور القنطره
جمهور وفى من كل فج نمولى ونيالا وأتبره
وكسلا وبرام وملكال وريرة والحركة ليهو مُيسَره
كابتنا سيدا دوام حضور باصاتو مين البقدره
كاريكا راوغ بى مزاج باصاتو ساهله مقشره
وبِشَه كان فى أحلى لون أهداف جميله مُحضَره
أفرحنا جد بدر الهلال هدية للنور عنقره
فى القمة نحنا مكانا فوق وعريسنا راسو مضرضره
كان الهلال بالجد رهيب كان الهلال هو المفخره
وضع إسمو فى أعلى المكان من غير نشوف الخرخره
تدريبنا ميشو فيهو واعى لمساتو ظاهره مؤثره
طارقنا يا بدر التمام ملك الدفاع ومحاوره
أهديك سلام من كل موج أهديك تحيه مُحضَره
وطبيبنا دايماً كان حضور والله سمحه المقدره
ورئيسنا نهديك إنتصار والكل دعاهو دعاهو المغفره
ورئيسنا نهديك إنتصار والكل دعاهو دعاهو المغفره

مرسل: **الثلاثاء 2010.10.12 2:50 pm**

كابتن الهلال والمنتخب القومى هيثم مصطفى ذهب منذ أسبوعيين الى الاردن لتلقية العلاج أثر إصابة فى كتفة والحمد لله عاد بالامس بعد أن أجريت له عمليه ناجحة والان فى منزله فى الصبابى ببحرى وسوف يخضعة الطيب الخاص بنادى الهلال الى فترة علاج وتمارين تدريجية الى أن يعود للملاعب بعد أسبوعين على الاقل عاجل الشفاء يا كابتن&&& كتبتب له هذه القصيدة على لحن كفارة ليك يازول والمرض ما بكتولو زول كفارة ليك يا زوول . وتقول :

كفارة ليك يازوول كفارة ليك يا زول
ياسيدا كنت فى الساحة كنت مسؤول
كفارة ليك يازول كفارة ليك يازووول
يارب تشفى ويزول ومانسمع بيك منزول
كفارة ليك يازووول كفارة ليك يا زووول
ندعو ليك ودعانا مامول تزور قبر الرسول
كفارة ليك يا زووول كفارة ليك يا زووووول
فى كريم الخصال إنت إنت مجبول
كفارة ليك يازول كفارة ليك يازول
العافية تزورك تدور ودقت ليك الطبول
كفارة ليك يازوول كفارة ليك يا زووول
لى هلالك عائد قائد حامى وتصول
كفارة ليك يازول كفارة ليك يازول
برنس سيدا الملك سمح الاسماء ليك نقول
كفارة ليك يا زووول كفارة ليك يا زووول
أرجع بالعافية زور وغنن ليك ناس بتول
كفارة ليك يا زووول كفارة ليك يا زوول
والمرض ما بكتولو زووول كفارة ليك يا زول

مرسل: **السبت 2010.10.16 11:30 pm**

شكرا للمبدعين على هذه المسكولات من الشعر المعطره

مرسل: **الأحد 2010.11.14 11:54 pm**

والله كنا نمنى النفس وعايزين نقول :

صفقنا الصفاقصى والدور لى وصيفنا
وبحرنا المحمّر وطامح .. صيف خريفنا
يا سيدا الموزّع وحارسما الامين وشوف شبالو سيفنا
وهجومنا الديمة كاسح كاسح وسطنا عمر عمر بخيتنا
دفاعنا الصخرة جاهز وزّع للوسط
وحرّك لى هجومو وحالاً إنبسط
قلب هوبه الغزال كالسوط المحط
والحاسد لى حالنا شبعان فى السخط

هلالنا الموجو كاسح حايحقق بطوله
وبى إذن الكريم نرفع ليهو كأس وليهو يمين نطوله
إبداع فى الاداء وأهداف أهداف عرض وطوله
وأفراح للجميع الجميع عمّت ناس بلوله
وأفراح للجميع الجميع عمّت كل سهوله
كل سودانى يفخر لو وطنى وأصيل
والكأس كأس سودانا والبيهو الدليل
نفديهو بروحنا وبرضو نقول نقول قليل
ونسعد كل ساكن لو أكل أكل البليل
هلالنا هلال فرح أسعد كل سودانى
ووزعنا الامانى ومعاها كتير تهانى
لى أولاد هلالنا الزادو التفانى
وليهم ألف مطرب قدّم من أغانى
وليهم ألف مطرب قدّم من أغانى

مرسل: **الثلاثاء 2010.11.16 6:57 pm**

العيد هناك أحضرو والعيد مبارك عليكم وقصيدة صباح العيد من بشرى مبارك

--------------------------------------------------------------------------------

كالعادة إستيقظ قبل صلاة الفجر بأكثر من ساعة أقرأ فيها ماتيسر من الذكر الحكيم وبما أن صلاة الفجر متأخرة جداً فى برمنجهام وهى الساعة السابعة صباحاً العاشرة بتوقيت السودان رأيت أن أصبّح على كل المسلمين فى العالم الاسلامى وعلى أهلنا بالسودان وعلى الاهله على وجه الخصوص بهذه القصيدة وقد خصصت بدايتها لجماهير هلال الملايين والموج الازرق حتى ينسوا معركة الصفاقصى ويستمتعوا بعيدهم ويتفرقوا لوصيفا وبرضو نقول لكل الوصيفات عيدكم مبارك ونحنا وإنتو حالة واحدة عندما نلعب بإسم السودان أما بعد ذلك فكل أزرق مع فريقو وكل أحمر مع وصيفو !!! والقصيدة تقول :

سلام العيد مبارك ....... عليكم لكل أهلّه
سلام يغشى الجميع وينزل يمر يمر بالحلّه
أنسوهو الصفاقصى .... الحنفيّة إنتو الملّه
ما قصّر هلالنا وما نرضى فيهو فيهو الذلّه
إلا الحظ معاند غلب الكتير الكتير والقِلّه
*********************
أبارك العيد وأسلّم .. أسلّم على أمى ثم الوالد
ومن بعدو الجميع ... وما أخلى إلاّ إلاّ وأقالد
أمكلتوم وأمنه منيرة راضية وكمان ناس خالد
وامر على كل كبارنا ....وحتى الترضّع وآلِد
وأذكر ليها خيرنا خيرنا.... ومجداً قديماً تالد
*********************
العيد ليهو طمعاً .. فى الغربة ما زى عيدكم
وكيف نفرح وننبسط ...وما شفنا فيهو جديدكم
صلاة العيد جموع .. فى الصيف سمح تريدكم
الله أكبر الله أكبر الله أكبر لاإله إلا الله والله أكبر الله أكبر ولله الحمد أغلى رصيدكم
ونحنا من البرد نكتّر فى اللبس ونتمنى دافى عصيدكم
**********************
وأنا فى العيد وأكتب ودمعى دمعى نازل سيل
وفارقنى الغميد.. فى نهارى نهارى أو فى ليل
لو بمرادى أسع أسع ألبس ألبس.. وأشد الحيل
وأحضر العيد معاكم .... ونلعب ولو لى شليل
أكييد حا أفرح وأسعد لو كان لو كان بلا دبييل
**********************
فى كل منتدى بكتب بكتب وليهو بزور
أدييكم تحية وأديكم أحلى أحلى مرور
ما افطّ الجميع وأسلّم وامُر وامُر بالدور
وأنا ما بعرف خداع أو أقول الزوور
أبارك العيد عليكم واوزّع الريفى دور
أبارك العيد عليكم واوزّع الريفى دور
أبارك العيد عليكم واوزّع الريفى دور

مرسل: **الأربعاء 2010.11.17 12:42 am**

--------------------------------------------------------------------------------

يا جماعة البوست ده خاص بالمسادير الرياضية أى زوول يكتب لى فريقو المسدار معروووف رباعى أو خماسى !!يا محمد كوراك ماتكتب ليك بيتين وتقول دخلت المنافسة!!والشغل المفجخ ما فينا بعد شوية بنجيت لجنة تحكيم المسادير من منتدى السروراب والله المفجخ كلو يرموه فى الكوشة وبعدين بنعرف الوصيف فى الشعر والمسادير منو ؟؟ والحشاش يملا شبكتو كدى أنا ببدأ وبقول بدينا إن شاء الله ملينا وما خلينا والى المسدار الاول وزى البيان الاول :

ما بِنكتّر كلامنا ويبقى لو فى لو
يا سيدا ورفاقتو ورينا شن بتسو
وصيفنا العزير نحرّم عليهو الضو
ويقعد بس يكورك وزيو صوت البو
وجمهورو الحزين عرقو نازل شو

مرسل: **الأحد 2010.11.21 3:34 am**

بلو رأسكم يوم التلاتاء بلو راسكم
ووسعو المطمورة برضو وسعو ليهو ساسكم
ونحنا ناوييين بس رباعى والتلاتى قديم مقاسكم
واحدة سادومبا واحدة كاريكا وبكرى المدينه ضرب نحاسكم

مرسل: **الثلاثاء 2010.11.23 10:50 pm**

شُفت الغرور الغرور يا محترم
خلا الهلال مجدو مجدو انشرم
خلى الوصيف أخر رقيص ترررم ترم
كان الفرح ما ليهو حد خلو الشنب برضو انبرم

مرسل: **الثلاثاء 2010.11.30 10:35 am**

تيم الاهلى شندى والصعود للممتاز هذا العام

--------------------------------------------------------------------------------

كنت أتابع نتائج فريق الاهلى شندى وكنت متأكد بإذن الله أن الفريق بهذه النتائج سوف يصعد للممتاز وقد كان بحمد وفضل الله أولاً ومن بعد ذلك بمجهوات اللاعبيين والادارة والمشجعين والجهاز الفنى والاقطاب والمتبرعيين الذين وقفوا مع الاهلى حتى صعد للممتاز بإمتياز .كنت بصدد أن أكتب قصيدة ولكن كانت هناك زحمه الهلال مع الصفاقصى وهلال مريخ الاولى والثانية وبعدها الاحداث التى واكبت المباريات من شكوى الهلال وخروج جماهير الفريقيين من التشجيع المثالى واللجوء الى هتافات لاعلاقه لها بكرة القدم.
أمّا الان فبحمد الله قد هدأت العاصفة نوعا ما والان فى إستراحة قبل بداية الدورى والمنافسات قد تمتد الى منافسات المحترفيين فى فبراير رأيت فى هذا اليوم أن أشارك بقصيدتى وأطلب من كل دار جعل أن يشاركوا دعماً للاهلى لان بقاء الاهلى فى الممتاز يتوقف على الدعم المعنوى والمادى والوقوف من الجميع حتى يجتاز لاعبى الاهلى العقبات والمباريات الاولى فى الممتاز وهى صعبة إذا لم يجدوا التشجيع والوقوف واللجان وترتيب الامر بصورة حديثة يستفيد فيها أهل شندى وأهل دار جعل من خبراتهم وعلاقاتهم الخرطومية وفى الاقاليم عندما يحل أهلى شندى فى كادقلى أو كسلا أو مدنى أو الحصاحيصا أو عطبرة أو بورسودان .
يجب أن نرى بصمات الرجل الكلس الارباب صلاح أحمد إدريس لما له من وقفات مالية وإدارية وعلاقات وهو شخصية لها إحترامها ومكانتها فى الوسط الرياضى والاعلامى والفنى والسياسى وماشاء الله وعينى باردة شخصية يتمناها كل نادى والحمد لله كانت من نصيب أهله فى أهلى شندى .
بإذن الله سوف أفرد فى كتاباتى حيز كبير للكتابة عن الاهلى شندى والمتابعة وعند نزولى الى السودان سوف أسجل بإذن الله زيارة للاهلى شندى فى مقر النادى وسوف أقدّم هذه القصيده وليت الاخ عماد المتمه جهز قصيدة معى حتى نقدمهما سوياً ويكون الاخ عماد المتمه مقدماً وحاضراً لذلك الاحتفال مع كل كوكبه منتدى دار جعل فهل أنتم جاهزون .؟؟ والآن الى القصيده :

العنوان تيم الاهلى شندى

تيم الاهلى شندى تيمنا ..........ياهو حبابو
نبارك لى الوصول...... ونكلّم جميع أصحابو
الدكتور والمهندس والمعلم والطبيب وجنابو
ونطلب من الجميع ... كل يوم يدق لى بابو
ويسأل من نواقصو... ويفتش جميع أنسابو
يا دووب فى البداية .......سبقو جميع أترابو
وحايكون ليهو شأن ......وحاتزيد كتير أنصابو
لو أدينا واجبو واجبو......... وشدينا لى كرابو
ومطربنا على اللحو........ غنى الغرز نشابو
وحسين شندى نِمّ قول .... قولك يزيد تقابو
الارباب صلاح الارباب صلاح أصلح لكل أعطابو
ورئيسنا عمر البشير كل يوم يشوف لى كتابو
من كرمك جدودك وعشيرتك وإنتو من أقطابو
ونكلّم برضو صديق........ دكتور ظريف ترحابو
يعالج كل مصاب.......ومابكون هو من الغابو
وأناشد كل حضور يكلم لى أخوهو ..... وجابو
وأناشد كل حضور يكلم لى أخوهو...... وجابو

منتدى أنا سوداني

قصائد هلالية.. مريخيه... وقوميه....!!!!

رد: قصائد هلالية.. مريخيه... وقوميه....!!!!

رد: قصائد هلالية.. مريخيه... وقوميه....!!!!

رد: قصائد هلالية.. مريخيه... وقوميه....!!!!

رد: قصائد هلالية.. مريخيه... وقوميه....!!!!

رد: قصائد هلالية.. مريخيه... وقوميه....!!!!

رد: قصائد هلالية.. مريخيه... وقوميه....!!!!

رد: قصائد هلالية.. مريخيه... وقوميه....!!!!

رد: قصائد هلالية.. مريخيه... وقوميه....!!!!

رد: قصائد هلالية.. مريخيه... وقوميه....!!!!

رد: قصائد هلالية.. مريخيه... وقوميه....!!!!

رد: قصائد هلالية.. مريخيه... وقوميه....!!!!

رد: قصائد هلالية.. مريخيه... وقوميه....!!!!

رد: قصائد هلالية.. مريخيه... وقوميه....!!!!

رد: قصائد هلالية.. مريخيه... وقوميه....!!!!

رد: قصائد هلالية.. مريخيه... وقوميه....!!!!

رد: قصائد هلالية.. مريخيه... وقوميه....!!!!

رد: قصائد هلالية.. مريخيه... وقوميه....!!!!

رد: قصائد هلالية.. مريخيه... وقوميه....!!!!

رد: قصائد هلالية.. مريخيه... وقوميه....!!!!

رد: قصائد هلالية.. مريخيه... وقوميه....!!!!