مذكرات مسافر...............للسودان

[الدكتوره]

السيد احمد يس
استمتع جدا وانا امر على هذه المزكرات
وتدمع عينى لحظه واموت على نفسى من الضحك مره
جعلتنى اشعر بشعور غريب وافكر فى والدى وفى الجايه
وبتمنى يجينى عريس مرتاح يقول ليه (على بالطلاق ماتدفع حاجه )
وخصصوا احنا 3 بنات
وذى مابقول المثل (يامخلف البنات ياشايل الهم للممات )
الله يديك الصحه والعافيه وتعرس لبناته ان شاء الله

[احمد يس]

الدكتورة..........
شكرا للمرور من هنا مرة اخرى......................
وشكرا على لقب السيد ( مش اونكل ولا ابيه )
عندما قررت ان ادون مذكراتى وهى على فكرة ليس مكتوبة ولكنى ارتجلها اثناء وجودى امام الشاشة البللوريه مباشرة. كنت اريد ان يقرأها اكبر عدد ممكن من اعضاء المنتدى لان معظمهم شباب فى عمر الزهور وتجربة العرس بتفاصيله لا يمكنهم تخيلها بكل ما فيها من حلو ومر...............

عرس البنات هاجس كل اب من اول اختيار العريس المناسب مرورا بكل مذكراتى الى ان تصل الى عش الزوجية.....................
العريس المقتدر................كتير فى السودان منهم..............لكن الاهم ان يكون بخاف الله فى بنات الناس............وبلاش يحلف طلاق من الاول ...............عشان ما يتعود على كده

وربنا يدى ابوك الصحة والعافية انا كمان عندى المزيد من البنات ............... صح ابو البنات شايل الهم للممات ............... بس كمان لو احسنا تربيتهم بيدونا تأشيرة للجنة...........
وربنا يديكى ابن الحلال انتى وكل بناتنا على المنتدى

[احمد يس]

اخذت السيارة تنهب الارض نهبا فى طريقى الى منزلى ببحرى بعد انتهاء العقد بمسجد السنهورى بالمنشية مرورا بشارع الستين وشارع المشتل وشارع عبيد ختم وكبرى برى ......... والكبرى الطاير بكوبر اللى شغالين فيهو من سنتين ولسع ما خلص.......
بجانبى ابنى الكبير........... عندك حاجة اشربها ............ههههههههه يضحك الولد وين يابوى انت بتهظر .......كلو خلص............... ليه انت ما عامل حسابك ........
والله مبالغة يابوى........ العربية كانت مليانة بكل ما لذ وطاب لكن الناس كانت كتيرة.
....... انا ذاتى ما لقيت شىء اشربه.............. انت كنت خاتت شنو ....... كلو يا ابوى
خبيز وعصاير وموية وفشار وتمر كميات................. والله امك ما قصرت ........
جابت القروش من وين.............. لووووووول .... ما دولابك فى والشنطة عمرانة....
لوووووول دى شنو يا ولد ..... ما تخت فى بالك يا ابوى دى حركات النت........
دوس بنزين يا احمد امشى البيت سريع حصل الدولاب واللى فيهو ............

ايووووووى ايوووووووى ايوووووووووووووى
جنس زغاريد بمجرد وصولى للبيت نسوان كتيرة من الاهل والحلة وبالاحضان ومبروك يا احمد عقبال ما تشوف عيالها............... اصلا انا جاى ريقى ناشف والاحضان نشفت ريقى زيادة.................... الا حضن ام العيال كان البلسم ..... بكيت وبكت هى......... فرحانين وفى نفس الوقت زعلانين............. كدا يا احمد نحنا عملنا اللى علينا.............. ربينا وعلمنا وكبرنا............. وسلمنا امانتنا لزول انشالله يخاف ربه فيها.................... ده اللى شفته فى عيون زوجتى بدون ما تقول حرف واحد....

ركعتين شكر لله ودعاء انشالله ربنا يسعدها ويرزقها بالذرية الصالحة........... يارب
كدا اخد لى حمام دافىء عشان ارتاح بعد يوم شاق جسديا وذهنيا وصراع جواى ومكسب ستر البنت وخسارة مكانها وذكرياتها ....................

ايوووووووووووووووووى ..... ايوووووووووووووووووى .... ايووووووووووو
......... فى شنو تانى.................. اهل العريس جايين بوفد رسمى من النسوان لتهنئة ام العروس.............. تقابل الفريقان فى منطقة محايدة بين الطابق الاول والثانى.......... ولاول مرة اعرف الفرق بين المعسكر الشرقى والمعسكر الغربى
والحرب الباردة ..................
كل الالوان وكل الاحجام ...... شعرت انى فى سوق الشهداء ......... الهروب فى هذه الحالة هو الحل ................. الى الراكوبة فى سطح المنزل........... اخر شىء سمعته زغروته ورحت فى سبات عميق...................

ولنا عودة

[احمد يس]

اكتفى بهذا القدر من المذكرات.....................لاسباب فنية
الى اللقاء فى مذكرات اخرى..........................

[بت أبوظبي]

المذكرات
في انتظارها

[احمد يس]

بت ابوظبى

والله انا ذاتى نفسى اكملها ............. يمكن التوقف نوع من الاحتجاج............يمكن عشان اشوف منو المتابع ومنو الما متابع ...............
انشالله بكملها عشانك..............

[احمد يس]

كنت قد قررت التوقف عن كتابة المذكرات والتى شارفت على نهايتها......... تاركا للجميع تكملتها حسب ما يتهيأ لهم.............. ولكنى وجدت انه ليس من اللائق تركها مثل مخرجى الروائع تركها بدون نهاية لذا سوف اواصل الكتابة

[احمد يس]

بقى من الزمن 3 ايام لحفلة الزفاف................ده معناتو انو الزول نومه يكون ما منتظم برغم التعب.....
التجربة الاولى دائما بتكون صعبة............. التفكير مشتت فى كل الاتجاهات ........ داير يكون عرس مرتب ومنظم .......... التفكير فى من لم يتلقى الدعوة...............التفكير فى قاعة الحفلة ...... متابعة كل الترتيبات المتعلقة بحفلة الجرتك.......... حيث انها سوف تقام فى منزلى بعد الانتهاء من حفلة الزفاف مباشرة وذلك نسبة لسفر العرسان بعد ساعات قليلة من الحفلة................ وبينى وبينكم الناس بقت تعملها بالطريقة دى اختصارا لحفلة صباحية يأتى فيها القاصى والدانى............. ولرغبتى الشخصية فى ان تكون حفلة خاصة جدا لاقرب الاقربين فقط..................

قررت ان افرغ نفسى يوم لزيارة الاهل فى كل انحاء العاصمة.......... وكانت غلطتى انى قمت بهذه الجولة نهارا................كمية العربات الموجودة فى شوارع الخرطوم مبالغ فيها........ قد تنتظر اكثر من 30 دقيقة لمحاولة العبور من بحرى الى الخرطوم سواء من كبرى النيل الازرق اذا كان مفتوح فى اتجاه الخرطوم او من كبرى برى من جهة كوبر ................. مظاهر العمران فى الاحياء تذهلك من حيث نوعية المبانى والمبالغة فى التشطيبات..............انواع السيارات على احدث الموديلات..........
الاناقة واضحة على الجميع................. تحتار فى امر بلدنا كثيرا...................

[صلاح يحيى سليمان]

الاخ احمد...!

احتجاجك يا اخى ليس له مبرر.....!
تصور انا عاوز ادخل معاك فى مناقشة وكذلك كثير من الاخوان.....وتاكد الاسئلة والمناقشة جاياك
بس انت كمل المذكرات ...وندخل معاك فى مناقشتها.....!
الناس مواصلة ومتابعة مذكراتك....والمناقشة جد حا تكون قيمة جدا للكثيرين.
بس نخلى العرسان يسافروا ....!

مع تحياتى

[احمد يس]

اطول يوم فى التاريخ ...................... صحيت فى اليوم ده قبل صلاة الفجر.......قلق ما عارف مصدره وين يمكن كنت بفكر فى المقام الاول فى نهاية سنوات طويلة منذ ولادة ابنتى واستمتاعى وانا العب معها وهى طفلة رضيعة وكيف بدأت خطواتها الاولى فى المشاية وكيف اول مره قالت كلمة بابا .....مرورا بذهابها الى الحضانة والمدرسة ... كيف كانت تكبر وتنمو امام ناظرى..... دراستها ومعانتى ومعانتها فى تخطى السنين وصولا الى الجامعة..... ومن حكمة ربنا انو انفصال الابناء عن الاباء يتم على مراحل كثيرة......... مرحلة الذهاب الى المدرسة.......مرحلة تكوين الصداقات مع الآخرين ......... مرحلة الدراسة الجامعية والذهاب الى السودان............. ولكن اصعبها هى المرحلة الاخيرة.................. الزواج............سنة الحياة الدنيا
يمكن كمان كنت بفكر كيف ستكون الحفلة ............... كيف ستكون ابنتى فى فستان الزفاف ...................... ماذا سوف يكون شعورى وهى تتأبط ذراع انسان غيرى..........حاجات كثيرة تدور فى عقلى ..... ورشة بكل اقسامها ...
الجميع متوتر برغم مظاهر الفرح البادية خارجيا ........ العروس فى قمة توترها الداخلى ...... حايمة فى البيت بدون هدف واضح................... زوجتى العزيزة زى ما قال المثل ام العروس فاضية ومشغولة ......... اكيد كانت بتفكر زى ما انا بفكر........................
شربنا الشاى فى اجتماع اسرى ضم الجميع ........................ يمكن لشعور بانها المرة الاخيرة التى ستشرب معنا الشاى ......................... اكيد انشالله سوف تشربه مرات ومرات فى المستقبل بأذن الله .......ولكن الاخيرة وهى ابنتنا بالكامل ............. وهى تشرب بحريتها ...................... البنت على فكرة بعد الزواج لا ترتاح الا فى منزلها ولا تعرف للاكل والشرب طعم الا مع زوجها......................

العروس سوف تقضى اليوم كاملا فى مركز التجميل................... جهزت شنطها فيها كل تحتاجه من فستان الزفاف والطرحة والاكسسوارات والتاج....................... طبعا على امل ان نلتقى فى الحفلة مساء .......
وحضنتها كثيرا حيث لا يرانا الاخرون .....................فا انا من النوع الذى لايحب ان تكون مشاعره مشاعا للاخرين..................دموع تحكى قصة مشوارنا الطويل ................وتحكى فى نفس الوقت عن قلق المجهول الات فى حياتها الجديدة..............

اها يا احمد البدلة جبتها من البخار..................... والله نسيت تماما الموضوع ده............... وبديت المشوار بالعربة الذى انتهى عندما اوقفت سيارتى اما م قاعة الحفل فى الثامنة مساء.

الاتصال على متعهد الحفلة.................اها انشالله الامور ماشية كويس ...............اطمن يا استاذ احمد .... الفريق حقنا حسع فى القاعة بيجهزوا الطاولات والمفارش......................داير مفارش تشرف ما مفارش اى كلام.........
انت بس ما تشيل هم ........................... الو ممكن اكلم سيد المحل.....................ايوة يا استاذ ما موجود.... اى خدمة......... لا بس كنت داير اطمن على كوشة العروس ..............باسم منو.................. احمد يس..........انت العريس..............ههههههههه لا انا كداب الزفة....... يا ولدى وين عريس نحنا يالله يالله نحضر اعراس بس.....
جاهزة وحملناها وحسع يكونوا وصلوا القاعة.........................

ولنا عودة

[احمد يس]

يجب ان تقف على كل كبيرة وصغيرة فى حفلتك والا سوف يفلت منك زمام الامور..................
وعليك ان تقوم بذلك وسط تلك المشاعر المتصاعدة والملتفة على بعضها مثل شجر اللبلاب.........
البيت مليان ناس من الاهل كل فى وادى مختلف تماما عن اودية الآخرين........... الحمامات لا تهدأ وموتور الموية شغال بكل احصنته وحمدت الله انو الجمرة الخبيثة لم تلحق بخدمة توصيل المياه حتى الان.............. حركة دائبة فى بيتى لا تهدأ............... انا داير اكون براى فى اللحظة دى بالذات...........اريد ان اعطى تأشيرة خروج لعبرتى ولا اريد لها ان تخرج وسط الافراح......
داير بكم يا عمنا ..................محطة بنزبن..................يا عمنا داير بكم .......عبى فول يا ابنى
........ ليه ختيت كم جالون ........ طيب انا ما سألتك فى الاول داير بكم..........ما قصدى يا ابنى ....هو الجالون بكم .... 6750 لا حول ولا قوة الا بالله............ الله المستعان.....
شارع النيل كما هو لم يتغير برغم مرور السنين.............شجر يحكى تاريخ الخرطوم.........ظل يكفى السودان كله................ تذكرت ايام ما كان الفندق الكبير ال grand hotel
فى مجده.............. وانا امر من امامه وتوقفت طويلا اما معدية توتى او البنطون كما نسميه ....
وقفت طويلا لتخرج العبرات والدموع .......... قلت ما بطال اصلوا النيل نازل السنة دى ومحتاج زيادة.......................
ترن ترن ترن ....................وينك يا احمد الوقت قرب عشان نستعد نمشى الحفلة...........الاولاد مشوا مع بنات عمتهم عشان بيمشوا الصورة الجماعية عشان بيتهم قريب من الاستديو.............
اى اى انا جاى فى الطريق كنت فى مشوار كان لازم اعمله................

[badeen]

وينك احمد واصل اصلي مسافر لسودان وانت شوثتنا
الله يديك العافيه
بدين

[احمد يس]

الاخ بدين
وينك انت ما ظاهر.................
انشالله توصل بالسلامة.......................بلدنا حلوه بكل ما فيها حلو ومر
ولمن ترجع انت كمان اكتب لينا مذكراتك

[بت أبوظبي]

تفاصيلك يا احمد زكرتني بعرس توت ... وعرس أعز صديقاتي..وأصدقائي
وكيف كنا في زحمه داخليه وخارجيه !!


واصل ..

[احمد يس]

والله يابت ابوظبى........ انا نفسى احكى تفاصيل اكتر دقاقة لانها فعلا هى احلى شىء فى العرس
وانشالله عقبالك انتى كمان.......

[حزن السنين]

و الله يا احمد ما عارف اقول ليك شنو لكن انا مع بت ابوظبي عشان كدة ما كملت القراية لحدي النهاية
بس فضلت امشي البيت و بي رواقة مع كباية جبنة من ست الحبايب اقراها بيمزااااااااااااااااج

[احمد يس]

شكرا ياحزن السنين
وما تنسانا بفنجان جبنه................... اقرأ برواقة وادينا رأيك

[الدكتوره]

والله يا سيد احمد انا متابعه المزكرات من البدايه
وفي انتظار البقيه انت بس شد حيلك

[احمد يس]

عادة يستغرق وقت حلاقتى لذقنى مابين 10 الى 15 دقيقة.................ويعتمد ذلك على السبب فأذا كنت فى الاحوال العادية.................يعترينى الملل واحاول التخلص من تلك المهمة الصعبة والتى ازاولها من وقت ان كنت احلقها بلا سبب الا لرغبتى فى ان تكون كثيفة ليس الا......... اما فى المناسبات فيتدرج زمنها حسب المناسبة نفسها............اذا كان هناك اجتماع عمل او موعد سفر او شكوى من زوجتى بسوء منظرها ويتدرج الاهتمام بها الى ان يصل فى اعلى درجاته ....... عندما يكون لدى موعد خاص وهام.....

اعتقد ليس هناك اهمية اكثر من موعد زفاف ابنتى.................اخذت اعد ادوات الحلاقة فى اهتمام واستمتاع بالغ كأنى ارى تلك الادوات لاول مره................
بالغت لكين يا احمد هو انت العريس والا شنو.................ده كلام زوجتى.........مالوا ما انا فعلا عريس او على الاقل شاعر بسعادة كبيرة اعتقد انها تفوق سعادة العريس زاتو............
عادة يقوم السادة الرجال بحلاقة اولية ................... وحلاقة تأكيدية لملاحقة كل شعرة متمردة لم يطالها الحلاقة الاولية................... ولكن على خلاف العادة قمت بحلاقة ثالثة ليس لها مسمى ....يمكن كنت سرحان ورجعت بخيالى الى ذكريات قديمة جدا................شعور ان تكون عريس مرتين دون ان تتزوج مرة ثانية..............ممكن يحصل ......
لا يا احمد ما تلبس بدلتك الكحلى عشان ما تمسخ للعريس بدلته................ طيب انا معاى بدلة رصاصية ينفع ....ممكن.............بس خلينى انا اخترلك الكرافته.................
المراية اشتكت منك يا احمد .........انت حكايتك شنو يا راجل ........كدى اشوف عينك تزوغ كدا والا كدا فى العرس..................النسوان اصلى انا عارفاهم اليومين ديل بقم خفيفات شديدة...وعيونهم طايرة..............
ياشيخة حرام عليكى وربك يسهل انشالله...............تقصد شنو يعنى................لا ما تشيلى فى بالك....
اها العيال وينهم .............ما قلتلك مشوا بعضهم مع بنات عمتهم ....... وابنك من بدرى مشى القاعة عشان يشوف لو فى حاجة ناقصة................. يعنى انا وانت لوحدنا ياجميل.............ما تيجى نمشى للحاجة ناخد رضاها قبل ما نمشى العرس عشان ربنا يسهل طريقنا................ والله فكره

[احمد يس]

عادة قديمة ان نمر على الناس الكبار الماقادرين يمشوا العرس ناخد البركة منهم وناخد رضاهم..........
طيب ما كمان نمشى على ناس امى بالمرة يا احمد عشان امى قالت مابتيجى عشان ما بتستحمل اصوات مكبرات الصوت............. مرينا على شوارع بحرى من شارع الزعيم ازهرى الى شارع كبرى شمبات وانا اغنى ما خليت اغنية سودانية ولا مصرية ولا شاميه لها علاقة بالزواج ..........انت عاجبك صوتك والا شنو يا راجل.................مالو صوتى ما وقت خطوبتنا كان فى نظرك صوت كروان.......
انت لسه متذكر...............كنت باكل بعقلك حلاوة...........يعنى كنت داير اقولك صوتك شين عشان ما الم فيك تانى............هههههه بهظر معاك يا راجل انا عارفاك بتتعقد سريع............. لا ما غيرك كان شاهد على جمال صوتى ما براكى...........منو يعنى تقصد......... ما تختى فى بالك دول ناس شلتنا القديمة.... شوارع الخرطوم بحرى زحمة شديدة خاصة شارع المعونة ..... المؤسسة... محلات كثيرة للملابس النسائية خاصة فساتين الزفاف والاكسسوارات...........من فرحتى وسعادتى كنت شايف الناس كلها فرحانة.......... مريت من كبرى النيل الازرق .......ذكريات ما ممكن ان تتنسى كازينو النيل الازرق على ضفاف النيل بجوار المخازن والمهمات........ تحت الكبرى من جهة الخرطوم سينما النيل الازرق بجوار وزارة التربية والتعليم............... وصلنا شارع المطار واسمه حاليا افريقيا...............
وصلنا مكان الحفلة ...........مشالله الاضواء وضعت بريشة فنان خصوصا المدخل كان روعة.......
ايووووووووووووو ايوووووووووووو ................... ما عارف منو زغرت...........بس سامع ناس ...
دى ام العروس وابوها............. احضان وسلامات والف مبروك ناس كتيرة مشالله............. اها بيكفى العشاء ياربى والا ما يكفى ........ يا راجل انت فى شنو والا شنو......خلينا فى العرس......
مبروك يا احمد............. البنات عجزوك......منو دى ....بالله ما عارفها ...بالغت يا احمد دى بت عمك
اللى فى دبى.............بالللللللللهى........الو الو وين انتو ما خلصتوا من الكوفيرة لا يا بوى خلصنا وماشيين على الاستوديو ......جيب يا احمد الموبايل دا ........... اها يابت اختك كيف ...... بتقولى شنو...مبالغة ...... ايووووووووويو يو.