منتدى أنا سوداني

مرسل: **الثلاثاء 2010.4.6 6:06 pm**

تجيك واحدة ترسمها في الخيال انسانة
ملامحها يغطيها الجمال

تقعد تحكي معاها تسمع ليك
وانت تسمع دقات قلبك
قلبلك دليلك

تتورد
وانت النبض عندك يزيد

تلمع في عيونا حكاية
وعيونك ماشة صغيرة

خايف اقول اكثر
الاحساس يفوق
والمنظور
الروح الطيبة تأمر
والذوق براهو والله اكتر
احفظك ربي

مرسل: **الثلاثاء 2010.4.6 6:15 pm**

بت حلتنا ...
نجلس قباله منزلها ...نترقب خطاويها
ترتعش القوب بلمحه ضيها
يفرهد القلب
وترش ايامك بدعاش الحب
تتقطر كلماتها رقه وخجل
وانت العاشق الوله
لك ..الخاطر المعطاء
ولك الود

مرسل: **الثلاثاء 2010.4.6 6:26 pm**

مها

هنا يبان الذوق

والكلام الحلو البعجب

وحكاية من العصر اتنهدم واقيف في اول الشارع

لمحة بس وارجف
حلاته
احي انا

هي تخليك مشدوه

مرسل: **الثلاثاء 2010.4.6 6:35 pm**

وهنا بيان الزوق والاسلوب
بتنا ...قليبا رهيف
لا بتجامل لا بتعرف التزييف
قليبا حنين وبعرف طلة الحابين
وبتحس بالحان الجاى
وبى قلبا عليها ...وريف
اريتك تبقى ليها
الكل وشجر الضل
وبالتحنان تخليها
اجمل من بنات الحور

مرسل: **الثلاثاء 2010.4.6 6:42 pm**

اشيلا غنا
هي اجمل مني

من يغمرنا بالحنان
تكون الروح له فدا
ومن نحلم به
يبقي الحلم هدف

هي الروح
اتنفسها محبة
اصدق محنة

لو ربنا رادك تضع الكف علي الكف

وتضغط مبروك علينا

مرسل: **الثلاثاء 2010.4.6 6:47 pm**

وتشيلك فى القليب الحان
وفلا الخاطر هدى وايمان
تفاخر بيك بنات الكون
وتسعد بيك
محل ما تكون
وبالحب والحنان الفيك
تتعطر بهاء ونضار

مرسل: **الثلاثاء 2010.4.6 6:53 pm**

قلت ليك
الالق واضح
والحرف يكون عالم جميل

تعيش فيهو بحريتك

قرارك في يدك

زولك زي ماقال قلبك دليلك

يازمن اجمعنا

مرسل: **الثلاثاء 2010.4.6 7:12 pm**

الحرف ...بلسم اخطه ...ليعبرعنى
ويداوى ...ما بنفسى
بتنا ....تعشق الحرف والنغم
حلاته بنيه ملفحه بى حب
الفارس المغوار طرحه
تحميها من الحر والزيف
وتكون بنيتنا ارق من التحنان
بى وارف ظلال عشقك
وقليبا كان بقالا دليلا
منو الغيرك بكون ...ليها
قليبا بى سماه مطير

مرسل: **الثلاثاء 2010.4.6 7:25 pm**

بنية
تفتح لهمسك نفاج

وتروي عطشك
انبل عاطفة

تشرح ليك الريد
وتريدك اكتر من روحها

قوافيها ابداع
وشوقا بيان

زالت حواجزنا وبقينا قراب

مرسل: **الثلاثاء 2010.4.6 7:31 pm**

بنيتنا ..ماها الجاهلا ...وصوها
ولا هى ....العايبه زجروها
ولاهى الطاشه وعوها
بنيه رزينه تملى العين
قوافيها ....تحجيك
وتهدى ليك خاطر العين
كان عرفتها دابك
اتلومت فيها كتير
ولو كان الحديث مقصود
اريتك تمشى فيه عديييييييييييييل

مرسل: **الثلاثاء 2010.4.6 7:59 pm**

من زمان علي البال

هي هي

تخاف عليها من روحك

تتمناها ما تفوتك

الكلمة امانة
والشعور بيها جانا

ماليه العين لمن تفيض
جاهلة يعني رشاقة
وكبيرة عقل ومواقف
المشوار ليها شرف نتمناهو
ونسعي ليهو
وماشي ليك

مرسل: **الأربعاء 2010.4.7 9:47 am**

أنا والليل وبنت الحلة

احلي سهر واحلي بشر

اعاين ليها وابتسم

تعاين لي ترتاح

تحيط وجهها بيديها

لوحة

رقة
انوثة

تجنن

تسرح في الضفائر

ياخ قمر

ضوا ف .. حياتي

مرسل: **الأربعاء 2010.4.7 10:00 am**

ابوسن ومها

ابداع حد الثمالة

واصلو ونحت نتاوق بس

لفة

ابوسن الف حمدلله على السلامة وربنا يمتعك بالصحة

منور من جديد

مرسل: **الأربعاء 2010.4.7 10:18 am**

ودابنعوف

مشتهي فنجان قهوة في حضورك

وهي عيونها علينا

بخورا جاولي
وعدني

ومحمصة بحرارة انفاسها
وفنجانا بمستكة
لمن تمد ليك الفنجان
ماترجف
ونقول جاتك قروش

دي لمسة عفوية
قلبت كياني قبلك

بنها كيف
ولونها برتكاني

الله لينا منها

مرسل: **الأربعاء 2010.4.7 5:53 pm**

الحلة قبل المغربية

مرقت البنية بتوبا

لمحتها قلبي قال شح

صدحت قمرية سلام

مشيتها قدم حمام

طلة بنظام
تخليك ترفع التمام

شرحت صدري

مرسل: **الأربعاء 2010.4.7 6:06 pm**

وسمعت الاذان ...وقالت ماشه للجيران
امها ...نادت هوووى يابنيه
الشمس غابت
تعالى ...بسراع
قبل الضلام يلفاك
بنيتنا ....اتاريها
لفحت توبا للفارس المغوار
سمعتبو دخل الحله ...
قلبها شح ...وطار بى هناك
سبقو الشوق ...
وقلبها فج ....وولع نار

مرسل: **الأربعاء 2010.4.7 6:18 pm**

بنوته

نور بسيما يضوي العتمة

تزيد عضلات الفارس احتمال
تولع في صدرو تحدي الاجيال

ينتر اسد
يسمع كلاما تقدير

اعزها حضور ونفير

يحميها من عيون وسيوف
عزها يضرب له دفوف

شوقي ليك

مرسل: **الأربعاء 2010.4.7 6:30 pm**

وسمعت ...فلان جا .....
امها هوووى يابت
ارحكى على بيت .....
وليدا وصل
وعاد السمحه قالت وى
والقليب فرهد ضى
والخشيم انفرد ...سى
والوش نور ضىء
و لو ما الخجل
كانت زغرتت وىوى

مرسل: **الأربعاء 2010.4.7 6:37 pm**

عمت البشائر
وزاد الفرح

زغرودة الحليوة فال
ربي حقق الامال

كساها العفاف جمال

دنياريدنا كتبنا شهادتا

ونواضر حسنها عنوان لقانا

في زول يلقي حنان زي دا يفوتو

ابشري بي ياعديلة

مرسل: **الأربعاء 2010.4.7 6:44 pm**

بنيتنا بنيه الحله حلاته.....
جاها الفارس قال ليها كيف
وقفت هناك خجلانه ....كيف
نطق الخشيم
انا زى يباب راجى الخريف
واشواقى ليك ماليهاحد
شوق المهاجر للوليف
فارسنا داك ....قلبو الرهيف
وقف عديييييييييييل
قاليها بكره بجيك خريف

منتدى أنا سوداني

بنت الحلة حلاته

بنت الحلة حلاته

رد: بنت الحلة حلاته

رد: بنت الحلة حلاته

رد: بنت الحلة حلاته

رد: بنت الحلة حلاته

رد: بنت الحلة حلاته

رد: بنت الحلة حلاته

رد: بنت الحلة حلاته

رد: بنت الحلة حلاته

رد: بنت الحلة حلاته

رد: بنت الحلة حلاته

رد: بنت الحلة حلاته

رد: بنت الحلة حلاته

رد: بنت الحلة حلاته

رد: بنت الحلة حلاته

رد: بنت الحلة حلاته

رد: بنت الحلة حلاته

رد: بنت الحلة حلاته

رد: بنت الحلة حلاته

رد: بنت الحلة حلاته