صفحة 1 من 1
مكتبة الشاعرة نادية عثمان
مرسل: الجمعة 2011.11.4 10:58 am
بواسطة بعد الزمن
تفاحتي يا آدم
واحشني
ماواحشاك !!
بايعني
انا شارياك !!
هالكني بعذابي
حائر قليبي وراك
ساكن هواي فى الروح
سيب حبي اتحداك !!
غرقانة فى ريدتك
بحرك مدادو صفاك
وين حنّك الفياض
ياغالي ايه قسّاك
زعلان عشان لومتك
صدقني مفتقداك
زعلانة منك جد
حبك بقالي هلاك
انا كنت نجمة ليل
حولي البشر افلاك
هسع سكنى الهم
بقى همي كيف انساك!!
كل يوم يمر ياحبيب
عمري الحزين يرجاك
يالغبت عني كتير
واحشنى ماواحشاك !!
تفاحتى ياآدم
عذبت ليه حواك ؟!!
رد: مكتبة الشاعرة نادية عثمان
مرسل: الجمعة 2011.11.4 10:59 am
بواسطة بعد الزمن
وعجبى !
كتلنى الشعر عشقا وهزتنى القوافى
حبيبتى حروف وكلمة من الزمن الخرافى
بقت فى الغربة مآوى فى قلب المنافى
مصيبة الشعر أكبر فى دنيا الصحافى
وعجبى!!
السلام كان ديمة مطلب وكل جارا ليهو ساعى
بس بخاف المدة تطول ونحنا هدتنا المساعى
الحجج والنقة كترت مابشوف كان ليها داعى
الوطن الجرحو نوسر كان جميل لو ليه نراعى
وعجبى!!
قلت وحدوى قلنا مرحب أكد القول بالسلام
قول وداع للآلة تكتل فى ربا السودان حمام
العدالة طلب اساسى وببقى سفك الدم حرام
نحنا أخوان ده الأساسى وبينا حب جد وانسجام
وعجبى!!
كل مانقول ده موسى يطلع برضو فرعون
ابليس بى قرونو وجد اولادو شيطون
الشر امتلكنا وخت عمارو فى الكون
كل مانقول ده انسان يطلع برضو ملعون
وعجبى!!
أصوات القنابل شيبت أطفال
بقت بغداد مدافن ومقبرة أجيال
أمريكا الغرورة قبيحة الأفعال
عشان بترول عراقى تضحى بالأنجال
وعجبى!!
لو تنسانى برضو مابنساك أنا
روح الزهرة قلبى وعبق السوسنة
يانى الجرتكوها سمحة محننة
ولو تنسانى حقك بيضيع ياجنا
وعجبى!!
ياوطنى القبائلك تشكى من تهميشك
ظالم ولا مظلوم من فعايل جيشك
أولادك بقطعوا فى منابت ريشك
قول ياوطنى حكمك الا بس ببشيشك
وعجبى!!
من شان السلام جابو الوسيط جنرال
ايمكن بالنياشين ينصلح ده الحال
ويرجعوا ناس بلدنا الهدهم ترحال
بين أمريكا كندا وكينيا ست الخال
وعجبى!!
دارفور العزيزة امى الحنينة الغرة
شن سووالوليدات جابو ليك الضرة
كبوا الدم بحورا وشربوك المرة
وين راح خير زمان الكابى جوة وبرة
وعجبى!!
ياعاشق الجمال أعرف انحنا جمالنا مالو مثيل
انحنا الفركة والسوميت وقولة السى معاها عديل
انحنا الخمرة والدخان والريف دور فتيل فى فتيل
معانا بتعرف ايه الحب وبدونا أخير تقع فى النيل
وعجبى!!
نحنا فى زمن المصالح بالقولات والسواطة
وانت يازولى الشفيف أحلى مافيك البساطة
لامنافق لامخادع زى بشر زاد انحطاطها
الا بس حظك معاكس فى زمن سمتو الوساطة
وعجبى!!
شلكاوية حلوة جمالها زى فينوس
شجرة سيسبان ودعامة الابنوس
بى سحر العيون خلبت عيون ونفوس
جننت الجنوب وبيها الشمال مهووس
وعجبى!!
أرفعوا صوت حواركم وأخرسوا البارود
الفور دار سلاطين من جدود لجدود
لابينكم جبان لا زول سفيه وحقود
الحق بالحوار مابالرصاص بيعود
وعجبىّّّّ!!
فى بلد الزرق دار سلطنة وسلطان
بتلقى القاسية هينة والقساوة حنان
أهل حكمة المساليت والزغاوة كمان
أطفوا الفتنة بينكم وكتروا الكيمان
وعجبى!!
الحرب القبيل مالقينا فيها هوادة
حقول الغام ونار لابد من اخمادها
من أجل التحول لازمة لينا ارادة
جنوب وشمال بلدنا ونحنا كلنا سادة
وعجبى!!
صاح انت الملك وفوق رأسك أجمل تاج
مصنوع من دهب أحمر وسن العاج
بس قلبك لئيم أسود بلون الصاج
مابتخاف من الله برغم انك حاج
وعجبى!!
سمعت وقالوا عنك دار تكون مشهور
عاشق الكورة مرة وفى الأغانى سرور
بى قرشك بقولو بتشهر المغمور
تخلى الدنيا تحكى عن الوجيه فرفور
وعجبى!!
شايقى ودنقلاوى أخوة فايتة الحد
فتيل ريحة وبخور عودين عبيرهم ند
ايد فوق ايد تملى بيبقو ساعة الجد
لو تسأل عليهم تلقى عندى الرد
وعجبى!!
أوعك تخاف واغرز خناجرك فى صميم قلب الرئيس
انت الشروق لو اظلمت وانت البتستر للبنيات ياعريس
قلمك درع حبرك رصاص يحرق حشا الاسد الكديس
انت الطريق مرسوم عديل وأصلو العوج درب التعيس
وعجبى!!
ادمان الكتابة منو البشفينى منو
كلماتى الرقيقة وحروفى على بحنو
بعشقو لون محابرى وقلمى العاجبو سنو
ولو ماكتبو شعرا أناملى أكيد بجنو
وعجبى !!
رد: مكتبة الشاعرة نادية عثمان
مرسل: الجمعة 2011.11.4 11:00 am
بواسطة بعد الزمن
غربة و شجن
شهق الرعد خايف البروق وبكى السحاب ..وكتين هطل مطرا دقاق ريحة الحراز
احلف واقول انو القليب قبلك بتول.. خالى الوفاض ماضاق طعم ريحة العشق والنوم خزاز
نفاج فتح جواى وكوّة نور يبق..يضوى المكان زى كهربة مدنا بيوتها من القزاز
حبك بصيص خيط الامل ومعنى الهروب ..من جوّة جوف الانشطار لما النفوس تعزف نشاز
خيل الامانى الطار وشال سرجو المطرز بالوعود..لعن المنافى وعاد خواتيمو الدموع مدقوقة فوق ورق الجواز
عاد من مشاتى الغربة والوجع الخبيث ..لملم بواقى كرامتو من رصف الحضارات المزيفة والمعطرة زيت وجاز
حط الرحال افتح شبابيك سكتك..أجهض وداع ادى القطار حق اللجؤ وأرفع شراع الانحياز
هو البستحق انك تعود ..وتزهر حقول الحب عهود ..تروى الأرض صحة وسلام ..لقمة ووئام ..رفريف حمام ..نسمة خريف ورشاش رزاز
وطن المساجد والخلاوى والدراويش والكنائس والمعابد ..وثبات عقائد باقية ضد الاهتزاز
عشقك سما وبالروح سبح فوق للسما ..زيك محال تلد الشموس يالمشرئب عالى الرؤوس
ليك الولاء تعظيم قسم ويمين غلاظ
آنفة واباء عزة وشموخ والكبرياء ..حبك حقيقة زى الحياة
يامحور الكون البيدور وثبات نقاط الارتكاز
فوق للجبال سودانا عاش ..سلة غلال ورطب لذاذ
ليهو العلا والانحناء والانحياز
وطن الجدود ليهو الخلود ..حبو الحياة وموتو المجاز
ليهو العلا والانحناء والانحياز
حبو الحياة ..وموتو المجاز!!
رد: مكتبة الشاعرة نادية عثمان
مرسل: الجمعة 2011.11.4 11:01 am
بواسطة بعد الزمن
تماضر يالحبيبة انحنا مشتاقين
ياام وجها صبوح بتعودى لينا متين
ياام قلما رصين كتب العديل والزين
وحياتك تعودى عليكى شيخ الدين !
رد: مكتبة الشاعرة نادية عثمان
مرسل: الجمعة 2011.11.4 11:02 am
بواسطة بعد الزمن
الكلمة الوردة
أحذر من خطر كلمة ..تطلع زى رصاص من فم
تخترق الكيان والنبض ..تحرّض بالنزيف الدم
تحطم فيك معانى كتير ..تعيش بعدها الثوانى ندم
ماتقول كلمة واحدة تفوت
دى طلقة معاها زول بيموت
وحس الوردة يبقى سكوت
عيب الكلمة مابترجع .. بعد تطلع من الانسان
مهما يبقى معناها .. فرح هامس وجهر أحزان
سيف الكلمة سبق العزل .. وكم من كلمة شنقوا لسان
ماتقول كلمة واحدة وبس
قول لحروف كلامك هس
أحذر كلمتك هدام .. تهد الفى السنين اترص
آه لو كلمتك وردة ..تفجّر فى الدواخل بوح
تكون همسة وحنين لمسة .. تعانق فى الصميم الروح
كلمة حب سكن أعماق .. وداوى النازف المجروح
قول الكلمة منك شهد
صادقة صدق صغير المهد
كلمة جميلة تبقى العهد
وآه لو كلمتك وردة
آه لو كلمتك ... !!
رد: مكتبة الشاعرة نادية عثمان
مرسل: الأربعاء 2012.3.7 5:33 pm
بواسطة هاشم الرزقابي
تفاحتى ياآدم
عذبت ليه حواك ؟!!
أحذر من خطر كلمة ..تطلع زى رصاص من فم
تخترق الكيان والنبض ..تحرّض بالنزيف الدم
ي\يك العافية الماجدة نادية
رد: مكتبة الشاعرة نادية عثمان
مرسل: الأربعاء 2012.3.7 5:44 pm
بواسطة هاشم الرزقابي
بيني والبحر
حمل الأثير حنان قلب مرهف تحنانه شجن مــــن الأشجان
بعثت تحيني أجبت بخافقي حياك مُحي الروح فــــي الأبدان
لما قرأت الوجد بين حروفــــــه وتفتحت أزهاره ألوان
أرخت خمائله بدوحة خاطري فقرأت في بعض المعاني أماني
وسبحت بين سطوره متـــأملا كتأملــــي للعاشق الــــولهـــــان
أيقنت أن الشوق حرك ساكنا رغم التنائي ووحشة الحرمــــان
ودُ خُصصت به فأيقظ نائمي ما أســعد الإنسان بالإنسان
فلكم أثار الود شـــجـــــوا كامنا بادلته شــجنا بشــجــــن ثانـــي
أمل الحياة به أعيش وارتجي إن سأني زمن مـن الأزمان
كم أورقت أزهاره في روحتي وسقت جـــداوله رياض جنانـــي
ولطـــــــالما حلقت بين غـصـــونه ولطــالما توجــته ســلطـــاني
ونسجت من خيط ألاماني خيمتي وجعلت من اوتارها ســــلواني
ورهنت أسلحتي وبعت كنانتي ونثرت ازهاري على البســتــان
في ساحل الكون الذي أصداءه عمّت ســــماء الكون والاركـــان
ماكان طيفا عابرا أبصــــــرته لكـــنه قبـــس مــــن الرحـمــــــن
سبحان من جعل الحياة جميلة جعـــل القلوب تفيض بالتحنــــان
فحديثها قد طالما أحببته ولطالمـــــــا أودعتــــه وجــــدانــــــــي
استمطرت من مقلتيهـــا لؤلؤاً فتناثرت درراً مـــــن المـــرجـــان
وجه نضير مشرق متهلل وجدي وشوقــــي إليه يستـــبقـــان
بادلته ودُ بود صـــادق أفرغته في قـلبــي الهـــيمــــــــــــان
البحر يبقى حاجــــزاً للقائنا لكن روحــــــــيينا ســــــــيلتقيـان
اللُجـــة الزرقاء حا لت بيننا لتزيد من ألمي ومـــــن حــــرمانـي
يابحـــــر إن باعدت بين شخـــــوصنا فقــــلوبنا يابحـــر مؤتلفان
يابحر فيك الـُدر في أعماقك فعلام يأتي بموجك الحـــــــــــرمان؟
أنا ماشكيت البحر أو لُجـاته إن باعدت بعـــض الخُطى أحزاني
فلربما جاد الزمــــان بلحظــــة فعبرت يا بحـــــر إلى السودان
أو ماوراء البحــــــر حيث أحبتي في ملتقى النيلين في أم درمـان
من لي بريح أو جــــناحي هدهد بهما احلق في ســــماء أوطانــي
حيث الذي بين الحـــياة وبيننا و`د ُنقـــــي كم إليه دعانــــي
قدري وجوداً لا أود بقاءه قلبي وعقلــــــي فيــــه يصطــــرعـــان
الرزقابي 0911115262