رســـــــاله الـــى اوبامـــــــا
مرسل: الاثنين 2011.12.5 2:16 pm
مواطن سودانى ساكن فى أمبدة روحو طالعة ضاقت بيهو المعيشة وهو فى قمة زهجو مسك ليهو ورقة وقلم وكتب رسالة للرئيس الأمريكى أوباما وقال ليهو : بحكم أنو أنحنا أولاد عم وجيران وفى النهاية تلمنا أفريقيا المهم أنا ظروفى زى الزفت وياريت لو تساعدنى ورمى الرسالة فى صندوق البريد ونسى الموضوع على كده الرسالة لفت ولفت وفى النهاية وصلت ليد أوباما قام طلع من مرتبو الخاص عشرة الف دولار وأداها لوزيرة الخارجية وقاليها... فى مواطن فى السودان فى حتة أسمها أمبدة وصلى ليهو القروش دى قامت وزيرة الخارجية الأمريكية رسلت القروش لوزير الخارجية على كرتى وقالت ليهو القروش دى من أوباما فى مواطن فى السودان فى حتة أسمها أمبدة وصل ليهو القروش دى قاليها جدا قام قال لمدير المراسم أمسك السبعة ألف دى فى مواطن فى أمبدة وصلها ليهو وقليهو دى من الرئيس الأمريكى أوباما قام مدير المراسم قال لرئيس السواقين أمسك الأربعة ألف دولار دى فى مواطن فى أمبدة أسمو فلان الفلانى وصلها ليهو وقليهو دى من الرئيس الأمريكى أوباما قام رئيس السواقين أستدعى أحسن سواق عندو وقال ليهو أمسك الألفين دولار دى ووصلها لفلان الفلانى فى أمبدة وقليهو دى من الرئيس الأمريكى أوباما قام السواق دق باب الزول وفتج ليهو الباب قام قاليهو أنتا فلان قاليهو نعم قاليهو أنتا رسلت رسالة لاوباما قلت ليهو رسل لى قروش؟ قاليهو نعم قام السواق قال ليهو أوباما قال ليك الله كريم