منتدى أنا سوداني

مرسل: **الثلاثاء 2014.7.8 8:22 pm**

[align=center]

السروجية
من المشهور عنهم العطالة و غالباً في اجازات و بهجة و بالرغم من كدي عايشين شبعانين و ما حصل باتو القوا

يوم الجمعة عندهم بطالو و عيد المسلمين ما يشتغلوا

يوم السبت دا عيد البهود برضو ما فيهو شغل

يوم الاحد دا عيد النصاري و هم جيران النصاري و متعايشين معاهم سمن علي عسل ما فيهو شغل

يوم الاثنين دا ولدو فيهو الرسول عليه الصلاة و السلام هم محتلفين

يوم الثلاثاء احتجاب

يوم الاربعاء الاستعداد ليوم الخميس

يوم الخميس بهجة و رقيص

[align=center]

[/align][/size][/align]

مرسل: **الثلاثاء 2014.7.8 8:23 pm**

[align=center]

الحواتة

ديل كمان قالوا مدعيين والدعاهم سيدنا نبي الله الخضر عليه السلام ... قالوا قال ليهم ان شاء الله مهنتكم ما تفوت بطنكم و فرجكم .. يعني ما تتعدي شهوة البطن و الفرج

قالوا النواتة بعد ما مرقوا من البحر قالوا جمعوا القوفاف و السمك الفيها عشان يتاقسموها

اها بدو القسمة سمكة هنا سمكة هناك والتالتة للزبير و هكذا نامن كمل السمك كلو و فضلت صيرة واحدة قعدو اتشاكلو فيها اها قالوا اثناء العوة و الكوراك شغال في البشيل الصيرة دي منو مر بهم رجل صالح و اشيع انه نبي الله الخضر عليه السلام و لمن شاف الكواريك و العوة شغالة قال ليهم خلاس السمكة ادوني ليها انا و اها في هذه الاثناء قامو اشارة اليه اشارة فيهو صعلقة و ما فيها احترام وتوقير لشخصه ... اها قالو نب الله الخضر زعل وقال لهم ان شاء الله خدمتكم ما تفوت بطنكم و فرجكم و من الزمان ما في نواتي طلع ليهو قوزن اخضر

[align=center]

[/align][/size][/align]

مرسل: **الثلاثاء 2014.7.8 8:24 pm**

[align=center]

الكامسرة

ديل مشهورين باللامة في التعامل مع الركاب وعدم مخافة الله و الخوف من السواقين

مشهد من حكايتهم قالوا رجل وقور ركب اللوري و قبال ما يتوهط و يقعد كويس جاهو الكمساري و طق طق ليهو يلا ياح مشينا

الراجل سمح يا ولدي خلينا النقعد سمح و بعدين انا ما طاير بديك حق الركوب

الكمساري تزمر و بدء يطنطن انتو الواحد ما يجهز ركوبو اول شي و بعدين انفجخ و معاهو دعوة و اخرج الخلال من جيبه و بدء في خللة شعرهو و الوسخ و القمل يتطاير منه و هو لا يعبا

المهم الحاج شمر جلاليبته من ناحية كراعو اليمين حتي ظهرت اطراف العراقي من الداخل و حبد العرافي نامن و وصل الجيب و اخرج الجزولان منه

بدء الحاح في فك الدبارة التي احكم ربط الجزلان و من ثم فك الطوطوة حتي استبانت مؤخرته من مقدمته و اخرج الشلن كما يخرج شباب اليوم السفة من كيس الصعوط المطوطو ... المهم ناوله حق الركوب و هو يسخر منه شيلو كان بخلوه ليك و مافي كمساري بنا ليهو بيت من الكمسرة و شد الحلل و دق الصاجات

و ينقسم المساعدين الي عدة انواع اهمها

مساعد السواق الرئيسي البشيك علي الزيت و غسيل العربية في البحر او الموقف و بغيير الاسبير و خلافه ودا يمكن يترقي و يبقي يوم من الايام سواق

مساعد الحلة و دا شغلو يسوي الاكل و الشاي ودا ما ببقي سواق زيهو و زي الشيال ما ببقي فنان

[align=center]

[/align][/size][/align]

مرسل: **الثلاثاء 2014.7.8 8:24 pm**

[align=center]

الكمننجي

ودا ليس بتاع الكمائن كما يظهر ولا عازف كمان انما هو بايع الكمونية ( العفشة ) و هو دخل السوق في زمن دخول سوق ام درمان زي الزووول البقع ليهو اللوتري في الزمن دا

التاجرة فن و شطارة الا تجارة الكمونية لانها زبائنها هم الاشطر ...بعد ان يقوم الجزارين بشراء البهائم و اللحم المختوم عليهو باشراف وزارة الصحة و البيطرة ... بعد ما ينهي الجزار تفريع اللحم يخرج العفشة و يختها في الوطا وهي برط الي ان يجي تجارها و بيعها عليهم و يقوم الكممنجية بفرشها علي قارعة الطريق فوق شوال و الضبان ينونوي فوقها و طبعن ديل اهم زبائن الكمننجية هم شريحة شاربي المريسة بصفة خصوصية و الحتالة و الشماسمة من السكرجية الذين لا يستطعيون شراء الزند و اللحمة النضيفة

الكمننجية ديل قالوا الشغلانية دي بالرغم من وضاعتها و حقارتها الا انهم حققو منها عائد مجزي و العهدة علي الراوي يقال ان الاسر الرسمالية الظاهرة الان قالوا جدهم ساعة دخل سوق امدرمان اباضو و النجم و قالوا ادين العفشة من الجزارين وفرشها و الان خلد اسمه بينما الجزارين ضاعو ساكت

[align=center]

[/align][/size][/align]

مرسل: **الثلاثاء 2014.7.8 8:26 pm**

[align=center]

ست النطاعة و حاجات تانية

دي السعافية البتسوي البروش و المصلايات و الطباقا و المقاشيش و النطع حق الدوخان

المراة دي دائمن تستهدف النسوان الدايرات يطهرن اولادن و بناتن عشان تجيب برش الطهور و طبعن المصلايات زمان الطلب عليهن قليل و بعدين ما بتقدر تطلب فيهو قروش زائدة عشان بتقول انا ذاتي كايسة الاجر حق الصلاة و كتير بهدوهن ساكت صدقة جارية

اما النطع حق الدخان موضوعو موضوع حجز يعني المراة في الشهور الاخيرة بتقوم تخفس لعند المراة البتضفر و تقوم توصيها تعمل ليها برش وصاية مصبوغ بالوان زاهية و نطع وصاية للدخان و يتم تنفيذ العمل مع بداية الحاجة الفعلية ليهو و بعدين المراة الشابة بتقوم تديها ريال اب عشرة قروش كدفع مقدمي و عند الاستلام تكلم ليها الباقي

المراة البتسوي الحاجات دي لمن تقبض المقدم تدخله المحفضة و تبقي جاهزة عشان تمشي تتقضي من السوق بشراء المواد الاولية من السعف بانواعه واحد للضفيرة و ااحد للزينة و الصبغة و غيرها و اشياء اخري كتيرة

اها المراة البتضفر شكلها زي نظام الترزي بتعلق الحاجات الخصلن للعرض يعني لمن يجهنا الزبائن الجداد يلقن عينة شغلها معلق ... النطع حق فلانة و البرش حق فلانة بت فلان و هكذا زي الترزي معلق جلاليب كوتار وما عندو فيهن فت جلايبة و تلاقهو لابس عراقي دايب

و بعدين المراة الشغالة ضفيرة نلقي عندها ادق الاخبار العائلية و خاصة كان حيتها نصت نهار و لقيت الجبنة قدامها
دي بالذات ممكن ارجع ليها تاني كان مافي زوووول جاب اضافة و اتمني الاضافة لان هذة المراة تدور كنز معلومات و اسرار ومهنتها فيها الكثير المنتجات طباقة الاكل المقاشيش و الكثير

[align=center]

[/align][/size][/align]

مرسل: **الثلاثاء 2014.7.8 8:27 pm**

[align=center]

بتاع المراتب
زوووول يتميز بسعة البال وكتم الاسرار الناس دائما تتماشا معاهو و ما قاعد يحاجج كتير اي حاجة سعرها محدد و يجب ان يكون مقبول و كان ما عجبك شيل صونان اولادك و كمان بناتك و شوفلك محل تاني تنفوضو فيهو ... عشان الزوووووول لمن يقصد بتاع المراتب يجي مطاطي الراس و يلقي التحية و يتجمل فيها بالسؤال عن العقاب و الاسرة و حتي السؤال ان شاء الله البلد مطرت عندكم و بتاع المراتب يضرب بعنف في القطن و يتطاير منو البعض و يرد بتثاقل علي الزبون الذي عارف انو ما جابو ليهو الا الشديد القوي عشان كدي المطايبة دي مي لله و كتير ما يمر هذا الزبون امام محله دون ان يلقي التحية حتى برفع اليد ... وهنا يقف المنجد عن الضرب و يسال الزبون عندك شنو ؟؟؟؟؟

عندي مراتب الاولاد النجنها عامنول مساميرها انحلن و اتهكت و قماشها انهرد

المنجد عندك قماش مخيط اولا ما عندك عشان اولادك ديل الدمورية بتاعتي ما بتفع معاهم

يبدا المنجد في تحديد قيمة القطن الزائد و سعرو و القماش و شغل الليد ويعاود ضرب القطن مرة تانية بينما يستدير الزبون كم لفة كدي و يحك جبهته و راسو مستعطفاً المنجد ان يرخص له شوية من القيمة

بتثاقل يرد المنجد والله انت بالذات انا مقدر ظروفك و كان ما انت الشغل دا ذاتو ما بستلمو لانني والله مزنوق و عندي شغل ناس كوتار

تحصل الموافقة الغير مشروطة و يتم الدفع الاول

يضع المنجد وراد المراتب المحتاج تجنيد اولن في الشمس عشان رئحة الصونان تخف شوية خاصة صونان الصبيان الفوق سن العاشرة ولسع ببلوا دا بكون مسقي المرتبة من كل الاجانب و سبب رئيسي لاهتراء القماش حق المرتبة و كذلك صنوان الفتوات رضو كريهة الرائحة لكن اكل العيش صعب

بعد استلام المراتب من المنجد يحرم الاولاد البوبلو في النوم عليها و يفرشو ليهم ملاية و مخدة و توضع المراتب المنجدة في الصالون لحين من الزمن ثم ياتيها البول من حيث لا يدري الابوان و تدور الاتهامات بين الاولاد والصباي

[align=center]

[/align][/size][/align]

مرسل: **الثلاثاء 2014.7.8 8:27 pm**

[align=center]

برد جوفك يا عطشان

غالباً الذي يمتهن بيع الموية لا تحتاج الي كبير راس مال يعني صفيحة زيت وغالبا ما يشتريها من تجار القطاعي بتاعين الزيت و كم كوز من دكاكين ناس ابومرين .. ياخت الموية من اقرب ماسورة صيلية او دكان جملة او مطعم و غالباً ما يكون مطعم حيث يحفظ لوح التلج الموضوع في شوال خيش و حولة نشارة الخشب في ركن قصي من المطعم لعلاقة مع احد الجرسونات و دائمن ناس الموية و صبية الجرايد و بتاعين الكيك و الباسطة بكونو نظام شلة

من المقولات المسنودة التي يرددها اهل السودان ان سقاية الموية فيها اجر عظيم و عشان الزوووول الببيع الموية غالباً ما ياتي من اقاصي الاقاليم التي يمتهن اهلها الرعي و بما انو بايع الموية لا يملك حرفة من حرف اهل البندر تدر لها دخل فانه يجد ان مهنة بيع الموية هي المهنة التي تناسبه و توجد غيرها الكثير من المهن لكن لضيق الافق و المسكنة يلجاً الي بيع الموية حتي يقيم عوج بطنه و يجد ملجا يسكن اليه

تبدا المهنة من الساعة التاسعة او العاشرة صباحاً حينما تبدا اللواري القادمة من الارياف تجلب الخضار ويحتاح الناس الموية و يبدا الصياح بكلمة برد و يضرب الكيزان مع بعض للفت انتباه العطشي ولكن الان الكيزان هم الذين يضربون الناس ببعضهم .. المهم خلينا في مهنة الساقية الصفيحة التي يطفو عليها فقشة تلج و تغطي بقماش ساكوبيس خفيف للغبار

يصيح احد القادمين من الارياف لبتاع الموية و يتحلق حوله زوجته و اطفاله مستظلاً باحد بلوكانات السوق و امامه كم بقجة مشريات و قفاف فيها ما لذا و طاب و بلمحة البرق يلبي بتاع برد النداء و يبدا مناولة احد الكيزان رب الاسرة الذي اولن يبدا ببصق السفة وياخت جوغمة موية يزيل بها ما علق من اثار الصعوط من فمه و يناول زوجته كوز تاني و هي التي تبادر اولن بسيقاية رضيعها و بينما يتدافر حولها ابنائها الاخرين طالبين السقاية و هي تنتهرهم طالباً منهم الصبر حتي تسقي اخوهم الصغير اولن و تناول الكوز بعد ذلك لباقي ابنائها حتي يتم يروي جميعا و بتاع برد ينتظر و بطبيعة يقبل اي مبلغ دون محاججة و يمشي لزبون اخر

المتعارف عليهو ان سعر الكوز تعريفة لكن الفريني ( اب قرشين )كان يسقي اكثر من خمسة اشخاص كل واحد يشرب نامن يقول بس

[align=center]

[/align][/size][/align]

مرسل: **الثلاثاء 2014.7.8 8:28 pm**

[align=center]

لياسة الزبالة

حنيني لبيوت امدرمان و حيطها المزبلة و اخلتها التي تمنع الغنم المهيمة من الحك علي الحيطة و بالتالي ازالة الزبالة التي دفعت فيها مبالغ مقدرة و مجهود عظيم ... هذا المهنة مع قذارتها تشرفت بمزوالتها

تجمع هرار الغنم و البقر و الحمير و ان شئت قول بعر او ورث بدل هرار و بمقدار لوري لبياض البيوت بالزبالة و يضاف اليها لوري فودة و رقيطا و تخلط جميعا مع بعض خلط يدوي بالمعدات المتاحة مثل الطواري و الكورايك و غيره و بعد هذا الخلط تحاط بسور من تراب حتي لا تذرفها الرياح او تصلها مواد شائبة ( (اخري حتي البعر داير يكون نقي في اصله و يرفض الاختلاط باشياء اخري تفسد عليه ميزاته التي حباه اياه الله جلا و علا وبالمناسبة افضل انواع البعر هو بعر الحمير يتميز باللزوجة و التماسك شوفو الحكمة يعني المخلوق دا بالرغم من انه وسيلة نبز لبعض الادميين و لكن والله الحمير دي كان اتكلمت اول حاجة تصدر بيان شديد اللهجة بتشبيه بعض الادميين بها .. المهم يتم تسقية هذا الخلط بالماء جيدا و يتشرب الماء بدون ان يسيل منه الماء و يترك فترة يوم اضافي بعد الاربعة ايام و تلك خمسة كاملة و بعدها ياتي الزبالة بالطواري و عجن المخلوط و طبعا اول طورية يتم غرزها في احشاء هذا الخليط تصدر منه رائحة عفنة لدرجة تجعل النسوان و الافندية يتغزوز بينما يتعايش الاخرون مع هذه الرائحة وهم يعنجون الخليط خلطا جيدا مع اضافة ماء زيادة عشان يسير زيهو و زي خلطة الاسمنت الحالية و ينقسم الزبالة الي تلاتة مجموعة

مجموعة تعجن وتضيف الماء اذا لزم و العجن يتم عن طريق الدك بالارجل بتحريكها اعلي و اسفل كانها خطة ثابتة بتاعة العساكر و استخدام الطواري

مجموعة تغرف و تشيل الخليط بالجوز الخشبي الي المعلمين

المجموعة مجموعة المعلمين الذين يستخدمون المحارة و الطالوش في عملية اللياسة او البياض او كما يقول المهندسين بلغة الانجليز بلاسترينغ
Plastering

دائما يلجا الجماعة الي بياض او لياسة حيط الجالوص بالزبالة قبل موسم الامطار ... و سبحان الله البيت الجالوصي يتم يتم حمايتة بالزبالة من الامطار و غيرها من عوامل تاكل الجالوص ياخد شكل جميل وزاهي و يكون اخضر مع رمادي داكن في ايامه الاول حتي ياخذ اللون الفضي بعد مضي شهر او شهران

اللياسة باستخدام الزبالة من فنون العمارة السودانية التي يجب ان يسجلها التاريخ يمكن تكون مستخدمة في مورتينايا او تشاد لكنها فني الزبالة في السودان هم الاجدر ولهم بصمة خاصة

ما زالت بيوت الجالوص موجودة لكن اختفت الزبالة و استعيض عنها بالاسمنت و السلك اي ما يعرف بالطرطشة و هي فعلن طرطشة

الزبالة هم اولاد اعم الطيانة في الصفات و الاشتراكية في العمل يمتازون بالسماحة و التواضع الجم .. و يوم الزبالة دا زي يوم النفير ست البيت لازم تستعد بالاكثار من عمل الكسرة بشتي صنوفها و الملاح لازم يكون كتير و كمان تجيب ملوة بصل غير مقطع حيث يستخدم الزبالة ايادهم الغليظة في تفقيش البصل بضربه فت ضربة و بعداك بس يتناولة الفقش المتناثرة الي الخشم و يلوكها مع اللقمة الحارة و طبعن لازم يكون في ملاحة ( جوز اواني واحدة ملح و التانية شطة ) والشطة لازم تكون قبانيت

[align=center]

[/align][/size][/align]

مرسل: **الثلاثاء 2014.7.8 8:30 pm**

[align=center]

الحداحيد

ديل جزء اصيل من ناس مهنة الحدادة لكنهم متخصصين في صناعات معينة

الساكين بشتي انواعها و سكين ضراع خاصة

الطواري باشكالها و انواعها المختلفة

الملايد

يعني باختصار كدي اي حاجة تخص الزراعة و المزارع في شخصه و امهر فني هذه المهنة هم قادمون من منطقة واوستي شرق النيل

يعني مثلا كان داير لك سكين ضراع تضبح يم و تكون وصاية و حديدها حور تقوم انت تجيب ليك جزء من حديد فلنكة مثلا بطريق مشروع او غير مشروع المهم تجيب الحديد و تقوم توديهو لي الحداد زي ما الزوووول بشيل قماشو و بيوده الترزي بفصل الحاجة العايزة كان عراقي كان سروال كان شوال للستات ايام بلبسن الشولات و الترزي بعاين ليها ساكت بحدد المقاس من اول نظرة او كان عندها شوال عاجياه بتشيلو مقاس و استايل

المهم الحداد يستلم الحديدة حقت الفلكنة من الزووووول و يحدد ليهو مقاس السكين و النفشة المطلوبة و عود السكين يكون كييف و غالباً ما يتم تزينه في نهايته بعملة فضية او تعريفة او اي قطعة فضة حورة ...

حسب حجم الحديدة حقتك يتم تصنيع الاشياء المرغوبة و غالباً زبائن الحداد هم المزارعين و الرعوية و يحتاجون الساكين و الفراير ( مفرده فرار ) او طورية و هذه الاشياء غالبا ما يكون حديدها حديد جيد اما سكاكين البصل و الكزلك و الملود و البربندي ديل حديدهم بيكون حديد درجة تانية او تالتة او رابعة و البربندي هو الوتد الذي يدق في الارض و تربط فيه غالباً الحمير لانة بيعكم عكمة صاح و التيران و البقر اما الحيونات التانية زي الضان و الماعز ديل يتم ربطهم علي اي شي بيمسكها

المهم الحداد دا بيستعمل النار في تسيخين الحديد جتي يتم تطويعه و تشكيله حسب المطلوب مع الطرق الشديد ... و مافي زووول نصيح بيجاور الحداد خوفاً علي طبلة الاذن من الفتق و كذلك مهر هولا الحدادين حتي في صناعة الالات زراعية اكثر دقة فيما يختص باعمال الحراثة مثل الموحرات و هلب المركب و قد فاق بعضهم و صنع بعض اسبيرات التركرترات الحديثة في ذلك الزمان

يفخر شباب ذلك الزمان بسكاكين الضوراع التي تستخدم فقط في اعمال الذبح و كان داير تزعل احدهم استعملها في قطيع البصل فان ذلك يعتبر اهانة ما بعدها اهانة و يقولون قطيع البصل يقلل من حدة السكين و كذلك يصيبها بالصدا و الواحد يفتخر يقول سكيني دي دق فلان اي الزووول اي اسم الحداد الصنعها و شهرته في المنطقة

[align=center]

[/align][/size][/align]

مرسل: **الثلاثاء 2014.7.8 8:30 pm**

[align=center]

العطارات

الماشا سوق ام درمان وما غشا عطارة التيمان دا يعتبر تسوقه ناقص ولا يحصل الا من الروجال اصحاب القلوب الغليظة اما القوارير كوبارن و صغارن لا يكتمل تسوقهن الا بزيارة عطارة التيمان و اصوا الماعندها قروش لازم تشتري بخور التيمان البكف العين و الذي يطلق ساعة المناسبات السعيدة كان عرس كان طهور ... يعني في مناسبة الطهور من الصباح تقوم ام اولاد الطهور بتفريش البيت و تزيينه و تقوم الحبوبة تشيل المبخر الموخمج و تطلق فيهو بخور التيمان تحوم الاركان وهي تدعو بالنجاح و الفلاح و تتعوذ و تسال الله خروج العين العنية و الكافرة النصرانية من الدار كان دخلت بالجمعة تمرق سبتاً و كان دخولها سبت الاحد يكون مروقها يعني يوم واحد ما تزيد منو

كذلك من بضاعات التيمان المشهورة لنسوان الزمن داك المصاصة و الرضاعة حقت الشوفع يعني كانت صيدلية لوزام طبية برضو و ادوية عشبية منها المحريب و الحرجل و حاجة كدي نسيت اسمها يستخدموها للطفل المحلوق بعد يتم تسنيد فقره و الجرتق

كذلك الناس الشيوخ و الفقرا الفاتحين عيادات الاعصاب و الجن ديل كمان عندهم حاجات زي اللبان الضكر اشياء اخري تتوفر فقط عند التيمان وكل مستهلكات فتح الكتاب من بخور طارد للجن و جالب للحظ و السعد

التيمان عطارة و تشاشا معظم البضاعة موضوعة علي طشاتا و الاخري في قوبر و برطمانيات و عندها رائحة نفاذة تشمها من اول الشارع علي بعد خمسة عشر متر

[align=center]

[/align][/size][/align]

مرسل: **الثلاثاء 2014.7.8 8:32 pm**

[align=center]

نساج العنقاريب

حليل الروجال البكسرو العنقاريب و حليل الروجال البيوسرو العنقاريب

العنقريب مفردة دائما لها في نفوس السودانين حزن دفين لما لها دلالات و ذكريات ومالات ماضية حزينة بالرغم من فائدتها بمجرد ان ذكر العنقريب طوالي تنط الي الذكري الدفينة صورة مروق عنقريب الجنازة و ما زال اهل السودان يستخدمون العنقريب في شيل الجنازة بالرغم من النطور في وسائل النقل و ساعة مروق عنقريب الجنازة بعد الغسيل يتبعها الثكالي و الارامل و المكلمومات من النساء بالصياح و العويل و الدمع السخين حتي خروجها من باب الحوش مع نهير و زجر كثير من الرجال و لكن ليس بعد الفجيعة في عزيز مخافة او تقدير لحي

العنقريب ابو مروق و كراب مهما اسدي الينا من جليل خدمة فيظل هو الذي حمل النعوش دون اوبة ومعها كريم الخصال و كلمة الليلة بالرغم من انها مفردة تطريب في شعر الحقيبة حيث كثيرا مانسمع الليلة هووووووي يا ليل و الليلة هوي يا ليل و كذلك اغاني البنات الليلة وين يا عينا و عجبوني كالو العين يا عينا انا و كذلك مديح المصطفي عليه الصلاة و السلام بيقولو وكت اليل ما جن ناس ليلي جن ... لكن كل ذلك الشدو بالليلة سرعان ما تغادر محطات فرحه بينما تقيم الليلة ووووووب و الليلة في الوجدان القريب للسوداني تتاوره في احيان متقارية وكثيرة

نساج العنقاريب رجل يحمل فن المهنة في اصابعه الذهبية فقط لانه لا يستخدم الات كثيرة غير عود الخلال الخشبي الذي لا يتعدي طوله العشرة سنتمرات و مبري والداي ميتر بتاعو برضو سنت ونصف السنت تقريبا و مخلاية يحمل فيها اعواد منجورة في شكل سبائك واحدات في شكل مربع و وحدات في شكل مستطيل في حجم حبة البسكويت يستخدمها في تثبيت مروووق العنقريب عندما تكون مخلله قبل بداية عمل النساجة حيث يتعرض العنقريب لعملية تحريك ونقل مستمر يعني في الصباح يستخدم العنقريب داخل الاوض و الكشاشات و البرندات و لكن عندما يخت طل العصر يستخدم العنقريب في فناء الحوش و هذه الرحلات و الشيل اليومي في تحريك العنقريب تؤثر في خللة المروق عند دخول طرفها المبري في فتحة كراع العنقريب و تستخدم هذه القطع الخشبية التي يحملها نظام ورد في اعادة احكام تثبيت المرق في الكراع
كذلك يحمل النساج في مخلاته قدوم لزوم اعادة تسوية المروق و قطيع الحبال القديمة ... و زي ما قال الشيخ فرح ود تكتوك عندما سئل هل الشقاوة بتقصر العمر ؟؟؟؟؟ اجاب كعادته اجابة العارفين التي فيها التورية ان قال والله انا غايتو شايف باب الغصن البتسخدموهو قفل للزريبة البهائم بكمل قوبال باقي هيكل الزريبة و دا كناية في كثرة الاستخدام بهلك الحاجة قبل اوانها والشقاوة استهلاك لطاقات البني ادم ... و اول حاجة في نساجة العنقريب بتخرب و تنتهي هي الكراب وكما هو معروف محل الزووول بختو الراس و المخدة يعني و زي ماقالو الراس و ماحوي ومعظم الرسين تقال و في ناس تانين بنومو عكس و بختو اكادريهم و ضفورها الطوال محل الكراب و عشان كدي الكراب هو اول الخارجين من الخدمة و تدوب حبالة وتتقطع قوبال باقي حبال العنقريب التانيات

النساج زووووول ماهل يبدا اول بنظافة العنقريب من الحوبال القديمة ثم يبدا في تربيط هيكل العنقريب حتي يكون في قمة الاستواء و لو جيت قستو بميزان مويه لما وجدت فيه انحراف ثم يبدا بتجميع روبط الحبال و فكلها وضع الاخلة في الاركان عشان الميزانية تكون ماية الماية وتبدا عملية النساجة بعمل شداد الكراب و ومن ثم تربيط الحوبال العرضية و الطولية بمقاسات دقيقة عشان تدني اشكال هندسية و زخرفية كمان و برضو هو يستخدم الماء في تطويع الحوبال اثناء شغله

[align=center]

[/align][/size][/align]

مرسل: **الثلاثاء 2014.7.8 8:34 pm**

[align=center]

الطباخين

و دي مهنة جديدة علي ام درمان ظهرت في اوجها في بدابة عهد النميري مع الطفرة الاقتصادية التي احتاحت البلاد عندما حارب النميري الطائفية التي كانت هي التي تستاثر بهذه الخدمة و هي التي تحتاجها فقط لان احفاد شيوخ الطائفيه هم حرصو ان يكون وضعهم مغايراً لوضع عامة الناس في طبيعة الاكل و طهيه و كانت عندهم القصور و السرايا والطباخين فقط ... لان عندما بدات مايو حمراء شيوعية بصراحة ارست كثير من قيم العدل و المساوة و هذا سبب محاربة الاسياد لها و كسبت الرهان لانها انحازت الي الشعب و ما زالت عامة الشعب ينتشون وهم يرددون مع الفنان وردي الله يرحمه لا للرجعية لا للرجعية و انداح التعليم و اتيحت الفرص الوظيفية بالكفاءات فقط لا بالانتساب للاسر التي توارث احفادها حكم السودان

هذه المقدمة فرفرة مذبوح يصعب علي السودانيون طردها عندما تاتي في سياق الموضوع ولا نكتفي بالاشارة اليها انما نغوص في اعماقها حتي نتذكر ان الموضوع مختلف وعندها نكون وصلنا قريب النص و ما زال للحديث بقية

طبيعة الاغلبية من ابناء ام درمان تعودوا علي وجبات محددة و محصورة و كانت اطباق شهية علي قلتها و متاحة لكل الاسر و كانت النساء تدربن علي عملها فقط و هي كسرة و الملاحات المعروفة لدينا حتي الان ورق - قرع - ملوخية - بامية - ساساي و هو الفاصوليا الفرك - ملاح الروب - ملاح اللبن و الشية و المرارة فكانت اغلبية النساء تجيد طهي هذه الاصناف اما الاصناف الحديثة مثل المحاشي و و الصلاطات المختلفة و الخشاف و الكستر المزين و المزخرف فكانت لها قلة من النساء يعرفن طبخها و غالبا يوكل اليهن عملها في المناسبات و تلقاهن جايات من اثر سرية و فيهن شوية طنقعة و تعالي علي بقية نسوان العجن واللخيخ التانيات و هولاء القلة يتلقاهن محل احترام و تقدير من الكل عشان بيعرفن يذوقن الاكل ودائمن صرات وشهن عندما يشفن ان اكلهن يتم تناوله بطريقة فجة و فيها قجارة

زمان زي ما حكو انو قالوا الطنابرة كانو متعزين شوية و شايفين روحهم علي الفنانين وبحكم انو ما ممكن للفنان الاستغناء عنهم الامر الذي جعل الفنان كرومة يفكر في تمزيق فاتورة الطنابرة و استعاليهم بابتداع طريقة غناء الحقيبة .. كذلك بدات حركة المجتمع في ايجاد من يقوم من بمهنة الطباخة الحديثة و بما ان شغلانية الطباخية مهنة كانت فقط محصورة علي النساء و ينفر منها الرجال بحجة انها حاجة انثوية لا تليق بهم

الحاجة ام الاقتراع قالوا بدا ظهور الرجال في مهنة الطباخة الحديثة في المناسبات وللامانة سمعت انو الذين بدوء هذه المهنة من المتحضرين الذين سافرو برا واشتغلوا في الفنادق و الناس الكانو في مصر و ناس السفن و البحارة وكان لابد من تطعيم هؤلاء المعلمين بكوادر مساعدة من ابناء ام درمان فكانت الدهشة ان الذين معظم الذين ولجو هذا المجال هم يسمونهم الان الجنس التالت و الذين اكثرو من مجالسة النساء و تطبعوا بطبعهم في طريقة الكلام اللين و المياعة و بعدين للامانة المجتمع استطعم اكلهم لما يتمازون به من صفة النظافة الشخصية فكان المجتمع يسخر منهم و لكن اكلهم كان قمة الروعة ... كانت المحاشي و الكاستر المكرونة التي توضع تفريشة للضلع والجرير الاخضر زينة للاكل و صلطةالروب بالعجور وحاجات تانية كتيرة

[align=center]

[/align]
[/size][/align]

مرسل: **السبت 2014.7.12 9:05 am**

يعنى كل المهن دى بقت حكر على ام درمان بس ..!!؟ :yar:

موضوع لذيذ .. عرفت منو حاجات كتيرة ..

كتر خيرك يا ناجى .. ومزيد من المواضيع المفيدة ..!!؟2

مرسل: **الأربعاء 2014.12.24 10:24 pm**

.. لمحة امدرمانية
كلام ناس امدرمان ...
بقلم شوقي بدري

يكرمني اخي الاصغر علي فوراوي بتلفونات من لندن. وينشط ذاكرتي بأحداث و ذكريات. وذكرني في احد المرات بما كتبت عن ما حدث في ليلة رأس السنة 1984-1985 . فلقد قضيت الليلة مع السويديين الذين كانوا يعملون معي, في الشقة التي جهزتها لهم في الامتداد-الخرطوم. وعندما حضرت في الصباح الى, امدرمان دخلت البيت قائلا صباح الخير. وكان الرد من اختي نضيفة صباح الخير يا زايع يا عايب يا خايب...كيف تنوم بره بيتك

وقتها كان لنا مكاتب في باريس والامارات ولندن وكوبنهاجن وسويسرا. ولكن هذا لا يشفع لان تنام خارج امدرمان. فعندما اعتذرت بعدم وجود البنزين. كان الرد.. تمشي بكرعينك وكان غلبك تحبى بالواطه. وتنوم جوه بيتك هنا في امدرمان . وتاني ما في ليك مرقة بعد الساعة عشرة..ولقد كان. وكانت تلك اول مرة وآخر مرة انام خارج بيتنا او امدرمان.

اخي علي فوراوي قال انه عندما وصل في اجازة الى السودان قال لزوجته السودانية التي من الخرطوم ,عندما استعد للخروج في المساء وسألته ماشي وين؟ .قال لها انا امي وصتني من زمان ما انوم برة بيتنا ماشي امدرمان.

الاخ علي فوراوي يحكي لي انه عندما يذهب لامدرمان, يذهب لزنك اللحمة وزنك الخضار وسوق امدرمان القديم. وفي احدى المرات سأل احد الجزارين... الاخ من وين؟..فقال الجزار انا من تلاته اربعه... وعلى شفتيه ابتسامة وفي عينيه نظرة امتحان. فقال علي انا من اتنين اتنين..وضحك الاثنان. وسقطت الكلفة بينهما وتوصلا كاخوين. فهذا هو تقسيم امدرمان القديم ..ارباع وحارات. وهذا ما نسيه الجيل الجديد. وكانت هنالك قطعة حديدية سوداء اللون عليها نمرة على باب كل منزل في امدرمان..ومنطقة اتنين اتنين هي منطقة شرق السوق
..

في سنة 1956 كنا نجلس تحت اللمبة في شارع الركابية غرب شيخ مرسي. وهذا الشارع ياتي من قلعة صالح جبريل ويعبر شارع الوادي وينتهي بشارع كرري. وكان معي الاخ محمد دوكة, وهو من ظرفاء امدرمان وجاري عبدالله دواي واحمد البشير وشقيقه محمود البشير ومحمد مكي ويس مكي الذي صار طبيب اسنان في الشارقة وغريب الله كاورو الذي كان صبي حداد. و والده شيخ الدباغين في الدباغة.
وكان بعضنا يضقل بكورة الشراب. فأقترب منا ثلاثة من الشباب وسالونا. من هم الهلالاب؟ ومن هم المريخاب؟. وكانوا من الهلالاب. واشادوا بالهلال وعظمته. ونحن الذين كنا في معسكر المريخ , عوملنا كمساكين. والشاب كان يقول لنا مافي احسن فريق من الهلال ونحن المريخاب يجب ان نغير انتمائنا . فنظر اليه محمد دوكة بإستخفاف واشار للحائط . وقال المكتوب في الحيطة ده شنو. وكان مكتوبا على الحائط 9/1 . وتعني المربع الاول الحارة التاسعة. وكان هذا مكتوبا بالجير بأرقام ضخمة لزوم عملية التعداد . والذي كان اول تعداد في السودان . واذكر انه كان مكتوبا في الصفحة الاولى في جريدة الايام تعداد السكان 12.232000 نسمة .
ولم يفهم الشاب الهلالابي الامر في الاول. الى ان شرح له محمد دوكة ان فريق هونفيد المجري قد فاز على الهلال بتسعة مقابل اصابة واحدة سجلها السد العالي سليمان فارس. ولم يحتسب الحكم اصابتين دخلا شباك سبت دودو.
المريخ ابلى بلاءا حسنا والنتيجة كانت خمسة ثلاثة. ولقد اشاد فريق الهونفيد الميجري بقيادة الكابتن بوشكاش بأداء المريخ . وهنالك لوحة بهذه المناسبة في نادي المريخ. والهونفيد كذلك لعب مع فريق الاتحاد في مدني. وكانوا سعداء باللعب في مدني لان استاد مدني كان منجل. ولم يكن هنالك نجيلة في دار الرياضة في امدرمان. واستاد الخرطوم لم يكن قد شيد بعد. المجر بهدلوا الفريق القومي الانجليزي وهزموهم بستة اهداف. مما جعل رئيس الاتحاد الانجليزي يمنع اشتراك الفريق القومي من الاشتراك في اي ماتشات دولية لفترة طويلة. واظن ان رئيس الاتحاد كان ماكنتوش. الذي رأس الاتحاد لفترة طويلة.

مرسل: **الأربعاء 2014.12.24 10:24 pm**

.. لمحة امدرمانية
كلام ناس امدرمان ...
بقلم شوقي بدري
.

وفي اغنية يا استاذ بالقزاز, وهي اغنية شعبية امدرمانية بحق وحقيقة,. لان الاغنية الشعبية ليس لها مؤلف معروف. وهذه غلطة ، مفهوم الاغنية الشعبية. تبدأ الاغنية الكثيرين يضيفون اليها بعض الابيات ومنها.
يا بوشكاش التسعة كتيرة خلاص..
ويا بوجيك السد راجيك..

وبوجيك كان هداف الهونفيد المجري . مات وهو صغير السن..كما عرفت من صديقي يوسف المجري فيما بعد. ان اغلب اعضاء اسرة بوجيك يموتون قبل الاربعين. وبوجيك كان لقب الخال عبدالوهاب الحاج حمد والذي لعب لبيت المال والكراكسه. ثم انتقل للسعودية ورجع قبل فترة صغيرة.

الشاب الذي كان يحثنا للانضمام لمشجعي الهلال وقف محتارا. فقال زميله ضاحكا ..ياخي ديل اولاد ملاعين بعد كلامم ده تاني ما عندك كلام.

شقيق محمد دوكة الاكبر هو ابوطالب الذي كان (مكشكشا) ومحبوبا جدا في امدرمان . كانت منطقة المحطة الوسطى منطقة نفوذه. يركب الترام والباصات بدون ان يدفع. كان متمحنا في يوم من الايام فسألوه مالك يا ابوطالب...فقال له والله الواحد بس داير ليه غابة وبنقو وبحر مريسة وترماج...... وقطر......

وناس امدرمان كثيرا ما يقولون والله لو لقيت طلب ابوطالب...
زميل الدراسة وصديقي الدكتور عمر العبيد بلال الذي صار وزيرا في حكومة نميري. تزوج من الآنسة داشا سكومالوفا. ولانه كان قد اكمل دراسته ورجع الى السودان, فلقد ارسل توكيلا لي لإكمال الزواج. وفي مكتب الزواج الذي يدعو الى الرهبة, وهو مبنى عتيق له مئات السنين سالتني المسؤولة عن عنواني في وطني الاصلي فقلت لها منزل 990 مقسوم على
3-4
فطلبت مني ترديد العنوان. وعنما رددته قالت.... ووووووووو...هذه طريقة جميلة وحديثة للعناوين . فقلت لها هذه طريقة مر عليها اكثر من خمسين سنة. فقالت اذا كان عندنا هذا النظام في براغ لسهلنا العمل لساعي البريد.

زميلة الآنسة داشا كانت الرفيقة آلنا كلاشوفا. كن طالبات في مدرسة الهوتيلات. وعرفت منهن كيف يعرف الجرسونات حساب الزبائن والطريقة ان تقسم الصفوف الى أ.ب.ت....الخ والطولات 3.2.1 ....الخ. في امدرمان والمقاهي الشعبية هنالك اشارات بين الجرسون والمعلم. وكنت تسمع ( لبس تكسب 17 قرش ). (كرشليق 6 قروش) (جناح امجكو9 قروش) والكرشليق هو الجلابية ابوزراير
جناح امجكو الجلابية الانصارية الضخمة. لبس تكسب الجلابية جيب ورا وجيب قدام.
وتسمع كذلك ربع الدستة 21 قرش . وهذا عندما يكون الآكلين ثلاثة. او كارب صليبو. للذي يلبس الحزام. او قالب كمر. لصاحب الكرش. او يقولون ابو تلاجة. ولشخص ممتلئ قد يقولون جري الفيل 3 قروش. ويستمر هذا الوصف حسب الظروف والاوضاع. وهذا طبعا يقال همسا للمعلم. والجرسون ماشي في طريقو...فيعرف الملم الحساب والشخص, حسب هذه الاوصاف. وحسب الظروف. مثل ابو طاقية وابوشال.

سمعنا قديما ان العم بيطار الذي صار من اغنياء السودان, كان من سكان امدرمان. وكان ساعي بريد في امدرمان. ولقد ذكرت في حكاوي امدرمان, ابراهيم البوسته الذي كان قليل الحجم وكان يطوف كل امدرمان. وعلى رجليه. وعلى رأسه شال ضخم ليقيه من الشمس. ويعرف كل اهل امدرمان حتى الذين رحلوا. والبريد كان يأتينا قديما ..امدرمان منزل ابراهيم بدري, بالرغم من اننا انتقلنا الى كل احياء امدرمان..

في كتاب حكاوي امدرمان هنالك فصل لكلام ناس امدرمان. وقلت فيه..مع ناس امدرمان لازم تكون ناقش. وما طاسي. والكلام حتى في داخل امدرمان يختلف من منطقة لمنطقة..وممكن ناس الموردة يتكلموا بطريقة, انو زول ودنوباوي او بيت المال ما يكون عارف الحاصل شنو.

عندما طلب كمال سينا من ابن حيه وصديقه جعفر نميري فلوسا . اعتذر النميري الذي كان ريئسا بأنه ما شايل معاهو قروش. فأشار سينا لدكتور بهاءالدين الذي كان يرافق النميري كل الوقت . فقال سينا (طيب ما تشوف باب الله). والعم باب الله كان مرافقا للسيد عبدالرحمن المهدي. كان يحمل شنطة الفلوس. وينفذ طلبات الامام. ابنه كان زميلي في مدرسة بيت الامانة والاحفاد الثانوية. هذه الملاحظة قد لا يفهمها شخص لم يرتبط بالانصار او ودنوباوي..

عندما كنت جالسا مع بض الاصدقاء في العباسية , سمعت احدهم يقول (نقوم نمشي القماير) . فأردت الانصراف. وانصرف شخص آخر . فنادوني وقالوا لي... مالك انت يا زول ما زمان كنت بتفهمها طايرة ...انحنا ما ما شين اي حته. لكن زهجنا من الزول الجا حقنا ده بي وشو المحفر ده. و القماير قديما اشتهرت بالحفر.

بكلمة واحدة يفهم الآخرون. فعندما يقولون كريت. يقصدون الذي اطال الجلوس او الاقامة وهذا اشارة الى المعزة سنية واختها كريت. حسب كتاب المطالعة في الاولية. فعندما اخذت سنية اختها كريت الى
( المرعى الجيد (كريت ابت الرجوع الى البيت

مرسل: **الأربعاء 2014.12.24 10:25 pm**

.. لمحة امدرمانية
كلام ناس امدرمان ...
بقلم شوقي بدري
وعندما يقول انسان ..والله ما فضل لي الا امشي اقيف تحت الصاري, وهذا نهاية الامر والاستسلام وعدم الحيلة. في المولد يوصي الناس ابناءهم او رفاقهم قائلين ...انه في حالة انفصالهم في الزحام يجب ان يتجهوا الى الصاري مباشرة لكي يلتقوا بالآخرين. الصاري عمود عالي, بعلم وإضاءة يرفع في بداية ربيع الاول
وسط احتفال كبير . (ما انا برضو بنزل عكس ) او ( كلنا اولاد امدرمان وبننزل في الكشة). الكشة هي المحطات الطويلة التي ينطلق فيها الترام مثل كشة العصاصير بين مكي ود عروسة والمحطة الوسطى. او السينما الوطنية والمجلس البلدي. ولم اشاهد سوى صبي واحد ينزل عكس وهو محمود جاد الله. فمن العادة ان ننزل ونواصل الجري مع الترام حتى لا نسقط. ومحمود كان يقفز ووجهه عكس سير الترام. ولا يتحرك ابدا. شاهدته ينزل في محطة كالتكس في الركن الشمالي الغربي لجامع الخليفة فمنزلهم كان في مساكن المستشفى الارسالية ..التجاني الماحي فيما بعد. فوالده كان ممرضا في المستشفى.

( ده لو بكرة قام فتل ....لوموني ).
اخونا الحنان كان ممرضا .. وآل الحنان وكانوا يسكنون في فريق ريد وكان اهلنا الرباطاب كثيرا ما يحضرون مع مرضاهم للعلاج في امدرمان . وبعد حفلة لطيفة رجع الحنان في منتصف الليل وكان بعض الرباطاب في انتظاره. ولم يصبروا الى الصباح. واصروا على الكشف على قريبهم. وكما قال فالمريض كان متقطع النفس. وبالنظر الى داخل جفونه كانت... دبلان... ما فيها اي لون. وكان لا يتحرك. وبسبب التشدد والاصرار على معرفة رايه قال لهم... ده لو بكرة قام فتل لوموني.... واهلنا الرباطاب كانوا مشهورين بفتل الحبال . وكان ناس الموردة والعباسية يرددون هذه الجملة لاي امر حتى عربة قديمة او فريق كرة..

احد شفع الرباطاب اتى به اهله من البلد وهو مريض جدا وبعد فترة والمضادات الحيوية والعلاج بقى شديد وسمن واظنه كان من ضيوف العم الطيب الخزين الذي كانت تمتلئ داره بالزوار من الرباطاب. شمال غرب ميدان الربيع. فقام الشافع بنجاضة اهل الحي فساله احد اهل العم سليمان والد الاستاذ بدرالدين والمحامي غازي سليمان. فقالوا له انت يا ولد بترجع بلدك متين...فقال الولد برجع لمن اكمل رغيف امدرمان. واهل العباسية كانوا يرددون , عندما يسألون عن مواعيد محددة, زي ما قال شافع الرباطاب لمن يكمل رغيف امدرمان.
الرغيف قديما لم يكن معروفا في كل بقاع السودان , خاصة الرغيف الشمسي اذي نملأه بالفول السمح وزيت السمسم. (والطعمية . ويحكى ان البدوي سألوه ...يا عربي الرغيف بتعرفو ...فقال (بلحيل ود اعما لي ضاقو عمن اول

ويقول ناس السوق و ودنوباوي عندما يكون الامر مظبوط وكل شي تمام... (زي ما قال بشير الحلاق جوة وبره). فبشير الحلاق كان يحلق للزبون ويبيع الصنف ويقول نحنا بنوزن الراس جوه وبره.

والكلام يمكن ان يكون وليد اللحظة. ونحن جلوس في معدية توتي , ركب صاحب حمار. وكان جيب العراقي مقفول بسستة صفراء اللون. فقال صديقي عثمان ناصر, وهو ميكانيكي, لصديقنا رحمة الله عليه الزين قبور وهو ميكانيكي وحداد. شايفكم خليته لحام الاوكسجين.. لحامكم بقى ستلين. فقال الزين مباشرة ..ما الستلين حنين ما بكسر في الدقداق. ولحام الاوكسجين هو اللحام العادي بلون الحديد. اما الستلين فهو من النحاس وهو اصفر اللون. وواصل عثمان وكمان المكنة غيرتو ليها الشيالات. وكان هذا اشارة (للضناب) وهو السير الجلدي الذي يربط سرج الحمار مارا تحت ذنبه . وكان السير جديدا.

عندما انتقلت من شمال امدرمان الى منطقة العباسية اكتشفت ان هنالك اشياء كثيرة مختلفة. فأغاني الروك اندرول قد اثرت في مذاق شباب العباسية, خاصة بعد تكوين فرقة شرحبيل. وكانت المعارك تدار عن طريق الملاكمة. او ضرب الراس روسية . والركل في الاماكن الحساسة. وكان هنالك تعابير وكلمات غريبة بالنسبة لي . وفي كل منطقة في امدرمان هنالك تعابير محلية.

احدى الفتيات قامت بشتم شاب وانا لم اكن افهم اي شيء. الا بعد ان عرفت بعد تفسير انه كان يتكلم عن كنكنه. وعرفت ان الكنكنه هي البطيخ حسب كلام اولاد فريق فلاته. الذين كانوا يقولون للفول المدمس مررو. وكانوا يقولون ..يا زول شي تمام باي وتراي. ولان ابناء العباسية كانوا مهووسين بحمل الاثقال وكمال الاجسام والاشارة هنا ... لل بايسبت او ترايسبت... والباي هي العضلة الامامية في نهاية الذراع والباي هي العضلة الخلفية. او يقولون عن البنات كالفات تمام والكالف هو عضلة الساق.
وللانسان القوي يقولون ياخي فلان ...ياخي الراجل التلومية .وتعني قوي او مكرب. بتوكه تعني في العباسية فلوس. اول اسمعها كان من الكوتش عبدالقادر هاشم الذي كان يدرب فريق التضامن وفرق اخرى. وكان له نشاط رياضي ضخم . وينظم ويقدم في العباسية وميدان الربيع بطريقة عقائدية.
ويقولون مثلا لانسان يهجم على الاكل او يدخل في الكلام بإندفاع ياخي ده داخل سوينق وآبر ..والاسوينق هي عندما يضرب الانسان بقبضته ضربة جانبية . والأبر هي عندما يضرب الانسان من تحت لفوق آبر -كت.

مرسل: **الأربعاء 2014.12.24 10:25 pm**

.. لمحة امدرمانية
كلام ناس امدرمان ...
ويقولون بكرة كيته واقاشي. والكيته هي نوع من الموسيقى والاقاشي هو اكلة دسمة تتكون من اللحم والفول السوداني. وهذا يعني عندما يتوقع الانسان شيئا كبيرا.. حتى لو كان فلوس او هدية. وعندما يقول الانسان في لعبة الكنكان عاوز انزل يقولون له تنزل في الطنبرة. والطنبرة هي نوع من الزار. ولكن الكلمة مختلفة في العباسية والطقوس مختلفة .واذكر ان اولاد السروجية يقولون بكرة نمشي الدايف ويقصدون العوم وتاتي من الكلمة الانجليزية دايف او يغطس.

اول مرة اسمع بدبرياش. كان من صديقي عثمان ناصر بلال الذي كان ميكانيكيا ويسكن في شارع السيد الفيل قبل انتقاله الى ابي سعد الآن . وكان الشقيق الاكبر لصديقي وزميل الدراسة عبدالله ناصر. وهذا عندما اشار عثمان لطعمية مستورة, التي كانت ضخمة ومستديرة. والدبرياش طبعا هو طارة الكلتش وكاانت كلمة دبرياش تستعمل كذلك للريال ابوعشرين. ويقولون عن الجنيه اضان فيل. واضان حمار للخمسين قرش .وللطرادة اضان غنماية . ومستورة كانت تبيع الصنف كذلك.
وعندما يكون الانسان خاملا ولا يتحرك يقولون له مالك ضارب بغو..والبغو هو المريسة.
من العادة عندما لا يتحرك الانسان او يطلب من الآ خرين القيام بعمل يقال له مالك محنن. اما في العباسية كنا نسمع مالك حارس قورو. والقورو هو ثمرة يمضغها اهل نيجيريا وغرب السودان. تعرف عالميا بالكولا. والقورو كان يفرش في الطاحونة امام العباسية.
او يقولون مالك ماسك كدنكه والكدنكه هي الطورية بلغة نيجيريا وغرب السودان والطورية هي كلمة نوبية قديمة اتت من شمال السودان. وعندما يتشدد الانسان يقولون له خلاص يا عبدالله بون. عبدالله بون كان امباشا بوليس ب شريطين. ويسكن العباسية . كان صارما واسع الانتشار. وهو من اهلنا النوبة يسوق الكومر ويحفظ النظام في دار الرياضة والسينما . ولا يتنازل ولا يقبل اي وساطة..

اثنين من اهلنا الرباطاب كانوا يعملون في السوق ....يوسرو العناقريب ...فأتى زائر. فقال احدهم للآخر امشي جييب شاي لي عمك ده فقال الآخر ما تمشي انت..وكان الرد...انا ما شغال...وكان الرد ...آآي انا ما بسوي في الحردفه. والحردفه هي الحجلة لعبة البنات التي هي عبارة عن مربعات او دوائر في الارض تلعبها البنات الصغار. مثل هذا الكلام يقال في محيط ناس الشمالية والرباطاب . والا لم يفهم المستمع..

او يقولون لك... والله ما بديك لو تعمل باك سمر صول... وتعني ان تقلب هوبة بالقلبه . وهذا طبعا من خلفية الجمباز . فكثير من اهل العباسية والموردة, وبانت خاصة ,كانوا جنودا في الجيش. او نص تعيين عندما كانوا صبيانا في بلك الاولاد . ولهذا تعتبر هذه الاشياء جزء من ثقافتهم ولكنها قد تكون غريبة في حي العرب اوابوروف.

مرسل: **الأربعاء 2014.12.24 10:26 pm**

.. لمحة امدرمانية
مقهى جورج مشرقي.. ذاكرة ام درمان

لا يزال الناس في السودان يذكرون مقهى جورج مشرقي الذي يعتبر من اشهر وأقدم المقاهي السودانية في العاصمة الوطنية أم درمان ويفتح أبوابه على ساحة البوستة الشهيرة في قلب المدينة.
وكان لهذا المقهى تأثيره في الحياة الاجتماعية، والسياسية، والفنية، وصاحبه جورج مشرقي من الأقباط الذين ولدوا في السودان، وقدمت أسرته من الصعيد المصري إبان الحكم التركي المصري.

يقول مشرقي عن نشأة المقهى انه تأسس عام 1940م ومنذ بدايته كان ملتقى لنجوم الغناء والفن والسياسة، ويذكر ان ابرز الرواد والمشاهير الفنان إبراهيم الكاشف رائد الأغنية الحديثة في السودان، والفنان عثمان الشفيع وعبيد الطيب ومن الشعراء محمد عوض الكريم القرشي.. إضافة إلى أهل السياسة، إذ كان المقهى يجمع الأحزاب ورموز السياسة وفي مقدمتهم إسماعيل الأزهري الذي تجمعه علاقة خاصة بصاحب المقهى، ومحمد احمد المحجوب رئيس الوزراء الأسبق، وأعضاء البرلمان الأول. وكان رؤساء تحرير الصحف الكبيرة يرتادون المقهى وأشهرهم علي حامد، و عبد الرحمن مختار مؤسس جريدة "الصحافة". وفي مقهى مشرقي خرجت اجمل الأغنيات السودانية لشعراء الحقبة الأولى.

الوسيلة السماعية لرواد المقهى كانت الاسطوانات التي تدار على جهاز الفونغراف، وظهرت وقتها اسطوانات لفنانين وفنانات سودانيين يقوم عليها الوكيل ديمتري البازار وتسجل في القاهرة، وشهد المقهى أول أجهزة الراديو (الترانستور) التي وضعت في مقاهي أم درمان.

وعن المقاهي المنافسة له في المدينة أشار مشرقي إلى ان عدد المقاهي لم يكن كبيراً، إذ يوجد فقط مقهى الضهير لصاحبه محمد أب ضهير، ومقهى آبي سنون.

ويحفظ مشرقي الكثير عن تاريخ المدينة ونشأة المسارح، ودور السينما، والحراك السياسي مما جعله مرجعاً مهما من مراجع المدينة، ووجهاً للتسامح الديني بين الأقباط والمسلمين إذ يعرفه مجتمع أم درمان مشاركاً في كل مناسباتهم السعيدة والحزينة.. وترك مشرقي إدارة المقهى في الآونة الأخيرة لأبنيه مجدي ومشرقي اللذين غيرا بعض ملامحه وأدخلا روح الحداثة عليه، ولكن الأب ظل رغم كبر السن يتواصل في الأمسيات مع الناس

مرسل: **الأربعاء 2014.12.24 10:27 pm**

.. لمحة امدرمانية
الرياضة بأمدرمان

هذه الدار العتيقة والتي كانت مهداً للرياضة المنظمة في السودان وبخاصة كرة القدم ما تزال قائمة شامخة تؤدي رسالتها بالرغم من تقادم عهدها واضمحلال ألقها وتضاءل دورها وانتقل دورها إلى إستادات حديثة تكسو أرضها النجيلة , وتنير ساحاتها الأضواء الكاشفة , وتؤدي فيها المباريات ليلاً بعيداً عن حمارة قيظ النهار , واللعب فيها ليس على أرض ترابية . لا زالت حيطانها العالية المبنية من الحجارة قائمة إلى الآن منذ عهد المهدية فقد كانت مستودعاً كبيراً . دار الزمان دورات وحكم الأنقليز السودان وكان القوم مولعين بالرياضة وبخاصة كرة القدم و التي ابتدعوها في العصر الحديث , و أدخل الجيش الإنجليزي هذه اللعبة الشعبية , وكونوا اتحاداً للكرة يرأسه إنقليزي , ونظموا دوري تتبارى فيه المصالح الحكومية التي كونت كل منها فريقاً لكرة القدم مثل الأشغال والنقل الميكانيكي والري المصري وكانت تقام أيضاً منافسات بين أسلحة الجيش كالمهندسين والإشارة , وأفردوا لها كأساً أسموه كأس المصالح وهناك أيضاً كأس الحاكم العام , و في الأربعينات من القرن الماضي تكونت الفرق الرياضية وقسمت إلى درجات أبرزها فرق الدرجة الأولى وضمت الموردة والمريخ والهلال والوطن ويليها فرق الدرجة الثانية كالزهرة والعباسية وحي الضباط , ويلي تلك فرق صغيرة غير مصنفة في الأحياء وهذه كانت تلعب في الساحات في الأحياء كساحة ميدان الربيع بالعباسية بأمدرمان , وكانت الفرق المذكورة كلها في أمدرمان وكانت هناك فرق كبيرة في مدينة الخرطوم كالأهلي وهناك فرق الخرطوم بحري كفريق سلاطين والكوكب و عقرب . وكان يدير المباريات حكام من السودانيين وكان من قدامي الحكام خضر زايد و منديل و جاء بعدهم يوسف محمد وعبيد إبراهيم والخليفة موسى ويوسف الخضر وكان اتحاد الكرة يعين الحكام وينظم لهم دورات تدريبية . أما عن الدار نفسها فقد أحيطت من الداخل بمدرجات من الطوب و الأسمنت من جهات الشرق والجنوب والشمال وهذه مدرجات شعبية رسم دخولها قرشان للتذكرة , و أما في الجهة الغربية فتوجد المسطبة الوسطي وبها كراسي مريحة مصفوفة علي مدرجاتها , ويحف بالمسطبة الوسطي من الجانبين المساطب الجانبية ويفصلها عنها حاجزان قصيران وبها كراسي أيضا , ورسم دخول المسطبة الوسطي عشرون قرشا وعشرة قروش للمساطب الجانبية , وكانت هناك أبواب لتذاكر ودخول كل المساطب , وكانت ولا زالت البوابة الرئيسة بالمسطبة الوسطي , ويوجد بالخارج سبورة سوداء من الأسمنت علي حائط المسطبة الوسطي يكتب عليها اسما الفريقين المتباريين ونوع المباراة إن كانت ودية أو دوري أو علي الكأس , وكذلك موعد بدء المباراة وفئات رسوم الدخول . وكان هناك تقليد وهو فتح الأبواب قبل نهاية المباراة بعشر دقائق لدخول الجمهور مجانا .وكانت هناك حدود معروفة و أمكنة لجمهور مشجعي كل فريق من الفرق الكبرى , فمشجعو الهلال يحتلون المساطب الشمالية ومشجعو الموردة يحتلون المساطب الجنوبية , ومشجعو المريخ يحتلون المساطب الشرقية , وهذه الأقسام ضرورية لمنع الاشتباك بين المتهورين والمتشنجين والمهووسين بين المشجعين ! فقد كانت هناك ملاسنات ومكايدات بين المشجعين خاصة بين الهلالاب والمريخاب من المشجعين مما سيلي ذكره . كانت هناك شخصيات ارتبطت بدار الرياضة فكان هناك طلب وهو رياضي متقاعد وكان بمثابة الطبيب الرياضي فحينما يصاب أحد اللاعبين يندفع العم طلب ومعه نقالة لينقله خارج الملعب لإسعافه , وكان في فترة الراحة بعد شوط المباراة الأول يحمل صندوقا من الكرتون به ليمون يعطي منه ليمونه لكل لاعب من الفريقين , وكان هناك العم الجاك الدلال وهذا عمله الأصلي فقد كان دلال الدلالة في امدرمان , وهو الإعلامي حينذاك فلم تكن توجد ميكرفونات أو مكبرات للصوت فكان الجاك يقف في الميدان بين الشوطين ويتوجه إلى الجهات الأربع ويعلن عن المباراة القادمة بصوته القوي الجهوري الذي يضاهي صوت أي مكبر للصوت فكان يصيح معلنا ( غدا , الهلال والوطن – الوطن والهلال في مباراة ودية ) وكان العم الجاك هلاليا متعصبا وسليط اللسان وفي مباراة للهلال والمريخ ادخل المريخ إصابة في شباك الهلال فقام أحد مشجعي المريخ وصاح في الجاك ((عصبة يا عم الجاك عصبة)) واخذ يردد ذلك والجاك يرد عليه بقول (( أنا آسف – أنا آسف)) واستعجب الناس من حلم الجاك المفاجئ ولكنه بادر بقوله : (( والله أنا آسف . أنا ما بكلم الواسع )) .

مرسل: **الأربعاء 2014.12.24 10:28 pm**

.. لمحة امدرمانية
الرياضة بأمدرمان
وكان هناك الخزين بائع الجرائد وأنا اسميه وكالة أنباء متحركة , وكانت لديه طريقة متميزة وشيقة للمناداة علي الجرائد وذلك بإبراز الأنباء المهمة بأسلوب مشوق ومثير ومن ذلك انه كانت هناك قضية أخلاقية اتهم فيها بعض الكبار بإقامة علاقات جنسية مع فتيات قاصرات , فكان الخزين ينادي علي الجريدة قائلا :
(( امدرمان بقت تنخاف . اقرأ القضية الأخلاقية الكبرى )) وقد رأيت الخزين قبل خمس سنوات وقد كبر في السن بالخرطوم وكان ما زال يبيع الجرائد في محل متواضع ولكن بدون حس , ولعل ناس الأمن قد اسكتوا حسه فأن الفضائح قد كثرت وتعاظمت في عهد الجبهة !
شهدت دار الرياضة أفذاذ كرة القدم في السودان فقد لعب على أرضها التراب عبد الخير لاعب الهلال الفذ و طلعت فريد الصخرة والأمير صديق منزول والسد العالي وأمين زكي وسبت وقاقارين وجكسا ومن الموردة زرقان ودرار وترنه وسمير وود الزبير وعمر عثمان وعمر التوم , ومن المريخ شرفى وحسن العبد وكلول وعصمت معنى وبرعى , ودولي الكبير ودولي الصغير وسحابة من بحري وبري وغيرهم ممن لا تحضرني أسماءهم , واستقبلت الدار أشهر الفرق العالمية فقد لعب على أرضها أبطال العالم في كرة القدم في فريق الرد استار
Red Star المجري الذي كان يضم ساحر الكرة بوشكاش وصاحب الرأس الذهبية كوتشيس وبوجيك وهودى كوتي. ولم تكن أنشطة هذه الدار تقتصر علي كرة القدم فقد كانت تقام فيها مهرجانات رياضية تضم مختلف ضروب الألعاب الرياضية , واذكر ونحن في المرحلة الأولية أن كلية غردون (جامعة الخرطوم حاليا ) نظمت بطولة بالدار في جميع الألعاب من العاب قوي وقفز عالي وشد حبل , وفي الستينات نظم نادي الهلال أول مباراة في كرة السلة بين الفتيات , كما كانت حفلات تخريج طلبة الكلية الحربية تقام بدار الرياضة بامدرمان .
أما الذي يستحق المشاهدة فعلا فهو جمهور كرة القدم كما قال لي أحد أصدقائي فهو يدخل الإستاد ليتفرج علي الناس وليس اللاعبين , وقد جربت ذلك ووجدت متعة في المشاهدة تعدل مشاهدة المباراة , ووجدت الذين يقفزون , ومن يلعن ويسب , ومن يصرخ , ومن يتشنج وتبرز عروق رقبته وكأنها ستنفجر , والذي يرفس بأقدامه ومن يشتم الحكم واللاعبين , والصفير والتصفيق , وهناك ظاهرة إشعال أوراق الجرائد عند إحراز الأهداف , وتجد الشخص الرصين الرزين ينقلب إلى أهوج ارعن , وربما يسئ الأدب في القول والتصرف .
وشاهدت ومعي مئات من الناس منظرا شاذا في هذه الدار فقد كانت هناك مباراة علي الكأس بين الهلال والموردة وفجأة هطل مطر غزير مصحوب بالبَرَدْ (قطع ثلج كالحصا) وتوقفت المباراة واندفع الناس للخروج وفي الخارج رأينا أحدهم جاريا والماء يبلله وملابسه ملتصقة به وكان لا يرتدي سروالا أو فانلة داخلية , وكان أضحوكة واستغراب من الجميع .
و بعد فهذه هي دار الرياضة بامدرمان ذات الأمجاد والتي ظلت صامدة علي مدي الأجيال , وودت لو أن أرضها صارت خضراء بالنجيلة ولعل اتحاد الكرة يفعل ذلك .

منتدى أنا سوداني

أمدرمـــــانيـــات

أمدرمـــــانيـــات

رد: المهن في ام درمان

رد: المهن في ام درمان

رد: المهن في ام درمان

رد: المهن في ام درمان

رد: المهن في ام درمان

رد: المهن في ام درمان

رد: المهن في ام درمان

رد: المهن في ام درمان

رد: المهن في ام درمان

رد: المهن في ام درمان

رد: المهن في ام درمان

رد: المهن في ام درمان

رد: أمدرمـــــانيـــات

رد: أمدرمـــــانيـــات

رد: أمدرمـــــانيـــات

رد: أمدرمـــــانيـــات

رد: أمدرمـــــانيـــات

رد: أمدرمـــــانيـــات

رد: أمدرمـــــانيـــات