منتدى أنا سوداني

والله يا سني .. النمو الإقتصادي الذي يشهده وسيشهده السودان والمجتمع
فيه الكثير من النواحي الإيجابيه والسلبيه .. شأنها وشأن اي تطور يحمل في طياته التغيرات التي ستجلبها هذه القفزه ..
أعتقد في رأيي ان يكون الوضع مطابق للنموذج الأول الذي ذكرته ..
الشعب السوداني محب للراحات والرفاهيات شأنه شأن أي مجتمع
الشعب السوداني محب للبوبار والإستعراض بصوره وااااضحه .. وهذا ما سيجعله ينفق ببذخ وفوق المعتاد

وحاجات كتيره كتيره !

بت أبوظبي كتب:والله يا سني .. النمو الإقتصادي الذي يشهده وسيشهده السودان والمجتمع
فيه الكثير من النواحي الإيجابيه والسلبيه .. شأنها وشأن اي تطور يحمل في طياته التغيرات التي ستجلبها هذه القفزه ..
أعتقد في رأيي ان يكون الوضع مطابق للنموذج الأول الذي ذكرته ..
الشعب السوداني محب للراحات والرفاهيات شأنه شأن أي مجتمع
الشعب السوداني محب للبوبار والإستعراض بصوره وااااضحه .. وهذا ما سيجعله ينفق ببذخ وفوق المعتاد

وحاجات كتيره كتيره !

بت ابوظبي،،

السؤال هو،، مع التغيير الكبير القائم بيه الشباب الحالي في عادات وتقاليد الشعب السوداني،، هل هو قادر على تغيير الجانب السلبي الذكرتيه تغييراً إيجابياً ؟

صدقيني،، انا ما خايف إلا من ال (حاجات كدة) دي

تسلمي،، ومشكورة على المرور

عمار جبارة كتب:اتمني ان نحقق النموزج الثاني حتي تعم الفائدة علي الجميع
ونحي قيم التكافل الاجتماعي التي امرنا بها الاسلام
ولان هناك كثيرا من الغبش التعابه والبيوت الساكناها الكآبة
اتمنى الخيار الثاني لانو والله نحن ماعندا غير طبقتين عليا ( اقلية )
ودنيا ( اغلبية )
اعتقد الاحق للاغلبية
اللهم اجعل هذا البلد امنا مطمئنا وسائر بلاد المسلمين

أخونا عمار،،
هل (تمنيك)هو تمني قائم على إستقراء واقع،، ولا تمنى من يغطس رأسه في التراب وبكضب في الشينة؟.

بعض السودانيين حاليا متفائلين في إنه هناك تغيير في التفكير والنظرة للأمور،، ويتخذ أصحاب النظرة دي الأخذ بالعديد من المتغيرات والمؤشرات الدالة على التغير في كثير من المفاهيم في انه السودانيين اصبحوا عمليين أكثر من زمان بسبب الضغط الإقتصادي، ومن ضمن مؤشراتهم انه (شوف السودانيين طلعوا من حتة العربية الكرولا) بس انا بقول انه العربية الكرولا ما طلعوا منها،، لكن بقت أمل ما ملحوق،، وكلللهم بدلوا الكرولا بالأتوس!!!!!!!!والله لو كان بدلوها بي عجلات،، كنت إحترمت الموضوع أكثر،، ولا لو الدولة فكرت لينا في مترو داخل المدن،، وقطارات بين المدن،، كان أسنانا مرقت بالبسمة

يايت لو عندك شيء في يدك أو مؤشرات،، تمدنا بيها الله يخليك.

مشكور على المرور والمشاركة

ibn batoota كتب:الأخ السني مساء الخير,,,,

من خلال إجازتي الأخيره للأسف الشديد المسألة بقت واقع معاش,,,,,
وهو إتجاه المجتمع لتحقيق أكبر قدر من الرفاهية ويسيرون بإتجاه النموزج الأول,,,
إبتدا من سلفيات البنوك لتحقيق أغراض ثانوية (إستبدال عربية) لاحظ إستبدال وليس شراء!!!!
وإنتهاءا بالإجازات الصيفية,,,,,,

عزيزي السني موضوع فعلا يحتاج وقفة تعجب وتأمل!

ابن بطوطة،، بين عليك محبط أكتر مني. بس السؤال،، هذ الفئة هي جزء قليل حتى الآن،،، ماذا عن البقية،، هل لو توفرت ليهم الفرصة،، برضو ح يجرو في نفس مضمار السباق؟؟

لك التحية والشكر على المرور الكريم

sarona كتب:

الاخ السني لك التحية

حقيقي سؤال مهم جدا .....

والاختيار اذا كان من منظور واقع المجتمع

فأقول المجتمع قد اختار و سبق السيف العذل .....

واصبح المجتمع يقيس الانسان من واقع مادي بحت .....

أما النموذج الشرق آسيوي فهو بمثابة الحلم الذي اتمنى ( و امنية حقيقية ) أن يتحقق......

فتطوير البنى التحتية لأي دولة ليس بالامر الهين وهو الابقى ...

تقبل مروري

سارونا،، لفتي نظري لي حتة كانت فايتة علي في الطرح، وفي أجوبة من سبقوك.

هل التغيير المنشود هو مسؤولية المواطن وفكره؟؟ ولا الدولة ليها دور؟

مشكورة على المرور والإضافة الحقيقية

سودانية نار كتب: استاذي السني انا اتفق معاك فيما ذهبت اليه
في ردك علي الغالية سارونا
واقووووول
الخيار الاول خيار افراد
صحيح السودانيين بداءت القروش تجري في ايديهم و ودخلو في دور سلم حياة الرفاهية
لكن اعتقد انه خيار طبيعي
لفترة طويلة من العوز والحاجة
وكمان ضريبة عمل شاقة امتدت لسنييين عدة
نفس الامول بدات تجري بالضعف ثلاثة والا اربعة مرات في يد الدولة
فاين هي ؟؟؟؟؟
صحيح الشوارع والكباري ماشة تمااام
لكن اين الخدمات التانية
ولماذا يدفع السوداني حتي الان ضرائب كل يوم شكل جديد
الخيار الاول خيار افراد
الخيار الثاني وووواجب حكومة
وتسلم

سودانية نار،،، عجبتني كلمتك بأنه الخيار الأول خيار أفراد،، والتاني خيار حكومات،،، لكن الحكومات دي عبراة عن مجموعة من الشعب السوداني بتتخذ القرارات،، فالمقصود هنا هو الفكر السوداني،،، خليني أقول ليك،، العندو القروش ده،، لو أتوفرت ليه مثلا وسائل نقل وريحة وجميلة من الدولة،، هل بيفضل انه يمشي المكتب بالوسيلة دي،، ويخلي العربية في البيت بدل الزحمة؟؟ ممكن يكون عندنا فكر زي ده؟؟

يديك العافية،، ومشطورة على المرور

وكيل عريف كتب:موضوع خطير اخى السنى

السودان يعيش طفره اقتصاديه كبيره جدا

وده بيحسو اكتر حاجه المغترب سنين ولما يرجع السودان

المغترب ده يكون افنى زهرة شبابو فى الاغتراب وحوش ليهو

مبلغ لا باس بيهو عايز يعمل ليهو مشروع يعيشو هو واسرتو لجنى جناهو

ولمن يجى يلقى قروشو دى بالنسبه لناس عايشين فى السودان ما بتساوى اى حاجه

ولو فكر فى اى مشروع يلقى مليون شخص فكر قبلو....... الدولار والريال او اى عمله

نزلت بالنسبه للجنيه السودانى ...كلامى ده يعنى انو موظف فى السودان فى شركه بتروليه

يساوى 3 مغتربين فى السعوديه و 2 فى دول الخليج

السودانيون ماشين فى الخيار الاول حياة الترف والبوبار.....ياخى البلد دى فيها حديد يطمم البطن

عربات اخر موديل.......... بيوت وعمارات تهبل...انديه واماكن للترفيه مبااااالغه........

الفرق بينا وبين دول الخليج انهم كلهم مرتاحين لكن نحن ناس دايشه وناس عايشه......

نحن الان اقرب للهند طبقه فوق وطبقه تحت فى النص مافى حاجه...

وبجيك راجع

اخوك وكيل عريف

وكيل عريف،،،

ما عندي غير أقول ليك ،،، آآآآآآآآآآآآآخ كنت عاوز ادس راسي في التراب،، لكن جريتو لي،،من نص الرملة،، الله يجازيك

ويديك العافية

السلام عليكم

اخى المشرف لك التحيه

انت ترفض التوجه الاول وتتمناهو

وكلنا بيتمنى التوجه التانى

لكن السودان حاليا ماشى فى التوجه الاول

غصبا عننا رضينا ام ابينا واذا لم تتحرك الدوله

سوف تقع الفاس فى الراس

والدليل على ان السودان مااااشى فى الخلجنه

على سبيل المثال وليس الحصر

قامت مدينه على امتداد الحاج يوسف

سميت حى الدوحه بدلا من امتداد الحاج يوسف

كانهم مستعرين من الاسم

ودونكم امتدادات الشجره سميت حى يثرب

وعندنا احياء الرياض والطائف وقاعة الشارقه وهلمجرا

فى خلجنه اكتر من كده

وكيل عريف

المشرف العام كتب:الاخ السنى...!

بصراحة انا لا معى التوجه الاول ولا التانى.....!
اولا ارفض رفض بات باسلوب المقارنة.....اخى لا تقارنا بالعرب...!الاخوان العرب وقعوا فى اخطاء
كثيرة مع بداية الطفرة الاقتصادية البترولية اساسها عدم وعى وجاهلية شعوب الخليج ودول البترول الاخرى فى تلك السنين الاولى......وضع السودان يختلف تماما عن ذلك الوضع...التعليم والعلم والخبرات
السودانية المعروفة عالميا لو كسبناها لخدمة البلد ستكون النتائج مزهلة ...ليس لافريقيا وحدها وانما عالميا...ودى حقيقة واحده من مخاوف الحكومة الامريكية ومعاداتها لنهضة السودان اقتصاديا ....10 دول
افريقية فقط تسلك الطريقة التى يسر فيها السودان ....ويعم الخراب والدمار للعديد من الدول الاوربية( الغنية)
وهم يعلمون ذلك....!انظر كمثال مهاجماتهم ومحاولاتهم التى لا تجدى ولا تنفع فى مقاومة النهضة الاقتصادية الصينية....!!!؟؟؟

كل الاحصائيات الاقتصادية والمحايده على وجه الخصوص ...تتنبأ بنهضة اقتصادية رهيبة فى شرق
القارة الافريقية....بزعامة السودان...فى ترابط مع النهضة الاسيوية ......لذلك يحاولون الدخول للبلاد باية
طريقة حتى ولو ادى ذلك لتغير النظام......!!! وهذه هو دائما وما زال الاسلوب الاوروبى الخاسر.

انا اتوقع للنهضة الاقتصادية السودانية نوعية جديدة ...سنفخر بها ...ومع الصبر الشديد وبناء اساس حضارى جديد للبنية التحتية( التى عانت طويلا) سيكون النجاح حليفنا باذن الله.

وشكرا...!

كلامك جميل يا صلاح،، وربنا يسمع منك،، لكن خوفي هو من الحياة المظهرية البدت في السودان،، إضافة للشكل الطبقي الكريه البدأ يظهر، ده أكيد ح يكون ليه تبعاته على المجتمع وتركيبته ومفاهيم الناس. التعليم في السودان ده وحدة هم مفروض نفرد ليه مساحة نقاش،، لأنه بدت نتائج السياسات الخاطئة تؤتي ثمارها العفنة والقبيحة،، ولكن لا نزال ننعم ببعض الخصوبة في إرثنا الثقافي والأدبي والتعليمي،، ولكن لو فكرنا انه هذا الإرث هو معين لا ينضب،، أو لم ننتبه للدور الكبير الذي يلعبه قلة من المثقفين الذين أتوا نتاج للفترة الذهبية للتعليم في السودان،، فنحن واهمون. الحمد لله العقل السوداني متفتح، وقابل للتلقين بكل ما هو مفيد حتى يبدأ في الإبداع،، ولكن قلة هم الآن من تتوفر لهم فرص التعليم النوعي الجيد،، فما هو المستقبل في ظل المعطيات دي؟؟؟

والله هم كبيييير

وكيل عريف كتب:السلام عليكم

اخى المشرف لك التحيه

انت ترفض التوجه الاول وتتمناهو

وكلنا بيتمنى التوجه التانى

لكن السودان حاليا ماشى فى التوجه الاول

غصبا عننا رضينا ام ابينا واذا لم تتحرك الدوله

سوف تقع الفاس فى الراس

والدليل على ان السودان مااااشى فى الخلجنه

على سبيل المثال وليس الحصر

قامت مدينه على امتداد الحاج يوسف

سميت حى الدوحه بدلا من امتداد الحاج يوسف

كانهم مستعرين من الاسم

ودونكم امتدادات الشجره سميت حى يثرب

وعندنا احياء الرياض والطائف وقاعة الشارقه وهلمجرا

فى خلجنه اكتر من كده

وكيل عريف

عزيزي وكيل عريف،، تصحيحا للقول،، انا ما تمنيت النموذج الأول، وما ممكن أن أتمناه،، ياخي انا رجل بحب بلدي،، ما تمنيته هو (تسري عائدات الوضع الجديد في عروقهم) في إشارة وقصد واضح وتوضيح لخوفي من أن تؤكل عليهم،، ولا يستفيد منها إلا القلة. فأنا من أنصار ومتمنيي النمذج الثاني،، وهو الذي يكون فيه رفاهية الشعب نتاج طبيعي لتطور الإقتصاد وإنعكاس له عن طريق توفر البنى التحتية، والصحة ، وصحة البيئة، والتعليم، والخدمات العامة، والعدل الإجتماعي،، ثم يترك المجال لإنسان البلد في أن يطور نفسه،، يعني بإختصار تهتم الدولة بما عليها،، ولا تركز على ملئ جيوب الشعب (أو فئة معينة منه) وأن يجد العامل من تعبه وملئ ملابسه بالزيوت من العائد ما يكفل له حياة كريمة،، وأن لا يكون هم المواطن أن يركب من العربات كل ما هو حديث، وأن يملأ يدي زوجته بكل أنواع المعادن والأحجار.

أما موضوع تسمية الدوحة، والطائف، والرياض وخلافه، ما هو إلا مسح جوخ سنتجاوزه، لأنه عبارة عن محاولة لتسمين البقر حتى يدر الحليب،، وماهي إلا ملصقات يمكن إزالتها (كفكر) بما نادينا منه من نهج ونتائج مرجوة،،،

يديك العافية

حنضله كتب:الثانى الثانى الثانى

حنظلة،،، قول ياريت،، وأنا بقول ليك آآآمييييييييين ،،، مشكور على المرور

اخى السنى

انا كان مفروض اكتب كلنا نرفض التوجه الاول ونتمنى ذلك

ولكن كلمة كلنا كتبت انت عشان انا بكتب من اليبورد مباشره

وبعد داك العتب على النظر

لك اسفى فانت سودانى اصيل هذا ظاهر من كتاباتك

اخوك

وكيل عريف