شواهد نفس

[Control 3]

[align=center]رائع ما انتقيته لنا أخي لبيب سلمت أناملك الذهبية
دمتم بـــــــود
[align=center][/align][/size][/align]

[طلال الحكيم]

[align=center]
عمي يا عبد الصبور
جابني ليك شوقي الكتير يا الغالي يا زينة الرجال
وجابني ليك العيد والسرور
نفسي كان أحضر العيد في ضراك
وأصلي جمبك في البروش
وأسمع التكبيرات معاك
ومعاك ما أحلا في العيد الفطور

جيت لقيت الناس محترقة زي حبات البخور
متباعدة زي صيدا ً نفور
منكوبة بالهم والبلا
لسانهم يسب في الدنيا وينعلا
وأقواهم الليلة بيخور

العيد مالو جافا الناس هنا
العيد مالو ما مسح الحزن ... ما مسح العنى
العيد ظنيتو ما جاهم إلا من خمسين سنة

وينو يا ناس عمي الحنين
وينو يا ناس سيد قلبي عبد الصبور

صاحو فيا الناس وقالو
عبد الصبور ؟؟؟ وأنت لسه متذكر عمك عبد الصبور
ياهو داك
شوفو قاعد بــ وراك
عمك عبد الصبور يا ود (سكت)
وخلى الكلام
ما بعرف النضِم وما بقول سلام
أمشيلو كان تفك منو السكات
وتحيي قلبو الباقي زي حفنة رماد


عمي يا عبد الصبور
رد علي وقولي سلام
عمي يا عبد الصبور الدنيا عيد
وأنا جاييك من بلدا بعيد
طالب العفو واقعد معاك يوما ً سعيد
قول يا عم عبد الصبور
قوم يا عبد الصبور ... قوم يا عبد الصبور
يلا قوم ... لمتين حتغرق في الهموم
قوماك كفاك
قوم يا عبد الصبور ما مشكلة البيت الوقع
ما مشكلة
قوم يا عبد الصبور ما مشكلة الهم والوجع
ما مشكلة
كلو بيعدي
بس أنت خليهو السكات
وأفتح ليا قلبك يا عمي وقول
أنا ولدك وعكاز يمينك
أنا سندك وفي الهم ضمينك

رفع عمي عبد الصبور عيون غايرات بعيد بعيد
وعاين لي شديد
عيون محكولة بوجع السنين
عيون ما عرفت الليل من صباح
عيون معصورة بأحزان اليتامى
ومكبوتة مشتهية الصياح

قال عبد الصبور بعد صمت الدهور
القصة ما قصة بيتي الــ وقع
القصة ما قصة الهم والوجع
ولا قصة بنيات أتكشفت أستارا
ولا قصة ولدي السافر وخلانا حيارى
(القصة أكبر من كده)

القصة ما قصة الطين والوحل
القصة ما قصة الجوع الحصل
أو مرض ما عرفنا ليه دوا
أو عطش ما لقينا ليه إرتوا

(القصة أكبر من كده)


القصة ما قصة حبوبتك (التايا ) الِشقت
مشغولة بلقمة بنياتا العداما
تلبس في تياب الليل البـِلت
وعيونها بدموع الحسرة إتملت
خايفة لو جاها القدر
وين البنيات يسكنن ؟
والدنيا ماليها العفن

(القصة أكبر من كده)


القصة ما قصة ود أختك (علي)
الـ خلى تعليمو وجرى .... للمدن من ظلم القرى
عشان يلقى لقمة تسد جوع بطنو الإتهرى
هي ذاتها وينها الكراريس و الكتب ؟؟
وينا الكراسي والكنب ... يا خي وينو الجدار وينو العتب ؟

لكن برضو ( القصة أكبر من كده)

يا ولدي القصة قصة تراب فقد المحبة ودمعة الإشتياق
فقد الإنتماء
فقد الوفاء وريحة البلد
يا حليلها يا ناس ريحة البلد
القصة قصة أولادو ماتو بالحيا
وعدمو الحيا
وما عرفو غيرة على البلد
كل يوم بنبزو في البلد
كل يوم بيلعنو في أم البلد
والناس تكورك في وش البلد

(وهي ذنبها شنو يا ناس البلد ؟؟)

القصة يا ولدي أكبر من كده القصة أخطر من كده
القصة قصة جماعة قالو نحن أسياد البلد
ويانا نحنا أولاد البلد
ناس (إتسلبطو ساكت في البلد)
والأدهى وأمر
إنهم إتسلبطو برضو في رب البلد
وقالو (نحن) أقرب الناس للإله
نحن حقتنا الأرض ... نحن حقتنا المياه
موش نحن أنصار الإله ؟
ما مشكلة لو إتفتفت بلد ... ما كلو بأمر الإله !!!
ما مشكلة لو هجر الرجال صدر البلد ... ما كلو في سبيل الإله !!
ما مشكلة لو جاعت بطون ... ما الصوم عبادة للرب الإله !!
ما مشكلة لو ماتت أو إتقتلت نفوس ... ما هي شهادة في درب الإله !!
ما مشكلة لو كترت قروشنا .. ما نحن عُباد الإله !!!
يتمتعو الأولاد من بعدنا ... ديل برضو أولاد عُباد الإله !!!
وكل كراسي وكل مناصب
هي لينا هدية لينا من الواهب الإله !!!
عشان نحن ناس الدين فيكم
لازم تزلو .. وتسكتو .. وتذعنو بالجباه
ونحن ليكم بنشقى وعشانكم بنتعب
هو تكليف جانا بس من الإله !!!



شفت (سلبطة) أكبر من كده ؟؟؟
لكن حيمشو وين من الإله ؟؟؟

موش يا ولد كان خليتني ساكت كان أخير ؟؟


( كان أخير والله يا عبد الصبور )

[/color][/font][/size][/b][/align]

[صلاح يحيى سليمان]

أدخل على الرابط ادناه لمتابعة الموضوع الاصلى




[frame="1 50"]
رابــــط الموضـــوع الاصــــلى[/frame]


وشكرا