عائشة "الفلاتية"

[صلاح محجوب عبداللطيف]

عائشة موسى احمد "الفلاتية"





المبدعة عائشة موسى احمد واشتهرت بالفلاتية أول سودانية تتمرد على تقاليد الحجاب وتقتحم الحياة العامة في شجاعة وجرأة قبل أكثر من ربع قرن من الزمان لتصبح مطربة مبدعة تردد الآفاق شهرتها وذلك في مجتمع متخلف ومتزمت.. ثم تنجح نجاحاً منقطع النظير رغم منافسة أساطين الفن من الرجال الذين عاصرتهم.. عائشة الفلاتية ، رحمها الله.. سيدة ظلت الى آخر رمق من حياتها تحتفظ في حرص بالغ على بعض معالم الربيع في قسمات وجهها الوضيئة.. وهي بعد خفيفة الدم.. حلوة الحديث.. رقيقة الأحاسيس.. لا تغيب الابتسامة الودودة من شفتيها الا لماماً .. ولا تتعثر في اطلاق الدعابة الطلية المرحة في سرعة بديهة حاضرة دائماً.. وهذا لقاء صحفى مع الفنانة عائشة الفلاتية على جريدة الصحافة وادار الحوار الصحفى الراحل رحمى سليمان :



قلت لها وأنا أتأمل الـ «تي» الأخضر الموسوم على خدها: ايه اللي رماك في حكاية الفن دي.. ياعائشة؟ واسرعت تقول بصوت تشوبه رنة أسف: تقول شنو؟! وصمتت وكأنها أرادت أن تتجنب الحديث في هذا الصدد.. فمضيت أقول: ما هو لابد أن تكون في عوامل وظروف دفعتك في الطريق ده.. وانتي أساساً عندك المؤهلات والموهبة اللي بتجعل منك مطربة؟..


وسرحت عائشة بنظراتها بعيداً من خلال النافذة.. ثم قالت فجأة: أصله يا سيدي.. لما كان عمري زي سبعة سنين وكده كنت بندمج مع البنات في بيوت الأعراس واللعبات.. وعشان صوتي كان جميل وانا كنت معتزه بيهو جداً.. كنت دائماً بسيطر على الموقف واقوم بالهلولة كلها.. * وكنتو بتغنو شنو؟ * غنا النسوان الكبار.. ما ياهو.. أغاني السيرة والدلوكة.. ومرات غنا سرور وكرومه.. واوعى بالك.. في بيوت الأعراس ما بقعد في السباته عشان أرقص.. كنت مهتمة بس بأني اسمع واسرق الغنا.. * وبعدين؟ * بعدين شنو؟! ما اهلي زوجوني وانا صغيرة.. عمري 11 سنة.. واقول ليك الحق.. الحياة الزوجية ما عجبتني كله كله.. لاني بحب امرق اروح الأفراح.. والزوج من الزمن داك ما بدور زوجته تمرق من البيت.. قول الراجل زهج وطلقني! * جننتيهو يعني؟ * واطلقت عائشة ضحكة مزغردة ومضت تقول: بعدين يا سيدي.. قعدت فوق البيت.. مع أهلي يعني. * طيب .. برضه ما عرفنا.. الفن ده .. دخل في حياتك كيف؟ * اصلو ياود امي.. في واحد راجل صعيدي مولد هنا اسمه محمد زقالي بيعرفونا.. يقوم يجي من مصر واحد خواجه اسمه ميشيان .. ميشيان بتاع الاسطوانات.. ميشيان ده كان جاي يسوق غنايين يسجل ليهم اسطوانات في مصر.. طلب من زقالي يفتش ليهو عن واحدة بتعرف تغني.. قامو جوني فوق البيت وطلبو مني أغني.. وغنيت ليهم غنا الزمن داك البعرفو.. الخواجة انبسط جداً وكنت بتمنى يقول لي قومي تسافري معانا كنت عاوزة ابقى مشهورة.. قول ياسيدي.. الخواجة قال البنت صوتها جميل جداً وتقوم معانا.. أبويا حلف بي جدودو انه ما ممكن.. قال ياجماعة مصر دي انا ماشفتها.. كيف بتي الصغيرة دي تمشيها؟.. وبكيت وزعلت.. والخواجه قعد يترجى أبوي وقال انه مسئول عن أي حاجة تحصل لي.. وما أطول عليك ياود أمي.. في النهاية الخواجة عمل معانا كنتراتو بعشرين غنوة بي ستين جنيه.. مش معقول؟ ما الجنيه الزمن داك كان جنيه.. والدنيا مازي حسه..


منقـــــــــــــول!

[هيثم ابراهيم]

لرائعه بروعة هذا الوطن عائشه الفلاتيه عجزت الارحام ان تنجب مبدعه مثلها
شقت طريقها وخلدت للمراه اسم ومكانه وكان فى وقتها صعب الوصول لما وصلت اليه
اثبتت وبما لا يدع مجال للشك ان الموهبه هى التى يمكن ان توصلك للمج وليس الشكل كما يحدث الان
عانت ما عانت عائشه الفلاتيه من مرض السكرى فبترت يدها ولم تقعدها عن مواصله مسيرتها ولها تسجيلات تلفزيونيه وهى تغنى وهى مبتورة اليد
ثم بترت رجلها ولم تنسها المعاناه ان تتخلى عن روح الدعابه عندما سئلت ان يا عئشه بترت يدك وما زلت تغنين وبترت رجلك وما زلتى تغنين لتقاطع السائل وهى تقول وساظل اغنى الى ان يقطعوراسى

عائشه الفلاتيه رمز من رموز هذا الوطن الابى

تفاعت مع كل الاحداث

غنت للقوات المسلحه اعذب الاغانى

غنت للوطن

غنت للمراه

غنت للجمال



الا رحم الله عائشه الفلاتيه واسكنها فسيح جناته

[اوتارالحنين]

عندما كنت صغير كنت اشاهد المسلسل وكان وقت المسلسل لا يتكلم احد ابد واذا تكلمت تطرد من تلك الدائرة

العامرة بالاهل والجيران واللمة الحلوة وبقرب بيتنا بيت صغير يستمعون الى الراديو كانت غنية عائشة الفلاتية

من دار الاذاعة برسل ليك سلامي وانا استمع اليها يارب كيف كانت الايام حلوة والله الحين احاول اسمعها بس ما اقدر كل شيئ تغير حتى الجيران رحلوا وابكي بحرقة لما اسمعها في الراديو

[whiteangel]

ما حسب تقاليد المجتمع وغيرو
بس رابطة الدين اقوى من رابطة المجتمع والنسب
والدين بقول المرأة اذا خرجت من بيتها لا تخرج متعطرة ولا متزينة
وكمان الاخت راحت تغني
الله يغفر ليها ويهديكم

[الزهره البيضاء]

من اجمل واصفي الاصوات صوت عائشه الفلاتيه وبرضو بحس الفنانه منار الفي برنامج اغاني واغاني صوته قريب جدا لي صوت عائشه الفلاتيه

[فنجاطة]

الله يرحمها ويغفر لها

[ناجي عثمان عبد الرازق]

[align=center]
عائشة الفلاتية فنانة من الزمن الجميل ، شكرا صلاح محجوب
[align=center]
[/align][/size][/align]