المبدع حميدة :1\ مجادعات من السلم الفوقاني

[abu rawa]

الموضوع منقول ولجماله وحلاوة لغته نقلته لكم وكاتبه المبدع حميدة ويقول فيها
هذا الثريد عبارة عن مسجات بالموبايل تبادلتها مع صديقى العزيز ناصر الزين فى مناسبات مختلفه وناصر الزين هو راجل لذيذ جدا .. المسجات عبارة عن النم في النضم
حأحاول انزل منها البقدر عليهو عسى انها تستفز الهمباته !!

الموضوع الاول فى ذم اخونا وحبيبنا برجاس
وبرجاس هذا احد زملاءنا فى الجامعه وهو راجل ابو الدقيق جدا.. عشان كدا اتخصصنا فى تدويرو ومشاغلتو بكل ماهو مستفز ... والمهم هنا تعرفو صفات اخونا برجاس اول حاجه حسو مبحوح اربعه وعشرين ساعه وراجل مكلف جدا يعنى محل مايلقاك لازم يرسلك ولا يكلفك بى حاجه وشنبو كبير جدا هههههه يلا نبدا
طبعا ناصر هو الابتدا بالقطيعه


قال

برجاس أب حسوس آفة بيوت الناس
ما لاقانا زيو دا فاقد الاحساس
لو زارك نهار زول للنعم كناس
وان ماسيتو يوم بس خنقة اب كباس

عقبت انا


ياصاحبى الحبيب خلى النصيحة جرابك
برجاس اللعين ماتعدو من اصحابك
شان مايهجروك فى لحظة كل احبابك
ويضيع فى قلة الزوق والمهانه شبابك

[abu rawa]

عقب ناصر
برجاس السغيل قط ما مشكّر شكره
وابليس اللعين من طبعو ماخد دفره
الجو اللطيف يغشاهو يصبح عكره
كم عقد نفوس فرق امم مفتكره

عقبت انا


ود نجم* السغيل ياالله حلنا منو
من قومة الجهل فاضحنا ياخ بى جنو
كل الحسنوات شافوهو هربن منو
طوالى الحسس خايفنو زايغين منو
اب حساً دراش ان سمعوه يجرن منو
اب شعراً غزير غوريلا اصلو اظنو


*نجم الدين هو والد برجاس

عقب ناصر



شاحد الله الكريم باقى الحسيس يقطعلو
ينادى الناس دوام ومافى زول يسمعلو
ينكتم نفسو وتانى مايرجعلو
ولمان يتلحس الناس تسبو تنعلو

عقبت انا

ياصاحبى الظريف جود بالقطيعه عليهو
برجاس الكريه انشالله حمى تجيهو
ساءلك ياكريم يتقطعن اضنيهو
صوتو يظل فحيح ينبح ومايجاب ليهو
عينيو بالرمد يقعن على خديهو
الحلبى السغيل يحرق شعر كرعيهو

[abu rawa]

[U]عقب ناصر[/U]


كان برجاس غشاك اسمعها منى نصيحة
قوم دس الهدوم ماتسيب فتيلة ريحة
ماتدقس تسيبلو الفيرنا* بمفاتيحها
يدقش ليكا باب ويجيبها ليكا صفيحه
وان جاك فى الشغل خليكا زول تفتيحه
ماتضحكلو طب تديهو ضحكه مريحة


*الفيرنا: عربية ناصر

عقبت انا


ياناصر الاله هاك النصح ماتكوسو
الخير بين يديك بالقرقريبه تعوسو
والشر داك قريب فارش كراسى جلوسو
كان جاك الكريم بالحيل اقدلو وبوسو
وان جاك اللئيم بالبنية ارمى ضروسو
وبرجاس السغيل اعفص عليهو ودوسو

عقب ناصر



يازولى الحبيب قوماك نجر النمه
فى الزول الخسيس برجاس عديم الهمة
هاك طرف الحديث الانقطع ماتمّا
فى سيرة اب حسوس الخالى من الذمّه
ماقضّاى غروض مابتم ليكا مهمه
لو سافر رجع لاشال بجيب لاعمّه

عقبت انا بعد ان زارنى برجاس وتسبب فى تعطيل جهاز الكمبيوتر بهباشته


اسمع نصيحتى الغالية يامحبوبنا
برجاس السغيل قلّع نمر حاسوبنا
كان قايلينو سامى مكانتو جوه قلوبنا
لكن للاسف دا نسخه من مركوبنا

حدث بعد ذلك ان زارنى حبيبى برجاس لقضاء ليله معى بالمنزل وكان اليوم حارا جدا
فقلت

الشمس ام حرور الصالية راسى سخانه
مابحمل هجيرا ولا بطيق سيطانا
خلت يومى ضيق وقيامه بى نيرانا
والزايد بلاى خلى الرويح قرفانة
برجاس من امس قارن معيشتو معانا

وعقبت انا ايضاً

اللييييييييييل
برجاس اللئيم بايت معاى الليله
ماخلالو كيك شاى الصباح بالكيله
كرفاس للسرير هتّاك عروض العيلة
قرطاع للبن بالليل عشاهو فطيرة
نقناق كان صحا وكان نام نخرتو شخيرة
قال فاطر معاك ياسيدى شيل الشيلة

[فكي ريري]

موضوع جميل اخي
والنم من اجمل انواع شعرنا السوداني


واصل ... مجهود مقدر

[استارو]

ياحبيبنا ابوراء
عذبتو الراجل ياخ لاكين والله مبالغة
واصل نحن فى انتظار الباقى
ولى قدااااااااااااااااااام

[abu rawa]

موضوع جميل اخي
والنم من اجمل انواع شعرنا السوداني


واصل ... مجهود مقدر

يديك العافية عبي المرور الجميل

[abu rawa]

ياحبيبنا ابوراء
عذبتو الراجل ياخ لاكين والله مبالغة
واصل نحن فى انتظار الباقى
ولى قدااااااااااااااااااام

استارو يا فردة الباقي جاي في الطريق والشكر للمبدع حميدة
اخوك ابو روعة