الحسن الرزين
النايرة الصبوحة الليلة جات حلتنا
ليها زمن بعيد مما مشت خلتنا
من شفناها طبنا شفينا من علتنا
عمانا الفرح والبشرى جات طلتنا
****
زي الزعفران الريحة جات فواحة
شوف قدلة فريع البان حمتني الراحة
السبب القبيل خلاها زايدة جراحا
بارق نور بسيما ولحظتا الجراحة
****
ومهما قلت ادور احكي وأجيب اوصافا
حيرت الحروف احتار كمان وصافا
عفة وذوق ورقة وإحتشام ولطافة
والعين يالطيف من نظرتا ولصافا
****
ولى طبع الكرم مولاي جل هداها
عظّم شانا من دون الحسان اهداها
ادبا جم وخفة دم معاهو نباهة
ضاحكة بشوشة حسن الطلعة ليها براها
****
مابسلاها قلبي تملي يوت طاريها
وين ماتمشي حب الناس دوام باريها
قمر السبعتين في حسنو مابجاريها
سبحان الإله رب العباد باريها
****
حسنها بادي لكل الخلايق وظاهر
نورا يلالي يبرق ولى عيونا يجاهر
السبب البخلي عشوقا ليلو مساهر
جديا في الغرام والحب محنك وماهر
*****
زي الريلة نافرة وديمة طبعها جافي
شوفوا الصيدة خلت شعري فيها قوافي
الخلاني ادور لى نار قليبي مصافي
أبدً مابتفكر لحظة في إنصافي
