سامحني واصفح يا حبيب ساقوني منك بالغصب
ندماني ليه سبتك براك تتباكى في نص الدرب
طمني حالك انت كيف والبي يهون مهما صعب
انا اصلي زول احساسو مات من بدري معتاد الضرب
كم مرة شانك يا مناي من حنضل الآلام شرب
من خشمي تتقاطر دماي لو ينطق اسمك بالكضب
نفوني من نص الديار يوم عرفو اني انا ليك بحب
لكن كل ما زاد بعادي لقيتو شخصك لي قرب
سجنوني بين اربع حيط زربوني من جيهتك زرب
لكني شايفاك كل يوم هل طيف خيالك يحتجب
طالوني بالايد واللسان ما فيّ شيتا ما سلب
غير حبك الما قدرو يوم يصلوهو ما ساكن القلب
اغرب شي اني انا بي وراك بنزل واتهان وانضرب
لكني في لحظة لقاك بنساهو زي الكان لعب
وريتم انو انا لي حبيب لو خنتو بشعر بالذنب
ساقيني راويني المحبة ومن حنانو كمان شرب
يا اخوي زي ريدك ولادك برضي للمريود بحب
والله لو حاس بالعلّي ما بترضى بيتي انا يتخرب
زي ما بتدور لهم السمح لي برضو خير الدنيا حب
لكني القى الدايرا وين من ناس معين خيرن نضب
في شورة زي بيعة الملح باعوني في السوق بالجلب
وما راعو لي امي الدوام تتباكى شاني وتحتجب
باريت لي زول بالجتة بس بارنك الروح والقلب
انا قلبي لو فارق ضراك ما اظنو من بعدك كسب
متحملي الآلام براي شايلي الهموم ما بتتحسب
وما لقيت زول حس العلي قاسمني همي معاي تعب
عرفت صح ألم الضرب ما بحسو زول غير الضرب
الغربة كيف وعذابا نار ما بيطرا الا المغترب
فوضت لي الله الأمر وقتين من التحنيس تعب
مظلومة والمظلوم دعيوتو من الإله ما بتتحجب
بكتب لك اسع يا الحبيب متصبري وماسكي القلم
بكتب لك اسع والقليب مجروح يعاني من الألم
مكتوبي من شهر العسل شهر المرض وشهر السجم
ملفوفة بي كفن الزفاف والحنة في إيدي دم
مرقت من سجن الطغاة وقعت في الزل والوهم
قبلت بالواقع المرير آمنت بي أمر القسم
وقبلت بالدايرنو لي كم قبلي مظلوم اتظلم
ويئست من عيشة عذاب راماني في زول ما رحم
انسانة صرت بلا طموح بلا مباديء بلا قيم
وقنعت من الرحمة تب بس فيك ما انقطع العشم
ما زلت ياك مالك القليب رغم انو امري انا اتحسم
لا زلت بفخر بيك واقول انت الحبيب في كل ملم
ولا زلت بي اسمك بصيح لو حتى ساكت اتهجم
وبقولا قدام أي زول ما خايفة اصلو الموت هو كم
آخر رسالتي بطمنك أرجوك ما تشيل لي هم
خليك في عهدك معاي ارجاني ما يطولبك سئم
أحفظني في جواك فرح بلسم تداويبو الألم
زي حفظي ليك بين الضلوع انت وقليبي نجم نجم
اخواني سيبم يفرحو انا جرحي لسع ما التئم
يمكن ضميرن يوم يحس ويعرفو اني انا انظلمت
ويعودو شان يبنو الوقع كيفن بينو الانهدم
ديل ناس هوايتن الظنون ديل خلو عيشتي بلا طعم
ما سوو بي حكم العقل وما بيرضو بي الليهو احتكم
الناس بتتقاس بالعقول ما بالجلاليب والعمم
وانا ماسكي في حبل الصبر في الله أملي انا ما اتعدم
أرحل يا حمام شيل اشواقي .. وارجوك لا تغيب
وصل كل مشاعري وريدي لي دار الحبيب
قولو قليبي يا محبوبي غيرك ما بيطيب
واي ديار بلا عينيكَ فيها اكون غريب
السبب المعذب قلبي وخلى الراس يشيب
فراقك يا اعزّ الناس بعد ما كُت قريب
الشوق والحنين البيّ .. أكتبو ليك ملام
وخايف من يكون في غيبتي .. جابولك كلام
لو كان البُعاد نسّاكَ لي عهد الغرام
ما كان يا جميل تحرمني شوفك والسلام
ارحل يا حمام قول ليهو .. اصبر يا جميل
ولو مالت عليّ الدنيا .. عنك ما بميل
كيف انسى البلد والخضرة .. والنيل والنخيل
والوجه السحرني جمالو .. والطرف الكحيل ؟
مشتاق لي نجيمة تضّوي لي قلبي الطريق
وللبسمة التفيض حنية .. من ثغرو الرقيق
تهت انا في ديار الغربة .. لا زاد لا رفيق
وما كان يا زمان ترميني بي ما لا اطيق
ما فارقني طيفك لحظة في ليلي البهيم
وياما الشوق بِرجع سيدو لي دارو القديم
لا بد الزمان يجمعنا والحال يستقيم
وانسى ايام شقاي والقاكِ .. وارتع في النعيم
انا لما القاك وين القى كلام
ما الشوق بيزغرد فى عينى وقليبى يدق اجمل انغام
حاسدننا ليه الناس يا (شوق) فى دنيا نعيشا وداد ووئام
مانحنا حياتنا الماضى احزان والدهر بلاك شايلنو صيام
ياريتو زمنا يقيف لحظات يتعطل سيرا خطى الايام
وياريتو سماك يمتد خريف يتلملم غيم يجمعنا غرام
ياواقفه على انا قاعد ليه زعلان من نفسى ده يبقى حرام
لكنو عزاى انو الاحساس والشوق واقفين حيوكى قيام
وعزاى فى انو القمر الغاب فى وجهك ضوى الكون بسام
مااصلو حياتى بلاكى هجير ضلينى شويه ابقيلى غمام
الشوق السافر فى عينيك داير يرسى وشالو الهدام
والبرق الشال من قبلى يلوح ماجانى دعاش مع النسام
الحزن المنو مشيت لاقاى والفرحه على بتمر قوام
ببسم للناس من فوق غلبى وبى حالى البى الله علام
الدهشه تزيد كل ماالقاك مااقدر افرز كاف من لام
واشعر بى انى بعيد هيمان فى دنيا جميله من الاحلام
البسمة تفرتق شمل جيوش وعيونك احد من الصمصام
وانا بين( اليم ) والنار حيران وقليبى دوام فى البر عوام
يا محننة ايدى محنة وريد زودتى على قلبى الالآم
لمساتك كلها لهفه وشوق ونقوشك فى ايديه سلام
ياغاليه اهواكى على كيفى لافرض عليا ولا الزام
وراجيكى تكونى عشانى النور لو كل الدنيا بقت لى ظلام
صرخات على الهامش
فى دنيا منكوبه
كال الرماد حماد
والدنيا مقلوبه
تخطيط بلا خطه
ماخلى راكوبة
مالو الزمن ياناس
رجع خراب سوبا
شفنا الغبش كيمان منشرى فى الشارع
ضاقت بها الاحوال لكن بقى الوازع
وايمانا بى الله
والقسمة
والواقع
ايه يرجو من تخطيط خلى البيوت واقفات
يوم لعبت الواسطه
وشال حيطة الجامع
ياأهلنا الطيبين
فى كل بلاد الله
بيت الغبش ينهد
شايلاهو كراكه
احلامنا الحلوه
شايلاها كراكه
سيف الاسى الغدار
طاعننو فى احشاك
وجانا القدر محتوم
سايق نزير الشوم
شايلاهو كراكه
شيلو الصبر واسوق
طال ما الخطط صبحت
مجلوبه فوق السوق
ماكسرت ناس زيد
مااصلو زول مسنود
ماشال خطاهو فى يوم اندله( جزيره)
او كسر الواقود
او يوم نفخ للنار
طار فى وشى (الهبود)
بس ناس قريعتى عبيد
زولاً بسيط تربال لاعندو مال لاجاه
وفوقو انضرب خازوق
يالاغبش المكلوم
ارفع يداك لله وادعوه يامظلوم
دايرين يجينا زمان الخير يكون حاضر
نحصد مع الزراع
الفرحه فى باكر
زمناً يساوى الناس
الوزراء والعمال
القاضى
والتربال
والحال ده ياهو الحال
اصلو الحكم( قرقوش )
دخل الكلام الحوش
ابلع اهاناتك
صون حسك المقروش
ماالعين علا الحاجب
والناس بقت تنجر بى قوة للواهب
والفوضى والخزلان
ترتع مع الواجب
ياصاحب الدينار
دينارك الفضى
سيفك وقيثارك
امن خراب بيتك
والهندسى الفنان
لماهو دينارك
العار عليك ياعار
فكرت فى نفسك
قبال تراعى الجار
فى آخر المشوار
دينارك الفضى يستقبلك فى النار
آآآه يابلادى بلد
تضرب قفا اولاده
الغنو غنواتم من وحى انشاده
والشالوا اقلامن شان يرفعو اوتاده
عشقو البلد بالجد
وماحبو غيرو بلد
وكل العشق يازول لاجاب ولا ودى
اصلو البلد فوضى
لو كان ابيت ترضى
والمولد انفضه
آآآه يابلادى بلد
حاميها حاميها
غالب حراميها
والجمره حرقتنا
من قبل ماتحرق الكان هو واطيها
كل الغبش آآآآمين
صبراً مع التأمين
انو الظلم ساعات
والحق مصيرو يبين
آآآآه ياغبش وينكم
يالفاتو ماجايين
يالفوق جمر قاعدين
يالماتو بالآهات والحسره والاحزان
واللسه منتظرين
لابد يوماً ما
من خاطراً مجروح شايل معاناتكم
يطلع صلاح الدين
يطلع صلاح الدين
يطلع صلاح الدين
كنت بحلم بي لقاك واتمنى يحصل
كنت خايف قبل أشوفك عمري يكمل
كل زول وصف لي عنك ما قدر لي وصفك اكمل
كنت بسمع بي جمالك ولما جيت لقيتك أجمل
يا سبيباً زي سواد الليل تهدل
ويا جبيناً القمر من نورو يخجل
ويا عيوناً فيها ماس الريد موصل
ويا نغيماً يفرح الفي القيد مكبل
ما تعالي اشوف رقيصك ليلي أليل
أصلي جايي عشان اشوفك وبكرة ارحل
إنتي عدتي الذكرى لي قلبي المهمل
لي حبيباً ديمة عن أحوالو بسأل
ياهو شوقي وياهو آخر وياهو أول
ياهو همي وسر عذابي الما حيكمل
يا المهاجرة سنين وهجرك ليا طوَّل
في غيابك وى لصبحي وليلي اقبل
[align=left]محمد أحمد علي الحبيب[/align] [align=center]
[/align][/size][/align]
جرعة من السياسة العمدة
غير ادون بي صراحة نفسـي مـا بتلقالـة راحـة
يـا بنـات أشعـاري أنتـن العليكـن مـو شويـة
وانطلاقكن ما هـو هيـن ذي رصـاص البندقيـة
فيك لي التاريخ بـدون كـم حكايـات مـارا بـي
راسخي من زمن الطفولة وماخدي في الافكار مساحة
كان نسيت ما بنسي مرة في الصباح يوم جانا صايح
مو كتير والعمدة بـرة بـرة مـن عالمنـا سايـح
بـرة مـن دنيـا المضـرة الكتيـرة قليلـة رايـح
ولي في يوم من صباحوا وبقة قبـل النـور مناحـة
طاري في يومو اللي فارق جبنا زكراهـو العشيـة
مما شال من جارتو كبشاً دايرة لي عيـد الضحيـة
قلنا ليها أشكيهـو قالـت الا لـي اب ايـداً قويـة
اليشيل الدايرو يمشـي ربـي يخلفـة فـي مراحـة
أنزل الله السكينة لي قلـوب فـي الريـف بسيطـة
ماها ذي صخب المدينـة لمـن استرجـع شريطـة
ما بتحل الاسـرة دينـه الا مـن قطـع السبيطـة
كان هجير الحوجة راشـح النخيـل باقيلنـا واحـة
بعدها الايام توالـن فـي قفـا العمـدة وحكومتـو
انتقـل والرقـدة طالـت والبيرقـد قاسـي قومتـو
الزمن بي الفيهو جايط ما قطع لي العمـدة نومتـو
نومة لي ابد الاوابـد تانـي مـا بشـرق صباحـة
الملك يا عمـدة وينـك الاراضـي الليلـة ميـري
البحر مـا خلـه طينـك شالـو شـلال الدميـري
والزمـن شتـت عوينـك والحكومـات الكتيـري
بـددو الوارسنـو منـك الا بـس وش القبـاحـه
لا بهزنو الكـوارس لا الشمـوس يعـرف مغيبـه
لا الخريف كان جاهو كابس المطر يسمـع صبيبـه
لا اناشيـد الـمـدارس لا الطواحـيـن القريـبـه
خشمو من تالانا كارس في المقابـر مافـي راحـه
حتي الكلاب الكان تهو كان يجيـب العمـدة راسـه
بي رصاصاتو المدوزي ما بيقيـل كلـب الحراسـه
هسي جات بي قلب قوي رشـت الشاهديـن نجاسـه
فوقو نامت مطمئنـة هوكـان قبيـل يكـره نباحـه
المطر يا عمده قلـه وانكمـش فاصلـو المـداري
والعرب تنجيمة جل ضاقت الشر فـي الصحـاري
مالقت لي ريقـة بلـه جـات تشاركنـا الطـواري
والطواري زمانة ولى وقلـه بيـن النـاس نجاحـا
[align=left]محمد أحمد علي الحبيب[/align] [align=center]
[/align][/size][/align]
مرة صرح لي بي سؤال ... يوم لقاني كأني تمثال
مالي شايفك شارد البال ... قلت ليهو سباني الجمال
كان قريب وظريف الدلال ... ورغم قربو بعيد المنال
كالقمر في ليلة كمال ... في الضواحي يضاحك التلال
في العيون والجيد كالغزال ... يمشي كالطاؤوس باختيال
والقوام ممدود في اعتدال ... وفي طباعو بديع الخصال
محض صدفة ويوم كرنفال ... والبنات أنواع واشكال
كان أثر نظراتو ينهال ... في فؤادي كوقع النبال
قلبي من يوم شافو ما زال ... في الدرب إدبار وإقبال
أصلو مهمل وصدك الطال ... زادو فوق إهمالوا إهمال
[align=left]محمد أحمد علي الحبيب[/align] [align=center]
[/align][/size][/align]
أي لحظة معاكي كانت في سياج الماضي روعة
صرت بيها الليلة بحلم زي أمل تحقيقو بدعة
وكل شيء راجيهو يرجع ولي فات ما ليهو رجعة
وما محال من غير عيونك ألقى في دنيايا متعة
الظنون الفيكي عاشت وغيرت مجراك بسرعة
يا حبيب كان هواجس والهواجس ذاتا خدعة
والشموع الفي زفافك لما ضوت أخمدت جوايا شمعة
في غياهب نفسي كانت نور منور كل بقعة
إلا بس نيران فراقك ما محال تطفيها دمعة
[align=left]محمد أحمد علي الحبيب[/align] [align=center]
[/align][/size][/align]
بكتب ليك يا دوب يـا أعـز إنسـان
عن شوقي وغرامي الكنت كاتمو زمان
***
عـن حـالـي وحيـاتـي أشـعـار
ماضي الذكرى كان قبلك صعاب وودار
شايل همي كان ياهو الرفيق والجـار
بحكي ليكي عن زول بالغرام انهـار
وأثبـت ليكـي بالبرهـان
***
كثير عزة كانت لـي حياتـو أسـاس
جميل آلامو كانت ضمة ما بتنقـاس
مجنون ليلى منسوب ليها بين النـاس
عنتر عبلة كان من أشهر الفـراس
بالغ فـي غرامـو زمـان
***
طه وريا ما شفتي الحرب كيف كـان
طالب شندي كان يلقالوا فيها أمـان
بس قوليلي كيف كانت حياة سيـران
كدَّر نفسوا مات في ظلمة الحرمـان
كلوا عشان تعيس روكسان
***
بكتب ليكي واشرح ليكي يـا نعمـات
حالـي البـيَّ زايـد منهـم مـرات
عايش في هموم ما بتطـردن آهـات
وآلامي وجراحي أنا برسلن نغمـات
دايمـاً والقلـب ولـهـان
***
باقي آمالي وا أسفي الشديد لـو راح
قاتم ليلي ما شايف بلاكـي صبـاح
يا نوري وسعادتي ومنبـع الأفـراح
راجـي سعادتـي بيكـي ارتــاح
ويصبح كوني بيك طربان
***
غاض الطرف دايماً ما بيصيب مرماك
سيوف الهند ما بلغت فعـل عينـاك
وحات اسم الله ما ظنيت يوم أنسـاك
وما ظنيت أواجه الدنيا تانـي بـلاك
وما شايف عليها إنسـان
***
بكتب ليكي مـا طلـع النجـم بالليـل
وبكتب ليكي ما ارتفعت ضفاف النيل
وبكتب ليكي ما رقرق عليهـا ضليـل
بكتب ليكي لامن تبقـي لـي دليـل
ويكون الهم زمان وزمـان
[align=left]محمد أحمد علي الحبيب[/align] [align=center]
[/align][/size][/align]
يا صفق النبت لي شيخ يصين التربة
بالليل والنهار وابل سماك ما غبا
***
بروق الساري لما تسيل تحاكي فؤادي أنا الخفاق
رعود الساري لما تكر تحاكي صداكي في الأعماق
مياه الساري لما تسيل تحاكي دموعي إلا دموعي مابتنطاق
أنا الجاكي وأنا الشاكي وأنا الباكي وأنا المشتاق
***
أنا الشايلك شموع وأخفيكي لو ريح السمايم هبا
أنا الزارعك ورد وأسقيك دموع لو كان مطر ما صبا
***
أنا المستني شوفتك عملت المستحيل ومحال
أنا الرسلت اشعاري بعد صفيتا بالغربال
أنا الجنيت وأنا الغنيت كلام لا قالوا لابيتقال
وكتير فكرت واتحيرت في قصة شقاي الطال
***
يا صفق النبت لي شيخ حريص طوالي
بالليل والنهار وابل سماك متوالي
***
حكايتي معاك عميقة عميقة واصلة القاع
قصايدي وراك جروح مطوية ما إبداع
حياتي بلاكي ما بتنطاق ومشوار بي وراكي ضياع
ومظلوم كوني من بعدك معلم الله من إشعاع
***
حياتي معاكي شن بتقولي غير دمعاً غزير انكبا
أو زولاً مصارع الموج في بر الأمان ما طبا
***
يا ست الحروف الخمسة لمان تحذف التعريف من الإخلاص
حكايتي معاك سنين وسنين طويلة خلاص
حكاية زول مرق ما عاد واتخلطت دروب ما فرزا القصاص
أنا الحبيت عيونك ولسه ما شفتك وشاعر بي بريقا رصاص
***
أنا المستني فوق قمم السهاد لو تدري حبك في الضلوع اتربا
حباكي الفؤاد من بدري يا ريت الفؤاد ما حبا
[align=left]محمد أحمد علي الحبيب[/align] [align=center]
[/align][/size][/align]
يا ست العيون الناعسة والخصر النحيل
ذكراك في الخيال تتمارى كل ما جنَّ ليل
لو قلتي ما بتدري العذاب البيَّ طبعاً مستحيل
عشان بحر الحنان واللهفة في عيني دليل
كم عانيت كم ساهرت كم من ليل وليل
كم ارسل دموع بالحسرة فوق خدي تسيل
وابحر في خيال أحلامي واتمناك خليل
تخفف لي مصايب الدنيا والعبء الثقيل
كم اتمنى اصبح زي حزام أو شنطة من هذا القبيل
أو اصبح كدمع الفرحة فوق خديك أسيل
ولو عبرت خواطرك حارة زي ابن السبيل
من أول نظرة لي عينيك للطرف الكحيل
اتخيل حروب الردة والسيف والصهيل
حسيت بيكي في نفسي وفؤادي عليك يميل
ومرت بي خيوط من ذكرى للماضي القبيل
اتذكر ركوب الساقية عند ساعة الأصيل
ومن قادوس يضري الموية رشاني العليل
مرت بي صور من ماضي زي حلماً جميل
ود شيخ والعشم زمراوي وأولاد كرنقيل
في نص المقات راكوبة فيها شباك وتيل
وشنطة من غير طبلة مفتوحة وفتيل
آه لو لقيت مرادي أرجع تاني أخش وأرفع واشيل
وأدردق في الضهر حلفاية عن ساعة المقيل
يا قلبي المعذب ديمة حب الماضي بي كتلك كفيل
مالك والعيون والبسمة والشعر الطويل
بحلف ليك يمين لو طرت لي خير الله ما بتلقى البديل
منو الغيروا اتخنق بالعبرة لحظات الرحيل
يا ما ناس في الدنيا ما بيرضو المثيل
وياما ناساً قنعوا بالرزق القليل
كنتي يا عهد الطفولة الماضي كالظل الظليل
كني زي جنة سندس وسلسبيل
[align=left]محمد أحمد علي الحبيب[/align] [align=center]
[/align][/size][/align]
كم بكينا على الأماسي بي كلام منظوم مسطر
تحسب الناس نظمو ساهل ونحن فيهو دمانا تقطر
فيهو نسكب دم قلوبنا كان تبين ماساتنا تظهر
كم بكت ناس لي بكانا وفي مشاعر غيرنا اثر
ولينا كم يصبح مراكب لو سماكم يوم تعكر
فيهو ريح الهم يشيلنا في بحار أشواقا نعبر
جيتو تسألو عن عواطف زي شجر بستان مغبر
إنطوت أيام ربيعو وحتى لون أوراقوا إصفر
والجفاف في ارضو يسري كل يوم بي صورة أكبر
إلا كان لقية عيونكم زي معالم موسم أخضر
لو سمحتم ميلوا إنتم علموا البان لو بيقدر
عيدوا للبستان نضاروا ولموا كل الكان مبعثر
يا حليل زولاً معذب في ديار الغربة عبر
عن مشاعروا وريدوا ليكم ولي بنات في قوزنا بُكَّر
ديمة يلهج بي غناكم وبرضو يحسب نفسوا قفر
لسه ما اتبارك جديدو وما وقف في داره بشر
قولو عرسك بيهو نسعد بالفرح لا حدي نسكر
كان يزيل ظلمة ليالي والدجى الفي دارنا عسكر
[align=left]محمد أحمد علي الحبيب[/align] [align=center]
[/align][/size][/align]
يا دنيا ما تنسيني يوم كان أسعف القلب الجريح
خليني افرح مرة فيك قبال يعاودنا المسيح
ريح الهموم لمان تهب تقفل منافذ كل ريح
ضاقت رحابك في العيون بالرغم من كونك فسيح
يا دنيا يرحمني الإله يا دنيا آه
آه يا زمن يومي الرسمت على السطور
باقات حنان محفوفة بي ورد الزهور
يوم انفجر فيَّ الحنين وأصبحت ما ياني الصبور
يومي الحكيت سراً قديم طاويهوا آلاف الشهور
يا دنيا يرحمني الإله يا دنيا آه
شاء الكريم رغم البعاد أكتب حروفك وارسلا
قاعد أعاتب في البريد يمكن يكون ما أوصلا
ومرات أقول باكر ترد تمسح جروحي وتغسلا
واليوم يفوت وتفوت شهور واطاتا كيف إتحملا
يا دنيا يرحمني الإله يا دنيا آه
مهما حصل أنا مابلومك يا عنيد
أملت منك في جواب لكنو كان أملاً بعيد
آه يا زمان بكيتني من أعماقي والبكا ما بيفيد
من بدري قنعان من هناك ما أظني تاني أكون سعيد
يا دنيا يرحمني الإله يا دنيا آه
آه يا زمن وآهاتي فيك متلاحقات
آه يا زمن من نار لهيب الذكريات
رحلة خيال فوق النجوم الساريات
وألسن لهيب شربت دموعي الجاريات
يا دنيا يرحمني الإله يا دنيا آه
[align=left]محمد أحمد علي الحبيب[/align] [align=center]
[/align][/size][/align]
بالله يا بلدي العزيز أهديك قصائد كالدرر
أحكيها لي باقي الشباب إنشاء الله تبقالن عبر
هاك من نصائح زول حزين طول عمروا والاهو القدر
بالعبرة والشوق الدفين في الدنيا من دون البشر
لا تحسب الأيام نعيم طوالي لا أبد الدهر
مهما تكون قيمة صفاك لا بد من موسم عكر
زي نيلنا في وكت التساب لو فجأة مجراهو انحدر
لا تمشي في درب الظنون من غير دليل وبلا اثر
ما اصعب السير في وعور في ليلة جافاها القمر
ولا تجري في درب الشرور يصبح فؤادك من حجر
وما أجمل الزول لو سريع تلقاهو في غلطة اعتذر
لا تدي سرك لي غريب مهما يكون لو فد نفر
باكر يعم ناساً كتار في لحظة تلقاهو انتشر
كم من هناك زولاً ضحوك لكنو زي لبن العشر
يعميك لو طار في العيون يؤذيك بالنوح والسهر
ولو كان معاك زول في نعيم ما بان عليهو ولا ظهر
والعرقو مر زي الحراز يتحتى في زمن المطر
بالله لا تمنع جناك يحرس بناتك في حذر
ما الزهرة من دون الغصون لا بد يغشاها الضرر
بهديك كمان دواء للنفوس تلقاهو في عطر الزهر
في روضة مرابا النسيم لو قمت ساعات السحر
وأهديك جواباً لي سؤال لو مرَّ بي خاطرك عبر
الريدة لو عجز اللسان تلقاها في عمق النظر
بالله يا أهلي العزاز وين المدايح والسير
كم مرة من عز الهجيع صحاني صوتاً كم نقر
يا حليل زمن ناساً كبار صنعو السواقي من الشدر
يا حليل حياض زمن الرفاق ملياني بي طير البقر
يا حليل هناك زمني الصغير قضيتوا في ليلات غرر
عشناها في تمر الحبيب ننجارا بي فوق البحر
[align=left]محمد أحمد علي الحبيب[/align] [align=center]
[/align][/size][/align]
غريبة عجيبة يا دنيا وعجيبة غريبة يا أقدار
أنا المتعود الأسفار
***
أسافر في عيون واحدين بلا أعرف اساميهم
يتم الحول ونتآلف وأكون معتاد ألاقيهم
أشوف الحب وكل الحب مجسد في أحاسيسهم
ورغم الكان أفوت مجبور وأبحر في مراسيهم
أتوه من تاني في الأخطار
غريبة عجيبة يا دنيا وعجيبة غريبة يا أقدار
***
حكايتي معاك حكاية خوف من المجهول
حكاية زول يحب الناس يذوب بالحسرة للمعزول
أحاسيس زول بيحيى وحيد وفي نفسوا الأمل مكتول
خمسة سنين ينادي عليك يدق في بابك المقفول
أنا المحــتا ر
غريبة عجيبة يا دنيا وعجيبة غريبة يا أقدار
***
لحظات عابرة نتقابل ونتفرق مع الأزمان
تبقى الذكرى في القلبين ترن في عالم النسيان
أهي الأيام بتتداول صيف وخريف فرح واحزان
وبرضو الناس بتستحمل عجيب ما أغرب الإنسان
زمان متقلب الأطوار
غريبة عجيبة يا دنيا وعجيبة غريبة يا أقدار
***
عجز الديك برغم الريش عن الطيران
ومن دونن ترا الوطواط محلق في فضا الجدران
وناس محتارة بين امرين وأحلاهم هو الحرمان
وناس بتنادي من طابقين منازل شامخة في البنيان
بيوت تسخر من الأشجار
غريبة عجيبة يا دنيا وعجيبة غريبة يا أقدار
***
وحاتكم يا أعز الناس وحات الفي القلوب مشتول
حنانكم زاد عن الأوصاف وفات الواضح المعقول
وحات عينيكم الحلوين مهما المدة بينا تطول
حروفكم ناحتة في جواي دروب السوسة في القندول
حنين يقدح ضلوعي شرار
غريبة عجيبة يا دنيا وعجيبة غريبة يا أقدار
***
وحاتك يا خفيف الروح وحات الفي الضمير مدسوس
وحاتك لما أشوف عينيك بنسى الواقع المحسوس
واشوف دنيايا مابتنشاف قصور مبنية في فردوس
أعاين ليها بالإحساس وعن ذاتا النظر محبوس
خيال السارح الأفكار
غريبة عجيبة يا دنيا وعجيبة غريبة يا أقدار
[align=left]محمد أحمد علي الحبيب[/align] [align=center]
[/align][/size][/align]
أصلوا شوقك لو بتعلم من زمان مـا زاد ملكنـا
أما ريدك ماشي زايـد والبعـاد باقيلنـا محنـة
فوق سعير نتملى دايماً نبكي كل ما جاتنا نسمـة
نذكر أيامك معانـا كنتـي فـي عينينـا نعمـة
خلو زولك يبقى تائه تبقى كـل دنياهـو ظلمـة
والعذاب آخر مصيروا لو يطير مكتوبلوا قسمـة
يا حليل أيام زمانـاً فـي ربيـع أيامـوا عشنـا
كنا في قمراتنا نسهر لا بنكـل لا يـوم نعسنـا
كانـت أيامـك معانـا خيـرة أيامنـا وفرحنـا
الحنين ما ليهو زايـد والدمـع والنـوم غلبنـا
كم نقول ذكراك نسيبا ونترك الماضـي الهجرنـا
في القمر والليل يجينا نلقـى للأشـواق رجعنـا
لي دياركم كم نساسق حتـى بالساسـاق فترنـا
لو نمد جملة مشينا كنـا فـي الظهـران مرقنـا
في طريقك كم نعاني قالوا بعض الناس مرضنـا
ونحن في الأشواق نعالج لا علاج لا نوح نفعنـا
بالعذاب واشواقنا نحن نبكي فوق طاقاتنـا زدنـا
وإنت كل الفات نسيتوا واتكتم في جوفنـا نحـن
بي لقاك ما زلنا نحلم ما انقطع في الشوق عشمنا
قلنا بس دايرين نشوفك بالغلط مـا جـاد زمنـا
في غيابك نحن نكتب بالدمـوع أبيـات شعرنـا
علو يحكي البينا حاصل بالألم والشـوق فقدنـا
[align=left]محمد أحمد علي الحبيب[/align] [align=center]
[/align][/size][/align]
