بكتب ليك يا دوب يـا أعـز إنسـان
عن شوقي وغرامي الكنت كاتمو زمان
***
عـن حـالـي وحيـاتـي أشـعـار
ماضي الذكرى كان قبلك صعاب وودار
شايل همي كان ياهو الرفيق والجـار
بحكي ليكي عن زول بالغرام انهـار
وأثبـت ليكـي بالبرهـان
***
كثير عزة كانت لـي حياتـو أسـاس
جميل آلامو كانت ضمة ما بتنقـاس
مجنون ليلى منسوب ليها بين النـاس
عنتر عبلة كان من أشهر الفـراس
بالغ فـي غرامـو زمـان
***
طه وريا ما شفتي الحرب كيف كـان
طالب شندي كان يلقالوا فيها أمـان
بس قوليلي كيف كانت حياة سيـران
كدَّر نفسوا مات في ظلمة الحرمـان
كلوا عشان تعيس روكسان
***
بكتب ليكي واشرح ليكي يـا نعمـات
حالـي البـيَّ زايـد منهـم مـرات
عايش في هموم ما بتطـردن آهـات
وآلامي وجراحي أنا برسلن نغمـات
دايمـاً والقلـب ولـهـان
***
باقي آمالي وا أسفي الشديد لـو راح
قاتم ليلي ما شايف بلاكـي صبـاح
يا نوري وسعادتي ومنبـع الأفـراح
راجـي سعادتـي بيكـي ارتــاح
ويصبح كوني بيك طربان
***
غاض الطرف دايماً ما بيصيب مرماك
سيوف الهند ما بلغت فعـل عينـاك
وحات اسم الله ما ظنيت يوم أنسـاك
وما ظنيت أواجه الدنيا تانـي بـلاك
وما شايف عليها إنسـان
***
بكتب ليكي مـا طلـع النجـم بالليـل
وبكتب ليكي ما ارتفعت ضفاف النيل
وبكتب ليكي ما رقرق عليهـا ضليـل
بكتب ليكي لامن تبقـي لـي دليـل
ويكون الهم زمان وزمـان
يا صفق النبت لي شيخ يصين التربة
بالليل والنهار وابل سماك ما غبا
***
بروق الساري لما تسيل تحاكي فؤادي أنا الخفاق
رعود الساري لما تكر تحاكي صداكي في الأعماق
مياه الساري لما تسيل تحاكي دموعي إلا دموعي مابتنطاق
أنا الجاكي وأنا الشاكي وأنا الباكي وأنا المشتاق
***
أنا الشايلك شموع وأخفيكي لو ريح السمايم هبا
أنا الزارعك ورد وأسقيك دموع لو كان مطر ما صبا
***
أنا المستني شوفتك عملت المستحيل ومحال
أنا الرسلت اشعاري بعد صفيتا بالغربال
أنا الجنيت وأنا الغنيت كلام لا قالوا لابيتقال
وكتير فكرت واتحيرت في قصة شقاي الطال
***
يا صفق النبت لي شيخ حريص طوالي
بالليل والنهار وابل سماك متوالي
***
حكايتي معاك عميقة عميقة واصلة القاع
قصايدي وراك جروح مطوية ما إبداع
حياتي بلاكي ما بتنطاق ومشوار بي وراكي ضياع
ومظلوم كوني من بعدك معلم الله من إشعاع
***
حياتي معاكي شن بتقولي غير دمعاً غزير انكبا
أو زولاً مصارع الموج في بر الأمان ما طبا
***
يا ست الحروف الخمسة لمان تحذف التعريف من الإخلاص
حكايتي معاك سنين وسنين طويلة خلاص
حكاية زول مرق ما عاد واتخلطت دروب ما فرزا القصاص
أنا الحبيت عيونك ولسه ما شفتك وشاعر بي بريقا رصاص
***
أنا المستني فوق قمم السهاد لو تدري حبك في الضلوع اتربا
حباكي الفؤاد من بدري يا ريت الفؤاد ما حبا
العيون في حسرة تدمع والفؤاد مشتاق ومغرم
والزمان بي طبعوا ظالم خلى كل ايامنا مأتم
ما خلاص سبتينا إنتي وتاني كيف من شروا نسلم
وكان وجودك لينا واحة وراحة للمحتاج ومعدم
لو ربيع ماضيكي ولى برضي بي رؤياكي بحلم
في رجاك لامن أروِّح أو أعيش وأشيخ وأهرم
فيكي كم غنيت قصايد وفيكي ضقت المرة علقم
وإنتي كنتي سبب غنايا وصرت بيكي شهير ومَعْلَم
يا ما أبكي وراك وانوِّح بي فؤاد بالشوق مفعَّم
لا بيشوف لا حتى يسمع زي كفيف وأصم وأبكم
ولما ضاق الحال عليا ومن وراكي نهاري أظلم
سبت أرض القوز رحلت وفيها كنت عزيز مكرم
جيت مسافر للمداين قلت نار الغربة أرحم
وكنت عارف بكرة بحزن ولي فراق أصحابي بندم
وفيها لفيت لي شبيهك بس عشان ألقاهو أنعم
وما لقيتو ولا حألقى وما أظن والله أعلم
لما اسرح في عيونك كلي بتفتح مشاعر
وأبدأ أكتب ليكي غنوة قبلي ما غناها شاعر
في عيونك شفت حسنك يبتسم للدنيا ساخر
روعة تتحدى الروائع وليها حق ما نوعا نادر
زي شجاعة ناس بلدنا البيها دون الناس نفاخر
نحن ماضي ونحن حاضر ونحن كل الجايي باكر
لا تظني هواكي عايش في القلوب من غير أواصر
في سبيل عينيكي إنتي نحن بالأرواح نخاطر
قولة أحبك لو بتكفي حبي ليك ما ليهو آخر
والعجيب من قبلك إنتي قلبي كان بالريدة كافر
يا سلام لمان أشوفك وفجأة يخطر لي خاطر
وألقى كل الكون بيضحك وأي منظر فيهو ساحر
في عيونك واضحة نفسك إنتي جوهر ما مظاهر
إنتي خيط من نور بيسطع في ظلام أعماقي باهر
إنتي سر جوايا غامض عقلي عن تفسيرو قاصر
وإنتي حب في قلبي خالد لي مدى الأزمان يعاصر
كل لون زي لون سبيبك يعترض قدامي عاكر
ألقى وجهك نور بيكسح لي جيوش الظلمة داحر
إنتي ما ملكة زمانك إنتي ما عقد الجواهر
بستعيد لحظات لقانا وأرعى نجم الليل مساهر
عقلي يستعرض مناظرك زي شريط من ذكرى عاطر
إنتي أعظم من خيالي إنتي شي جوايا ثائر
إنتي أعمق من غنايا وإنتي أول وإنتي آخر
هدام الزمان وراها كيفن تستغل النيل
بعدما إستوت وإتفدعت للشيل
***
غاصت فى مياهو الصافى
ما زى البجيبه السيل
يا نخلتنا رحلة عافى
ودعى من ديارنا نخيل
***
جوز من قمرى أمنا زاتو
طوَّل بين جريدا نزيل
طاحت بى عشيش أولادو
وأطعمت السمك فى النيل
مالت وإنتكت قنعانى
من بلداً وطاها الفيل
فى رحلة علاج مجانى
لى أرض الكنانه عديل
***
بجبوج من بداية الرحله
تتبكى ودموعا تسيل
جزيرة أم سيوف زى نحله
خاشى على ديارا دخيل
***
سارت فى طريقا براها
لا تأشيره لا بهديل
لا حر السفاره صلاها
لا صوت العسس والخيل
***
الشاطراب مغارب جاتا
مرَّت فى طريقا طويل
مديسيسه وجميع جاراتا
هداها الحزن بالحيل
ظلت طمبنارتى تنادى
ما عارفاها بى كم ميل
فاتت تنقسى وبى غادى
مارى مرور كرام بالليل
***
زارت ناوا بعد الهجعه
سهرانه ومناما قليل
لكن ضاع طريق الرجعه
وين تلقالو تانى سبيل
***
كان لى صاى وكان لى عبرى
عارفات المقالب ديل
قالت ليها مهما تجرى
ما حتلقى ليهو بديل
***
يبكى على فراقا نخيلنا
من الكُرشه للقنديل
ود لقاى وحتى مدينَّا
والبركاوى صبرو جميل
***
ما سمعت نصيحة أُماتا
إتمادت عنادا هبيل
سارعت و أسرعت خطواتا
خشت فى البحيره عديل
عاشق عيونك من زمان لكن خطاي مترددة
خايف يكون دربك عذاب وطرق جحيم متعددة
إخلاص صراحة اقولا ليك حبك حقيقة مؤكدة
لكني شايف بالغيوم اقطار سماكي ملبدة
حبك مفاتيح الهنا وأبواب هنايا موصدة
قوة شعور فوق الوصف شعلة حماس متوقدة
***
والله دايماً في الخيال إسمك حروفو مرددة
لكني بي طبعي الخجول صبحت حياتي معقدة
أكتب أحاسيسي وصبور والناس تقول متبلدة
لكني مهما أكون صبور قدراتي برضو محددة
حبك مفاتيح الهنا وأبواب هنايا موصدة
قوة شعور فوق الوصف شعلة حماس متوقدة
***
يا أنهر غرام شرب الفؤاد من منهلك
يا نور عيون تاهت كتير قبل اوصلك
هاك من منابع ريد غيور ما بيرضى للتوب يلمسك
وحتى الزمان رباكي شالك من صغِّير وقبلك
حبك مفاتيح الهنا وأبواب هنايا موصدة
قوة شعور فوق الوصف شعلة حماس متوقدة
***
والله يا إخلاص أحبك وقصدي يوم ما تعرفي
خايف أواجهك بالغرام من عيني باكر تخسفي
يكفيني إنك تكتبي من غير قصد في أحرفي
لكني لا بسعد بلاك لا من عيونك بكتفي
حبك مفاتيح الهنا وأبواب هنايا موصدة
قوة شعور فوق الوصف شعلة حماس متوقدة
***
يا ابنة الماضي السحيق كم للفؤاد فيك عربدة
كم عشت ايامك ربيع واليوم حياتي منكدة
مهما تجور الدنيا بي مهما تكون متشددة
يا منبع الحب العميق ذكرة هواكي متجددة
حبك مفاتيح الهنا وأبواب هنايا موصدة
قوة شعور فوق الوصف شعلة حماس متوقدة
والنسمة تعبث بالنخيل بتذكرك في كل شيء بتذكرك
بتذكرك والكون بيعكس في المياه
لون الغروب إبداع عجيب أجمل صور خلقا الإله
صور المراكب راسية في الشاطي القريب
لوحات جمال منتشرة في كل اتجاه
بتذكرك والليل بيطمس كل لون عند الغروب
والناس بتحسس خطاها على الدروب
غرقانة في النور الضئيل بتذكرك في كل شيء بتذكرك
بتذكرك في ليل مثير فيهو القمر بلغ الكمال
بتذكرك في هجعة التلت الأخير والنور يضاحك في التلال
والساري أضناهو المسير والنوم يداعب في جفونو مع العليل
بتذكرك في كل شيء بتذكرك ساعة السحر
والنور بيولد من جديد والنسمة تلثم في الزهر
والنور بيشرق بالأمل ممتد على الأفق البعيد
والكون بينهض في كسل من رقدة الليل الطويل
بتذكرك في كل شيء بتذكرك
بتذكرك في يوم خريف لمعان بروق ورزاز خفيف
والجو بينذر بالمطر بتذكرك في زوبعة رعدو المخيف
والريح تزمجر في الشجر والقرية تسبح في الغيوم
في يوم نهارو كأنو ليل
بتذكرك وألقاكي في جيش من سحايب انفتح
مشطورة بي سيف الشعاع مرسوم عليهن قوس قزح
بتذكرك والطيب غمر كل البقاع والطير يغرد بي فرح
لوحات طبيعة بدون يراع أوصافا فوق المستحيل
بتذكرك في حر شديد زي شوقي ليك ضلل عيونو من الصواب
كم شفت في الأفق البعيد غابات شجر غرقانة في بحر الرهاب
والجو بيبعث بالضجر والروح بتحلم بالشراب
شادد رحالي ورا السراب أصبحت زي ابن السبيل
بتذكرك في ذكرة الماضي السحيق
بتذكرك وأنا جد حزين
بتذكرك في هوة النوم العميق
والروح تعانق في الخيال في لحظة ترجع كم سنين
بتذكرك والموت يحول دون العشيق
كيفن أموت أنا مرتين
بتذكرك ساعة وداع والناس تجهز للرحيل
بتذكرك واتذكرك في كل شيء بتذكرك
السنين بتدور وتمضي وكل لحظة بلاكي مرة
واي غنوة اقولا بعدك خالية من كلمة مسرة
وكل ثانية تمر عليَّ بقول أحبك ألف مرة
ولو جمعت الدنيا بعدك حتى ما فوق المجرة
مابتعوضني الفقدتو وما بتعادل منو ذرة
***
كيف أطيق الدنيا واسعد وقطعة مني تكون بعيدة
عايشة في تحنان وإلفة وتاركة في جروح عديدة
ما حقيقة صعب عليَّ من بعد أيام سعيدة
فجأة أشعر إني تائه في ظلام نفسي الوحيدة
وفي عيوني الكون بيظلم كل لحظة تمر جديدة
***
السنين بتدور وتمضي وبرضو يمضي معاها عمري
وغصب عني فضلت صابر إلا آه ما بيجدي صبري
قصدي بس داير اشوفك لو رجعت سريع وبدري
مين بيعرف بكرة يحصل مافي زول بالدنيا يدري
يمكن الأيام تعجل وتنطوي الأسرار في صدري
أحرف ضياع بهديها ليك مكتوبة بي دمع الشجن
مدفوعة بي موجات حنين كان تلقى في قلبك وطن
كم كنت بي حبك سعيد وعادت عليَّ سنين دجن
زجتني في ظلمة جفاك ولبست هجرانك كفن
عهد النعيم الكان معاك قضيتوا زي أحلام وسن
كان نعمة من فضل الزمان والليلة دفعني التمن
نوب الدهور زادن علي خلتني أدمنت الحزن
وأصبحت زي شجرة عذاب مغروسة في أرض المحن
وما أحزنك جور السنين خليتو يطويني الزمن
لكن منايا تكون سعيد لو حتى أيامك مضن
يا ريتني أخترق العهود وأعبر معاك خلف الزمن
لا تمضي من عمرك سنين لا بكرة يغشاك الوهن
صدقت العيون وكلام المحنه ... هنانى بحنانه لما على حنه
.. قال لى كلمه طيبه .. كانت منه حلوه ..
مين غيره البيزرع أيام عمرى .. جنه ..؟؟
***
فصل الحب قصير من البدايه .. والأيام تمر وتمر الروايه ..
عشنا الدنيا شفنا .. شفنا الكون حكايه..
البصبر عليها ... بيلقى فى النهاية ..
قال لى كلمه طيبه .. كانت منه حلوه
.. مين غيره البيزرع أيام عمرى .. جنه .. ؟
صدقت العيون لما بقيت أسيرها..
عشقت الموجه ترقص .. ترقص فى الضفيره..
وشفت النور هناك .. والشامه الصغيره
... بتقول للخدود .. أحلام الأميره ..
قال لى كلمه طيبه .. كانت منه حلوه ..
مين غيره البيزرع أيام عمرى جنه ..
****
صدقه العيون تعكس لى ضياه .. ويزيد فى حنانى ..
وأسبح فى شذاه .. غرد يا كنارى .. واسجع من غناه .
وأرقص يا فؤادى .. واسعد بى هواه ..
قال لى كلمة طيبه .. كانت منه حلوه ..
مين غيره البيزرع أيام عمرى جنه ..
صدقت العيون يا ملهماتى .. ولقيت فكرى تايه..
وين أغنياتي.. الصادح بلحنى .. والمالك حياتي..
ألقاه ليه.. ليه ما ألأقى ذاتي...؟
قال لى كلمة طيب.. كانت منه حلوة
.. مين غيره البيزرع أيام عمرى جنه ...
***
مشاعر حنانى ... وكل ما أعاني..
من أسمى المعاني ونغمة لسانى ...
ألحان المودة .. تقول حبه تانى ..
حبيت فيه فرحه .. وشوق للتسامى..
قال لى كلمة طيبه .. كانت منه حلوة ..
مين غيره البيزرع أيام عمرى جنه...
الميزه الرقيقه ... تزيد فى علاه...
عرفت الدنيا غنوه … ولى أحبابها حلوه..
تقول ليها العيون .. .. وتكون من صداه..
تغرد للمحبه .. وتزيد من هيامي..
قال لى كلمة طيبه .. كانت منه حلوة ..
مين غيره البيزرع أيام عمرى جنه..
عيونك كانوا فى عيوني ... يصدوني وينادوني...
أخاف لو قلت حبونى ... وأقول يمكن يحبوني
عزوني ويصافونى ... عيونك كانوا فى عيوني..
أصبر بي هواك البال ... وأزرع قلبى بى الآمال ..
عشقتك وكنت عندى خيال .. مجرد حبى ليك محال
أداريه واخليه .. واخاف من قلبى يحكيه ..
عيونك كانوا فى عيوني ..
****
ظروفنا تحرم اللقيا ... تعادى الحب ولو طاهر ..
يعيش فى خوف من الدنيا ... يكون مكتوم وما ظاهر
فكيف احساس ... تحسه الناس... نضيق بيهو ...
ونعاديه ..وكل الكون يشك فيه .. عيونك كانوا فى عيوني..
****
حبيبي لانك انت عفيف ... رقيق بتخاف من الأشواق
تعال .. نتحدى حتى الخوف ... تبوح بهواى ..
وأقول أهواك ... نكون ظاهرين.. وما خايفين ... نعيش ليه ..
ونذوب فيه ..نجاهر للانام بيه
عيونك .. كانوا فى عيوني...
****
نحاول نبرز الاخلاص... وزادنا البهجة والنشوة
نفتح فى قلوب الناس... مشاتل من حنان حلوه ….
نقول ليهم .. نوريهم... معانيه... وأمانيه... ونفخره للجميع بيه..
عيونك كانوا فى عيوني
****
انت أغلى .. من هواك ... من كلام عينيك وسحرك من بهاك ....
من مزايا الرقة عندك من نداك .. من ربيع الدنيا أِرق .. من ضياك..
كنت سابح .. كنت ناعم بى رضاك.. من كلام عينيك وسحرك ..
من بهاك ..
****
يا حبيبى كنت فاكر من زمان ... انى عندك .. وفى فؤادك لى مكان ..
كله طيبه ... وكله دافق بالحنان ... من مشاعر .. ومن موده ..
ومن أمان ...
ومن كلام عينيك … وسحرك من بهاك....
****
كلمونى .. حدثوني... عرفوني... انى زايد فى حنيني ..
وانت لاعب بي شجوني..
وما بتفكر فى سنيني ... وما بهمك حال عيوني .. من دموعى ..
ومن أنيني...
ومن كلام عينيك وسحرك .. من بهاك..
****
قلت ليهم .. يا حببي.. ويا شبابي.. .. انت أغلي …
وانت أكبر من عتابي..
وانت جوهر.. وانت أندر... وانت أبعد من سرابي
... برضى ساير فى طريقك وما بفكر فى عذابي..
ومن كلام عينيك .. وسحرك... من بهاك..
****
يا حبيبي.. قصدى تسعد بى ربيعك... يا ربيعي
.. والبريق الزان شموعك.. من ضلوعى..
ومن كلام عينيك.. وسحرك... من بهاك...
ما غريب....
يا الأندى من طيب الأماسي وأحلى من سحر المغيب
انت زولنا.. ونور حياتنا.. الما بغيب …
ما غريب...
***
انت شبيت فى ديارنا ….
وكنت زولنا وكنت جارنا
يوم تجينا نقول ربيع الدنيا زارنا..
ويوم تخاصم شوقنا ليك بيسقى نارنا …
ما غريب
****
ما حصل بتشوف عيونك ما بنسالم …
ديل عيونك دنيا واسعه.. وديل عوالم
قمره سالت فيها خصلة شعر حالم ….
زار جبينك وزار خدودك كلما تشيله النسايم..
ونحن شلناك فى عروقنا وبرضو تتباعد تخاصم..
يا حبيبنا..
ويا قريبنا.. النادى زى خير المواسم
ما غريب..
***
سمرتك من أرضى من نيلى ، وبلادى
بيك بستوحى المعاني وطلعتك فى الغربة زادى..
وليك سافرت وتعبت ، وكل لحظات من سهادى…
فيها من وحيك..
معانى العزه تتجسم قصادى.. ويا معادى ..
ويا معادى..
ويا سنينى الزاهية فى غمرة جهادى..
ما غريب
ميل يا صباح..
واسكب نداك اللولى فى خدالزهور..
وافرد جناح..
ألوانك البتضوى نور ..
داخل حديقه ترارى زى روق البدور..
ميل يا صباح...
***
الأصفر الخده انجرح من النسيم...
زهرالشواطي الكهرمان أصله الكريم...
فاح وانثنى وفتح العيون...
يا رب يصون...
عقده المنظم زاهى زى عقد النجوم..
ميل يا صباح...
***
شق الملاك أجفانه فى خفه ونزل …
لون الهوى السامى الشريف لون الغزل
عطر الندى المن خده بينقط عسل..
ميل يا صباح
شوف البياض أكمامه زى وش الصباح..
فله العيونه مغسلات بالريحه يرقص كالوشاح..
ضحك النسيم لما انثنى وبي سره باح..
شوف البياض نفض حيوبه الحلوه فاح..
ميل يا صباح...
****
أهديت حبيبي الحشمه باقه وبيها كان..
أجمل من الزهر النضير..
لما ألتمع وجهه المنير..
طوقت حسنه الزاهى بي زهر الحنان..
كل ما الصباح غمر الورود فى الروض وبان
ميل يا صباح
بسمع كلام عنك كتير ..
قالوا غالى.. وقالوا سالى...
مفتكر نفسك أمير...
يا سلام....
****
ولما شفتك وعشت لحظات فى كمالك..
كنت بسرح فى عيونك وكنت بتأمل جمالك
وكان مناى.. تسمح لى يوم أوصف خصالك...
وانت متواضع كتير للبعرفوك..
وانت فعلا فى طبايعك ود ملوك..
يا سلام...
***
يا نسمه فى صيف العذاب..
يا صباح للدنيا يا نور الشباب..
بسمتك ومضة أمل..
كلمتك سالت عسل..
خطوتك غاليه وعزيزه وبرضو يا عالى الجناب..
انت متواضع كتير..
وانت فعلا فى طبايعك زول أمير
… يا سلام...
***
مرتين غنيت عشانك..
مره لى فرحة صباى..
ومره لى تشريف غناى..
وانت يا سيد الزمن ….
برضو متواضع كتير..
وانت فعلا فى طبايعك زول أمير
