السماء الليلة شايلة تب والسحاب اتقلع زي الجبال والشمس غابت وراحت والدنيا امست بدون مساء
والكتاحة قامت ...
وتسمع الكواريك من جوه البيت يااااا ياجنوت اتلموا ماشايفين الهبايب قامت وتسمع كوراك تاني يابت
لمي الهدوم المشروره فوق الحبل ده الهواء مايطيرن وتسمع الغنم يدغن والطيور فرررررر من بين اغصان الشجر
طارت وجات راجعة تاني مالاقية مكان تدسي فيه والغنم لبدت جنب الحيطة القصيرة بتاعة التكل والكديسة
مرة تمشي ومرة تجري ودخلت ف الغرفة تحت العنقريب والجداد كاك كاك اكاك يضرب ف السكليب
وباب الشارع المعمول من برميل موية طاخ يمشي ويجي ويضرب ف حلق الخشب القرب يقع وتسمع تاني صوت امك من جوه ياولد اخوك فلان جاء شكيتو علي الله اكان عاوز يجنني بالكورة دي كدي تاوق ليه برة شوفو مع ولد عرفة اصلهم لو ماجننوني مابرتاحو وصوت الحاج بقطع دعواته عليه يامرة مالك بتدعي ف الجنوت مع المغارب هسع ده وقت بدعوا فيه وشال الابريق واستعجل مشي علي بيت الادب قبال ما الهواء يصل وتسمع لب من فوق الحيطة وتاني لب لببببب اتاريها كورة الجنة ابصنقير جدعة من فوق الحيطة وقبال مايدخل البيت وتمسمع كررررو باب الحوش الانفتح تاني برفسة من رجولو وهو جاري علي الميزرة عشان يشرب ويقطع العطش الاخدو من الجري والرحيح ف الكورة ويجري تاني علي الكورة حقتو يشوته بكل قوتو حتي ترتطم بالحيطة وياخدها ف حضنو ويدخل جوه اوضة الجالوص
مع صيحات امو ياشافع جيت انت لاهبوب بتلمك لامرض اصبرلي النقبضك في يدي دي ....
الليلة الله يمرقنا من الكتاحة دي صوت الوالد وهو راجع م بيت الادب وفي يدو لسه الابريق الذي طالما اصطحبه طول
حياته ولايمكن ان يفرط فيه .. ياولد يامحمد .... اااها ايوه يابوي ... امشي اقفل الباب الخليتو فاتح داه واتكلو بحجر ولاعود
الهبوب ماتقوم توقعوا ...كويس ويجري محمد نحو الباب وهو ينظر للسماء الذي بدأ يتلون بالوان داكنة من الغبار العالق
فيه ويقول الليلة ياحليل حماماتي اكان ماجن لحدي هسع ياربي جن ولاماجن ... وبصوت عالي انت يابت الفلت
ليه قفلتي شباك الحمام هسع دخلن عشان تقفليه ( اختو فاطمة ) ومن جووه هي بتقول خلاص تعال حماماتك المعزبنا بيهن
ديل قبيل جن وقفلت الشباك من الكديس ماياكلن ليك ماكتر خيري كمان
ويدخل محمد الاوضة بعد ان ارتاحت نفسو شويه بعد سماع بان حماماتو بخير وفي قفصهن
ويابوي كدي النطلع بجنبك
وراك عشان اقدر اقفل الشباك ده كويس واحشر لي فيه قطعة قماش باقي اليوم المطرة بتجيكم داخلة بجاي
سمح يا المطرطش بس حاسب ماتوسخ لي عراقي ده
يافاطنة اقفلي الباب ده وجيبي لي بطاريتي والرادي حقي ده جنبي .... سمح يابا وقبل ماتقفل فاطنة الباب
تقول بصوت عالي الليلة والليلة الهبوب جات تب وحممممممرا شديد وهي تتقاوق برة امها خلاص ادخلي لي جوه
شعرك ده بتمليه تراب واتحسست فاطنة ضفائرها وهي بتسمع ف كلام امها لالا انا رابطاهم بطرحة ياامي
وشئياء فشئ تختفي ملامح الرؤية الكانت ف الكون وتعم الفوضي بوصول الكتاحة التي تطرق كلي شئ
ابواب وصوت فحيح جريد النخل وشجر النبق الذي بدأ يتساقط ف الارض من شدة الرياح وكانها بتقول لها
لماذا لم تجودي علي الاطفال الذين تعبوا من التفلق بالطوب والحجارة فيك عشان ياكالوا النبق
سقطت واحدة جنب فاطمة وهي بتدحرج امامه قبل ان تقفل باب الاوضة وهي تمسك بها فرحة
النبق اشتت كلو من الشجرة يامحمد ... محمد صحي وقبل ان يبارح محمد مكانه كي يلحق باخته التي
غاظته باكل النبق المشتت سمع صوت والده خلاص اقعد قبلك وانتي اقفلي الباب ده سريع وادخلي لي جوووه
وبخبطة واحدة قفلت فاطنة الباب واظلمت الغرفة وهي تتحسس مكان طريقها الي عنقريب امها
ولكنها ....
