لعبدلله لديه يقين راسخ بأن البلاد لم تمر عبر تاريخها الطويل بمرحلة أسوأ مما هي عليه الآن في كافة مناحي الحياة حسبكم أن الدولار قد وصل سعره نهار الأمس ثمانية جنيهات وعشرون قرشاً (يعني تمنية ألف وشوية) !
تعالوا معاً نقف على أوضاع (الصحة) في بلادنا كمثال لهذا التردي الذي نعيشه ، ففي مؤتمر صحفي ضم وزير الصحة (مأمون حميدة) ومديري إدارات وزارته تم التصريح بهذه المخالفات :
• ضبط أشخاص ينتحلون صفة طبيب !
• يعني تاني الزول قبل ما الطبيب يكشف غليهو يطلب منو يوريهو مستنداتو (البرضو ح تكون مزورة)
• تسرب الإشعاع من أقسام الأشعة في 16 مستشفى !
• يعني المستشفيات بدل ما تعالج السرطان تجيب ليك سرطان
• الأطباء خلف تعطيل الأجهزة الطبية في المستشفيات العامة
• أهو دي عاوزه ليها فهامة (هم قاصدين يعني وللا عدم معرفة بالتشغيل وللا الفهم شنو بالضبط)؟
• وجود أدوية ومستهلكات طبية منتهية الصلاحية بالمستوصفات
• بالله ده إسمو كلام .. عشان كده الزول يدخل ماشي بي كرعينو ويطلع في (عنقريب) !!
• إستعانة المستوصفات بكوادر أجنبية
• بالطبع الوزارة بتقصد كوادر أجنبية (غير مسجلة) يعني ناس دخلت (الزريبة) دي سااااكت وكمان إشتغلت في الحقل الطبي (شفتو الكلام ده كيف؟) ... بلد سايبه !
• أغلاق مستشفيات خاصة ومستوصفات بسبب إخفاقها في حفظ الدم
• سبحان الله المستوصفات الخاصة التي تطالب أهل المريض بدفع الأمنيات المليونية تخفق في (حفظ الدم) .. ناس ما عندها دم فعلاً
• وجود مؤسسات خاصة غير مرخصة تقوم بإجراء عمليات تحصين !
• (ونحنا نقول ليه بقينا زى الحصين) اليوم كوووولو جارين !!
• وجدود عيادات تجري عمليات جراحية دون تصريح رسمي
• العجب كمان لو العمليات دي بيقوم بيها الأطباء المزورين الفوق ديل تكون المسألة فل الفل
• ضبط مجموعة تضم 34 إختصاصياً يهربون أثناء ساعات العمل الرسمية إلى عياداتهم
• طبعن .. أكيد يمشوا يحصلو (النقاطة) وإن شاء الله المواطن يحصل (أمات طه) !
• وجود 17 معمل فحص تعمل دون ترخيص !
• يعني (كيري) سااااكت .. تجيب ليك كم جهاز (ضارب) .. وبتاع معمل (مزور) ومحاليل فحص (منتهية الصلاحية) وتعمل ليك لافتة مضيئة وأهو لقيت ليك شغل بدل ما تقعد (عاطل) ساكت شايل شهادة (التدريب المهني) وحايم !
• عدم السيطرة على الدخول للمستشفيات العامة مما أضر ببنية الصرف الصحي بالمستشفيات !
• يعني بالعربي كده الناس بتدخل المستشفيات عشان تقضي حاجتها ! طيب الزول (مزنوق) وقدامو مستشفي (يعملا وين) .. طبعن أكيد يقطع تذكرة ويفك زنقتو .. هو لو (الحكومة) وفرت دورات مياه عامة كان ده بيحصل ؟
هذا عزيزي القارئ الكريم بعض مما جاء من مخالفات تم رصدها من قبل وزارة الصحة الولائية للمؤسسات العلاجية الخاصة بولاية الخرطوم .. يعني (العاصمة) .. فتأمل كيف يكون حال الولايات الأخرى يا رعاك الله !
المعادلة عزيزي القارئ تقول أنه بعد رفع الدعم وإرتفاع أسعار اللحوم والفواكه والخضر سوف يتجه (الشعب) إلى البقول وما شابه وسوف تختفي من (جسده) النحيل العناصر الهامة كالبروتين الحيواني والفايتمينات مما يجعله عرضة لكثير من الأمراض تجعله يتجه نحو المستشفيات ليجد أن (الدم) منتهي الصلاحية وأن المعمل يعمل دون ترخيص وأن الأجهزة قد قام بتعطيلها الأطباء وسوف تخترق عظامه الأشعاعات الصادرة من غرف الأشعة وسوف يصرف له دواء (فاسد) وسوف تجرى له عملية جراحية في مكان غير معقم وللا مرخص يجريها له طبيب (مزور) وعندما تسؤ حالته ويسأل ذويه عن مكان تواجد الإختصاصي تأتي الإجابة :
- الإختصاصي ده قبيل طلع من المستشفى ومشي عيادتو !! (ده لو ما كان الإختصاصي ذات نفسو مزور) !!
كسرة :
قال أيه .. من أراد أن تثكله أمه .. شنو كده ما عارف ... يا راجل نحنا كنا فين وبقينا (معاكم) وين ؟ يا عمي رووووح منكم لله !!
كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو وووو)؟
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو)؟
الفاتح جبرا - ساخر سبيل
إستخرج الكلمة الشاذة مما يلي :
1- رفع الدعم – الدائرة - الخط المستقيم – الشكل البيضاوي
2- المستشارون – الخبراء – القطط – المتسولون -
3- الخريف – الموت – الزواج – الإمتحان
4- عربة الإسعاف – عربة التاكسي - عربة المسؤول – عربة النفايات
5- فيل – وحيد قرن – مسئول – حصان
6- الملاريا – الطلقة – تصريحات المسئولين – اللغم
7- المصعد – درجة الحرارة – الطائرة – الأسعار
8- الفيروس – الأميباء – كريات الدم – الرغيفة
9- الكف – المعصم – الكوع - الزند
10- الطائرات – السراويل–الطواقي –العراريق
11- بيت البكا – بيت العرس – بيت الشعر – بيت الأدب
12- الفطور – الشاي – الصلاة – قراءة الصحف
13- البنزين – موية النار – موية الحنفية – موية زمزم
14- الصقعة الكهربائية – الصبغة – سم الفار – التصريحات
15- ماليزيا – البرازيل – الإكوادور – الأرجنتين
16- السجن – المستوصف – المستشفى – الإستاد
17- الأحزاب – الأسمنت – الطوب – الرمل
18- الفتاوى – الفساتين – البناطلين – البساتين
19- برامجنا التلفزيونية – الموبايل - سلك الكهرباء – السوط –
الإجابات :
1- الخط المستقيم .. (عندو آخر) !!
2- القطط (من ناحية أعداد وكده) !
3- الإمتحان لأنه الوحيد الذي لا يأتي فجأتن (الزول بيكون عارف إمتحانو متين)
4- عربة التاكسي لأنها الوحيده فيهم الممكن تقيف ليك
5- الحصان لأنه أقلهم تخانة جلد
6- الملاريا .. بتديك فرصة
7- الأسعار .. الوحيده فيهم كان طلعت ما بتنزل
8- الرغيفة .. يمكن رؤيتها بالعين المجردة (على الأقل لحدت هسه)
9-الكوع .. الوحيد الذي لا يمكن أن تلحسه بلسانك (لحدت هسه .. مين عارف)
10- الطائرات لأنها الوحيده التي نقوم بتصنيعها بينما البقية نستوردهم من الصين (شفتو كيف)
11- بيت البكا .. لأنه الوحيد الذي نناقش فيه السياسة والرياضة وكده
12- قراءة الصحف .. لا تأخذ وقتاً من الموظف أثناء أداء عمله كالأخريات (بس ما يكون فيها كلمات متقاطعة)
13- موية زمزم .. الوحيده الما بتعمل ليك مضاعفات لو شربتها
14- سم الفار .. لا يقتلك على الفور
15- ماليزيا .. الوحيده بينهم التي يعتمد إقتصادها على إستثماراتنا فيها (شئ فنادق وشئ فلل وشئ ما بعرفو شنو)
16- الإستاد .. الوحيد فيهم ممكن تمشي ليهو وتجي راجع !
17- الأحزاب .. كووولهم أداة بناء إلا هي أداة هدم (الكلام ده عندنا بس) !
18- البساتين .. لا يمكن تفصيلها بينما البقية (ممكن)
19- الموبايل .. الوحيد بينهم الـ (ما أداة تعذيب)
كسرة :
(دي كيف؟) : مصر- تونس- السودان- ليبيا !!!
كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو وووو)؟
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو)؟
الحياة بقت صعبة خلاص ولا تحتمل.. اليوم كلو الزول جاري بلا فائدة .. حاجات كتيرة كل يوم تعكنن عليك وتكرهك العيشة.. لازم تعمل ليك (إستراتيجية) عشان شوية الحياة تكون مقبولة وأسهل حبتين.. دى غايتو عشرة نصائح تطنيش.. لو عاوز حياتك تتحسن شوية أسمع كلامى وأعمل بيهم!!
الطناش الاول
طنش إنك كل سنة تسمع حكاية (الخريف فاجأنا) دى .. وحكاية قمنا بتكوين لجنة لدرء (الكوارث) والكلام المقدد القاعد تسمع فيهو ليك (عشرين خريف) ده لأنو لو عاوز تتكلم فى الموضوع ده وتقول للمسئولين إنو الحكاية دى كترتوها ومسختوها وإنو المسألة بقت ما مبلوعة ما ح يسمعو ليك وح يسووا فى القاعدين يسووا فيهو ده وما ح يشتغلو بيك شغلة وح تقوم (تفقع مرارتك) ساكت فأحسن ما تتعب نفسك لأنو السنة الجاية ح يحصل نفس الشىء والخريف ح يفاجىء المسئولين والمطرة ح توقع البيوت والسيل ح يكتل الناس .. صدقنى دى حكاية ما عندها نهاية عشان كده طنش الموضوع ده وما تشغل بيهو دماغك واضرب منو طناش عشان بالك يرتاح!!
الطناش التاني
طنش وما تدفع أى جباية يعنى ح يعملو ليك شنو؟ إعدام مثلاً؟ ح يجرجروك كم (جرجيرة) كده ويحبسوك شويتين وبعدين ح يفكوك يعنى ح يودوك السجن عشان يشربوك ويأكلوك؟ طبعا لا!! هم المسئولين ديل قاعدين يأكلوا ليهم زول!! ما قاعدين ياكلو براهم وكده ..طنش يا زول وأسمع كلامى وما تدفع أى جباية!!
الطناش التالت
طنش أى زول عاوز منك قروش.. مش إنت ذاتك ما عندك ولسة قاعد تتدين؟ طيب ح تجيب ليهم قروش من وين يعنى؟ هل ح تهبط عليك ثروة من السماء عشان تسدد ليهم؟ طبعا لا.. عشان كده طنش الناس الإنت مستلف منهم ديل كلهم وشيلهم من راسك كلو كلو.. وبعدين لو إفترضنا فى واحد فيهم زهج منك وعاوز يمشى المحكمة عشان يشتكيك الحكومة ح تدفعوا رسوم ودمغات وشنو ما بعرف داك أكتر من القروش العاوزا منك ذاتا.. يعنى مش ح يمشى.. عشان كده (طنش) واسمع كلامى!!
الطناش الرابع
طنش إنك تستمع لتصريحات المسؤولين عشان ما يجيك شلل رباعي أو إنسداد في الشريان التاجي المسؤولين ديل أصلو عايشين في كوكب تاني .. غايتو لو ما عملتا بنصيحتي دي أنا ما مسؤول !
الطناش الخامس
طنش الجرايد و الأخبار لأنها كلها كلام يوجع الدماغ!! الإتحاد الأوروبي يرتب لحوار بين الحكومة والمعارضة ... قرب إعلان التشكيل الوزاري المرتقب .. (تشكيل مين يا عم) .. الإتحادي لم ينسحب من الحكومة (ينسحب ؟ في زول يرفض النعمة؟) .. الخطوط الألمانية توقف رحلاتها (المطار الجديد لزومو شنو؟) والعجب الجرائد الإجتماعية.. الفنانه ديك (طلقوها) والمطربة ديك (ضبطوها) .. وقصص وحكاوى إنت فى غنى عنها.. عشان كده (طنش) حكاية الجرائد عشان بالك يهدأ وتروق وكده!!
الطناش السادس
طنش كلام أي مسؤول يقول ليك .. العارف ليهو فساد يجيب مستنداتو .. طنش يا عم ما هم قاعدين يطنشوا في كسراتنا دي سنين وكمان يقولوا ليك (جيب مستندات) !!
الطناش السابع
طنش اي حاجة ح تنكد عليك عيشتك يعني زي مشاهدة التلفزيون والمذيع الكل كلمة والتانية يقعد يقهى ليك فى (سقف الأستديو) ويكتل ليك فى عينو و(يغرودهم) ليك وإلا مقدم البرنامج القاعد يسأل الضيف ويجاوب قبالو.. ولازم تطنش كمان مشاهدة الإعلانات او الإستماع إليها.. طنش عشان ما يجيك ضغط أو ينفجر فيك عرق .. طنش السخافات دى عشان تعيش!
الطناش التامن
لو كنت ما متزوج طنش أسطوانة أهلك بتاعت (ما تعرس إنت منتظر شنو) ؟ أو (فكر فى موضوع العرس وخليهو فى بالك) !! لأنو هم ما عارفين الفى بالك!! ولو كانو عرفو الفى بالك ما كانو جابو ليك السيرة دى من أساسو .. طنش يا عم هو ناس مثنى وثلاث ورباع ديل خلو ليكم حاجة تعرسوها؟ ما عزلوا (النوار)
كلو !! .. وكمان ما خلو ليكم حاجة تعرسو بيها ما شالو (الضحاكات) كووووولها !!
الطناش التاسع
لو كنت متزوج طنش النقة بتاعت (المرا) وما تشتغل بيها شغلة عشان ثبت علميا إنو (النقة) بتعمل إلتهاب فى صمام (العصب القولونى المترالى) وأنها تورث الفقر وإنت ما ناقص (فقر) وكفاية الفقر العليك كمان تقوم تجيب ليك معاهو (نقة) !! أسمع الكلام وطنش (نقة المرا) وأضرب (طناش) عشان ما تمشى (الإنعاش) !
الطناش العاشر
طنش الطناشات الفوق دى كلها وما تشتغل بيها شغلة لأنى إتلفت كده وكده وحكيت رأسى عشان ألاقى ليا موضوع أكتب فيهو قمت ما لقيت والوكت زنقنى وناس الجريدة كل دقيقة يتصلو فينى ويسألونى: يا أستاذ ما رسلت المادة مالك؟ فقمت (نجرت) موضوع (الطناش) ده .. فطنش الطناشات الفوق دى كلها وما تشتغل بيها.. احسن ليك!!
كسرة :
هو الواحد بالله يطنش شنو؟ وللا شنوو؟ وللا شنوووووووووووو !!
كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو وووو)؟
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو)؟
كنا عندما نجأر بالشكوى من إرتفاع أسعار السلع والخدمات الضرورية كالوقود والخبز والمواصلات كان الرد عند المتعاطفين مع طيب الذكر (المشروع الحضاري) جاهزاً :
- ما كنتو قاعدين تبيتو في الطلمبات .. نسيتو الزحمة والصفوف ؟
وعلى الرغم من أن هذه الإجابة إجابة فطيرة لا تستند إلى أي منطق أو عقل إلا أن محدثك لا يعطيك الفرصة لدحض حجته أو حتى مناقشته فيها بل (يمسك ليك) في حكاية الندرة و(المبيت والصفوف) متناسياً عمداً أن سلعة (الوقود) كمثال قد تضاعف سعرها مئات المرات !
يبدو أن الأمور ذاهبة في إتجاه (الندرة) مع (الغلاء) إذ تشهد اجزاء واسعة من ولاية الخرطوم نذر أزمة حادة في الخبز ، وعادت في معظم الاحياء ظاهرة (الصفوف) ديك (ذاااتا) على الرغم من أن سعر (الرغيفة) قد تضاعف عشرات بل مئات المرات خلال الأربعة وعشرين عاماً الماضية !
العبدلله يرى أن المشكلة ليست مشكلة خبز أو وقود أو خلافه .. المشكلة هي مشكلة فشل في إدارة الدولة فبينما لا تستطيع الدولة توفير النقد الأجنبي لإستيراد القمح فإنه لا يمر أسبوع أو أسبوعين إلا و(تستضيف ليها) عاصمتها مؤتمراً دولياً (يكلفها الشئ الفلاني) ولك عزيزي القارئ ان تعلم أن (الدولة) قد إستضافت مؤخراً مؤتمراً لمنبر النساء الأقليمي لنساء البحيرات العظمى (إسمو كده) .. وعلى الرغم من أن العبد لله لا يعلم (نحنا تبع ياتو بحيرة) لكنه يعلم علم اليقين باننا في أشد الحوجة لـ(النقد الأجنبي ) الذي صرف في تذاكر السفر والطيران والإقامة لأعضاء هذا المؤتمر (الغريب) !
لأننا ما عندنا نقد أجنبي يكفي لإستيراد (القمح) من الخارج فلازم نستتورد (التقاوي) ونزرع أرضنا .. هذا ما سبق أن صرح به وزير الزراعة (عبد الحليم المتعافي) في يونيو/حزيران الماضي إذ قال بأن البلاد تستورد 1.5 مليون طن من القمح سنويا وقد أشار حينها إلى وجود سعي لتقليص هذه الكمية من خلال منح المزارعين المحليين أسعارا أفضل لشراء محاصيلهم لتحفيزهم على زيادة إنتاجهم !
وتم إستيراد (تقاوى تركية) – تركية ليه ما تعرفش- وبيعها للمزارعين بواسطة البنك الزراعي بعد أن تم إستكتابهم تعهداً بالسداد وقاموا بزراعة (التقاوى) غير انها لم تنبت ، (فاسدة وكده) ! .. (سوف يذهب مستوردها إلى ماليزيا مستثمراً وعريساً بينما يذهب المزارع إلى السجن حبيسا) !
وإنهار الموسم الزراعي لهذا العام وبدأت كل الجهات ذات الصلة بهذه التقاوى (تتنصل) من المسؤولية وتم تكوين العديد من لجان التقصى والتحقيق (والشنو ما عارف) والتي سوف تميط اللثام بإذن الله عن كل العناصر المشاركة في (العملية) ما عدا الجهة (الفاسدة) التي قامت بإستيرادها !
والمضحك المبكي (حقيقة) تصريحاً قرأته بالأمس للسيد رئيس قطاع البنك الزراعي بولاية الجزيرة يقول فيه بأن اللجان الفنية التي قام البنك فرع الولاية بتكوينها لفحص تقوى القمح التركية ستفرغ من أعمالها غد الثلاثاء (يعني اليوم) !
المضحك المبكي في الأمر أن البنك قد قام بشراء وإستلام (البضاعة) ثم باعها للمزارعين دون أن يقوم بإجراء الفحوصات اللازمة ليتحقق من سلامتها ومعرفة إن كانت صالحة أم لا .. يعني البنك يشترى (بقروش هذا الشعب المكلوم) بضاعة وما يكلف نفسو يشوفا ضاربة؟ صالحة؟مغشوشة .. بالله ده إسمو كلام ؟ .. لا وأيه .. بعدما ثبت (بيان بالزرع) إنها فاسدة يقوم البنك بعملية الفحص كما صرح مسؤول البنك ... (هات الحبوب يا ولد) !
العبد لله بحث في كل قواميس اللغة ليجد له كلمة تقال في هذا الموضع فلم يجد .. إنظر رعاك الله كيف يتم التلاعب (بدم باااارد) بقوت وأموال إنسان هذا البلد المحروم البائس الفقير الما عارف يلاقيها من وين وللا من وين ..
ختاماً العبدلله لا يطالب بكشف ومحاكمة المتورطين في إستيراد هذه التقاوى الفاسدة فلنا في كشف ومحاكمة المتورطين في بيع (خط هيثرو) عظة وعبرة (وواوات وكده) .. فأصحاب المشروع الحضاري (الفيهم إتعرفت) والقصة بقت هايصة والفساد بقى شئ عااادي.. صحيح والله (من أمن العقوبة ساء الأدب) ده لو فضل فيها أدب !!
كسرة :
يقولون أن التقاوى فاسدة ... برضو هي الفاسدة !! بالمناسبة العارف ليهو فساد يجيب (الوثائق) !!
كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو وووو)؟
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو)؟OR="Navy"][/color]
