المريخ اليوم يتوثب المجد بزراعه الطويل ويخرس ابواق الحسد والتخذيل
فرحة لاعبي المريخ بالتتويج (1)
السلام عليكم ورحمة الله تعال وبركاته
اخوة المنتدى الكرام
الصفوة العالميين انتم الاوائل
الهلالاب ….. سبحان الله الواحد من يطراكم الاصفار تجي بدون سبب ……..
شايف نشاطكم مكثف وحماسكم زايد شوية ..
كانوا ضربوا ليكم البروجى بتاع الصحيان البدرى والعميان جاي وشايل المكسر ..
اتفقوا فى حسد المريخ ..
جقلبة وبكاء وعويل وممارسة سيئة لسياسة التخذيل ..
نعم هو المريخ ..
يصنع لكم الاحداث ..
ويقود الكرة السودانية من فتح لاخر ..
حقق البطولات .. وبنى منشأته واستاد عالمى جلب لامثالكم الفخر باستضافة مباريات وبطولات ما كانت لتكن ..
وترككم تحاولون مجاراته ..
واليوم يقف التاريخ شاهداً على فتح جديد للكرة السودانية بمقابلة الزعيم لبطل العالم فى حدث تحسده عليه كل ادارات الاندية فى العالم لما فيه من مكاسب ادارية وفنية ومعنوية جمة .. يصبوا اليها الجميع وكل من يود طرق ابواب العالمية والاضواء ..
المريخ ينقل السودان الى العالمية
نتيح لكم الافتخار بانكم تجاورون هذا النادى السعيد ..
نحن نفتح بوابة الامل امام لاعبينا بالظهور امام العمالقة ونترك لكم الفرجة ..
بس اتفرجوا من سكات ..
يتمنى كل لاعب افريقي فى هذه اللحظة لو انه حظي بهذه الفرصة .. ويقينى ان هناك لاعبون زرق ايضا يتمنون ذلك .. خصوصا ولدنا ..
نحن بوابة ومعبر لكل من يريد العالمية ..
وتانى عشان اللاعب نسجلو .. المفروض يدفع قروش
المريخ يصنع لكم الحدث .. لكن مشكلتكم ما بتستفيدوا
نحن نقودكم الي العالمية رويدا رويدا ..
فقط استفيدوا من تجربتنا ..
وبطلوا حسادة …. وتخذيل
يخوض الاهلة هذه الايام حملة قوية جدا ضد المريخ
حملة اساسها الحقد ليس الا ..
اتكلموا عن الفضيحة .
ونسالهم اين الفضيحة اذا انهزمنا فى مباراة ودية امام بطل العالم باي نتيجة !!!
وهل الفضائح فى الكرة تكون فنية ام ادارية واخلاقية !!!!!!
تحدثوا عن شراء المقابلة .. وعن النتيجة ايضاُ..
وفضحوا انفسهم وكشفوا جهلهم بكيفية اجراء مثل هذه المقابلات بين الاندية الكبري .. ولهم العذر بالتاكيد فى هذا الامر ..
قلنا ليكم حاولوا استفيدوا …
اعادوا اسطوانة حق الفقراء والمساكين والشعب .. ونسوا حجم المال الحكومى الذى دخل ناديهم مع المجلس الجديد ومن قبله البرير ايضاً .. وسدادهم المفاجئ لدائنى الامس .. واليوم ..
حتى تصريح غوارديولا( بانو ما سمع بالمريخ ) ..
وجدوا فيه الضالة التى يبحثون عنها ..
كأن غوارديولا كان يعرف الهلال فى يوم من الايام ..
يكفينا انو عرف الان انو فى فريق اسمو المريخ ..
انتو موقعكم وين …؟؟
الفرق الكبري ما بتقابل من طرف ..
عندنا انجازات وارقام .. واسمنا مدون فى السجل الذهبي وابطال والحمد لله ..
لدينا واجهة ادارية مشرفة وبنية تحتية ممتازة ..
انتو ياكافى البلا .. يوصفوكم بي شنو !!!!!
لا ماضى لا حاضر
يقابلوكم كيف بس !!!!!!!
فى الختام ..
واصلوا فى حملتكم المخزية ..
لانو بصراحة كده بنتفائل بيها
وبنستمتع شديد بانو فى حراك رياضى واعلامى بسبب المريخ
فعلاً .. نصنع الاحداث ونترك بكم الفرجة وردود الافعال
بقلم (الكاسر32) عضو منتديات كورة سودانية[/justify]